1. Lá nkilika Mateo 7:13, 14, lá wopo wɔkɔnge okokaso ntepela ente tolekɔ lá lɔkɛndɔ?

ISANKFUMƆ tolekɔ lá lɔkɛndɔ. Okoma wɔ lɔkɛndɔ lɔso nde, ntɔsɛna l’andja wa bango walekɔ l’anse k’ɛlɔndjɛlɔ kɛ ngandji kɛ Yehova. Lofu la lofu, iso mponaka djɛ nkilika mboka kɛ lowiko. Koko etengo Yeso ndatepela, mboka kɛkɔ kelekɔ daambi edjinge lá win’ɛmɔtshi, wolo ndjingela l’eteyi. (Wala Mateo 7:13, 14.) Ladjikɛnde tolekɔ anto wa n’tshamba djɛ ndjɔ, alekɔ wɔdju leso dj’iso mvunga mboka kɛkɔ.​—Nga. 6:1.

2. Kɛkɔnge k’ekaso lɔ lá djamba djɛnɛ? (Lenda edjinge ipapango: “ Okitshakitshɛ ntokotshɛka djɛ nangha etshikitano.”)

² Ntsha iso nkɔpaka ntshikala lá mboka kɛ daambi ketá lowiko, iso ladjɛ ndjala entshupa djɛ nangha etshikitano lá tokanyi, lá ndjalelo, edjinge lá nanghedji ndjɛso. Ɔpɔstɔlɔ Poolo akeketshɛka Akristo witansɛki lá Kɔrɛtɔ dj’iwɔ nkindjɛ ‘nangha etshikitano.’ (2 Kɔ. 13:11) Dako n’tshɔ ndendanaka edjinge l’iso. Lá djamba djɛnɛ, tongeka wopo wɔ Bible okokande ntokotshɛ dj’iso nkindjɛ nangha etshikitano edjinge wopo wɔ tolongo tombotshunda lá nyuma okokawɔ ntokotshɛ dj’iso ntshikala lá mboka ketá lowiko. Tɔngɛna lonkina wina wɔkɔnge okokawɔ ndjala okakasano leso dj’iso nkilika ɛlɔndjɛlɔ kime olonghanyelo wɔ Yehova. L’ekomo, tɔngɛna wopo wɔ okitshakitshɛ okakawɔ tokotshɛ, djɛ nangha etshikitano ipa ntshutshɛ osasa wɔso l’olemo wokambelaso Yehova.

3. Kɛkɔnge kɛ Otepela wɔ Ndjambe okokawɔ ntonanghela?

³ Apalekɔ wɔdju leso djɛ nshishima tokanyi edjinge mposɛ yɛso. Ladjikɛnge? Ladjikɛnde oloko wolekɔ lokeso efula, edjinge alekɔ wolo leso dj’iso ndjewa tampe okokande ntɔtɔla. (Jɛr. 17:9) Alekɔ wɔdju dj’iso ndaadjimba isɔmɛlɛ la ‘tokanyi t’ongolo.’ (Dja. 1:22) Djɛkondeke, iso ladjɛ nkambaka  l’Otepela wɔ Ndjambe djɛ ndaashishima. Otepela wɔ Ndjambe ndjisolaka kɛnɛ kelekɔ l’anse k’ololoko wɔso ‘tokanyi edjinge mposɛ’ y’oloko wɔso. (Heb. 4:12, 13) Lá lɛdji lonkina, Otepela wɔ Ndjambe wolekɔ entengo mashinyi wɔ rɛyɔ-X, ntokotshɛka djɛ ndjisola kɛnɛ kelekɔ l’eteyi. Koko iso ladjɛ ndjala l’okitshakitshɛ ntsha tɔkɔpa mba wapɔ má alako w’owaso má Bible kana m’enkambi wa Ndjambe.

4. Kɛkɔnge kɛnyɛ djɛ Nkfumi Saolo ayɛka ndoyala mpame k’otako?

⁴ Ndjɔmbɔmba kɛ Nkfumi Saolo ntɛnyɛka kɛnɛ kekoka ntokomela wina wosambaso okitshakitshɛ. Saolo ayɛka ndoyala l’otako efula, atonaka ntshikitanyɛ tokanyi tɔnde edjinge nanghedji djɛnde. (Yee. 36:1, 2; Aba. 2:4) Kɛsɔ keyɛka ndɛnama papoo wina wɔ Yehova ndapɛyɛ Saolo ɛlɔndjɛlɔ kɛ ndjɔ m’ɔkɔngɔ wɔnde ndjaka ase Amalɛka. Koko, Saolo, atalɛmɛyɛ Yehova. Edjinge wina wɔ ɔprɔfɛta Samwɛlɛ ndoshimela nyɛtshi kindananghe, Saolo atawola omvunga wɔnde. Koko, nde ayasambelaka djɛ nyɛnyɛ ante, nde atanangha ovunga w’ekekete, edjinge nde amamaka anto ankina lowo la nyɛnyɛ djɛ, iwɔ ndeke lontshindisa djɛ nangha n’kambo djɛsɔ. (1 Sa. 15:13-24) Saolo ananghaka n’kambo djɛ nghɔsɔ ntondo. (1 Sa. 13:10-14) N’kambo dj’okiyano nde, nde awolaka dj’oloko wɔnde ndjala l’otako. Nde atatshikitanyɛ tokanyi tɔnde, ndjɛkondeko Yehova ndopangola edjinge ndokandjɛ.

5. Olakanyelo wɔkɔnge wokokaso mba má ndjɔmbɔmba kɛ Saolo?

⁵ Djɛ mba olakanyelo má ndjɔmbɔmba kɛ Saolo, iso ladjɛ ndawopola weepó wɛnɛ: ‘Wina wowalami alako wim’Otepela wɔ Ndjambe, lemi mponaka donga dj’ipa nkamba la kɛnɛ kowalami? Lemi mponaka djɛ ndasambela djɛ nyɛnyɛ ente, kɛnɛ konaghami kepalekɔ nsɔsɔlɔ nyɛtshi? Lemi langohonake mama anto ankina lowo?’ Ntsha nsakiso kɛso lá weepó wenyi oyɛwɔ nde ɛɛ, mbɔ ngo iso ntshikitanyɛ tokanyi tɔso edjinge nanghedji djɛso. Ntsha lako, oloko wɔso nkoka ndoyala l’otako, ko Yehova ndotokadjɛ dj’ipa iso ndjala tolongo tɔnde.​—Dja. 4:6.

6. Kɔpɛyɛ otshikitano wolekɔ l’antenyɛ Nkfumi Saolo la Nkfumi Davidɛ.

⁶ Kolenda otshikitano wɔlekɔ l’antenyɛ Nkfumi Saolo nya mpɛna kɛnde Nkfumi Davidɛ, mpame kɛkɔpaki ‘ɛlɛmbɛ wɛ Yehova.’ (Yee. 1:1-3) Davidɛ ewaki ante, Yehova mbikɛka anto walekɔ l’okitshakitshɛ koko ntonaka anto wafudjɛ apɛka. (2 Sa. 22:28) Ndjɛkondeke Davidɛ awolaki djɛ ɛlɛmbɛ wɛ Ndjambe ntshikitanyɛ tokanyi tɔnde. Nde afunaka ante: ‘Lemi langolumɛka Yehova kanga lɔpɛyisa dako. Ayale kaanga l’otsho, tokanyi tɔmi tɔ m’eteyi nsembolaka lemi.’​—Yee. 16:7.

7. Kɛkɔnge k’isongonangha ntsha tomboyala l’okitshakitshɛ?

⁷ Ntsha tolekɔ l’okitshakitshɛ, tongawola Otepela wɔ Ndjambe ntshikitanyɛ tokanyi tɔso, lá ntondo k’iso nangha nyɛtshi. Otepela wɔ Ndjambe wolekɔ ngete djoyi djetoshimela ante: ‘Mboka kekinɛ. Nyɔkɛndɛ l’eteyi.’ Iwɔ ntewolaka wina w’ɔkɔpaso mvunga mboka, tá womɛ lɔwɔ kana tá wadjɛ lɔwɔ. (Iza. 30:21) Má ndjokala Yehova, tongowaka wapɔ efula. (Iza. 48:17) Ndjɔmbɔmba, topangoyala la nsɔnyi wina w’anto ankina otosembolawɔ. Edjinge tongoyala entshupa la Yehova ladjikɛnde nde ntɔsaka entengo wana wande.​—Heb. 12:7.

8. Etengo Djakɔbɔ 1:22-25 ɛnyɛwɔ, wopo wɔkɔnge okokaso nkamba l’Otepela wɔ Ndjambe etengo ilendjeyɛ?

⁸ Otepela wɔ Ndjambe koka ndjala leso etengo ilendjeyɛ. (Wala Djakɔbɔ 1:22-25.) Efula l’anteyi kɛso ndjalendaka l’ilendjeyɛ lá ntondo kɛ mposa má mvulu. Nghɔsɔ ndeke, okokaso nyɛna ntsha alekɔ ndjonyi ndaalɔngɔsɔla lá ntondo k’anto ntɛɛna. Wopo wɔkɔ ɔmɔ ndeke wina wowalaso Bible lofu la lofu, iso nyɛnaka wopo wokokaso ntshikitanyɛ tokanyi edjinge djalelo djɛso. Efula nkɔpaka mbala vɛrse yɛ  lofu la nkɛsɛ lá ntondo kɛ mposa má lopango. Lá nangha nghɔsɔ, iwɔ ntshikaka djɛ kɛnɛ k’iyowalaki ndjapemela tokanyi tɔwɔ. Masɔ, lá lofu l’ontondo iwɔ mponaka topo tɔ nkamba l’alako wimá Otepela wɔ Ndjambe. Lonkina, iso ladjɛ ndjala la nonghanyi kɛ wɔlɔ kɛ ndjekaka, mbalaka edjinge ntɔnɔlaka má Otepela wɔ Ndjambe lofu la lofu. N’kambo n’tshɔ, nyɛnamaka etengo m’palekɔ la ntshina, koko dekɔ l’anteyi k’akambo waleka ndjonyi w’oyɛso ladjɛ nangha djɛ ntokotshɛ djɛ ntshikala lá mboka kɛ daambi ketá lowiko.

9. Lá wina wɔkɔnge wokoka ilongo nkosembola?

⁹ Ombotateyɛka nkɛnda lofu lɔmɔtshi lá mboka kekowangoyɛ la Yehova? (Yee. 73:2, 3) Ntsha ilongo yɛko imɔtshi yembotshunda lá nyuma awaka oloko wolo wɔ nkosembola, wɛ owekameyɛka edjinge okambaka la dako djɛnde? Ntsha nghɔsɔ, mbɔ onanghaka wɔlɔ, edjinge ape l’ehamo wɛ oyalaka la djedjɛ efula te ilongo yɛko yɛsɔ, má ndjewo kɛnde.​—Woo. 1:5.

10. Kɛkɔnge k’okokɛ nangha ntsha ilongo yɛko ambokɔpɛyɛ dako?

¹⁰ Otepela wɔ Ndjambe ntovungolaka ante: ‘Mpota yɛmbɔkɔkɔta ilongo yelekɔ n’kɔmano.’ (Woo. 27:6) Lá wopo wɔkɔnge n’kambo n’tshɔ oyɛwɔ nsɔsɔlɔ? Kɔsa ndjɔmbɔmba kɛnɛ: Ɔkɔpa ndjopa ontayimbo woheta etuka efula, ko ombila yimba lá telefɔnɛ kɛko. Wina wingotakɛnde l’ontayimbo ipa la ndenda tá ntondo, mbala kɛkɔ kɛmɔ ilongo yɛko ambokokota lá lɔwɔ ko ambokosepa la wolo djɛ nkimɛ m’ontayimbo. Wopo wɔ ndokosepaki la wolo lá lɔwɔ, ambokohotandjɛ, koko má nkosepa l’isasimoyɛ ambokohandjɛ dj’ipa wɛ mpela otuka. Kaanga mpota kɛkɔ kɛngɔkɔpɛyɛ olando lá etsho efula, wɛ ongomala lá wopo wɔ ndokosepaki? Lako! Koko wɛ ongoyala la djedjɛ lá okotshɔ wɔnde. Wopo wɔk’ɔmɔ ndeke, ntsha ilongo yɛko ambokewoyɛ djɛ etepela wɛko kana nanghedji djɛko m’palekɔ la djokanelo l’ɛlɛmbɛ wɛ djɔ wɛ Ndjambe, wɛ ongoka yɛnyi má bango. Koko totonake dako djɛnde kana nyomala. Angoyala etengo n’kambo dj’enkesa. (Los. 7:9) Koko yala la djedjɛ, lá wopo wɔ ndombowa oloko wolo wɔ nkoshimela.

11. Kɛkɔnge kekoka ntshinda onto djɛ ntona dako djɛ wɔlɔ dj’ime ilongo?

¹¹ Kɛkɔnge kekoka ntshinda onto djɛ ntona dako dj’ime ilongo yɛ ngandji? Otako. Anto w’etako, nkɔpaka ngo kɛnɛ ‘kesasangɛ atoyi wawɔ.’ Iwɔ ‘ndjipaka atoyi wawɔ dj’ipa ndjekameyɛ akambo wa nsɔsɔlɔ.’ (2 Ti. 4:3, 4) Iwɔ nkanelaka ambɔ, wapalekɔ la djonyi dj’alako ladjikɛnde walekɔ la balo kana walekɔ djonyi ndeka anto ankina. Koko, ɔpɔstɔlɔ Poolo afunaka ante: ‘Ntsha onto ɔmɔtshi ndaawɔsaka djɛ nde alekɔ la djonyi, koko alekɔ onto wɔ totoko, nde ayaadjimba.’ (Nga. 6:3) Nkfumi Salɔmɔna apakisolaka n’kambo n’tshɔ wɔlɔ. Nde afunaka ante: ‘Wɔna w’ɔmvɔ wolekɔ la balo ndeka ekokolo kɛ nkfumi k’enkesa, kanga lopalekɔ lonkina la balo djɛ ndjekameyɛ ndjewo.’​—Los. 4:13.

12. Etengo Ngalatiya 2:11-14 otepelande, olakanyelo wɔkɔnge w’owaso má ndjɔmbɔmba kɛ ɔpɔstɔlɔ Pɛtɛlɔ?

¹² Kolenda ndjɔmbɔmba k’ɔpɔstɔlɔ Pɛtɛlɔ, wina w’ɔpɔstɔlɔ Poolo ndoshimela akambo papo papoo lá n’tshandjawala djɛ ndosembola. (Wala Ngalatiya 2:11-14.) Pɛtɛlɔ akokaka ndjoka Poolo nkɛlɛ lá kɛnɛ kindoshimela, wopo windoshimela, edjinge etena k’indasɔnɛ djɛ ndoshimela. Koko Pɛtɛlɔ ayalaka la balo. Nde awolaka dako djɛ Poolo edjinge atolamela onkomba. L’ɔkɔngɔ, nde ayɛka ndeta Poolo ante, ‘wɔnanyɔ wɔ ngandji.’​—2 Pɛ. 3:15.

13. Kɛkɔnge koyɛso ladjɛ nama lá wɔngɔ wina wɔpɛyɛso anto ankina alako?

¹³ Ntsha ɛna ente, wɛ ladjɛ mpɛyɛ ilongo yɛko imɔtshi dako, akambo wakɔnge woyɛ ladjɛ nama lá wɔngɔ? Lá ntondo kɛ wɛ nsawola  nya ilongo yɛko, yawopola ente: ‘Sii kɛmi ‘kembotamba elelo’?’ (Los. 7:16) Onto wolekɔ la sii kembotamba elelo, ndomboyɛka anto ankina, má ɛlɛmbɛ wɛnde nyɔmɛlɛ, koko ape wɛ Yehova edjinge nde apayalaka la djandji. Ntsha m’ɔkɔngɔ wɔ wɛ ndaashishima nghɔmɛlɛ, ɔmbɛna ente alekɔ ngo djonyi nsawola nya ilongo yɛko, shimelande n’kambo djɛkɔ edjinge kamba la weepó djɛ ndokotshɛ djɛ nde ndjewa djɛ kɛnɛ konanghande kelekɔ nyɛtshi. Yaashikikɛ djɛ kɛnɛ kotepelɛ ndɔsama má Afunelo, edjinge vungɔ ente, opalekɔ l’odjito wɔ wɛ ndomboyɛ winako, koko wɔ ndakotshɛ djɛ ndjoka wopo wɔ Yehova oyawokande lá kɛnɛ konanghawɔ. (Ɔrɔ. 14:10) Kamba la balo dj’ima Otepela wɔ Ndjambe, edjinge wina wolakɛ onto, okola nkɛtshi kɛ Yeso. (Woo. 3:5; Mat. 12:20) Ladjikɛnge? Ladjikɛnde Yehova angotonanghela akambo ngo ngete onanghelaso anto ankina.​—Dja. 2:13.

14. Kɛkɔnge kɛ olonghanyelo wɔ Ndjambe otoposeyɛnde?

¹⁴ Yehova ntɔlɔndjɛka lá mboka ketá lowiko má lotshimbo lɔ etenyi kolonghanyelo kelá looko, ketoposeyɛ enkanda, tovidɛo edjinge nsanghanyɛ yetokotshɛ djɛ nkamba l’alako wotanaso má Otepela wɔ Ndjambe. N’kete n’tshɔ dekɔ djɛ ndjɛkɛ oloko, mande ndɔsama m’Afunelo. Wina wɔ Iloyi yɛ lɔndjɛ ɔsawɔ akano walendana l’olemo w’ipoposanyɛ, iwɔ ndawɛkɛka lá nyuma k’ekina. Kaanga oyɛwɔ nghɔsɔ, Iloyi yɛ lɔndjɛ nkalɔka ndenda akano wasɔ lonkina djɛ ndenda kana alekɔ djonyi nangha etshikitano. Lamo? Mande ‘akambo waposa l’andja wanɛ watatshikitana,’ edjinge olonghanyelo wɔ Ndjambe ladjɛ ndjekesanela l’etshikitano wɛ bango wɛsɔ.​—1 Kɔ. 7:31.

15. Okakasano wɔkɔnge woyalisa l’ansakodji amɔtshi?

¹⁵ Ape l’ehamo, wina w’owaso elembetshelo wɛ bango lá kɛnɛ kelendana l’elakanyelo wemá Bible, kana ɛlɔndjɛlɔ ɛmɔtshi lá ɛlɛmbɛ welendana la nanghedji, iso ndjawolaka edjinge nkambaka lawɔ. Ko kɛkɔnge k’onanghaso wina wɔ olonghanyelo wɔ Ndjambe onaghawɔ etshikitano l’akambo amɔtshi walendana la lowiko lɔso? Ndjɔmbɔmba, lá ɛnɔnyi emangha wemboheta, lofulo lɔ nfalanga l’opikelo edjinge l’ɔwɔngɛlɔ wɔ n’tena dj’ɔtɛmwɛlɔ lohandaka efula. Djɛkondeke, Iloyi yɛ lɔndjɛ ɔsaka nonghanyi kɛ, n’tshumano efula mpenghanyɛka Mvulu kɛmɔ k’Onkfumi. Eposelo weyalisa má n’kambo n’tshɔ nde, n’tshumano efula wasanghanaka edjinge Amvulu y’Onkfumi efula isadjemaka. Ko, nfalanga yewayemisa ikotshɛka  djɛ mpika Amvulu y’Onkfumi l’ewila wepalekɔ l’okfudji. Ntsha oyɛ nde l’owila wiyosadjɛ Amvulu y’Onkfumi edjinge wɔ n’tshumano efula iyasanghana, okokaka ndjala l’okakasano wɔ ndjekesanela la n’kambo n’tshɔ. Ansakodji amɔtshi watateyɛka n’tshɔ otale djɛ t’ingela nsanghanyɛ. Ankina wakambisa la wolo djɛ mpika kana mbɔngɛ Mvulu k’Onkfumi wakokaka ndjawopola lamo iyakoke nsadjɛ Mvulu k’Onkfumi. Wayawokaka etengo watshutshɛka welo wɛwɔ kana wina wɛwɔ nghotoko. Koko, kaanga oyɛwɔ nghɔsɔ, iwɔ wawolaka etshikitano wɛsɔ edjinge wɛdje djɛ mba djedjɛ.

16. Lamo nkamba la dako dj’otanaso lá Kɔlɔsɛ 3:23, 24 otokotshɛwɔ djɛ ndjala l’osasa?

¹⁶ Tongokindjɛ ndjala l’osasa ntsha iso mvungɔka ente, Yehova ndeke okambelaso edjinge nde ndeke lɔlɔndjɛ olonghanyelo wɔnde. (Wala Kɔlɔsɛ 3:23, 24.) Nkfumi Davidɛ ɛnyɛka ndjɔmbɔmba kɛ wɔlɔ wina windapɛyɛ epapɛyɛ wɛ mpika tɛmpɛlɔ. Nde atepelaka ante: ‘Lemi oyɛmi na, edjinge owila wɔmi oyɛwɔ na dj’iso ndjala l’akoka wa mpɛyɛ epapɛyɛ wɛ nghɔnɛ? Mande n’kete nkfumɔ oyɛwɔ nde mewɛ edjinge tɔmbɔkɔpɛyɛ ngo kɛnɛ keyisa m’ɛwɔ wɛko.’ (1 Ɛk. 29:14) Edjinge iso, wina wɔpɛyɛso epapɛyɛ tolekɔ mpɛyɛ Yehova ngo kɛnɛ keyɛ m’ɛwɔ wɛnde. Kaanga oyɛwɔ nghɔsɔ, Yehova ndjalaka l’osasa efula wina wɔpɛyɛso wina wɛso, wolo wɔso, edjinge n’kete djɛso djɛ nsuka kɛnɛ kɔkɔpande nangha.​—2 Kɔ. 9:7.

17. Lamo isopakoke ndɛmba ntsha tɔmbɛna ente iso ladjɛ ndjatshikitanyɛ l’akambo amɔtshi?

¹⁷ Djɛ ntshikala lá mboka kɛ daambi ketá lowiko, isankfumɔ ladjɛ nkilika djina djɛ Yeso wɔlɔ wɔlɔ. (1 Pɛ. 2:21) Ntsha ɔmbɛna ente ndɔmbamaka djɛ wɛ nangha etshikitano, tɔlɛmbake. Ɔsɔ alekɔ ilembetelo yɛ wɔlɔ y’ɛnyɛ djɛ wɛ nkɔpaka nkilika ɛlɔndjɛlɔ kɛ Yehova. Vungɔ ente Yehova ndjewaka djɛ tolekɔ anto wa n’tshamba djɛ djɔ, nde apatɔlɔmbɛ dj’iso ndjokola Yeso lá djɔ.

18. Kɛkɔnge koyɛso ladjɛ nangha djɛ nkotshɛ okoma wɔso?

¹⁸ Nyontshɔ isakfumɔ tile yimba l’etsho weyaye edjinge toyale entshupa djɛ nangha etshikitano lá tokanyi, lá nanghedji edjinge lá djalelo djɛso. (Woo. 4:25; Luka 9:62) Toyale l’okitshakitshɛ, ‘tokindjɛ nsasanga, tonanghe etshikitano.’ (2 Kɔ. 13:11) Ntsha tombonangha nghɔsɔ, ‘Ndjambe kɛ ngandji edjinge kɛ vu angoyala [laso].’ Edjinge Nde angotokotshɛ djɛ ndjala l’osasa má wina wɔnɛ edjinge l’etsho weyaye, lowiko l’etshinda l’andja wa bango.