1. Muyile Mateo 7:13, 14, mu mushindo kinyi watudi mu lwendo?

ATWE boso twi mu lwendo. Atwende na kepatshila ka kukatwela mu nsenga ipya mu bukunkushi bwa Yehowa. Efuku dyoso, tukwete kwitatshisha bwa ku twela mwishinda aditwala ku muwa. Anka bu bibaadi bibyakule Yesu, dino eshinda ndipela na ingi nsaa bi bukopo kwimutambukila. (Badika Mateo 7:13, 14.) Bu byatudi bakutwe kupwidika, mbibofule bwatudya kutuuka mu dino eshinda.​—Nga. 6:1.

2. Nkinyi kyatutaluula mu uno mwisambo? (Tala dingi kashibo akamba’shi: “ Kwiyisha akwitukwasha bwa kushintuula mweneno etu.”)

² Su atukumiina kutambukila mu kashinda kapela akatwala ku muwa, abitungu tushintule ngyelelo etu a binangu, bintu byatudi bafule na byatu’shi bafule, na bikitshino byetu. Mpoolo baadi munyingishe bena Kidishitu ba mu Kodinda bwabadya kutungunuka na “kukumiina malango.” (2 Kod. 13:11, NWT) Dino elango nditutale mpa natwe. Mu uno mwisambo, atutaluula mushindo wi kwitukwasha Bible bwa kushintuula mweneno etu, na bi kwitukwasha bileshesho bya ba kuuku be buwa, bwa kutambukila mwishinda aditwala ku muwa. Atumono nsaa yabidya kwitwelela bukopo bwa kulonda bukunkushi bwa ndumbulwilo a Yehowa. Atutaluula dingi bilombene kwitukwasha kwiyisha bwa kushintuula mweneno etu kushi kushimisha muloo wa kufubila Yehowa.

3. Eyi dy’Efile Mukulu ndilombene nkukwasha naminyi?

³ Ta mbibofule bwatudya kutaluula binangu byetu na byatupusha. Bwakinyi? Mwanda eshimba dyetu ndilamalama na mbilombene kwitwikela bukopo bwa kutundula kyaditutakula mu kukita. (Yel. 17:9) Mbibofule bwatudya kwidimba na “binangu bi bubi.” (Shak. 1:22, NWT) Nyi bwakinyi abitungu  tufubishe Eyi dy’Efile Mukulu bwa kwitaluula. Eyi dy’Efile Mukulu ndilombene nkwitukwasha bwa kutundula ki munda mwetu, kwamba’shi ‘kusokola nkalo na mitentekyesho bifwame’ mu mashimba etu. (Eb. 4:12, 13) Eyi dy’Efile Mukulu di nka bu kyamo kya Échographie, mwanda aditukwasha bwa kutala bi munda. Anka abitungu twikale beyishe bwa kutumikila malango e mu Bible na abetupa kwi baba abetukunkusha.

4. Nkinyi akilesha’shi Mufumu Saule bafikile muntu sha kwitatula?

⁴ Kileshesho kya Mfumu Saule akilesha kilombene kukitshika nsaa yatushi beyishe. Saule babangile kwitatula mu mushindo ushibadi mpa na akumiina’shi, mulombene kushintuula ngyelelo aye a binangu na bikitshino byaye. (Mis. 36:2, 3; Aba. 2:4) Bino bibadi bimwekye patoka nsaa ibadi Yehowa mulungule Saule kyadya kukita kunyima kwaye kutshokola bena Amaleke. Anka Saule tabadi mukookyele Yehowa nya. Na nsaa ibadi mutemuki Samwele mumulungule pabitale kukutwa kwaye kwa kukookyela, Saule bapelele kukumiina kilubilo kyaye. Pamutwe pa kukumiina kilubilo kyakye, Saule bakwile’shi ka mwanda kapela na dingi bantu nyi abekalanga bantakule bwa kwibikita. (1 Sam. 15:13-24) Saule tabadi mupwe kukita ungi mwanda wi bino kumpala. (1 Sam. 13:10-14) Bi malwa, mwanda balekyele kwitatula mwishimba dyaye. Tabadi mushintule ngyelelo aye a binangu, nyi bwakinyi Yehowa badi mumusumbushene.

5. Kileshesho kya Saule akitulongyesha kinyi?

⁵ Su tatukumiina kwikala bu Saule, abitungu twiyipushe ino nkonko: ‘Nsaa yambadika malango e Mwiyi dy’Efile Mukulu, na kimbaa kwibingisha bwa kupela kwiatumikila su? Napwandjikisha’shi bino bya nkwete kukita tambikambe kwikala bubi su? Nasumbwila bangi kilumbu bwa bya nkwete kukita su?’ Su lwaluulo lwi’shi oolo, sunga ku lumune lwa ku ino nkonko, abitungu tushintule ngyelelo etu a binangu na bikitshino byetu. Su tatwibebikite, eshimba dyetu adiitatula na Yehowa etupele bu ba kuuku baye.​—Shak. 4:6.

6. Lesha kwilekena kwi pankatshi pa Mfumu Saule na Mfumu Daavide.

⁶ Tala kwilekena kwi pankatshi pa Saule na muntu badi mumupyane; Mfumu Daavide badi mufule “eyi dya Yehowa.” (Mis. 1:1-3) Daavide badi auku’shi Yehowa apashaa bantu beyishe, anka mushikwe basha kwitatula. (2 Sam. 22:28) Nyi bwakinyi, Daavide badi atadila Eyi dy’Efile Mukulu bwadidya kushintuula ngyelelo aye a binangu. Bafundjile’shi: “Natumbula Yehowa mwanda kwetu kumpa elango. Sunga mbufuku, nnangunangu yande aindjimunâ.”​—Mis. 16:7, EEM.

7. Nkinyi kyatukitshi su twibeyishe?

⁷ Su twibeyishe, atutadila Eyi dy’Efile Mukulu bwadidya kushintuula binangu bi bubi kumpala kwatudya kukita myanda i bubi. Eyi dy’Efile Mukulu adikala nka bu aditulungula’shi: “Talai eshinda dyanudya kulonda. Ndjîdi.” Aditudimusha nsaa yatukyebe kupambuka bwa kwenda ku mboko ibalume sunga ku ibakashi. (Yesh. 30:21, EEM) P’atutemeesha Yehowa atupete myabi i bungi. (Yesh. 48:17) Bu kileshesho, takwi muntu afiki mu kwitupa malango bwa’shi bitukalakashe. Na atunyisha kwifubwila peepi na Yehowa mwanda atuuku’shi etwata bu bana baye badi mufule.​—Eb. 12:7.

8. Muyile Shake 1:22-25, mushindo kinyi watudi balombene kufubisha Eyi dy’Efile Mukulu bu lumweno?

⁸ Eyi dy’Efile Mukulu di nka bu lulweno. (Badika Shake 1:22-25.) Be bungi bakwatudi, abetalaa mu lumweno kumpala kwabadya kutuka. Bino abitukwasha bwa kumona su kwi mbalo ayitungu’shi tulumbuule kumpala kwa’shi bangi beyimone. Mu mushindo umune, nsaa yatubadika Bible efuku dyoso, twi kumona mishindo i bungi yatudi balombene kushintula  ngyelelo etu a binangu na bikitshino byetu. Be bungi abamonaa’shi, bi buwa kubadika kifundwe kya kwifuku nakashika oso kumpala kwa kuutuka. Abatadila bibabadika bwabidya kwikala na bukitshishi mu ngyelelo abo a binangu. Paapa, munkatshi mwa dyadya efuku dyoso, abakimbi mishindo yabadi balombene kufubisha dyadya elango dya mu Bible. Na dingi, abitungu twikale na programe akwibadikila efuku dyoso na kunangushena byabya bibatubadika Mwiyi dy’Efile Mukulu. Bino ta mbibofule nya, anka kino nyi kimune kya ku bintu abintungu’shi tukite bwa kutambukila mu kashinda kapela akatwala ku muwa wa loso.

9. Nsaa kinyi ilombene kuuku obe kukupa malango?

⁹ Tobodi mubangye kukita kintu kibadya kulwisha kipwano kyobe na Yehowa su? (Mis. 73:2, 3) Su kuuku obe badi munyingye eshimba bwa kukulanga, bodi muteemeshe na kutumikila elango dyaye su? Su bodi mumuteemeshe, bodi mukite mwanda wi buwa na we na lutumbu, mwanda badi mukulangye.​—Nki. 1:5.

10. We mulombene kukita kinyi su kuuku obe akupa malango?

¹⁰ Eyi dy’Efile Mukulu aditutentekyesha’shi: “Kuku ôbe p’akutopeka sunga byakutapa kwishimba, alêsha kishima [lulamato] kyê kodi.” (Nki. 27:6, EEM) Bino abipushisha kinyi? Tubande kwata kino kileshesho: Pwandjikisha’shi okyebe kusambuka kilayi ki myotoka i bungi, na kinangu kyobe ki ku telefone. Binobino, tobanga kusambuka kushi kutala. Musango umune, kuuku obe bakukaka ku mboko bwa nkwalusha. Nsaa ibakukaka, mboko ibakwele busungu, anka bino bibakwasha bwa’shi tabakusanyanga kwi motoka. Sunga mboko yakwela busungu munda mwa mafuku e bungi, mwanda wa’shi mukukakye bi bukopo, wekumufitshila munda su? Nya! Wekala na lutumbu bwa bukwashi bwaye. Mu mushindo umune, su kuuku obe akudimusha’shi ngakwilo obe sunga bikitshino byobe, ta mbipushene na miiya ya kululama y’Efile Mukulu, mbilombene nkutapa kwishimba. Anka tomufitshilanga munda. Su bwebikitshi, nyi kukutwa kwa kinangu. (Mul. 7:9) Anka, ikala na lutumbu mwanda kuuku obe banyingy’eshimba bwa nkulungula byanka.

11. Nkinyi kilombene kutakula muntu bwa kupela kupusha elango di buwa dya kuuku aye?

¹¹ Nkinyi kilombene kutakula muntu bwa kupela kupusha elango di buwa dya kuuku aye? Nkwitatula. Bantu ba sha kwitatula abakumiina kupusha myanda ‘ayibasangasha ku matwi. . . . Abapele kuteemesha bya-biinyibiinyi.’ (2 Tim. 4:3, 4) Abapwandjikisha’shi ta be na lukalo lwa malango na’shi abo be na binangu na mbakile bangi bantu. Mpoolo mutumiibwa bafundjile’shi: “Su muntu kapanda eeata bu muntu mukata, aye shii kintu, eedimbi aye nabeene.” (Nga. 6:3) Mfumu Salomone badi mupushishe uno mwanda kalolo. Bafundjile’shi: “Nsongwalume e na binangu sunga ekala mulanda, mukile mfumu tádi mununu, mupatakane, shakyebânyi kupusha malango.”​—Mul. 4:13, Ñono na malango.

12. Muyile Beena-Ngalatea 2:11-14, nkinyi kibatulongyela ku kileshesho kibadi kitulekyele Mpyeele mutumiibwa?

¹² Tala kileshesho kitulekyele Mpyeele mutumiibwa nsaa ibadi Mpoolo mumupe elango munkatshi mwa bantu. (Badika Beena-Ngalatea 2:11-14.) Mpyeele badya kukwatshila Mpoolo nsungu bwa elango dibadi mumupe na mbalo ibadi mumupele dyanka. Anka Mpyeele badi na kingangu. Tabadi mukwatshile Mpoolo nsungu sunga kutungunuka na kwibinangushena, anka badi muteemeshe elango dyaye. Mafuku kunyima, atemuna Mpoolo bu “mukwetu a kifulo.”​—2 Mp. 3:15, EEM.

13. Myanda kinyi ayitungu’shi tutentekyeshe kumpala kwa kupa muntu elango?

 ¹³ Su okyebe kupa kuuku obe elango, myanda kinyi ayitungu’shi otentekyeshe? Kumpala kwa kwisamba naye eyipushe’shi: ‘Nee “mululame bikishekishe” su?’ (Mul. 7:16) Muntu mululame bikishekishe atshibilaa bangi biimu kushii muyile miya ya Yehowa, kadi muyile yaye’ye nabene na t’ekalaa na lusa. Su kunyima kobe kwitaluula bomono’shi abitungu wesambe na kuuku obe, uuka mwanda kalolo na omwele nkonko ayimukwasha bwa kutundula kilema kyaye. Ikala mushinkamishe’shi byabya byokula, mbimene mu bifundwe, na ntentekyesha’shi twe na bushito bwa kutshibila kuuku obe kiimu nya, anka mukwashe bwadya kuuka bi mweneno a Yehowa pabitale kyakwete kukita. (Lom. 14:10) Fubisha Eyi dy’Efile Mukulu, na ambula lusa lwa Yesu nsaa y’olanga muntu. (Nki. 3:5; Mat. 12:20) Bwakinyi? Mwanda Yehowa etukitshina myanda mu mushindo watukitshinaa bangi.​—Shak. 2:13.

14. Ndumbulwilo a Yehowa kwete kwitupa bintu kinyi?

¹⁴ Yehowa kwete kwitukunkusha mwishinda aditwala ku muwa, ku bukwashi bwa ndumbulwilo aye kwete kwitupa ma video, mikanda na bisangilo abitukwasha bwa kutumikila malango e Mwiyi dyaye. Bino byoso mbya kukulupila mwanda mbimene mu bifundwe. Nsaa i Kasaka ka Bakunkushi-Bakulu akata bitshibilo pabitale mushindo wi buwa wa kukita bulungudi, akateka bukwashi bwa kikudi kiselele. Sunga mbyabya, Kasaka ka Bakunkushi-Bakulu akataluula nsaa yoso bitshibilo byako bwa kumona su kwi mbalo ayitungu kushintuula. Bwakinyi? Mwanda “Bya pano pa nsenga abikidi sunga’shi abishintuluka.” Nyi bwakinyi abitungu ndumbulwilo a Yehowa akite myanda muyile nshalelo e kwanka.​—1 Kod. 7:31.

15. Lukalakashi kinyi lukwete kupeta bangi balungudi?

¹⁵ Kushi mpaka, nsaa i ndumbulwilo a Yehowa etupatulwila mpushisho mupya a malongyesha a mu Bible sunga kwitupa mayi a kulonda pabitale mwikelo, atwiakumiina na kwiatumikila. Byabya, twikukita kinyi nsaa i ndumbulwilo a Yehowa ashintula myanda i na bukitshishi mu nshalelo etu? Bu kileshesho, mu bipwa bishale, kwibaka na kulumbuula ma mbalo a lulangwilo akwikalanga kwate makuta e bungi ngofu. Nyi bwakinyi, Kasaka ka Bakunkushi-Bakulu kabadi kate kitshibilo kya’shi, tukongye twi bungi, tufubishe Nshibo ya Bufumu imune. Pa mwanda wa byabya, tungi tukongye tubadi tusangibwe na angi Mashibo  a Bufumu nkupanyibwa. Makuta abadi atukye, abadi beafubishe bwa kwibaka Mashibo a Bufumu mu ma mbalo a badi nao lukalo ngofu. Su we mushale mbalo yabadi bapane Mashibo a Bufumu, na yabadi basangye tukongye, mbilombene nkwikela bukopo bwa kubiila kuno kushintuluka. Bangi balungudi tabatambuka kipindji kila bwa nkatwela mu bisangilo. Bangi abadi bafube ngofu bwa kwibaka na kulumbuula Mashibo a Bufumu, bakwete kwipusha bwakinyi bakwete kwiapana. Abepusha’shi nsaa na bukome byabekalanga batushe, mbyende mu bisumanga. Anka, mbalombene lutumbu ngofu, mwanda mbakumiine kuno kushintuluka.

16. Elango di mu Beena-Kolose 3:23, 24, aditukwasha naminyi bwa kulama muloo wetu?

¹⁶ Atulama muloo wetu nka su atutentekyesha’shi tukwete kufubila Yehowa na’shi kwete kukunkusha ndumbulwilo aye. (Badika Beena-Kolose 3:23, 24.) Mfumu Daavide mwitulekyele kileshesho ki buwa nsaa ibadi mutushe makuta bwa kwibaka kwa ntempelo. Bakwile’shi: “Ami na mwilo wande twi banyi naamu bwatudy’a kwikala na matalwa a kulambula bintu bino? Byooso abifiki koodi, dingi kyooso kyatudi bakupe akifiki kwiyaasa dyoobe.” (1 Mya. 29:14) Natwe namu, atwalwisha Yehowa bintu byadi mwitupe. Sunga mbyabya, Yehowa asankilaa nsaa, bukome, na bintu byatutusha bwa kukwatshishena mudimo waye.​—2 Kod. 9:7.

17. Bwakinyi t’abitungu tubofule kwishimba nsaa y’atushintula mweneno etu?

¹⁷ Bwa kushala mu kashinda kapela akatwala ku muwa, abintungu atwe boso twambule kileshesho kya Yesu. (1 Mp. 2:21) Su omona’shi abitungu oshintule mweneno obe, tobofulanga kwishimba. Kino nyi kitundwilo ki buwa akilesha’shi okumiina kulonda bukunkushi bwa Yehowa. Tutentekyeshe’shi Yehowa auku’shi twi bantu bakutwe kupwidjika, nyi bwakinyi tatengyela’shi twambule kileshesho kya Yesu bu bantu bapwidjikye.

18. Nkinyi akitungu’shi tukite bwa kukumbasha kepatshila ketu?

¹⁸ Tutumeyi atwe boso binangu byetu ku myanda ayifiki kumpala na twikale na bukidi bwa kushintuula ngyelelo etu a binangu, bintu byatudi bafule na byatushi bafule, na bikitshino byetu. (Nki. 4:25; Luk. 9:62) Twikaleyi nka na kwiyisha na ‘tutungunukye na kwikala na muloo, na kukumiina malango.’ (2 Kod. 13:11, NWT) Su tubakitshi bino, “Efile Mukulu a kifulo na butaale ekala [netu].” Etukwasha bwa kwikala na muloo kubanga binobino na aketupa muwa wa loso mu nsenga ipya.