1. Soleki fa Mateyus 7:13, 14 e sori, dan na tapu sortu pasi wi e waka?

WI ALAMALA de na pasi e go na a nyun grontapu pe Yehovah o tiri. Ibri dei wi e pruberi fu tan na tapu a pasi di o meki wi kisi têgo libi. Soleki fa Yesus taki, dan a pasi smara èn son leisi a muilek fu waka na en tapu. (Leisi Mateyus 7:13, 14.) Fu di wi na sondusma, meki makelek wi kan komoto na a pasi disi.​—Gal. 6:1.

2. San wi o luku na ini na artikel disi? (Luku a faki tu di nen „ Sakafasi e yepi wi fu tan na tapu a smara pasi”.)

² Efu wi wani tan na tapu a smara pasi, dan wi musu de klariklari fu kenki wi denki nanga a fasi fa wi e tyari wisrefi. Na apostel Paulus ben gi Kresten di ben e libi na ini Korente a deki-ati fu tan ’kenki den denki’ (2 Kor. 13:11). Wi musu gi yesi na a rai disi tu. Na ini na artikel disi wi o luku fa Bijbel kan yepi wi fu tyari kenki kon èn fa mati di de lepi Kresten kan yepi wi fu tan na tapu a pasi fu libi. Wi o luku tu san kan meki en muilek gi wi fu teki a rai di na organisâsi fu Yehovah e gi. Wi o si fa sakafasi kan yepi wi fu tan dini Yehovah nanga prisiri awinsi wi musu tyari kenki kon.

3. Fa Gado Wortu kan yepi yu?

³ Fu san ede a kan muilek gi wi fu kenki wi denki nanga a fasi fa wi e firi? Fu di wi ati kan kori wi. Dati meki wi no man frutrow en (Yer. 17:9). Makelek wi kan kori wisrefi nanga „prakseri di no tru” (Yak. 1:22). Dati meki wi musu gebroiki Gado Wortu fu ondrosuku wisrefi. Gado Wortu e sori krin „san wan sma e denki na ini en ati èn san a abi na prakseri fu du” (Hebr. 4:12, 13). Ma wi musu  abi sakafasi fu man teki a rai di wi e kisi fu Bijbel èn fu den wan di e teki fesi.

4. Fa wi du sabi taki Kownu Saul ben kon abi heimemre?

⁴ Na eksempre fu Kownu Saul e sori san kan pasa te wi no abi sakafasi. Fu di Saul ben abi heimemre, meki a no ben wani si taki a ben abi fu tyari kenki kon (Ps. 36:1, 2; Hab. 2:4). Disi kon na krin di Yehovah taigi Saul san a ben musu du baka te a ben wini den Amalèksma. Ma Saul no gi yesi na Yehovah. Èn di a profeiti Samuel go taki nanga en, Saul ben feni taki a no ben meki wan fowtu. A taki dati a sani di a ben du no ben bigi so èn taki na a pipel ben meki a du en (1 Sam. 15:13-24). Wan pisi ten na fesi Saul ben trangayesi Yehovah kaba (1 Sam. 13:10-14). A sari taki Saul meki en ati kori en. Fu di a no kenki en denki, meki Yehovah piri-ai gi en èn a no ben feni en bun moro.

5. San wi kan leri fu Saul?

⁵ Efu wi no wani abi heimemre neleki Saul, dan wi musu aksi wisrefi: ’Te mi e leisi Bijbel mi e feni taki a rai na ini a no gi mi? Mi feni taki a sani di mi e du no ogri so? Mi e gi tra sma a fowtu?’ Efu a piki tapu iniwan fu den aksi disi na „iya”, dan wi musu kenki wi denki. Efu wi no du dati, dan wi ati kan kori wi èn wi kan kon abi heimemre. Disi o meki taki Yehovah no o si wi moro leki en mati.​—Yak. 4:6.

6. Fa Kownu David ben de heri tra fasi leki Kownu Saul?

⁶ Kownu David ben de heri tra fasi leki Kownu Saul fu di a ben lobi „a wèt fu Yehovah” (Ps. 1:1-3). David ben sabi taki Yehovah e kibri den sma di abi sakafasi, ma taki a no lobi den sma di abi heimemre (2 Sam. 22:28). Dati meki David ben meki Gado Wortu kenki en denki. A ben skrifi: „Mi o prèise Yehovah, a Gado di gi mi rai. Iya, te neti mi niri piri-ai gi mi.”​—Ps. 16:7.

7. San wi o du efu wi abi sakafasi?

⁷ Efu wi abi sakafasi, dan wi o meki Gado Wortu kenki iniwan fowtu denki di wi abi, fosi den meki taki wi go du sani di no bun. Gado Wortu o de leki wan sten di e taigi wi: „Disi na a pasi. Waka na tapu.” A o warskow wi efu wi e bigin komoto na a pasi (Yes. 30:21). Te wi e arki Yehovah, dan dati o tyari furu wini kon gi wi (Yes. 48:17). Fu eksempre, wi no o kisi syen fu di tra sma no o abi fu gi wi piri-ai. Boiti dati, wi o tron moro bun mati fu Yehovah fu di wi o si taki a lobi wi.​—Hebr. 12:7.

8. Te wi e luku san Yakobus 1:22-25 e taki, dan fa Gado Wortu de leki wan spikri?

⁸ Bijbel kan de leki wan spikri gi wi. (Leisi Yakobus 1:22-25.) Furu fu wi e luku na ini wan spikri ibri mamanten, fosi wi komoto na oso. Te wi e du dati, dan wi e si san wi musu kenki fosi tra sma si wi. Na so a de tu taki te wi e leisi Bijbel ala dei, dan wi o si sortu kenki wi musu tyari kon na ini a fasi fa wi e denki nanga a fasi fa wi e tyari wisrefi. Furu brada nanga sisa e leisi a deitekst ibri mamanten, fosi den komoto na oso. Den e luku fa den sani di den leisi kan yepi den fu kenki den denki. Èn a heri dei dati den e luku fa den kan gebroiki a rai fu Gado Wortu. Wan tra sani di wi musu du, na fu meki ten fu leisi Gado Wortu ibri dei èn fu denki dipi fu san wi leisi. Disi na wan fu den moro prenspari sani di wi musu du fu man tan na tapu a smara pasi fu libi.

9. O ten wan bun mati o abi fu gi yu rai?

⁹ Oiti yu bigin du wan sani di ben kan pori yu matifasi nanga Yehovah? (Ps. 73:2, 3) Efu wan bun mati ben abi a deki-ati fu kon taki nanga yu, dan yu arki en èn yu teki a rai fu en? Efu yu du dati, dan yu du a yoisti sani èn a no de fu taki dati yu breiti taki a mati fu yu kon taki nanga yu.​—Odo 1:5.

10. San yu musu du efu wan mati kon taki nanga yu fu wan sani di yu no e du bun?

¹⁰ Gado Wortu e taki: „Den soro di wan mati e meki, na fu a bun fu yu” (Odo 27:6). San disi wani taki? Luku na agersitori disi: Kon meki wi taki dati yu e wakti fu abra wan druk strati, dan yu telefon e bigin bari. A sani disi e puru yu prakseri èn yu e waka go na tapu a pasi sondro fu luku. Leki fa yu bigin waka, wan mati e grabu yu anu hori, dan a e hari yu kon baka na seisei. A grabu yu hori so steifi, taki a e hati yu anu. Ma toku a sani di a du meki taki wagi no naki yu. Awinsi yu anu e hati yu wan tu dei langa, yu ben o atibron taki yu mati grabu yu hori? Nôno! Yu ben o breiti taki a yepi yu. Na so a de tu taki, efu wan mati taigi yu taki a fasi fa yu e taki noso wan sani di yu e du no e kruderi nanga Bijbel, dan dati kan hati yu. Ma no atibron fu di a gi yu rai èn no firi wan fasi tu. Dati ben o de wan don sani (Preik. 7:9). Na presi fu dati yu musu breiti taki yu mati ben abi a deki-ati fu taki nanga yu.

11. San kan meki taki wan sma no teki a rai fu wan bun mati?

¹¹ San kan meki taki wan sma no teki a rai fu wan bun mati? Dati na heimemre. Sma di abi heimemre lobi en te sma e „taki sani nomo fu switi den yesi”. Den ’no wani arki a tru leri’ (2 Tim. 4:3, 4). Den e denki taki den no abi rai fanowdu fu di den feni taki den koni noso prenspari moro trawan. Ma na apostel Paulus ben skrifi: „Efu wan sma e denki furu fu ensrefi, aladi a no de noti, dan a e kori ensrefi” (Gal. 6:3). Kownu Salomo ben taki en heri moi. A ben skrifi: „Wan pôti pikin di koni, betre moro wan owru kownu di don èn di no e arki moro te a e kisi rai.”​—Preik. 4:13.

12. San wi kan leri fu na apostel Petrus te wi e luku san skrifi na Galasiasma 2:11-14?

¹² Prakseri san na apostel Petrus du di na apostel Paulus ben piri-ai gi en na fesi tra sma. (Leisi Galasiasma 2:11-14.) Petrus ben kan mandi fu a fasi fa Paulus taki nanga en èn a ben kan mandi tu taki Paulus piri-ai gi en pe tra sma ben de. Ma Petrus ben koni. A teki a rai èn a no ben hori Paulus na ati. Bakaten a ben kari Paulus en „lobi brada”.​—2 Petr. 3:15.

13. San wi musu hori na prakseri fosi wi gi wan sma rai?

¹³ Efu yu si taki a de fanowdu fu gi wan mati rai, dan san yu musu hori na prakseri? Fosi yu go taki nanga yu mati, dan aksi yusrefi: ’Mi e „denki taki mi na a moro bun sma di de”?’ (Preik. 7:16) Wan sma di e denki taki a bun moro trawan no e krutu sma soleki fa Yehovah e krutu sma èn nofo tron a no abi sari-ati. Efu yu prakseri bun fu san ede yu wani gi yu mati rai èn yu si taki a de fanowdu ete fu go taki nanga en, dan sori en krin san na a problema. Poti aksi tu fu yepi en fu frustan taki a sani di a du no bun. Sorgu taki den sani di yu e taki e kruderi nanga  Bijbel èn hori na prakseri taki yu mati no musu gi frantwortu na yu, ma na Yehovah (Rom. 14:10). Hori na prakseri tu taki yu no musu frutrow tapu yu eigi frustan, ma tapu Gado Wortu di abi koni rai (Odo 3:5). Boiti dati, neleki Yesus yu musu sori taki yu e frustan fa yu mati e firi (Mat. 12:20). Fu san ede? Bika a srefi fasi fa wi e libi nanga trawan, na a srefi fasi Yehovah o libi nanga wi.​—Yak. 2:13.

14. Fa Gado organisâsi e yepi wi?

¹⁴ Yehovah e gebroiki a pisi fu en organisâsi di de na grontapu fu yepi wi fu tan na tapu a pasi fu libi. Den e meki felem nanga buku èn den e seti konmakandra di e yepi wi fu du san wi leri na ini Gado Wortu. Ala den leri di wi e kisi komoto na ini Bijbel. Te den brada fu a Tiri Skin musu bosroiti san na a moro bun fasi fu du a preikiwroko, dan den e meki a santa yeye tiri den. Toku ten na ten a Tiri Skin e luku efu den musu kenki son bosroiti di den ben teki. Fu san ede? Fu di „sani na grontapu e kenki” èn dati meki na organisâsi fu Gado musu fiti ensrefi na den nyun situwâsi.​—1 Kor. 7:31.

15. Sortu kenki di na organisâsi tyari kon meki sani moro muilek gi son preikiman?

¹⁵ Te na organisâsi e fruklari Bijbel leri tra fasi noso te den e sori wi fa wi musu tyari wisrefi, dan wi de klariklari fu gi yesi na den. Ma san wi e du te son kenki di na organisâsi e tyari kon e meki son sani moro muilek gi wi? Fu eksempre, na ini den yari di pasa a kon moro diri fu bow konmakandra presi èn fu sorgu den. Dati meki a Tiri Skin bosroiti taki so furu gemeente leki a kan, musu gebroiki a srefi Kownukondre zaal. A sani disi meki taki wan tu gemeente ben tron wán gemeente èn son Kownukondre zaal seri. Den brada gebroiki a moni disi fu bow Kownukondre zaal na tra presi pe a de tranga fanowdu. Efu yu e libi na wan presi pe den sani disi e pasa, dan kande yu feni en muilek fu fiti yusrefi na a nyun situwâsi. Son preikiman musu teki wan moro langa pasi now fu go na den konmakandra. Trawan ben wroko tranga fu bow noso fu sorgu wan Kownukondre  zaal, ma now den no man frustan fu san ede a zaal seri. Kande den firi leki den lasi den ten nanga den krakti. Toku den e fiti densrefi na a nyun seti disi èn wi e prèise den fu dati.

16. Te wi e du san skrifi na Kolosesma 3:23, 24, dan fa dati o yepi wi fu tan prisiri?

¹⁶ Wi o tan abi prisiri te wi e hori na prakseri taki wi e wroko gi Yehovah èn taki na en e tiri na organisâsi fu en. (Leisi Kolosesma 3:23, 24.) Di Kownu David ben gi moni fu horibaka gi a bow fu a tempel a ben taki: „Na yu gi wi ala san wi abi èn na den sani di yu ben gi wi, na dati wi e gi yu baka. Sobun, suma na mi èn suma na a pipel fu mi, taki wi man gi yu den sortu presenti disi?” (1 Kron. 29:14) Te wi e gi moni fu horibaka gi a wroko fu Yehovah, dan neleki David wi e gi Yehovah san de fu en kaba. Toku Yehovah e warderi en te wi e gebroiki wi ten, wi krakti nanga den gudu fu wi fu horibaka gi a wroko fu en.​—2 Kor. 9:7.

17. Fu san ede yu no musu lasi-ati te yu si taki yu musu tyari kenki kon?

¹⁷ Efu wi wani tan na tapu a smara pasi, dan wi alamala musu waka soifri na Yesus baka (1 Petr. 2:21). Efu yu si taki yu musu tyari kenki kon, dan no lasi-ati. Disi na wan bun sani fu di a e sori taki yu wani taki Yehovah tiri yu. Hori na prakseri taki Yehovah no e fruwakti taki wi leki sondusma o man du ala sani soifri soleki fa Yesus ben du dati.

18. San wi musu du fu kisi têgo libi?

¹⁸ Meki wi alamala luku go na fesi èn meki wi de klariklari fu kenki wi denki nanga a fasi fa wi e tyari wisrefi (Odo 4:25; Luk. 9:62). Tan abi sakafasi, ’tan de nanga prisiri èn tan kenki yu denki’ (2 Kor. 13:11). Efu wi e du dati, dan „a Gado fu lobi èn fu freide o de nanga [wi]”. A o yepi wi fu de nanga prisiri now èn fu kisi têgo libi na ini a nyun grontapu.