1. Kukoonkana ni lileembo lya Mateo 7:13, 14, juu ya ki kunti twalanda nangue tuli mu bulendo?

FWE bonse tuli mu bulendo. Kitukebele mu bulendo bwetu, ni kufika mu kyalo kya leenu kyakatungululua na Leeza weetu wa ntono. Kila busiku tuli twaikwinda kwenda mu nzila ili yatwala ku bukose. Inzi, nga vyaalandile Yesu, ezio nzila ni ya kanfinenkezia, kabili musita kampanda ili yasaangua yakolele kuikoonka. (Soma Mateo 7:13, 14.) Te tupuililikile, pakaako kilengele kufuma mu ezio nzila.​—Bag. 6:1.

2. Ni kiki kituli kumona mu leeli lyasi? (Mona ni kisanduku, “ Kwikeefia Kuli Kwatukwasia Kusiala mu Nzila ya Kanfinenkezia.”)

² Kine tutonene kusiala mu nzila ya kanfinenkezia ili yatwala ku bukose, tupalile kwitabila koololua ao kukita bupilibuko mu malanga etu, mu bintu bituli twatona ao bitusiizi kutona, ni mu bikitua byetu. Mutumua Paulo waabakinkiziizie Bakristu ba mu Korinto batwalilile ‘kuya baololua.’ (2 Bakor. 13:11, NWT) Ozo musoko uli wabomba ni kuli fwefue. Mu leeli lyasi tuli kulondoluela Bibilia viili kuviinda kutukwasia kukita bupilibuko, kabili kine babibuza bakosele kimupasi kunti batukwasia siani kusiala mu nzila ili yatwala ku bukose. Kabili tuli kumona musita ukili kyasaangua paange kyakolele kukoonka butunguluzi buli bwaleetua na kuteania kwakue Yehova. Tuli kumona mibeele ya kwikeefia viili kutukwasia kupilibuka bila kuzeezia nsaansa yeetu musita utuli mukumubombela Yehova.

3. Mulandu Wakue Leeza kunti wakukwasia siani?

³ Musita utuli twaezia kutoosia malanga etu ni vituli twaiunvua, tuli twasaakaana ni buavia. Mutima weetu uli watubeepa, kabili keekio kunti kyalengia kikole kumana kuukebele kututwala. (Yer. 17:9) Kilengele kwibeepa fwe beene. (Yak. 1:22) Pakaako, tupalile kubombia Mulandu Wakue Leeza eevi kwitoosia  fwe beene. Mulandu Wakue Leeza uli walangilila vili aali yeetu ya mukati, “mapange ni malanga” ali mukati ka mutima weetu. (Baeb. 4:12, 13) Mu nzila kampanda, Mulandu Wakue Leeza uli wabomba nga kipiimo kya radio kili kyakwasia kumona bintu bili mukati mubili. Inzi, eevi tuviinde kunoonkela mu masoke ali afuma mu Bibilia ao atuli twapeelua na balupua bali batungulula, tupalile kwikeefia.

4. Ni kiki kilangiliile nangue Likolo Sauli waalukile muntu wa kibuli?

⁴ Mufuano wakue Likolo Sauli uli walangilila kintu kili kuviinda kukitika kine te twikefiizie. Sauli waalukile ni kibuli saana mpaka waakeene kwitabila nangue waali wapalile kwalulula malanga ni bikitua byakue. (Malum. 36:1, 2; Hab. 2:4) Keekio kyaamwenekele paswetele musita Yehova lwaamupeele Sauli malaizio palua keelia kyaali wapalile kukita kisia kubakanda Baamaleki. Inzi, Sauli taamunakiile Yehova. Ni musita Samweli lwaaile kumulanda kilubo kyakue, Sauli waakeene kwitabila. Inzi, waalandile nangue ni ka kilubosie kaniini kabili nangue bantu i baamupatikiziizie akite evio. (1 Sam. 15:13-24) Kabili, ntaanzi ya paapo, Sauli waalangiliile mibeele nga ezio yenka. (1 Sam. 13:10-14) Kya bulanda, waalekeleele mutima wakue wileendule. Waakeene kwalulula malanga akue, pakaako Yehova waamusasiliile ni kumukaana.

5. Kunti twasambilila ki kufuma ku mufuano wakue Sauli?

⁵ Eevi kutiina mibeele ya kwileendula yakue Sauli, kili buino twiipuzie eevi: ‘Musita undi nasoma Mulandu Wakue Leeza ni kusaangamo musoko palwane, eba, ndi naezia kwisakila? Eba, ndi nakeba kukeefia kilubo kyane? Eba, ndi naezia kulanda nangue bange i bakilengia?’ Kine twaisaanga mu kimo pakati ka biipuzio bebio bili paapo, tupalile kwalulula malanga ni aali yeetu. Kine te tukitile evio, mutima weetu kunti waaluka ni kibuli saana ni Yehova ali kutiona bukibuza pamo neetu.​—Yak. 4:6.

6. Londolola kupusana kuli pakati ka Likolo Sauli ni Likolo Daudi.

⁶ Mona kupusana kuli pakati ka Likolo Sauli ni Daudi, Likolo waamukoonkelepo, muntu waali watonene “muzilo wakue Yehova.” (Malum. 1:1-3) Daudi waali wamanine nangue Yehova ali wapususia baalia bekefiizie inzi ali wakaana baalia beleenduile. (2 Sam. 22:28) Pakaako, Daudi waalekeleele Mulandu Wakue Leeza upilibule malanga akue. Waaleembele eevi: “Nakaba kumulumbania Yehova, olia wakimpeela musoko. Atasie musita wa busiku, malanga ane a mukati saana ali angolola.”​—Malum. 16:7.

7. Kunti twakita ki kine twikefiizie?

⁷ Kine twikefiizie, tuli kulekelela Mulandu Wakue Leeza walulule malanga etu abiipile ntaanzi teanatufikie ku kukita bintu bibiipile. Mulandu Wakue Leeza uli kwaluka nga lizui lili mukutwana nangue: “Eezi i nzila. Endemo.” Kunti yatusoka kine te twakeba kukita kintu kampanda kibiipile. (Is. 30:21) Kine twamutuilizia Yehova, kunti twanoonkelamo mu nzila ingi. (Is. 48:17) Kwa mufuano, tetunvua busoni buli bwaiza musita utuli twaololua na muntu unge. Kabili tuli kukila kumupalama Yehova paantu tuli kwinika nangue ali mukutukitila nga baba ali ni ntono.​—Baeb. 12:7.

8. Nga vikilangiliilue mu lileembo lya Yakobo 1:22-25, kunti twabombia siani Mulandu Wakue Leeza nga kiizino?

⁸ Mulandu Wakue Leeza kunti wabomba nga kiizino ao kio. (Soma Yakobo 1:22-25.) Bengi pakati keetu bali baikenta mu kiizino lukele-keele ntaanzi ya kufuma pa nsesi. Kukita evio kuli kwatukwasia kumona pa tupalile kuwaamia ntaanzi bange tebanatumone. Enka evio, kine twasoma Bibilia kila busiku, tuli kumona nkeende mutupalile kwalulula malanga etu ao mibeele yeetu. Bengi bali bamona nangue kusoma lileembo lya kila busiku lukele-keele ntaanzi ya kufuma pa nsesi kuli kwakwasia saana. Bali balekelela bintu bibali basoma bitungulule malanga abo. Kisia, mu koba konse,  bali bakeba nzila ya kubombia musoko ozo ufumine mu Mulandu Wakue Leeza. Kabili, tupalile kuya twali ni ntantiko ya lyonse, ibiikile mukati kusoma ni kutontonkania kubalua busiku Mulandu Wakue Leeza. Keekio ni kimo pakati ka bintu bya mana saana bili kutukwasia kusiala mu nzila ya kanfinenkezia ili yatwala ku bukose.

9. Juu ya ki kibuza kunti wakoolola?

⁹ Eba, waatendekelepo kale kwenda mu nzila yaali yakutwala kule ni Yehova? (Malum. 73:2, 3) Kine kibuza akosele kimupasi waalangiliile kusipa ni kuiza kukoolola, eba, waamutuiliziizie ni kubombia musoko wakue? Kine waamutuiliziizie ni kubombia musoko wakue, waakitile buino, kabili uli watasia paantu waaizile kukusoka.​—Tus Maf. 1:5.

10. Upalile kukita siani kine kibuza obe wakoolola?

¹⁰ Mulandu Wakue Leeza watulangulusia nangue: “Bilonda bya kukisiiwa na kibuza ni bya kisinka.” (Tus Maf. 27:6) Ezio milandu ni ya kisinka mu nzila ki? Tontonkania ozu mufuano: Tulande nangue upembeele kwabuka musebo uli wapitwamo saana ni kooku upuuluilue na telefone yobe. Waingila mu musebo bila kukenta kooku ni kooku. Kisia, penka paalia, mwinobe wakukula ku kuboko ni kukubwezia mu mbali musebo. Paantu wakukwata na maka saana, kuboko kobe kwakisika, inzi, kukita evio kwakwasia te kunti utikue na motoka. Anzia kine kilonda keekio kunti kyalengia unvue misa mu nsiku kampanda, eba, uli kumufiitilua kibuza obe paantu waakikukula na maka? Kakiine teukita evio! Uli kutasia paantu wakikukwasia. Enka evio, kine kibuza obe wakusoka nangue bulanzi bobe ao bikitua byobe te bipateene na mafunde a nsaambu akue Leeza, ku ntendeko kunti wakisua. Inzi, te kufiitua paantu wakusoka. Kine wafiitua uli kulangilila nangue uli kipuba. (Kas. 7:9) Inzi, tasia, paantu kibuza obe walangililanga kusipa pa kuiza kukusoka.

11. Ni kiki kili kyalengia muntu akaane kukoonka musoko uweeme wakue kibuza?

¹¹ Ni kiki kili kyalengia muntu akaane kukoonka musoko kufuma kuli kibuza wakue amutonene? Kibuli. Bantu bali ni kibuli bali basaangua bakeba kunvua “bintu bibatonene kunvua.” Tebeezi ‘kutona kabili kutuilizia kisinka.’ (2 Tim. 4:3, 4) Bali basaangua baimwene kuya bali ba pa muulu kabili ba mana saana. Inzi, mutumua Paulo waaleembele eevi: “Kine muntu emwene kuba kantu musita wasili kantu ali mukwibeepa sie.” (Bag. 6:3) Likolo Sulemani waalondoluele keekio buino saana. Waaleembele eevi: “Mwanike wali mupabi inzi wali ni mulangue, akilile kuwaama kuliko likolo mukote inzi wali kipuba, asiizi kabili kumona mana ya kutuilizia musoko.”​—Kas. 4:13.

12. Nga vikileembelue mu Bagalatia 2:11-14, twasambilila ki kupitila mufuano waabiikilue na mutumua Petro?

¹² Mona mufuano waabiikile mutumua Petro musita mutumua Paulo lwaamusokele ntaanzi ya bantu. (Soma Bagalatia 2:11-14.) Petro waali wapalile kumufiitilua mutumua Paulo kukoonkana ni vyaafumiizie musoko ozo kabili ntaanzi ya bantu. Inzi, Petro waalangiliile mulangue. Waaitabiile musoko kabili taamufitiilue Paulo ni kusiala wamubikiliile. Inzi, waaizile kumukuuta Paulo nangue “lupua mutonua.”​—2 Pet. 3:15, NWT.

13. Ni biki bitupalile kulanguluka musita wa kufumia musoko?

¹³ Kine wamona nangue upalile kumusoka mwinobe, ni biki biupalile kulanguluka? Ntaanzi ya kumusoka mwinobe, iipuzie eevi, eba, ‘ndi kwilangilila kuya nali wa “nsaambu kukila”?’ (Kas. 7:16) Muntu wa nsaambu kukila ali wapingula bange, apana kukoonkana ni mafunde akue Yehova, inzi kukoonkana ni akue muine, kabili teezi kusaangua ni nkumbu saana. Kine kisia kwitoosia we muine wamona nangue upalilesie kumusoka mwinobe, mulangilile buino pali kilubo kyakue kabili bombia biipuzio bili kumulengia atontonkanie  ni kumukwasia mwinobe enike kilubo kyakue. Sininkizia nangue musoko obe uswapiile Maleembo, ni kooku walangulukile nangue ali ni nsaambu ya kupingula mwinobe te weewe, inzi, ni Yehova. (Bar. 14:10) Swapila mulangue uli mu Mulandu Wakue Leeza, kabili ni musita luuli mukusoka mwinobe, pala nkumbu yakue Yesu. (Tus Maf. 3:5; Mat. 12:20) Juu ya ki tupalile kukita evio? Paantu Yehova wakatukitila nga enka evelia vituli twabakitila bange.​—Yak. 2:13.

14. Kuteania kwakue Leeza kuli mukututeaniizia ki?

¹⁴ Yehova ali watutungulula mu nzila ili yatwala ku bukose kupitila seemu ya pa kyalo ya kuteania kwakue ili yateania ma viideo, mpapulo, ni kulonghaana. Bebio bintu bili byatukwasia fwe bonse kubombia masoke ali mu Mulandu Wakue Leeza. Ezio mpunda ili yasaangua yaswapiilue paantu imaniine saana pa Maleembo. Musita balupua ba mu Kabungue Kali Katungulula lubali bapingula palua nzila ikilile kuwaama ya kukita miilo ya kusimikila, bali baswapila mupasi utakatiifu. Inzi, Kabungue Kali Katungulula kali kabuela kutoosia kabili eevi kumona kine kipalile kwalulula bupinguzi bwabo. Juu ya ki? Paantu “kilangililo kya keenu kyalo kili mukwaluluka,” kabili kuteania kwakue Leeza kupalile kwipatanisia ni aali ya leenu.​—1 Bakor. 7:31.

15. Ni buavia ki buli na bakasimika bange?

¹⁵ Musita kuteania kwakue Leeza lukuli kwatupeela bulondolozi bwa leenu palua lisambilizio kampanda lya Bibilia, ao kutupeela butunguluzi palua mafunde alandiile lwendo, tuli twaitabila ni kubombia. Inzi, tuli twakita siani kine kuteania kwakue Leeza kwakita bupilibuko buli bwakumia nkeende kampanda ya buikazi bwetu? Kyakumuenako, mu miaka eezi yakipita, kukuula ni kutengenezia nkeende ya kupupilamo kwaakitwama nfalanga ingi saana. Pakaako, Kabungue Kali Katungulula kaakilanda nangue bilonghaano bingi bitendeke kubombia Nsesi ya Bukolo imo. Keekio kyakilengia bilonghaano binge bibiikue pamo ni Masesi kampanda a Bukolo asisiiwe. Ni nfalanga, ili mukubombiiwa eevi kukwasia kukuula mu nkeende mukabiilue saana Masesi a Bukolo. Kine wikeele mu nkeende muli mukusisiiwa Masesi a Bukolo ni bilonghaano byabiikua pamo, kunti wamona kyakolele kwipatanisia ni aali ezio ya leenu. Loonu, bakasimika bange bapalile kwenda lwendo lwaleepele eevi kufika ku nkeende kwa kulonghaana. Baalia baabombele saana eevi kukuula ao kutengenezia Nsesi ya Bukolo kunti baiipuzia juu ya ki Nsesi ya Bukolo  yasisiiwa. Kunti bamona nangue musita ni maka abo aailesie mwa mpuni. Anzia evio, bali baitabila bupinguzi bwakikwatua ni kunakila, pakaako, bapalile kutasiiwa.

16. Kubombia musoko uli mu lileembo lya 2 Bakorinto 6:1 kunti kwatukwasia siani kusuunga nsaansa yeetu?

¹⁶ Tuli kutwalilila kuya twali ni nsaansa kine twalanguluka nangue Yehova i utuli mukubombela kabili nangue weene i ali mukutungulula kuteania kwakue. (Soma 2 Bakorinto 6:1.) Likolo Daudi waabiikile kyakumuenako kiweeme musita wa kufumia bulongio eevi kukuula ekalu. Waalandile eevi: “Neene ndi ni, kabili ni bantu bane ni baani eevi tuviinde kufumia bulongio bwa kwitonena nga bobu? Paantu kila kintu kifumine kuli weewe, kabili twakupeela keelia kifumine mu minue yobe we muine.” (1 Mil Nsi. 29:14) Musita utuli twafumia bulongio, ni fwefue tuli twamupeela Yehova bintu bifumine mu minue yakue muine. Anzia evio, Yehova ali waunvua makola saana lwali wamona twabombia musita, maka, ni bunoonsi bwetu eevi kukwasia miilo yatonene ikitue.​—2 Bakor. 9:7.

17. Juu ya ki te upalile kutioka mutima musita luwainika nangue upalile kwalulula ntanfu yobe?

¹⁷ Eevi kutwalilila kwenda mu nzila ya kanfinenkezia ili yatwala ku bukose, fwe bonse tupalile kukoonka mu peepi mufuano wakue Yesu. (1 Pet. 2:21) Kine kyamoneka nangue upalile koolola ntanfu yobe ao kwaluluka, te kutioka mutima. Kwinika nangue upalile kukita bupilibuko kulangiliile nangue utonene kukoonka butunguluzi bwakue Yehova. Languluka, Yehova amanine nangue te tupuililikile. Pakaako, teezi kutuloomba tupale mufuano wakue Yesu mu nzila ipuililikile.

18. Tupalile kukita ki eevi tukabe kufika kutuli mukuya?

¹⁸ Kansi, fwe bonse tutonte maano ku ntaanzi ni kutona kukita bupilibuko mu malanga etu, mu bintu bituli twatona ao bitusiizi kutona, ni mu bikitua byetu. (Tus Maf. 4:25; Luk. 9:62) Kansi, tusiale twaikefiizie ni, “kutwalilila kusaansamuka, kuya twaololua.’ (2 Bakor. 13:11) Kine twakita evio, “Leeza wa ntono ni wa mutende wakaba pamo [ni fwefue].” Kupuako, tetukaba kufikasie kutuli mukuya, inzi twakaba kusekelela ni bulendo bwetu.