1. Xó má naʼthí náa Mateo 7:13, 14, náá ejkualú ikháán bi̱ ni̱ndxu̱lú cristiano rá.

XÓ MUʼTHÁ, xúgiáanʼ bi̱ ni̱ndxu̱lú cristiano, najkualú náa mbá kamba̱a̱. Mbóó náa nandulú muʼgua̱nú, nindxu̱u̱ náa numbaaʼ nuxi̱ʼ náa maʼtáñajunʼ Jeobá, Dios bi̱ nandoo kaʼyulú. Tsejtsí mbiʼi nuʼni tsiakimijna rí mu̱ʼgua̱ má xúʼko̱ náa kamba̱a̱ rí maʼga̱ kaguáanʼ makuwáanʼ. Jesús niʼthí, numuu rí kamba̱a̱ nindxu̱u̱ chíma̱ja̱nʼ ikha jngó naʼniulú gakhi̱i̱ mu̱ʼgua̱ (atraxnuu Mateo 7:13, 14). * Numuu rí ni̱ndxu̱lú xa̱bu̱ aʼkhá, ikha jngó naguʼunlú rí magajnúʼ riyu̱lú náa kamba̱a̱ (Gál. 6:1).

2. Ndiéjunʼ guʼyáá náa artículo rígi̱ rá. (Atayáá kúgumaʼá “ Rí manindxu̱lúʼ xa̱bu̱ guabaaʼ nambáyulúʼ mu muriʼkhumijná”.)

² Mu muʼguá má xúʼko̱ náa kamba̱a̱ chíma̱ja̱nʼ dí na̱jkha̱ kaguáanʼ makuwáánʼ, ndayóoʼ dí makuwáanʼlu xawii mu muriʼkhu̱u̱ dí xóo nundxa̱ʼwáá edxu̱lúʼ, dí nuʼni ga̱jma̱a̱ rí xóo ni̱ndxu̱lú. Rúʼko̱ dí nindoo gáʼthi apóstol Pablo índo̱ nixnúún tsiakii a̱ngiu̱lú bi̱ kúwá náa Corinto rí ndayóoʼ ‹muriʼkhumijná› (2 Cor. 13:11). Consejo rígi̱ nayambáá xóó rí mbiʼi xúgi̱. Náa artículo rígi̱, mbuʼyáá xú káʼnii Biblia ma̱ndoo mambáyulú muriʼkhumijná ma̱ngaa xú káʼnii gumbayúlú bi̱ nambáxulúʼ májánʼ gajmiúlú bi̱ nuni ñajuunʼ Dios, mu mu̱ʼgua̱ má xúʼko̱ náa kamba̱a̱ rí na̱jkha̱ kaguáanʼ makuwáánʼ. Ma̱ngaa mbuʼyáá ndiéjunʼ rí maʼniulú gakhii muʼnimbánii ikha dí naxná Jeobá náa xuajñuu. Ga̱jma̱a̱ mbuʼyáá dí gíʼdoo wéñuʼ numuu rí manindxu̱lúʼ xa̱bu̱ guabaaʼ á mu nandulú muriʼkhumijná ga̱jma̱a̱ rí makuwáánʼ gagi má xúʼko̱ ru̱ʼni̱ ñajuunʼ Jeobá.

3. Xú káʼnii embáyulú Biblia rá.

³ Naʼniulú gakhii mbuʼyáá xóo endxa̱ʼwáá edxu̱lúʼ ga̱jma̱a̱ rí  nakumulú. Ndíjkha rá. Numuu rí a̱jkiu̱lú naʼni nduwánʼ ikha jngó naʼniulú gakhii mbuʼyáá ndiéjunʼ guʼni (Jer. 17:9). Naguʼunlú rí muʼni nduwamijná ga̱jma̱a̱ ku̱ma̱ rí minduwaʼ (Sant. 1:22). Ikha jngó dí gíʼdoo wéñuʼ numuu majmulú Biblia mu mbuʼyáá xóo phú ni̱ndxu̱lú. Biblia nambáyulúʼ mu mbuʼyáá xóo ni̱ndxu̱lú awúún dí xóo ‹nundxaʼwamíjná ga̱jma̱a̱ asndu dí rígá náa awúu̱n a̱jkiu̱lú› (Heb. 4:12, 13). Xóo muʼthá rí nindxu̱u̱ xóo mbá ajua̱nʼ dí mbiʼyuu rayos X, dí naʼngo̱o̱ ndaʼyoo asndu náa awúu̱n itsuluʼ. Rí xúgi̱ á mu nandulú dí mambáyulú xtágabu rí na̱ʼkha̱ náa Biblia dí nuxna xa̱bi̱i̱ Dios, ndayóoʼ manindxu̱lúʼ xa̱bu̱ guabaaʼ.

4. Xú káʼnii eʼyáá dí rey Saúl niʼni mbamína rá.

⁴ Xkridoo rey Saul nasngájma dí gamíi magiʼnulu, á mu na̱nguá ni̱ndxu̱lú xa̱bu̱ guabaaʼ. Niʼnimbamínáʼ wéñuʼ rí asndu na̱nguá ndiʼyoo dí ndayóoʼ mariʼkhu̱u̱ xóo endxa̱ʼóo edxu̱u̱ ga̱jma̱a̱ rí naʼni (Sal. 36:1, 2; Hab. 2:4). Rígi̱ niguanúu kaʼwu índo̱ Jeobá niʼthúu̱n mbájmbu índo̱ magi̱ʼdu̱u̱ gajmíi̱n amalequitas, mú ikhaa na̱nguá niʼnimbo̱o̱. Índo̱ gaʼyee Samuel nixprígúu ga̱jma̱a̱ numuu dí niʼni na̱nguá ndiya eʼkun. Rí phú niʼni, niʼnimbamínáʼ ga̱jma̱a̱ niʼthí rí eʼwíinʼ guaʼdáá aʼkhún (1 Sam. 15:13-24). Rígi̱ na̱nguá nindxu̱u̱ timbá miʼtsú dí Saúl naʼni xígi̱ káʼnii (1 Sam. 13:10-14). Phú ngíná, dí niniñuminaʼ dí a̱jkiu̱u̱n maʼni mbamína. Ga̱jma̱a̱ na̱nguá niriʼkhu̱u̱ rí xóo endxa̱ʼóo edxu̱u̱, Jeobá nixprígúu mú ikhaa táʼndoo.

5. Dí nigíʼnuu rey Saúl ndiéjunʼ ejmañuluʼ rá.

⁵ Mu majmañulúʼ dí xóo nigíʼnuu Saúl, ma̱ndoo murajximíjna̱ xóo rígi̱: “Lá ndaʼyáʼ xó mata mu xaʼgíʼ maʼnimbánuu consejo dí naʼthí náa Biblia ráʼ. Lá ndayóo dí na̱nguá gíʼdoo numuu dí magíʼnuu á mu tsénimbo̱ʼ ráʼ. Lá natha dí eʼwíinʼ guaʼdáá aʼkhún dí ikhúún nani ráʼ.” Á mu nuriʼña̱a̱ dí xúʼko̱ nindxu̱u̱ náa tikhu graxe̱ rígi̱. Ndayóoʼ dí muriʼkhu̱u̱ xóo endxaʼwáá edxu̱lúʼ ga̱jma̱a̱ rí xóo nuʼni. Á mu tseriʼkumijnálu, gamíi rí muʼni mbaʼumíjna̱ ga̱jma̱a̱ rí Jeobá xándoo mambajxu̱u̱ ga̱jma̱á ni̱ndxu̱lú (Sant. 4:6).

6. Xú káʼnii mixtiʼkuii ninindxu̱u̱ Saúl ga̱jma̱a̱ David rá.

⁶ Guʼyáá xú káʼnii mixtiʼkhu nindxu̱u̱ rey Saúl ga̱jma̱a̱ rey David mbáa bi̱ nindoo kaʼyoo ‹xtángoo ndrígóo Jeobá› (Sal. 1:1-3). David ndaʼyoo má dí Jeobá naʼni káwíin xa̱bu̱ guabiinʼ, mú bi̱ nuni mbaʼumíjna̱ tsíyoo gaʼñún (2 Sam. 22:28). Ikha jngó niniñuuʼ dí xtángoo ndrígóo Dios maʼni dí mariʼkuminaʼ. Ikhaa niʼnirámáʼ: “Mani mba̱a̱ Jeobá, bi̱ naxnúʼ xtágabu. Asndu mbruʼun rí nandxa̱ʼwa̱mínáʼ naxprígúʼ” (Sal. 16:7).

7. Á mu ni̱ndxu̱lú xa̱bu̱ guabaaʼ, ndiéjunʼ guʼni rá.

⁷ Á mu ni̱ndxu̱lú xa̱bu̱ guabaaʼ, muniʼñááʼ rí Biblia mariʼkhu̱u̱ rí xóo nundxa̱ʼwa̱míjna̱ nákha xóó tséʼni mbá dí raʼkhí. Ajngá rawunʼ Dios nindxu̱u̱ xóo mbá aʼwá dí naʼthúlú: “Rígi̱ nindxu̱u̱ kamba̱a̱. Ayuʼ ikhí”. Naʼthúlú índo̱ kúwáanʼ ragájnuriyulúʼ náa ñawún mujúnlu o náa xti̱ʼ náa kamba̱a̱ rí na̱jkua̱ (Is. 30:21). Dí muʼdxawíinlú Jeobá mambáyulú wéñuʼ (Is. 48:17). Muʼgíʼ mbá xkri̱da, xátiyulú índo̱ guxprigulú. Ma̱ngaa makumulúʼ rí kúwáanʼ mijngii náa Jeobá, numuu rí naʼniulú xóo mbáa a̱ʼdióo bi̱ nandoo kaʼyoo wéñuʼ (Heb. 12:7).

8. Xó má naʼthí náa Santiago 1:22-25, xú káʼnii gándoo Biblia mani̱ndxu̱u̱ xóo mbá niwanʼ náa ikháanʼlu rá.

⁸ Biblia nindxu̱u̱ xóo mbá niwanʼ náa ikháanʼlu (atraxnuu Santiago 1:22-25). * Mambá miʼcha̱ xúgíinʼ xa̱bu̱ nákhá xóo tsegajnún náa guʼún nuyejximíjna̱ náa niwanʼ. Ga̱jma̱a̱ xúʼko̱ nandoo nduyáá náa xóo ndayóoʼ muni tsiʼyamijná, nákha xóo tseñún eʼwíinʼ. Xúʼko̱ má kayuuʼ, índo̱ nuraxnuu Biblia mambá mbiʼi, xúʼko̱ nandoo nduʼyáá náa ndayóoʼ muriʼkhu̱u̱ xóo endxaʼwáá edxu̱lúʼ o rí nuʼni. Mbaʼin a̱ngiu̱lú nuraxnuu folleto rí mbiʼyuu muʼnigajmaa tsejtsi mbiʼi escritura nákha  xóo tsegajnún náa guʼún ga̱jma̱a̱ xúʼko̱ nundxa̱ʼwa̱míjna̱ dí niraxnuu. Ga̱jma̱a̱ kañiʼ má mbiʼi rúʼko̱ nduyaʼ xú káʼni ma̱ndoo mugíʼ muni dí niraxnuu náa Ajngá rawuunʼ Dios. Ma̱ngaa gíʼmaa muraxnuu Biblia xúgíʼ mbiʼi ga̱jma̱a̱ rí mundxa̱ʼwa̱míjna̱ dí niraxnuu. Gajkhun má, rígi̱ nindxu̱u̱ gakhii, mú nindxu̱u̱ mbá dí gíʼdoo wéñuʼ numuu rí mambáyulú mu mu̱ʼgua̱ má xúʼko̱ náa kamba̱a̱ rí chíma̱ja̱nʼ rí na̱jkha̱ kaguáanʼ makuwáanʼ.

9. Xú káʼnii gíʼmaa makumulúʼ á mu mbáa bi̱ nambájxulú gajmiúlú naxprígulú rá.

⁹ Lá ni̱jkha̱nú mbá miʼtsú dí nirajñulú náa Jeobá rá. (Sal. 73:2, 3.) Á mu mbáa bi̱ nambájxulú gajmiulú bi̱ naʼni ñajuunʼ Dios ga̱jma̱a̱ támiñuu índo̱ nixprígulú, lá niʼdxawíín ga̱jma̱a̱ niʼgíʼ niʼnimbánii consejo dí niʼthúlu xáʼ. Rúʼko̱ ninindxu̱u̱ mbá májánʼ rí nuʼnilú ga̱jma̱a̱ nuxna̱a̱ wéñuʼ núma̱aʼ numuu dí niʼthúluʼ (Prov. 1:5).

10. Xú káʼni gáʼyóoʼ muʼni á mu mbáa mígiu̱lú naxprígulú rá.

¹⁰ Ajngá rawuunʼ Dios naʼni marmáʼáan a̱jkiu̱lú dí ‹consejo rí naxnulu bi̱ nambájxu gajmiúlú nindxu̱u̱ jmbu› (Prov.27:6). Ndiéjunʼ eyoo gaʼthúun rá. Gundxaʼwamíjna̱ dí kúwáanʼ manúnguluʼ náa kamba̱a̱ dí nagún wéñuʼ carro, ga̱jma̱a̱ ikhú nduʼyáá celular ndrígúlú. Ga̱jma̱a̱ nugíʼdilú nanúngulú rí asndu tsiyejxi̱ náa mu̱ʼgua̱. Ikhú mbáa mígiu̱lúʼ nagujtun xa̱ʼ ñawúnlú ga̱jma̱a̱ naxmájtrigáanʼlú skidiʼ. Nagujtun xa̱ʼ wéñuʼ ñawúnlú dí asndu naʼni maña̱ʼ. Mú ga̱jma̱a̱ numuu dí ikhaa nixmájtrigáanʼlú, niʼni káwáanlú, xúʼko̱ na̱nguá niʼni kambiyulú carro. Gajkhun má, mbáa mikhu ñawúnlú nguáthá mbiʼi wáa, mú xakiʼnáanʼ kuʼyáá mígiu̱lú, rí phú muʼni muxnáalú núma̱aʼ numuu rí nimbáyulúʼ. Xúʼko̱ má kayuuʼ á mu naʼtulúʼ mbáa mígiu̱lú dí xóo nuʼthá ga̱jma̱a̱ dí xóo nuʼni tsénigu̱u̱ʼ Dios, mbáa nákha maʼtulú magaunlú, mú á mu ikháanʼ nakiʼnáanʼ kuʼyáá, rúʼko̱ gasngájma rí ni̱ndxu̱lú mbáa skagu̱nʼ (Ecl. 7:9). Rí phú muʼni, muxnáa núma̱aʼ, numuu rí támiñuu maʼthúlú.

11. Ndiéjunʼ gándoo gaʼni dí mbáa xándoo gaʼdxawun consejo ndrígóo mígiu̱u̱ rá.

¹¹ Ndiéjunʼ gándoo gaʼni dí mbáa xándoo gaʼdxawun consejo ndrígóo mígiu̱u̱ rá. Nindxu̱u̱ dí maʼnimbamínáʼ. Bi̱ nuni mbaʼumíjna̱ nanigu̱u̱nʼ dí ‹mudxawún eʼwíinʼ dí ikhiin nuthi›, mú ikhiin nuniña̱a̱ʼ ‹rudxawíín dí gajkhun› (2 Tim. 4:3, 4). Na̱nguá edxawíín dí nuthi eʼwíinʼ numuu rí nakumu̱ún dí ikhiin najmañún ga̱jma̱a̱ guaʼdáá itháán numuu ki xóo eʼwíinʼ. Mú apóstol Pablo niʼthí: “Á mu mbáa naku̱mu̱u̱ rí gíʼdoo numuu, mu nda̱a̱ rí nindxu̱u̱, xtáa raʼninduwaminaʼ” (Gál. 6:3). Rey Salomón niʼthí: ‹Rí itháán májánʼ rí mbáa ada̱ gínáa kí xóo mbáa rey bi̱ nikhi̱i̱ ga̱jma̱a̱ tsendxaʼóo májánʼ edxu̱u̱ ma̱ngaa rí tsegrui̱gú májánʼ xtágabu› (Ecl. 4:13).

12. Índo̱ nuraxnulú Gálatas 2:11-14, ndiéjunʼ ejmañulú náa xkridoo apóstol Pedro rá.

¹² Apóstol Pedro, niniñuuʼ mbá májánʼ xkri̱da índo̱ apóstol Pablo nixprígúu náa inún mbá xúgíinʼ (atraxnuu Gálatas 2:11-14). * Na̱nguá nikiʼnán kaʼyoo Pablo dí xóo niʼniuu o xóo niʼthúu̱n. Numuu rí Pedro najmañuu, ikha jngó nigruigú consejo ga̱jma̱a̱ na̱nguá nikiʼnáa kaʼyoo Pablo. Numuu rí nda̱wa̱á niʼthúunʼ “ndxájuʼ bi̱ nandoʼ ka̱yo̱o̱” (2 Ped. 3:15).

13. Ndiéjunʼ dí gíʼmaa murajximíjna̱ nákha xóó tséxnáá consejo mbáa rá.

¹³ Á mu nduʼyáá rí ndayóo muxnáá consejo mbáa mígiu̱lú, ndiéjunʼ dí gíʼmaa mbuʼyáá ginii rá. Nákha xóo tseʼtamíjná gajmiúlú, gurajximíjna: ‹Lá naku̱mu̱ʼ rí ni̱ndxu̱ʼ mbáa xa̱bu̱ jmbii náa ikhaa xáʼ›. (Ecl. 7:16.) Mbáa xa̱bu̱ bi̱ naku̱mu̱u̱ rí nindxu̱u̱ jmbii naʼthí xóo má eyoo  ikhaa, raʼkháa xóo nandoo Jeobá ga̱jma̱a̱ tsegawíinʼ a̱jkiu̱u̱n. Á mu nda̱wa̱á dí nirajximijnálu rígi̱ ga̱jma̱a̱ nduʼyáá má dí ndayóoʼ tsiakii muxnáá consejo mígiu̱lú, guʼtháán kaʼwu ndiéjunʼ náa rí nanga̱wa̱a̱n ga̱jma̱a̱ guʼnilú graxe̱ mu xúʼko̱ mbaʼyoo má ikhaa náa dí raʼkhí niʼni. Mú gíʼmaa mbuʼyáá dí muʼthá nindxu̱u̱ dí nagájnuu náa Biblia ga̱jma̱a̱ garmáʼáan a̱jkiu̱lú dí mígiu̱lú xaxnájxi̱i̱ cuenta náa ikháanʼ, maxnájxi̱i̱ náa Jeobá (Rom. 14:10). Gajmulú Biblia índo̱ guxnáá consejo mbáa ga̱jma̱a̱ gagawíinʼ a̱jkiu̱lú xó má niʼni Jesús (Prov. 3:5; Mat. 12:20). Garmáʼáan a̱jkiu̱lú dí Jeobá maʼniulú xó má nuʼniu̱u̱n eʼwíinʼ (Sant. 2:13).

14. Ndiéjunʼ dí naguwíi xuajñuu Dios mu maxnúlú ikha rá.

¹⁴ Jeobá najmiuu xa̱bi̱i̱ bi̱ kúwá náa tsu̱du̱u̱ numbaaʼ mu muxná ikulú náa kamba̱a̱ dí na̱jkha̱ kaguáanʼ makuwáánʼ. Ikhiin nurawíi video, i̱yi̱i̱ʼ ga̱jma̱a̱ nuni dí marigá reunión náa nambáyulúʼ muʼgíʼ muʼnimbánii consejo ndrígóo Biblia. Xúgíʼ rígi̱ nigájnuu kájxi̱ náa Escritura. Cuerpo Gobernante nunda̱ʼa̱ má xúʼko̱ xi̱ʼ kaʼwu mu maxnún ikha mu muraʼwi̱i̱ itháan májánʼ xóo ma̱ndoo miʼtáraʼa. Maski ajndu xúʼko̱, ikhiin nangíʼ eʼni nduyáá á mu dí májánʼ dí niraʼwi̱i̱ muni, numuu dí xóo “narígá náa numbaaʼ rígi̱ na̱jkha̱ raxtiʼkhuu” ga̱jma̱a̱ xuajñuu Dios gíʼmaa maguʼun dí xóo na̱jkha̱ raxtiʼkhuu (1 Cor. 7:31).

15. Ndiéjunʼ dí nuraʼníí tikhun a̱ngiu̱lú rá.

¹⁵ Gajkhun má dí tséʼni a̱jma̱ a̱jkiu̱lú mundrígú índo̱ xuajñuu Dios naríyaʼ mbá i̱yi̱i̱ʼ dí naʼthí ga̱jma̱a̱ numuu Biblia, o náa naʼthí ga̱jma̱a̱ numuu xóo makuwáanʼ. Mú, xú káʼnii endrígú índo̱ nagájnuu mbá rí naʼni maxtiʼkhuu xóo makuwáanʼ rá. Mbá xkri̱da, náa iwáá tsiguʼ rígi̱ nigi̱xi̱ numuu rí najmaa náa naguma guʼwá rí nagimbáanʼ ma̱ngaa rí muñewa̱a̱n májánʼ. Ikha jngó, Cuerpo Gobernante niʼthí rí majmaa guʼwá náa nagimbáanʼ xóo má eʼngo̱o̱. Ikha jngó, tikhu guʼwá náa nagimbáanʼ niwiín a̱ngiu̱lú ga̱jma̱a̱ rí niguanúu nixtagujua̱a̱. Mbújkha̱a̱ rí nixtagujua̱a̱, najmaa mu maguma i̱ʼwáʼ náa phú ndañún a̱ngiu̱lú guʼwá mu magimbíin. Á mu kúwáanʼ náa xuajen rí naxtagujua̱a̱ guʼwá náa nagimbáanʼ ga̱jma̱a̱ nawiín a̱ngiu̱lú náa imbo̱o̱ guʼwá nagimbáanʼ, mbáa maʼniulú gakhii mu maguʼunluʼ ga̱jma̱a̱ numuu awan rígi̱. Ga̱jma̱a̱ tikhun Publicador ndayóoʼ rí magún mitsínguánʼ mu ma̱ndoo makuwá náa Reunión. Ga̱jma̱a̱ eʼwíinʼ niñajunʼ gakhii wéñuʼ mu maguma guʼwá o nañewa̱a̱n mu xáʼchúu mbáa ikhiin nurajximíjna, náá numuu dí naxtagujua̱a̱. Mbáa makumún dí tsiakii rí nini ga̱jma̱a̱ mbiʼi rí nijmún ninindxu̱u̱ ndí. Maski ajndu xúʼko̱,  ikhiin nuyambáá ga̱jma̱a̱ awan dí nigájnuu rígi̱, ikha jngó nuxniínlú núma̱aʼ.

16. Xú káʼni embáyulú Colosenses 3:23, 24, mu maʼdxu̱lú má xúʼko̱ rá.

¹⁶ Mbá rí mambáyulú dí maʼdxu̱lú má xúʼko̱ nindxu̱u̱ dí marmáʼáan a̱jkiu̱lú dí kuwáánʼ ruñajunʼ náa Jeobá ga̱jma̱a̱ dí ikhaa naxná ikha náa xuajñuu (atraxnuu Colosenses 3:23, 24). * Rey David niniñuuʼ mbá májánʼ xkri̱da índo̱ nimbáyúu ga̱jma̱a̱ dí gíʼdoo, mu maguma templo. Ikhaa niʼthí: “Mu, tsáa lá ni̱ndxu̱ʼ ikhúúnʼ ga̱jma̱a̱ tsíin ni̱ndxu̱ún xa̱bi̱ʼ, mu xúniʼñáʼxu mixná tsigijñaʼ xóo rígi̱ rá. Numuu rí xúgíʼ na̱ʼkha̱ náa ikháán, ga̱jma̱a̱ rí naraxnúxu ikhaa má exna̱ʼxu” (1 Crón. 29:14). Índo̱ mangáanʼ nuxnálú mbújkha̱a̱, kuwáanʼlu ruxnáá Jeobá dí ikhaa má nixnulu. Maski ajndu xúʼko̱ ikhaa nadxuu wéñuʼ índo̱ ndaʼyoo dí najmulú mbiʼi ga̱jma̱a̱ mbújkulú mu mumbáyii ñajunʼ dí ikhaa nandoo maguma (2 Cor. 9:7).

17. Náá numuu dí ragíʼmaa makaguabáanʼlu á mu nduʼyáá rí ndayóo muriʼkhumijná rá.

¹⁷ Mu xagájnuriyulú náa kamba̱a̱ dí na̱jkha̱ kaguáanʼ makuwáanʼ, xúgiáanʼ gíʼmaa mbuʼyaridáá Jesús (1 Ped. 2:21). Á mu nduʼyáá rí ndayóo muriʼkhumijná, xakaguabáanʼlu. Rúʼko̱ nindxu̱u̱ rí májánʼ dí muʼni, xúʼko̱ nusngajma dí kúwáanʼ ruʼnimbulú ikha ndrígóo Jeobá. Ikhaa ndaʼyoo dí ni̱ndxu̱lú xa̱bu̱ aʼkhá, ikha jngó tsegiʼthu̱u̱n dí muʼni ikháá má kayuuʼ xó má niʼni Jesús.

18. Ndiéjunʼ gíʼmaa muʼni mu muʼguanu náa na̱jkua̱ rá.

¹⁸ Rí iwáá, guʼyáá rí makanulú nda̱wa̱á ga̱jma̱a̱ gakuwáánʼ xawii mu muriʼkhu̱u̱ rí xóo nundxa̱ʼwáá edxu̱lúʼ, rí nuʼni ga̱jma̱a̱ rí xóo ni̱ndxu̱lú (Prov. 4:25; Luc. 9:62). Ganindxu̱lú má xúʼko̱ xa̱bu̱ guabaaʼ ga̱jma̱a̱ guʼni má xúʼko̱ dí naʼthí náa 2 Corintios 13:11: ‹Gaʼdxulú má xúʼko̱, ga̱jma̱a̱ guxprigumijnalu›. Á mu nuʼni, ‹Dios bi̱ nandoo kaʼyulú ga̱jma̱a̱ bi̱ gíʼdoo rí tsímáá› maxtáa ga̱jma̱á ni̱ndxu̱lú. Raʼkháa i̱ndó muʼgua̱nú náa na̱jkua̱, dí makuwáánʼ radxulú má xúʼko̱, náa kamba̱a̱ rí na̱jkha̱ kaguáanʼ makuwáanʼ.