1. Tuir Mateus 7:13, 14, ita hotu hakaʼas an atu halo saida?

ITA hotu hakaʼas an atu serbí Jeová hodi ita bele moris iha mundu foun iha ninia Ukun okos. Loroloron ita hakaʼas an atu laʼo iha dalan neʼebé lori ba moris. Maibé hanesan Jesus hatete, dalan neʼe kiʼik tebes no dala ruma susar atu laʼo iha dalan neʼe. (Lee Mateus 7:13, 14.) Tanba la perfeitu, fasil ba ita atu laʼo sees husi ida-neʼe.​—Gal 6:1.

2. Iha lisaun neʼe, ita sei aprende saida? (Haree mós kaixa “ Haraik an ajuda ita laʼo iha dalan kiʼik”.)

² Atu bele laʼo nafatin iha dalan neʼebé kiʼik tebes neʼebé lori ba moris, ita presiza sai prontu atu halo mudansa ba ita-nia hanoin no hahalok. Apóstolu Paulo anima ema Kristaun iha Korinto atu kontinua ‘hadiʼa sira-nia hanoin’. (2 Kor 13:11) Konsellu neʼe mós aplika ba ita. Iha lisaun neʼe, ita sei aprende oinsá Bíblia bele ajuda ita atu halo mudansa no oinsá belun sira neʼebé maduru bele ajuda ita atu kontinua laʼo iha dalan neʼebé lori ba moris. Ita mós sei aprende tanbasá dala ruma susar ba ita atu halo tuir matadalan husi Jeová nia organizasaun. Ita sei aprende oinsá haraik an bele ajuda ita atu halo mudansa no haksolok nafatin hodi serbí Jeová.

3. Oinsá Maromak nia Liafuan bele ajuda ita?

³ La fasil atu analiza ita-nia hanoin no sentimentu. Tanbasá? Tanba ita-nia laran mak makerek, no dala ruma susar atu hatene oinsá ita-nia laran bele book ita. (Jer 17:9) Fasil atu lohi ita-nia an ho “hanoin neʼebé sala”. (Tgo 1:22) Tan neʼe ita presiza uza Bíblia atu analiza ita-nia an. Bíblia bele hatudu sai ita-nia “hanoin no hakarak iha laran”. (Ebr 4:12, 13) Ita bele dehan katak Bíblia mak hanesan raiu-xís neʼebé bele ajuda ita haree ita-nia laran. Maibé ita  presiza haraik an atu bele aplika konsellu husi Bíblia ka husi Maromak nia organizasaun.

4. Saida mak hatudu katak Liurai Saul sai foti an?

⁴ Liurai Saul nia ezemplu hatudu buat neʼebé bele akontese bainhira ita la haraik an. Saul sai foti an tebes no lakohi rekoñese katak nia presiza halo mudansa ba ninia hanoin no hahalok. (Sal 36:1, 2; Hab 2:4) Porezemplu, bainhira Jeová fó matadalan espesífiku ba Saul kona-ba buat neʼebé nia presiza halo depois manán ema Amalec, Saul la halo tuir Jeová. No kuandu profeta Samuel koʼalia ba Saul kona-ba ninia hahalok, Saul lakohi rekoñese ninia sala. Saul hatete katak ninia sala ladún sériu no koko atu duun ema seluk. (1 Sam 15:13-24) Antes neʼe, Saul mós hatudu hahalok neʼebé hanesan. (1 Sam 13:10-14) Triste mak nia husik ninia laran sai foti an. Nia la halo mudansa ba ninia hanoin, tan neʼe Jeová fó dixiplina ba nia no la simu tan nia.

5. Ita bele aprende saida husi Saul?

⁵ Ita lakohi sai hanesan Saul. Tan neʼe, diʼak atu husu ba ita-nia an: ‘Bainhira lee konsellu husi Bíblia, haʼu toman atu buka razaun oioin hodi la aplika konsellu neʼe ka lae? Haʼu hanoin katak buat neʼebé haʼu halo laʼós sala neʼebé sériu ka lae? Haʼu koko fó-sala ba ema seluk tanba haʼu-nia hahalok ka lae?’ Se ita hatán sin ba pergunta sira-neʼe ida, ita presiza halo mudansa. Se lae, ita bele sai foti an no Jeová sei lakohi simu ita nuʼudar ninia belun.—Tgo 4:6.

6. Esplika toʼok saida mak la hanesan entre Liurai Saul no Liurai David.

⁶ Liurai Saul no Liurai David la hanesan duni. Liurai David gosta tebes “Jeová nia ukun-fuan”. (Sal 1:1-3) David hatene katak Jeová salva ema neʼebé haraik an no kontra ema neʼebé foti an. (2 Sam 22:28) Tan neʼe David uza Maromak nia ukun-fuan atu korrije ninia hanoin. David hakerek: “Haʼu sei hahiʼi Jeová, neʼebé fó ona matadalan ba haʼu. Durante kalan mós haʼu-nia hanoin sira korrije haʼu.”—Sal 16:7.

7. Se ita mak haraik an, ita sei halo saida?

⁷ Se ita mak haraik an, ita sei uza Bíblia atu korrije ita-nia hanoin sala antes neʼe book ita atu halo sala. Maromak nia Liafuan sei sai hanesan lian neʼebé hatete ba ita: “Dalan mak neʼe. Laʼo tuir ida-neʼe bá.” Bíblia sei fó avizu ba ita kuandu ita komesa halo sala. (Isa 30:21) Bainhira ita rona ba Jeová, ita sei hetan benefísiu oioin. (Isa 48:17) Porezemplu, ita la presiza ema seluk atu korrije ita no ita la hetan moe. Ita mós sei hakbesik liután ba Jeová tanba ita hatene katak nia tau matan ba ita hanesan aman tau matan ba ninia oan.—Ebr 12:7.

8. Hanesan temi iha Tiago 1:22-25, oinsá ita bele uza Bíblia hanesan espellu?

⁸ Bíblia bele sai hanesan espellu. (Lee Tiago 1:22-25.) Baibain dadeer-dadeer ita hateke espellu antes sai husi uma. Ita halo ida-neʼe atu bele haree se ita presiza halo mudansa ba ita-nia an antes ema seluk haree ita. Hanesan neʼe mós, kuandu ita lee Bíblia loroloron, ita sei nota ita-nia hanoin no hahalok neʼebé presiza hadiʼa. Ema barak hetan benefísiu hodi lee eskritura loroloron nian dadeer-dadeer antes sira sai husi uma. Sira husik buat neʼebé sira lee atu book sira-nia hanoin. Tuirmai, durante loron tomak, sira buka dalan atu aplika Bíblia nia konsellu. Laʼós neʼe deʼit, ita mós presiza estuda no medita Bíblia loroloron. Importante tebes atu halo ida-neʼe hodi bele kontinua laʼo iha dalan kiʼik neʼebé lori ba moris.

9. Iha situasaun saida mak Ita-nia belun presiza korrije Ita?

⁹ Uluk Ita komesa laʼo sala dalan no neʼe lori Ita dook husi Jeová ka lae? (Sal 73:2, 3) Se Ita-nia belun neʼebé maduru korrije Ita, Ita rona no halo tuir ninia konsellu ka lae? Se nuneʼe, Ita halo buat neʼebé diʼak, no klaru katak Ita agradese tanba Ita-nia belun fó avizu ba Ita.—Prov 1:5.

10. Ita presiza halo saida se ita-nia belun korrije Ita?

¹⁰ Bíblia fó-hanoin ita: “Belun neʼebé laran-metin fó konsellu maski neʼe bele hakanek ninia maluk nia laran.” (Prov 27:6) Neʼe katak sá? Imajina katak Ita hamriik iha dalan ninin no karreta barak liu bá-mai. Ita hakat daudaun ba dalan sorin maibé Ita mós tau fokus demais ba Ita-nia telefone no la tau atensaun ba dalan. Iha tempu neʼe kedas, Ita-nia belun rasta Ita-nia liman, no dada fali Ita ba dalan ninin. Nia rasta Ita-nia liman makaʼas no neʼe halo Ita-nia liman moras. Maibé nia halo nuneʼe atu salva Ita-nia moris. Maski Ita-nia liman moras ba loron balu, Ita sei hirus nia ka lae? Lae duni. Ita hatudu agradese tanba nia ajuda Ita. Nuneʼe mós, se Ita-nia belun fó avizu ba Ita katak Ita-nia liafuan ka hahalok la tuir Maromak nia hakarak, karik foufoun Ita sente laran-kanek. Maibé keta sai hirus ka sente an lalais. Neʼe la matenek. (Ecle 7:9) Duké halo nuneʼe, hatudu agradese ba nia tanba nia brani atu koʼalia ho Ita kona-ba neʼe.

11. Saida mak bele book ema ida atu la simu konsellu husi ninia belun?

¹¹ Saida mak bele book ema ida atu la simu konsellu husi ninia belun? Hahalok foti an. Ema neʼebé foti an gosta ema atu “koʼalia deʼit buat neʼebé sira hakarak atu rona”. Sira ‘la rona tan ba lia-loos’. (2 Tim 4:3, 4) Sira hanoin katak sira mak matenek liu no importante liu ema seluk. Maibé, apóstolu Paulo hakerek: “Se ema ruma hanoin katak nia ema importante maski tuir loloos lae, nia lohi ninia an rasik.” (Gal 6:3) Liurai Salomão esplika didiʼak ida-neʼe, hodi dehan: “Labarik ida neʼebé kiak maibé matenek mak diʼak liu duké liurai neʼebé katuas maibé beik, no neʼebé la hanoin tan atu halo tuir avizu.”—Ecle 4:13.

12. Tuir Galásia 2:11-14, saida mak ita bele aprende husi apóstolu Pedro?

¹² Apóstolu Pedro halo saida bainhira apóstolu Paulo korrije nia iha ema seluk nia oin? (Lee Galásia 2:11-14.) Iha situasaun hanesan neʼe, Pedro bele sai hirus tanba buat neʼebé Paulo hatete no tanba Paulo korrije nia iha ema seluk nia oin. Maibé Pedro hatudu matenek. Pedro simu Paulo nia konsellu no la rai hirus ba Paulo. Duké halo nuneʼe, nia bolu Paulo nuʼudar ninia “maluk doben”—2 Ped 3:15.

13. Ita presiza hanoin-hetan saida kuandu fó konsellu ba ema seluk?

¹³ Ita presiza hanoin-hetan saida se Ita sente katak Ita presiza fó konsellu ba Ita-nia belun? Antes Ita koʼalia ho nia, husu ba Ita-nia an: ‘Haʼu hakarak hatudu katak haʼu mak “ema neʼebé laran-loos liu” ka lae?’ (Ecle 7:16) Ema hanesan neʼe tesi-lia ba ema seluk tuir deʼit ninia hanoin rasik, laʼós tuir Jeová nia hanoin. Baibain ema hanesan neʼe la hatudu laran-sadiʼa. Se Ita analiza ona Ita-nia an no tuirmai Ita sente katak Ita presiza nafatin atu koʼalia ho Ita-nia belun, diʼak atu koko halo buat tuirmai neʼe. Fó sai ho klaru problema mak saida, no uza pergunta atu ajuda nia rekoñese ninia sala. Ita-nia konsellu tenke bazeia ba Bíblia. Hanoin-hetan katak Ita-nia belun presiza hatán ba  Jeová laʼós ba Ita. (Rom 14:10) Sadere ba matenek husi Bíblia. Bainhira Ita fó konsellu ba ema ruma, banati-tuir Jesus nia hahalok laran-sadiʼa. (Prov 3:5; Mt 12:20) Tanbasá? Tanba se ita hatudu laran-sadiʼa ba ema seluk, Jeová mós sei hatudu laran-sadiʼa ba ita.—Tgo 2:13.

14. Jeová nia organizasaun prepara saida ba ita?

¹⁴ Atu ajuda ita laʼo iha dalan neʼebé lori ba moris, Jeová fó matadalan ba ita liuhusi ninia organizasaun parte rai nian. Ninia organizasaun prepara vídeo, publikasaun no reuniaun sira neʼebé ajuda ita atu halo tuir Bíblia nia konsellu. Ita bele tau fiar ba informasaun neʼe tanba neʼe bazeia ba Bíblia. Grupu Administradór sadere ba espíritu santu bainhira halo desizaun kona-ba dalan diʼak atu halaʼo serbisu haklaken. Maski nuneʼe, Grupu Administradór koʼalia fali kona-ba desizaun neʼebé sira halo ona atu haree se sira presiza halo mudansa ka lae. Tanbasá? Tanba “situasaun iha mundu neʼe troka daudaun”, no Maromak nia organizasaun tenke halo mudansa tuir situasaun foun.—1 Kor 7:31.

15. Irmaun-irmán balu hasoru susar saida?

¹⁵ Bainhira Maromak nia organizasaun fó sai esplikasaun foun kona-ba Bíblia nia hanorin ka matadalan kona-ba morál, ita simu no halo tuir ida-neʼe. Maibé oinsá ho mudansa seluk neʼebé afeta ita-nia moris? Porezemplu, iha tinan hirak-neʼe nia laran, sasán neʼebé uza atu harii no tau matan ba fatin adorasaun nian sai karun tebes. Tan neʼe, Grupu Administradór fó matadalan ba kongregasaun barak atu uza Reuniaun-Fatin neʼebé hanesan. Tanba mudansa neʼe kongregasaun balu sai ida deʼit no organizasaun faʼan Reuniaun-Fatin balu. No osan neʼe uza fali atu harii Reuniaun-Fatin iha área neʼebé presiza tebes. Karik organizasaun faʼan Reuniaun-Fatin neʼebé Ita uza, ka Ita-nia kongregasaun sai ida deʼit ho kongregasaun seluk, no karik susar ba Ita atu sai toman ho mudansa sira-neʼe. Agora irmaun-irmán balu presiza laʼo dook liután atu tuir reuniaun. Karik irmaun-irmán seluk serbisu makaʼas atu harii ka tau matan ba Reuniaun-Fatin ida no agora duvida tanbasá organizasaun faʼan fali Reuniaun-Fatin neʼe. Karik sira sente katak sira-nia hakaʼas an saugati  deʼit. Maski nuneʼe, sira halo tuir arranju foun sira-neʼe no ita gaba sira.

16. Oinsá mak konsellu iha Koloso 3:23, 24 bele ajuda ita atu haksolok nafatin?

¹⁶ Ita bele sente haksolok nafatin kuandu ita hanoin-hetan katak Jeová dirije ninia organizasaun no ita halo ninia serbisu. (Lee Koloso 3:23, 24.) Liurai David hatudu ezemplu diʼak kuandu nia fó osan atu harii templu. Nia hatete: “Haʼu neʼe sé no haʼu-nia povu mak sé hodi ami bele fó sakrifísiu hanesan neʼe ba Ita ho laran? Buat hotu mai husi Ita-nia liman, no ami fó ba Ita buat neʼebé Ita rasik mak fó ona mai ami.” (1 Krón 29:14) Bainhira ita fó osan nuʼudar kontribuisaun, ita mós fó ba Jeová buat neʼebé nia fó ona mai ita. Maski nuneʼe, Jeová hafolin tempu, enerjia, no sasán neʼebé ita fó atu apoia serbisu neʼebé nia hakarak kumpre.—2 Kor 9:7.

17. Tanbasá Ita lalika sente laran-kraik se Ita presiza halo mudansa?

¹⁷ Atu bele kontinua laʼo iha dalan kiʼik neʼebé lori ba moris, ita hotu presiza laʼo tuir Jesus ho didiʼak. (1 Ped 2:21) Se Ita presiza halo mudansa, keta sai laran-kraik. Kuandu Ita rekoñese katak Ita presiza halo mudansa, neʼe hatudu katak Ita hakarak halo tuir Jeová nia matadalan. Jeová hatene katak ita la perfeitu. Tan neʼe nia la espera ita atu banati-tuir Jesus iha dalan neʼebé perfeitu.

18. Ita presiza halo saida atu bele tama ba mundu foun?

¹⁸ Mai ita hotu tau fokus ba ita-nia futuru no sai prontu atu halo mudansa ba ita-nia hanoin no hahalok. (Prov 4:25; Lc 9:62) Mai ita kontinua hatudu haraik an no ‘kontinua atu haksolok no hadiʼa ita-nia hanoin’. (2 Kor 13:11) Se ita halo nuneʼe, “Maromak domin no dame nian sei hamutuk ho [ita]”. Nia sei ajuda ita atu sente haksolok agora no ita mós sei tama ba mundu foun.