1. Nagnino tika ro azo ampitoviegne amy ty ndaty maro handeha amy ty tane raike agne naho henteagne ty Matio 7:13, 14?

AZO oharegne amy ty ndaty maro handeha amy ty tane raike tika. Faie ty tanjontikagne, le ty ho avy amy i tontolo vaovao agne, i ampitamaen’Andrianagnahare bey hatea antikagney. Mikezake avao tika isan’andro mba hagnorike i lalagne mbamy i havelogne nainai’e mbeoy. Faie fa nirehafe i Jesosy tie “maifitse” o lalagne iohoe, le tsy mora ty mandeha ama’e. (Vakio ty Matio 7:13, 14.) Noho itika tsy voririke ka, le mora mitsile lalan-kafa.​—Gal. 6:1.

2. Ino iaby ty hodinehentikagne ato? (Henteo ty efajoro tihoe “ Hagnampe Antika Hagnitsy ze Toko’e Hahitsy ty Fiambaneagne.”)

² Naho itika tsy te hitsile lalan-kafa, le toko’e ho vognogne hagnitsy ty toe-tsaintika naho hagnova ty raha tsy mete ataontika. Nandrisike ty Kristiana ta Korinto agne ty apostoly Paoly tie: ‘Mikezaha lognandro nareo mba hagnitsy ze toko’e hahitsy.’ (2 Kor. 13:11) Mbe mihatse amantika ka o torohevetse iohoe. Hodinehentikagne ato tie: 1) Nagnino ty Baiboly ro afake magnampe antika hagnitsy ze raha toko’e hahitsy amantikagne, 2) nagnino o Kristiana matotseo ro afake magnampe antika tsy hiala amy i lalagne mbamy i havelogney mbeoy, le 3) naho fa manao akore ro va’e ho sarotse amantika ty hagnorike ty tari-dalagne mey i fandaminagne. Ho treantika ka fa afake magnampe antika ho fale avao ty fiambaneagne naho fa misy fagnitsiagne ndra fagnovàgne.

3. Afake magnampe azo hahavita inogne ty Baiboly?

³ Tsy mora ty mamantatse ze raha tena am-pontikagne ao. Nagnino? Satria mamitake o fò, le va’e ho sarotse amantikagne ty mamantatse tie aia o lalagne itariha’e antikagneo. (Jer. 17:9)  Mora mamita-tegna amy ty “fiheveran-diso” ka tika. (Jak. 1:22) Tsy maintsy mampiasa ty Saontsin’Andrianagnahare areke tika naho te hamantatse ze raha tena am-pontikagne ao. Ty anto’e, mahavita mampibaribary ‘ty raha eretserete ty fontika naho ty raha safirientikagne’ io. (Heb. 4:12, 13) Tena mitovy amo o fitaovagne fagnenteagne ty raha agnate vatantikagne agneo areke o Baibolio. Faie tsy maintsy miambane tika naho te hahavita hampihatse ty torohevetse agnate’e ao ndra mey ty solon-tegna i Jehovah.

4. Akore ty ahafantarantikagne tie nanjare nirehareha ty Saoly Mpanjaka?

⁴ Treantikagne amy ty raha nanjò i Saoly Mpanjaka tie hanao akore ty hiafarantika naho tsy miambane. Naho fa nanjare nirehareha ty Saoly, le tsy nitsapa’e sasa tie nila nagnitsy ty toe-tsai’e naho ty raha tsy mete natao’e reke. (Sal. 36:1, 2; Hab. 2:4) Vao mainke trea nibaribary zay naho fa nimeigne toromareke mazava reke miomba ty raha toko’e hatao’e naho fa rese’e o Amalekitao. Tsy nagnorike i toromareke nimeigne azey reke. Naho fa nirehake aze aza ty Samoela mpaminany, le tsy nieke ty fahadisoa’e reke. Nagnamaren-tegna reke, le nihamaivagne’e ty raha natao’e sady ty hafa ro ndra nimei’e tsiny. (1 Sam. 15:13-24) Taloha io reke, le trea tie fa nanagne ze toe-tsaigne zay. (1 Sam. 13:10-14) Mampanahelo fa nengà i Saoly hirehareha ty fo’e. Tsy nagnitsy ty toe-tsai’e reke, le nivignetse tama’e ty Jehovah sady tsy neke’e ho mpanjaka sasa reke.

5. Ino ty raha ianarantika boake amy i Saoly?

⁵ Mila misaintsaigne ty fagnonteneagne retoagne tika naho tsy te hanahake i Saoly: ‘Naho fa mamaky Baiboly raho, mipay tali’e tsy hagnorihagne ty torohevetse ao vao raho naho ohatse treako tie misy raha toko’e hahitsiko? Mieretseretse vao raho tie tsy tena raty i raha tsy mete ataokoy? Ty hafa vao ro meiko tsiny noho ty raha tsy mete nataoko?’ Naho eka iaby ty avalentikagne ireo, le mila magnitsy ty toe-tsaintikagne tika. Naho tsy izay, le hanjare hirehareha tika, le tsy ho eké i Jehovah ho ragne’e sasa.​—Jak. 4:6.

6. Hazavao ty tsy nampitovy i Saoly Mpanjaka naho i Davida Mpanjaka.

⁶ Inogne ty tsy nampitovy i Saoly Mpanjaka naho i Mpanjaka nandimbe azey, ndra i Davida? Tena nitea ty “lalà i Jehovah” ty Davida. (Sal. 1:1-3) Nihai’e ka fa magnavotse ze ndaty miambane ty Jehovah fa manohetse ze ndaty mirehareha. (2 Sam. 22:28) Nengà i Davida hagnitsy ty toe-tsai’e areke ty lalàn’Andrianagnahare. Hoe reke: “Hisaotse i Jehovah raho, noho ireke magnomey torohevetse ahy. Mbe magnanatse ahy avao ty voako ndra tie naho fa halegne aza.”—Sal. 16:7.

7. Ino ty hataontikagne naho miambane tika?

⁷ Naho itika miambane, le hengantikagne ty Saontsin’Andrianagnahare hagnova ze eretsere-draty amantikagne ao mba tsy hahavy antika hanao raha raty. Hoe maniahy antika reke amy izay tie: “Intoy ty lalagne, le andehano.” Mampitao antika reke naho ohatse tika manomboke mitsile magnavana ndra magnavia. (Isaia 30:21) Maro ty soa ho azontikagne naho mitsanogne ty Saontsy i Jehovah tika. (Isaia 48:17) Tsy hahatsiaro ho megnatse ndra afa-baraka ohatse tika satria itika avao le fa mahita ty raha toko’e hahitsy amantika. Vao mainke hifandrambe maifitse amy i Jehovah ka tika satria tsapantika tie manahake o anake ikokoagneo ty fomba indesa’e antika.—Heb. 12:7.

8. Akore ty azontika ampiasagne ty Saontsin’Andrianagnahare mba hanahake o hetsorò, arake ty Jakoba 1:22-25?

⁸ Manahake o hetsorò ty Saontsin’Andrianagnahare. (Vakio ty Jakoba 1:22-25.) Itika zao magnente hetsoro naho fa handeha hiboake. Nagnino? Itikagne avao amy izay, le fa mahatrea ty raha toko’e hambinegne amantikagne. Naho itika ka areke mamaky Baiboly isan’andro, le hahatrea tie akore ty fomba azontika  agnitsiagne ty toe-tsaintikagne. Maro zao ty mahatrea tie mahasoa ty fanoagne teny vakiegne isake maraindray. Magnampe iareo hahatrea ty raha mila ahitsy iareo zay. Misaintsaigne ty fomba hampihara iareo ty torohevetse nitrea iareo tao iareo agnate i andro ignehoeke. Mila mianatse Baiboly naho misaintsaigne ze raha ianarantika isan’andro ka tika. Tena ilaegne ty manao ireo naho teantika ty tsy hiala amy i lalagne mbamy i havelogney mbeoy.

9. Nagnino ty namantika ro va’e hagnitsy antika?

⁹ Fa nisy fotoagne vao rehe nanao raha va’e hitarike azo hanimba ty fifandrambesa’o amy i Jehovah? (Sal. 73:2, 3) Akore ty natao’o naho fa nisy nama’o matotse raike nagnomey torohevetse azo? Tena soa ty natao’o naho ohatse nirambese’o i toroheve’ey sady nampihare’o. Azo antoke fa nankasitrake aze ka rehe, noho ireke nisikigne herim-po mba hampitaoagne azo.—Ohab. 1:5.

10. Ino ty toko’e hatao’o naho misy nama’o magnitsy azo?

¹⁰ Maniahy antika ty Baiboly tie: “Naho mijera ahy ty ndaty maren-tane, le rambeseko ho hasoa fagnahy feno hatea zay.” (Sal. 141:5) Ino ty tea izay ho rehafegne? Intoy misy ohatse. Andao hatao tihoe hanapake amy ty arabey raike rehe. Faie tondregne mikitikitike telefony avao rehe naho fa nanapake amy i lalagney eo, le tsy trea’o tie misy tobile hidosy azo. Faie nisy nama’o raike tamy izay nanintogne i tagna’oy mafe mba hiheregna’o. Va’e ho narare i tagna’oy satria sininto’e mafe. Faie naho tsy nanao izay malaky reke, le ho nivoadosy i tobiley rehe, le nimate. Ndra tie va’e hanaintaigne agnate ty andro maromaro aza i tagna’oy, le azo antoke fa tsy ho boseke amy i ragne’oy rehe. Ty hankasitrake aze aza ty hatao’o noho ireke nagnavotse azo. Naho misy nama’o areke mirehake azo tie tsy mifagnarake amy ty fitsipy i Jehovah ty raha rehafe’o ndra atao’o, le va’e ho mafe ama’o amy ty voaloha’e ty handrambe ty torohevetse mei’e azo. Faie ko boseke ama’e rehe. Hagegeagne ty fanoagne izay. (Mpito. 7:9) Ty toko’e hatao’o aza, le ty hisaotse i nama’oy, noho ireke nisikigne herim-po hirehafagne azo.

11. Nagnino ty ndaty raike ro tsy vognogne handrambe ty torohevetse mey ty nama’e aze?

¹¹ Fa inogne moa ty mahavy ty ndaty raike tsy handrambe ty torohevetse soa boake amy ty nama’e? Fireharehagne. ‘Ze raha tea’e ho rey avao ro mahafinaritse’ o ndaty mireharehao ty mitsanogne aze. ‘Tsy mitsanogne ty hamarenagne sasa’ ka iareo. (2 Tim. 4:3, 4) Mieretseretse iareo tie tsy mila meigne torohevetse sasa satria fa hendre ndra ambone noho ty hafa. Faie hoe ty apostoly Paoly: “Naho misy mihevetse ty tegna’e ho ambone, ie amy izao reke tsy misy dika’e, le mamitake ty tegna’e reke.” (Gal. 6:3) Magnazava ze hevetse zay soa ty raha nirehafe i Solomona Mpanjaka toy. Hoe reke: “Ndra aleo ajaja mahantra faie hendre, ta tie mpanjaka antetse faie gege, le tsy mahatsapa tie mila fampitaoagne.”—Mpito. 4:13.

12. Ino ty lesogne ianarantika boake amy i apostoly Petera?

¹² Tena modely soa ho antika ty apostoly Petera. Nagnitsy aze tagnatreha o ndaty maro teo ty apostoly Paoly tie indraike. (Vakio ty Galatianina 2:11-14.) Niboseke tamy i Paoly vao reke? Nifantoke tamy ty fomba nirehafa i Paoly aze naho tamy ty toeragne nijobogne’e hirehafagne aze vao reke? Aha’a. Nirambese’e i torohevetse nimey i Paoly azey sady tsy nitagne lolom-po ka reke. Tafara tatoy aza, le nirehafe’e fa ‘rahalahi’e tena mami’e’ ty Paoly.—2 Pet. 3:15.

13. Ino ty raha mila saintsaignentika aloha ty hagnomezagne torohevetse?

¹³ Ino ty toko’e hatao’o naho mieretseretse rehe tie mila meigne torohevetse ty nama’o raike? Aloha ty hirehafa’o ama’e, le saintsaigno zao: ‘Kera ndra izaho ro “maregne loatse”?’ (Mpito. 7:16) Ty ndaty maregne loatse, le  mitsaratsara ty hafa arake ty fomba fiheve’e manokagne fa tsy arake ty fitsipy i Jehovah. Va’e tsy tena hitretré ty hafa ka reke. Tena ilaegne areke ty mandineke soa ty anto’e mandrisike azo hagnomey torohevetse aze. Akore naho fa nanao izay rehe, faie mbe mahatsapa tie mila magnomey torohevetse i nama’oy avao? Rehafo ama’e i olagney, le mampiasà fagnonteneagne hagnampea’o aze hahatsapa tie tena tsy mete ty raha natao’e. Anò azo antoke fa mioregne amy ty Soratse Masigne ty raha rehafe’o. Ko haligno ka fa tsy anjara’o ty hitsara i nama’oy fa ahy i Jehovah. (Ohab. 3:5; Rom. 14:10) Tretrézo i nama’oy manahake ty natao i Jesosy. (Mat. 12:20) Nagnino? Arakarake ty fomba indesantikagne ty hafa ty fomba hindesa i Jehovah antika ka.—Jak. 2:13.

14. Ino ty raha mey i fandaminagne antika?

¹⁴ Mampiasa i fandamina’e an-tane etoỳ ty Jehovah mba hitarihagne antika mbamy i lalagne mbamy i havelogne nainai’e mbeoy. Amy ty alala ty boke, gazete, video naho fivoriagne ty anoa i fandaminagne izay. Ireo ty agnampea’e antika hahatrea ty fomba hampiharagne ty torohevetse amy ty Saontsin’Andrianagnahare ao. Tena azo itokisagne i fagnazavagne rey satria mioregne amy ty Soratse Masigne. Naho fa handrambe fanapaha-kevetse zao ty Filan-keve-pitantanagne tie akore ty fomba soa hagnatanterahagne ty asa fitoriagne, le miantehetse amy ty fagnahy masigne. Faie ndra tie fa nanao izay ty Filan-keve-pitantanagne, le hentea’e mateteke ka tie kera misy toko’e hahitsy ndra hovagne ty fanapaha-kevetse nirambese’e. Fa nagnino? Satria miovaova ty ‘raha amy ty tontolo toy eto,’ le tsy maintsy manao raha mifagnarake amy ze raha vaovao misy eo ty fandaminagne.—1 Kor. 7:31.

15. Ino ty raha sarotse natrehe ty mpitory ila’e?

¹⁵ Akore naho misy nahitsy ty fahazoantikagne ty hamarenagne ila’e ndra meigne tari-dalagne miomba ty hagnorihantika ty fitsipy i Jehovah tika? Azo antoke fa hagneke naho hagnorike i raha rey tika. Faie akore naho misy voka’e manokagne amy ty fiaignantika i fagnovàgne rey? Taogne tsiampeampe lasa zay, le trea tie nihanitombo ty vilin-draha ilaegne amy ty fagnoregnagne naho ikolokoloagne ty tragno ampiasaentikagne mba hanompoagne i Jehovah rey. Nanapa-kevetse areke ty Filan-keve-pitantanagne fa Anjomba i Fanjakagney raike avao ro hivoria ty fiangonagne maromaro. Noho ze fagnovàgne zay, le natambatse ty fiangonagne  ila’e, le nisy Anjomba i Fanjakagney ila’e ka navarotse. Le natao akore ze vola niazo? Nampiasaegne mba hagnoregnagne Anjomba i Fanjakagney amy ty toeragne tena ilàgne izay agne. Va’e tsy ho nimora tama’o ty nagneke ze fagnovàgne zay naho ohatse ty Anjomba i Fanjakagney nisy azo o navarotseo, le natambatse amy ty fiangonagne hafa ka rehe. Misy mpitory ila’e zao voatere tsy maintsy mandeha lavitse naho fa hivory. Ty ila’e ka niasa mafe nagnoregne i Anjomba rey. Va’e hagnontane areke iareo tie: ‘Inogne ty anto’e namarotagne ty Anjomba i Fanjakagney tiagne?’ Va’e hieretseretse aza iareo tie lany fotoagne naho hery avao nagnoregne i tragno rey. Faie ndra tie va’e ho teo zay, le toko’e ho deraegne iareo satria nagneke sady nankatò i fagnovagney.

16. Nagnino tika ro ho fale avao naho mampihatse i torohevetse amy Kolosianina 3:23, 24 aoy?

¹⁶ Naho itika te ho fale avao naho fa misy fagnovàgne, le mila tadidientika tie ze asa ataontika, le hoahy i Jehovah iaby sady ireke ty mitarike i fandaminagne. (Vakio ty Kolosianina 3:23, 24.) Tena soa ho tsikombentikagne ty toe-tsaigne naseho i Davida Mpanjaka, naho fa ireke nagnomey vola hagnoregnagne i tempolỳ. Hoe reke: “Fa ia moa raho, le ia ka moa o vahoakὸ ro hanagne hery hagnomeagne fagnatetse an-tsitrapo hoe izao? Boake ama’o ze kila raha, sady ty raha boake amy ty fità’o avao o agnomea’ay azò.” (1 Tan. 29:14) Naho magnomey vola hatao fagnomezagne areke tika, le tsy tihoe hirike amantika rey. Raha hirike amy i Jehovah avao rey naho ty maregne. Faie tena fale reke naho magnomey ty fotoantika, ty herintika, naho ty volantikagne tika mba hanohagnagne ty asa tea’e hatao.—2 Kor. 9:7.

17. Nagnino tika ro tsy toko’e ho kivy naho mahatsapa tie misy raha mila ahitsy ty amantika?

¹⁷ Naho itika te handeha amy i lalagne maifitsey avao, le tsy maintsy magnorike ty modely i Jesosy. (1 Pet. 2:21) Faie naho mahatsapa rehe tie misy raha mbe mila ahitsi’o, le ko kivy. Ty anto’e, trea amy izay fa te hagnorike ty tari-dala i Jehovah rehe. Ko haligno fa ony i Jehovah soa tie tsy voririke tika. Tsy mitamà areke ty Jehovah tie ho vitantikagne ty hagnorike ty modely i Jesosy amy ty fomba voririke.

18. Ino ty raha tsy maintsy ataontika naho teantika ty hahatratse i tanjontikagney?

¹⁸ Lonike abey tika mba hifantoke amy ty hoavy sady ho vognogne hagnitsy ty toe-tsaintika naho ty raha tsy mete ataontikagne. (Ohab. 4:25; Lioka 9:62) Lonike ka tika hiambane avao, “ho fale lognandro, naho hagnitsy ze toko’e hahitsy.” (2 Kor. 13:11) Naho manao izay tika, le ho ‘amantika i Andrianagnahare ty hatea naho ty fieragneragnagney.’ Ho avy amy i tontolo vaovaoy agne ka tika, sady ho fale avao amy itika an-dalagne ho mbeoy.