1. Guya khu Matewu 7:13, 14, khu ginani hi nga ganeyago gu khethu hi womo ndziyani?

HATSHAVBO ha gu dzigaradzeya gu thumeya Jehovha gasi hi kodza guta vbanya ga mafu nya maphya ma na gu ba ma fumedwa khu Mufumo wa Jehovha. Tshigu ni tshigu ha gu zama gu gimbiya khu ndziya yi yisago womini. Ganiolu, kha nga a ganedego Jesu, ndziya yeyi yi hongide nigu dzimbe dzitepo si ngu garadza gu gimbiya khiyo. (Leri Matewu 7:13, 14.) Khu kotani nya gu mba vbeleya gwathu si ngu vbevbuga gu yi diga ndziya yeyi. — Gal. 6:1.

2. Ginani hi na bhulago khigyo avba nya ndrima yeyi? (Wona kwadru ““ Gudzinogisa gu ngu hi phasa gu vbindrugedza silo nyo khaguri.”)

² Gasi gu simama ndziyani nyo honge yi yisago womini, hi yede gu dzi emiseya gu vbindrugedza mapimiselo yathu, mavbanyelo ni esi hi girago. Mupostoli Pawulo kutside maKristo ma nga ba ma vbanya Korinto gu simama gu vbindrugedza silo nyo khaguri. (2 Kor. 13:11) Wusingalagadzi wowo wu ngu thuma gwathu nethu. Avba nya ndrima yeyi hi na wona edzi Bhibhiliya yi nga hi phasago khidzo gu vbindrugedza silo nyo khaguri ni edzi dzipari dzi vidzidwego dzi nga hi phasago khidzo gu simama ndziyani yi yisago womini. Hi na bwe hi wona gambe egi gi nga girago si hi garadzeya gu landrisa sileletelo hi ningwago khu hengeledzano ya Jehovha. Hi na wona edzi gu dzinogisa gu nga hi phasago khidzo gu vbindrugedza silo nyo khaguri hi bwe hi simama na hi tsakide thumoni wa Jehovha.

3. Lito la Nungungulu li nga gu phasa kharini?

³ Kha si vbevbugi gu gevisisa mapimo yathu ni edzi hi dzipwago khidzo. Khu ginani? Kholu monyo wathu wu ngu kanganyisa nigu si nga hi garadzeya guti omu wu na hi yisago umo. (Jer. 17:9) Si ngu  vbevbuga gu dzi lipheya habune “khu Magana nya gukanganyise.” (Jak. 1:22) Khu kharato, hi yede gu thumisa Lito la Nungungulu gasi hi dzi gevisisa. Lito la Nungungulu li ngu hi yeyedza edzi hi gu idzo khu ndrani li bwe li tugula mahingigedzo ni mapimo ma sihadego monyoni gwathu. (Hebh. 4:12, 13) Bhibhiliya ya gu fana ni mutshini va girago khuwo raio-X owu wu gu ni makodzelo nya gu wone esi si gomogo ndrani nya muthu. Ganiolu, hi yede gu dzi nogisa gasi hi si kodza gu thumisa wusingalagadzi hi wu manago omu nya Bhibhiliya mwendro ga ava va emeyago Nungungulu.

4. Ginani gi yeyedzago gu khigyo Pfhumu Sawule khade muthu nya gu dzi khusedze?

⁴ Giyeyedzo gya Pfhumu Sawule gya gu hi yeyedza esi si giregago ha gu mba dzinogisa. Sawule a di gu dzi khusedza nyo bwe a bomba gu dzumeya gu khuye yede gu vbindrugedza silo nyo khaguri. (Ndzi. 36:1, 2; Habh. 2:4) Khu giyeyedzo, tepo Jehovha a nga embeya Sawule esi a nga ba a yede gu gira na si gu dwani ni Vaamaleki uye kha engisa. Tepo muprofeti Samuweli a nga mu khawuka khu gu mba engisa, Sawule a di bomba gu dzumeya gu khuye giride gihoso. Uye a di dzi emeleya, a ganeya khuye kha nga gira gihoso nya gikhongolo, a bwe khuye vathu va nga mu kutsedzeya gu gira isoso. (1 Sam. 15:13-24) Sawule kha nga ba a pheya gu gira silo nya nga esi. (1 Sam. 13:10-14) Khu kharato, uye dzumelede liphuvbo nya gu dzi khusedze li dandra monyoni gwaye. Uye kha vbindrugedza mapimo yaye, esi si giridego gu a si tsakedwi khu Jehovha.

5. Ginani hi nga gi hevbulago avba nya giyeyedzo gya Sawule?

⁵ Ethu kha hi dzini gu fana ni Sawule, khu kharato, hi yede gu dzi wudzisa khethu: ‘Tepo nyi lerigo wusingalagadzi wu gomogo omu nya Lito la Nungungulu, ina nyi ngu zama dzindziya nya gu dzi emeleye gasi nyi si wu landrisi? Ina nyi ngu pimisa gu kheni esi nyi girago kha sa hosega ngudzu? Ina nyi ngu rwega vambe nandru khu kotani nya esi nyi girago?’ Abari gu hlamulo nya siwudziso sesi i ina, hi yede gu vbindrugedza mapimiselo yathu ni mavbanyelo yathu. Kholu ha gu mba gira isoso, hi na khala vathu nya gu dzi khusedze ava Jehovha a si va vbwetigo kha nga dzipari dzaye. — Jak. 4:6.

6. Tshamuseya gu hambana gu gomogo avba ga Pfhumu Sawule ni Pfhumu Dhavhidhe.

⁶ Nga wona gu hambana gu gomogo avba ga Pfhumu Sawule ni Pfhumu Dhavhidhe. Dhavhidhe a di gu gola ‘nayo wa Nungungulu.’ (Ndzi. 1:1-3) Dhavhidhe a di gu dziti gu khuye Jehovha a gu vbanyisa ava va dzi nogisago ganiolu a wugeya ava va dzi khusedzago. (2 Sam. 22:28) Khu kharato, Dhavhidhe dzumelede nayo wa Nungungulu wu vbindrugedza mapimo yaye. Uye lovide khuye: “Nyi ngu rungudza PFHUMU Nungungulu a nyi layago, ni vbakari nya wutshigu, monyo wangu wu ngu nyi dundrugisa.” — Ndzi. 16:7.

7. Ginani hi na girago ha gu ba hi dzi nogisa?

⁷ Ha gu ba hi dzi nogisa hi na dzumeleya Lito la Nungungulu li vbindrugedza ni yavbini mapimo nyo vivbe hi gu nawo na hi nga si hosisi. Lito la Nungungulu li na fana li lito li hi embeyago khilo: “Eyi khiyo ndzila; gimbilani khiyo.” Ilo li na hi gengedza ha gu pheya gu gira silo nya mba sadi. (Isa. 30:21) Gu engisa Jehovha khya lisima ngudzu gwathu. (Isa. 48:17) Khu giyeyedzo, hi na potsa gu khaleya gu kawukwa tepo yatshavbo. Nigu hi na hidzimeya ga Jehovha kholu hi ngu dziti gu khethu uye a ngu hi khathaleya kha nga papayi nya lihaladzo. — Hebh. 12:7.

8. Kha nga si khumbugidwego omu ga Jakobe 1:22-25, hi nga thumisa Lito la Nungungulu kha nga libona khu ndziya muni?

⁸ Lito la Nungungulu li nga thuma kha nga libona gwathu. (Leri Jakobe 1:22-25.) Nya vangi gwathu va ngu tala gu dzi bona na va si khugi khu gaya. Khu ndziya yoyo hi ngu kodza gu wona gu ina hi yede gu vbindrugedza gilo nyo khaguri gani na hi nga si wonwi khu vambe. Khu gu fana, tepo hi lerigo Bhibhiliya tshigu ni tshigu hi na wona  dzindziya dzi nga hi phasago gu vbindrugedza mapimo ni mavbanyelo yathu. Nya vangi va ngu phasega khu gu leri lowo nya litshigu vbadzimindrutunu na va nga si khugi khu gaya. Avo va gu dzumeleya gu esi va leridego si kuha mapimo yawe. Khavbovbo, ndrani nya litshigu avo va gu zama gu wona dzindziya nya edzi va nga thumisago khidzo wusingalagadzi wa omu nya Lito la Nungungulu. Nigu hi yede gambe gu hevbula hi bwe hi dundrugeya khu Lito la Nungungulu tshigu ni tshigu. Esi si nga wonega khatshi si dugwana, ganiolu, iso gimwegyo nya silo nya lisima esi hi yedego gu gira gasi hi simama ndziyani nyo honge yi yisago womini.

9. Lini avba pari si na lombago gu yi gu kawuka?

⁹ Ina u phede gu gira gilo gi na ghohago wupari wago ni Jehovha? (Ndzi. 73:2, 3) Tepo dzipari dzi gu kawukago, ina u ngu dzi engisa u bwe u thumisa wusingalagadzi wadzo? Wa gu ba u gira isoso, u ngu gira gwadi nigu khu lisine u ngu bonga ngudzu kholu dzipari dzago dzi gu gengedzago. — Mav. 1:5.

10. Ginani u yedego gu gira ya gu tshuka pari yago yi gu kawuka?

¹⁰ Lito la Nungungulu li ngu hi dundrugisa khilo: ‘I tshukwana gu thedwa dzimbanga khu pari, guvbindra gu ningwa bheju khu nala.’ (Mav. 27:6) Ma gu tshamuseya ginani malito yaya? Nga wona giyeyedzo gegi: Nga dundrugeya na wu gu vbweta gu tshatuga estradha gu talago gu vbindravbindra ngudzu dzimovha, ulolo na wu gu phwinyaphwina telefone. U pheya gu tshatuga nya mba khedza mudzibambe. Khavbovbo, pari yago yi ta gu mola khu libogo, yi gu ndrindra yi gu dusa muestradhani. Iyo yi di gu mola khu ndziya nya gu upwa gu vbisa, ganiolu esi yi giridego si giride gu u si vetwi khu movha. Ambari olu adzina u phwidego guvbisa khu matshigu nya mangi, ina u di hadzi gorogeya pari yago kholu yi gu modego khu ndziya nya gu upwa guvbisa? Khu lisine ne. Uwe u di hadzi gu yi bonga kholu yi gu phasidego. Khu ndziya nyo fane, ya gu tshuka pari yago yi gu embeya gu khiyo esi u girago kha si gimbileyani ni gugola ga Nungungulu, adzina si nga gu vbisa gupheyani, ganiolu, u nga gorogi khu kotani nya olu yi gu ningidego wusingalagadzi, kholu isoso wupumbu. (Muh. 7:9) Wulangani nya isoso, bonga kholu pari yago yi tiyidego hwambo yi gu gengedza.

11. Ginani gi girago gu muthu a bomba wusingalagadzi nya wadi a ningwago khu pari yaye?

¹¹ Ginani gi girago gu muthu a bomba wusingalagadzi nya wadi a ningwago khu pari? Gu dzikhusedza. Vathu nya gu dzi khusedze va gu gola “silo si tsakisago myonyo yawe.” Avo va gu “diga gu yingisa sihevbudzo nya lisine.” (2 Thim. 4:3, 4) Avo va gu pimisa gu khavo kha va vbweti wusingalagadzi kholu va nguti ngudzu mwendro va na ni lisima ngudzu gu vbindra vambe. Khu kharato, mupostoli Pawulo lovide khuye: “Muthu a gu dzi alakanya gukhuye gilo, nasiri gilo, a ngu dzi pfhadza abune.” (Gal. 6:3) Pfhumu Solomoni tshamusede gwadi silo sesi. Uye a di lova khuye: “Lidzaha nya gugengele ambari nari gisiwana, li ngu vbindra mufumeli a gumbidego, nari gipumbu, a si dzumeligo gu kawukwa.” — Muh. 4:13.

12. Guya khu Vagalatiya 2:11-14, ginani hi gi hevbulago avba nya giyeyedzo gya mupostoli Pedro?

¹² Nga dundrugeya khesi Pedro a giridego tepo Pawulo a nga mu kawuka mbeli ga vathu nya vangi. (Leri Vagalatiya 2:11-14.) Pedro na gorogede Pawulo khu ndziya a ganedego khiyo, ni olu a mu kawukidego mbeli ga vathu nya vangi. Ganiolu, Pedro a diri muthu nya gu gengeye. Uye dzumede wusingalagadzi a ningidwego nigu kha gorogeya Pawulo. Wulangani nya isoso, avba nya lidangaliya laye ranide Pawulo khuye ‘Ndriyathu nya gigodwa.’ — 2 Ped. 3:15.

13. Ginani hi yedego gu dundrugeya khigyo na hi nga si ningi wusingalagadzi muthu nyo khaguri?

¹³ Wa gu vbweta gu ningeya wusingalagadzi pari yago, ginani u yedego gu dundrugeya  khigyo? Na wu nga si ganeyi ni pari yago dzi wudzise khuwe: ‘Ina nya gu dzi gira muthu nya gu lulame?’ (Muh. 7:16) Muthu a dzi wonago na lulamide a gu lamula guya khu milayo yaye nasiri eyi ya Jehovha nigu uye kha yeyedzi pweya-wusiwana. Wa gu khala u dundrugeya gwadi khu gighelo gi gu girago u vbweta gu ninga wusingalagadzi pari yago, u bwe u dzipwa na wu dongide gu gira isoso, yi embeye gigaradzo gyakona u bwe u thumisa siwudziso gasi gu yi phasa gu pwisisa gu khiyo esi yi giridego si hosegide. Tiyisega gu khuwe esi u ganeyago si ngu dzi seketeya omu nya milowo nigu dundruga gu khuwe pari yago ya gu dzi hlamuleya ga Jehovha nasiri gwago. (Rom. 14:10) Thumisa guti gu gomogo omu nya Lito la Nungungulu nigu tepo u ningago wusingalagadzi muthu nyo khaguri pimedzeya pweya-wusiwana wa Jesu. (Mav. 3:5; Mat. 12:20) Khu ginani? Kholu Jehovha a na hi phara khu ndziya yamweyo hi pharago khiyo vambe. — Jak. 2:13.

14. Ginani egi hengeledzano ya Nungungulu yi hi lulamiseyago?

¹⁴ Jehovha a gu hi thangeya ndziyani yi yisago womini khu gu thumisa hengeledzano yaye ya mafuni, eyi yi lulamiseyago dzivhidhiyu, mabhuku ni mitshangano yi hi phasago gu thumisa wusingalagadzi wa omu nya Lito la Nungungulu. Mahungu yaya ma tumbegide kholu ma gu dzi seketeya omu nya Milowo. Tepo vandriyathu va Huwo nya Guthangeye va hungago ndziya nya yadi nya gu gire thumo nya gu tshumayele, avo va gu tumba liphuvbo nya guage. Ambari ulolo, Huwo nya Guthangeye tepo yatshavbo yi ngu gevisisa gwadi esi yi hungidego gasi gu wona gu ina gyomo gi yedego gu vbindrugedzwa gani. Khu ginani? “Kholu makhalelo nya mafu yaya ma ngu vbindrugedza” nigu hi yede gu dzi pwananisa ni siemo nya siphya. — 1 Kor. 7:31.

15. Gigaradzo muni egi vahuweleyi nyo khaguri va tshanganago nagyo?

¹⁵ Tepo hengeledzano ya Nungungulu yi hi ningago tshamuselo nya wuphya khu gihevbudzo nya Bhibhiliya, mwendro tepo yi hi ningago gileletelo nya mavbanyelo, ethu ha gu gi dzumeya hi bwe hi gi thumisa. Ganiolu, ginani hi girago tepo hengeledzano ya Nungungulu yi vbindrugedzago silo nyo khaguri si hi khuhago? Khu giyeyedzo, ga myaga yeyi dzitsapawu dzi vbwetegago gasi gu vbaha ni gu sayisa malanga nya wukhozeyi dzi engedzede ngudzu. Khu kharato, Huwo nya Guthangeye yi leletede khiyo mabandla nya mangi ma nga thumisa Salawu mweyo. Isoso si nga gira gu mabandla ma thumisa Salawu mweyo ni gu dzimbe dziSalawu nya Mufumo dzi rengiswa. Dzitsapawu dzi manwago dza gu thumiswa gasi  gu vbaha dzisalawu ga malanga gu vbwetegago ngudzu giphaso. Abari gu wa gu vbanya ga wulanga owu dziSalawu dzi rengiswago nigu mabandla na ma gu thumisa Salawu mweyo, adzina si nga gu garadzeya gu dzi pwananisa ni giemo nya giphya. Vambe vahuweleyi sa gu lomba gu gimbiya pfhuka nyo laphe gasi gu hongola mitshanganoni. Vambe va dzi garadzeyago gu vbaha ni gu sayisa Salawu nya Mufumo, adzina va nga dzi wudzisa khavo khu ginani Salawu yeyi si lombago gu yi rengiswa? Avo adzina va nga dzipwa khatshi va di thumeya giburwana ganiolu, va ngu dzi pwananisa ni malulamiselo yaya nya maphya nigu va ngu zundzega khu isoso.

16. Gu thumisa wusingalagadzi wu gomogo omu ga Vakolosi 3:23, 24, si nga hi phasa kharini gu simama na hi tsakide?

¹⁶ Hi na simama na hi tsakide ha gu dundruga gu khethu thumo hi wu girago ha gu gireya Jehovha ni gu uye a ngu thangeya hengeledzano yaye. (Leri Vakolosi 3:23, 24.) Pfhumu Dhavhidhe hi ningide giyeyedzo nya gyadi tepo a nga dusa dzitsapawu gasi gu vbahwa Tempele. Uye a di khuye: “Eni, gumogo ni vathu vangu, khethu vamani nya gukala hi dzi kodza gu ningela khu gugola silo nya nga esi? Satshavbo sa guta khiyo gwago, iso hi ningedego hi si manide mandzani gwago.” (1 Dzik. 29:14) Tepo hi girago miningelo, anethu ha gu ningeya Jehovha esi si tago khiyo gwaye. Ganiolu, Jehovha a ngu tsaka ngudzu tepo hi thumisago tepo yathu, tshivba ni dzitsapawu gasi gu gira thumo waye. — 2 Cor. 9:7.

17. Khu ginani u si yeligo gu vbeya tshivba wa gu tugula gu khuwe somo u yedego gu vbindrugedza?

¹⁷ Gasi hi simama ga ndziya nyo honge yi yisago womini, hatshavbo hi yede gu pimedzeya giyeyedzo gya Jesu. (1 Ped. 2:21) So wonega gu khatshi somo u yedego gu vbindrugedza, u nga vbeyi tshivba, kholu isoso sa gu yeyedza gu khiso u ngu dzina gu thangedwa khu Jehovha. U nga divali gu khuwe Jehovha a ngu dziti gu khuye kha ha vbeleya, khu kharato uye kha vireyi gu khuye hi pimedzeya giyeyedzo gya Jesu khu ndziya nyo vbeleye.

18. Ginani hi yedego gu gira gasi gu vboheya misuwo yathu?

¹⁸ Hatshavbo hongoleni hi vega gupima avba nya wumindru nya wadi hi bwe hi dzi emiseya gu vbindrugedza mapimo, mavbanyelo ni sigiro sathu. (Mav. 4:25; Luka 9:62) Khu gu dzinogisa hongoleni hi simama na hi tsakide hi bwe hi vbindrugedza silo nyo khaguri. (2 Kor. 13:11) Ha gu gira isoso, ‘Nungungulu nya lihaladzo ni gurula a na khala ni ethu.’ Uye a na hi phasa gu khala na hi tsakide olu nigu a na hi ninga womi nya pindrugedwa mafuni nya maphya.