1. Hi ku ya hi Matewu 7:13, 14, hi yini ndlela leyi hi fambaka hi yona?

HINKWERHU hi le ndleleni leyi yaka misaveni leyimpsha, lani hi nga ta fumiwaka hi Yehovha. Siku ni siku hi fanele hi lwa swaku hi kuma wutomi la ku kala li nga heli. Kambe Yesu a hlaye swaku ndlela leyi yi lalile. Naswona minkama yin’wana swa karhata ku famba ka yona. (Lerha Matewu 7:13, 14.) Leswi hi kalaka hi nga hetisekanga, swa vevuka ku tshuka hi lahleka ivi hi tshika ku landzela ndlela leyi. — Gal. 6:1.

2. Hi ta djondza hi yini ka nhlokomhaka leyi? (Vona ni kwadru leli nge “ Ku Tiveka Hansi Swi Hi Pfuna Ku Txintxa Lomu Swi Lavekaka Kona.”)

² Loko hi lava ku famba hi ndlela leyi yisaka wuton’wini, hi fanele hi tinyimisela ku txintxa mapimiselo ya hina, leswi hi swi rhandzaka ni leswi hi swi yentxaka. Mupostolo Pawulo a byele Vakreste va Korinto swaku va pfumela ku wololoxiwa. (2 Kor. 13:11) Leswi a nga va byela swona, swa tirha ni ka hina namuntlha. Ka djondzo leyi, hi ta vona swaku Bibele ni van’wana, va nga hi pfunisa ku yini swaku hi txintxa leswi lavekaka, kuva hi tama hi famba a ndleleni ya wutomi. Naswona hi ta vona swaku hi le ka swiyimu swini lani swi nga hi karhatelaka ku landzela leswi nhlengeletanu yi hi byelaka swona. Hi ta tlhela hi vona swaku ku tiveka hansi swi nga hi pfunisa ku yini ku txintxa hi tlhela hi tama hi tirhela Yehovha na hi tsakile.

3. Rito la Xikwembu li nga hi pfunisa ku yini?

³ A swi vevuki ku kambela mimpimiso ya hina ni leswi hi titwisaka xiswona. Hi mhaka muni? Hi mhaka leswi mbilu ya hina yi kanganyisaka, swi nga hi karhatela ku tiva lomu yi hi yisaka kona. (Yer. 17:9) Swa vevuka kuva yi hi ‘kanganyisa’.  (Yak. 1:22) Hi mhaka leyo, hi fanele hi tirhisa Rito la Xikwembu swaku hi tikambela. Rito la Xikwembu li nga hi pfuna ku vona leswi hi nga tshamisa xiswona ndzeni, “miyanakanyu ni makungu ya mbilu.” (Hev. 4:12, 13) Rito la Xikwembu hi nga li fanisa ni muchini wa ku hamba raio-X, wu hi pfunaka ku vona leswi hi nga tshamisa xiswona ndzeni. Kambe swi lava hi tiveka hansi swaku hi kota ku pfuniwa hi Rito la Xikwembu ni hi lava Xikwembu xi nga va veka swaku va hi pfuna.

4. I mpsini leswi kombisaka swaku Hosi Sawulo a a tibyela?

⁴ Leswi nga humelela Hosi Sawulo swi kombisa leswi nga yentxekaka loko munhu a nga tiveki hansi. Sawulo a a tibyela hintamu naswona a a nga pfumeli swaku a fanele a txintxa mapimiselo, leswi a a swi yentxa ni leswi a a swi rhandza. (Pis. 36:1, 2; Hab. 2:4) Swaku Sawulo a a tibyela swi tikombe a nkama Yehovha a nga mu byela leswi a a fanele a swi yentxa nkama a nga hlula Vaamaleke. Phela Sawulo a nga mu yingisanga Yehovha. Hambi hi nkama muprofeta Samuwele a nga ya vulavula na yena, Sawulo a nga pfumelanga xidjoho xa yena. Handle ka leswo, a zame ku tinyimelela a vona ingi nandzu wa yena a wu nga li wukulu a tlhela a zama ku lumbeta van’wana. (1 Sam. 15:13-24) Phela Sawulo a a ngo sungula ku yentxa leswo! (1 Sam. 13:10-14) Lexi vavisaka hi leswaku Sawulo a tshike mbilu ya yena yi tikulisa. A nga txintxanga mapimiselo ya yena, hi mhaka leyo, Yehovha a a nga ha mu tsakeli.

5. Hi nga djondza yini ka xikombiso xa Sawulo?

⁵ Leswi hi kalaka hi nga swi lavi ku fana na Sawulo, hi fanele hi tivutisa leswi: ‘Loko ni djondza Bibele, ni zama ku tinyimelela swaku ni nga swi tirhisi leswi ni swi djondzaka? Ni vona ingaku swilo swa ku biha leswi ni swi yentxaka a hi swa nchumu? Ni nyika nandzu van’wana hi swidjoho swa mina?’ Loko nhlamulo ya hina ka xin’we xa swivutiso leswi ku li ina, hi fanele hi txintxa mapimiselo ya hina ni leswi hi swi yentxaka. Loko hi nga yentxi leswo, hi ta sungula ku tibyela naswona Yehovha a nga ta hi tsakela. — Yak. 4:6.

6. Hi kwini ku hambana loku a ku li kona ka Hosi Sawulo na Hosi Davhida?

⁶ Vona ku hambana loku a ku li kona ka Hosi Sawulo na Hosi Davhida lweyi a a rhandza “nawu wa Yehovha”. (Pis. 1:1-3) Davhida a a swi tiva swaku Yehovha a rhandza vanhu lava tivekaka hansi kambe a nyenya lava tibyelaka. (2 Sam. 22:28) Hi mhaka leyo, Davhida a pfumelele nawu wa Yehovha swaku wu txintxa mapimiselo ya yena. A te: “Ni ta dzunisa Yehovha, lweyi a ni layaka. Hambi niwusiku mimpimiso ya mina ya ni lulamisa.” — Pis. 16:7.

7. I mpsini leswi hi nga ta swi yentxa loko hi tiveka hansi?

⁷ Loko hi tiveka hansi, hi ta pfumelela Rito la Xikwembu li lunghisa mapimiselo ya hina na hi nga se yentxa swilo swa ku biha leswi hi swi pimisaka. Swi ta fana ni loko Bibele li hi byela li ku: “Ndlela hi leyi. Fambani hi yona.” Li ta hi basopisa loko hi sungula ku yentxa swilo swa ku biha. (Esa. 30:21) Phela ku yingisa Yehovha swi ta hi pfuna hintamu. (Esa. 48:17) Hi xikombiso, loko hi tirhisa Rito la Xikwembu, a swi nga ta boha swaku ku ta munhu mun’wana a ta hi laya naswona hi ta va kusuhi na Yehovha, hikusa hi ta swi vona swaku wa hi hlayisa ku fana ni papayi lweyi a hi rhandzaka. — Hev. 12:7.

8. Hi ku ya hi Yakobo 1:22-25, hi nga li tirhisisa ku yini Rito la Xikwembu ku fana ni xipelhu?

⁸ Rito la Xikwembu li nga fanisiwa ni xipelhu. (Lerha Yakobo 1:22-25.) Vanhu va vanyingi va sungula hi ku tilanguta ka xipelhu na va nga se huma kaya. Leswo swi yentxa swaku va tekela ku tilunghisa na va nga se voniwa hi vanhu van’wana. Na hina loko hi lerha Bibele siku ni siku, hi ta vona leswi hi faneleke hi swi txintxa ka mapimiselo ya hina ni leswi hi swi yentxaka. Van’wana  va vona na swi pfuna ku sungula hi ku djondza tsalwa la siku na va nga se suka kaya, mixo wun’wana ni wun’wana. Leswo swi yentxa swaku va kota ku pimisa hi leswi va nga swi lerha va tlhela va swi tirhisa siku hinkwalu. Xin’wana hi nga xi yentxaka, i ku tivekela nkama wa ku djondza Bibele siku ni siku ni ku pimisa hi leswi hi swi djondzaka. Hambileswi swi tikombaka swi li minchumu ya yitsongo, kambe hi swona swi lavekaka swaku hi kota ku famba ka ndlela leyi yi yisaka wuton’wini.

9. Makwerhu a nga ku laya loko swi te yini?

⁹ Ku ni swilo leswi u nga sungula ku swi yentxa swaku swi nga ku hambanisa na Yehovha? (Pis. 73:2, 3) Loko ku ta makwerhu swaku a ku laya, mu yingiseli u tlhela u yentxa leswi a ku byelaka swona. Loko u yentxa leswo, a wu nga ta tisola funtshi u ta mu khensa makwerhu yelweyo. — Swi. 1:5.

10. U fanele u yentxa yini loko makwenu a ku laya?

¹⁰ Bibele li li: “Swilondza leswi vangiwaka hi munghanu swa pfuna”. (Swi. 27:6) Swi vula yini leswi? A hi nge u lava ku tlulela xitaratu lexi nga ni mimovha yayinyingi, ku ve u deketela telefoni la wena u gama u sungula ku tsemakanya na wu nga lavisanga matlhelweni, se ku ta munhu a ku khoma a ku koka hi voko a ku humesa xitaratwini. Leswi a nga ku khomisa xiswona swa vavisa hikusa a ku koki hintamu. Kambe a ponise wutomi la wena hikusa a wu li kusuhi ni ku biwa hi movha. Hambiloko a wo heta masiku na wu twa ku vava, a wu ta mu khensa munhu lweyo, hi leswi a nga ponisa wutomi la wena. Hi ku fanana, loko makwerhu a ku laya hi mhaka mavulavulelo ya wena kumbe leswi u swi yentxaka, swi nga ha vava ku sunguleni. Kambe u nga kwati kumbe ku mu vekela xiviti hi mhaka leswi a nga swi yentxa. Phela loko u kwatisiwa hi leswo, swi kombisa swaku u xiphunta. (Ekl. 7:9) Ku hambana ni leswo, mu khensi hi leswi a kalaka a nga chavanga ku vulavula na wena.

11. I mpsini swi nga yentxaka swaku munhu a nga pfumeli ku layiwa hi makwerhu?

¹¹ I yini xi nga yentxaka swaku munhu a nga pfumeli ku layiwa hi makwerhu? I ku tibyela. Vanhu va ku tibyela va rhandza ku twa “leswi vaswitsakelaka” kambe ‘vafularhela ntiyiso, vangawuyingisi’. (2 Tim. 4:3, 4) Va vona ingi a va lavi ku layiwa hikusa va tlharihile funtshi va tiva ku tlula van’wana. Kambe mupostolo Pawulo a te: ‘Loko mun’wana ayanakanya leswaku yena [i] xanchumu, kasi ahi nchumu, watikanganyisa.’ (Gal. 6:3) Hosi Solomoni a te: “La yampsa jovhem la xisiwana kambe na li tlharihile kutlula hosi ya yikulu kambe na yi li xiphunta, yi tlhela yi yala ku layiwa.” — Ekl. 4:13.

12. Hi nga djondza yini ka xikombiso xa mupostolo Petro lexi nga ka Vagalatiya 2:11-14?

¹² Vona xikombiso xa mupostolo Petro a nkama a nga layiwa hi Pawulo a frenti ka vanhu van’wana. (Lerha Vagalatiya 2:11-14.) Petro a a ta va a kwatile hi leswi Pawulo a nga vulavulisa xiswona ni hi leswi a nga mu laya frenti ka vanhu van’wana. Kambe Petro a a tlharihile, a pfumele ku layiwa, funtshi a nga mu vekelanga xiviti Pawulo. Ku hambana ni leswo, siku lin’wana loko a vulavula hi Pawulo a te: “Makwerhu Pawulo murhandziwa wa hina.” — 2 Pet. 3:15.

13. I mpsini hi faneleke hi swi khumbuka loko hi laya munhu?

¹³ Loko ku li swaku ku ni makwerhu lweyi u lavaka ku mu laya, i mpsini leswi u faneleke u sungula u pimisa hi swona? Na u nga se vulavula na yena, sungula hi ku tivutisa leswi: A nho tiyentxa “munhu wa ku lulama ku tlula mpimu?” (Ekl. 7:16) Lweyi a tiyentxaka munhu wa ku lulama ku tlula mpimu, a yavanyisa vanhu van’wana hi ku ya hi mavonelo ya yena,  ku nga li hi mavonelo ya Yehovha. Funtshi a nga va tsetseleli van’wana. Loko se u tikambelile u tlhela u vona swaku swa laveka ku va u mu laya makwerhu, mu byeli lomu a nga phazama kona u tlhela u tirhisa swivutiso swaku u mu pfuna ku twisisa xihoxo xa yena. Vulavula na yena na wu tirhisa Matsalwa, na wu khumbuka swaku lweyi a nga ni mfanelo ya ku yavanyisa hi Yehovha ku nga li wena. (Rhom. 14:10) Tirhisa wutlhari leli nga ka Bibele loko u laya munhu u tlhela u tekelela ntwelawusiwana wa Yesu. (Swi. 3:5; Mat. 12:20) Hi mhaka muni u fanele u yentxa leswo? Hi mhaka leswi hi va khomisaka xiswona vanhu van’wana, Yehovha a ta hi khomisa xiswoleswo. — Yak. 2:13.

14. I mpsini leswi nhlengeletanu ya Yehovha yi hi nyikaka swona?

¹⁴ Yehovha a hi fambisa ka ndlela leyi yisaka wuton’wini, hi ku tirhisa nhlengeletanu ya yena. Phela nhlengeletanu ya Yehovha yi hi nyika mavhidiyo, mabuku ni mintlhanganu swaku yi hi pfuna ku tirhisa leswi hi swi djondzaka ka Bibele. Leswi hi swi djondzaka swa tshembeka hikusa swi susiwe ka Bibele. Loko vamakwerhu va Ntlawa lowu Rhangelaka va lava ku yentxa swiboho leswi khumbaka ntirho wa ku chumayela, va rhanga hi ku khongela va kombela moya wa ku kwetsima. Hambileswo, vamakwerhu lava, va swi kambela swiboho swa vona swaku va vona lomu va faneleke va txintxa kona. Hi mhaka muni? Hi mhaka misava ya txintxa naswona nhlengeletanu ya Yehovha yi fanele yi titwananisa ni swiyimu. — 1 Kor. 7:31.

15. Hi swini swikarhatu leswi vamakwerhu van’wana va nga ha kumanaka na swona?

¹⁵ Loko nhlengeletanu ya Yehovha yi hi byela mintlhamuselo ya nyuwani ya tidjondzo ta Bibele kumbe yi hi basopisa ka mahanyelo ya ku biha, ha swi yamukela hi tlhela hi swi tirhisa. Kambe hi ta yentxa yini loko yi txintxa swilo swin’wana leswi khumbaka wutomi la hina? Hi xikombiso, swoswi, ku yaka ni ku hlayisa Tiyindlo ta Wugandzeli swa dura hintamu. Hi mhaka leyo, Ntlawa lowu Rhangelaka wu vule swaku mabandla ya manyingi ma fanele ma tirhisa Yindlo yin’we ya Wugandzeli. Leswo swi yentxe swaku mabandla man’wana ma patsana ni swaku Tiyindlo tin’wana ta Wugandzeli ti xavisiwa. Male ya kona yi tirhiseliwe ku yaka Tiyindlo tin’wana ta Wugandzeli lomu ku nga ni xilaveko xa xikulu. Loko lomu u tshamaka  kona, Yindlo ya Wugandzeli yi xavisiwile naswona mabandla ma patsanile swi nga yentxeka swi ku karhatela ku titwananisa ni swiyimu. Vamakwerhu van’wana swi nga ha lava va khwela maxapa swaku va ya mintlhanganwini, kasi van’wana lava a va li kona loko Yindlo ya Wugandzeli yi yakiwa ni lava a va yi hlayisa, va nga ha tivutisa swaku kasi hi mhaka muni yi xavisiwa. Va nga ha pimisa swaku va tlangi hi nkama ni ntamu wa vona. Kambe va ku yamukela ku txintxa loku naswona va fanele va khensiwa hi mhaka leswo.

16. Ku tirhisa leswi nga tsaliwa ka Vakolosa 3:23, 24, swi ta hi pfunisa ku yini ku tshama na hi tsakile?

¹⁶ Hi ta tama hi tsaka loko hi khumbuka swaku ntirho lowu hi wu yentxaka i wa Yehovha naswona hi yena a fambisaka nhlengeletanu ya yena. (Lerha Vakolosa 3:23, 24.) Hosi Davhida a veke xikombiso xa kahle loko a humesa leswi a swi laveka a ku yakiweni ka tempele. A te: “Kambe, nho va mani mina, ni vanhu va mina vo va yini, leswaku hi kota ku hamba magandzelo ya ku tirhandzela ya ku fana ni lawa? Hikusa hinkwaswu i swa wena, naswona hi ku nyike leswi swi ku lumbaka.” (1 Tikro. 29:14) Na hina loko hi humesa minyikelo, hi nyika Yehovha leswi swi mu lumbaka. Kambe Yehovha wa tsaka hintamu loko hi nyikela nkama, ntamu ni male ya hina leswaku hi seketela ntirho wa yena. — 2 Kor. 9:7.

17. Hi mhaka muni hi nga fanelanga hi godola loko hi vona swaku ku ni lomu hi faneleke hi yampsisa kona?

¹⁷ Leswaku hi famba ka ndlela leyi yisaka wunton’wini, hinkwerhu hi fanele hi landzela xikombiso xa Yesu Kreste. (1 Pet. 2:21) Loko u vona swaku ku ni leswi u faneleke u txintxa, u nga godoli. Hikusa leswo swi kombisa swaku wa swi lava ku kongomisiwa hi Yehovha. Khumbuka swaku Yehovha wa swi tiva swaku hina a hi hetisekanga. Hi mhaka leyo, a nga nyimeli swaku hi fana na Yesu hi ku helela.

18. Hi fanele hi yentxa yini swaku hi kuma wutomi la ku kala li nga heli?

¹⁸ Hinkwerhu a hi pimiseni hi minkateko leyi hi nga ta yi kuma ka nkama lowu taka. Hi tlhela hi tinyimisela ku txintxa mapimiselo ya hina, leswi hi swi rhandzaka ni leswi hi swi yentxaka. (Swi. 4:25; Luk. 9:62) A hi tivekeni hansi ‘hi ya mahlweni hi tsaka, hi wololoxeka’. (2 Kor. 13:11) Loko hi yentxa leswo “Xikwembu xa lirhandzu ni xa kurhula xita va na [hina].” Xi ta hi pfuna swaku hi tsaka swoswi hi tlhela hi va ni wutomi leli nga heliki a nkameni lowu taka.