1. Kuyana na Mateyu 7:13, 14, chifukwa wuli tingati tili paulendo?

TOSE tili paulendo. Ndipo tose chilato chithu ntchakuti tizakakhale mu charu chiphya pasi pa muwuso wachitemwa wa Yehova. Zuŵa lililose tikuyezgayezga kwenda pa nthowa iyo yikulongozgera ku umoyo. Kweni nga umo Yesu wakayowoyera, nthowa iyi njifinyi ndipo nyengo zinyake chikuŵa chakusuzga kuyilondezga. (Ŵazgani Mateyu 7:13, 14.) Tili ŵambura kufikapo, ndipo ntchipusu kuyileka nthowa iyi.—Gal. 6:1.

2. Kasi tisambirenge vichi mu nkhani iyi? (Wonaniso bokosi la mutu wakuti “ Kujiyuyura Kukutovwira Kusintha.”)

² Para tikukhumba kulutilira kwenda pa nthowa yifinyi iyo yikulongozgera ku umoyo wamuyirayira, tikwenera kuŵa ŵakunozgeka kusintha kaghanaghaniro kithu, umo tikuwonera vinthu na umo tikuchitira vithu. Mpositole Paulosi wakachiska Ŵakhristu ŵa ku Korinte kuti ŵalutilire “kusintha maghanoghano.” (2 Kor. 13:11) Ulongozgi uwu ukugwiraso ntchito kwa ise. Mu nkhani iyi, tidumbiskanenge umo Baibolo lingatovwilira kusintha kweniso umo ŵabwezi awo mbakukhwima mwauzimu ŵangatovwilira kuti tilutilire kwenda pa nthowa yakuya ku umoyo. Kweniso tisambirenge chifukwa icho nyengo zinyake chikuŵira chakusuzga kulondezga ulongozgi uwo gulu la Yehova likupeleka. Tiwonengeso umo kujiyuyura kungatovwilira kuti tisinthe na kulutilira kuteŵetera Yehova mwakukondwa.

3. Kasi Mazgu gha Chiuta ghangamovwirani wuli?

³ Ntchipusu yayi kusanda maghanoghano ghithu na umo tikujipulikira. Chifukwa wuli? Chifukwa mtima withu nguryarya ndipo ntchakusuzga kumanya uko ukutilongozgera. (Yer. 17:9) Ntchambura kusuzga kujipusika tekha na “fundo zautesi.” (Yak. 1:22) Ntheura tikwenera kugwiliskira ntchito Mazgu gha Chiuta para tikujisanda. Mazgu gha Chiuta ghakuvumbura umo tiliri  mukati mwithu, “ndipo ghakumanya ivyo mtima ukughanaghana na kukhumba.” (Heb. 4:12, 13) Mazgu gha Chiuta tingayowoya kuti ghali nga ni mashini gha X-ray, chifukwa ghakutovwira kuwona mukati mwithu. Kweni tikwenera kuŵa ŵakujiyuyura kuti tilondezgenge ulongozgi wa mu Baibolo panji wakufuma ku gulu la Chiuta.

4. Kasi ntchivichi chikulongora kuti Themba Sauli pamanyuma likazakaŵa lakujikuzga?

⁴ Chiyelezgero cha Themba Sauli chikulongora ivyo vingachitika para tili ŵambura kujiyuyura. Sauli wakaŵa wakujikuzga chomene, mwakuti wakakana kuzomerezga kuti wakwenera kusintha kaghanaghaniro kake na vyakuchita vyake. (Sal. 36:1, 2; Hab. 2:4) Mwachiyelezgero, Yehova wakati waphalira Sauli ivyo wakwenera kuchita para wathereska Ŵaamaleki, Sauli wakamupulikira yayi Yehova. Ndipo ntchimi Samuyeli yati yamuphalira ivyo wakachita, iyo wakakana kuzomerezga kuti wakabudiska. M’malo mwake, wakajikhungulufya ndipo wakati ŵanthu ndiwo ŵakamuchichizga kuti wachite nthena. (1 Sam. 15:13-24) Aka kakaŵa kakwamba yayi kuti Sauli wachite nthena. (1 Sam. 13:10-14) Chachitima ntchakuti wakalekelera mtima wake kuti uŵe wakujikuzga. Wakasintha yayi kaghanaghaniro kake, ndipo Yehova wakamuchenya na kumukana kuti waŵe themba.

5. Kasi tingasambirako vichi kwa Sauli?

⁵ Tikukhumba yayi kuŵa nga ni Sauli. Ntheura tikwenera kujifumba mafumbo agha: ‘Kasi para naŵazga ulongozgi mu Mazgu gha Chiuta, nkhuyezga kusanga nthowa za kujigowokera zakulekera kuwulondezga? Kasi nyengo zinyake nkhujikhungulufya na kuwona ivyo nkhuchita kuti ni viheni viŵi yayi? Kasi nkhupa mulandu ŵanyake pa ivyo nkhuchita?’ Usange zgoro ndakuti enya, mbwenu ndikuti tikukhumbikwira kusintha kaghanaghaniro kithu na umo tikuwonera vinthu. Chifukwa para tisinthenge yayi, tiŵenge ŵakujikuzga ndipo Yehova watikanenge.—Yak. 4:6.

6. Yowoyani mphambano pakati pa Themba Sauli na Themba Davide.

⁶ Wonani mphambano iyo yilipo pakati pa Themba Sauli na Themba Davide. Davide wakatemwanga “dango la Yehova.” (Sal. 1:1-3) Davide wakamanyanga kuti Yehova wakuponoska awo mbakujiyuyura kweni wakwimikana na ŵakujikuzga. (2 Sam. 22:28) Ntheura Davide wakazomerezga dango la Chiuta kuti lisinthe kaghanaghaniro kake. Iyo wakalemba kuti: “Nilumbenge Yehova uyo wakunipa fundo. Nanga mpha usiku, maghanoghano ghane ghamukati ghakunilongozga.”—Sal. 16:7.

7. Kasi tichitenge vichi usange ndise ŵakujiyuyura?

⁷ Usange ndise ŵakujiyuyura, tizomerezgenge Mazgu gha Chiuta kuti ghasinthe maghanoghano ghithu ghaheni agho ghangatilongozgera ku kwananga. Baibolo liŵenge nga ni mazgu agho ghakutiphalira kuti: “Nthowa ni iyi. Endaninge mwenemumo.” Ghatichenjezgenge para tamba kupuluka. (Yes. 30:21) Para tikupulikira Yehova, tisangenge vyandulo vinandi. (Yes. 48:17) Mwachiyelezgero, soni zitikorenge yayi para munyake watipa ulongozgi. Ndipo tiŵenge pafupi chomene na Yehova chifukwa tikumanya kuti wakutipwelelera pakuŵa dada withu wachitemwa.—Heb. 12:7.

8. Nga umo pakuyowoyera pa Yakobe 1:22-25, kasi Mazgu gha Chiuta ghali nga gilasi munthowa wuli?

⁸ Mazgu gha Chiuta ghali nga ni gilasi. (Ŵazgani Yakobe 1:22-25.) Taŵanandi tikulaŵiska pa gilasi mulenji uliwose pambere tindawukepo pa nyumba. Ivi vikovwira kuti timanye apo pakukhumbikwa kunozga pambere ŵanji ŵandatiwone. Mwakuyana waka, para tikuŵerenga Baibolo zuŵa lililose, tiwonenge nthowa izo zingatovwira kusintha kaghanaghaniro kithu kweniso umo tikuwonera vinthu. Ŵanandi ŵakuwona kuti ntchakovwira chomene kupangirathu lemba la zuŵa namlenji pambere ŵandawukepo panyumba. Ivi vikovwira kusintha kaghanaghaniro kawo. Ndipo zuŵa lose ŵakuwona nthowa izo ŵangalondezgera ulongozgi wa mu Mazgu gha Chiuta. Kweniso  tikwenera kusambira Mazgu gha Chiuta zuŵa lililose na kughanaghanirapo. Vingawoneka nga tikumalirapo waka nyengo yithu, kweni kuchita nthena nkhwakuzirwa chomene ndipo kungatovwira kuti tilutilire kwenda pa nthowa yifinyi yakuya ku umoyo.

9. Kasi mphawuli apo mubwezi winu wakwenera kumupani ulongozgi?

⁹ Kasi muli kwendapo pa nthowa iyo yikatenge yimupuluskaninge? (Sal. 73:2, 3) Usange mubwezi winu wakukhwima wakachita chikanga kumupani ulongozgi, kasi mukapulikira na kuchita ivyo wakamuphalirani? Usange ni nthena, mukachita chinthu chakwenelera ndipo mukwenera kuti mukuwonga kuti mubwezi winu wakamuchenjezgani.—Zinth. 1:5.

10. Kasi mukwenera kuchita wuli para munyinu wamupani ulongozgi?

¹⁰ Mazgu gha Chiuta ghakutikumbuska kuti: “Vilonda vyakufuma kwa mubwezi ni vyakugomezgeka.” (Zinth. 27:6) Kasi fundo iyi yikung’anamurachi? Wonani chiyelezgero ichi: Mukukhumba kwambuka msewu uwo mukwenda magalimoto ghanandi, mbwenu mwatimbanizgika chifukwa chakuti mukulaŵiska pa foni. Mukunjira mu msewu kwambura kulaŵiska vigaŵa vyose. Nyengo yeneyiyo mubwezi winu wakukora woko linu mwankhongono na kumuguzirani mumphepete mwa msewu. Wamuguzani mwankhongono mwakuti woko linu lapwetekeka, kweni kuchita nthena kwawovwira kuti galimoto yileke kumugandani. Nanga ni para woko linu lingalutilira kuŵinya kwa mazuŵa ghanandi, kasi mumukwiyirenge mubwezi winu chifukwa chakuti wangumuguzani mwankhongono? Yayi! Mungamuwonga chomene chifukwa chakuti wamovwirani. Mwakuyana waka, para mubwezi winu wamuchenjezgani kuti ivyo mukuyowoya na kuchita vikukolerana yayi na fundo zaurunji za Chiuta, pakwamba mungakhuŵara. Kweni lekani kukwiya chifukwa chakuti wamupani ulongozgi. Chifukwa uwu ungaŵa uchindere. (Muph. 7:9) M’malo mwake, muwongani kuti wanguchita chikanga kumupani ulongozgi.

11. Kasi ntchivichi chingapangiska munthu kukana ulongozgi uwemi kufuma kwa mubwezi wake?

¹¹ Kasi ntchivichi chingapangiska munthu kukana ulongozgi uwemi wakufuma kwa mubwezi wake? Kujikuzga. Ŵanthu ŵakujikuzga, ŵakukhumba “kupulika ivyo vikukondweska makutu ghawo.” Ŵakukhumba yayi ‘kupulika unenesko.’ (2 Tim. 4:3, 4) Iwo ŵakuwona kuti ŵakukhumbikwira ulongozgi yayi chifukwa ŵakughanaghana kuti iwo mbamahara chomene panji mbakuzirwa chomene kujumpha ŵanji. Ndipouli, mpositole Paulosi wakalemba kuti: “Usange munthu wakujiwona kuti nkhanthu apo iyo nkhanthu yayi, wakujipusika yekha.” (Gal. 6:3) Themba Solomoni likalongosora makora nkhani iyi. Likalemba kuti: “Mwana uyo ni mukavu kweni wavinjeru ni muwemi kuluska themba lichekuru ilo lilijeso mahara kuti lipulikire chenjezgo.”—Muph. 4:13.

12. Kuyana na Ŵagalatiya 2:11-14, kasi tikusambirako vichi kwa mpositole Petrosi?

¹² Ghanaghanirani ivyo wakachita mpositole Petrosi wati wapika ulongozgi na mpositole Paulosi pamaso pa ŵanthu. (Ŵazgani Ŵagalatiya 2:11-14.) Petrosi mphanyi wakakwiya na ivyo Paulosi wakayowoya chifukwa wakayowoyera pamaso pa ŵanthu. Kweni Petrosi wakaŵa wamahara. Wakazomera ulongozgi uwu ndipo wakamusungira chakusingo yayi Paulosi. Mwakuti nyengo yinyake pakuyowoya za Paulosi wakati ni “mubali withu wakutemweka.”—2 Pet. 3:15.

13. Kasi tikwenera kughanaghanirapo dankha vichi pambere tindapeleke ulongozgi kwa munyithu?

¹³ Usange mukukhumba kupeleka ulongozgi kwa munyinu, kasi mukwenera kughanaghanirapo dankha vichi? Pambere mundayowoyeskane nayo munyinu, jifumbani kuti ‘Kasi ndine waka nkhujumphizga kuŵa murunji chomene?’ (Muph. 7:16) Munthu uyo wakujiwona kuŵa murunji chomene kanandi wakweruzga ŵanji na fundo za Yehova yayi, kweni zake, ndipo kanandi wakuŵa walusungu yayi. Para mwaghanaghanirapo mwakupwelelera ndipo mwawona kuti ntchakwenelera  kumupa ulongozgi munyinu, muphalirani suzgo lake ndipo gwiliskirani ntchito mafumbo kuti mumovwire kumanya kuti wabudiska nadi. Woneseskani kuti ivyo mukuyowoya vikujintha mu Malemba, kweniso kuluwa yayi kuti ni udindo winu yayi kweruzga munyinu. Kweni movwirani waka kupulikiska umo Yehova wakuwonera ivyo wakuchita. (Rom. 14:10) Gwiliskirani ntchito ulongozgi wavinjeru wakufuma mu Mazgu gha Chiuta, ndipo para mukumupa ulongozgi munthu, yezgani Yesu pa nkhani ya chiwuravi. (Zinth. 3:5; Mat. 12:20) Chifukwa wuli? Chifukwa Yehova wazamuteruzga kuyana na umo tikweruzgira ŵanji.—Yak. 2:13.

14. Kasi gulu la Chiuta likutipa vichi?

¹⁴ Yehova wakutilongozga pa nthowa yakuya ku umoyo kwizira mu gulu lake, ilo likutipa mavidiyo, mabuku na maungano, ivyo vikutovwira kuti tichitenge ivyo vili mu Mazgu gha Chiuta. Fundo izo tikusanga mu vinthu ivi tikuzigomezga chifukwa zikufuma mu Malemba. Para ŵabali ŵa mu Wupu Wakulongozga ŵakusankha nthowa ziwemi chomene izo tingagwiliskira ntchito pakupharazga, ŵakugomezga mzimu utuŵa. Ndipouli, Wupu Wakulongozga ukuwelerangamoso nyengo na nyengo ivyo wadumura kuti uwone usange pangakhumbikwira kusintha. Chifukwa wuli? “Chifukwa vyakuchitika vya charu ichi vikusintha,” ndipo Gulu la Chiuta nalo likwenera kusintha.—1 Kor. 7:31.

15. Kasi ni masuzgo wuli agho ŵapharazgi ŵanyake wakumana nagho?

¹⁵ Para gulu la Chiuta lalongosoraso makora fundo zinyake za mu Baibolo panji latipa ulongozgi pa nkhani za makhaliro ghawemi, tikuzomera na kwamba kuchita ivyo taphalirika. Kweni kasi tikuchita wuli para gulu la Chiuta lasintha vinthu vinyake ivyo vikukhwaska chomene ise? Mwachiyelezgero, vyaka vyasonosono apa, mtengo wa vinthu vyakuzengera na kunozgera malo ghithu ghakusoperapo wakwera chomene. Ntheura Wupu Wakulongozga, uli kudumura kuti mipingo yinandi yigwiliskirenge ntchito Nyumba ya Ufumu yimoza. Lekani mipingo yinyake yili kusazgika pamoza ndiposo Nyumba za Ufumu zinyake zili kuguliskika. Ndipo ndalama izi ŵakuzigwiliskira ntchito pakuzenga Nyumba za Ufumu zinyake ku malo uko zikukhumbikwa chomene. Usange mukukhala ku malo uko Nyumba za Ufumu zikuguliskika ndipo mipingo yikusazgika pamoza, nyengo zinyake chingamuŵirani chakusuzga kuti muzgoŵere kusintha uku. Pasono ŵapharazgi ŵanyake ŵakwenera kwenda mtunda utaliko  kuti ŵakafike ku maungano. Ŵanyake awo ŵakajipeleka chomene pakuzenga panji kunozga Nyumba ya Ufumu ŵangazizwa kuti sono yikuguliskika. Ŵangawona nga kuti nyengo na nkhongono zawo vyaluta pawaka. Kweni nipera ŵakukolerana nako kusintha uku ndipo ŵakuwongeka chomene.

16. Chifukwa wuli tiŵenge ŵakukondwa para tilondezgenge ulongozgi wa pa Ŵakolose 3:23, 24?

¹⁶ Tilutilirenge kuŵa ŵakukondwa para tikukumbuka kuti ntchito yose iyo tikugwira nja Yehova ndipo ndiyo wakulongozga gulu lake. (Ŵazgani Ŵakolose 3:23, 24.) Themba Davide ntchiyelezgero chiwemi pa nkhani ya vyakupeleka. Ilo likapeleka vinthu vyakuti viwovwire kuzengera tempile. Likati: “Kasi ine ndine njani ndipo ŵanthu ŵane mbanjani, kuti tipeleke vyawanangwa nga ni ivi? Pakuti vyose vikufuma kwa imwe, ndipo tamupani ivyo vikufuma mu woko linu.” (1 Mid. 29:14) Para tikupeleka vyawanangwa, nase ndikuti tikupeleka kwa Yehova vinthu ivyo vyafuma kale kwa iyo. Nangauli vili nthena, kweni Yehova wakuwonga chomene nyengo, nkhongono na vinthu ivyo tikupeleka pa kukhozgera mulimo wake.—2 Kor. 9:7.

17. Chifukwa wuli mukwenera kujiwona kuti ndimwe ŵakutondeka yayi para mwawona kuti mukukhumbikwira kusintha pa malo ghanyake?

¹⁷ Kuti tilutilire kwenda pa nthowa yifinyi yakuya ku umoyo, tose tikwenera kuyezga Yesu. (1 Pet. 2:21) Usange mukuwona kuti mukukhumbikwira kusintha pa malo ghanyake, kujiwona kuti ndimwe ŵakutondeka yayi. Ichi ntchilongolero chakuti mukukhumba kulondezga ulongozgi wa Yehova. Kuluwa yayi kuti Yehova wakumanya kuti ndise ŵambura kufikapo. Ntheura wakukhazga kuti tiyezgenge Yesu ndendende yayi.

18. Kasi tikwenera kuchita vichi kuti tifiske chilato chithu?

¹⁸ Mphanyi tose taŵikapo mtima kughanaghanira vyamunthazi na kulutilira kusintha kaghanaghaniro kithu, umo tikuwonera vinthu na vyakuchita vithu. (Zinth. 4:25; Luka 9:62) Tiyeni tilutilire kujiyuyura, kuŵa ŵakukondwa na “kusintha maghanoghano.” (2 Kor. 13:11) Usange tichitenge nthena, “Chiuta wa chitemwa na wa mtende waŵenge [nase].” Watovwirenge kuŵa ŵakukondwa sono kweniso wazamutipa umoyo uwemi mu charu chiphya.