1. Maererano na Mateu 7:13, 14, ngei zvecizwi tiri mu rhwendo?

TESE isusu tiri mu rhwendo. Cinangwa cedu nge ce kugara mu nyika ipsva tecitongwa nge utongi wa Mwari uno rudo. Zuwa no zuwa tinoedza kuteera guanza rinotiendesa ku upenyu. Asi hingana zvakareketwa na Djesu, gwanza iri rakatetepa, uye nguwa dzimweni zvinganesa kuhamba ndiro. (Erengai Mateu 7:13, 14.) Tiri anhu asikazi kukwana, ndiyo ndaa zviri nyore kupauka patinonga tecihamba mu gwanza iri.—Aga. 6:1.

2. Ticaonei mu fundo ino? (Onai bhokisi rakazwi “ Kudzidodosa Kunotibetsera kuti Tigadzirise Makwanza Edu.”)

² Kana tecida kurumbwa tiri mu gwanza rakatetepa rinoenda ku upenyu, tinodikana kugara anhu anotendera kugadziriswa mu marangariro, miitiro, uye zviito zvedu. Mu phostori Pauro wakabambisa aKristu aigara ku Korinti kuti arumbwe “ecigadziriswa.” (2Ako. 13:11) Zano iri rinoseenzawo katiri. Fundo ino, icatibetsera kuona kuti Bhaibheri rinotibetsera kudini kuti tigadzirise makwanza edu uye kuti shamwari dzedu dzakakura pakunamata dzingatibetsera kudini kuti tirumbwe tiri mu gwanza re upenyu. Ticaona zviro zvingaita kuti zvitishuphire kutondoedza nhungamiriro inopaswa no sangano ra Djehovha. Ticaonawo kuti kudzidodosa kucatibetsera kudini patinogadziriswa asi tisikapsveti mupfaro wekuseenzera Djehovha.

3. Soko ra Mwari ringaitei kamuri?

³ Patinoedza kuongorora marangariro uye muzwiro edu tingasongana no cineso. Mwoyo unotinyepera uye zvingatinesera kuzia kuti uri kutiendesa kupi. (Dje. 17:9) Zviri nyore kudzinyepera “no zviro zvekunyepa.” (Tg. 1:22) Ndiyo ndaa, tinodikana kuseenzesa Soko ra Mwari kuti tidziongorore. Soko ra Mwari rinotipangidza zvatiri ngece mukati zvakadzika-dzika  zve “marangariro e munhu uye zvinodiwa” no mwoyo wedu. (Ahe. 4:12, 13) Nge dii rimweni, Soko ra Mwari rinoita hingana mucini we raio-X, zvoita kuti tione zviri mukati medu. Asi tinodikana kudzidodosa kana tecida kubetsereka no mazano atinotambira e mu Bhaibheri, kana kuti e aemereri a Mwari.

4. Cinyi cinopangidza kuti Mambo Sauro wainga ari munhu unodzikudza?

⁴ Muezaniso wa Mambo  Sauro unopangidza zvingaitika katiri kana tikatama kudzidodosa. Sauro wakadzikudza maningi zvekuti aazi kuzvitendera, uye aazi kutendera kuti waidikana kugadzirisa marangariro uye zviito zvake. (Pis. 36:1, 2; Abha. 2:4) Izvi zvakabuda pamhene Djehovha paakapa Sauro nhungamiriro ye zvaaidikana kuita aa apedza kurhwisa wa Amareki. Asi Sauro aazi kupurutana Djehovha. Uye muphorofita Samueri paakareketa naye nge zve nyaya ii, Sauro aazi kutendera zvishaishi zvake. Kusia izvona, iyena wakaedza kuzveredzera zviito zvake uye wakaedza kupasa amweni ndaa yake. (1Sa. 15:13-24) Sureno, Sauro wainga apangidza muitiro umwewo. (1Sa. 13:10-14) Zvinotsukwarisa kuti iyena wakatendera kuti mwoyo wake udzikudze. Iyena aazi kugadzirisa zviito zvake, hino Djehovha wakamuramba.

5. Ngazvipi zvaticafunda pa muezaniso wa Pauro?

⁵ Kuti tifunde ne muezaniso wa Sauro, tinodikana kudzibvunzisa kuti: ‘Pandinoerenga mazano anobva mu Soko ra Mwari, ndinogadzirisa zvandinorangarira here? Ndinorangarira kuti zvandiri kuita azvizi kunyanya kushata here? Ndinopumha anhu amweni nge zvandinoita here?’ kana mhinduro yedu ye mibvunzo ii iri honde, tinodikana kugadzirisa marangariro uye miitiro yedu. Tikatama kudaro, mwoyo wedu ungadzikudza zve kuti Djehovha ucazotoguma pa kutiramba hingana shamwari yake.—Tg. 4:6.

6. Panganidzai musiyano uripo pakati pa Mambo Sauro na Mambo Dhavhidhi.

⁶ Onai musiyano uripo pakati pa Mambo Sauro na Mambo Dhavhidhi, munhu waida “mutemo wa Djehovha.” (Pis. 1:1-3) Dhavhidhi waizia kuti Djehovha anoponesa aya anodzidodosa, asi anozonda aya anodzikudza. (2Sa. 22:28) Hino, Dhavhidhi wakatendera kuti mitemo ya Mwari igadzirise marangariro ake. Iyena wakatara eciti: “Ndicarumbidza Djehovha wakandipasa zano. Kunyazi usiku, marangariro dzangu dziri mukati-kati dzinondinatsa.”—Pis. 16:7.

7. Ngazvipi zvaticaita kana tikadzidodosa?

⁷ Kana tikadzidodosa, ticatendera kuti Soko ra Mwari rigadzirise marangariro edu akashata tisati taita zviro zvinonga zvecirangarirhwa no aya. Soko ra Mwari ricagara hingana izwi rinotibvunza kuti: “Iri ndiro gwanza. Hambai naro” Irona ricatiziisa kana tootangisa kuita zviro zvakashata. (Isa. 30:21) Kana tikazwira Djehovha ticabetsereka mu mishobo yakasiyana-siyana. (Isa. 48:17) Ngo muezaniso, atizopsveruki kana munhu akauya kuzotibetsera. Uye ticagara dhuze na Djehovha ngekuti tinonga tecizia kuti ayena arikutibata hingana mwana unodiwa.—Ahe. 12:7.

8. Hingana zvinoreketwa pana Tiyago 1:22-25, Tingaseenzesa kudini Soko ra Mwari hingana supeya?

⁸ Soko ra Mwari rinokwanisa kuita hingana supeya katiri. (Erengai Tiyago 1:22-25.) Anhu ajinji paanomuka mu hope, anodziringisa pa supeya. Nge mushobo umwewo, tinokwanisa kuona patinodikana kugadzirisa tisati taonekwa nge anhu amweni. Zvimwe-zvimwezvowo, patinoerenga Bhaibheri zuwa no zuwa, ticaona zvatinodikana kugadzirisa pa zviya zvatinorangarira uye zviito zvedu. Akawanda anoona zvecibetsera kuerenga tsamba yo zuwa macibesi ese. Aona anotendera kuti zvaaerenga zvibate-bate zvaanorangarira.  Hino, zuwa no zuwa, aona anopsvaka mishobo yekuseenzesa mazano ari mu Soko ra Mwari. Kusiya izvi, tinodikana kugara no urongwa we kuerenga uye kurangarira nge zve Soko ra Mwari mazuwa ese. Izvi zvingaita hingana zviri nyore, asi nge zviro zvimweni zvinokosha zvingakwanisa kutibetsera kuti tirumbwe tiri mu gwanza rakatetepa rinoenda ku upenyu.

9. Ndepapi patingada zano?

⁹ Makamboita zviro zvakamuendesa kure na Djehovha here? (Pis. 73:2, 3) Shamwari yakakura pakunamata peyakawiya kuzomupasa zano, makaizwira uye makaipurutana here? Kudai makazviita, makaita zvakanaka, uye tendai shamwari yenyu nge zvaakamuitira.—Zvie. 1:5.

10. Munodikana kuitei kana shamwari yenyu ikauya kuzomupa zano?

¹⁰ Soko ra Mwari rinotiedzurira kuti: “Maronda anoitiswa no shamwri akagondeka.” (Zvie. 27:6) Izvi zvinoreyei? Onai muezaniso unoteera: Cimborangarirai kuti makaimira kudarika gwanza kuti muende ku dii rimweni, asi rino anhu akawanda uye mopingaidzwa no thurufunu yenyu. Munopinda mu gwanza musikazi kuona ku dii rimweni kuti muone kuti karu iri kuuya here. Panguwa iyona, shamwari yenyu inomubata muoko uye inomundundira sure. Kubata kaanoita muoko wenyu no simba zvokuti nyara yenyu inorhwadza, asi zvaaita izvi no kukasika, zvaita kuti musatsikwe nge karu. Kunyazi muoko wenyu ukarhwadza ke mazuwa akawanda, maizonyangadzirhwa shamwari yenyu yamubata muoko here? Haiwa! Mungatotenda rubetso raamupa. Nge mushobo umwewo, kana shamwari ikamubvunza kuti zvamunoreketa kana kuti zvamunoita azvipindirani no zvinodiwa na Mwari, zvingamurhwadza pakutanga. Asi musanyangadzwe ndiyena nge mazano aamupasa. Kana mukamunyangadzirhwa unonga uri upenzi. (Mup. 7:9) Pane kuita izvi, tendai shamwari yenyu nge kushinga kaaita kuti arekete nemwi.

11. Cinyi cingaita kuti munhu arambe zano rakanaka?

¹¹ Cinyi cingaitisa kuti munhu arambe zano rakanaka rinobva ku shamwari yake ino rudo? Kudada. Anhu anodzikudza “ano tsiya nzee dzawo.” Awona “anoramba kupurutana cokwadi.” (2Ti. 4:3, 4) Awona anoita zviro maererano no zvaanoda. Ndiyo ndaa, Pauro wakatara kuti: “Kana munhu ecirangarira kuti unokosha, asi asiripi ciro, uri kudzinyepera.” (Aga. 6:3) Mambo Soromoni wakadimbura nyaya ii ngomwazvo. Iyena wakati: “Zvirinani mwana murombo, asi wakangwara kupinda mambo wacena asi ari benzi, asina nzero dzakakwana kuti apurutane ciziiso.”—Mup. 4:13.

12. Tinofundei ne muezaniso wakapaswa ne mu phostori Pedru uri pana Agaratiya 2:11-14.

¹² Onai muezaniso wakasiiwa ndi mu phostori Pedru paakasumururhwa pakadzara no anhu ndi mu phostori Pauro. (Erengai Agaratiya 2:11-14.) Pedru waikwanisa kunyangadzwa nge zvaakabvunzwa ndi mu phostori Pauro eciona mushobo waakazvireketa uye paakazvireketera. Asi Pedru wakazvingwarira. Iyena wakatambira rubetso raakapaswa uye aazi kucengetera Pauro bundu. Nge kuhamba ke nguwa wakazobhuya kuna Pauro kuti i “hama inodiwa.”—2Pe. 3:15.

13. Ngazvipi zvatinodikana kurangarira tisati tapasa zano?

¹³ Kana mukaona kuti munoda kupasa zano shamwari yenyu, ngazvipi zvamunodikana kurangarira? Musati macedza no shamwari yenyu, dzibvunzisei kuti, ‘Ndiri “kunyanyisa  kugara munatsi” here?’ (Mup. 7:16) Munhu unonyanya kudziona hingana munatsi, unotonga amweni, haiwa mu kuona ka Djehovha, asi nge maonero ake, uye pamweni aseenzesi rudo. Kana mukaongorora, uye moona kuti munodikana kureketa no shamwari yenyu, budisai pamhene nyaya yakhona, uye seenzesai mibvunzo kuti mubetsere shamwari yenyu kuti izie peyashaisha. Ngwarirai kuti zvamunoreketa zvibve mu Bhaibheri, mecizia kuti shamwari yenyu ndiyona icadzidairira kuna Djehovha haiwa imwimwi. (Aro. 14:10) Gondai ungwaru unobva mu Soko ra Mwari, uye pamunopasa zano munhu, teedzerai usisi wa Djesu. (Zvie. 3:5; Mt. 12:20) Ngei? Ngekuti Djehovha acatibata nge mushobo watinobata ndiwona amweni.—Tg. 2:13.

14. Zvinyi zvatiri kupaswa nge sangano ra Djehovha?

¹⁴ Djehovha unotitungamirira mu gwanza re upenyu eciseenzesa sangano rake re pasi, rinotipasa mavhidhiyo, mabhuku, uye misangano inobetsera anhu ese kuti aseenzese mazano ari mu Soko ra Mwari. Zvese izvi zvinobva mu Bhaibheri. Pakusanangura mishobo yakanaka inodikanwa kuizwa pa basa rekuparidzira, Dare Rinotungamirira rinogonda mwiya mucena wa Djehovha. Kunyazi zvakadaro Dare Rinotungamirira rinorumbwa recigadzirisa zvisananguro zvaanonga aronga kuti aone kuti basa iri ringaizwa kudini. Ngei? Ngekuti “zviri kuitika mu nyika zviri kucinja” uye sangano ra Djehovha rinodikanawo kucinja kuti zvienderane no zviri kuitika mu nyika.—1Ako. 7:31.

15. Zvineso zvipi zvirikusongana ne aparidzi amweni?

¹⁵ Isusu tino purutana nhungamiriro dze mu Bhaibheri dzatinotambira dzakaringana no mafundisiro kana kuti tsika. Asi tinoita kudini sangano ra Mwari parinoita cinjo inopingaidza zviro zvimweni zvakaringana no upenyu wedu? Ngo muezaniso, mu makore ano, mutengo wekuwaka uye kugadzirisa nyumba dze kunamatira zvakakwira maningi. Hino Dare Rinotungamirira rakareketa kuti Nyumba dze Umambo dzinodikana kuseenzeswa pakubetsera anhu. Nge ndaa yekugadziriswa uku, ungano dzakabatanidzwa uye Nyumba dze Umambo dzimweni dzakatengeswa. Mare yakhona iri kuseenzeswa pakuwaka Nyumba dze Umambo ku mbuto dzinonyanya kudiikanwa  Nyumba dze Umambo. Kana meciraramira ku mbuto dziri kutengeswa Nyumba dze Umambo uye ungano dzecibatanidzwa, zvingamunesera kuti mujairane ne mugariro mupsva. Aparidzi amweni anodikana kurura rhwendo kuti apinde misangano. Uye aya akaseenza no simba pakuwaka uye kugadzirisa Nyumba dze Umambo angadzibvunzisa kuti ngei dzaakutengeswa. Awona angaona hingana kuti akatamba no nguwa uye simba rawo. Kunyazi zvakadaro, awona arikuzwira sangano ndiyo ndaa anodikana kusimbwa.

16. Kuseenzesa zano riri pana Akorosi 3:23, 24 zvicatibetsera kudini kuti tirumbwe tecipfara?

¹⁶ Ticarumbwa tecipfara tikarangarira kuti tiri kuseenzera Djehovha uye kuti ayena ari kutungamirira sangano rake. (Erengai Akorosi 3:23, 24.) Mambo Dhavhidhi wakapasa muezaniso wakanaka paakabetsera pakuwakwa ke tempro. Iyena wakati: “Ndini ani inini uye anhu angu cinyi, kuti timupase zvipo tisikabambidzirhwi? Nge kuti zviro zvese zvinobva kamuri, uye tamupasa zvinobva mu nyara dzenyu.” (1Mak. 29:14) Patinopa mipiro, tinongawo tecipasa Djehovha zviro zvinonga zvabuda mu nyara dzake. Kunyazi zvakadaro, Djehovha anokoshesa nguwa, simba, uye zvatinopasa kuti titsigire basa raanoda kuti riizwe.—2Ako. 9:7.

17. Ngei musikadikani kuora mwoyo kana mukaona kuti pano pamunodikana kugadzirisa?

¹⁷ Kuti tirumbwe tiri mu gwanza rakatetepa rinoenda ku upenyu, isusu tese tinodikana kunyasa kuteera tsoka dza Djesu. (1Pe. 2:21) Kana mukaona kuti munodikana kugadzirisa zviito zvenyu, musaore mwoyo. Izvona zvingakwanisa kugara zvipangidziro zvakanaka zvinopangidza kuti munopurutana nhungamiriro ya Djehovha. Edzurirai kuti Djehovha aaimiri kuti isusu—anhu asikazi kukwana—tinyase kuteedzera zvakakwana muezaniso wa Djesu.

18. Tinodikana kuitei kuti tugume katiri kuenda?

¹⁸ Tese hedu tinodikana kuona zviri mberi uye kuti tide kucinja marangariro, miitiro, uye zvatinoita. (Zvie. 4:25; Ru. 9:62) Ngatirumbwe tecidzidodosa, “torumbwa tecipfara, tecigadziriswa.” (2Ako. 13:11) Kana tikadaro, “Mwari we rudo no we runyararo acagara [nesu].” Uye atizogumi basi katiri kuenda asiwo ticapfadzwa no vhiyaji yakhona.