1. Матфейлэсь 7:13, 14 верамъя, кыӵе сюрес вылтӥ ми мынӥськомы но кытчы со нуэ?

 ВАНЬМЫ ми мынӥськомы сюрес вылтӥ, кудӥз выль дуннее нуэ. Отын сюлмаськись Иегова Инмармы кивалтоз. Та сюрес вылтӥ ми котькуд нунал мынӥськомы. Иисус вераз, со сюбег но со вылтӥ мыныны секыт шуыса. (Лыдӟе Матфейлэсь 7:13, 14.) Ми сьӧлыкоесь бере, та сюрес вылысь кожыны но быгатӥськомы (Гал. 6:1).

2. Мае ми эскеромы та статьяын? (Озьы ик учке « Зӥбыт-востэм сям юрттэ милемлы пырак улонэ нуись сюбег сюрес вылтӥ мыныны» рамкаез.)

² Пырак улонэ нуись сюбег сюрес вылтӥ мынон понна, милемлы дась луоно воштыны сое, кызьы ми малпаськиськомы, кызьы улон шоры учкиськомы но кызьы асьмеды возиськомы. Апостол Павел Коринфын улӥсь христианъёслэсь мылкыдзэс ӝутӥз воштӥськыны (2 Кор. 13:11, ВД). Та визь-кенешлэсь милемлы но кылзӥськоно. Та статьяын ми эскеромы, кызьы Библия юрттэ милемлы воштӥськыны. Озьы ик ми эскеромы, кызьы эшъёсмы, кудъёсыз умой адӟем карон возьмато, юртто милемлы шонер сюрес вылтӥ мыныны. Со сяна, ми малпаськомы, кыӵе учыръёсы Иеговалэн организациезлэсь кылзӥськыны секыт луэ. Ми адӟомы, кызьы зӥбыт-востэм сям юрттоз милемлы воштӥськыны но Инмарлы шумпотыса ужаны-тыршыны.

3. Кызьы юрттэ милемлы Инмарлэн Кылыз?

³ Куддыръя секыт валаны, кыӵеесь луо малпанъёсмы но шӧдонъёсмы, шонересь-а соос, ӧвӧл-а, малы ке шуоно сюлэммы кескич (Иер. 17:9). Соин сэрен ми асьмеды капчиен  пӧяны но быгатомы (Иак. 1:22). Соин ик, астэ эскерон понна, Инмарлэсь Кылзэ уже кутоно. Со юрттэ адӟыны, кыӵеесь ми, но валаны, кыӵеесь милям сюлэм малпанъёсмы но мылкыд каронъёсмы (Евр. 4:12, 13). Библия рентген аппарат кадь — со адӟыны юрттэ сое, мае адями синмын адӟыны уг луы. Библиысь визь-кенеш яке агайёслэн визь-кенешсы пайда мед ваёз шуыса, милемлы зӥбыт-востэмесь луоно.

4. Кытысь адӟиське, Саул вылтӥяськыны кутскиз шуыса?

⁴ Мар луоз, адямилы зӥбыт-востэм сям уг тырмы ке? Со умой адӟиське Саул эксэйлэн примерез вылын. Саул сокем вылтӥяськыны кутскиз, солэн валамез но ӧз поты, солы воштӥськоно шуыса (Пс. 35:2, 3; Авв. 2:4). Кылсярысь, куке Иегова Сауллы вераз, мар кароно амалик калыкез вормем бере, Саул солэсь ӧз кылзӥськы. Самуил пророк вераз Сауллы, со янгышаз шуыса. Нош Саул соглаш ӧз кариськы. Со сяна, со ассэ шонере поттыны но тыршиз. Саул вераз, солэн янгышез сокем секыт ӧвӧл шуыса, но мукетъёссэ янгыше уськытыны выриз (1 Экс. 15:13—24). Таӵе мылкыдыз Сауллэн азьвыл но шӧдӥськиз (1 Экс. 13:10—14). Жаляса верано луэ, со вылтӥяськон сямлы сётскиз. Саул воштӥськыны пумит луиз, соин ик Иегова со интые мукет эксэй пуктӥз.

5. Малы дышетэ милемыз Сауллэн примерез?

⁵ Милям уг поты Сауллэсь адӟем кареммы. Соин ик астэ юано: «Библиез лыдӟыса, мон валасько ке, мыным воштӥськоно шуыса, утчасько-а мон мугъёс та визь-кенешез уже кутонтэм вылысь? Малпасько-а мон, Библиысь возетлэсь ӧй кылзӥськы ке, номыр уродэз уз луы шуыса? Лэсьтэм янгышъёсы понна мукетъёссэ янгыше уськытӥсько-а?» Та юанъёс пӧлысь одӥгезлы ке но ми «бен» шуимы ке, милемлы воштоно сое, кызьы ми малпаськиськомы но кызьы асьмеды возиськомы. Ӧм ке воштӥське, ми сокем вылтӥяськыны быгатомы, Иегова милемын эшъяськемысь но дугдоз (Иак. 4:6).

6. Маин пӧртэм вал Давид Сауллэсь?

⁶ Саулэн ӵошатыса, Давид Иеговалэсь законзэ яратӥз (Пс. 1:1—3). Одӥг пол со Иеговалы таӵе кылъёсын вазиськиз: «Зӥбыт-востэм муртъёсты Тон утиськод, вылӥ мылкыдоосты шоразы учкыса зӥбломытӥськод» (2 Экс. 22:28). Соин ик, куке Давид вала вал, малпанъёсыз Инмарлэн законэзлы пумит луо шуыса, со воштӥськыны тыршиз. Со гожтӥз: «Визь сётӥсь Кузё-Инмарез данъяло; уйёсы но сюлмы монэ дышетэ» (Пс. 15:7).

7. Кызьы ми асьмеды возёмы, зӥбыт-востэмесь луимы ке?

⁷ Ми зӥбыт-востэмесь ке, соку Библиысь визь-кенешъёслэсь кылзӥськомы но шонертэм малпанъёсмес тупатомы, янгыш медам лэсьтэ шуыса. Инмарлэн Кылыз луоз куара выллем, кудӥз милемлы вера: «Тани сюрес, со кузя мынэ!» (Ис. 30:21). Со алоз милемыз, ми шонер сюрес вылысь кожимы ке. Иеговалэсь кылзӥськон милемлы пайда ваёз (Ис. 48:17). Кылсярысь, янгышъёсмы понна гордэктоно уз луы. Озьы ик Иеговаен кусыпъёсмы юнмалозы, малы ке шуоно ми валаломы, Иегова милемыз аслэсьтыз нылпиоссэ кадь яратэ шуыса (Евр. 12:7).

8. Иаковлэсь 1:22—25 лыдэ басьтыса, малы Библиез синучконэн ӵошатыны луэ?

⁸ Инмарлэсь Кылзэ ӵошатыны луэ синучконэн. (Лыдӟе Иаковлэсь 1:22—25.) Тросэз дорысьтызы потон азьын синучконэ учко, дыр, ваньмыз умой-а шуыса. Озьы ик, котькуд нунал Библиез лыдӟыса, ми тупатыны быгатомы сое, кызьы малпаськиськомы но кызьы улон шоры учкиськомы. Тросэзлы кельше котькуд нуналлы кылбурез лыдӟыны ӵукна, дорысьтызы потэмзылэсь азьло.  Солы луыса соос быгато Библиысь визь-кенешъёсъя малпанъёссэс тупатыны но соосты улоназы пыртыны. Со сяна, милемлы дышоно котькуд нунал Инмарлэсь Кылзэ эскерыны но со вылын малпаськыны. Номыр секытэз ӧвӧл, кадь, нош сотэк пырак улонэ нуись сюбег сюрес вылтӥ мыныны уг луы.

9. Кыӵе учыре эш визь-кенеш сётыны быгатэ?

⁹ Вал-а тӥляд сыӵе учыръёсты, куке тӥ шонер сюрес вылысь кожиды но Иеговалэсь палэнскыны кутскиды? (Пс. 72:2, 3). Кылсярысь, адӟем карымон эшты тӥледлы визь-кенеш сётыны дӥсьтӥз. Кылзӥськиды-а тӥ солэсь? Кылзӥськиды ке, тӥ шонер лэсьтӥды. Дырыз дыръя сётэм визь-кенешез понна тӥ солы тау кариськоды, луоз (Мад. 1:5).

10. Мар кароно, эшмы милемлы визь-кенеш сётэ ке?

¹⁰ Инмарлэн Кылыз тодамы вайытэ: «Яратӥсь муртлэн пыкылонъёсыз сюлмысь потэмын луо» (Мад. 27:6). Мар сярысь татын вераське? Эскеромы таӵе примерез. Шуом, тӥ эшеныды малпаськоды потыны сюрес вамен, кытӥ трос машинаос ветло. Нош тӥ телефонады учкиськоды но чакласькытэк сюрес вылэ потӥськоды. Со куспын эшты кидэс кутэ но ӝогак берлань кыске. Тӥляд киды лыз-вож луэ, нош эштылы луыса тӥ машина улэ ӧд сюре. Киды кӧня ке нунал ӵоже висиз ке но, вождэс поттоды-а тӥ эштылы? Уд, тӥ солы тау кароды. Со выллем ик луэ, куке эшты тӥледлы вера, кылъёсты яке ужъёсты Инмарлэн шонерлыко куронъёсызлы пумит луо шуыса. Нырысь со сюлэмдэс вӧсь карыны быгатэ ке но, кулэ ӧвӧл эштылы вождэс поттыны яке кӧттэс ӝож карыны — со визьмо уз луы (Екк. 7:9). Со интые эштылы тау каре, тӥледлы визь-кенеш сётыны дӥсьтӥз шуыса.

11. Мар люкетыны быгатэ эшмылэн визь-кенешезлэсь кылзӥськыны?

¹¹ Мар люкетыны быгатэ эшмылэн визь-кенешезлэсь кылзӥськыны? Вылтӥяськон сям. Вылтӥяськись адямиос уг ярато кылзыны соосты, кинъёс Библиысь визь-кенеш сёто, нош ярато кылзыны соосты, кинъёс «мылкыдзылы тупась чебересь кылъёс» верало (2 Тим. 4:3, 4). Сыӵе адямиос малпало, соослы визь-кенешъёс кулэ ӧвӧл шуыса, малы ке шуоно асьсэды мукетъёсызлэсь визьмогес шуыса лыдъяло. Но апостол Павел гожтӥз: «Ачиз нокин ке но ӧвӧл, нош со ассэ вылӥ луисько шуыса лыдъя ке, со ассэ ачиз озьы пӧя» (Гал. 6:3). Нош Соломон эксэй тазьы вераз: «Пересь но визь-кенешъёсты кабыл басьтыны быгатӥсьтэм укылтэм эксэй луон сярысь, ӟечгес куанер ке но, но визьмо пинал пи луыны» (Екк. 4:13).

12. Малы дышетэ милемыз Пётрлэн учырез кудӥз гожтэмын Галатъёслы 2:11—14?

¹² Тодамы ваёмы, кызьы апостол Пётр ассэ возиз, куке апостол Павел солы шонерак вераз, со янгыш шуыса. (Лыдӟе Галатъёслы 2:11—14.) Пётр вожзэ поттыны быгатысал солы, кызьы Павел визь-кенешез сётӥз но ваньмыз азьын сое сётӥз шуыса. Но Пётр визьмо адями вал. Со Павеллэсь кылзӥськиз но солы йыркуръяськыса ӧз улы. Берлогес со Павелэз гажано агай шуыса нимаз (2 Пётр 3:15).

13. Мар сярысь тодамы возёно, ми эшмылы вераны малпаськомы ке, со ассэ шонертэм возе шуыса?

¹³ Мар сярысь тодады возёно, тӥ эштылы вераны малпаськоды ке, со ассэ шонертэм возе шуыса? Соин вераськемдылэсь азьло асьтэлэсь юалэ: «Мон укыр шонер улӥсь ӧвӧл-а?» (Екк. 7:16). «Укыр шонер улӥсь» адями, мукетъёсты, Инмарлэн куронъёсызъя судить уг кары, со аслаз куронъёсызъя судить каре. Солы адямиосты гажаны-жаляны секыт. Тӥ малпаськоды ке, эшеныды  вераськытэк уз луы шуыса, валамон вералэ солы, кыӵе янгыш со лэсьтӥз. Сётэ солы сыӵе юанъёс, кудъёсыз солы малпаськыны но янгышсэ валаны юрттозы. Визь-кенешты Библия вылэ пыкиськемын мед луоз. Тодады возе: эшты тӥ азьын кыл уг куты, со Иегова азьын кыл кутэ (Рим. 14:12, 13). Асьтэлэн визьды вылэ эн пыкиське, нош Христослэсь гажан-жалянзэ адӟем каре (Мад. 3:5; Матф. 12:20). Малы со кулэ? Малы ке шуоно Иегова ассэ милемын возёз озьы ик, кызьы ми асьмеды мукетъёсын возиськомы (Иак. 2:13).

14. Кызьы ми сярысь сюлмаське Иеговалэн организациез?

¹⁴ Иегова нуэ милемыз улон сюрес вылтӥ аслаз организациез пыр. Печатлам но электрон публикациос, видео, кенешлэн пумиськонъёсыз — ваньмыз та юрттэ милемлы Библиысь визь-кенешъёсты уже кутыны. Ваньмызлы, малы дышетэ Иеговалэн организациез, быдэсак оскыны луэ, малы ке шуоно со Инмарлэн Кылыз вылэ пыкиське. Куке Кивалтӥсь кенешысь агайёс ужпум куто, кызьы тодытон ужез радъяны, соос кылзӥсько Иеговалэн кивалтэтэзлэсь, кудзэ со святой духез пыр сётэ. Озьы ке но Кивалтӥсь кенеш кутэм ужпумъёссэ куддыръя выльысь эскере. Малы? Та дуннеын югдур воштӥське бере, Инмарлэн организациезлы выль югдуръёслы тупатсконо луэ (1 Кор. 7:31).

15. Кыӵе шуг-секытэн пумиськизы куд-ог вын-агайёс но сузэр-апайёс?

¹⁵ Веранэз ӧвӧл, куке Иеговалэн организациез Библиысь кыӵе ке дышетонэз выль сямен валэктэ яке вера, кызьы асьмеды возёно, ми соин соглаш кариськиськомы. Нош кызьы ми асьмеды возиськомы, куке солэн кутэм ужпумъёсыз улонмылэн мукет удысъёсыныз герӟаськемын? Кылсярысь, берло аръёсы, Инмарлы йыбыртъянэн герӟаськем юртъёсты пуктон но соосты эскерон-тупатъян понна, тросгес но тросгес коньдон кулэ луэ. Соин ик Кивалтӥсь кенеш ужпум кутӥз Эксэйлык юртъёсты тужгес но умой амалэн кутыны. Со понна кенешъёс огазеямын вал, нош куд-ог Эксэйлык юртъёс — вузамын. Солы луыса Эксэйлык юртъёсты пуктыны луиз отын, кытын соос кулэгес. Тӥ палан но кенешъёсты огазеязы но Эксэйлык юртэз вузазы ке, выль югдурлы дышыны тӥледлы капчи ӧвӧл, дыр. Табере куд-огъёсызлы  пумиськонэ мынон понна тросгес дыр кулэ луэ. Нош куд-огъёсыз уг валало, малы Эксэйлык юртсэс вузазы, кудзэ соос туж тыршизы пуктыны яке чакласа возьыны. Оло нош, соос малпало, юнме тыршизы шуыса. Озьы ке но соос Иеговалэн организациеныз соглаш карисько. Со понна соосты туж ушъяны луэ.

16. Кызьы Колоссыослы 3:23, 24 гожтэм кылъёс юртто милемлы шумпотыса улыны?

¹⁶ Мар юрттоз милемлы шумпотыса улыны? Тодамы возёно: ми Иегова понна тыршиськомы но со аслаз организациеныз кивалтэ. (Лыдӟе Колоссыослы 3:23, 24.) Давид эксэй, кудӥз храмез пуктон понна коньдон сётӥз, милемлы умой адӟем карон возьматэ. Со Иеговалы вераз: «Уго, кин со мон, кин со мынам калыке, тазьы саламъёс-кузьымъёс сётыны быгатӥмы? Но ваньмыз Тынад сётэмед, Тынад киысьтыд басьтэмез Тыныд сётӥмы» (1 Пар. 29:14). Ми но, ас мылкыд кареммыя коньдон сётыкумы, Инмарлы сётӥськомы сое, мае со милемлы сётӥз. Но Иегова туж шумпотэ, куке ми дырмес, кужыммес но коньдонмес сётӥськомы, солэсь ужзэ быдэстон понна (2 Кор. 9:7).

17. Малы ӝоже усёно ӧвӧл, валаськоды ке, тӥледлы мае ке воштоно на шуыса?

¹⁷ Азьланяз но улонэ нуись сюбег сюрес вылтӥ мынон понна, милемлы Христослэсь адӟем кароно (1 Пётр 2:21). Тӥ валаськоды ке, тӥледлы мае ке воштоно на шуыса, мылкыдды медаз куашка. Со возьматэ, тӥляд Иеговалэн визь-кенешъёсызлэсь кылзӥськемды потэ шуыса. Эн вунэтэ, Иегова тодэ, ми тырбыдэстэмесь шуыса. Соин ик ӵапак Христос кадь лэсьтэммес со уг возьма.

18. Мар кароно, выль дуннеын улон понна?

¹⁸ Ноку но эн коже выль дуннее нуись сюрес вылысь. Кулэ дыръяз воштэ сое, кызьы тӥ малпаськиськоды, кызьы улон шоры учкиськоды но кызьы асьтэды возиськоды (Мад. 4:25; Лука 9:62). Азьланяз но зӥбыт-востэмесь луэ, шумпотэ, воштӥське, «соку яратыса, тупаса улонлэн Инмарез тӥледын валче улоз» (2 Кор. 13:11). Со юрттоз тӥледлы али шумпотыса улыны, нош азьланяз выль дуннеын улон кузьмалоз.