1. De acordo con Mateo 7:13, 14, parché che podemo dir che semo drio caminar nte una strada?

GESÙ el ga dito che noantri semo drio caminar nte una strada streta e difìcile de caminar. (Ledi Mateo 7:13, 14. *) Questa strada la mena ala vita eterna ndove Geovà el ndarà governar. Par quela che femo sforso par seitar a caminar in questa strada. Ma come noantri no semo perfeti, l’è fàcile ndar fora dela strada. — Gàl. 6:1.

2. Cossa che ndaremo veder in questo stùdio? (Vedi el quadro “ La umiltà la ne giuta a cambiar quel che ghemo de bisogno”.)

² Paolo el ga dito ai cristiani de Corinto: ‘Seité a far i cambiamenti che ghe ocore.’ (2 Cor. 13:11) Anca noantri ghemo de seghir questo consìlio. Parché? Parché noantri sol saremo boni de caminar nela strada giusta se cambiemo quel che ghemo de bisogno in quel che pensemo, quel che sentimo e quel che femo. Questo stùdio el ne giutarà a far questo. Prima, ndaremo veder come la Bìblia e amighi che i ga una bona relassion con Geovà i pol giutarne a far i cambiamenti che ghemo de bisogno. Ndaremo anca veder parché che pol esser difìcile seghir le orientassion dela organisassion de Geovà e come che esser ùmili ne giutarà a far questo sensa perder la alegria.

3. Come che la Bìblia la pol giutarne?

³ El nostro cuor l’è tanto “traditor”. (Ger. 17:9) Par quela, l’è fadiga saver se noantri se sentimo e pensemo dela maniera giusta. Alora, l’è tanto fàcile ‘imbroiarse par le maniere sbaliade de pensar’. (Tiago 1:22) Ma la Bìblia la pol  giutarne a saver se semo drio pensar dela maniera giusta. Ela la ze come una màchina, che i dotori i dopera par saver quel che ghemo par rento, parché la mostra quel che pensemo e le nostre motivassion. (Ebr. 4:12, 13) Alora, ghemo de esser ùmili par acetar i consili dela Bìblia e de quei che Geovà el dopera par giutarne.

4. Come che savemo che Saul l’è deventà orgolioso?

⁴ Quel che ga sucedesto con Saul mostra quel che pol suceder quando no semo ùmili. Par esémpio, nela guera contra i amalechiti, Geovà el gavea dato orientassion a Saul ma lu no’l ga mia obedio. Quando el profeta Samuel l’è ndato darghe un consìlio, Saul no’l ga acetà e gnanca no’l ga pensà che lu l’era sbalià. Invesse, lu el ga catà fora scuse, el ga parlà che no l’è stato tanto sbalià cossita e che el ga fato quel par causa dei altri. (1 Sam. 15:13-24) Poco tempo vanti, lu el gavea fato una roba cossita. (1 Sam. 13:10-14) Saul l’è deventà orgolioso e no l’è stato bon de veder che el gavea de cambiar quel che el pensea e quel che el fea. (Sal. 36:1, 2; Aba. 2:4) Alora, Geovà no’l ga acetà quel che Saul el ga fato e no’l ga pi volesto esser el so amigo.

5. Cossa che podemo far par no deventar orgoliosi come Saul?

⁵ Se no volemo far come Saul, ghemo de domandarse: ‘Quando son drio leder i consili dela Bìblia, cato fora scuse par no cambiar la me maniera de pensar? Quando mi fao robe sbaliade, penso che no l’è pròpio bruto cossita? Quando mi fao un sbàlio, parlo che l’è stato par causa dei altri?’ Se la risposta la ze ‘si’ a qualche una de queste domande, ghemo de cambiar la nostra maniera de pensar. Se no cambiemo, ndemo deventar orgoliosi e Geovà no’l sarà pi nostro amigo. — Tiago 4:6.

6. Quala che la era la difarensa intrà Saul e Davi?

⁶ Saul l’era tanto difarente de Davi. Davi el amea la “lege de Geovà”. (Sal. 1:1-3) Lu el savea che Geovà el salva le persone ùmile ma no’l ghe piase de quele che le ze orgoliose. (2 Sam. 22:28) Alora, Davi el assea che la lege de Geovà lo giutesse a cambiar la so maniera de pensar. Lu el ga scrito: “Vao darghe onor a Geovà, quel che el me dà consili. Anca durante la note, i me pensamenti i me insegna la roba giusta de far.” — Sal. 16:7.

7. Parché che ghemo de esser ùmili?

⁷ Parché che ghemo de esser ùmili? Parché se semo ùmili, ndaremo cambiar la nostra maniera de pensar de acordo coi prinsipi dela Bìblia. La Parola de Dio la ndarà esser come una voce che la dise: “Questa la ze la strada. Ndé par ela.” La Bìblia la ndarà mostrarne quel che ghemo de cambiar par no ndar fora dela strada giusta. (Isa. 30:21) Parché che l’è bon scoltar a Geovà? (Isa. 48:17) Par esémpio, no ndaremo far qualcossa bruta e gnanca ne tocarà scoltar che semo drio sbaliar. E restaremo anca pi darente del nostro amoroso Pare. — Ebr. 12:7.

8. De acordo con Tiago 1:22-25, parché che la Parola de Dio la ze come un spècio?

⁸ Tanti i se varda nel spècio vanti de ndar via de casa. Cossita, lori i pol meter a posto qualcossa che no va mia ben. La Bìblia anca la ze come un spècio par noantri. (Ledi Tiago 1:22-25. *) La Bìblia la ne giuta  a veder quel che ghemo de cambiar nela nostra maniera de pensar e far le robe. Par esémpio, tanti i lede el testo del giorno de matina, cossita lori i pol pensar e proar meter in pràtica nel giorno. Noantri ghemo anca de leder la Bìblia e pensar in quel che ledemo tuti i giorni. Noantri ghemo de far questo par seitar a caminar nela strada giusta.

9. Parché che fursi te ghè ricevesto un consìlio?

⁹ Fursi ti te ghè belche scominsià a far qualcossa che la ndaria rovinar la to amicìssia con Geovà. (Sal. 73:2, 3) Pol esser che un amigo el te ga parlà sora quel che te gavei de cambiar. Se te ghè scoltà e te ghè metesto el consìlio in pràtica, te ghè fato la roba giusta. Sicuro che te sì restà tanto contento de ricever questo consìlio. — Pro. 1:5.

10. Cossa che ghemo de far quando ricevemo un consìlio de un amigo?

¹⁰ La Parola de Dio la dise: “El amigo leal el ne dà consili anca quando no ne piase de scoltarli.” (Pro. 27:6) Metemo dir che una persona la ze drio spetar par ndar de quel’altra banda de una strada che passa tanti auti. Ma la persona la resta sol su par el telèfono e no la varda par le bande vanti de ndar a quel’altra banda. Alora, un amigo lo tira indrio e cossita lo salva. Ma sarà che questa persona la restarà disgustada col so amigo ancora che el ghe ga fato mal al brasso? Sicuro che nò! Invesse, lu el ndaria ringrassiarlo parché lo ga salvà. Sucede la medèsima roba quando ricevemo un consìlio. Pol esser che no ne piase de ricéverlo, ma no ghemo de restar inrabiadi e gnanca disgustadi, saria bruto se féssino questo. (Ecl. 7:9) Invesse, ghemo de restar contenti parché lu el ga bio coraio de giutarne.

11. Parché che una persona no la ndaria acetar el consìlio de un amigo?

¹¹ Parché che una persona no la ndaria acetar el consìlio de un amigo? Par causa del orgòlio. Persone orgoliose le ghe piase de scoltar quel che l’è bon par lore. Lore no le vol scoltar la verità. (2 Tim. 4:3, 4) Lore le pensa che le sa de pi che i altri e che le ze pi importante che i altri. El apòstolo Paolo el ga scrito: “Se qualchedun el pensa che l’è importante quando che no l’è, l’è drio imbroiar a lu stesso.” (Gàl. 6:3) El rè Salomon el ga parlà: “L’è meio un gióveno poareto, ma che el ga sabedoria, che un rè vècio, ma che l’è stùpido parché no’l sa scoltar consili.” — Ecl. 4:13.

12. (a) Cossa che el apòstolo Piero el ga fato quando Paolo ghe ga dato un consìlio? (b) Cossa che imparemo de questo?

¹² Vedi quel che ga sucedesto col apòstolo Piero. El apòstolo Paolo el ghe ga dato un consìlio davanti de tante persone. (Ledi Gàlati 2:11-14. *) Piero el podaria restar disgustà con Paolo. Ma cossa che Piero el ga fato? Lu el ga mostrà sabedoria, el ga acetà el consìlio e no l’è restà disgustà con Paolo, parché pi tardi lu lo ga ciamà de “fradel amà”. — 2 Pie. 3:15.

13. Cossa che ghemo de far quando ndemo dar un consìlio?

¹³ Quando ndemo dar un consìlio,  ghemo de star atenti par no esser massa giusti. La persona che la ze massa giusta no la fà le robe de acordo coi prinsipi de Geovà, ma la fà le so pròpie lege e no la mostra tanta compassion. Alora, la giulga ale altre persone de acordo cole so lege. (Ecl. 7:16) Se noantri pensemo che l’è pròpio bisogno de dar un consìlio, prima ghemo de saver qual che l’è el problema. Alora, podemo doperar domande par giutar el nostro amigo a veder che el ga sbalià e anca fidarse nei consili dela Bìblia. Ricòrdate che l’è Geovà che ndarà giulgarlo e nò noantri. (Rom. 14:10) Ghemo de doperar la Bìblia e anca gaver compassion cossita come Gesù. (Pro. 3:5; Mat. 12:20) Ghemo de mostrar compassion parché Geovà el ndarà giulgarne dela medèsima maniera che giulghemo ai altri. — Tiago 2:13.

14. Cossa che la organisassion de Geovà la ne dà?

¹⁴ Come che la organisassion de Geovà la ne giuta a seitar a caminar nela strada giusta? Ela la ne dà i vìdei, publicassion e le riunion che ne giuta a meter in pràtica i consili dela Parola de Dio. Noantri podemo fidarse in tuto questo parché l’è tuto fato de acordo cola Bìblia. El Corpo Governante sempre el ga el aiuto del spìrito santo par far tute le dessision sora la predicassion. Ancora cossita, lori sempre i pensa se i ga de bisogno de far qualche cambiamento, parché el mondo l’è drio cambiar e anca la organisassion de Geovà la ga de far qualche cambiamento. — 1 Cor. 7:31.

15. Che cambiamenti arquanti fradei i ga bio de far?

¹⁵ Quando la organisassion de Geovà la fà qualche cambiamento nei insegnamenti bìblichi e sora quel che l’è giusto o sbalià, noantri acetemo. Ma pol esser fadiga far questo quando ghemo de far altri cambiamenti. Par esémpio, come ghen’è bisogno de tanti soldi par far su e mantegner i Saloni del Regno, el Corpo Governante el ga orientà le congregassion a doperarli meio. La organisassion anca la ga vendesto arquanti saloni, cossita la ga sparagnà soldi e la ga fato su saloni ndove che ghen’era de pi bisogno. Ma tanti fradei i ga bio de cambiar de Salon del Regno. Fursi l’è stato fadiga far questo parché arquanti i ga de  viaiar par ndar ale riunion. Altri i ga laorà tanto par far su i saloni e adesso i se domanda parché i ze stati vendesti. Lori i pol pensar che el so laoro l’è stato par gnente. Ancora cossita, lori i ze drio acetar e obedir ala dessision del Corpo Governante e par quela i mèrita esser lodadi.

16. De acordo con Colossensi 3:23, 24, cossa che ndarà giutarne a esser contenti?

¹⁶ Noantri saremo contenti se se ricordemo che semo drio laorar par Geovà e che lu l’è drio tender dela so organisassion. (Ledi Colossensi 3:23, 24. *) Geovà el resta tanto contento se doperemo el nostro tempo, la nostra forsa e i nostri soldi par giutar nela òpera. Davi el ga dato un bel esémpio quando el ga fato contribussion par far su el témpio. Lu el ga dito: “Ma chi che mi son e chi che l’è el me pòpolo par far le oferte dela nostra pròpia voia? Parché tuto vien de ti e tuto quel che te demo l’è belche tuo.” (1 Cró. 29:14) Alora, quando femo le nostre contribussion semo drio dar indrio a Geovà quel che l’è belche suo. — 2 Cor. 9:7.

17. Se te ghè de far qualche cambiamento, cossa che questo el mostra?

¹⁷ Noantri seitaremo a caminar nela strada giusta se noantri imitemo a Gesù. (1 Pie. 2:21) Ma se te ghè de cambiar qualcossa, no stà restar disgustà, parché questo mostra che te vol seghir le orientassion de Geovà. Ricòrdate che Geovà el sa che no semo perfeti, alora lu no’l speta che femo tuto perfeto come Gesù el ga fato.

18. Cossa che ghemo de far par seitar a caminar nela strada giusta?

¹⁸ Alora, ghemo de cambiar la nostra maniera de pensar, quel che sentimo e quel che femo quando che ghe vol e ghemo de pensar nele benedission che gavaremo nel futuro. (Pro. 4:25; Luc. 9:62) Ghemo de seitar a esser ùmili, ‘contenti e a cambiar quel che ghe ocore’. (2 Cor. 13:11) Se femo cossita, el Dio de amor e de pace el sarà con noantri adesso e par sempre!