1. Sumala ha Mateo 7:13, 14, kay ano nga masisiring naton nga aada kita ha usa nga pagbiyahe?

KITA ngatanan aada ha usa nga pagbiyahe. An aton destinasyon, o tumong, amo an makaukoy ha bag-o nga kalibotan ilarom han mahigugmaon nga pagmando ni Jehova. Kada adlaw, naniningkamot kita paglakat ha dalan ngadto ha kinabuhi. Pero sugad han siring ni Jesus, ito nga dalan gutiay ngan usahay makuri agian. (Basaha an Mateo 7:13, 14.) Tungod kay diri kita perpekto, masayon la kita mahisimang tikang hito nga dalan.​—Gal. 6:1.

2. Ano an aton hihisgotan hini nga artikulo? (Kitaa liwat an kahon nga “ An Pagpaubos Nabulig ha Aton nga Maghimo hin mga Pagbag-o.”)

² Kon karuyag naton makapabilin ha gutiay nga dalan ngadto ha kinabuhi, kinahanglan andam kita nga maghimo hin mga pagbag-o ha aton panhunahuna, disposisyon, ngan buhat. Gin-aghat ni apostol Pablo an mga Kristiano ha Corinto nga padayon nga “magpatadong.” (2 Cor. 13:11) Ito nga sagdon aplikado liwat ha aton. Hini nga artikulo, hihisgotan naton kon paonan-o makakabulig ha aton an Biblia ha pagtadong han aton mga pitad ngan kon paonan-o makakabulig an aton hamtong nga kasangkayan nga makapabilin kita ha dalan ngadto ha kinabuhi. Hihisgotan liwat naton kon ha ano nga mga sitwasyon mahimo magin makuri an pagsunod ha giya han organisasyon ni Jehova. Mahibabaroan naton kon paonan-o an pagpaubos makakabulig ha aton nga maghimo hin mga pagbag-o nga diri nawawara an aton kalipay ha pag-alagad kan Jehova.

3. Paonan-o makakabulig ha imo an Pulong han Dios?

³ Diri masayon an pag-usisa han aton panhunahuna ngan mga inaabat. An aton kasingkasing malimbong salit bangin makurian kita ha paghibaro kon ano an igin-aaghat hito ha aton nga buhaton. (Jer. 17:9) Masayon malimbongan an aton kalugaringon han “sayop nga pangatadongan.” (San. 1:22) Salit kinahanglan gamiton naton an Pulong han Dios ha pag-usisa han aton kalugaringon.  Pinaagi han Pulong han Dios, naibubuhayhag an aton sulod nga pagkatawo, an “panhunahuna ngan mga intensyon” han aton kasingkasing. (Heb. 4:12, 13) Maipapariho naton an Pulong han Dios ha X-ray machine, nga nabulig nga makita an sulod han aton lawas. Pero kinahanglan kita magin mapainubsanon kon karuyag naton makabenepisyo han mga sagdon tikang ha Biblia o ha mga representante han Dios.

4. Ano an nagpapakita nga nagin mapahitas-on hi Hadi Saul?

⁴ Iginpapakita han ehemplo ni Hadi Saul kon ano an mahimo mahitabo kon diri kita mapainubsanon. Nagin mapahitas-on gud hi Saul salit waray niya amina, bisan ha iya kalugaringon, nga kinahanglan niya bag-uhon an iya panhunahuna ngan ginbubuhat. (Sal. 36:1, 2; Hab. 2:4) Nakita ini han gintagan ni Jehova hi Saul hin espisipiko nga instruksyon kon ano an iya bubuhaton katapos niya mapirde an mga Amalekita. Pero waray sugta ni Saul hi Jehova. Ngan han ginkompronta hiya ni propeta Samuel mahitungod hito, waray niya karawata an iya sayop. Lugod, naningkamot hiya nga pakamatadungon an iya diri pagkamasinugtanon pinaagi ha pagsiring nga diri man daku nga sayop an iya nabuhat ngan ginbasol niya an iba. (1 Sam. 15:13-24) Antes pa hito, nagpakita hiya hin puropariho hito nga disposisyon. (1 Sam. 13:10-14) Makasurubo, gintugotan niya nga magin mapahitas-on an iya kasingkasing. Waray niya tadonga an iya panhunahuna, salit ginsaway ngan ginsalikway hiya ni Jehova.

5. Ano an aton mahibabaroan tikang ha ehemplo ni Saul?

⁵ Basi diri kita magin pariho kan Saul, maopay nga pakianhan naton an aton kalugaringon: ‘Kon may nababasa ako nga sagdon ha Pulong han Dios, ginpapakamatadong ko ba an akon panhunahuna? Ginhuhunahuna ko ba nga diri man sobra karaot an akon ginbubuhat? Ginbabasol ko ba an iba tungod han akon mga nabuhat?’ Kon oo an aton baton ha bisan hain hini nga mga pakiana, kinahanglan naton bag-uhon an aton panhunahuna ngan disposisyon. Kay kon diri, magigin mapahitas-on gud kita ngan diri na makikigsangkay ha aton hi Jehova.​—San. 4:6.

6. Isaysay an kaibahan nira Hadi Saul ngan Hadi David.

⁶ Tagda an kaibahan ni Hadi Saul ngan an sinaliwan ha iya nga hi Hadi David, usa nga tawo nga nahigugma ha “balaud ni Jehova.” (Sal. 1:1-3) Maaram hi David nga gintatalwas ni Jehova an mga mapainubsanon pero nakontra hiya ha mga mapahitas-on. (2 Sam. 22:28) Salit gintugotan ni David nga bag-uhon han balaud han Dios an iya panhunahuna. Hiya nagsurat: “Dadayawon ko hi Jehova nga nagsagdon ha akon. Bisan ha gab-i gintatadong ako han akon gihilarumi nga mga panhunahuna.”​—Sal. 16:7.

7. Ano an aton bubuhaton kon mapainubsanon kita?

⁷ Kon mapainubsanon kita, tutugotan naton nga tadungon han Pulong han Dios an aton sayop nga panhunahuna antes pa naton mabuhat ito. An Pulong han Dios magigin pariho hin usa nga tingog nga nasiring ha aton: “Ini an dalan. Lakat kamo dida hini.” Magpapahamangno ito ha aton kon nahisisimang kita tikang ha dalan​—ngadto ha wala o ha too. (Isa. 30:21) Kon mamamati kita kan Jehova, makakabenepisyo kita ha damu nga paagi. (Isa. 48:17) Pananglitan, malilikyan naton an kaalohi tungod kay may nagtadong ha aton. Ngan magigin mas duok kita kan Jehova kay maaram kita nga gintatratar kita niya sugad hin hinigugma nga anak.​—Heb. 12:7.

8. Sumala ha Santiago 1:22-25, paonan-o naton magagamit an Pulong han Dios sugad nga espiho?

⁸ An Pulong han Dios maipapariho naton ha espiho. (Basaha an Santiago 1:22-25.) Kadam-an ha aton nangingespiho anay kada aga antes bumaya ha balay. Tungod hito, nakikita naton kon may kinahanglan kita ayuson ha aton kalugaringon antes pa ito makita han iba. Sugad man, kon nagbabasa kita han Biblia kada adlaw, nakikita naton kon ano an mahimo naton bag-uhon ha aton panhunahuna ngan disposisyon. Nakakabulig ha damu an pagbasa han inadlaw nga teksto kada aga antes bumaya ha ira balay. Gintutugotan nira an  ira nababasa nga makaapekto ha ira panhunahuna. Katapos, ha bug-os nga adlaw, namimiling hira hin mga paagi nga maiaplikar an sagdon han Pulong han Dios. Kinahanglan liwat naton pag-adman ngan pamalandungon an Pulong han Dios kada adlaw. Baga hin simple la ini, pero usa ini han pinakaimportante nga mahimo naton buhaton basi makapabilin ha gutiay nga dalan ngadto ha kinabuhi.

9. Kay ano nga bangin tadungon ka han imo sangkay?

⁹ Natestingan mo na ba mahisimang ha usa nga dalan nga nagpapahirayo ha imo tikang kan Jehova? (Sal. 73:2, 3) Kon may hamtong ka nga sangkay nga nagkaada kaisog ha pagtadong ha imo, namati ka ba ha iya ngan ginsunod an iya sagdon? Kon amo, tama an imo ginbuhat, ngan sigurado nga mapasalamaton ka nga ginpahamangnoan ka niya.​—Prob. 1:5.

10. Ano an angay mo buhaton kon ginsagdonan ka han imo sangkay?

¹⁰ An Pulong han Dios nagpapahinumdom ha aton: “An mga samad nga iginhatag han usa nga sangkay pamatuod han iya pagin maunungon.” (Prob. 27:6) Ano an iginpapasabot hini? Hunahunaa ini nga ilustrasyon: Imadyina nga titabok ka ha kalsada nga damu an awto pero busy ka pagkinita ha imo celfon. Nagtikang ka tumabok nga diri nagkikita ha kalsada. Katapos, tigda ka nga ginbutong han imo sangkay. Makusog gud an iya pagkapot ha imo butkon salit nagkaada ito bun-og. Pero tungod kay ginbutong ka niya, waray ka maligis. Bisan kon nagsisinakit an imo bun-og hin pipira ka adlaw, masisina ka ba ha imo sangkay tungod kay ginbutong ka niya? Diri gud! Lugod, magpapasalamat ka nga ginbuligan ka niya. Sugad man, kon pahamangnoan ka han usa mo nga sangkay nga an imo panyakan o buhat diri uyon ha matadong nga mga suruklan han Dios, bangin masakitan ka ha siyahan. Pero ayaw kasina kay ginsagdonan ka niya. Kalurongan ito. (Ecles. 7:9) Lugod, magin mapasalamaton nga an imo sangkay nagkaada kaisog ha pagsagdon ha imo.

11. Ano an posible magin rason nga diri karawaton han usa an maopay nga sagdon han iya sangkay?

¹¹ Ano an posible magin rason nga diri karawaton han usa an maopay nga sagdon han iya mahigugmaon nga sangkay? An pagpahitaas. Karuyag han mapahitas-on nga mga tawo nga ‘giritikgitikon an ira mga talinga. Diri hira namamati han kamatuoran.’ (2 Tim. 4:3, 4) Para ha ira, diri nira kinahanglan hin sagdon kay hitaas an ira pagkita ha ira kalugaringon. Pero hi apostol Pablo nagsiring: “Bisan hin-o nga naghuhunahuna nga importante hiya pero diri ngay-an, ginlilimbongan niya an iya kalugaringon.” (Gal. 6:3) Iginsaysay ini hin maopay ni Hadi Solomon. Hiya nagsurat: “Mas maopay an bata nga pobre pero maaramon kay han hadi nga lagas na pero lurong, nga diri na namamati ha pahamangno.”​—Ecles. 4:13.

12. Ano an aton mahibabaroan ha susbaranan ni apostol Pedro, nga mababasa ha Galacia 2:11-14?

¹² Tagda an susbaranan nga iginpakita ni apostol Pedro han gintadong hiya ni apostol Pablo ha publiko. (Basaha an Galacia 2:11-14.) Puydi unta masina hi Pedro kan Pablo tungod ha paagi han iya pagsagdon ngan tungod kay ginhimo niya ito ha atubangan han mga tawo. Pero maaramon hi Pedro. Ginkarawat niya an sagdon ngan waray hiya magdumot kan Pablo. Lugod, ha urhi gintawag niya hi Pablo nga “hinigugma nga bugto.”​—2 Ped. 3:15.

13. Ano an kinahanglan naton hinumdoman antes magsagdon?

¹³ Kon inaabat mo nga kinahanglan mo sagdonan an usa nga sangkay, ano an kinahanglan mo hinumdoman? Antes mo hiya kaistoryahon, pakianhi an imo kalugaringon, ‘Sobra ba ako nga nagpapakamatadong?’ (Ecles. 7:16) An tawo nga sobra nga nagpapakamatadong naghuhukom ha iba, diri uyon ha mga suruklan ni Jehova, kondi uyon han iya suruklan, ngan posible nga diri hiya maloloy-on. Kon katapos mo usisahon an imo kalugaringon, nakita mo la gihapon nga kinahanglan mo  kaistoryahon an imo sangkay, isumat ha iya an problema ngan pagbangon hin mga pakiana nga mabulig ha iya nga masabtan an iya sayop. Siguroha nga an imo isisiring nakabase ha Kasuratan, nga ginhuhunahuna nga an imo sangkay may baratunon, diri ha imo, kondi kan Jehova. (Roma 14:10) Sarig ha kinaadman nga aada ha Pulong han Dios, ngan kon nagsasagdon, subara an pagin mapinairon ni Jesus. (Prob. 3:5; Mat. 12:20) Kay ano? Kay tatrataron kita ni Jehova pariho han aton pagtratar ha iba.​—San. 2:13.

14. Ano an igintatagana ha aton han organisasyon han Dios?

¹⁴ Gin-gigiyahan kita ni Jehova ha dalan ngadto ha kinabuhi pinaagi han tunan-on nga bahin han iya organisasyon, nga nagtatagana hin mga video, publikasyon, ngan mga katirok nga nabulig ha aton nga maiaplikar an sagdon ha Pulong han Dios. An mga impormasyon dida hito iginbasar gud ha Kasuratan. Kon nagdidesisyon an Nagmamando nga Lawas kon paonan-o mahihimo ha pinakamaopay nga paagi an pagsangyaw nga buruhaton, nasarig hira ha baraan nga espiritu. Pero regular nga ginrirepaso la gihapon nira an ira mga desisyon mahitungod hito nga buruhaton. Kay ano? “Kay nagbabag-o an mga panhitabo hini nga kalibotan,” salit an organisasyon han Dios kinahanglan magpahiuyon ha bag-o nga mga kahimtang.​—1 Cor. 7:31.

15. Ano nga ayat an gin-aatubang han pipira nga magwarali?

¹⁵ Sigurado nga ginsusunod dayon naton an aton nakakarawat nga mga giya nga iginbase ha Biblia may kalabotan ha aton mga katutdoan o mga suruklan ha moral. Pero ano an aton reaksyon kon an organisasyon han Dios naghihimo hin pagbag-o nga nakakaapekto ha iba nga bahin han aton pagkinabuhi? Pananglitan hinin bag-o la, nagtikadaku gud an gasto ha pagtukod ngan pagmintinar ha mga lugar han pagsingba. Salit, an Nagmamando nga Lawas naghatag hin instruksyon nga an usa nga Kingdom Hall gamiton hin damu nga kongregasyon. Tungod hito, may mga kongregasyon nga gintarampo ngan iginbaligya an iba nga Kingdom Hall. Gin-gagamit an kwarta ha pagtukod hin mga Kingdom Hall ha mga lugar nga nanginginahanglan gud hito. Kon iginbaligya an iyo Kingdom Hall ngan igintampo an iyo kongregasyon ha iba nga kongregasyon, bangin makurian ka ha pagpahiuyon hinin bag-o nga mga kahimtang. An pipira nga magwarali mas hirayo na an bibiyahion basi umatender ha mga katirok. An iba nga nagpinaniguro ha pagtukod o pagmintinar ha usa nga Kingdom Hall bangin maghunahuna  kon kay ano nga iginbaligya ito. Bangin abaton nira nga nakarag la an ira panahon ngan kusog. Bisan pa hito, nakooperar hira hinin bag-o nga kahikayan ngan angay hira kumendasyonan.

16. Paonan-o an pag-aplikar han sagdon ha Colosas 3:23, 24 makakabulig nga magpabilin kita nga malipayon?

¹⁶ Magpapabilin kita nga malipayon kon pirme naton huhunahunaon nga an aton ginbubuhat para ito kan Jehova, ngan gin-gigiyahan niya an iya organisasyon. (Basaha an Colosas 3:23, 24.) Hi Hadi David nagpakita hin maopay nga susbaranan han nagdonar hiya hin kwarta ha pagtukod han templo. Hiya nagsiring: “Hin-o ako ngan hin-o an akon katawohan nga kami makakahatag hin boluntaryo nga mga halad pariho hini? Kay an ngatanan nga butang tikang ha imo, ngan iginhahatag namon ha imo an tikang ha imo mismo kamot.” (1 Cron. 29:14) Kon nagdudonar kita, iginhahatag liwat naton kan Jehova an iya mismo iginhatag ha aton. Bisan pa hito, gin-aapresyar ni Jehova an panahon, kusog, ngan materyal nga mga butang nga aton iginhahatag basi masuportaran an buruhaton nga iya iginpapabuhat.​—2 Cor. 9:7.

17. Kay ano nga diri ka angay masubo kon kinahanglan mo maghimo hin mga pagbag-o?

¹⁷ Basi makapabilin ha gutiay nga dalan ngadto ha kinabuhi, kinahanglan naton sundon hin maopay an mga pitad ni Jesus. (1 Ped. 2:21) Kon nakita mo nga kinahanglan mo maghimo hin mga pagbag-o, ayaw kasubo. Maopay ito nga sinyales, kay nagpapakita ito nga karuyag mo magpagiya kan Jehova. Hinumdumi nga hi Jehova diri naglalaom ha aton​—sugad nga diri pa mga perpekto—​nga perpekto nga subaron an ehemplo ni Jesus.

18. Ano an kinahanglan naton buhaton basi makab-ot an aton tumong?

¹⁸ Hinaot kita ngatanan magpokus ha tiarabot ngan magin andam ha paghimo hin mga pagbag-o ha aton panhunahuna, disposisyon, ngan buhat. (Prob. 4:25; Luc. 9:62) Magpabilin kita nga mapainubsanon, “padayon nga magrayhak . . . , magpatadong utro.” (2 Cor. 13:11) Kon bubuhaton naton ito, “an Dios han gugma ngan han kamurayawan maupod ha [aton].” Ngan diri la kay basta makakaabot kita ha aton destinasyon kondi magigin malipayon liwat kita ha aton pagbiyahe.