1. მუჭოთ მათეშ 7:13, 14-ის ჭარჷ, მუ გაგებათ გივორეთ შარას?

ჩქი, არძა, გეპჸუნთ შარას. ჩქინ დანიშნულებაშ ადგილ, შხვა სიტყვეფით ქოფთქუათინ მიზან, თინა რე, ნამდა იფცხოვრათ ახალ ქვეყნიერებას ჩქინ მოჸოროფე ღორონთ იეჰოვაშ მართველობაშ თუდო. ჩქი ირდღას ვოცადუთ, მივაჸუნათ სიცოცხლეშ შარას. მარა მუჭოთ იესოქ თქუ, თე შარა ჭიფე რე დო მინშა რთულ რე თიშ გეჸუნა (წეკითხით მათეშ 7:13, 14). ათეშენ არასრულყოფილებაქ შილებე ადვილო გემკმოჩილითუან თე შარას (გალ. 6:1).

2. მუს გუვარჩიენთ თე სტატიას? (ქოძირით ჩარჩო  „თანდაბლობა მოხვარნა ჩქინ ნაბიჯეფიშ გიშასწორებას“.)

² სიცოცხლეშ ჭიფე შარაშ გეჸუნა ქუმოკონან-და, მზათ ოკო ვორდათ, დიფთირუათ აზროვნება, დამოკიდებულება დო საქციელ. მოციქულ პავლექ კორინთის მახორუ ქრისტიანეფს ელუჩ, ნამდა გაგრძელესკო მუნეფიშ დუდიშ გიშასწორება (2 კორ. 13:11). თე რჩევა ჩქი ხოლო მოხუნა. თე სტატიას გუვარჩიენთ, მუჭო მოხვარნა ბიბლია ჩქინ ნაბიჯეფიშ გიშასწორებას დო მუჭო მოხვარნა მოწიფულ მეგობრეფ, ქუდოფსქიდათ სიცოცხლეშ შარას. თეს გეძინელ, გუვარჩიენთ, მუჟამ შილებე რთულ რდას იეჰოვაშ ორგანიზაციაშე მეღებულ ხემძღვანელობაშ მეჸუნა. თის ხოლო ქობძირუნთ, მუჭო მოხვარნა თანდაბლობა, თეშ დიფთირათ, ნამდა იეჰოვაშ მსახურებას ხიოლ ვა ვოდინუათ.

3. მუ შეულებ ღორონთიშ სიტყვას?

³ მუჟამსით ვოცადუთ ჩქინ ფიქრეფიშ დო გრძნობეფიშ გიმორკვიებას, სირთულეს შეფხვადუთ. ჩქინ გურ უდუნდებელ რე დო შილებე თექ მეცილან, ქიგებგათ, სოიშახ მემჸონანა თიშ მორჩქილაფა (იერ. 17:9). თე დროს ადვილო შილებე დუდ დებღორათ „არასწორ აზროვნებათ“ (იაკ. 1:22). ათეშენ ღორონთიშ სიტყვა ოკო გეგმიბრინუათ, ნამდა გეგმიბრკუათ ჩქინ  დუდ. ღორონთიშ სიტყვა აარგამენს ჩქინ შინაგან პიროვნებას — არძაშ უმოს ტომბა „აზრეფს დო ზრახვეფს“ (ებრ. 4:12, 13). თინა რენტგენიშ აპარატის მოგენს, მუშენდა მოძირანა, მუ მიღნა დინახლე. მარა თანდაბლობა მოსაჭირნა, ნამდა ღორონთიშ სიტყვაშე დო ღორონთიშ წარმომადგენელეფშე მეღებულ რჩევაქ ჯგირობუა მომღან.

4. სოვრეშე იძირედ, ნამდა მეფე საულქ გეამაყ?

⁴ მეფე საულიშ მაგალით მოძირანა, მუქ შილებე მოხვადას თანდაბლობა ქუმორკუნან-და. საულქ თეშ გეამაყ, ნამდა მუშ დუდის ხოლო ვა უტირხუდ, აზროვნებაშ დო საქციელიშ გიშასწორება ოსაჭირუდუნ (ფსალმ. 36:1, 2; აბაკ. 2:4). თექ გეგმიარგამ, მუჟამსით იეჰოვაქ საულს კონკრეტულ მითითება მეჩჷ, მუ ოკო უკეთებუდკო, ამალეკელეფს დამარცხენდუნ თიშ უკულ. მარა საულქ ვედემორჩილ იეჰოვას. ხვალე თენა ვარინ, მუჟამსით წინასწარმეტყველ სამუელქ პირდაპირ ეჩუ თე საკითხშე, საულქ ვაღიარ მუშ შეცდომა, თეშ მანგიორო თინა მუშ დანაშაულიშ შედეგეფს აუბრალოენდჷ თით, ნამდა დუდიშ გამართლებას ოცადუდ დო ირფელს შხვეფს ეკაბრალენდჷ (1 სამ. 15:13—24). საულქ თეიშახ ხოლო გიმირჩქინ დაუმორჩილებლობა (1 სამ. 13:10—14). სანარღოთ, თიქ მუშ გურს ქიმეჩ საშვალება, გეამაყკო. აზროვნება ვეგშასწორ დო ათეშენ იეჰოვაქ ვემიწონუ თინა დო ვარია თქუ თიშე.

5. მუშ გურაფა შემლებნა საულიშ მაგალითშე?

⁵ საულიშ მაგალითშე ქიდიბგურუათინ, ჯგირ იჸუაფ ჩქინ დუდის ქობკითხათ: „მუჟამსით ღორონთიშ სიტყვაშე რჩევას ბკითხულენქ, ჩქიმ აზროვნებაშ გამართლებას ხომ ვა ვოცადუქ? დაუმორჩილებლობაშ შედეგეფს ხომ ვა ვაუბრალოენქ? შხვას ხომ ვა ვაბრალუაფუქ დუვაშენ თის?“ თე კითხვეფშე ნამდგაინიშ პასუხ დადებით ქორენ-და, აზროვნებაშ თირუა მოსაჭირნა. თაშ ვემიფქციებუთ-და, ჩქინ გურ თიცალ ამაყო გინირთუ, ნამდა იეჰოვაშ მეგობრეფ მეტო ვეპჸით (იაკ. 4:6).

6. გენწყით, მუთ გენესხვავებდეს ართიანშე მეფე საულ დო მეფე დავით.

⁶ ქიდეკვირით, მუთ გენესხვავებუდ მეფე საულ მეფე დავითშე, ნამდგას უჸორდჷ „იეჰოვაშ კანონ“ (ფსალმ. 1:1—3). დავითის უჩქუდ, ნამდა იეჰოვა თინეფს ირსხენს, მით თანდაბალ რე, მარა ამაყეფს ოწინააღმდეგ (2 სამ. 22:28). ათეშენ დავით ღორონთიშ კანონს არზენდჷ მუშ გიშასწორებაშ საშვალებას. თიქ ჭარჷ: „განვადიდენქ იეჰოვას, ნამუთ რჩევას მარზენს, სერით ხოლო ჩქიმ გიშასწორებას ომსახურ ჩქიმ ტომბა ფიქრეფ“ (ფსალმ. 16:7).

7. მუს გუვაკეთენთ, თანდაბლეფ ქუვორეთ-და?

⁷ თანდაბლეფ ქუვორეთ-და, ღორონთიშ სიტყვას ქიმეფჩანთ საშვალებას, გეგშასწორას ჩქინ არასწორ ფიქრეფ, სოიშახ თინა გლახას მოკეთებაფუანა. ღორონთიშ სიტყვა ჩქინო ხონარცალ იჸუაფ, ნამუთ მიწინა: „თენა რე შარა, გილართით თით“. თინა გუმაფრთხილენა, მუჟამსით სიცოცხლეშ შარას მარძგვანშე ვარდა კვარჩხანშე ეურთანთ (ეს. 30:21). იეჰოვას ქუმურჩქილუანთ-და, თენა ბრელ ჯგირობუას მომღანა (ეს. 48:17). მაგალთო, ვა მეწყინებნა, მუჟამსით მიდგარენ ჩქინ გიშასწორებას ეცადებ. თეს გეძინელ, უმოსო დევეახლოვებუთ იეჰოვას, მუშენდა გეგმოფცადუნთ, ნამდა თინა მუჭოთ საჸოროფო სქუასინ თეშ მოქცუნა (ებრ. 12:7).

8. მუჭოთ იაკობიშ 1:22—25-ის ჭარჷ, მუჭო შემლებნა ღორონთიშ სიტყვაშ სარკეცალო გიმორნაფა?

⁸ ღორონთიშ სიტყვა ჩქინო სარკეცალ რე (წეკითხით იაკობიშ 1:22—25). მუჭოთ წესინ, ირ ოჭმარეს, ჸუდეშე გინულაშახ, სარკეს გივოჯინეთ. შედეგო, შემლებნა სოიშახ შხვეფ ბძირუნდანინ, ჩქი ქობძირათ, მუ მაფნა გიშასწორებელ. თეშნერო, მუჟამსით ირდღას ბიბლიას ბკითხულენთ, ვორწყეთ, მუჭო შემლებნა ჩქინ აზროვნებაშ თირუა. ბრელშო დამხმარე რე, ირ ოჭმარეს, ჸუდეშე გინულაშახ, ირდღაშიან მუხლიშ კითხირ. თინეფ ნაკითხირს საშვალებას არზენა, იმოქმედას მუნეფიშ აზროვნებაშა. უკულ,  მთელ დღაშ დინახლე, ოცადნა, გეგმირინუან ღორონთიშ სიტყვაშე მეღებულ რჩევა. თეს გეძინელ, ბიბლიაშ გურაფაშ ჯგირ ჩვევა ოკო მიღდან, მუდგაშათ ღორონთიშ სიტყვაშ ირდღაშიან კითხირ დო ნაკითხირშე ფიქრ მიშურს. შილებე თენა ადვილ ოკეთებელო იძირედას, მარა თენა ართ-ართ არძაშ უმოს მნიშვნელოვან მუდგარენ რე, მუთ მიმეხვარებნა, ქუდოფსქიდათ სიცოცხლეშ ჭიფე შარას.

9. მუჟამ შილებე მეგობარს თქვანდა რჩევაქ აჸუას მიოჩამალქ?

⁹ დღას ქიგეჸუნაფუთო თიცალ შარას, ნამუთ იეჰოვაწკუმა დუგაშორენდეს? (ფსალმ. 73:2, 3). თე დროს თქვან მეგობარქ გაბედულება გეგმირჩქინ დო რჩევა ქიმერჩეს-და, ქუმურჩქილეთო თის დო გეგმირინეთო რჩევა? თაშ ქორენ-და, სწორაშე მოიქციებინნა დო მუშო ოკო რაგად, თქვან მეგობარიშ მარდულ იჸუაფუთ, მუშენდა თიქ სწორ შარა ქუგოძირეს (იგავ. 1:5).

10. მუჭო ოკო მიქცუათ, მუჟამსით მეგობარ რჩევას გარზენა?

¹⁰ ღორონთიშ სიტყვა გუმოშინანა: „მეგობარშე ჭრილობა ართგურობაშ ნიშან რე“ (იგავ. 27:6). მუს შილებე თენა ნიშნენდას? დეფიქრით თეცალ მაგალითშე: წერმიდგინით, ნამდა შარაშ გინოჭკირუა გოკონა, სოდეთ გადატვირთულ მოძრაობა რე დო იჯინეთ, სოიშახ მანქანეფ ვემკულა. თე დროს ტელეფონშა გეგნიღით ყურადღება დო შარაშა თეშ გინილით, ნამდა იშო-აშო შურო ვემკოიჯინუნა. უცბას მეგობარქ კილეს ხე მანგარო გეირაჸუეს დო ტროტუარშა დუგორთინუეს. თიქ კილეს თიცალ მანგარო მერკიდეს ხე, ნამდა დეგეუჩარეს, მარა მეგობარიშ თეცალ მოქციებაქ მანქანაშ რაგვინს გინგოტუეს. შილებე ხეს მუსხირენ დღას გაჭუდან, მარა გურ მუგალედესო, მეგობარქ თაშ მიგექცუესინ? მუშო ოკო რაგად, ვარ! მანგარ მარდულ იჸუაფუდით, ნამდა თიქ მიგეხვარეს. თეშნერო, მეგობარ ქუგაფრთხილენა, ნამდა თქვან რაგად ვარდა საქციელ ღორონთიშ სამართლიან ნორმეფიშ შესაბამის ვა რენ-და, დუდშე შილებე თექ გურ გიწყუნუან. მარა თე რჩევაშ გურშენ გურქ ვამოირთან. თენა ვეჸუაფუდ ჭკვერულ (ეკლ. 7:9). თეშ მანგიორო, გონივრულ იჸუაფ, მარდულეფ რდათ თიშო, ნამდა თქვან მეგობარქ გაბედულება გიმირჩქინ დო რჩევა მერჩეს.

11. მუქ შილებე პიროვნებას ეცილას, მოჸოროფე მეგობარშე რჩევაშ მეღებას?

¹¹ მუქ შილებე პიროვნებას ეცილას, მოჸოროფე მეგობარშე რჩევაშ მეღებას? სიამაყექ. ამაყ კათას უჸორა თიშ მორჩქილაფა, „მუთ მუნეფიშ ჸუჯის ოჰამ“ დო ვა ურჩქილენა ჭეშმარიტებას (2 ტიმ. 4:3, 4). თინეფს ზედმეტ წარმოდგენა უღნა მუნეფიშ დუდშა დო ფიქრენა, ნამდა რჩევა ვასაჭირნა. მარა მოციქულ პავლექ ჭარჷ: „კოჩის მუშ დუდ მუთუნო ქიმიორჩქ დო სინამდვილეს მუთუნს ვა წარმოადგინენს-და, დუდის იღორენს“ (გალ. 6:3). მეფე სოლომონქ თენა მანგარ ჯგირო ენწყჷ. თიქ ჭარჷ: „ღარიბ, მარა ბრძენ ახალგაზრდა უჯგჷ, მოხუცებულ, მარა უგუნურ მეფეს, ნამდგას გაფრთხილება მუთუნო ვემიორჩქ“ (ეკლ. 4:13).

12. მუჭოთ გალატელეფიშ 2:11—14-ის ჭარჷ, მუს ბგურაფლენთ პეტრე მოციქულიშ მაგალითშე?

¹² დეკვირით, მუ მაგალით დომტუეს მოციქულ პეტრექ, მუჟამსით პავლექ თის სახალხოთ მეჩ რჩევა (წეკითხით გალატელეფიშ 2:11—14). პეტრეს შეულებუდ გურ მორთუმუდკო პავლეშ სიტყვეფშე დო ყურადღება თიშა გეგნიღკო, მუჭო დო სო მეჩჷ პავლექ რჩევა. მარა პეტრე ბრძენ კოჩ რდუ. ათეშენ მიღჷ რჩევა დო პავლეშ წინააღმდეგ გლახაშ რაგად ვა დუჭყაფ. თეშ გინაწონს, უმოს გვიანო თიქ პავლე მიშინუ, მუჭოთ „საჸოროფო ჯიმა“ (2 პეტ. 3:15).

13. მუ ოკო ფშუდან, მუჟამსით შხვაშა რჩევაშ მეჩამა მილამნა?

¹³ მეგობარშა რჩევაშ მეჩამა ქოილამნან-და, მუ ოკო რშუდან თე დროს? რჩევაშ მეჩამაშახ ქოკითხით თქვან დუდის: „ნაბეტან მართალ“ ხომ ვა ვორექ? (ეკლ. 7:16). ნაბეტანო მართალ კოჩ შხვეფს იეჰოვაშ მოთხოვნეფით ვარინ, მუშ მოთხოვნეფით განსაჯენს  დო ხშირ შემთხვევას თეცალ პიროვნება ვა რე მოჭყოლოფე. თქვან დუდიშ გიმორკვიებაშ უკულ ხოლო ქოფიქრენთ, ნამდა თქვან მეგობარს რჩევა ოსაჭირუნ-და, დიო ქიგეგით, მუ რე პრობლემა დო უკულ გეგმირინეთ თიცალ კითხვეფ, ნამუთ მეხვარებ თის, ქოძირას, მუ შეცდომა აფჷ დაშვებულ. დერწმუნით, ნამდა მუდგას იჩიებუთ, წმინდა წერილეფშა რე გერსხილ. რშუდან, თქვან მეგობარ თქვან წოხოლე ვარინ, იეჰოვაშ წოხოლე რე ანგარიშვალდებულ (რომ. 14:10). ორაგადე ღორონთიშ სიტყვაშ სიბრძნეშა გაფდან გერსხილ დო რჩევაშ მეჩამაშ დროს, მიაჸუნით იესოშ მაგალითის დო მიშელით პიროვნებაშ მდგომარეობაშა (იგავ. 3:5; მათ. 12:20). მუშენ რე თენა მნიშვნელოვან? მუშენდა იეჰოვა თეშ მიმექციებნა, მუჭოთ ჩქი ვოქცუთ შხვეფს (იაკ. 2:13).

14. მუ საშვალებეფით ფხემძღვანელენა ღორონთიშ ორგანიზაცია?

¹⁴ იეჰოვა სიცოცხლეშ შარას გიმოწურუანა მუშ ორგანიზაციაშ მიწიერ ნაწილიშ საშვალებათ, ნამუთ ფხემძღვანელენა ვიდეოეფიშ, პუბლიკაციეფიშ დო შეხვალამეფიშ საშვალებათ. თე საშვალებეფ, ნამუთ წმინდა წერილეფშა რე გერსხილ, მოხვარნა, გეგმიბრინუათ ღორონთიშ სიტყვას მოჩამილ რჩევეფ. ხემძღვანელ საბჭო ღორონთიშ წმინდა შურშა რე მენდებულ, მუჟამსით გინოჭყვიდუნს, მუჭო შილებე ხოლო უმოს უჯგუშო შისრულას ქადაგებაშ საქმექ. თეწკუმა ართო, თინა რეგურალურო გინაჯინე მუშ მეღებულ გადაწყვეტილებეფს, ნამდა ქოძირას, მუთუნ ხომ ვა რე ოთირალ. მუშენ რე თენა საჭირო? მუშენდა „თე ქვეყნიერება ირიათო ითირუ“ დო ღორონთიშ ორგანიზაციაქ ხოლო ცვლილებეფს ოკო დუხუჯუას (1 კორ. 7:31).

15. მუ სირთულეს შეხვად ნამთინე მაუწყებელქ?

¹⁵ მუშო ოკო რაგად, ჩქი ხიოლით მეპჸუნთ ბიბლიაშა გერსხილ ხემძღვანელობას, ნამუთ ბიბლიურ გურაფეფს დო ზნეობრივ საკითხეფს ოხუ. მარა მუჭო იფქციებუთ, მუჟამსით ღორონთიშ ორგანიზაციას თიცალ ცვლილება ხვადუ, ნამუთ ჩქინ ცხოვრებაშ შხვა მხარეეფშა მოქმედენს? მაგალთო, ბოლო წანეფს თაყვანიშცემაშ ადგილეფიშ შენებაშ დო მიკოლუაფაშ ხარჯეფქ მანგარო მიძინ. ათეშენ ხემძღვანელ საბჭოქ გეგნოჭყვიდ, ნამდა იეჰოვაშ მოწმეეფიშ დარბაზეფქ უმოს გონივრულო იჸუკო გიმორნაფილქ. თეშ გურშენ, კრებეფქ გეერთიან დო ნამთინე დარბაზიქ გიმოჩამილქ იჸუ. თე ფარა გეგმირინუეს დარბაზეფიშ ოშენებელო თიცალ ადგილეფს, სოდეთ თეშ საჭიროება რდუ.  თიცალ ტერიტორიას ქოცხოვრენთ, სოდეთ დარბაზეფ გიმოჩეს დო კრებეფქ გეერთიან-და, შილებე თქვანო რთულ რდას თე ცვლილებეფშა მერჩქვანა. ნამთინე მაუწყებელს ასე უმოს შორშა აფჷ ოულარ, ნამდა კრებაშ შეხვალამეფს ქიდესწრას. თინეფ, მით დარბაზიშ მშენებლობას ვარდა მიკოლუაფას ღებულენდეს მონაწილებას, შილებე უკვენდან, მუშენ იჸუ თე დარბაზიქ გიმოჩამილქ. თინეფ შილებე ფიქრენდან, ნამდა თე ირფელს ტყურათ მიკახარჯეს მუნეფიშ დრო დო ენერგია. თეშ უმკუჯინუო, თე და დო ჯიმალეფ ახალ დანიშნულებას მზადყოფნათ ასრულენა, მუდგაშეთ ცქვაფას იმსახურენა.

16. მუჭო მიმეხვარებნა კოლოსელეფიშ 3:23, 24-ის მოჩამილ რჩევაშ გიმორნაფა, ვა ვოდინუათ ხიოლ?

¹⁶ ჩქი იეჰოვაშო ფხანდენთ დო თინა ხემძღვანელენს მუშ ორგანიზაციას. თენა ირიათო ქოფშუნან-და, ხიოლს ვა ვოდინუანთ (წეკითხით კოლოსელეფიშ 3:23, 24). მეფე დავითიქ ჯგირ მაგალით მუჩეს, მუჟამსით ტაძარიშ ოშენებელო შესაწირავ აკეთ. თიქ თქუ: „მი ვორექ მა დო მი რე ჩქიმ ხალხ, ნამდა თეცალ ნებაყოფლობით შესაწირავეფიშ კეთებაქ ქეშმალებესკონ?! ირფელ სქანდე რე დო სქან ხეშე მოჩამილ დოირთინეთ“ (1 მატ. 29:14). ჩქი ხოლო, მუჟამსით შესაწირავს ვორთუთ, იეჰოვას ვურთინუანთ თის, მუთ თიქ მუჩეს. მარა იეჰოვა იშენით აფასენს თი დროს, ენერგიას დო სახსრეფს, ნამდგას თიშ საქმეშ ოკეთებელო ვახარჯენთ (2 კორ. 9:7).

17. მუშენ ოკო ვა გოიტირხან გურქ, ნაბიჯეფიშ გიშასწორება ქუგოსაჭირნან-და?

¹⁷ სიცოცხლეშ ჭიფე შარას ქუდოფსქიდათინ, იესოშ ნაკვალუს ოკო გივაჸუნათ (1 პეტ. 2:21). ქარწყეთ, ნამდა ნაბიჯეფიშ გიშასწორება ქუგოსაჭირნან-და, გურქ ვა გოიტირხან. სინამდვილეს, შილებე თენა ჯგირ ხოლო რდას, მუშენდა თენა ოძირანს, ნამდა გოკონა, მიაჸუნათ იეჰოვაშ ხემძღვანელობას. რშუდან, იეჰოვა ჩქინდე, არასრულყოფილ ადამიანეფშე, ველჷ, ნამდა იესოშ მაგალითის სრულყოფილო მივაჸუნუთ.

18. მუ ოკო ვაკეთათ მიზანიშ მიოჭირნაფალო?

¹⁸ მორთ არძაქ მომავალშა გეგნიბღათ ყურადღება დო მზათ ვორდათ, ნამდა გეგშვასწორათ ჩქინ აზროვნება დო საქციელ (იგავ. 4:25; ლუკ. 9:62). ვორდათ თანდაბალეფ, ვა ვოდინუათ ხიოლ დო გეგშებსწორათ (2 კორ. 13:11). თაშ ქიმიფქციებუთ-და, „ჸოროფაშ დო მშვიდობაშ ღორონთ [ჩქინწკუმა] იჸუაფ“. შედეგო, უბრალოთ ჩქინ დანიშნულებაშ ადგილშა ვემურთინ, ხიოლს ხოლო ვა ვოდინუანთ.