DILONGI 47
Ngie Widi Wukubama mu Kubalula Phil’aku yi Kuyindudila?
‘Buabu zikhomba ziama, lutatamana kuyangalala ayi kuba bakubama mu kubaluka mayindu.’—2 KOLI. 13:11.
NKUNGA 54 “Ya yiyi Nzila”
MAMBU TUANLONGUKA *
1. Mu Matai 7:13, 14, buidi bandedikisila bisadi bioso bi Yave?
BISADI bioso bi Yave badi buka mu viage. Tuidi mu kukuenda mu nza yimona yo naveka Yave Tat’itu yi luzolo kala tuadisa. Diawu kadika kilumbu tumvangilanga mangolo muingi tutatamana mu nzila beni. Vayi dedi bo Yesu katubila, nzila beni yidi yifietama ayi tulenda mona phasi kudiatila mu yawu. (Tanga Matai 7:13, 14.) Ayi mu kuba bankua masumu, tulenda vekuka.—Ngala. 6:1.
2. Mbi tunkuiza tubila mu dilongi adidi? (tala mvandi quadro “ Kukikulula Kutu Sadisanga Kubalula Phil’itu yi Kuyindudila.”)
2 Mo tutamana mu nzila yi luzingu, tufueti ba bakubama muingi kubalula phil’itu yi kuyindudila ayi mavanga mitu. Diawu mvuala Polo kakindisila baklisto ku Kolinto muingi batatamana ‘kuba bakubama mu kubalula mayindu mawu.’ (2 Koli. 13:11) Dilongi beni, mvandi didi ndandu mu befu. Diawu tuentubila mambu malenda kutu sadisa tutatamana mu nzila yi luzingu. Theti tuentubila Kibibila, bosi bakundi bayonzuka mu kiphevi. Mvandi tunkuiza tubila mbi bilenda ku tuvanga kumona phasi mu kulandakana zithuadusulu tuntambulanga mu kimvuka. Ayi kutsuka tunkuiza tubila, buidi kukikulula kulenda kutu sadisila kubalula phil’itu yi kuyindudila ayi kutatamana kuba mayangi.
BIKA DIAMBU DI NZAMBI DI KUSEMBA
3. Buidi Diambu di Nzambi dilenda ku kusadisila?
3 Ntim’itu widi kikaka kineni mu thangu tuntomba kufiongunina mayindu ayi mabanza mitu. Bo wawu widi bukhita, diawu tummuenanga phasi kubakula khonzo wawu wu tunata. (Yele. 17:9) Ayi khumbu ziwombo mayindu mitu malenda vekuka mu ‘mambu makhambulu tsundu.’ (Yako. 1:22) Diawu tufueti sadila Diambu di Nzambi muingi “kukifiongunina befu veka”ayi kubakula ‘mayindu’ madi ku khati ntim’itu. (Ebe. 4:12, 13) Diambu di Nzambi didi buka chapa bambotulanga muingi kumona binama bidi mu khati nyitu. Vayi tufueti kukikulula muingi tubaka ndandu mu malongi mamfumina mu Kibibila voti kuidi batu Yave kalenda sadila.
4. Mbi bimmonisa ti ntinu Sauli wuyiza ba lungundayi?
4 Kifuani ki ntinu Sauli ki tumonisa mambu malenda monika befu manga kukikulula. Nandi wuyiza ba lungudayi ayi naveka kasa bue zaba ko ti waba tombila kubalula phil’andi yi kuyindudila. (Minku. 36:1, 2; Haba. 2:4) Lungundayi luandi luluta monikina mu thangu Yave kamvana kiyeku ayi kansudikisa buboti mambu kafueti vanga ku tsuka mvita banuana na basi Amaleki. Vayi Sauli kasa sadila ko mambu Yave kakamba. Ayi mu thangu mbikudi Samueli kanzabikisa mawu, nandi kasa kikinina ko nzimbala kavanga, vayi wutona kufonda bibila ayi kuvana foto kuidi bankaka. (1 Samu. 15:13-24) Bakana ko yawu khumbu yitheti kamonisina lungundayi. (1 Samu. 13:10-14) Kiadi ayi kuinda kuzaba ti nandi wubika ntim’andi kuba lungundayi. Ayi bo kakhambu balula phil’andi yi kuyindudila, diawu Yave kavingisila mutu wunkaka buka ntinu.
5. Mbi tulenda longuka mu kifuani ki ntinu Sauli?
5 Mo tubika ba buka ntinu Sauli, buboti kuyikuvusa: ‘Bo yintanga Kibibila, yintombanga bibila muingi yibika tumamana mambu kiawu kintuba? Yinyindulanga ti mambu yimvanga masi kuandi ko beni mambi? Yintombanga kuvana bankaka foto mu zinzimbala ziama?’ Boti betuba ngete mu kiuvu kimueka, buna fueti balula phil’aku yi kuyindudila, khanu ngie wala vukumuka mu kuba lungundayi. Ayi Yave wala zenga kikundi muidi.—Yako. 4:6.
6. Sudikisa disuanasa mbi ntinu Sauli kaba na ntinu Davidi.
6 Tala disuasana ntinu Sauli kaba na ntinu wumona Yave kasola. Kibibila kintuba ti ntinu Davidi waba zolanga beni ‘minsiku mi Yave.’ (Minku. 1:1-3) Nandi wuzaba ti Yave wumvukisanga bo bakikululanga vayi wunlendanga bo badi lungundayi. (2 Samu. 22:28) Nandi wubika minsiku mi Yave mibalula phil’andi yi kuyindudila. Nandi wusonika: ‘Yala zitisa Yave wu kuphananga malongi. Kheti va khati builu mayindu mami ma khati ntima, ma kutsembanga.’—Minku. 16:7.
DIAMBU DI NZAMBI
Diambu di Nzambu di tuluengisanga mu thangu tuntomba kutatuka mu nzila yi kiedika. Boti tukikululanga, tuala bikila diawu dibalula mayindu mitu mambi. (Tala lutangu 7)
7. Befu kuba batu ba kikululanga mbi tuala vanga?
7 Befu kukikulula, tuala bikila Diambu di Nzambi dibalula mayindu mambi befu tuidi ava kuvanga diambu dimbi tube yindula. Ayi diawu diala ba buka mbembo yi mutu widi va khonzu’itu wu tukamba: ‘Ayiyi yawu nzila, fueti diatila.’ Mvandi diala tulubula mu thangu tuntona ku vekuka mu nzila kuba kuandi ku khonzu lukieto—voti ku lubakala. (Yesa. 30:21) Ndandu yiwombo tumbakanga mu kutumamana mambu Yave ka tulonga mu nzila Kibibila. (Yesa. 48:17) Ayi bo tumvanga mawu, diala ba diambu diphasi mutu wunkaka kutu vana tsembolo. Mvandi tuala luta fikama Yave, kibila tuidi lunungu va meso mandi banga muan’andi wu luzolo.— Ebe. 12:7.
8. Buidi buku Yakobi 1:22-25, yindedikisila Diambu di Nzambi?
8 Diambu di Nzambi mvandi didi buka lumuenu. (Tanga Yako. 1:22-25) Befu bawombo va meni ava kubasika, tukitalanga va lumuenu muingi kumona boti vadi vama tufueti kukiludika ava batu bankaka ba tutala. Bobuawu mvandi, kutanganga Kibibila kadika kilumbu, kutu sadisanga kumona vama tufueti baludila phil’itu yi kuyindudila ayi mavanga mitu. Diawu bawombo banzodilanga kufiongunina matangu ma Kibibila ma kilumbu va meni ava babasika. Ayi mu kilumbu kioso, bambikanga mambu babe tanga mabalula phil’awu yi kuyindudila, mu kutomba ziphila zi kusadisa mawu mu luzingu. Diawu buboti beni kadika kilumbu kubotulanga thangu muingi kutanga ayi kuyindula Diambu di Nzambi. Dilenda monikina buka diambu dikhambulu nkinza vayi boti tutidi tutatamana mu nzila yifietama yinnata luzingu lu mvu ka mvu, nkinza beni kuvanga mawu.
YUWA MALONGI MA ZIKHOMBA BAYONZUKA MU KIPHEVI
ZIKHOMBA ZIYONZUKA MU KIPHEVI
Mu thangu khomba wuyonzuka mu kiphevi katuvana dilongi dimboti, tukumvutudilanga matondo mu mangolo kabe vanga muingi kutu vutula mu nzila? (Tala lutangu 9)
9. Kibila mbi khumbu zinkaka nkundi voti khomba kafueti kutu lubudila?
9 Ngie wumana vanga diambu dibina kutatula mu mioko mi Yave? (Minku. 73:2, 3) Mu thangu beni, boti khomba wuyonzuka mu kiphevi wuku vana malongi ayi ngie wuyuwa mu kusadila mawu, buna diambu dimboti wuvanga. Kibila nandi wu kulubula muingi wubika tatuka mu nzila yi luzingu.—Zinga. 1:5.
10. Mbi tufueti vanga mu thangu nkundi ka tusemba?
10 Diambu di Nzambi di tutebula moyo ti: ‘Zimbezi ba tulueka kuidi mutu wu tuzolanga, zidi zisonga.’ (Zinga. 27:6) Mbi mansundula? Yindula boti widi mu kutaba nzila yimvioka makalu mawombo. Vayi ngie widi wuvuvuka mu kutala mu telefone. Bo wuntona kutaba nzila mu khambu tala zikhonzu ziwadi, nkundi wu kutitika mu ngolo zioso muingi babika kubunda. Vayi ngie kubua ayi kukonyuka mua nkadu, bukiedika ti ngie wunkuiza vana foto nkundi’aku? Ndamba! Ḿba ngie wunkuiza ntonda mu phila kabe vukisila luzingu luaku. Bobuawu mvandi, boti khomba be kusemba mu diambu ngieveka bemona ti khanu madoduka diela mu kulevula minsiku mi Nzambi, bika kukangila khomba beni nganzi, khei va thonono mawu ma kubika mu kiunda. kibila kuvanga mawu, yidi mbonosono yi buvungisi. (Mpovi 7:9) Vayi tonda khomba beni, mu kibakala kaba monisa muingi ka kusadisa wuvutula mu nzila yi luzingu.
11. Mbi bilenda vanga tubika kikinina dilongi dimfumina kuidi nkundi wu luzolo?
11 Mbi bilenda vanga tubika kikinina dilongi dimfumina kuidi nkundi wu luzolo? Kukinangika. Mutu wukinangikanga, “katianga ko kukuwa malongi” vayi wunzolanga bankamba ‘mambu mo nandi kantomba kukuwa.’ (2 Tim. 4:3, 4) Mvandi katianga ko kukuwa malongi ma bankaka, mu kutadila ti mayindu mandi mawu to malutidi. Vayi mvuala Polo wutuba: ‘Enati mutu wukitadilanga buka mutu wu luvalu vayi kasi ko, buna naveka kuandi wu kivuna.’ (Ngala. 6:3) Ntinu Salomo wutuba mu bukhufi kiedika kidi mu mambu amomo bo kasonika: ‘Bulutidi kuandi ditoko widi kiphumbulu vayi widi nduenga, kena ntinu weka nkulutu vayi widi buvungisi, wummanganga kukuwa malongi ma bankaka.’—Mpovi 4:13.
12. Mbi tulenda longuka mu kifuani mvuala Petelo ka tubikila mu Ngalatia 2:11-14?
12 Tala kifuani kimboti mvuala Petelo ka tubikila mu thangu mvuala Polo kansemba va meso ma batu bawombo. (Tanga Ngalatia 2:11-14.) Mu thangu beni boti nandi wutsikika mayindu mandi mu phila mvuala Polo kayolukila yandi ayi vama kankambila mambu beni, khanu kasa baka ko ndandu mu dilongi bamvana. Vayi nandi wumonisa nduenga, wukikinina dilongi bamvana ayi kasa kangila ko mvuala Polo nganzi. Nandi wutonda ayi wutedila mvuala Polo “khomba yi luzolo.”— 2 Pete. 3:15.
13. Mambu mbi fueti tebukilanga moyo ava kusemba nkundi?
13 Vayi ava kusemba nkundi, mvandi buboti kuyikuvusa: ‘Tsembolo beni yidi phila yintomba kumonisina ti minu “yilutidi busonga”?’ (Mpovi 7:16) Kibila tuisintomba ko kuba va kibuangu ki Yave, mu kufundisa bankaka mu zithuadusulu zitu vayi bo Yave kantombila. Ngie kuyifiongunina ayi kumona ti nkinza beni kusemba nkundi’aku, buna fueti vangila mawu mu lukinzu mu kunsudikisa diambu dimbi kabe vanga. Bosi mvana biuvu bilenda kunsadisa kukikinina nzimbala kabe vanga. Ayi sadila Kibibila, muingi kuntebula moyo ti ngie wisi ko kiyeku ki kumfundisa, vayi makani maku madi kummonisa ti mambu kadi mu kuvanga, masinkuangidika ko Yave. (Loma 14:10) Fiatila mu nduenga yidi mu Diambu di Nzambi. Ayi mu thangu nsemba mutu, landakana kifuani ki Yesu mu kumonisa kiadi. (Zinga. 3:5; Matai 12:20) Mu kibila mbi? Kibila mu phila befu tumfundisila bankaka, buawu Yave kala tufundisila.— Yako. 2:13.
LANDAKANA ZITHUADUSULU TUNTAMBULANGA MU NZILA KIMVUKA KI YAVE
KIMVUKA KI YAVE
Kimvuka ki Yave kitu vananga bilongulu, zivideo ayi zikhutukunu zitu sadisanga kusadila malongi madi mu Diambu di Nzambi. Zikhumbu zinkaka Dingumba Dintuadisi dimbalulanga zithuadusulu mu phila tufueti vangila kisalu kitu. (Tala lutangu 14)
14. Mbi kimvuka ki Yave ki tuvananga?
14 Yave wunsadilanga kimvuka kiandi muingi kututuadisa mu nzila yi luzingu. Mu kimvuka tuntambulanga zivideo, bilongulu ayi tunlandakananga zikhutukunu zi tusadisanga kusadila malongi madi mu Diambu di Nzambi. Bilongulu beni tuntambulanga bibongulu mu Kibibila. Ayi mu thangu Dingumba Dintuadisi dimbaka makani mu phila tufueti luta vangila buboti kisalu kitu ki kusamuna, bawu bamfiatilanga mu phevi yi Nzambi. Vayi kheti bobo, thangu ka thangu babue yindudilanga ziphila zinkaka balenda tuadisila kisalu ki kusamuna. Mu kibila mbi? Kibila ‘mambu ma nza ayiyi madi mu kubaluka,’ ayi kimvuka ki Yave kifueti kolama mu ziphila zimona zi kusamunina.—1 Koli. 7:31.
15. Diambu mbi dinkaka minsamuni badi mu kuviokila?
15 Dedi mu thangu tuntambulanga ziphisulu zimona mu mambu ma Kibibila ayi ma luzingu luitu, befu tunsadilanga mawu mu thinu. Vayi buidi tumbelanga bo kimvuka ki Yave, kimbalula mambu mantombulu befu kubue kolama? Dedi mu thangu ayiyi, thalu yi zimbongo muingi kutungila ayi kuludika Nzo Kintinu yima buelama beni. Diawu Nnanga Wukuikama kavanina thuadusulu muingi bimvuka bidi bi fikama, bakutakana mu Nzo yimueka to yi Kintinu muingi kusadila yawu buboti. Ayi bavana nsua muingi kusumbisa Zinzo zinkaka zi Kintinu bakhambu bue sadila. Zimbongo beni, ziawu bantungisila Zinzo zi Kintinu mu zitsi zidi beni tsatu. Boti mawu widi mu kuviokila, adiodio dilenda ba diambu diphasi, kibila mufueti bue kolama. Zikhomba basala muingi kutunga Zinzo beni zi Kintinu badi mu kusumbisa, khumbu zinkaka bambanga mu kiunda, buka ti mangolo maphamba bavanga. Vayi tuntonda beni zikhomba aziozio kibila kheti bobo, badi bakubama muingi kubuela mioko makani amomo ma Nnanga Wukuikama.
16. Dedi bummonisina Kolosai 3:23, 24 mbi bilenda kutu sadisa tutatamana kuba mayangi?
16 Muingi tutatamana kuba mayangi, tufueti tebukanga moyo ti kisalu tumvanga kidi ki Yave. Ayi nandi wunsadilanga kimvuka kiandi muingi kutuadisa kisalu beni. (Tanga Kolosai 3:23, 24.) Ntinu Davidi widi kifuani kimboti mu thangu kavanga khubukulu muingi kutunga tempelo. Nandi wutuba: ‘Nani minu yidi ayi banani dikabu diama muingi kuvana minkhayilu amimi mikhambu kuiku? Kibila biuma bioso kuidi ngie bimfuminanga ayi befu tu kuvutudila to bio ngie wutu vana.’ (1 Lusa. 29:14) Mu thangu tumvana minkhayilu mitu, befu mvitu tubue vutudilanga Yave buima nandi ka tuvana. Vayi Yave wunkuangalalanga beni, mu thangu tunsadila thangu, mangolo mitu ayi buima tuidi muingi kubuela mioko kisalu kiandi.— 2 Koli. 9:7.
TATAMANA KUDIATILA MU NZILA YIFIETAMA
17. Mbi fueti fika vanga boti bevekuka mu nzila yi kuzingu?
17 Muingi tutatamana kudiatila mu nzila yi fietama yinnata mu luzingu, tufueti landakana buboti zithambi zi Yesu. (1 Pete. 2:21) Vayi boti bevekuka mu nzila, fika vanga mangolo ma kuvutuka. Akiokio, kilenda ba kidimbu kimmonisa ti ngie widi wukubama muingi kulandakana thuadusulu yi Yave. Tebuka moyo ti Yave zebi ti befu tuisi ko batu balunga—diawu nandi kalendi vingila ko befu tuvangila mambu moso mu phila yisonga dedi bo Yesu kavangila.
18. Mbi tufueti tatamana kuvanga muingi tuvitila buboti mu nza yimona?
18 Baka makani ma kutatamana kutsikika thalu’aku kuntuala ayi ba wukubama muingi kubalula mayindu ayi mavanga maku. (Zinga. 4:25; Luka 9:62) Tatamana ku kikulula ayi ba wukubama muingi kukikinina ‘lusalusu lu kuvutula mu nzila yi luzingu.’ (2 Koli. 13:11) Ngie kuvanga mawu, ‘Nzambi yi luzolo ayi yi ndembama wala ba yaku.’ Ayi ngie wala vitila buboti mu nza yimona. Vayi mu thangu ayiyi, ngie mvaku wala baka ndandu mu viage befu boso tuidi mu kuvanga.
NKUNGA 34 Ndiatulu yi Busonga
^ Lut. 5 Befu bowombo tummonanga beni phasi kubalula mayindu mitu mu mambu tuntianga ove tukhambu tianga ayi mavanga mitu. Vayi dilongi adidi, dinkuinza tusudikisa kibila tufueti baludila phil’itu yi kuyindudila ayi buidi tulenda tatamana kuba mayangi mu thangu tumvanga mawu.
^ Lut. 76 MAMBU MADI MU ZIFIKULA: Khomba wunzibula ntim’andi kuidi khomba wunkaka wuyonzuka mu kiphevi, muingi kunzabikisa mambu kamonikina mu makani mambi kabaka. Ayi khomba beni wukunkuwa mu mvibudulu ayi widi mu kufiongunina boti kafueti kumvana malongi.
