1. Casi ná Mateo 7:13, 14, ¿xiñee zanda guchaaganu xquendanabani ca xpinni Cristu casi ora zeʼ tuuxa de viaje?

ZANDA guchaaganu xquendanabani ca xpinni Cristu casi ora zeʼ tuuxa de viaje, ra racaláʼdxinu chindanu nga lu Guidxilayú cubi ra zuni mandar Jehová, Dios ni nadxii laanu. Guiráʼ dxi rúninu stipa sanu lu neza ni riné laanu lu guendanabani. Peru casi guníʼ Jesús nabéʼ neza riʼ ne nuu tiru nagana para sáʼ tobi luni (biindaʼ Mateo 7:13, 14). Cumu binni ruchee laanu la? nuu biaje rireechunu de lu neza riʼ (Gál. 6:1).

2. ¿Xi zazíʼdinu lu artículo riʼ? (Laaca zanda gúʼyaluʼ recuadru ni láʼ « Pa humilde laanu zacaneni laanu guchaʼnu»).

² Para cadi guireechunu de lu neza ni ziné laanu lu guendanabani, caquiiñeʼ guchaʼnu modo riníʼ íquenu, ni rúninu ne modo laanu. Nga nga ni racalaʼdxiʼ apóstol Pablo guni ca xpinni Cristu de Corinto ora gúdxibe laacaʼ guchaacaʼ modo riníʼ íquecaʼ (2 Cor. 13:11). Tiempu riʼ laaca risaca conseju bidii Pablo. Lu artículo riʼ zazíʼdinu ximodo zanda gacané Biblia laanu guchaʼnu modo laanu ne ximodo zanda gacané ca xhamígunu laanu, ca ni naca ti ejemplu galán, ti cadi guireechunu de lu neza ni rudii guendanabani. Laaca zadúʼyanu pora nga zanda gaca nagana para laanu chinándanu ni gabi xquidxi Jehová laanu. Laaca zazíʼdinu xiñee nabé risaca gácanu humilde pa racaláʼdxinu guchaʼnu ne gúninu ni ná Jehová né guendanayecheʼ.

3. ¿Ximodo racané Stiidxaʼ Dios laanu?

³ Nagana nga gudii tobi cuenta pa jneza ni riníʼ ique ne ni  runi sentir. ¿Xiñee yaʼ? Purtiʼ riguite ladxidoʼno laanu ne qué gánnanu xi zándaca gucaani laanu gúninu (Jer. 17:9). Ne nuu biaje riguítenu laca laanu (Sant. 1:22). Nga runi nabé risaca iquiiñenu Stiidxaʼ Dios para guidúʼyanu pa nuu xiixa ra naquiiñeʼ guchaʼnu. Racané Biblia laanu para gánnanu ximodo nácanu pur dentru, «xi riníʼ íquenu ne xi deseu nuu ndaaniʼ ladxidoʼno» (Heb. 4:12, 13). Zeeda gácani casi ti aparatu ni ribee rayos X, ni racané laanu guidúʼyanu xi nuu dentru de laanu. Nga runi, pa racaláʼdxinu cueendunu ni galán de ca conseju ni zeeda lu Biblia ne ca ni rudii ca hermanu ni zániru ndaaniʼ xquidxi Dios, caquiiñeʼ gácanu humilde.

4. ¿Xiñee nánnanu guca rey Saúl orgulloso?

⁴ Ni bizaaca rey Saúl zacané laanu gánnanu xi rizaaca ti binni ora cadi humilde laa. Guizáʼ orgulloso gúcabe, dede qué ninabe nudiibe cuenta pa caquiiñeʼ guchaabe modo riníʼ íquebe ne ni rúnibe (Sal. 36:1, 2; Hab. 2:4). Bihuínnini ora gudxi Jehová laabe xi naquiiñeʼ gúnibe ora gunduuxebe ca amalequita, peru qué nuzuubabe diidxaʼ. Ora guluu jneza profeta Samuel laabe pur ni bíʼnibe, qué niniʼbe bicheebe, lugar de nga dede guníʼ íquebe cadi tan malu ni bíʼnibe ra qué nuzuubabe stiidxaʼ Jehová ne bigaanibe donda ique stobi (1 Sam. 15:13-24). Ne cadi ngue nga primé biaje guni Saúl zaqué (1 Sam. 13:10-14). Triste guininu ni, peru dede guníʼ íquebe jma risácabe que xcaadxi. Cumu qué nuchaabe modo riníʼ íquebe la? guluu jneza ne bicaanáʼ Jehová laabe.

5. ¿Xi rizíʼdinu de ni bizaaca rey Saúl?

⁵ Para cadi guizaacanu ni bizaaca rey Saúl, caquiiñeʼ gúninu laanu ca pregunta riʼ: «¿Ñee ruyubeʼ pretextu para cadi guneʼ ni ná ca conseju ni zeeda lu Biblia la? ¿Ñee riníʼ iqueʼ qué zazaacaʼ gastiʼ pa qué guzuubaʼ diidxaʼ la? ¿Ñee rugaaneʼ donda ique stobi pur ni runeʼ la?». Pa rúninu neca tobi de ca ni bizéʼtenu riʼ, caquiiñeʼ guchaʼnu modo riníʼ íquenu ne modo laanu. Pa qué gúninu ni, zácanu orgulloso ne maʼ qué zaná Jehová gaca xhamígunu (Sant. 4:6).

6. ¿Xiñee maʼ gadxé guca rey Saúl de rey David?

⁶ Guidúʼyanu yanna xiñee maʼ gadxé guca rey Saúl de rey David, ti hombre ni gunnaxhii «ley stiʼ Jehová» (Sal. 1:1-3). Gunna David rulá Jehová ca binni humilde peru rucaanabe ca binni orgulloso (2 Sam. 22:28). Nga runi, bidiibe lugar guchaa Stiidxaʼ Dios modo riníʼ íquebe. Sicaríʼ guniʼbe: «Zusisacaʼ Jehová, purtiʼ laa rudii conseju naa. Ne huaxhinni riguu jneza xquendabiaaneʼ naa» (Sal. 16:7).

7. ¿Xi zúninu pa humilde laanu?

⁷ Pa humilde laanu, zudiʼnu lugar guchaa Stiidxaʼ Dios modo riníʼ íquenu ante gúninu xiixa ni cadi jneza. Zeeda gaca Stiidxaʼ Dios casi ti voz ni rabi laanu: «Ndiʼ nga neza ca. Lasá luni». Zábini laanu ora maʼ careechunu de lu neza ca, pa ladu derechu o ladu bigaʼ (Is. 30:21). Pa gucaʼdiáganu Jehová zabeendunu stale cosa galán (Is. 48:17). Guzéʼtenu ti ejemplu, qué zatuí lunu ora uguu jnézacabe laanu. Ne zuni sentirnu nuunu jma gaxha de Jehová purtiʼ runi tratarbe laanu casi ti xiiñibe ni nadxiibe (Heb. 12:7).

8. Casi ná Santiago 1:22-25, ¿ximodo zanda gueeda gaca Stiidxaʼ Dios casi ti espeju para laanu?

⁸ Zanda gaca Stiidxaʼ Dios casi ti espeju para laanu (biindaʼ Santiago 1:22-25). Guiráʼ siadóʼ, ruuyadxí binni laa lu espeju ante guiree de ra lidxi, zacá ruuyaʼ paraa naquiiñeʼ quixhe chaahuiʼ ante guʼyaʼ xcaadxi laa. Zacagá rizaaca ora ridúʼndanu Biblia  guiráʼ dxi, racaneni laanu guidúʼyanu pa naquiiñeʼ guchaʼnu modo riníʼ íquenu o modo laanu. Stale hermanu ruundaʼ folletu ni láʼ Guidúʼndanu Stiidxaʼ Dios guiráʼ dxi ante guiree de ra lidxi ne rudiicaʼ lugar gacaneni laacaʼ guchaacaʼ modo riníʼ íquecaʼ. Ne cada dxi rúnicabe stipa chinándacabe conseju ni biree de lu Stiidxaʼ Dios. Laaca naquiiñeʼ guidúʼndanu Biblia guiráʼ dxi ne guiníʼ íquenu ni zeeda luni. Neca ruluíʼ huaxiéʼ risácani, pa gúninu ca ni bizéʼtenu riʼ, zacaneni laanu sanu lu neza nabéʼ ni riné laanu lu guendanabani.

9. ¿Pora nga zándaca caquiiñenu uguu jneza ti xhamígunu laanu?

⁹ ¿Ñee guyuu ora bixélenu de lu neza stiʼ Jehová la? (Sal. 73:2, 3). Pa guluu jneza ti xhamígunu laanu, ¿ñee bicaadiáganu laabe ne yenándanu conseju bidiibe laanu la? Pa bíninu ni, jneza decisión gucuaanu, ne zándaca rudiʼnu xquixe peʼ laabe purtiʼ guníʼnebe laanu (Prov. 1:5).

10. ¿Xi naquiiñeʼ gúninu pa uguu jneza ti xhamígunu laanu?

¹⁰ Stiidxaʼ Dios rusietenalaʼdxiʼ laanu «tuuxa ni dxandíʼ xhamígunu zudii conseju laanu neca gacaná ladxidoʼno» (Prov. 27:6). ¿Xi riníʼ ca diidxaʼ riʼ? Guxuíʼlunu chitídinu ti calle ra cadiʼdiʼ stale carru, ridídinu calle ca ne cayuuyadxinu teléfono stinu. Ne óraque, rigubayú ti xhamígunu laanu, cumu nabé nadipaʼ gudubayube laanu la? dede biaana ti moradu nanu. Peru pa qué nigubayube laanu, nilá ti carru laanu. Zándaca ziuubaʼ nanu chupa chonna gubidxa peru qué zadxiichinu pur ni bíʼnibe ca, sínuque zudiʼnu xquixe peʼ laabe. Ngaca nga rizaaca ora rabi ti xhamígunu laanu cadi jneza ni rininu o ni rúninu purtiʼ qué riuulaʼdxiʼ Dios ni. Zándaca qué ziuuláʼdxinu ni gábibe laanu, peru ti guendahuati nga pa guidxiichinenu laabe (Ecl. 7:9). Naquiiñeʼ gudiʼnu xquixe peʼ laabe purtiʼ gúpabe valor para guiníʼnebe laanu.

11. ¿Xi zándaca gucaa tuuxa cadi gucaadiaga conseju ni gudii ti xhamigu laa?

¹¹ ¿Xi zándaca gucaa tuuxa cadi gucaadiaga conseju ni gudii ti xhamigu laa? Orgullo. Ti binni orgulloso rucaadiaga ca cosa si ni riuulaʼdxiʼ ganna ne qué rucaadiaga «ni dxandíʼ» (2 Tim. 4:3, 4). Qué rucaadiágacaʼ purtiʼ riníʼ íquecaʼ jma nuu xpiaanicaʼ ne jma risácacaʼ que xcaadxi. Peru apóstol Pablo guníʼ: «Pa nuu tu riníʼ ique risaca, peru cadi zacá ni la? caguite laca laa» (Gál. 6:3). Ne ngaca guníʼ rey Salomón, sicaríʼ guníʼ: «Jma risaca ti xcuidi pobre ni nuu xpiaaniʼ que ti rey maʼ nagola ni nahuati, ni maʼ qué riná guicaa conseju» (Ecl. 4:13).

12. Casi ná Gálatas 2:11-14, ¿xi rizíʼdinu de ejemplu stiʼ apóstol Pedro?

¹² Bisaana apóstol Pedro ti ejemplu galán para laanu dxi guluu jneza apóstol Pablo laa nezalú stale binni (biindaʼ Gálatas 2:11-14). Ñándaca nidxiichinebe apóstol Pablo pur modo guluu jneza laabe ne ra biʼniʼ ni. Peru cumu nuu xpiaaniʼ Pedro la? gucuaabe conseju bidii Pablo laabe ne qué nidxiichinebe laa, lugar de nga la? ra gudiʼdiʼ tiempu gúdxibe laa hermanu ni nadxieeʼ (2 Ped. 3:15).

13. ¿Xi naquiiñeʼ gúninu ora chigudiʼnu conseju tuuxa?

¹³ Pa chuʼ ora guidúʼyanu caquiiñeʼ gudiʼnu conseju ti xhamígunu, ¿xi naquiiñeʼ gúninu primé? Ante guinínenu laabe, guiníʼ íquenu: «¿Ñee riníʼ iqueʼ jma jneza ca ni runeʼ la?» (Ecl. 7:16). Ti binni ni riníʼ ique jma jneza ca ni runi, runi juzgar xcaadxi  pur ca ni ruuyaʼ si ne cadi modo ruuyaʼ Jehová ne qué riá. Pa maʼ guníʼ íquenu ni bizéʼtenu riʼ ne naquiiñeʼ guinínenu xhamígunu, gábinu laabe xi bizaaca ne gúninu laabe pregunta para gánnabe paraa bicheebe. Guiráʼ ni gábinu laabe naquiiñeʼ guireecani de lu Biblia ne cadi guiaandaʼ laanu cadi laanu zuni juzgarnu laabe sínuque Jehová (Rom. 14:10). Chinándanu ni rusiidiʼ Stiidxaʼ Dios ne ora gudiʼnu conseju tuuxa guianu laa cásica biʼniʼ Jesús ni (Prov. 3:5; Mat. 12:20). Qué chuʼ dxi guiaandaʼ laanu runi tratar Jehová laanu modo runi tratarnu xcaadxi (Sant. 2:13).

14. ¿Xi rudii xquidxi Dios laanu?

¹⁴ Riquiiñeʼ Jehová xquidxi ni nuu lu Guidxilayú riʼ para gacané laanu sanu lu neza ni ziné laanu lu guendanabani. Runi xquidxi Dios videu, publicación ne reunión ni racané laanu chinándanu ca conseju zeeda lu Biblia. Ni zeeda lu ca publicación riʼ bireecani de lu Biblia. Ruyubi Grupu ni Zániru gacané espíritu santu laacaʼ para gánnacaʼ ximodo jma jneza gaca predicar. Neca zacá ruuyacabe modo gaca dxiiñaʼ riʼ jma galán. ¿Xiñee yaʼ? «Purtiʼ maʼ cuchaa guiráʼ cosa ni cayaca lu guidxilayú» ne laaca naquiiñeʼ guchaa xquidxi Dios modo runi dxiiñaʼ (1 Cor. 7:31).

15. ¿Xi guendanagana huadxaagalú caadxi publicador?

¹⁵ Ora rusiene xquidxi Dios xiixa enseñanza nacubi o xiixa tema ni cusiene naquiiñeʼ gaca ti xpinni Cristu nayá nezalú Dios, naquiiñeʼ chinándanu ni. Peru ¿xi rúninu ora ruchaacabe xiixa cosa ni maʼ biaʼnu gúninu yaʼ? Guzéʼtenu ti ejemplu, lu ca últimu iza riʼ jma caru para gucuí ne guni chaahuiʼ xquidxi Dios ca lugar ra raca adorar Jehová. Nga runi, maʼ guníʼ Grupu ni Zániru iquiiñeʼ ca salón ca biaʼ capacidad stícani. Nga runi maʼ bieeguʼ caadxi congregación ne maʼ gúcacaʼ tobi si ne laaca maʼ bidoo caadxi Yoo stiʼ Reinu. Caquiiñeʼ xquidxi Dios bueltu para cuí jma Yoo stiʼ Reinu ra caquiiñeʼ ni. Pa nabézanu ti lugar ra maʼ bidoo caadxi Yoo stiʼ Reinu ne maʼ guca caadxi congregación tobi si la? zándaca gaca nagana para laanu guiaʼnu ca cambiu riʼ. Yanna riʼ, caquiiñeʼ  guni viajar caadxi publicador zitu para chindacaʼ reunión sticaʼ. Caadxi hermanu ni gucané para gurí o guca chaahuiʼ ti yoo stiʼ Reinu zándaca guinabadiidxacaʼ xiñee cutoocabe ni ne guiníʼ íquecaʼ pur gana si biquiiñecaʼ tiempu ne stipa sticaʼ para gurí Yoo stiʼ Reinu ca. Peru neca zacá, cayuni apoyárcabe ni cayuni xquidxi Dios ne runi felicitarnu laacabe.

16. ¿Ximodo racané Colosenses 3:23, 24 laanu para cadi gusaana de chuʼnu nayecheʼ?

¹⁶ Ti cosa ni zacané laanu para cadi gusaana de chuʼnu nayecheʼ nga guietenaláʼdxinu cayúninu dxiiñaʼ para Jehová ne laabe nga cayuni dirigirbe xquídxibe (biindaʼ Colosenses 3:23, 24). Bisaana rey David ti ejemplu galán para laanu purtiʼ bidii bueltu para cuí templu stiʼ Dios. Sicaríʼ guniʼbe: «¿Tu nacaʼ naa ne tu naca ca binni xquidxeʼ para chuʼdu lugar ra gudiʼdu ofrenda de guidubi ladxidoʼdo yaʼ? Purtiʼ de lii zeeda guiráʼ ni, ne de ni rudiiluʼ laadu nga maʼ bidiʼdu lii» (1 Crón. 29:14). Ora rudiʼnu donación rudiʼnu Jehová de ni maʼ bidii laanu. Neca zacá, rudii Jehová xquixe peʼ laanu pur tiempu, stipa ne ca cosa ni rudiʼnu para gaca dxiiñaʼ ni racaláʼdxibe gúninu (2 Cor. 9:7).

17. ¿Xiñee cadi naquiiñeʼ guireʼnu gana pa caquiiñeʼ guchaʼnu modo laanu?

¹⁷ Pa qué racaláʼdxinu guireechunu de lu neza ni riné laanu lu guendanabani, caquiiñeʼ chinándanu ejemplu stiʼ Jesús (1 Ped. 2:21). Pa gudiʼnu cuenta caquiiñeʼ guchaʼnu modo laanu, cadi guireʼnu gana. Pa gúninu ni, zusihuínninu racaláʼdxinu gacané Jehová laanu. Cumu imperfectu laanu la? nánnabe zándaca gaca nagana para laanu chinándanu ejemplu stiʼ Jesús purtiʼ perfectu laa.

18. ¿Xi naquiiñeʼ gúninu para chindanu ra racaláʼdxinu?

¹⁸ Guicá íquenu ni chiguicaanu lu ca dxi ni zeeda ca ne chuʼnu dispuestu guchaʼnu modo riníʼ íquenu, ni rúninu ne modo laanu (Prov. 4:25; Luc. 9:62). Gácanu humilde ne gúninu ni ná 2 Corintios 13:11, sicaríʼ nani: «Siempre lachuu nayecheʼ, laguchaa modo riníʼ íquetu». Pa gúninu ni, «Dios ni rannaxhii ne ni riguixhedxí» ladxidoʼno ziuu ládenu. Zindanu ra racaláʼdxinu chindanu ne laaca ziuuláʼdxinu viaje ni cayúninu para guicaanu guendanabani.