1-2. Wacopo tio ku juk ma nwang’ere i Lembrieko 4:25 nenedi? Kemii lapor moko.

KEPAR pi lapor mi dhanu adek ma e: Nyamego moko m’uteng’ini ubeparu pi lembe ma ber m’egam ekwo i ie con. Kadok tin ebenwang’ere ku peko de, re ebemedere nitimo ni Yehova ku tego pare ceke. (1 Kor. 15:58) Kubang’ ceng’, ebed eparu pir ayi m’ebikwo ko karacelo ku wedi pare man jurimbe i paradiso. Nyamego mange ke ubepoi pi lembe ma rac ma jakristu wadi moko utimo ire i cokiri, re kadok kumeno de, emito ngo ebed kud akece i ie pi lembene. (Kol. 3:13) Umego moko ke uparu pi dubo ma con etimo, ento enwang’u nia mito eketh wie i kum gin m’ecopo timo kawoni pi nigwoko bedoleng’ pare.​—Zab. 51:10.

² Lembang’o m’urombo i bang’ Jukristu adek eno zoo? Gin ceke gipoi pi lembe m’utimere con, re giketho ngo wigi akeca i kum lembene. Ento giketho ‘wang’gi atira’ i kum lembe mi nindo m’ubino.​—Som Lembrieko 4:25.

3. Pirang’o ukwayu waketh ‘wang’wa atira’ i kum lembe mi nindo m’ubino?

³ Pirang’o pire tie tek nia waketh ‘wang’wa atira’ i kum lembe mi nindo m’ubino? Tap calu ma ng’atini copo wotho ngo atira tek ebeneno ng’eye, wan bende wacopo timo ngo cuu ni Yehova tek wabeparu kwa pi gin ma watimo con.​—Lk. 9:62.

4. I thiwiwec maeni wabiweco iwi lembang’o?

⁴ I thiwiwec maeni, wabiweco iwi awic adek ma copo cwaluwa niketho wiwa zoo i kum lembe ma con. Awicne gini e: (1) neno ng’eijo, (2) bedo kud akece, man (3) dieng’ akeca pi dubo ma con. Kinde ma wabeweco iwi thengeman, wabineno kite ma cik mir ukungu mi Biblia copo konyo kowa kara kud  waketh wiwa i kum ‘gin ma ni i ng’eiwa,’ ento i ‘kum gin ma ni i wang’wa.’​—Flp. 3:13.

5. Buku mir Eklizia 7:10 ubemio iwa cimowang’ i kum awic ma kani?

⁵ Som Eklizia 7:10. Poi nia giragora eni uwacu ngo nia etie rac nipenjiri kumae: “Ceng’ ma kwong’a bedo ber nedi?” Nipoi pi lembe m’ukadhu utie giramia m’uai i bang’ Yehova. Ento giragora uwacu nia, “Kud iwac kumae, ‘Ceng’ ma kwong’a bedo ber ma sagu maeni nedi?’” Awic m’utie i wec maeno utie niporo kwo mwa ma con ku kwo mwa ma kawoni, man niwacu nia lembe ma ber acel de mbe i kwo mwa ma tin. I Biblia mange juloko wec maeno nia: “Kud ipenj kumae: ‘Pirang’o nindo ma con ubedo ber ma sagu nindo ma kawono?’ Kum penji ma kumeno en e mi ryeko ngo.” (B.L.L.)

6. Pirang’o etie lembe mi rieko ngo niparu nia kwo mwa ubino ber con nisagu ma kawoni? Kemii lapor moko.

⁶ Pirang’o etie lembe mi rieko ngo niparu nia kwo mwa ubino ber con nisagu ma kawoni? Neno ng’eijo copo ketho juparu kende kende pi lembe ma beco ma con, ento wawil pi lembe ma rac m’ubed unwang’uwa. Ku lapor, kinde ma nyithindho mir Israel giwok kud i ng’om mi Misiri, wigi wil pio pio i kum can ma gineno kuca, man giketho wigi zoo i kum cam ma beco ma gibed gicamu. Gicaku wacu kumae: “Wapoi i kum rec, ma wacamu i Misiri mananu; kud ukuju, man kud ukondo, ku ma thungulu m’i thim, ku ma thungulu ma lake tek.” (Wel 11:5) Nyo andha gibed gicamu camne “mananu”? Ungo. Kuca gibino ng’eca man Jumisiri ubed usendogi lee. (Ai 1:13, 14; 3:6-9) Re i ng’eye giwil pi can maeno ceke, man gicaku paru pi lembe ma giweko i ng’eigi. Giketho wigi zoo i kum lembe ma ber ma kuca, kakare niketho wigi i kum lembe ma ber ma Yehova uai utimo igi. Timo migi unyayu ngo anyong’a nyanok de i ii Yehova.​—Wel 11:10.

7. Ang’o m’ukonyo nyamego moko kara kud epodh i awic mi neno ng’eijo?

⁷ Wacopo tim’ang’o kara kud wapodh i awic  mi neno ng’eijo? Wakewec iwi lapor pa nyamego moko m’ucaku timo tic i Bethel mi Brooklyn niai oro 1945. Oro moko i ng’eye, gigamiri kud umego moko de ma timo i Bethel man gitimo tic karacelo pi oro dupa. Ento i oro 1970, remo maku won ot pare. Nyamegone wacu nia, kinde ma won ot pare udhingo tho, emio ire juk ma copo dong’ konye nikwo ma ber i ng’ei tho pare, ewacu kumae: “Wakwo ma ber i gamiri mwa. Dhanu ma pol ukwo ngo kumeni.” Edok emedo kumae: “Kud ibed iketh wii kwa i kum lembe m’ukadhu, kadok saa moko wii bibepoi pire de. Nindo bikadhu ci, e can m’i cwinyi bithum. Cwinyi kud utur man ng’eicwiny de kud umeki. Ento bed kud anyong’a pi nindo ceke ma watimo ie ni Yehova karcelo kudi. . . . Nipoi pi lembe m’ukadhu utie giramia m’uai i bang’ Yehova.” Ineno ngo nia eno juk ma beri?

8. Nyamegwa unwang’u kony ma kani i juk ma won ot pare umio ire?

⁸ Nyamegwa ugwoko wec maeno ma won ot pare uyero ire. Etimo ni Yehova ku gwoko bedoleng’ nitundo m’ebin etho ko ma oro pare tie 92. Oro moko i wang’ tho pare, ewacu kumae: “Kan abepoi pi oro ma kadhu 63 m’adong’ atimo ie tic mi saa ceke ni Yehova, anwang’u nia abino kud anyong’a lee i kwo para.” Pirang’o? Ewacu kumae: “Gin ma ketho wakwo kud anyong’a, utie kwo karacelo kud umego ku nyimego, genogen ma watie ko mi kwo kugi i paradiso, man timo ni Yehova Mungu mandha ma Jacwic rondo ku rondo.” * Eno tie lapor ma ber mandha mi ketho wang’jo atira i kum nindo m’ubino!

9. Nimakere ku Lembe mi Julawi 19:18, saa ma kani m’ecopo bedo iwa tek niweko lembe?

⁹ Som Lembe mi Julawi 19:18. Wang’ mapol ebedo iwa tek niweko lembe ni ng’atini, akecane ka ng’atu m’utimowa rac utie jayic  wadwa, jarimbwa, kunoke wat mwa. Ku lapor, nyamego moko uloko lembe iwi nyamego wadi nia ukwalu sente pare. I ng’eye, nyamego m’uloko lembe wi wadi ukwayu kisa, ento nyamego ma juloko lembe iwie ukayu lembene asu. Nyo in de idaru nweng’iri ku kit lembe ma kumeno? Kadok fodi wanwang’ara ko ngo de, re cicopere nia saa moko wan de kokoro wagam wakayu lembe man wawacu nia wacopo weko lembene ngo.

10. Ang’o ma copo konyowa kara kud wakay lembe i iwa?

¹⁰ Ang’o ma copo konyowa kara kud wakay lembe i iwa? Mi kwong’o, poi nia Yehova neno lembe ceke. Eng’eyo pi peko ceke ma wanwang’ara ko, uketho i ie racu ma jubetimo iwa. (Ebr. 4:13) Can nege, kan eneno wabesendara. (Isa. 63:9) Man eng’olo nia ebidaru peko ceke ma wanwang’ara ko, ma jubenyayu i kumwa.​—Nyu. 21:3, 4.

11. Wabinwang’u bero ma kani ka wakayu ngo lembe i iwa?

¹¹ Ukwayu wang’ei bende nia ka wakayu ngo lembe, wabinwang’u berone de wan giwa. Nyamegwa ma juloko lembe i wie unwang’u nia eno tie lemandha. Eweko lembe ni nyamego m’uloko racu i wie, e nok nok akece m’i ie ucaku thum. Ewacu nia ka waweko lembe ni juwadwa, Yehova de biweko iwa. (Mat. 6:14) Eno nyutho ngo nia lembe ma jutimo ire ubino rac ungo, ento eng’io kende kende nia mito ngo ebed kud akece i ie. Lembuno uketho nyamegwa udoko jamutoro man eno konye niketho wie i kum timo ni Yehova.

12. Buku pa 1 Yohana 3:19, 20 ubemio iwa ponji ma kani?

¹² Som 1 Yohana 3:19, 20. Saa moko wan ceke wadieng’ pi lembe ma rac ma watimo. Ku lapor, jumoko pidocwinygi sendogi pi dubo ma gitimo ma fodi ging’eyo ngo lemandha. Jumange ke pidocwinygi sendogi pi dubo ma gitimo i ng’ei batizo migi. Eno tie lembe ma wok iwa wan ceke. (Rum. 3:23) I andha, wabed wamito watim gin ma ber, ento wang’ mapol “wan ceke wakier.” (Yak. 3:2; Rum. 7:21-23) Kadok wan ceke wabed wawinjara rac kinde ma pidocwinywa ubesendowa de, re saa moko ebedo iwa ku kony. Pirang’o wayero kumeno? Pilembe pidocwiny ma sendowa ketho watimo alokaloka i kwo mwa, man eketho wakeco nia wabipodho ngo kendo i timone.​—Ebr. 12:12, 13.

13. Pirang’o mito ngo cwinywa ubed upid nisagu m’ukero pi dubo ma watimo con?

¹³ Saa moko kadok i ng’ei ma wayewo dubo mwa man Yehova de uweko iwa, re pidocwinywa medere nisendowa assu nisagu. Kit pidocwiny ma kumeno bedo iwa kud adwogi ma rac. (Zab. 31:10; 38:3, 4) Pirang’o? Wakewec pi nyamego moko ma pidocwinye usende lee pi dubo m’etimo con. Ekoro kumae: “Anwang’u nia abesendara mananu nitimo ni Yehova, kum saa moko nyo abiboth de ngo.” Ju mapol m’i kindwa de copo winjiri ve nyamegwa eno. Pire tie tek nia wabed ku wang’wa kara kud wapodh i awic maeno, ma cwinywa ubed upid ko nisagu m’ukero pi dubo ma watimo con. M’usagu zoo, kepar kite ma Sitani copo winjere ko kan eneno nia waweko timo ni Yehova, ma nwang’u Yehova ke fodi umaruwa asu!​—Nen 2 Jukorinto 2:5-7, 11.

14. Wacopo ng’eyo nenedi nia Yehova uweko dubo mwa?

¹⁴ Re wacopo penjara kumae: ‘Acopo ng’eyo nenedi nia Yehova uweko dubo para?’ Kan ipenjiri kumeno, nyutho nia Yehova copo weko iri. Oro dupa udaru kadhu, Otkur ma Wiw moko ukoro kumae: “Saa moko wacopo nwang’u nia wabed watimo dubo lee, ma dong’ kurane unyang’ man parune de bedwogo i wiwa wang’ ma pol. Kan iwinjiri kumeno,  cwinyi kud utur. Kud ipar nia itimo dupa ma wekere ngo. Kum eno tie tap lembe ma Sitani ubemito ipar. Cwinyi m’ubedieng’ pi dubo m’itimo kende ci, ubenyutho nia itie dhanu ma rac ungo, man Yehova copo timo iri kisa. Lworo kud unegi, nyuth jwigiri man kway Mungu utim iri kisa, ekonyi kara ibed ku pidocwiny ma leng’ kendo. Cidh i bang’e calu nyathin cisayu kony i bang’ won kinde m’enwang’ere ku peko. Pieno, in bende kwai Yehova, e ebikonyi kum kisa pare dwong’.” *

15-16. Jurutic pa Yehova ma pol giwinjiri nenedi kinde ma ginwang’u nia Yehova uweko dubo migi?

¹⁵ Jurutic pa Yehova ma pol ginwang’u jukocwiny kinde ma ginwag’u nia Yehova uweko dubo migi. Ku lapor, oro moko m’ukadhu, umego moko ugam unwang’u kony lee i lembe m’esomo i thiwiwec mi Otkur ma Wiw. Thiwiwecne ukoro pi nyamego moko m’ubino paru nia Yehova copo mare ngo pi dubo pare m’etimo con. Lembuno upido cwiny nyamegone pi oro dupa, kadok i ng’ei batizo pare de. Ento kinde m’enyamu i lembe iwi jamgony, e paru pare uwilere. *

¹⁶ Lembe m’umego eno usomo ukonye nenedi? Ekoro kumae: “Kinde m’abino aradu, abed aneno pornografi lee. Nindo ma ceng’ini eni de, adok abodh’i ie kendo. Acidh asayu kony i bang’ judong cokiri man gikonya anyang’ nia Mungu umara man ecopo timo ira kisa. Lembuno ukonya nivoyo peko para. Re i ng’ei nindo moko, cwinya caku pido kendo nia tija mbe man nia Yehova copo mara ngo. Lembe m’asomo iwi nyamego maeno ukonya lee mandha. Kawoni anwang’u nia kan abeparu nia Mungu copo weko ngo ira, eca nwang’u ve abeyero nia lam ma Wode uthiero uromo ngo nikabu dubo para. Athumo karatasi mi thiwiwec ma jukoro lembene i ie, kara kinde m’abinwang’ara nia tija mbe, acopo dosome man anyamu ie kendo.”

17. Jakwenda Paulo utimo ang’o kara kud epodhi i awic mi dieng’ akeca pi dubo m’etimo con?

¹⁷ Lembe m’umego eno ukoro, ubepoyo  wiwa i kum lapor pa jakwenda Paulo. I wang’ nidoko Jakristu, Paulo utimo dubo dupa ma dongo. Kadok saa moko ebed epoi i kum lembe m’etimo de, re eketho ngo wie i kum lembenegi. (1 Tim. 1:12-15) Ebed eneno jamgony ni giramia ma Mungu umio ire athothi. (Gal. 2:20) Lembuno uketho Paulo upodho ngo i awic mi dieng’ akeca pi dubo m’ukadhu, ento eketho wie i kum timo ni Yehova ku tego pare ceke.

18. Waponjo lembang’o i thiwiwec maeni?

¹⁸ Wanwang’u ponji makani i kum awic ma juweco pigi i thiwiwec maeni? (1) Nipoi pi lembe m’ukadhu utie giramia m’uai i bang’ Yehova; re kadok nwang’u kwo mwa ma con ubino ber rukani de, kwo mwa mi nindo m’ubino i ng’om ma nyen lundo, bibedo ber nisagu zoo. (2) Jucopo timowa rac, ento tek waweko lembe ni juwadwa, wabiketho wiwa zoo i kum timo ni Yehova. (3) Nidieng’ akeca pi dubo ma watimo con, copo cerowa nitimo ni Yehova kud anyong’a. Pieno calu Paulo, mito wang’ei nia andha Yehova udaru weko iwa.

19. Wang’eyo nenedi nia i ng’om ma nyen kookoo mir adieng’acwiny mi lembe m’ukadhu bibedo mbe?

¹⁹ Watie ku genogen mi kwo ma rondo ku rondo. I ng’om ma nyen, kookoo mir adieng’acwiny mi lembe m’ukadhu bisendowa kendo ngo. Pi nindo maeno, Biblia uwacu kumae: “Jubipoi pi gin ma kwong’a ngo.” (Isa. 65:17) Kepar nyanok: Jumoko m’i kindwa gitimo ni Yehova nitundo gitii, re i ng’om ma nyen, gibidwogo kendo aradu. (Yob 33:25) Dong’ kud waketh wiwa i kum lembe ma con, ento waketh wang’wa zoo i kum nindo m’ubino ma wapar ko pi mugisa ma wabinwang’u!