1-2. Sasamaan kita misaka dademak to Taneng 4:25? Hadaken ko tinakoan.

HARATENGEN ko laenoay tolo tinakoan. Cecay matoˈasay fafahiyan salikaka marariday miharateng to mataˈlifayto a lipahakay tatokiyan. Soˈlin pasangaray ko kaˈorip nohatini, kawra padotocay cingra misarocod matayal saki Yihofaan. (1 Korinto 15:58) To romiˈamiˈad, miharatengay cingra kalacafayay to salawina i lakoing a maˈorip koniyah. Cecay salikaka maharatengay ko pidokaˈ no cecay salikaka cingranan, kawra makahiyay cingra a misodod. (Kolosay 3:13) Cecay faˈinayan salikaka maharatengayho ko nano mataˈlifayto a raraw, kawra padotocay cingra a madimadi, misamacay matayal saki Yihofaan.—ˈOlic 51:10.

² Oniya tatoloay salikaka iraay ko maanan kalecadan hani? Maharatengay nangra ko mifekaday mataˈlifayto a demak, kawra cowa ka tangoˈol to mataˈlifayto a demak. ‘Pasiˈayaw ko pinengneng,’ misaˈimer to hanoikor.—ˈOsien ko Taneng 4:25.

3. Hano ‘pasiˈayaw ko pinengneng’ ita, misaˈimer to hanoikor hani?

³ ‘Pasiˈayaw ko pinengneng’ ita, misaˈimer to hanoikor, hano kalimlaan hani? Ano pasiikor saan ko tamdaw a minengneng, cato kangaˈay talaˈayaw a romakat. Malecaday, ano misamacay kita to mataˈlifayto a demak, wa cato kangaˈay misamacay matayal saki Yihofaan.—Luka 9:62.

4. Oniya lalakaw wa milengo to maanan?

⁴ Oniya lalakaw wa milengo to tolo lalangian patangoˈolay kitanan to mataˈlifayto * a demak: (1) Tangoˈol to mataˈlifayto, (2) ˈinteh ko falocoˈ, (3) pakidem ko kakesem no falocoˈ. Wa  minengnengho kita o maanan a safalod no Fangcalay Cudad ko papadama kitaanan ‘misaˈicel talaˈayaw,’ aka pisamacay to mataˈlifayto a demak.—Filipi 3:13.

5. Patnakay 7:10 patalipaˈelalay kitanan aka pidemak to maanan?

⁵ ˈOsien ko Patnakay 7:10. O sinael cowa pipasomowal kitanan to: “Hano ngaˈay ko iˈayaway a romiˈad?” Miharateng to makapahay a demak i ˈayaw o sapatelong ni Yihofa. Patalipaˈlalay ko sinael kitaanan: “Aka somowal: ‘O iˈayaway a romiˈad hano mikikaka ko ngaˈay to aniniyay?’” Mihaenay, cowa ka ngaˈay kita tano iˈayaway a pakayraan palalini to noaniniyay, sahtoay o tatiihay kono aniniay saan a miharateng.

6. Haharateng saan to ikakaay ko ngaˈay no iˈayaway a kaˈorip to aniniyay hano cowa ko citanengay hani? Hadaken ko tinakoan.

⁶ Haharateng saan to ikakaay ko ngaˈay no iˈayaway a kaˈorip to aniniyay hano cowa ko citanengay hani? Tangoˈol to iˈayaway hakowaay ko kangaˈay no kaˈorip, wa mapawan to malifaay a roray. Tinakoen ko nolitengan Israil, ikor no miliyas cangra to Icip, kahenayay mapawan to pasangar no kaˈorip iˈayaw, o ngaˈayay aca a kakaenen ko maharatengay. Sanay cangra: ‘Maharatengay niyam itiniho i Icip cowa pipalak to payci iraayto ko foting, iraayho ko fidaol, kacawasay, kocay, tamaniki, ato sowan!’ (Saˈosi 11:5) Kawra soˈlinay caka pipalak cangra to payci iraayto ko kakaenen han? Cowa. Itiya marorayay ko kaˈorip no Israil, malakoliay cangra i Icip, taˈangayay ko saroero. (Kasadakan 1:13, 14; 3:6-9) Ikor mapawanay cangra toniya roray, makalim sapatikolaw to iˈayaway. Cowa pisinanot cangra to sapalemed ni Yihofa cangranan, ikakaay ko ngaˈay no iˈayaway saan miharateng. Cowa ka hemek ci Yihofa tonini.—Saˈosi 11:10.

7. O cecay fafahiyan salikaka sasamaan eca ka tangoˈolay to mataˈlifayto hani?

⁷ Sasamaan kita eca ka tangoˈol to mataˈlifayto hani? Nengnengen ko nalifetan no cecay fafahiyan salikaka. Itini 1945 miheca  misatapang cingra matayal i Pitil no Prokelin, caka pina miheca mararamoday cingra to matayalay i Pitil, ikor no mararamod padotocay cangra matayal i Pitil. Kawra, 1976 miheca adadaay ko faˈinay no fafahiyan salikaka. Sanay cingra, tiya mamapatay ko faˈinay ningra i, pafeliay cingranan to ngaˈayay sapaini, padama cingranan ngaˈay ko kaˈorip noikor. Sanay ko faˈinay ningra: “Lipahakay ko raramod ita, awaay ko mahaenay a lipahak no ˈalomanay tamdaw.” Patalipaˈelay ko faˈinay cingranan: “Aka a tangoˈol to mataˈlifayto. O mamiadah ko toki to dokaˈ, aka pakasomaden ko niyah, o lalipahak kiso to kahemekan a romiˈad iˈayaw. Mataˈlif ko toki, wa mahapinang iso o materekay i ponoˈ iso sahtoay o makapahay. Ngaˈay mitikol miharateng to lipahakay a demak o sapafeli no Kawas a sidaˈit kitanan.” Oniya sapaini tada matatodongayto!

8. Oniya fafahiyan salikaka cowa ka tangoˈol to mataˈlifayto, telocto milifokay to maanan a epoc hani?

⁸ Mitooran noniya fafahiyan salikaka ko sapaini no faˈinay ningra a midemak, ˈayaw no mapatay cingra i 92 ko mihecaan, padotocay madimadi a matayal saki Yihofaan. ˈAyaw no mapatay cingra to pina miheca sanay: “Tikolen miharateng, 63 miheca kako miemin to toki matayal ci Yihofaan, marenecay a lipahak ko kaˈorip ako.” Hano ngaˈay mihaen ko sowal ningra hani? Sanay cingra: “Soˈlinayto marenec a lipahak ko kaˈorip ako, samanen ngaˈayay ko kalawidang to salikaka, hanaca iraay ko hatokel malacafay cangranan i Lakoing mihodop to kasapaan a misangaˈay Tatapangan, oya tada cecayay soˈlinay Kawas a Yihofaan, tahira i daˈoc.” * Oniya fafahiyan salikaka, pasiˈayaw ko pinengneng, misaˈimer to hanoikor, tada o ngaˈayay a taˈarawan ita.

9. Itini maanan a pakayraan, sapitooraw to sowal no Lifi 19:18 a midemak tada pasangaray misodod to tao alatek?

⁹ ˈOsien ko Lifi 19:18. O midokaˈay kitaanan  ano o salawina anca o salikaka i kasakopang, tocerid pasangaray kita misodod cingranan. Tinakoen, cecay fafahiyan salikaka pakararaway to roma fafahiyan salikaka to mitakaway to payci. Soˈlin ikor miliˈayay koya salikaka, kawra oniya mapakararaway a salikaka tatiihay ko falocoˈ. Na iraay ko mahaenay harateng iso han? Soˈlin cowa ka lecad ko pakayraan, ano madokaˈ kita i, tahadaˈoc cowa ko mamisodod cingranan wa saan kiso miharateng alatek.

10. O maanan ko papadama kitaanan eca ka ˈinteh ko falocoˈ hani?

¹⁰ O maanan ko papadama kitaanan eca ka ˈinteh ko falocoˈ hani? Haratengen, maˈaraway ni Yihofa ko kihcod. Mafanaˈay Cingra to kihcod a demak, mahawpay ko macadaay ita kihcod cowa ka sadafdaf a demak. (Hipray 4:13) Tahapades kita i, masomaday Cingra. (Isaya 63:9) Mikiˈokay Cingra, o malifaay ita pakayniay caka sadafdaf a dokaˈ, o mamalahdaw maemin noikor.—Paˈarawan 21:3, 4.

11. Falahen ita ko ˈintehay a falocoˈ, wa ira ko manan a epoc no niyah?

¹¹ Haharatengen ita, falahen ko ˈintehay a falocoˈ wa milifok to adihayay a epoc. Oya mapakararaway a salikaka cipinang tonini, ikor ngaˈayayto cingra mihaen to demak. Cipinangay cingra, sododen ita ko tao, wa nagˈay milifok to sasodod ni Yihofa. (Matay 6:14) Cowa ko patado to pakararaway a salikaka mikilim to lalangian, anca cowa ka pakidem ko raraw no tao saan miharateng. Makahiay misodod, caayto ka ˈinteh ko falocoˈ ikor matongalay ko lipahak, ngaˈayayto padadotoc misamacay matayal saki Yihofaan.

12. Mikitini 1 Yohani 3:19, 20 mananamay ita ko manan hani?

¹² ˈOsien ko 1 Yohani 3:19, 20. Makesem ko falocoˈ o matatodongay konini. Tinakoen, o roma tamaw makesemay ko falocoˈ samanen iˈayaw mafanaˈ to soˈlinay kimad midemakay to mararaway a demak, o roma tamdaw makesem ko falocoˈ samanen ikor micada to paputisem midemakay to mararaway a demak. (Loma 3:23) Manaokaniw, sapidemakaw kita to matatodongay a demak, kawra “soˈlinay adihay ko patelac no mita a maemin.” (Yakop 3:2; Loma 7:21-23) Soˈlin cowa ka olah kita to makesemay a falocoˈ, kawra o ngaˈayay kora harateng, samanen o makesemay a falocoˈ micorohay kitanan misalof to mararaway, misetek to falocoˈ ecato piliyaw mararaw.—Hipray 12:12, 13.

13. Hano aka pakidem a makesem ko falocoˈ ita?

¹³ Ano maharekayto pasasiyor kita, paihkalayto ci Yihofa misododan Ningra kita, ano padadotocho kita makesem to iˈayaway a raraw, mihaen o pakidemay a makesem ko falocoˈ. O tatiihay ko hatiniay makesemay a falocoˈ. (ˈOlic 31:10; 38:3, 4) Misamanay? O cecay fafahiyan salikaka pakayni pakidem a makesem ko falocoˈ a misemsem, sowal ningra: “Ano misaˈicel kako a matayal saki Yihofaan awaay ko kapo saan miharateng, samanen cowato ka kiyamaw.” ˈAlomanay tamdaw mahecaday ko harateng toniya fafahiyan salikak alatek, kawra haharetengen, ano cowa pisawad ci Yihofa kitaanan, sawad han ita ko niyah, mihaen o pakahemekay ci Satanan. (Nengnengen ko 2 Korinto 2:5-7, 11) Mihaenay, aka pakidem a makesem ko falocoˈ.

14. Hano pakasoˈlin kita to cowa pisawad ci Yihofa kitaanan hani?

¹⁴ Wa miharateng kita alatek: “Hano pakasoˈlin kako to cowa pisawad ci Yihofa takowanan hani?” Ano mihaen ko harateng iso, paihkalay to mamalifok iso ko sasodod ni Yihofa. Sowal no Mikecolay: “O roma tatihay nanaman  ita cilamitay to alatek, mansa saliyaliyaw saan kita midemak to malecaday a raraw . . . Aka a matoled, miharateng to cowa ko mamisodod ci Yihofa tisowanan. Nanay mahaen ko harateng iso sanay ci Satan. Pakayni i raraw no niyah a makesem kiso, paihkalay konini to ngaˈayayho a malidong. Misapoener ko falocoˈ a mitolon to Kawas, micangacang to sasodod Ningra, padama tisowanan ira ko makoracay a falocoˈ, ecato piliyaw midemak to malecaday a raraw. O cecay wawa ano kina pina tahalifa to malecaday pasangaray, pasayraay i wama misaali to sadama. Mihaenay, ka padotoc a micangacang ci Yihofaan, makahiyay Cingra pafeli to mikiriwiˈay a sidaˈit, o sasidaˈit Cingra a padama tisowanan.” *

15-16. Mafanaˈ ko ˈalomanay salikaka to cowa pisawad ci Yihofa cangranan i, samanay ko harateng hani?

¹⁵ Mafanaˈ ko ˈalomanay salikaka to cowa pisawad ci Yihofa cangranan i, masayarayto ko falocoˈ. Tinakoen, ikor no miˈosi ko cecay salikaka to cecay lalakaw no “Minanam to Fangcalay Cudad a Mafalic ko Nokaˈorip,” matemeray ko falocoˈ. Toniya lalakaw, somowalay ko cecay fafahiyan salikaka, pakayni nalifetan ningra i saˈayaw pasangaray a pakasoˈlin to maolahay ci Yihofa cingranan, ikor no pina miheca micada to paputisem, kamayan mahaen ko harateng ningra. Kawra, ikor no midotim cingra to tatodong no sapatefoc i, pakasoˈlinayto maolahay ci Yihofa cingranan. *

¹⁶ O nalifetan no fafahiyan salikaka samanay padama toniya salikaka hani? Sanay cingra: “Kaemangho kako i, misaˈicelay misawad to nanaman minengneng to kaacekan a sasing, caka halafin miliyaway midemak kako. Micangacangan ako ko sadama no malohemay malitengay no kasakopang, masalofay nohatini ko pakayraan. Mihinomay ko malohemay malitengay takowanan, somowal to iraay ko siniˈada ni Yihofa, maolahay takowanan, kawra kamayan miharateng kako to awaay ko kapo no niyah, cato ka olah ci Yihofa takowanan saan miharateng, ano  mahaenay i, cowa ko papakasodod to raraw ako ko kinafalah no wawa Ningra kira.

17. Hano cowa ka pakidem makesem ko falocoˈ ni Pawlo?

¹⁷ Hatiniay a nalifetan maharatengay ita ko tarokos ci Pawlo, iˈayaw malo Krisciyang cingra adihay ko pakidemay a raraw. Maharatengay ni Pawlo ko iˈayaway a raraw, kawra cowa ka padotoc miharateng toya demak. (1 Timoti 1:12-15) Maharatengay ningra koya sapatefoc o sapafeli ni Yihofa cingranan a sapatelong. (Kalatiya 2:20) Mihaenay, cowa ka pakidem a makesem ko falocoˈ ni Pawlo, ao misarocoday ko falocoˈ ato harateng matayal saki Yihofaan.

18. Mikitini toni lalakaw wa mananam ita ko maanan hani?

¹⁸ Oniya lalakaw mitadtaday to tolo lalangian papiharateng to mitaˈlifayto a demak, mikitini wa mananam ita ko maanan hani? (1) Miharateng to makapahay a demak i ˈayaw o sapatelong ni Yihofa, kawra ano samaanto ngaˈay ko kaˈorip iˈayaw, o kaˈorip i faelohay a hekal wa ikaka ko kangaˈay. (2) Midokaˈay ko tao kitanan alatek, kawra ano makahi kita misodod to tao, wa ngaˈay misamacay matayal saki Kawasan. (3) Pakidem makesam ko falocoˈ ecato ka lipahak kita midoko ci Yihofaan, mansa pasayra kita ci Pawloan minanam, pakasoˈlin to maharekayto ci Yihofa misodod kitanan.

19. Hano mafanaˈ kita, itini faelohay hekal cowato ka mamiharateng kita to matoleday a demak ˈiayaw hani?

¹⁹ Iraay ko hatokel ita tahaˈdaoc maˈorip. Itini faelofay a hekal, cowato ko mamiharateng kita to matoleday a demak ˈiayaw. Sowal no Fangcalay Cudad, itiya, “o mamatawalto ko iˈayaway a demak a maemin.” (Isaya 65:17) Soˈlin O roma salikaka matoˈas matoˈasayˈto, kawra itini faelohay hekal, wa patikol cangra kaemang. (Yopu 33:25) Mihaenay, misetek kita to falocoˈ, Aka maˈorip i mataˈlifayto, ka pasiˈayaw ko pinengneng, misaˈimer to hanoikor.