1-2. Songon dia do hita boi mangihutton Poda 4:25? Paboa ma contohna.

BAYANGKON ma contoh on. Sahalak donganta borua na matua, mangingot akka na denggan na dihilala ibana tikki poso. Alai saonari, nang pe nga lam matua jala godang hasusaanna, dibahen ibana do nasa tolapna mangulahon lomo ni roha ni Jahowa. (1 Kor. 15:58) Ganup ari sai dibayangkon ibana do dirina, dohot akka halak na dihaholongi ibana tinggal di Paradeiso. Adong muse donganta borua na haccit rohana dibahen sasahalak di huria, alai dang sai torus diingot ibana i. (Kol. 3:13) Sahalak donganta bawa mangingot hasalaanna najolo, alai sai fokus do ibana asa boi toktong setia tu Jahowa saonari.​—Ps. 51:11.

² Aha do na sarupa sian pengalaman ni tolu donganta on? Sude do nasida mangingot akka na masa di tikki naung salpu. Alai dang sai torus dipikkiri nasida i, sai ‘tu jolo do nasida mamereng’.​—Jaha Poda 4:25.

3. Boasa ikkon torus hita mangida tu jolo?

³ Boasa ikkon torus hita mangida tu jolo? Asa boi sasahalak tigor mardalan tu jolo dang boi sai mangida tu pudi. Suang songon i ma, molo sai tapikkiri aha na masa di tikki naung salpu, dang boi be hita fokus tu ulaonta manomba Jahowa.​—Luk. 9:62.

4. Aha do na lao taulas di artikel on?

⁴ Di artikel on lao taulas ma tolu na boi mambahen hita sai mangingot aha na masa di ngolutta di tikki naung salpu. Na parjolo, torus merasa undenggan do ngolutta najolo. Na paduahon, sai jut rohatta tu sasahalak. Jala na patoluhon, sai manguhumi diri. Taida ma songon dia prinsip ni Bibel, boi mangurupi hita asa unang sai mangingot akka naung salpu, alai torus mangida “angka na laho ro”.​—Plp. 3:13.

5. Songon na didok di Parjamita 7:10, aha do na so boi taulahon?

⁵ Jaha Parjamita 7:10. Dang didok di ayat i, na so boi taingot akka na denggan di ngolutta najolo. Silehon-lehon ni Debata do akka na denggan i. Alai didok di ayat i, ‘Unang dok dia do ulaning dalanna umbahen dumenggan najolo sian nuaeng?’ Jadi ikkon manat do hita asa unang tabanding-bandingkon ngolutta najolo dohot saonari. Jala unang ma sai tadok gabe dao do ussusa ngolutta saonari.

6. Boasa dang marbisuk hita molo sai tadok undenggan do ngolutta najolo? Paboa ma contohna.

⁶ Boasa dang marbisuk hita molo sai tadok undenggan do ngolutta najolo? Alana olo do sai holan akka na denggan na taingot, alai gabe talupahon hasusaatta najolo. Parrohahon ma aha na masa tu bangso Israel. Dung kaluar nasida sian Mesir, pittor lupa do nasida tu akka hasusaanna di Mesir. Alai na sai diingot nasida holan akka sipanganon na tabo na adong disi. Didok nasida, “Tikki di Mesir lomonta do mangallang dengke, so pola situhoron. Songon i muse molo taingot angka ansimun, semangka, bawang pre, bawang mera, bawang puti.” (4 Mus. 11:5, Bibel siganup ari) Alai toho do memang dang pola situhoron akka sipanganon i? Daong. Gariada, massai porsuk do dihilala nasida ala ikkon karejo gabe hatoban di Mesir. (2 Mus. 1:13, 14; 3:6-9) Pittor lupa do nasida tu hasusaan tikki di Mesir, jala lomo do roha ni nasida asa songon najolo i muse ngoluna. Sai dipikkiri ma akka na denggan di ngolu ni nasida najolo. Jala gabe dang fokus be tu akka na denggan na dibahen Jahowa tu nasida di Mesir. Dang lomo be roha ni Jahowa tu nasida.​—4 Mus. 11:10.

7. Aha do na mangurupi sahalak donganta borua, asa unang sai merasa na undenggan do ngoluna najolo?

⁷ Songon dia do carana asa unang sai tahilala undenggan do ngolutta najolo? Parrohahon ma pengalaman ni sahalak donganta borua na melayani di Betel  Brooklyn mulai taon 1945. Dung piga-piga leleng, marhasohotan ma ibana dohot sahalak donganta na karejo di Betel, rap ma nasida melayani disi saleleng martaon-taon. Alai di taon 1976, marsahit ma suamina i. Tikki naeng mate suamina i, dilehon ibana ma poda lao patoguhon istrina. Didok suamina i ma tu istrina i, “Massai denggan do parsaripeonta saleleng on. Godang do halak na so hea makkilala sisongon i. Ra, dang boi dilupahon ho akka na denggan saleleng on. Alai unang ma holan i na sai diingot ho. Lam leleng gabe lam moru do annon lungun ni rohami. Unang ma sai marsak ho, jala sai metmet roham alani on. Alai sai las ma roham mangingot akka na denggan na tahilala saleleng manomba Jahowa. . . . Silehon-lehon sian Debata do i.” Massai denggan do poda ni suamina i.

8. Songon dia do donganta on mandapot laba sian poda na dilehon suamina?

⁸ Diihutton donganta borua i do poda ni suamina i. Setia do ibana manomba Jahowa sahat tu na mate marumur 92 taon. Piga-piga taon andorang so mate ibana, didok ma, “Molo huingot saleleng 63 taon au dinas sepenuh waktu, massai las do rohakku. Ala hupakke do ngolukku manomba Jahowa.” Didok ibana muse, “Boi do hita marlas ni roha di ngolutta saonari, ala boi gabe bagian sian organisasi ni Jahowa. Jala boi mandapot harapan asa tinggal rap dohot akka dongan di Paradeiso.” * Torus do diida donganta on tu ari na naeng ro jala gabe sitiruon na denggan do ibana tu hita.

9. Songon na disurat di 3 Musa 19:18, aha do biasana na mambahen hita maol manalpuhon hasalaan ni sasahalak?

⁹ Jaha 3 Musa 19:18. Biasana ummaol do manalpuhon hasalaan na dibahen ni donganta di huria, ale-ale, manang keluargatta.  Misalna sahalak donganta borua ditudu manakko hepeng ni donganta borua na asing. Ujungna mangakku sala do donganta na manudu i, alai tong do jut roha ni donganta na ditudu i, jala sai dipikkir-pikkiri ibana do i. Hea do dihilala hamu songon i? Nang pe dang sarupa situasi na taadopi, alai olo do ra dang boi tahalupahon hasalaan ni sasahalak na mambahen jut rohatta.

10. Tikki jut rohatta, aha do na boi mangurupi hita?

¹⁰ Tikki jut rohatta aha do na boi mangurupi hita? Taingot ma diida Jahowa do sasudena. Diboto ibana do sude na taadopi, termasuk tikki dibahen sasahalak na haccit tu hita. (Heb. 4:13) Dang lomo roha ni Jahowa molo susa hita. (Jes. 63:9) Jala marjanji do Ibana apusanna do akka na haccit na dibahen halak tu hita.​—Pgk. 21:3, 4.

11. Aha do labana molo dang sai jut be rohatta tu sasahalak?

¹¹ Taingot ma muse, boi do lam dame rohatta molo tasalpuhon hasalaan ni halak. Songon i do dihilala donganta borua na ditudu nakkin. Ujungna olo do ibana manalpuhon i jala dang jut be rohana tu dongan na manudu ibana. Disadari ibana do, molo tasalpuhon hasalaan ni na asing, salpuhonon ni Jahowa do hasalaatta. (Mat. 6:14) Memang diboto ibana do, sala do na dibahen donganna i. Alai dang sai jut be rohana mamikkiri i. Hasilna, gabe las ma roha ni donganta i, jala boi ma ibana fokus manomba Jahowa.

12. Aha do na boi taparsiajari sian 1 Johannes 3:19, 20?

¹² Jaha 1 Johannes 3:19, 20. Sipata olo do tauhumi diritta sandiri. Misalna olo do diuhumi sasahalak dirina, ala diingot ibana hasalaan na hea diulahon ibana andorang so diboto hasittongan. Na asing muse manguhumi dirina ala diulahon ibana hasalaan dung tardidi ibana. (Rom 3:23) Pasti lomo do rohatta mangulahon na sittong. Alai jotjot do hita sala. (Jak. 3:2; Rom 7:21-23) Nang pe dang lomo rohatta manguhumi diritta sandiri, alai adong do manfaat ni i. Aha ma i? Asa boi tapauba pangalahotta na so denggan jala asa unang taulahon be hasalaan na sarupa.​—Heb. 12:12, 13.

13. Boasa dang boi torus tauhumi diritta?

¹³ Alai olo do gabe torus tauhumi diritta nang pe nungnga muba hita jala nungnga disalpuhon Jahowa hasalaatta. Boi do gabe marjea hita molo sai songon i torus pakkilalaatta. (Ps. 31:11; 38:4, 5) Boasa? Parrohahon ma pengalaman ni sahalak donganta borua na sai manguhumi dirina alani hasalaanna najolo. Didok ibana ma, “Marisuang do huhilala sude na huulahon lao manomba Jahowa. Dang mungkin boi au malua.” Olo do ra sarupa pakkilalaatta dohot donganta on. Jadi ikkon manat do hita, asa unang sai torus tauhumi diritta. Boasa? Alana boi do gabe dang tasomba be Jahowa, hape nungnga disesa Jahowa hasalaatta i jala las ma roha ni Sibolis!​—Bandingkon 2 Korint 2:5-7, 11.

14. Sian dia do taboto na olo do Jahowa manesa dosatta?

¹⁴ Alai olo do ra sukkun-sukkun rohatta, ‘Sian dia ma huboto naung disesa Jahowa hasalaakki?’ Molo adong sukkun-sukkun sisongon i di rohamuna, sabotulna i patuduhon na manolsoli do hamu. Jala boi ma sesaon ni Jahowa hasalaanmuna i. Marpulu taon naung salpu, sada artikel The Watchtower hea do paboahon songon on, “Targanggu do panggora ni rohatta  molo taulahon muse hasomalan na roa naung tatinggalhon. . . . Alai unang ma metmet rohamuna. Unang ma didok rohamuna dang sesaon ni Jahowa be dosamuna i. Pikkiran sisongon i do na dihalomohon Sibolis. Molo manolsoli do hamu alani hasalaan na dibahen hamu, on patuduhon na boi do Jahowa manalpuhon hasalaanmuna. Serep ma rohamuna, jala martangiang ma hamu tu Debata. Pangido ma tu Ibana asa disesa dosamuna, asa ias panggora ni rohamuna, jala asa diurupi hamu unang mangulangi hasalaan na sarupa. Sahalak dakdanak, olo do mulak-ulak mangido tu bapakna asa diurupi ibana pasaehon masalah na sarupa. Alani i, molo sai dipangido hamu do tu Jahowa asa diurupi hamu, pasti urupanna do hamu alani asi ni rohana.”

15-16. Songon dia do pakkilalaan ni akka donganta dung diboto nasida na olo do Jahowa manalpuhon hasalaan ni nasida?

¹⁵ Godang do naposo ni Jahowa na tarapul rohana mamboto olo dope Jahowa manalpuhon hasalaan ni nasida. Misalna piga-piga taon naung salpu, adong do pengalaman ni sahalak donganta borua di seri artikel, “Alkitab Mengubah Kehidupan”. Di artikel i didok ibana, alani hasomalan na roa na hea diulahon ibana najolo, gabe maol do ibana porsea na holong do roha ni Jahowa tu ibana. Jala torus do ibana makkilala songon i sappe martaon-taon dung tardidi ibana. Alai dung dirimangi taringot tobusan, gabe pos ma rohana na dihaholongi Jahowa do ibana. *

¹⁶ Adong do sahalak donganta bawa na dipatogu dung dijaha ibana pengalaman ni donganta borua i. Didok ibana, “Tikki poso dope au, kecanduan pornografi do au, baru-baru on gabe huulahon do i muse. Hupangido ma tu sintua asa diurupi au, jala boi ma huatasi masalah i. Dipapos akka sintua i do rohakku na holong do roha ni Jahowa tu au jala olo do Ibana manalpuhon hasalaakku. Alai olo do sipata, huhilala dang arga dirikku jala dang mungkin dihaholongi Jahowa au. Alai tikki hujaha pengalaman ni donganta borua on, gabe dipatogu do rohakku. Saonari  husadari ma, molo hudok tu dirikku dang disalpuhon Debata hasalaakku, berarti dang porsea au na boi do tobusan ni Jesus i manesa dosakku. Huribak ma halaman ni artikel i, asa boi muse hajaha jala hurimangi molo huhilala muse sisongon i.”

17. Aha do na diulahon si Paulus asa unang sai manguhumi diri sandiri?

¹⁷ Gabe taingot do ra pengalaman ni si Paulus tikki manjaha pengalaman ni akka donganta on. Godang do dosa na balga na diulahon si Paulus andorang so gabe halak Kristen ibana. Diingot ibana do akka hasalaanna i, alai dang sai torus dipikkiri ibana i. (1 Tim. 1:12-15) Porsea do ibana molo tobusan ni Jesus i, sada silehon-lehon ni Debata na boi manesa dosana. (Gal. 2:20) Jadi, gabe dang sai diuhumi si Paulus be dirina. Alai gabe fokus ma ibana lao mangalehon na undenggan tu Jahowa.

18. Aha do na taparsiajari sian artikel on?

¹⁸ Aha do na taparsiajari sian artikel on? (1) Sada silehon-lehon ni Jahowa do ala boi taingot akka na denggan di tikki naung salpu. Alai undenggan dope ngolutta haduan di tano na imbaru sian ngolutta di tikki naung salpu. (2) Sipata olo do haccit rohatta dibahen dongan na asing. Alai molo tasalpuhon hasalaanna i, gabe fokus ma hita manomba Jahowa saonari. (3) Molo torus tauhumi diritta, gabe dang boi be las rohatta manomba Jahowa. Jadi songon si Paulus ma hita, ikkon pos do rohatta naung disesa Jahowa dosatta.

19. Sian dia do taboto na so ingototta be di tano na imbaru akka na mambahen hita marsak di tikki naung salpu?

¹⁹ Adong do harapanta lao mangolu salelengna di tano na imbaru. Dang ingototta be akka na mambahen hita marsak di tikki naung salpu. Didok Bibel do, “Ndang be ingoton angka na parjolo i manang tarsunggul tu roha.” (Jes. 65:17) Pikkirhon ma on: Saleleng tasomba Jahowa saonari, lam leleng lam matua do hita. Alai molo di tano na imbaru, mulak poso do hita muse. (Job 33:25) Unang be sai taingot-ingot akka naung salpu i. Alai fokus ma hita tu tano na imbaru, jala marsitutu ma hita mulai saonari asa boi hita mangolu disi!