ICIPANDE CA KUSAMBILILAMO 48
‘Mulelolesha fye ku Ntanshi’
“Leka amenso yobe yaloleshe fye ku ntanshi, kabili yatontomeshe fye ku ntanshi.”—AMAPI. 4:25.
ULWIMBO 77 Ulubuuto mu Calo ca Mfifi
IFYO TWALASAMBILILA *
1-2. Kuti twakonka shani ukufunda ukwaba pa Amapinda 4:25? Landeni pa fya kumwenako.
TONTONKANYENI pa fya kumwenako fyakonkapo. Nkashi umukalamba aibukisha ifisuma ifyalecitika ilyo ashilakota. Nangu ca kuti alaba na mafya pali ino nshita, atwalilila ukubombela Yehova apapela amaka yakwe. (1 Kor. 15:58) Cila bushiku alelenganya ifyo cikaba ilyo ena na balupwa lwakwe ne fibusa bakaba pamo mu calo cipya. Nkashi na umbi aibukisha ifyo Umwina Kristu munankwe amukalifye, lelo asalapo ukulabako ku fyo bamukalifye. (Kol. 3:13) Munyinefwe aibukisha ifyo alufyenye kale, lelo asalapo ukwesha apo engapesha ukutwalilila ukuba uwa cishinka kuli Yehova.—Amalu. 51:10.
2 Finshi ifipalene pali aba Abena Kristu batatu? Bonse balebukisha ifyacitike kale, nomba tabekalila fye ukulafitontonkanyapo. Lelo, balolesha fye “ku ntanshi.”—Belengeni Amapinda 4:25.
3. Mulandu nshi tulingile ‘ukulalolesesha fye ku ntanshi’?
3 Cinshi cacindamina ‘ukulalolesha fye ku ntanshi’? Nga filya fine umuntu engatendeka ukufuma mu musebo nga ca kuti alelolesha ku numa ilyo ale-enda, na ifwe bene te kuti tubombele bwino Yehova nga ca kuti tuletontonkanya sana pa fya ku numa.—Luka 9:62.
4. Finshi twalasambilila muli cino cipande?
4 Muli cino cipande, twalalanda pa fiteyo fitatu ifingalenga twalatontonkanya sana pa fya ku numa. Ifi ifiteyo ni: (1) ukulafuluka inshiku sha kale ukucila mu cipumo, (2) ukulaenda ne cikonko ku mukoshi, na (3) ukulasakamikwa sana pa fyo twalufyenye kale. Ilyo tulelanda pali ifi ifiteyo, twalamona ifyo amashinte ya mafunde ya mu Baibolo yengatwafwa ukukanalatontonkanya sana pa “fya ku numa,” lelo ukulakonkelela “ifya ku ntanshi.”—Fil. 3:13.
ICITEYO CA KUFULUKA IFYA KU NUMA UKUCILA MU CIPIMO
Finshi fingalenga twafilwa ukulalolesha fye ku ntanshi? (Moneni paragrafu 5, 9, na 13) *
5. Citeyo nshi ico Lukala Milandu 7:10 ilandapo ico tulingile ukucenjelako?
5 Belengeni Lukala Milandu 7:10. Ili ilembo talitila calibipa ukwipusha ukuti: “Cinshi ico inshiku sha kale shawamine?” Pantu ukwibukisha ifya kale bupe ubo Yehova atupeela. Lelo lilalanda ukuti: “Witila: ‘Cinshi ico inshiku sha kale shawamine ukucila shino?’” Mu mashiwi yambi kuti twatila iciteyo cilipo kulalinganya ifyo ifintu fyali kale ku fyo ifintu fili pali ino nshita, no kulamona kwati ifintu fyonse fyalibipa pali ino nshita ukucila kale. Muli Baibolo imo bapilibula ici icikomo ukuti: “Wilaipusha auti: Cinshi ico inshiku sha kale shawamine ukucile sha nomba? Pantu ukwipushe fi te cintu ca mano.”
Finshi abena Israele balufyenye ilyo bafumine mu Egupti? (Moneni paragrafu 6)
6. Cinshi cabipila ukwikalila fye ukulatontonkanya ukuti inshiku sha kale shaliweme ukucila inshiku sha nomba? Landeni pa ca kumwenako.
6 Cinshi cishawamina ukwikalila fye ukulatontonkanya ukuti inshiku sha kale shaliweme ukucila isha nomba? Ukulafuluka inshiku sha kale ukucila mu cipimo, kuti kwalenga twalaibukisha fye ifisuma ifyalecitika kale. Nelyo kuti kwalenga twalaba ne fyabipa ifyalecitika kale. Ku ca kumwenako, tontonkanyeni pa fyacitile abena Israele. Ilyo fye bafumine mu Egupti balilabile bwangu ifyo balecula. Lelo babikile sana amano ku fya kulya ifisuma ifyo baleipakisha. Batile: “Twaibukisha isabi twalelya mu Egupti apa fye, ifibimbi ne fitangamenshi na liiki na kanyense na galiki!” (Impe. 11:5) Bushe ca cine baleipakisha ifi ifya kulya apa fye? Awe. Abena Israele balecula sana pali ilya nshita, pantu bali basha mu Egupti. (Ukufu. 1:13, 14; 3:6-9) Na lyo line, balilabile kuli fyonse ifyo balecula no kutendeka ukufuluka inshiku sha ku numa. Babikile fye amano ku fyo baleipakisha kale, ukucila ukubika amano ku fisuma ifyo Yehova abacitiile. Yehova alikalipe pa fyo bacitile.—Impe. 11:10.
7. Cinshi ca-afwile nkashi umo ukukanaikatwa mu citeyo ca kulafuluka ifya ku numa ukucila mu cipimo?
7 Kuti twacita shani pa kuti tuicingilile ku citeyo ca kufuluka ifya kale ukucila mu cipimo? Tontonkanyeni pali nkashi uwatendeke ukubombela pa Bethel ya mu Brooklyn mu 1945. Ilyo papitile imyaka alyupilwe kuli munyinefwe uwalebombela pa Bethel, kabili balibombele pa Bethel imyaka iingi. Na lyo line, mu 1976 umwina mwakwe alilwele. Uyu nkashi alandile ukutila ilyo umwina mwakwe aishibe ukuti ali mupepi no kufwa, alimwebele ifyali no kumwafwa ukushipikisha nga aba mukamfwilwa. Amwebele ati: “Mu cupo cesu mwali insansa. Te fyo ciba ku bengi.” Lyena amwebele no kuti: “Wilatontonkanya pa fya ku numa, nangu line wakulafibukisha. Mu kupita kwa nshita ukaba fye bwino. Tekwesha ukukalipa no kulaililila ubulanda. Ulesekelela pa fyo waipakisha na mapaalo wakwata. . . . Ukwibukisha ifya kale bupe ubo Lesa atupeela.” Ifi bamwebele fyali no kumwafwa nga nshi.
8. Bushe ifyo nkashi yesu bamwebele ku mwina mwakwe fyamwafwile shani ukukanafuluka ifya kale ukucila mu cipimo?
8 Nkashi yesu alikonkele ifyo bamwebele ku mwina mwakwe. Alitwalilile ukubombela Yehova ne cishinka ukufikila ilyo afwile ninshi ali ne myaka 92. Ilyo kwashele imyaka iinono ukuti uyu nkashi afwe, atile: “Nga natontonkanya pa myaka 63 iyo nabombela Yehova umulimo wa nshita yonse, kuti natila nali-ipakisha ubumi icine cine.” Cinshi nkashi alandile ifi? Atile: “Icilenga sana tuleipakisha ubumi bwananyina bushaiwamina ne subilo lya kwikala pamo na bamunyinefwe mu paradaise pano pene pe sonde, ukulabombela Kalenga wesu Uwapulamo, Yehova, Lesa umo fye uwa cine, ku ciyayaya conse.” * Kuti twasambilila ifingi kuli uyu nkashi uwatwalilile fye ukulolesha ku ntanshi.
ICITEYO CA KULAENDA NE CIKONKO KU MUKOSHI
9. Ukulingana na Ubwina Lebi 19:18, ni lilali nalimo cingatukosela ukwelela uwatukalifye?
9 Belengeni Ubwina Lebi 19:18. Ilingi line cilatukosela ukuleka ukwenda ne cikonko ku mukoshi nga ca kuti uwatulufyenye Mwina Kristu munensu, ni cibusa wesu, nelyo ni lupwa wesu. Ku ca kumwenako, nkashi umo balimubepeshe ku wa bwananyina ukuti alibile indalama. Lyena pa numa nkashi uwamubepeshe alilombele ubwelelo, lelo nkashi uo bakalifye atwalilile fye ukutontonkanya pa fyacitike. Bushe mwalibala amumfwapo nge fyo uyu nkashi aumfwile? Nangu ca kuti tabatubepeshapo ubufi bwa musango uyu, fwe bengi nalimo twalitontonkanyapo ukuti tatwakatale atwelela uwa bwananyina uwatukalifye.
10. Finshi fingatwafwa ukukanalaenda ne cikonko ku mukoshi?
10 Finshi fingatwafwa ukukanalaenda ne cikonko ku mukoshi? Tufwile ukulaibukisha ukuti Yehova alamona fyonse. Aleshiba fyonse ifitucitikila, ukubikako ne fyo batufyenga. (Heb. 4:13) Alomfwa ububi nga tulecula. (Esa. 63:9) Kabili alitulaya ukuti akafumyapo fyonse ifyabipa ifitucitikila pa mulandu wa lufyengo.—Ukus. 21:3, 4.
11. Bushe tunonkelamo shani nga ca kuti twabelela uwatukalifye uluse?
11 Na kabili tufwile ukulaibukisha ukuti nga twaleka ukwenda ne cikonko ku mukoshi ni fwe tunonkelamo. Ifi fine e fyo na nkashi uo babepeshe ukuti naiba indalama aishileishiba. Mu kupita kwa nshita, alilekele ukwenda ne cikonko. Alilwike ukuti nga tulebelela abantu uluse, Yehova na o akulatubelela uluse. (Mat. 6:14) Alishibe ukuti ifyo nkashi nankwe acitile tafyali bwino, lelo asalilepo fye ukumubelela uluse, no kuleka ukwenda ne cikonko ku mukoshi. Icafuminemo ca kuti nkashi yesu ali ne nsansa kabili alitwalilile ukubombela Yehova.
ICITEYO CA KULASAKAMIKWA SANA PA FYO TWALUFYENYE KALE
12. Finshi tusambilila pe lembo lya kwa 1 Yohane 3:19, 20?
12 Belengeni 1 Yohane 3:19, 20. Inshita shimo bonse fye tulomfwa ububi. Ku ca kumwenako, bamo balomfwa ububi pa fyabipa ifyo balecita ilyo bashilasambilila icine. E lyo bambi balomfwa ububi pa mulandu wa fyo balufyenye ninshi balibatishiwa. (Rom. 3:23) Ca cine ukuti tatufwaya ukulufyanya. Lelo “bonse tulaipununa imiku iingi.” (Yako. 3:2; Rom. 7:21-23) Nangu ca kuti tatumfwa bwino ukusakamikwa pa fyabipa ifyo twacitile, ukumfwa ububi pa fyo twacitile kuti kwatwafwa. Cinshi twalandila ifi? Pantu ukumfwa ububi kuti kwalenga twalungika icilubo cesu, kabili kuti kwatwafwa ukulafwaisha ukukanabwekeshapo icilubo twacitile.—Heb. 12:12, 13.
13. Cinshi tulingile ukuicingililila ku citeyo ca kulasakamikwa sana pa fyabipa ifyo twacitile kale?
13 Inshita shimo kuti twatwalilila ukusakamikwa pa fyo twalufyenye, nangu ca kuti twalilapila kabili Yehova alitwelela. Ukutwalilila ukusakamikwa sana pa fyo twalufyenye kale takwawama. (Amalu. 31:10; 38:3, 4) Cinshi twalandila ifi? Tontonkanyeni pali nkashi umo uwatwalilile ukumfwa ububi pa fyabipa ifyo acitile kale. Atile: “Naleumfwa ukuti ukubombesha mu mulimo wa kwa Yehova kuicusha fye, pantu nalimo Yehova takanjelele.” Nalimo fwe bengi twalyumfwapo ifyo uyu nkashi aleumfwa. Kanshi calicindama ukuicingilila ku citeyo ca kulasakamikwa sana pa fyabipa ifyo twacitile kale. Mulandu nshi? Pantu Satana kuti atemwa nga twaleka ukubombela Yehova, nangu ca kuti Yehova alitwelela.—Linganyeniko 2 Abena Korinti 2:5-7, 11.
14. Kuti twashininkisha shani ukutila Yehova alafwaya ukutubelela uluse nga twalufyanya?
14 Nalimo kuti twayipusha atuti, ‘Kuti nashininkisha shani ukuti Yehova alimbelela uluse?’ Nga twayipusha ici cipusho, ninshi cilelanga fye ukuti Yehova kuti atwelela. Imyaka iingi ku numa, Ulupungu lwa kwa Kalinda lwatile: “Inshita shimo kuti twatwalilila ukubwekeshapo ukucita icilubo cimo cine. Nalimo icingalenga ni co twalifilwa ukuleka ukucita fimo ifyo twalecita ilyo tushilatendeka ukubombela Lesa. . . . Tamufwile ukufuupuka. Mwilamona kwati mwalicita ulubembu ulo Yehova ashingelela. Satana afwaya mulemona kwati Yehova te kuti amubelele uluse. Nga mwaumfwa ububi ilyo mwalufyanya, ninshi cilelanga fye ukuti tamuli bantu ababi kabili Yehova kuti amubelela uluse. Mufwile ukuba abaicefya no kutwalilila ukulomba Lesa ukuti amubelele uluse, pa kuti mube na kampingu iyasanguluka na kabili, na pa kuti mwikabwekeshapo ukucita icilubo cimo cine. Nga filya fine umwana umunono atwalilila ukweba bawishi ukuti bamwafwe pa bwafya bumo bwino, na imwe mufwile ukutwalilila ukulomba Yehova ukuti alemwafwa, kabili akamwafwa pantu aliba ne cikuuku.” *
15-16. Bushe abantu bamo bomfwa shani nga baishiba ukuti Yehova kuti ababelela uluse?
15 Abantu ba kwa Yehova abengi balatemwa ukwishiba ukuti Yehova kuti abelela. Ku ca kumwenako, imyaka iinono ku numa, munyinefwe umo alikoseleshiwe ilyo abelengele ilyashi ilyali mu cipande citila “Baibolo Ilaalula Abantu.” Muli ici cipande mwali ilyashi lya kwa nkashi uwalemona kwati Yehova te kuti amutemwe pa mulandu ne fyabipa ifyo alecita kale. Na lintu abatishiwe, pa myaka iingi uyu nkashi alitwalilile ukumfwa ububi. Nomba ilyo atontonkenye sana pa cilubula, alishileishiba ukuti Yehova alimutemwa. *
16 Bushe ili lyashi lya-afwile shani munyinefwe? Uyu munyinefwe alembele ukuti: “Ilyo nali umwaice naletamba sana ifye shiku. Nomba line nalitambilepo ifye shiku na kabili. Nalyebele baeluda ukuti bangafwe pali ubu bwafya, kabili nde-esha na maka ukupwisha ubu ubwafya. Baeluda banjebele ukuti Lesa alintemwa, kabili kuti ambelela uluse. Lelo inshita shimo ndaimona uwa cabecabe, imona kwati Lesa te kuti antemwe. Ifyo nabelengele pa fyacitikiile [uyu nkashi] fyalingafwa sana. Nomba nalishiba ukutila nga ndetontonkanya ukuti Lesa te kuti anjelele, ninshi cimo no kulanda ukuti ilambo lya Mwana wakwe te kuti lifuute imembu shandi. Nalisunga ici icipande pa kuti ndecibelenga no kutontonkanyapo lyonse ilyo natendeka ukuyumfwa ukuti nshalinga ukupepa Lesa.”
17. Bushe umutumwa Paulo aicingilile shani ku citeyo ca kusakamikwa sana pa fyabipa ifyo acitile kale?
17 Amalyashi ya musango uyu yalatwibukishako ifyo cali ku mutumwa Paulo. Ilyo ashilaba Umwina Kristu, alicitile imembu ishikalamba ishingi. Paulo aleibukisha ifyabipa ifyo acitile, lelo taleikalila fye ukulatontonkanya pali ifi fintu. (1 Tim. 1:12-15) Alishibe ukuti Lesa kuti amwelela, pantu alemona icilubula ukuti bupe ubo Lesa amupeele. (Gal. 2:20) Kanshi Paulo ali-icingilile ku citeyo ca kusakamikwa sana pa fyabipa ifyo acitile kale, kabili abikile sana amano ku kubombela Yehova apapelele amaka yakwe.
MULETONTONKANYA SANA PA CALO CIPYA!
Tufwile ukulalolesha fye ku ntanshi (Moneni paragrafu 18 na 19) *
18. Finshi twasambilila muli cino cipande?
18 Finshi twasambilila ku fiteyo ifyo twalandapo muli cino cipande? (1) Ukwibukisha ifisuma ifyalecitika kale bupe ubo Yehova atupeela. Nomba nangu ifyalecitika kale fingawama shani, te kuti ficile pa bumi ubusuma ubo tukaipakisha mu calo cipya. (2) Bamo kuti batulufyanya, lelo nga twasalapo ukubelela, tukatwalilila ukubombela Yehova. (3) Ukusakamikwa sana pa fyabipa ifyo twacitile kale kuti kwalenga twalafilwa ukubombela Yehova ne nsansa. Kanshi nga filya Paulo acitile, na ifwe tufwile ukusumina ukuti Yehova alitwelela.
19. Twaishiba shani ukuti mu calo cipya tatwakaleibukisha ifikalalenga twaumfwa ububi?
19 Twalikwata isubilo lya kwikala umuyayaya. Kabili mu calo cipya ica kwa Lesa tatwakaleibukisha ifikalalenga twaumfwa ububi. Baibolo ilanda pali ilya inshita ukuti: “Ifya kale . . . tafyakese na mu mutima.” (Esa. 65:17) Tontonkanyeni pali ici: Bamo twalibombela Yehova ica kuti no kukota na tukota, lelo mu calo cipya tukabwelela ku bulumendo. (Yobo 33:25) Kanshi twilatontonkanya sana pa fya ku numa, lelo tuletontonkanya sana pa fyo cikaba mu calo cipya. Kabili tufwile ukwesha apo twingapesha ukulacita ifikalenga tukabemo!
ULWIMBO 142 Twikatishe Isubilo Twakwata
^ para. 5 Tacabipa ukwibukisha ifyo cali kale. Nomba tatulingile ukubika sana amano ku fya kale ica kuti twafilwa no kubombela bwino Yehova ino nshita, nelyo twaleka ukutontokanya pa fisuma ifyo atulaya. Muli cino cipande twalalanda pa fiteyo fitatu ifingalenga twalatontonkanya sana pa fya kale. Twalalanda na pa mashinte ya mafunde ya mu Baibolo e lyo na pa fya kumwenako fya muno nshiku ifingatwafwa ukukanaikatwa muli ifi ifiteyo.
^ para. 14 Moneni Ulupungu lwa kwa Kalinda ulwa ciNgeleshi ulwa February 15, 1954, ibu. 123.
^ para. 58 UBULONDOLOSHI BWA CIKOPE: Ukulafuluka ifya kale ukucila mu cipimo, ukulaenda ne cikonko ku mukoshi, no kulasakamikwa sana pa fyabipa ifyo twacitile kale, fyaba kwati fisendo ifyafina ifingalenga twalafilwa ukwenda bwino mu nshila iyaya ku bumi.
^ para. 65 UBULONDOLOSHI BWA CIKOPE: Nga twalekelako kuli ifi ifyaba nge fisendo, tukomfwa bwino, tukaba ne nsansa kabili tukaba na maka na kabili. Ici cikalenga tukalelolesha fye ku ntanshi.
