1-2. ?Olsem wanem yumi save folem advaes we i stap long Ol Proveb 4:25? Talem wan eksampol.

TRAEM tingbaot trifala situesen ya. Wan olfala sista i stap tingbaot ol gudfala taem we hem i bin gat taem hem i yangfala. Nating se laef blong hem naoia i had, hem i gohed blong mekem bes blong hem long wok blong Jehova. (1 Kor. 15:58) Evri dei hem i stap tingbaot taem we hem mo famle blong hem oli laef wanples long niufala wol we God i promes long hem. Wan nara sista i tingbaot taem ya we wan Kristin i mekem hem i harem nogud, be hem i jusum blong no holemtaet kros. (Kol. 3:13) Wan brata i tingbaot ol mastik we hem i bin mekem, be hem i putum tingting blong hem i stap fulwan long wanem we hem i save mekem naoia blong holemstrong long Jehova.—Sam 51:10.

² ?Wanem i sem mak long ol trifala Kristin ya? Olgeta evriwan oli tingbaot samting we i hapen long olgeta bifo, be oli no traem tingbaot ol samting ya oltaem. Defren olgeta, oli “lukluk i go stret nomo” long fiuja.—Ridim Ol Proveb 4:25.

3. ?From wanem yumi mas “lukluk i go stret nomo” long fiuja?

³ ?From wanem i impoten blong “lukluk i go stret nomo” long fiuja? Wan man i no save wokbaot stret sipos oltaem hem i stap lukluk i go biaen. Long sem fasin, yumi no save gohed blong mekem wok blong Jehova fulwan sipos oltaem yumi stap tingbaot ol samting we oli hapen long laef blong yumi bifo.—Luk 9:62.

4. ?Long stadi ya bambae yumi tokbaot wanem?

⁴ Stadi ya bambae i tokbaot tri trap we i save mekem se yumi  stap tingbaot nomo ol samting blong bifo. I gat: (1) rigret mo wis se laef i olsem bifo, (2) holemtaet kros, mo (3) filim gilti bitim mak from mastik we i pas finis. Long ol wanwan situesen ya, bambae yumi luk olsem wanem ol rul blong Baebol oli save halpem yumi blong no tingbaot “ol samting we oli stap biaen,” be blong putum tingting i stap long “ol samting we oli stap long fored.”—Fil. 3:13.

5. ?Prija 7:10 i wonem yumi long wanem trap?

⁵ Ridim Prija 7:10. Makem we vas ya i no talem se i rong blong askem se: “?From wanem ol dei we oli pas finis, oli gud?” From we ol gudfala memori oli presen we i kam long Jehova. Be hem i se: “Yu no mas talem se: ‘?From wanem ol dei we oli pas finis oli gud moa long hemia?’” Taswe, trap i stap taem yu skelem laef blong yu bifo wetem hemia blong naoia, mo yu talem se laef blong yu naoia i mowas. Wan narafala Baebol i transletem vas ya se: “Yu neva mas askem se, ‘O, ?from wanem ol samting blong bifo oli gud moa?’ Hemia i no wan waes kwestin.”

6. ?From wanem i no waes blong gohed blong tingbaot se laef bifo i gud moa? Talem wan eksampol.

⁶ ?From wanem i no waes blong gohed blong tingbaot se laef blong yumi bifo i gud moa? Fasin ya blong rigret mo wis se laef i olsem bifo, i save mekem yumi tingting nomo long ol gudfala samting blong bifo, be yumi fogetem ol nogud samting we i bin hapen. Traem tingbaot eksampol blong ol man Isrel. Afta we oli aot long Ijip, kwiktaem nomo oli fogetem hadlaef we oli bin gotru long hem. Nao tingting blong olgeta i stap nomo long ol gudfala kakae we oli bin harem gud long hem. Oli stap talem se: “!Mifala i tingbaot se long Ijip, mifala i stap kakae fis we mifala i no pem, wetem ol kukamba, ol wota melen, ol grin onion, ol onion, mo lae!” (Nam. 11:5) ?Be i tru se oli “no pem” ol kakae ya? Nogat. Ol man Ijip oli fosem olgeta blong wok slef mo oli safa bigwan. (Eks. 1:13, 14; 3:6-9) Be yet, oli fogetem ol hadtaem ya we oli kasem mo oli wis se oli laef olsem bifo. Oli jusum blong tingbaot “ol  gudtaem blong bifo,” bitim we oli putum tingting long ol gudfala samting we Jehova i jes mekem long olgeta. Jehova i no glad nating long fasin ya blong olgeta.—Nam. 11:10.

7. ?Wanem i halpem wan sista blong i no stap tingting tumas long samting we i hapen bifo?

⁷ ?Olsem wanem blong no foldaon long trap ya blong rigret mo wis se laef i olsem bifo? Tingbaot eksampol blong wan sista we i wok long Betel long Brooklyn stat long 1945. Sam yia biaen, hem i maredem wan Betelaet, mo tufala i wok tugeta blong plante yia. Be long 1976, hasban blong hem i sik. Sista ya i talem se, taem hasban blong hem i save se i no longtaem bambae hem i ded, hem i givim sam gudfala advaes long hem. Brata ya i talem long waef blong hem se: “Yumitu haremgud long mared blong yumitu. Smol man nomo i gat janis blong gat wan mared olsem.” Be hem i talem tu se: “Yu no mas stap tingbaot ol samting blong bifo—nating se bambae memori blong yu i stap yet. Taem we i pas bambae i halpem yu blong haremgud bakegen. Yu no mas kros no harem sore long yu wan. Yu mas glad long ol gudfala taem mo ol blesing we yu bin kasem. Smol taem i mas pas [fastaem], nao bambae yu glad blong rimemba ol samting blong bifo. . . . Memori i wan presen we God i givim long yumi.” ?Yu no ting se hemia i wan gudfala advaes?

8. ?Wanem blesing we sista ya i kasem from i no stap tingbaot nomo ol samting blong bifo?

⁸ Sista ya i folem advaes blong hasban blong hem. Hem i gohed blong mekem wok blong Jehova kasem we hem i ded taem i gat 92 yia. Sam yia bifo we hem i ded, hem i se: “Taem mi luklukbak long ol 63 yia we mi bin wok fultaem blong Jehova, mi save talem we mi gat wan nambawan laef.” ?From wanem? Hem i eksplenem se: “Samting we i rili mekem mi mi haremgud long laef blong mi, hemia ol gudfala brata sista, mo hop ya we mi gat blong laef blong olwe wetem olgeta long paradaes long wol. Long ples ya, bambae yumi wok blong Bigman  we i Wokem yumi, trufala God ya, Jehova, blong olwe.” * !Hemia wan nambawan eksampol blong lukluk i go stret nomo long fiuja!

9. Folem Levitikas 19:18, ?wetaem i had moa blong no holemtaet kros?

⁹ Ridim Levitikas 19:18. Plante taem i had blong no holemtaet kros, antap moa sipos man we i mekem yumi kros i wan Kristin brata sista, wan gudfala fren, o wan famle. Eksampol, wan sista i talem se wan nara sista long kongregesen i stilim mane blong hem, be biaen hem i luksave se hem i mestem mo i talem sore. Be nara sista ya i kros mo i no stop blong tingbaot samting we i bin hapen. ?Yu yu bin gat sem filing olsem finis? Nating se yumi no fesem sem situesen olsem, plante long yumi i kam kros mo yumi harem se i had blong fogivim man we i mekem yumi kros.

10. ?Wanem i save givhan taem yumi stap kros long narafala?

¹⁰ ?Wanem i save givhan taem yumi stap kros long narafala? Yumi mas rimemba se Jehova i luk evri samting. Hem i save evri samting we yumi stap gotru long hem, olsem taem man i mekem i no stret long yumi. (Hib. 4:13) Hem i harem nogud taem yumi safa. (Aes. 63:9) Mo hem i promes se bambae i finisim ol nogud samting ya we oli stap mekem yumi safa.—Rev. 21:3, 4.

11. ?Wanem gudfala samting i kamaot taem yumi lego kros?

¹¹ Yumi mas tingbaot tu se taem yumi lego kros, bambae yumi haremgud moa. Hemia nao samting we sista ya i lanem, afta we hem i naf blong lego kros blong hem. Hem i makem se taem yumi fogivim narafala, Jehova tu i fogivim yumi. (Mat. 6:14) Hem i save se samting we nara sista ya i mekem i rong, be hem i jusum blong no holemtaet kros. Frut we i kamaot se sista ya blong yumi i kasem moa glad, mo i naf blong putum tingting blong hem i stap fulwan long wok we hem i mekem long Jehova.

12. ?Yumi lanem wanem long 1 Jon 3:19, 20?

¹² Ridim 1 Jon 3:19, 20. I nomol blong filim gilti from mastik we yu bin mekem. Eksampol, samfala oli filim gilti from ol samting we oli bin mekem bifo we oli lanem trutok. Sam narafala oli filim gilti from ol mastik we oli mekem afta we oli baptaes. Mo i nomol blong gat ol filing olsem. (Rom 3:23) I tru, yumi wantem mekem samting we i stret. Be “yumi evriwan i stambol plante taem.” (Jem. 3:2; Rom 7:21-23) Nating se yumi no laekem filing ya blong gilti, be filing ya i save givhan long yumi. ?From wanem? From we i save halpem yumi blong mekem sam jenis long laef, mo gat strong tingting blong no mekem ol sem mastik ya bakegen.—Hib. 12:12, 13.

13. ?From wanem yumi mas lukaotgud blong no foldaon long trap ya blong filim gilti bitim mak?

¹³ Be samtaem yumi save gohed blong filim gilti bitim mak, nating se yumi tanem tingting blong yumi, mo Jehova i soem se hem i fogivim yumi finis. (Sam 31:10; 38:3, 4) ?Olsem wanem samting ya i save hapen? Tingbaot eksampol blong wan sista we oltaem i filim gilti from ol nogud samting we i mekem bifo. Hem i se: “Mi harem se i blong nating nomo we mi stap traehad blong mekem moa long wok blong Jehova, from we i let finis blong hem i sevem mi.” Ating plante long yumi i gat sem filing olsem. Taswe i impoten we yumi lukaotgud blong no foldaon long trap ya blong filim gilti bitim mak. ?From wanem? From we Setan bambae i glad tumas sipos yumi stop blong mekem wok blong Jehova, nating we Jehova i fogivim yumi finis.—Skelem 2 Korin 2:5-7, 11.

14. ?Olsem wanem yumi sua se Jehova i no lego yumi?

 ¹⁴ Yet, maet yumi stap tingting se: ‘?Olsem wanem mi sua se Jehova i no lego mi?’ Taem yumi askem kwestin ya, long semtaem yumi stap ansarem kwestin ya tu. Plante yia bifo, Wajtaoa i talem se: “Maet bifo yumi stap mekem ol sem mastik bakegen mo bakegen we yumi no luksave bifo we yumi stat blong mekem wok blong Jehova. . . . Be yumi no mas lusum hop. Yumi no mas ting se yumi mekem wan sin we Jehova bambae i neva save fogivim. Hemia nao tingting we Setan i wantem se yumi gat. Taem yu stap harem nogud mo yu tingting plante, hemia i soem se mastik blong yu i no bitim mak. Yu neva mas kam taed blong gat tingting daon mo askem God blong i fogivim yu, klinim hat blong yu mo halpem yu. Yu toktok long hem olsem wan pikinini we i toktok long papa blong hem taem i kasem trabol, nating se hem i mekem sem mastik plante taem. Long rod ya, Jehova bambae i halpem yu from we hem i kaen tumas.” *

15-16. ?Samfala oli harem olsem wanem taem oli luksave se Jehova i no lego olgeta?

¹⁵ Plante man blong Jehova oli haremgud blong save se Jehova i no lego olgeta. Eksampol, sam yia i pas, wan brata i haremgud long wan stori we i stap long atikol ya, “Baebol i Jenisim Laef.” Long atikol ya, wan sista i talem se from rabis ekspiriens blong hem bifo, i had blong hem i bilivim se Jehova i lavem hem. Nogud filing ya i stap long hem blong plante yia, iven afta we i baptaes. Be taem hem i stat blong tingting dip long ransom, tingting blong hem i jenis. *

¹⁶ ?Olsem wanem stori blong sista ya i gat paoa long brata? Brata ya i se: “Taem mi yangfala, mi gat fasin ya blong lukluk ponografi. Mo naoia, mi stap lukluk bakegen. Mi askem help blong ol Kristin elda, nao mi winim problem ya. Oli halpem mi blong luksave se God i lavem mi mo i sore long mi. Be yet, samtaem mi harem se mi nating nomo, mo se Jehova i no lavem mi. Stori blong sista ya i rili halpem mi. Naoia mi luksave se taem mi gat tingting  ya se God i no save fogivim mi, i olsem we mi stap talem se sakrefaes blong Pikinini blong hem i no naf blong kavremap ol sin blong mi. Mi katemaot atikol ya blong mi save ridim mo tingting dip long hem, taem ol nogud filing ya oli kambak long mi.”

17. ?Olsem wanem Pol i lukaotgud blong no foldaon long trap ya blong filim gilti bitim mak?

¹⁷ Ol stori olsem oli mekem yumi tingbaot aposol Pol. Hem i bin mekem sam bigfala sin bifo we i kam wan Kristin. Pol i tingbaot ol nogud samting ya we hem i bin mekem, be hem i no traem tingbaot ol samting ya oltaem. (1 Tim. 1:12-15) Hem i luk ransom olsem wan presen we i kam long hem stret. (Gal. 2:20) Pol i lukaotgud blong no foldaon long trap ya blong filim gilti bitim mak, be hem i putum tingting blong hem i stap fulwan long wok blong Jehova mo i givim beswan blong hem.

18. ?Yumi lanem wanem long stadi ya?

¹⁸ ?Yumi lanem wanem afta we yumi tokbaot ol trifala trap long stadi ya? (1) Ol gudfala memori oli blesing we i kam long Jehova. Be nating se laef blong yumi bifo i gud we i gud, laef blong yumi long fiuja long niufala wol bambae i gud moa. (2) Ol narafala oli save mekem yumi kros, be taem yumi jus blong fogivim olgeta, yumi naf blong gohed blong mekem wok blong Jehova. (3) Taem yumi filim gilti bitim mak, hemia i save blokem yumi blong mekem wok blong Jehova wetem glad. Taswe olsem Pol, yumi mas bilif fulwan se Jehova i fogivim yumi finis.

19. ?Olsem wanem yumi save se long niufala wol bambae yumi no moa rigret from ol samting blong bifo?

¹⁹ Yumi gat hop blong laef foreva. Mo long niufala wol ya blong God, bambae yumi no moa rigret from ol samting blong bifo. Baebol tu i tokbaot taem ya se: “Ol man bambae oli no moa tingbaot ol samting blong bifo.” (Aes. 65:17) Traem tingbaot: Sam long yumi oli mekem wok blong Jehova kasem we oli kam olfala, be long niufala wol, bambae yumi kam yangfala bakegen. (Job 33:25) Taswe yumi wantem gat strong tingting blong no tingbaot oltaem ol samting blong bifo. !Be, yumi lukluk i go nomo long fiuja mo mekem bes blong yumi blong stap long taem ya!