1-2. Uga carana ndalanken nasehat bas Kuan-kuanen 4:25? Ban contohna.

BAYANGKEN telu contoh enda. Sekalak turang senina si enggo metua ngukuri uga riahna akapna mbarenda sanga ia nguda denga. Aminna pe gundari melala tentangen si iadapina, tapi terus iusahakenna asa ngasupna ngelayani Jahwe. (1 Kor. 15:58) Tiap wari ibayangkenna dirina, keluargana, bage pe teman-temanna nggeluh bas Pardis. Contoh si deban, iinget sekalak turang senina uga kitikna ukurna iban turang seninana bas runggun, tapi iusahakenna gelah la terus ngukurisa. (Kol. 3:13) Lit ka sekalak turang senina si nginget kesalahenna si mbarenda, tapi gundari iusahakenna kel gelah banci tetap setia man Jahwe.​—Msm. 51:10.

² Kai si seri arah teluna turang seninata enda? Inget kalak e kai si pernah terjadi, tapi la terus iukurina. Sebalikna, ‘pinter itatapna ku lebe’ eme wari si pepagi.​—Baca Kuan-kuanen 4:25, NW.

3. Engkai maka perlu ‘pinter sitatap ku lebe’ eme natap wari si pepagi?

³ Engkai maka penting ‘pinter sitatap ku lebe’ eme natap wari si pepagi? Kalak si tatapna ku pudi la banci pinter perdalanna, bage ka pe kita bas ngelayani Jahwe. La banci tutus ateta ngelayani Jahwe adi lalap siukuri kai si pernah terjadi ntah pe kai si pernah silakoken mbarenda.​—Luk. 9:62.

4. Kai kari sibahas bas artikel enda?

⁴ Bas artikel enda, sibahas kari kai saja si banci erbanca terus siukuri kai si pernah terjadi mbarenda. Kai saja e? (1) bagi si mbarenda ateta lalap kegeluhenta, (2) terus siinget kesalahen kalak, ras (3) lalap salah siakap banta. Sibahas kari uga nasehat Pustaka banci nampati kita gelah la terus siukuri kai si “arah pudi,” tapi si terus siukuri “kai si arah lebe.”​—Pil. 3:13.

5. Menurut Pengerana 7:10, kai si la banci sikataken?

⁵ Baca Pengerana 7:10. Menurut ayat enda labo salah adi sisungkun bagenda, “Engkai maka mehuli kegeluhenta si mbarenda?” Ingeten si mehuli sada pemere i bas Jahwe nari. Sebalikna i bas ayat e ikataken, “Ola sungkun, ‘Engkai maka ulin si nai asangken si genduari?’” Enda ertina, arus kita hati-hati gelah la sibandingken kegeluhenta si mbarenda ras kegeluhenta si gundari. Janah ula siakap maka kerina si lit gundari enda la mehuli.

6. Engkai maka la cocok adi siukuri lalap kegeluhenta si mbarenda? Ban contohna.

⁶ Engkai maka la cocok adi siukuri maka ulin siakap kegeluhenta si mbarenda? Adi bagi si mbarenda ateta lalap kegeluhenta, banci jadi si mehulina saja ngenca lalap siinget janah si la mehuli silupaken. Cuba ukuri contoh bangsa Israel si mbarenda. Kenca itadingken kalak e Mesir, mis ilupakenna uga serana kegeluhenna mbarenda. Pangan si entabeh saja ngenca lalap si ingetna, nina, “Adi i Mesir biasa kita rate-ate man nurung, janah la nukur pe. Ma siinget denga kin biasa lit i bas kita cimen, mandike, pere, pia, lasuna?” (Bil. 11:5) Tapi payo nge la ‘nukur kerina’ pangan si ipanna? Lang. Meherga kel si arus igalari kalak e, arus kalak e jadi budak i Mesir. (Kel. 1:13, 14; 3:6-9) Tapi, ilupaken kalak e uga serana kegeluhenna e. Tedeh atena lalap kegeluhenna si mbarenda janah si mehulina saja si terus iukurina. La iukurina kai si mehuli si enggo ibereken Jahwe man bana. Nembeh ate Jahwe ngidahsa.​—Bil. 11:10.

7. Kai si banci nampati turang seninata gelah la terus iukurina kegeluhenna si mbarenda?

⁷ Uga carana gelah la lalap siukuri kegeluhenta si mbarenda? Cuba ukuri pengalamen sekalak turang seninata si mulai ngelayani bas Betel Brooklyn tahun 1945. Piga-piga tahun kenca si e, erjabu ia ras sekalak turang senina si erdahin ka bas Betel. Ertahun-tahun dekahna kalak e ngelayani i je. Tapi bas pertengahen  tahun 1976, sakit perbulangenna. Sanga nandangi mate, ibereken perbulangenna piga-piga nasehat guna mpegegehi ia. Nina perbulangenna, “Ermeriah ukur kel kita sedekah enda bas perjabunta. Jarang kalak ngenanamisa bage.” Nina ka, “Memang la terlupakenndu kari kai si enggo pernah sidalani. Tapi ula terus iukurindu kerna si e. Reh dekahna malem nge kari pusuhndu. Ula terus kitik ukurndu ntah pe ceda atendu. Ngata bujurlah kam perban enggo sigejapken keriahen ukur sedekah enda janah melala sidat pasu-pasu sanga silayani Jahwe. . . . Adi ingetndu kerina e pasti meriah ukurndu perban e rehna i bas Dibata nari.” Tuhu-tuhu nasehat si mehuli.

8. Kai manpaatna perban idalanken turang seninata nasehat arah perbulangenna?

⁸ Idalanken turang seninata enda nasehat arah perbulangenna. Terus ia setia ngelayani Jahwe seh ngasa ia mate bas umur 92 tahun. Piga-piga tahun sope ia mate, bagenda nina, “Adi kuinget mulihi 63 tahun aku ngelayani Jahwe i bas dinas sepenuh waktu, banci kukataken maka tuhu-tuhu puas kel kuakap.” Engkai? Nina, “Si erbanca puas kuakap, perban aku jadi bagin sada keluarga arah turang seninata si luar biasa, janah lit arapen kami banci ngelayani Penciptata eme Dibata Jahwe, Dibata si benar, seh rasa lalap bas pardis i doni.” * Melala si banci sipelajari arah turang seninata si terus ngukuri janji-janji Jahwe e. 

9. Menurut Imamat 19:18, biasana kai nge si erbanca mesera siakap ngampuni kalak si enggo erban kita kecewa?

⁹ Baca Imamat 19:18. Mon-mon mesera siakap ngampuni kalak si erban kitik ukurta, terlebih adi ia turang seninata bas runggun, kalak si rembak ras kita, ntah pe anggota keluargata. Contohna,  lit sekalak turang senina ituduh nangko sen. Si nuduhsa eme turang seninana si lit bas runggunna. Bas pudi wari, mindo maaf si nuduhsa ndai perban enggo ietehna maka labo turang seninata e si nangkosa. Tapi perban kecewa kel turang senina si ituduh ndai, terus iukurina kerna si e. Pernah nge bage perasanndu? Banci saja pernah, aminna pe labo seri situasina. Enterem arah kita pernah kecewa iban kalak janah la mungkin siakap banci silupaken kesalahenna e. 

10. Kai si banci nampati kita gelah la terus siinget kesalahen kalak si deban?

¹⁰ Kai si banci nampati kita gelah la terus siinget kesalahen kalak si deban? Arus siinget maka idah Jahwe kerinana. ItehNa kai si terjadi man banta. Janah idahNa sanga la adil perbahanen kalak man banta. (Heb. 4:13) Susah iakapNa sanga susah siakap. (Jes. 63:9) Emaka erjanji Ia imasapkenNa kari kerina si banci erban kitik ukurta, termasuk perbahanen si la adil.​—Ket. 21:3, 4.

11. Kai gunana adi nggit kita ngampuni?

¹¹ Perlu ka siinget maka adi siampuni kalak si deban, banci reh tenangna pusuhta. E me si terjadi man sekalak turang seninata si enggo ituduh ndai. Dungna, banci iampunina kalak si nuduh ia. Isadarina maka adi nggit kita ngampuni kalak si deban, Jahwe pe nggit ngampuni kita. (Mat. 6:14) Aminna pe salah iakapna kai si ilakoken kalak si nuduh ia ndai, tapi nggit ia ngampunisa. Asilna, reh riahna me ukurna janah terus ilayanina Jahwe.

12. Kai si banci sipelajari arah 1 Johanes 3:19, 20?

¹² Baca 1 Johanes 3:19, 20. Banci saja pernah salah siakap banta. Contohna, salah siakap banta perban kesalahen si pernah silakoken sope erlajar kebenaren ntah pe kenca iperidiken. Situhuna, wajar nge perasan si bage. (Rom. 3:23) Memang silakoken ateta kai si mehuli, tapi “kerina kita rusur erban salah.” (Jak. 3:2; Rom. 7:21-23) Terganggu nge kita adi salah siakap banta, tapi situhuna e mereken pengaruh si mehuli. Engkai? Perban perasan si bage banci erban tersuruh ukurta berubah janah siusahaken asa ngasupta gelah lanai siulihi kesalahenta.​—Heb. 12:12, 13.

13. Engkai maka ula terus salah siakap banta?

¹³ Selain si e, banci saja lebih siakap salahta. Kai maksudna? Terus siakap salah banta aminna pe kita enggo ertobat janah enggo ibuktiken Jahwe maka iampuniNa kita. Bahaya kel perasan si bage. (Msm. 31:11; 38:4, 5) Engkai? Cuba siukuri sekalak turang seninata si terus salah iakapna bana perban dosa si pernah ilakokenna, nina, “Sia-sia kuakap kerja kerasku i bas ngelayani Jahwe perban labo kari aku selamat ateku.” Banci saja bagi turang senina e perasanta. Adi bage, arus kita hati-hati gelah ula lebihsa siakap salahta. Engkai? Perban meriah kel ukur Setan adi ngadi kita ngelayani Jahwe. Padahal, situhuna enggo iampuni Jahwe nge kita!​—Bandingken 2 Korinti 2:5-7, 11.

14. Janari banci siteh maka nggit nge Jahwe nampati kita?

¹⁴ Banci saja tersungkun-sungkun kita, ‘Kai buktina nggit Jahwe ngampuni aku?’ Adi bage penungkunenndu, situhuna e jadi bukti maka nggit nge Jahwe ngampuni kam. Puluhen tahun si lewat, bagenda nina The Watchtower, “Ope denga silayani Jahwe, banci saja mulih-ulih silakoken kesalahen si seri janah la banci siakap siatasi kelemahenta e. . . . Ula kam nyerah.  Ula iakapndu maka la banci iampuni Jahwe kesalahenndu e. Cara rukur si bage me si iarapken Setan bas kam nari. Banci saja sedih kel iakapndu janah gulut kel ukurndu sanga ilakokenndu kesalahen si seri. Situhuna, perasan si bage jadi bukti maka kam labo kalak jahat, janah banci iampuni Jahwe kesalahenndu e. Tetaplah meteruk ukur, teruslah ertoto man Jahwe gelah iampuniNa kam, gelah ibanNa bersih pusuh peratenndu, janah isampatiNa kam ngadi ngelakoken kesalahen e. Bali bagi anak-anak si lalap ngelakoken kesalahen si seri janah lalap ka ipindona penampat bapakna, kam pe teruslah pindo penampat Jahwe janah pasti kam isampatiNa perban luar biasa kel kiniulinNa.”

15-16. Uga nge perasan piga-piga turang senina sanga itehna nggit Jahwe ngampuni?

¹⁵ Malem kel pusuh enterem umat Jahwe sanga itehna Jahwe nggit ngampuni. Contohna, piga-piga tahun si lewat terpegegehi kel sekalak turang seninata sanga ibacana sada artikel i bas seri “Alkitab Mengubah Kehidupan.” Bas artikel e, iceritaken sekalak turang seninata kesalahen si pernah ilakokenna mbarenda. Kesalahen e erbanca mesera iakapna tek maka keleng denga ate Jahwe ia. Aminna pe enggo ertahun-tahun dekahna ia iperidiken, tetap denga bage perasanna. Tapi sanga iukurina alu mbages korban tebusen Jesus, itehna me maka keleng ate Jahwe ia. *

¹⁶ Uga pengalamen e nampati turang senina ndai? Nina, “Sanga nguda denga aku, candu aku ngenen pornografi. Mbaru-mbaru enda mulihi ka kunen pornografi. Kupindo penampat sekalak pertua janah alu manjar-anjar kuatasi masalahku e. Ipetetap pertua e ukurku maka keleng denga nge ate Jahwe aku janah nggit Ia ngampuni aku. Tapi mon-mon, tetap denga kuakap la meherga bangku. Tempa-tempa la kuakap mungkin keleng ate Jahwe aku. Mbaca pengalamen turang senina ndai tuhu-tuhu nampati aku kel. Gundari, enggo sadar aku maka adi kukataken labo mungkin iampuni Jahwe  aku, e ertina la kuakap bias korban tebusen Jesus banci ngampuni dosa-dosaku. Emaka kugunting me artikel e, katawari pe la kuakap meherga bangku, mulih-ulih kubaca janah kuukuri alu mbages.”

17. Kai si ilakoken Rasul Paulus gelah la lalap iukurina kesalahenna si mbarenda?

¹⁷ Pengalamen-pengalamen si bage ngingetken kita man Rasul Paulus. Ope denga ia jadi kalak Kristen, lit piga-piga kesalahen serius si ilakokenna. Memang, labo ia lupa salahna e, tapi labo ka terus iukurina. (1 Tim. 1:12-15) Ianggapna korban tebusen e sada pemere i bas Dibata nari man bana. (Gal. 2:20) Emaka, la terus salah iakapna bana tapi lalap iusahakenna mereken si mehulina man Jahwe.

18. Kai si enggo sipelajari bas artikel enda?

¹⁸ Kai si banci sipelajari arah artikel enda? (1) Ingeten si mehuli sada pemere i bas Dibata nari. Tapi la soal uga sikapna kegeluhenta mbarenda, kegeluhenta i bas wari si pepagi eme bas doni si mbaru ndauh sikapen. (2) Banci saja lit si erban kitik ukurta, tapi adi nggit kita ngampuni, banci terus silayani Jahwe. (3) Adi lalap siakap salah banta, banci dungna lanai silayani Jahwe alu ermeriah ukur. Emaka, bagi Rasul Paulus, perlu kita tek maka enggo iampuni Jahwe kita.

19. Janari banci siteh maka bas doni si mbaru pagi lanai lit kai pe si erban kitik ukurta?

¹⁹ Lit arapenta nggeluh si rasa lalap. Sanga nggeluh kita pagi bas doni si mbaru, lanai siinget kai pe si erban kitik ukurta. Nina Pustaka kerna si e, “Kejadin-kejadin si enggo lepas ilupaken kerina.” (Jes. 65:17) Cuba ukuri enda: Piga-piga turang seninata enggo metua, tapi bas doni si mbaru pagi, nguda ka kalak e mulihi. (Jop 33:25) Emaka, siusahakenlah asa ngasupta gelah lanai siukuri kegeluhenta mbarenda. Sebalikna, teruslah siukuri doni si mbaru janah silakoken asa ngasupta gelah banci nggeluh i je.