1-2. How wi ku fala di advais weh deh da Proverbs 4:25? Yooz di egzampl eena di paragraaf.

TINK bowt dehnya chree egzampl. Wahn oalda sista di luk bak pahn aala di gud memriz fan ih paas. Eevn doa fi shee laif haada now, shee stil kantinyu du ih bes fi Jehoava. (1 Kor. 15:58) Evri day shee picha ihself lang wid ih famili ahn frenz di liv tugeda eena di Paradais weh Gaad pramis wi. Wahn nada sista tink bowt how sombadi eena di kangrigayshan mi hert shee, bot shee disaid fi noh tink tu moch bowt weh di persn mi du tu ahn. (Kol. 3:13) Wahn brada memba di mistayk dehn weh hihn mi mek eena di paas, bot hihn disaid fi du aal weh ih kud now fi bee faytful tu Jehoava.—Ps. 51:10.

² Weh dehnya chree Kristyan gat eena kaman? Aala dehn memba weh mi hapm tu dehn eena di paas, bot dehn lef di paas eena di paas; dehn noh aalwayz tink bowt it. Insteda dat, dehn luk schrayt heda dehn ahn kip dehn aiy pahn di fyoocha.—Reed Proverbs 4:25. *

3. Wai wi need fi ‘kip wi aiy dehn schrayt heda wiʼ pahn di fyoocha?

³ Wai wi need fi ‘kip wi aiy dehn schrayt heda wiʼ pahn di fyoocha? Jos laik how wahn persn kyaahn waak schrayt if ih kip aan di luk bihain ahn, wee kyaahn mek proagres eena wi servis tu Jehoava if wi kip aan di luk bak—eeda bikaaz wi di tink bowt tingz weh mi hapm tu wi er wi di tink bowt tingz weh wee mi du eena di paas.—Look 9:62.

4. Weh wi wahn diskos eena dis aatikl?

⁴ Eena dis aatikl, wi wahn diskos chree a di chrap dehn weh  ku kaaz wi fi aalwayz di tink bowt di paas. Wan a di chrap dehn da wen wi kip aan di tink bowt how gud wi laif yoostu bee. Di neks wan da wen wi stay beks wid sombadi weh du wi sohnting. Ahn di laas wan da wen wi hoal aan tu schrang gilti feelinz. Eena eech wan a dehndeh kays, wi wahn si how Baibl prinsiplz ku help wi noh fi foakos pahn ‘di tingz weh wi lef bihainʼ bot fi ‘schrech faawod tu weh deh heda wi.ʼ—Fil. 3:13.

5. Weh Ecclesiastes 7:10 tel wi noh fi du?

⁵ Reed Ecclesiastes 7:10. * Noatis dat dis vers noh seh dat ih rang fi aks: “Wai tingz mi gud bak den?” Gud memriz da wahn gif fahn Jehoava. Bot di vers seh: “Noh seh, ‘Wai tingz mi beta bak den dan tudeh?ʼ” Soh wi haftu bee kyaaful noh fi kompyaa wi laif eena di paas wid wi laif now ahn staat tu tink dat evriting wers now.

6. Wai ih foolish fi kip aan di tink dat wi laif mi beta eena di paas? Yooz di egzampl eena di paragraaf.

⁶ Wai ih foolish fi kip aan di tink dat wi laif mi beta eena di paas? Bikaaz wen wi kompyaa wi laif now tu wi laif bak den, wi mait onli memba di gud tingz weh mi hapm tu wi ahn ferget bowt aala di bad tingz. Fi egzampl, tink bowt di Izrelait dehn. Rait afta dehn lef Eejip, dehn ferget bowt di haad taimz weh dehn mi fays deh. Ahn dehn onli foakos pahn aala di gud food weh dehn mi eet wen dehn mi deh da Eejip. Dehn mi seh: “Wi ga gud memriz a di fish weh wi yoostu eet fi free da Eejip, an aala di kukumba, waatamelan, oanyan, ahn gyaalik tu!” (Num. 11:5) Bot dehn mi reeli eet aala da food “fi free”? No. Dehn mi haftu pay wahn hai prais, kaaz joorin da taim dehn da-mi slayv ahn di Eejipshan dehn mi chreet dehn reeli bad. (Ex. 1:13, 14; 3:6-9) Bot eevn soh, dehn mi en op di ferget bowt aala di haad taimz weh dehn mi fays, ahn dehn mi waahn goh bak tu da taim. Dehn mi chooz fi foakos pahn dehn laif bak den insteda foakos pahn aala di gud tingz weh  Jehoava mi jos du fi dehn. Jehoava neva hapi wid dehn atichood ataal!—Num. 11:10.

7. How wahn sista mi stap ihself fahn kip aan di tink dat ih laif mi beta eena di paas?

⁷ How wi ku stap wiself fahn tink dat wi laif mi beta eena di paas? Tink bowt di egzampl a wahn sista weh mi staat tu serv da Brooklyn Betel eena 1945. Sohn yaaz layta, shee mi geh marid tu wahn brada weh mi-di serv da Betel tu, ahn di too a dehn mi serv deh tugeda fi wahn lata yaaz. Bot eena di 1970ʼs, ih hozban mi geh sik. Di sista seh dat wen ih hozban mi wahn soon ded, hihn giv ahn sohn gud advais weh mi wahn help shee afta hihn ded. Hihn tel ahn: “Wee ga wahn reeli gud marij. Wahn lata peepl noh ga da privilij.” Bot hihn mi aalso tel ahn: “Yu wahn neva ferget di gud taimz weh wi mi ga tugeda, bot noh foakos pahn dehndeh memriz. Az taim paas, yu noh wahn feel soh sad agen. Ahn noh bee mizarabl ahn feel sari fi yuself. Bee hapi dat wi kuda mi spen sohn gud taim tugeda di serv Jehoava. . . . Memriz da Jehoava gif tu wee.” Yu noh tink dat da-mi gud advais?

8. How wahn sista mi benifit fan ih hozban advais?

⁸ Di sista mi tek ih hozban advais. Shee mi faytful tu Jehoava dong tu di en. Shee mi ded wen ih mi 92 yaaz oal. Yaaz bifoa dat, shee mi seh: “Wen Ah luk bak pahn mi 63 yaaz eena ful-taim servis tu Jehoava, Ai ku seh dat Ai reeli hapi wid mai laif.” Wai? Shee seh: “Weh reeli help wi fi bee hapi wid wi laif da wi bradaz ahn sistaz ahn di hoap weh wi ga fi liv wid dehn fareva eena Paradais di serv wi Kriyayta, di onli chroo Gaad, Jehoava.” * Wi ku laan wahn lat fahn dis sista weh mi foakos pahn Jehoava pramis dehn!

9. Akaadn tu Leviticus 19:18, wai ih mait bee haad fi fergiv sombadi weh get wi beks?

⁹ Reed Leviticus 19:18. * Ih haad fi fergiv  sombadi weh get wi beks, espeshali if di persn da fahn wi kangrigayshan, if da wahn kloas fren, er if da wahn famili memba. Fi egzampl, wahn sista mi seh dat wahn nada sista eena ih kangrigayshan mi teef moni fan ahn. Laytaraan, shee riyalaiz dat da neva chroo, soh ih seh sari tu di sista fi akyooz ahn a sohnting laik dat, bot di ada sista mi geh beks ahn kudn stap tink bowt weh mi hapm. Yoo eva feel da way? Eevn if wi noh fays da egzak saym sichuwayshan, moa dan laikli aala wi praabli mi feel laik wi kudn fergiv sohnbadi wan taim er di ada.

10. Weh ku help wi wen wi feel laik wi kyaahn fergiv sombadi weh get wi beks?

¹⁰ Weh ku help wi wen wi feel laik wi kyaahn fergiv sombadi weh get wi beks? Wan ting weh wi ku du da memba dat Jehoava di si evriting. Soh hihn si evriting weh wi goh chroo, laik wen peepl chreet wi bad. (Heeb. 4:13) An ih hat ih haat wen ih si wi di sofa. (Isa. 63:9) Hihn aalso pramis wi dat soon ih wahn geh rid a eni payn weh wi feel bikaaz a di bad tingz weh mi hapm tu wi.—Rev. 21:3, 4.

11. How wee benifit wen wi fergiv adaz?

¹¹ Wi noh waahn ferget dat wi wahn feel beta wen wi fergiv adaz. Dat da weh di sista weh mi geh beks sayka weh di ada sista mi mek wahn faals akyoozayshan gens ahn mi riyalaiz. Soh afta wahn wail, shee mi aybl fi fergiv di sista. Shee mi riyalaiz dat wen wi fergiv ada peepl, Jehoava fergiv wee tu. (Mach. 6:14) Shee mi noa dat weh di ada sista mi du tu ahn mi rang, bot shee stil chooz fi fergiv ahn. Sayka dat, wi sista hapiya, ahn now ih ku foakos pan ih servis tu Jehoava.

12. Weh 1 Jan 3:19, 20 teech wi?

¹² Reed 1 Jan 3:19, 20. Ih naamal fi ga gilti feelinz. Fi egzampl, sohn peepl feel gilti bikaaz a di tingz weh dehn mi du bifoa dehn laan di chroot. An ada peepl feel gilti bikaaz dehn mi mek sohn mistayk afta dehn geh baptaiz. (Roam. 3:23) Af koars, aala wi waahn du di rait ting. Bot “aala wi mek mistayk lata taim.” (Jay. 3:2; Roam. 7:21-23) Eevn doa ih noh feel gud wen wi ga gilti feelinz, ih ku akchwali help wi. Wai? Bikaaz wen wi ga gilti feelinz, ih ku help wi fi mek chaynjiz eena wi laif ahn noh fi mek di saym mistayk dehn agen.—Heeb. 12:12, 13.

13. Wai wi need fi bee kyaaful wen wi ga schrang gilti feelinz?

¹³ Pahn di ada han, ih pasabl fi hoal aan tu schrang gilti feelinz. Dat meenz dat wi kantinyu feel gilti eevn afta wi ripent ahn Jehoava don shoa wi dat ih fergiv wi. Dehndeh kaina gilti feelinz veri daynjaros. (Ps. 31:10; 38:3, 4) Wai? Luk pahn di egzampl a wahn sista weh mi schrogl wid schrang gilti feelinz sayka di mistayk dehn weh shee mi mek eena di paas. Shee mi seh: “Ai mi feel laik Ah shudn werk haad eena mi servis tu Jehoava bikaaz hihn mi praabli don giv op pahn mi.” Wahn lata wi praabli feel di saym way how da sista feel. Soh ih impoatant dat wi noh hoal aan tu schrang gilti feelinz. Wai? Bikaaz Saytan wuda bee veri hapi if wi stap serv Jehoava, eevn doa Jehoava don fergiv wi aredi!—Kompyaa 2 Korintyanz 2:5-7, 11.

14. How wi ku noa fi shoar dat Jehoava noh giv op pahn wi?

¹⁴ Wi mait stil wanda, ‘How Ah ku noa fi shoar dat Jehoava noh giv op pahn mi?ʼ Wen wi aks wiself da kweschan, wi don di ansa it aredi. Yaaz agoa, The Watchtower mi seh: “Wi [mait] kip aan di mek di saym mistayk oava ahn oava agen, ahn maybi wi stil di schrogl wid wahn bad habit weh wi mi ga bifoa wi staat tu serv Jehoava. . . . Bot noh giv op. Yu mait tink tu yuself dat yu komit wahn sin weh Jehoava kuda neva fergiv yu  fa. Ahn dat da egzakli weh Saytan waahn yu tink. Bot di fak dat yu feel sad ahn yu beks wid yuself sayka weh yu du da proof dat yu da noh wahn bad persn ahn dat Jehoava ku fergiv yu. Soh stay hombl ahn kip aan di pray tu Jehoava fi fergiv yu, fi help yu ga wahn kleen kanshans, fi help yu feel beta bowt yuself, ahn fi help yu stap mek di saym mistayk. Goh tu hihn jos laik wahn lee pikni weh goh tu ih pa wen ih get eena chrobl, noh mata humoch taim da bowt di saym prablem. Soh kip aan di aks Jehoava fi help, ahn fi shoar hihn wahn help yu.” *

15-16. How sohn bradaz ahn sistaz mi feel wen dehn si how Jehoava neva giv op pahn dehn?

¹⁵ Wahn lata wi bradaz ahn sistaz mi geh komfert wen dehn si how Jehoava neva giv op pahn dehn. Fi egzampl, yaaz agoa, wahn aatikl fahn “The Bible Changes Lives” seeriz mi inkorij wahn brada. Eena da aatikl, wahn sista mi seh dat bikaaz a di bad tingz weh mi hapm eena fi shee laif, ih mi haad fi bileev dat Jehoava kuda eva lov ahn. Shee mi schrogl wid dehndeh feelinz eevn yaaz afta shee geh baptaiz. Bot wen shee meditayt pahn di ransom, ih help ahn fi bileev dat Jehoava lov ahn. *

¹⁶ How di sista ekspeeryens mi help di brada? Hihn mi rait: “Wen Ah mi yong, Ai mi adiktid tu poarnografi. Ahn wahn wail agoa, Ah mi get intu da habit agen. Ah mi aks di eldaz fi help, ahn now Ah di mek proagres fi get oava da bad habit. Di eldaz mi help mi fi si dat Jehoava lov mi ahn dat ih waahn fergiv mi. Bot eevn soh, sohntaim Ah stil feel laik Ah noh wert notn ahn dat Jehoava kuda neva lov mi. Soh wen Ah reed di sista ekspeeryens, ih reeli help mi. Now Ah noa dat wen Ah tink dat Gaad kuda neva fergiv mi, da laik Ah di seh dat wen ih mi sen ih Son fi ded fi mee, dat neva inof fi kova oava mi sin dehn. Ah kot owt dis aatikl soh dat Ah ku reed it ahn meditayt pan it weneva Ah staat tu feel laik Ah noh wert notn.”

17. Weh mi help di apasl Paal fi noh hoal aan tu schrang gilti feelinz?

¹⁷ Dehnya kaina ekspeeryens mek wi tink bowt di apasl Paal. Bifoa hihn da-mi wahn  Kristyan, hihn mi mek wahn lata seeryos mistayk. Ahn Paal mi memba evriting weh hihn mi du, bot ih neva foakos pahn dehndeh tingz. (1 Tim. 1:12-15) Hihn mi bileev dat Jehoava kuda mi fergiv ahn bikaaz a di ransom sakrifais ahn dat di ransom da-mi wahn persnal gif weh Jehoava giv tu hihn. (Gal. 2:20) Soh dat da weh mi help Paal fi noh hoal aan tu schrang gilti feelinz. An eena da way deh, hihn kuda mi foakos pahn weh ih kuda mi du fi giv Jehoava ih bes dong tu di en.

18. Weh wi laan eena dis aatikl?

¹⁸ Weh wi laan afta wi mi diskos di chree chrap weh ku kaaz wi fi aalwayz di tink bowt wi paas? Wi laan dat (1) gud memriz da wahn gif fahn Jehoava, bot noh mata how gud wi laif yoostu bee, wi fyoocha eena di nyoo werl wahn bee eevn beta. (2) Ada peepl mait du tingz weh mek wi geh beks wid dehn, bot wen wi chooz fi fergiv dehn, wi wahn ku foakos pahn how fi gi wi bes tu Jehoava now. (3) Schrang gilti feelinz ku stap wi fahn serv Jehoava wid jai. Soh jos laik Paal, wi need fi bileev dat Jehoava don fergiv wi aredi.

19. How wi noa dat eena di nyoo werl wi noh wahn memba eniting fahn wi paas weh mek wi feel sad?

¹⁹ Aala wi ga di hoap fi liv fareva. An eena di nyoo werl weh Gaad pramis wi, wi noh wahn memba tingz fahn wi paas weh mek wi feel sad. Dat da wahn pramis weh deh eena di Baibl; ih seh: “Wi noh wahn memba dehndeh tingz weh mi deh eena di paas.” (Isa. 65:17) Tink bowt dis: Som a wi don geh oal eena wi servis tu Jehoava, bot eena di nyoo werl wi wahn bee yong agen. (Job 33:25) Soh den, wi need fi mek it wi goal fi noh foakos pahn wi paas. Insted, mek wi foakos pahn di nyoo werl ahn du evriting weh wi kud now soh dat wi ku mek it deh!