1-2. Unsaon nato pagsunod ang tambag sa Proverbio 4:25? Paghatag ug pananglitan.

HUNAHUNAA kining tulo ka pananglitan. Ang usa ka tigulang nga sister naghunahuna sa malipayong mga hitabo sa batabata pa siya. Bisag medyo lisod na ang iyang kinabuhi karon, gihimo niya ang iyang kinamaayohan para kang Jehova. (1 Cor. 15:58) Kada adlaw, mag-imadyin siya nga kauban niya ang iyang mga minahal sa gisaad nga bag-ong kalibotan. Ang laing sister nahinumdom nga napasakitan siya sa usa ka igsoon, pero nakadesisyon siya nga dili na magsigeg hunahuna niana. (Col. 3:13) Ang usa ka brader nahinumdom sa iyang nahimong kasaypanan pero nagpokus siya sa pagpabiling matinumanon karon.​—Sal. 51:10.

² Unsay parehong gihimo niining tulo ka igsoon? Bisag nahinumdom sila sa nangagi, wala sila magsigeg hunahuna niana. Hinunoa, nagpokus sila sa umaabot.​—Basaha ang Proverbio 4:25.

3. Nganong kinahanglan tang magpokus sa umaabot?

³ Nganong importante nga magpokus ta sa umaabot? Sama nga ang usa ka tawo dili makatarong ug lakaw kon magsige siyag lingi sa luyo, dili pod ta makapadayon sa pag-alagad kang Jehova kon magsige tag lingi sa nangagi.​—Luc. 9:62.

4. Unsay atong hisgotan niining artikuloha?

⁴ Niining artikuloha, hisgotan nato ang tulo ka lit-ag nga angay natong likayan aron dili ta magsigeg hunahuna sa nangagi. Kini ang: (1) pagsigeg handom sa kagahapon, (2) paghambin ug kasuko, ug (3) sobrang pagkakonsensiya. Sa matag kahimtang, tan-awon nato kon sa unsang paagi ang mga prinsipyo sa Bibliya makatabang nato nga dili magpokus sa “mga butang sa luyo” kondili mangab-ot sa “mga butang sa unahan.”​—Filip. 3:13.

5. Sumala sa Ecclesiastes 7:10, unsay dili nato angayng buhaton?

⁵ Basaha ang Ecclesiastes 7:10. Matikdi nga kining bersikuloha wala mag-ingon nga sayop ang pagpangutana: “Nganong ang kanhing mga adlaw maayo?” Ang maayong mga kasinatian regalo gikan kang Jehova. Hinunoa, ang bersikulo nag-ingon: “Ayaw pag-ingon, ‘Nganong ang kanhing mga adlaw mas maayo pa kay sa karon?’” Sa laing pagkasulti, dili maayong itandi nato ang atong kinabuhi karon sa nangagi ug maghunahuna nga ang atong kinabuhi karon wa gyoy nada. Ang laing hubad niining tekstoha nag-ingon: “Ayaw gayod pagpangutana, ‘Ngano man nga ang atong pagkabutang kaniadto mas maayo man kay sa karon?’ Dili maalamon ang maong pangutana.”

6. Nganong dili maalamon nga magsige tag hunahuna nga mas maayo pa ang atong kinabuhi kaniadto? Paghatag ug pananglitan.

⁶ Nganong dili maalamon nga magsige tag hunahuna nga mas maayo pa ang atong kinabuhi kaniadto? Kay kon himoon nato nâ, ang ato lang mahinumdoman mao ang maayong mga butang sa nangagi ug malimot ta sa kalisdanan nga atong nasinati. Tagda pananglitan ang mga Israelinhon kaniadto. Pagbiya nila sa Ehipto, nalimot dayon sila kon unsa ka lisod ang ilang kinabuhi didto. Nagpokus lang sila sa lami nga mga pagkaon. Sila miingon: “Gimingaw na mi sa mga isda nga libre namong gikaon sa Ehipto, sa mga pepino, pakwan, sibuyas dahon, bombay, ug ahos!” (Num. 11:5) Pero, “libre” ba gyod tong ilang gikaon? Dili. Dako kaayog gibayad niana ang mga Israelinhon; sila gidaogdaog pag-ayo ingong mga ulipon sa Ehipto. (Ex. 1:13, 14; 3:6-9) Bisan pa niana, nalimot sila sa maong mga kalisdanan ug nangandoy sa kagahapon. Sila nagpokus sa maayong mga butang sa nangagi imbes magpokus sa maayong mga butang nga bag-o pang gihimo ni Jehova para kanila. Si Jehova wala malipay sa ilang panghunahuna.​—Num. 11:10.

7. Unsay nakatabang sa usa ka sister nga dili magsigeg handom sa iyang kinabuhi kaniadto?

⁷ Sa unsang paagi malikayan ang lit-ag sa pagsigeg handom sa atong kinabuhi kaniadto?  Tagda ang pananglitan sa usa ka sister nga nagsugod pag-alagad sa Brooklyn Bethel niadtong 1945. Pipila ka tuig sa ulahi, naminyo siya ug kaubang Bethelite, ug silang duha nag-alagad didto sulod sa daghang katuigan. Pero, pagka-1976, ang iyang bana nasakit. Siya miingon nga dihang naamgohan sa iyang bana nga hapit na kining mamatay, gihatagan siya niinig maayong tambag nga makatabang niya inigkabiyuda niya. Giingnan siya sa iyang bana: “Malipayon ang atong kaminyoon. Daghang tawo ang wala makasinati niana.” Pero giawhag sab siya sa iyang bana: “Ayaw paghunahuna kanunay sa nangagi​—bisan tuod dili nimo malimtan kana. Sa ngadtongadto maulian ka ra. Ayawg kayugot ug mobatig kaluoy sa kaugalingon. Magmatagbaw nga natagamtam nimo kini nga mga kalipay ug mga panalangin. Ang atong mga panumdoman maoy gasa sa Diyos kanato.” Maayo gyod nâ nga tambag!

8. Sa unsang paagi nakabenepisyo ang sister sa pagsunod niya sa tambag sa iyang bana?

⁸ Gisunod sa sister ang tambag sa iyang bana. Matinumanon siyang nag-alagad kang Jehova hangtod sa iyang kamatayon sa edad nga 92. Pipila ka tuig una siya mamatay, siya miingon: “Sa paghinumdom sa kapig 63 ka tuig sa bug-os-panahong pag-alagad kang Jehova, makaingon ako nga natagamtam nako ang usa ka matagbawon gayod nga kinabuhi.” Ngano? Siya miingon: “Ang makahatag gayod ug katagbawan sa kinabuhi mao ang atong kahibulongang panag-igsoonay ug ang paglaom nga mabuhi uban sa atong mga igsoong lalaki ug babaye diha sa usa ka yutang paraiso, nga mag-alagad sa atong Dakong Maglalalang, ang bugtong matuod nga Diyos, si Jehova, sa walay kataposan.” * Daghan gyod tag makat-onan niining sister nga nagpokus sa umaabot!

9. Sumala sa Levitico 19:18, kanus-a tingali nga malisdan kaayo ta sa pagpasaylo niadtong nakapasakit kanato?

⁹ Basaha ang Levitico 19:18. Usahay malisdan ta sa pagpasaylo kon ang nakasala kanato  usa ka igsoon sa pagtuo, suod nga higala, o paryente. Pananglitan, usa ka igsoon ang namasangil sa laing sister nga gikawat kuno niini ang iyang kuwarta. Sa ulahi, ang sister nga namasangil nangayog pasaylo, pero ang sister nga gipasanginlan nasuko kaayo ug nagsigeg hunahuna sa nahitabo. Mibati ka na bag ingon niana? Bisag dili susama niana ang atong nasinati, tingali kadaghanan nato nasuko ug mibati nga dili gyod nato mapasaylo kadtong nakapasakit kanato.

10. Unsay makatabang nato dihang masuko ta?

¹⁰ Unsay makatabang nato dihang masuko ta? Angay natong hinumdoman nga nakita ni Jehova ang tanan. Nahibalo siya sa tanan natong nasinatian, apil na ang mga inhustisya nga atong naeksperyensiyahan. (Heb. 4:13) Masakitan siya dihang mag-antos ta. (Isa. 63:9) Ug nagsaad siya nga sa ngadtongadto wad-on niya ang bisan unsang kadaot nga resulta sa mga inhustisya nga atong naeksperyensiyahan.​—Pin. 21:3, 4.

11. Sa unsang paagi makabenepisyo ta kon dili ta maghambin ug kasuko?

¹¹ Maayo pong hinumdoman nga kon dili ta maghambin ug kasuko, makabenepisyo ta. Mao nay naamgohan sa sister nga gipasanginlan. Sa ngadtongadto, napasaylo ra niya ang sister nga namasangil niya ug wala na siya masuko niini. Naamgohan niya nga kon pasayloon nato ang uban, pasayloon sab ta ni Jehova. (Mat. 6:14) Nahibalo siya nga sayop ang gihimo kaniya sa sister, pero midesisyon siya nga dili na maghambin ug kasuko. Tungod niana, siya mas malipayon na ug nakapadayon sa pag-alagad kang Jehova.

12. Unsay atong makat-onan sa 1 Juan 3:19, 20?

¹² Basaha ang 1 Juan 3:19, 20. Kitang tanan makonsensiya usahay. Pananglitan, ang uban nakonsensiya tungod sa ilang nahimo sa wala pa sila makakat-on sa kamatuoran. Ang uban nakonsensiya sa mga sayop nga ilang nahimo human sila mabawtismohi. (Roma 3:23) Siyempre, gusto natong buhaton kon unsay husto. Pero, “kitang tanan mapandol sa makadaghan.” (Sant. 3:2; Roma 7:21-23) Bisag dili makapalipay ang pagbati nga makonsensiya, duna ni kaayohan. Ngano? Tungod kay makapalihok ni nato nga magbag-o ug maningkamot nga dili na usbon ang atong sayop.​—Heb. 12:12, 13.

13. Nganong angay tang mag-amping nga dili malit-agan sa sobrang pagkakonsensiya?

¹³ Sa laing bahin, posible nga mobati tag sobrang pagkakonsensiya​—nga makonsensiya gihapon bisag naghinulsol na ta ug gipakita na ni Jehova nga gipasaylo ta niya. Kanang matanga sa pagkakonsensiya makadaot. (Sal. 31:10; 38:3, 4) Ngano? Tagda ang pananglitan sa usa ka sister nga padayong nakonsensiya sa mga sala nga iyang nahimo kaniadto. Siya miingon: “Gibati nako nga walay kapuslanan nga maghago pa ko sa pag-alagad kang Jehova kay dili na man tingali ko maluwas.” Daghan kanato ang mibatig sama niana. Busa mag-amping ta nga dili malit-agan sa sobrang pagkakonsensiya. Ngano? Tungod kay malipay kaayo si Satanas kon mohunong ta sa pag-alagad, bisag gipasaylo na ta ni Jehova.​—Itandi ang 2 Corinto 2:5-7, 11.

14. Unsaon nato pagseguro nga andam si Jehova sa pagpasaylo kanato?

¹⁴ Pero, maghunahuna gihapon tingali ta, ‘Unsaon nato pagseguro nga andam si Jehova sa pagpasaylo kanato?’ Ang pagpangutana niana nagpakita nga mapasaylo ta ni Jehova. Katuigan kanhi, ang The Watchtower nag-ingon: “[Tingali] balikbalik natong mahimo ang mao rang sayop. Basin wala pa gyod nato mawala ang kahuyangan nga naa nato sa wala pa ta  mag-alagad sa Diyos. . . . Ayawg kaluya. Ayawg hunahunaa nga nakahimo kag sala nga dili gyod mapasaylo. Kanay gusto ni Satanas nga imong hunahunaon. Sa pagkatinuod, ang imong kaguol ug pagkadismayar nagpakita nga dili ka daotan ug nga mapasaylo ka ni Jehova. Magpabiling mapainubsanon ug padayon sa pag-ampo sa Diyos nga pasayloon ka, nga hatagan kag hinlong konsensiya, ug tabangan ka nga dili na maotro ang maong sayop. Samag bata nga balikbalik nga mangayog tabang sa iyang amahan sa mao ra gihapon nga problema, padayon sa pagpangayog tabang kang Jehova ug siya motabang nimo tungod sa iyang dili hitupngang pagkamaayo.” *

15-16. Unsay gibati sa pipila dihang nasabtan nila nga gipasaylo na sila ni Jehova?

¹⁵ Daghang alagad ni Jehova ang nahupayan dihang nasabtan nila nga gipasaylo na sila ni Jehova. Pananglitan, pipila ka tuig kanhi, usa ka brader ang natandog sa eksperyensiya nga iyang nabasa diha sa seryeng “Ang Bibliya Makabag-o sa Kinabuhi.” Sa artikulo, giangkon sa usa ka sister nga tungod sa iyang dili maayong mga kasinatian kaniadto, nalisdan siya sa pagtuo nga puwede siyang higugmaon ni Jehova. Ug wala mawala ang iyang gibati bisag dugay na siyang nabawtismohan. Pero, dihang namalandong siya sa lukat, nausab ang iyang panglantaw. *

¹⁶ Sa unsang paagi nakatabang sa brader ang eksperyensiya sa sister? Ang brader misulat: “Sa batan-on pa ko, nakigbisog ko sa akong pagkaadik sa pornograpiya. Ning bag-o pa, naligas na pod ko. Nagpatabang ko sa Kristohanong mga ansiyano, ug nabuntog nako ang akong kahuyangon. Gipasaligan ko nila sa gugma ug kaluoy sa Diyos. Apan, usahay mobati kong way pulos, nga daw imposibleng higugmaon ko ni Jehova. Ang pagbasa sa kasinatian [sa sister] nakatabang gayod. Karon nakaamgo ko nga kon maghunahuna kong imposibleng pasayloon ko sa Diyos, sama rag miingon ko nga ang halad sa iyang Anak dili igo sa pagbayad sa akong mga sala. Gitipigan nako ning artikuloha aron akong mabasa ug mapamalandong sa panahon nga mobati kong walay pulos.”

17. Sa unsang paagi nalikayan ni apostol Pablo ang lit-ag sa sobrang pagkakonsensiya?

 ¹⁷ Ang mga eksperyensiya nga sama niini nagpahinumdom nato kang apostol Pablo. Sa wala pa siya mahimong Kristohanon, nakahimo siyag pipila ka seryosong sala. Nahinumdom siya sa iyang nahimo, pero wala siya magsigeg hunahuna niana. (1 Tim. 1:12-15) Giisip niya ang lukat ingong regalo sa Diyos kaniya. (Gal. 2:20) Busa nalikayan ni Pablo ang lit-ag sa sobrang pagkakonsensiya, ug sukad niadto, nagpokus na siya sa paghatag sa iyang kinamaayohan ngadto kang Jehova.

18. Unsay atong nakat-onan niining artikuloha?

¹⁸ Unsay atong nakat-onan sa pagsusi sa mga lit-ag nga gihisgotan niining artikuloha? (1) Ang maayong mga kasinatian regalo gikan kang Jehova; pero bisag unsa pa ka maayo ang atong kinabuhi kaniadto, mas maayo pa gyod ang atong kinabuhi sa bag-ong kalibotan. (2) Mapasakitan tingali ta sa uban, pero kon magpasaylo ta, makapadayon ta sa pag-alagad kang Jehova. (3) Ang sobrang pagkakonsensiya makapugong nato sa pag-alagad kang Jehova nga malipayon. Busa, sama kang Pablo, kinahanglang kombinsido ta nga gipasaylo na ta ni Jehova.

19. Giunsa nato pagkahibalo nga sa bag-ong kalibotan, dili na nato mahinumdoman pa ang makapaguol nga mga hitabo sa atong kinabuhi?

¹⁹ Duna tay paglaom nga mabuhi sa walay kataposan. Ug sa bag-ong kalibotan sa Diyos, dili na nato mahinumdoman pa ang makapaguol nga mga hitabo sa atong kinabuhi. Bahin nianang panahona, ang Bibliya nag-ingon: “Ang kanhing mga butang dili na hinumdoman.” (Isa. 65:17) Hunahunaa lang: Ang pipila kanato natigulang na sa pag-alagad kang Jehova, pero sa bag-ong kalibotan, mahibalik ta sa pagkabatan-on. (Job 33:25) Busa, magmadeterminado ta nga dili magsigeg hunahuna sa atong kinabuhi kaniadto. Hinunoa, magpokus ta sa umaabot nga bag-ong kalibotan ug buhaton ang tanan aron makapuyo ta didto!