1-2. Ifa usun sipwe tongeni apwénúetá ewe kapasen fén lón Än Salomon Fos 4:25? Apwóróusa eú pwóróus.

ANCHANGEI ekkeei úlúngát pwóróus. Emén Chón Kraist fefin chinnap a nesékúriti apwapwaan manawan me lóóm. Inaamwo ika manawan iei a áweires nge a sópweló le achocho úkúkún an tufich fán iten Jiowa. (1 Kor. 15:58) Iteiten rán a kachitoni manawan fengen me chón an famili me chienan kewe lón ewe ótót sefé mi pwonetiw. Pwal emén Chón Kraist fefin a chemeni ewe atun emén chón ewe mwichefel a fókkun eletipengawa, nge a filatá an epwe chék likitaló. (Kol. 3:13) Emén Chón Kraist mwán a chemeni an kewe mwáál me lóóm nge a nefótófót wóón an epwe chék tuttuppwél ngeni Jiowa iei.​—Kölf. 51:10.

² Met ekkena úlúmén Chón Kraist ra lélléfengen wóón? Iir me úlúmén ra chemeni met a fis ngeniir me lóóm nge rese kan ekkekieki ekkena mettóch. Ra fen chék “newenewenela” ngeni mwachkkan.​—Álleani Än Salomon Fos 4:25.

3. Pwata a lamot ach sipwe “newenewenela” ngeni mwachkkan?

³ Pwata a lamot ach sipwe “newenewenela” ngeni mwachkkan? Emén mi kan nesékúr lón an fetál ese tongeni fetál wenewen. A pwal ina usun lón ach angang ngeni Jiowa. Sise tongeni sópweló le unusen angang ngeni Jiowa ika sia kan ekkekieki ekkewe mettóch mi fis lón manawach me lóóm are minne sia féri.​—Luk. 9:62.

4. Met sipwe pwóróus wóón lón ei lesen?

⁴ Lón ei lesen, sipwe pwóróus wóón úlúngát ssár mi tongeni efisi ach sipwe kan múmmúúiti manawach me lóóm me lóóm. * Ikkeei: (1) ach áneánei manawach me lóóm, (2) ach chou ngeni emén, me (3) ssenúkún mengiringir. Lón eú me eú ssár, sipwe  kúna ifa usun án Paipel kewe kapasen emmwen ra tongeni álisikich ach sisap nefótófót wóón ‘mine a nom lükisökürüch’ nge sipwe achocho ngeni ‘mine a nom mwach.’​—Fil. 3:13.

5. Ifa ewe ssár Än Salomon Afalafal 7:10 a éúréúrakich ach sipwe túmúnúkich seni?

⁵ Álleani Än Salomon Afalafal 7:10. Nengeni pwe ena wokisin ese erá pwe mi mwáál ach eis: “Pwata a múrinné ekkewe fansoun lóóm?” Pún ekkewe mettóch mi múrinné sia chemesefáli, iir liffang me ren Jiowa. Nge, ena wokisin a erá: “Kosap ais, ‘Pwota ewe fansoun lom a mürina seni fansoun ikenai?’” Weween pwe epwe wiliti eú ssár ika sia apépééi nónnómun manawach me lóóm ngeni nónnómun manawach iei, me ekieki pwe unusen nónnómuch iei a ngangngawoló.

6. Pwata esap alen tipachem ach ekkekieki pwe manawach me lóóm a múrinné lap seni iei? Eáni eú áwewe.

⁶ Pwata esap alen tipachem ach ekkekieki pwe manawach me lóóm a múrinné lap seni iei? Ach áneánei manawach me lóóm a tongeni efisi ach chemesefáli ekkewe chék mettóch mi múrinné lón manawach me lóóm nge ménúki weiresich kewe. Sipwe nengeni pwóróusen ekkewe chón Israel lóóm. Mwirin ar towu seni Isip ra mwittir ménúki weiresin manawer me ikena. Nge ra chék nefótófót wóón ekkewe mwéngé mi anné ra pwapwaiti. Ra erá: “Sia chechemeni ekewe ik sia mongö lon Isip, nge sisap möni. Sia pwal chechemeni ach ochoch küri me senia, nengi me anion pwal ninnikü.” (Num. 11:5) Nge pwúngún pwe rese “möni” ener kana? Ewer, a fókkun mémmóng pún lón ena fansoun ekkewe chón Isip ra nemenemengaw wóón ekkena chón Israel me néúniir slave. (Eks. 1:13, 14; 3:6-9) Nge, mwirin och fansoun ra ménúki ekkena weires me áneánei manawer me lóóm. Ra filatá le nefótófót wóón manawer me lóóm mi apwapwa nge rese nefótófót wóón ekkewe mettóch mi múrinné Jiowa a kerán chék féri fán iter. Jiowa ese pwapwa ren met ra féri.​—Num. 11:10.

7. Met a álisi emén Chón Kraist fefin an epwe ttii seni ewe ssárin áneánei manawan me lóóm?

⁷ Ifa usun sipwe ttii senikich ewe ssárin ach  áneánei manawach me lóóm? Ekieki pwóróusen ei Chón Kraist fefin mi poputá le angang lón Brooklyn Bethel lón 1945. Mwirin fitu ier, a pwúlúweni pwal emén chón angangen lón ena Bethel, me ra angangfengen ren fite fite ier. Iwe nge, lón 1976, pwúlúwan we a semmwen. A erá pwe lupwen a mirititi pwe epwele máló, a ngeni ekkóch kapasen fén mi álisi le likiitú mwirin málóón. A ereni: “A apwapwa lón ánein ach pwúpwúlú. Chómmóng rese eáni ena sókkun pwapwa.” Nge a pwal pesei: “Inaamwo ika kopwe chechchemeni ach kewe fansounfengen mi apwapwa, nge kosap nefótófót wóór. Ló, ló, ló, epwe kisikisiló óm letipechou. Kosap kon lichippúng me letipechou ren met a fis ngonuk. Kopwe aúcheani ekkewe fansoun mi apwapwa sia eáni lón ach angangfengen ngeni Jiowa. . . . Ekkewe mettóch mi múrinné sia chemesefáli, iir liffang me ren Jiowa.” A mmen fókkun múrinné ena kapasen fén!

8. Ifa usun emén chienach fefin a feiéch seni án pwúlúwan we kapasen fén?

⁸ Chienach na a apwénúetá án pwúlúwan na kapasen fén. A angang ngeni Jiowa fán tuppwél tori an máló lón an 92 ier. Fitu ier mwen an máló, iei met a erá: “Ai nesékúriti lap seni 63 ierin ai angang ngeni Jiowa full-time, ua tongeni erá pwe ua fókkun pwapwa lón manawei.” Pwata? A áweweei: “Sia tongeni pwapwa lón manawach pokiten sia chóni eú famili lón pekin ngún mi amwarar. Sia ápilúkúlúkún manaw lón ewe paratis wóón fénúfan fengen me iir lón ach angang ngeni Jiowa tori feilfeiló, ewe chék Kot mi enlet me ach we Chón Fératá.” * A ifa me múrinnéén an na leenien áppirú usun emén mi neweneweneló ngeni mwachkkan!

9. Me ren Lifitikos 19:18, ineet atun a tongeni weires ach sipwe likitaló ach chou ngeni emén?

⁹ Álleani Lifitikos 19:18. Fán chómmóng a weires ngenikich ach likitaló ach chou ngeni emén mi féfféringaw ngenikich ika eménna chienach chón lúkú, chiechiach are aramasach.  Áwewe chék, emén Chón Kraist fefin a tipimwáál ngeni emén chienan chón lúkú pwe a solá seni moni, nge mwirin a mirititi pwe a mwáálliló me a omusomus ngeni. Iwe nge, ewe emén Chón Kraist fefin a fókkun song me ese tongeni likitaló. A fen fis ngonuk ena sókkun memmeef? Ikaamwo ese fis ngonuk ena esin, nge lape ngenikich sia fen chou ngeni emén me meefi pwe sise tongeni omusaaló.

10. Met epwe tongeni álisikich lupwen sia chou ngeni emén?

¹⁰ Met epwe tongeni álisikich lupwen sia chou ngeni emén? Sipwe fókkun chechchemeni pwe Jiowa a kúna mettóch meinisin. A silei meinisin met mi fis lón manawach kapachelong ese lifilifil án aramas féffér ese pwúng ngenikich. (Ipru 4:13) A meefi letipengaw lupwen sia kúna riáfféú. (Ais. 63:9, NW) Nge a pwonei pwe ekiseló chék epwe amóeló meinisin metekin letipach ren ekkewe mettóch ese pwúng mi fis ngenikich.​—Pwär. 21:3, 4.

11. Ifa usun sia pwisin kúna álilliséchún ach likitaló ach chou ngeni emén?

¹¹ Sia pwal mochen chechchemeni pwe lupwen sia likitaló ach chou ngeni emén, sia pwisin kúna álilliséchún. Ina met ewe Chón Kraist fefin mi kúna tipimwáál a mirititi. Mwirin och fansoun, a tufichin likitaló an song. A mirititi pwe lupwen sia omusaaló tipisin ekkewe ekkóch, Jiowa epwe pwal omusakicheló. (Mat. 6:14) Ese ekisikisaaló are kúnetipingen wóón met chienan we chón lúkú a féri, nge a filatá le likitaló an song. Iwe mwirilóón, a lapóló pwapwaan chienach na me a tongeni nefótófót wóón an angang ngeni Jiowa.

12. Met sia káé seni 1 Johannes 3:19, 20?

¹² Álleani 1 Johannes 3:19, 20. Fán ekkóch kich meinisin sia meefi mengiringir. Áwewe chék, ekkóch ra mengiringir ren ekkewe mettóch ra féri me mwen ar káé ewe enlet. Nge pwal ekkóch ra mengiringir pokiten ekkewe mettóch ra mwáálliló wóón mwirin ar papatais. (Rom 3:23) Pwúngún pwe sia mochen féri minne mi pwúng. Nge “kich meinisin sia mwälila fän chomong.” (Jas. 3:2; Rom 7:21-23) Inaamwo ika sise sani ena memmeefin mengiringir, nge a tongeni wor échún. Ifa usun? Pokiten ena memmeef a tongeni amwékútúkich le féri siwil lón manawach me úppós ach sisap chúen férisefál met ekkewe sia mwáálliló wóór.​—Ipru 12:12, 13.

13. Pwata a lamot ach sipwe túmúnúkich seni ach meefi ssenúkún mengiringir?

¹³ Iwe nge, mi tufich ach sipwe meefi ssenúkún mengiringir, weween sipwe chék memmeefi mengiringir inaamwo ika sia fen aier me Jiowa a fen omusaaló ach tipis. Ena sókkun mengiringir a efeiengaw. (Kölf. 31:10; 38:3, 4) Ifa usun? Ekieki pwóróusen emén Chón Kraist fefin, mi riáfféú fán ewe memmeefin mengiringir iteitan ren an kewe tipis me lóóm. A erá: “Ua meefi pwe ese wor lamoten ai upwe achocho le angang ngeni Jiowa pokiten eli usap kúna manaw.” Chómmóng me leich sia pwal meefi meefien chienach na. A mmen fókkun lamot ach sipwe túmúnúkich seni ewe ssárin ssenúkún mengiringir. Pwata? Pokiten Satan epwe fókkun pwapwa ika sia fangetá inaamwo ika Jiowa ese fangetánikich!​—Apépé ngeni 2 Korint 2:5-7, 11.

14. Ifa usun sipwe wesewesen silei pwe Jiowa ese fangetánikich?

¹⁴ Nge eli sipwe chúen ekieki, ‘Ifa usun upwe wesewesen silei pwe Jiowa ese fangetániei?’ Ika ka eáni ena kapas eis, a pwá pwe Jiowa a tongeni omusakoló. Fitu fitu ier a ló, The Watchtower a erá: “Eli sia kan tuttur lón ewe chék esin tipis. Neman pokiten sise pworacho ngeni ach apwangapwang me mwen  ach poputá le angang ngeni Kot. . . . Kosap ápilúkúngaw. Kosap ekieki pwe ka féri eú tipis Jiowa esap fókkun tongeni omusaaló. Ina met Satan a mochen kopwe lúkú. Ren enletin, óm meefi letipengaw me lichippúng ren pwisin en, a pwári pwe esap en emén aramas mi ngaw, me Jiowa a tongeni omusakoló. Kopwe tipetekison me tittingor án Kot epwe omusakoló, álisuk le eánisefáli eú mwelien letip mi limeliméch, me álisuk le úkútiw le féfféri ewe féffér mi mwáál. Emén semirit a kan tittingor án seman we álillis lón an osukosuk inaamwo ika a fen nóm lón ena esin osukosuk fán fite. Iwe, kopwe pwal tittingor án Jiowa álillis me I epwe álisuk pokiten an we úméúméch mi somwoló.” *

15-16. Met meefien ekkóch lupwen ra mirititi pwe Jiowa ese fangetániir?

¹⁵ Chómmóng néún Jiowa kewe aramas ra kúna ourur lupwen ra mirititi pwe Jiowa ese fangetániir. Áwewe chék, fitu ier ra ló, a chúng letipen emén Chón Kraist mwán ren pwóróusen emén lón Ewe Leenien Mas. Lón ena pwóróus, emén Chón Kraist fefin, a erá pwe a weires ngeni an epwe lúkú pwe Jiowa a tongeni tongei pokiten ekkewe mettóch mi ngaw a fis lón manawan me lóóm. A riáfféú ren ekkena memmeef pwal mwo nge mwirin fitu ier an papatais. Iwe nge, atun a ekilonei usun ewe méén kepich, a álisi le lúkú pwe Jiowa a tongei.

¹⁶ Ifa usun ena pwóróus a achchúngú letipen ena Chón Kraist mwán? A erá: “Lesáráfééi, fán chómmóng ua kan kakkatol sasingin me kachitoon kapasingaw me a fókkun weires ai upwe úkú seni. Kukkuto chék, ua ttursefál. Ua kútta álillis seni ekkewe Chón Kraist mwán mi ásimaw, iwe ekis me ekis ua pworacho ngeni ai na osukosuk. Ekkewe mwán mi ásimaw ra alúkúlúkú ngeniei usun án Kot tong me úméúméch. Nge fán ekkóch ua chúen meefi pwe ese wor aúcheai me usun itá Jiowa ese fókkun tongeni tongeei. Ai álleani pwóróusen [ena Chón Kraist fefin] a wesewesen álisiei. Iei ua mirititi pwe lupwen ua ekieki pwe Kot esap tongeni omusaeiló, iwe usun itá ua erá pwe ese naf án Néún we asor le pwélúoló ai kewe tipis. Ua fichiewu ena pwóróus pwe upwe tongeni  ákkálleani me ekkekilonei usun iteiten ua meefi pwe ese wor aúcheai.”

17. Ifa usun aposel Paulus a ttii seni ewe ssárin ssenúkún mengiringir?

¹⁷ Ekkena esin pwóróus ra áchemangenikich usun aposel Paulus. Me mwen an wiliti emén Chón Kraist a féri chómmóng tipis mi chou. Paulus a chemeni minne a féri nge ese kan ekkekieki usur. (1 Tim. 1:12-15) Me ren pwe ewe méén kepich ina án Kot liffang ngeni pwisin i. (Kal. 2:20) Ina minne, Paulus a ttii seni ewe ssárin ssenúkún mengiringir me a nefótófót wóón an fang ngeni Jiowa úkúkún an tufich.

18. Met sia fen káé lón ei lesen?

¹⁸ Met sia káé seni ach etittina ekkewe ssár sia pwóróus wóór lón ei lesen? (1) Ekkewe mettóch mi múrinné sia chemesefáli, iir liffang me ren Jiowa, inaamwo ika a múrinné manawach me lóóm nge manawach lón ewe ótót sefé epwe kon múrinné seni meinisin. (2) Eli ekkóch repwe eletipengawakich nge ika sia filatá le omusereló sia tongeni nefótófót wóón ach angang ngeni Jiowa iei. (3) Ssenúkún mengiringir a tongeni pinekich le angang ngeni Jiowa fán pwapwa. Ina minne, a lamot ach sipwe usun Paulus le lúkú pwe Jiowa a fen omusakicheló.

19. Ifa usun sia silei pwe lón ewe ótót sefé sisap chúen chechchemeni ekkewe mettóch mi áletipechowukich me lóóm?

¹⁹ Sia eáni ewe ápilúkúlúkún manaw esemuch. Atun sipwe nóm lón án Kot we ótót sefé, sisap chúen chemeni ese lifilifil met a eletipengawakich. Iei met ewe Paipel a apasa usun ena fansoun: “Esap chüen wor eman epwe chechemeni ekewe mettochun lom.” (Ais. 65:17) Ekieki mwo, ekkóch me leich sia fen chinnapeló lón ach angang ngeni Jiowa, nge lón ewe ótót sefé sipwe sáráfé sefál. (Hiop 33:25) Ina minne, sipwe tipeppós ach sisap múmmúúiti manawach me lóóm me lóóm, nge sipwe chék neweneweneló ngeni mwachkkan me achocho úkúkún ach tufich iei pwe sipwe nóm lón ewe ótót sefé!