1-2. Nemene la aqane tro sa trongëne la hna qaja ngöne Ite Edomë 4:25? Qaja jë la ketre ceitun.

 HANAWANG la itre hna melën celë. Kola mekune hmaca la itre drai ekö hnene la ketre trejine qatre föe. Ngacama tru la itre jol hnei eahlo hna cile kow enehila, ngo eahlo palahi a catre nyihlue i Iehova. (1 Kor. 15:58) Ame e nöjei drai, eahlo a lapa mekun la fene ka hnyipixe memine la itre sinee hna hnim. Nge ketre trejine föe a mekune hmaca la kola akötrë angeic hnene la ketre Keresiano, ngo angeic a thele troa thëthëhmine la hna kuca. (Kol. 3:13) Ame pena la ketre trejin trahmany, angeic a mekune hmaca la itre tria i angeic ekö, ngo aja i angeic troa catre mele nyipici koi Iehova.—Sal. 51:10.

² Nemene la hna kuca hnene la köni trejin? Hnei angatre hna mekune hmaca la itre drai ekö ngo tha angatre kö a wangatrune la itre drai cili. Angatre pe a ‘goeëne mekötine’ la itre drai elany.—E jë la Ite Edomë 4:25.

3. Pine nemene matre nyipiewekë tro sa ‘goeëne mekötine’ la itre drai elany?

³ Pine nemene matre nyipiewekë troa ‘goeëne mekötine’ la itre drai elany? Thatreine kö së troa tro meköt nge easë palahi a xei hutrö. Ketre tune fe, thatreine kö së troa catre nyihlue i Akötresie nge easë palahi a mekune la itre drai ekö.—Luka 9:62.

4. Nemene la hne së hna troa ce wang ngöne la tane mekun celë?

⁴ Ame ngöne la tane mekun celë, easa troa ce wang la köni ewekë ka upi së troa wangatrune la itre drai ekö. *  Kola qaja la (1) troa lapa mekun la itre drai hnapan, (2) troa lapa fë trengehni, me (3) mekune la itre tria hna kuca ekö. Ketre, tro sa ce wang la itre trepene meköt ka troa xatua së troa thëthëhmine ‘la itre ewekë hutrö’ me goeëne mekötine la ‘itre ewekë ka eje qëmeke së.’—Fil. 3:13.

5. Nemene la hna hmekë së ngöne la tusi Ate Cainöj 7:10?

⁵ E jë la Ate Cainöj 7:10. Tha kolo kö a qaja ka hape, ka ngazo troa mekune laka, ka lolo kö “la ite drai hnapan.” Ame la mekun, tre, ketre ahnahna lai qaathei Iehova. Önine la xötr: “The qaja kö, ka hape, Hna tune ka laka loi la ite drai hnapane hune la ite drai celë?” Eje hi, tha tro kö sa goeëne la eisapengönene la mele së ekö me mele së enehila me qaja ka hape, ka loi ju kö la mele së ekö.

6. Pine nemene matre tha tro kö sa qaja lapane ka hape, ka loi la mele së ekö? Qaja jë la ketre ceitun.

⁶ Pine nemene matre tha tro kö sa qaja lapane ka hape, ka loi la mele së ekö? Pine laka, ame la easa lapa mekun la itre drai hnapan, easa mekun la itre ewekë ka loi me wangacone la itre jol ka traqa ekö. Hanawang la hna melën hnei angetre Isaraela. Thupene la hna fek qa Aigupito, hnei angatr hna canga thëthëhmine la aqane akötrë angatr. Nemene la hnei angatr hna lapa mekun? Öni angatr: “Eësha mekune la ite ie hne shë hna öni gufa e Aigupito; ite kokuma, me ite wanathim, me ite liki, me ite salat, me ite galika.” (Num. 11:5) Ngo hapeu, ka “gufa” kö la itre xen cili? Waea. Hna thahluë angatr me qanangazo angatr hnei angetre Aigupito! (Eso. 1:13, 14; 3:6-9) Ame e thupen, thëthëhmine hë angatr la itre jole cili nge hnei angatre hmaca hna piin la mele i angatr ekö. Hnei angatr hna wangatrune la itre drai ekö nge tha öhne hë angatr la hnei Iehova hna kuca koi angatr. E cili, tha madrine hë Iehova.—Num. 11:10.

7. Nemene la ka xatuane la ketre trejine föe matre tha tro kö a lapa mekun la itre drai ekö?

⁷ Nemene la nyine troa kuca matre tha  tro kö sa lapa mekun la itre drai ekö? Hanawang la hna melën hnene la ketre trejine föe ka huliwa ngöne la Bethela e Brooklyn lo 1945. Itre macatre thupen, hnei eahlo hna faipoipo memine la ketre trejin ne la Bethela, nge hnei nyidro hna ce huliwa e cili koi itre macatre. Ngo ame lo 1976, hna tith la föi eahlo hnei mec. Nyidrëti hë a troa mec matre nyidrëti a xatua eahlo troa cile kow la jole cili. Öni nyidrë: “Hnei nyiso hna ce mele madrin. The wangatrune kö la itre drai ne ce mele so. Tro pë hë la itre drai a aupune la akötre i nyipo. The hleuhleu kö me treij. Mekune kö la itre drai ne ce mele madrin. Ame la itre mekune së ekö, ke, itre ahnahna lai qaathei Akötresie.” Drei la ketre eamo ka lolo catr!

8. Nemene la itre eloine hna kapa hnene la ketre trejin?

⁸ Hnene lai trejin hna drenge la föi eahlo. Hnei eahlo hna catre huliwa i Iehova uti hë la eahlo a mec, nge 92 lao macatre i eahlo. Qëmekene troa mec, öni eahlo: “Tru la madrineng ngöne la eni a mekune lo 63 lao macatre ne eni a huliwa koi Iehova.” Hnauëne la eahlo a madrin? Öni eahlo: “Easa madrin ke, hetre trejine me easë e cailo fen asë, nge easa mejiune troa ce mele me angatr ngöne la Paradraiso elany, me ce nyihluene la Atre Xupi së, Iehova Akötresieti ka caas, uti hë epine palua.” * Ketre tulu ka lolo koi së ke, hnei eahlo hna goeëne mekötine la itre drai elany!

9. Thenge la Levitiko 19:18, pine nemene matre ame itre xaa ijin, easa canga lapa fë trengehni?

⁹ E jë la Levitiko 19:18. Ijije hi tro sa lapa fë trengehni ngöne la kola akötrë së hnene la ketre trejin maine ketre sinee së pena. Hanawang la hna melën hnene la  ketre trejine föe. Hnene la ketre trejin hna upezö angeic ka hape, hnei angeic hna atrekënö manie. Thupene lai, hnene la trejin hna qeje menu koi angeic, ngo hnei angeic hna lapa fë trengehni. Hapeu, hna hane fe traqa koi epuni la jole cili? Maine jë hne së hna hane lapa fë trengehni me mekun laka, thatreine kö së troa thëthëhmine la ngazo hna kuca koi së.

10. Nemene la nyine troa kuca matre tha tro kö sa lapa fë trengehni?

¹⁰ Nemene la nyine troa kuca matre tha tro kö sa lapa fë trengehni? Ame la hnapan, tha tro kö sa thëthëhmine laka, pëkö ewekë ka sihngödri koi Iehova. Öhn asë hi Nyidrëti la itre ewekë ka tha meköti kö hna kuca koi së. (Heb. 4:13) Ame la easa akötr ke, Nyidrëti fe a akötr. (Is. 63:9) Ketre, Nyidrëti a thingehnaean laka, tro kö Nyidrëti a aupune la hni së ka akötr me nyinyine la itre jole cili.—Hna ama. 21:3, 4.

11. Nemene la itre eloin e tro sa thipetrije la elëhni?

¹¹ Eje hi, hetre eloin e tro sa thipetrije la elëhni. Celë hi lai hna trotrohnine hnene lo lai trejine föe hna upezön. Atreine hë eahlo xomehnöthe la elëhni. Ketre, atre hi eahlo laka, tro Iehova a nue la ngazo së e hne së hna nue la ngazo i itre xan. (Mat. 6:14) Tha hnei angeice kö hna wangatrune la hna kuca koi angeic, matre hnei angeic hna nue la ngazo. Madrine hë angeic, nge angeic a catre huliwa i Iehova.

12. Nemene la ini hne së hna xom qa ngöne la tusi 1 Ioane 3:19, 20?

¹² E jë la 1 Ioane 3:19, 20. Easë asë hi a mekune hmaca la itre tria hna kuca ekö. (Rom. 3:23) Ame la itre xan, angatr a mekun la itre ngazo hna kuca qëmekene troa atre la nyipici. Ame pena itre xan, angatr a mekun la itre ngazo hna kuca thupene la hna xomi bapataiso. Celë hi matre, ngacama easa thele troa kuca la loi, ngo “itre ka tria pala hi së.” (Iako. 3:2; Rom. 7:21-23) Eje hi, tha madrine kö së ngöne la easa mekun la itre tria së, ngo ame pe, hetre thangane ka loi. Pine nemen? Pine laka, celë hi ka troa xatua së troa saze me nuetrije la itre aqane ujë ka ngazo.—Heb. 12:12, 13.

13. Pine nemene matre tha tro kö sa mekune hmaca la itre tria së ekö?

¹³ Ketre, maine jë ase hë së ietrane la itre ngazo së, nge hna nue fe itre eje hnei Iehova, ngo easë palahi a mekun la itre tria së ekö. Celë hi matre easa hnehengazo me hleuhleu. (Sal. 31:10; 38:3, 4) Önine la ketre trejine föe ka mekun la itre tria i angeic ekö: “Ame koi ni, tha nyipiewekë kö troa huliwa i Iehova ke, tha tro kö ni a hane mel ngöne la Paradraiso.” Celë fe hi hna mekun hnene la itre xaa Keresiano. Ngo tha tro kö sa thëthëhmine laka, ketre hnö i Satana lai. Angeic a madrine ngöne la easa mekun laka, ka luzi hë së, ngo hna nue pe la itre ngazo së hnei Iehova!—Wange ju fe la 2 Korinito 2:5-7, 11.

14. Tro sa atre tune kaa laka, ase hë nue la ngazo së hnei Iehova?

¹⁴ Loi e tro sa isa hnying ka hape: ‘Tro ni a atre tune kaa laka, ase hë nue la ngazong hnei Iehova?’ Kolo hi lai a amamane laka, ijije hi tro Iehova a nue la itre ngazo së. Önine la ketre Ita Ne Thup: “Ame itre xaa ijin, easa tria me anyimua kei pine la itre ewekë ka ngazo hne së hna majemine kuca ekö. . . . Tha tro kö sa akötr me hleuhleu, me mekun laka, tha ijije kö  troa nue la itre ngazo së. Satana a ajane tro sa mekun tun. Maine kola huliwa la mekuthetheu së nge easa akötr, kolo hi lai a amamane laka, tha ka ngazo kö së. Loi e tro palahi sa hetre hni ne ipië me catre thith me sipone troa nue la itre ngazo së. Tune la nekönatr koi kem, loi e troa easenyi koi Iehova ngöne la easa akötr, nge tro kö Nyidrëti a xatua së.” *

15-16. Nemene la mekuna ne la itre trejin ngöne la angatr a öhn laka, hnei Iehova hna nue la ngazo i angatr?

¹⁵ Ame la itre xaa hlue i Iehova, hna akeukawane la hni angatr la Iehova a nue la ngazo i angatr. Hanawang la tulu ne la ketre trejin ekö. Hna ketr la hni nyidrë hnene la hna qaja hnene la ketre trejine föe ngöne la götrane hna hape, “Saze Hë La Mel, Hnei Tusi Hmitrötr.” Ame koi eahlo, thatreine kö Iehova troa hnimi eahlo pine la itre ewekë hnei eahlo hna kuca ekö. Celë hi aqane mekune i eahlo thupene la eahlo a xomi bapataiso. Ngo ame hë la eahlo a lapa mekun la thupene mel, kolo ha saze la mekuna i eahlo. *

¹⁶ Nemene la aqane xatuane la trejin hnene la hna melën hnei eahlo? Öni nyidrë: “Ame lo eni a nekötrahmanyi hnenge hna majemine goeë iatr ka sis. Hnenge hna isi matre troa nuetrije la aja cili ka ngazo. Ngo hnenge hmaca hna kei. E cili, hnenge hna thele ixatua thene la itre qatre thup. Hnei angatr hna amamane laka, Iehova a hnimi ni nge aja i Nyidrëti troa nue la ngazong. Ame enehila, atreine hë ni xomihni. Ngo eni palahi a mekun laka, tha nyipiewekë kö ni koi Iehova nge tha tro jë kö Nyidrëti a hnimi ni. Hnene la hna melën hnene lai trejin föe hna xatua ni. Eje hi, maine tro sa mekun laka, thatreine kö Akötresie troa nue la itre ngazo së, easë hi lai a wangacone la mele hna huujën hnei Iesu, Nekö i Nyidrë. E cili, hnenge hna amë hnyawa la tane mekun ka qeje eahlo, matre tro ni a e ngöne la eni a kucakuca.”

17. Nemene la ka xatua Paulo matre tha tro kö a lapa mekun la itre ngazo hna kuca ekö?

 ¹⁷ Kola amekunë së hnene la hna melën ne la lue trejin, la tulu i Paulo aposetolo. Qëmekene tro Paulo a ketre Keresiano, hnei nyidrëti hna kuca la itre ewekë ka ngazo. Tha thëthëhmine kö nyidrë la itre tria i nyidrë, ngo ame pe, tha hnei nyidrëti kö hna mekun lapan itre ej. (1 Tim. 1:12-15) Ame koi Paulo, ketre ahnahna qaathei Iehova la thupene mel. (Gal. 2:20) Celë hi ka xatua nyidrë matre tha tro kö a lapa mekun la itre ngazo hna kuca ekö, ngo tro pe a catre huliwa i Iehova.

18. Nemene la hne së hna ce wang ngöne la tane mekun celë?

¹⁸ Nemene la ini hne së hna xom qa ngöne la köni hnö i Satana? (1) Ketre ahnahna qaathei Iehova la easa mekune la itre ewekë ekö. Eje hi, ka madrine la mele së ekö. Ngo the qaja palaha la itre manathith hne së hna troa kapa elany. (2) Loi e tro sa nue la ngazo hna kuca koi së. Celë hi ka troa xatua së troa catre huliwa i Iehova. (3) Maine tro palahi sa mekun la itre tria së ekö, tro hë lai a ajolë së troa nyihlue i Iehova. Haawe, tui Paulo, loi e xecie koi së laka, tro Iehova a nue la itre ngazo së.

19. Nemene la ka amamane laka, tha tro hmaca kö sa mekun la itre tria së ekö?

¹⁹ Easa mejiune troa mel epine palua. Ame ngöne la fene ka hnyipixe, tha tro hmaca kö sa mekun la itre tria së ekö. Öni Tusi Hmitrötr: “Tha tro hmaca kö a mekune la hnapan.” (Is. 65:17) Pane mekune jë la itre trejin ka nyihlue i Iehova koi itre macatre. Ame ngöne la fene ka hnyipixe, tro hmaca angatr a thupëtresij! (Iobu 33:25) Haawe, the mekune hmaca kö la itre drai hnapan. Goeëne jë la mel elany memine la itre manathith hne së hna lapa treqen!