1-2. Nka gurhe rhwakakolesa ehano lili mu Mezali 4:25? Lerha omufano.

WAZA kw’eyila mifano esharhu. Mwali-werhu oshajire ali ayibuka ebisanzi binja ageragamo mira. Chiro akaba oku ali ahurana bibazo binene omu kalamo zene, agenderere kujira okwage koshi agalire omu kasi ka Yehova. (1 Ko. 15:58) Buli lusiku anayinja ayibuka changwa kuwaza gurhe yewe n’abazigirwa bage nji baba balamire haguma omu gulu lihyahya. Owindi mwali-werhu ali ayibuka gurhe owabo Mukristu muguma amuvunaga omurhima, aliko amabona oku ayibagire ebyola. (Kol. 3:13) Mwene-werhu ali ayibuka amabi ajiraga, aliko lero, asezeze obwenge bwage omu kubera mwimana embere za Yehova.​—Zb. 51:10.

² Ngahe ehali z’abala Bakristu basharhu zibuganene? Boshi bali bayibuka ebyabahikiraga omu kalamo mira, aliko barhachigenderere kuwaza bwenene kw’ebyola bintu. Ahubwe, “basezeze amasu embere” oku siku zayinja.​—Osome Mezali 4:25.

3. Bulagurhe rhukwanene ‘kuseza amasu embere’ oku siku zayinja?

³ Bulagurhe kuli kwinja “oseze amasu” oku siku zayinja? Nka kulala omuntu arhakagala kugenderera kulambagira oku mustari gunyorokere anali agenderera kulola enyuma, nerhu rhurhakagala kukolera Yehova bwinja nka rhugenderere kuwaza oku bintu rhwageragamo omu kalamo mira.​—Lu. 9:62.

4. Bichi rhwaganirako mu gunola mwazi?

⁴ Mu gunola mwazi, rhwaganira ku bintu bisharhu byakarhuma rhwagenderera kuwaza oku bintu byagerere. * Byebinola: 1) Okuchifija ebyagerere, 2) okubika omujinya, na 3) okuchibona munya-magosa kurhalusa olugero. Mu buli chintu, rhwabona nka gurhe amakanuni me Biblia makarhurhabala, arhali mpu omu kuchiseza oku “bintu byagerere,” saliko omu kuchiseza oku “bintu bili embere.”​—Flp. 3:13.

5. Bichi olwandiko lwa Muhubiri 7:10 luderhere rhurhakwanene kujira?

⁵ Osome Muhubiri 7:10. Tala oku olula lwandiko luderhere oku kurhali kubi kuchibaza ntya: “Bulagurhe esiku za mira zaliri zinja?” Obuhashe b’okuyibuka amenja magerere, luli luhembo lurhengere emwa Yehova. Ahubwe, olula lwandiko luderhere ntya: “Orhabazaga, ‘Bulagurhe esiku za mira zaliri zinja kulusha eza buno?’” Che chirhumire rhurhakwanene kuhuzanya akalamo rhwalilamire mira n’akarhulamire zene, n’okuwaza oku buli chintu chibihire bwenene bunola. Eyindi tafsiri ye Biblia ederhere olula lwandiko ntya: “Nta kuchibaza, ‘Berhu we, bulagurhe ebintu byalivire byakwira bwenene omu siku za mira?’ Chirhali chibazo ch’obwenge.”

6. Bulagurhe kurhali kwinja rhugenderere kuwaza oku akalamo kerhu ka mira kaliri kenja bwenene? Lerha omufano.

⁶ Bulagurhe kurhali kwinja rhugenderere kuwaza oku akalamo kerhu ka mira kaliri kenja bwenene? Okuchifija ebyagerere kwarhuma rhwahwanza kuyibuka ebintu binja byonyine bya mira. Changwa kwarhuma rhwahwanza kuyibagira amabi rhwahuranaga namo. Rhushambale oku mufano gwa Baizraeli. Oku banamala kurhenga omu Misri ntya, bayurukira bayibagira akalamo kabi balilamiremo eyola munda. Ahubwe, balema baseza obwenge bwabo oku kalyo kenja baliri bapata. Baderha ntya: “Rhwamayibuka efi za busha rhwaliri rhwalya Emisri, n’amakonkombre, amapasteke, amapwaro, amatunguru, n’amaturungu-sumu!” (Hes. 11:5) Aliko si kweri, ebilyo baliri balya byanaliri “bya busha”? Nanga. Abaizraeli baliri balibuka bwenene; mw’akola kasanzi, balibahebere omu buja bukomere bwenene omu Misri. (Kut. 1:13, 14; 3:6-9) Aliko, bayinja yibagira amola maligo moshi n’okuhwanza kuchifija ebyagerere. Bachishoga kuchiseza oku “binja byagerere” baliri bapata Emisri ahali h’okuchiseza oku binja Yehova aliri abajirira mw’agola mango. Yehova arhasimiswaga n’oborhere bwabo.​—Hes. 11:10.

7. Bichi byarhabalaga mwali-werhu muguma aleke kujifija ebyagerere?

⁷ Nka gurhe rhwakalekana n’engeso y’okuchifija ebyagerere? Waza oku mufano gwa mwali-werhu muguma wahwanzaga kukolera oku Beteli ye Brooklyn omu mwaka gwa 1945. Enyuma  ya myaka migeke, mwene-werhu w’okola Beteli amushaba, banakolera okola Beteli bombi mu myaka minene. Aliko mu mwaka gwa 1970, eba ahwanza kulwala. Oyola mwali-werhu aderha oku amango eba abona oku olufu lwage luli hofi, amuhereza amahano menja m’okumurhabala enyuma y’olufu lwage. Amubwira ntya: “ Rhwaligwerhe obusime omu bunyumpa bwerhu. Banene barhalibapata obusime buli nk’obola omu bunyumpa bwabo. Oseze amasu embere, bulala eyola munda y’eli oluhembo lyawe. Orhagendereraga kuwaza oku bya mira chiro akaba oku wakabiyibuka. Wafuma, okw’esiku zili zagera. Orhabikaga omujinya changwa mp’ochiyunvire obonjo. Ogwarhe omwishingo bulala wapatire obusime n’eyola migisho. Buzinda, wanajawabona oku ebya mira oyibukire byakulerhera obusime. . . . Obuhashe b’okuyibuka luli luhembo Mungu arhuhere.” Elyola lyalili hano linja bwenene!

8. Nyungu zichi mwali-werhu alipatire omu kukolesa ehano eba amuhaga?

⁸ Oyola mwali-werhu abika ebyola binwa oku murhima. Akolera Yehova oku bwimana kugera amango afaga ey’agwerhe myaka 92. Myaka migeke embere afe, aderha ntya: “Eyi nayibuka myaka erhalwise 63 namalire omu kasi ka Yehova k’amango moshi, oku bwani nakaderha oku naligwerhe akalamo k’obusime bunene.” Bulagurhe? Afasiriya ntya: “Echilerha obusime omu kalamo, kuli kulama omu mulala guzibu-zibu gwa bene-berhu na bali-berhu, n’obulangalalire b’okulama haguma nabo omu paradizo kunola gulu, eyi rhuli rhwakolera Omulemi werhu Mukulu, Mungu muguma w’okuli, Yehova, esiku n’amango.” * Ogola mufano gwa mwali-werhu walisezeze obwenge oku bilagane bya Yehova, gurhuyigirize bintu binene bwenene!

9. Nk’oku olwandiko lwa Walawi 19:18 luderhere, mango mahe byakarhukomerera okubabalira omuntu warhugayisaga?

⁹ Osome Walawi 19:18. Rhunabona nka bikomere okurhagenderera kubika omujinya, amango omuntu warhujiriraga kubi ali werhu  Mukristu, mwira w’oku murhima changwa muntu w’omu mulala. Omufano, mwali-werhu muguma abesheraga owindi mwali-werhu oku amuzimbire efuranga. Buzinda, oyola mwali-werhu wabasheraga owabo, achigalukako n’okuhema obonjo, aliko mwali-werhu babesheraga agenderera kuwaza kw’ebyola byageraga. Wachigerere kuchiyunva ntyo si? Chiro akaba rhurhasaga kuhurana echibazo chili nk’echola, nkabaga banene mu rhwewe bachigerere kubika omujinya n’okuwaza oku barhakwanene kubabalira muntu mulebe wabagayisaga.

10. Bichi byakarhurhabala amango rhugwerhe omujinya?

¹⁰ Bichi byakarhurhabala amango rhugwerhe omujinya? Rhukwanene kuyibuka oku Yehova ali abona buli chintu. Ali abona buli chintu bali barhukolera kuheba han’omulyagane rhuli rhwahurana nago. (Ebr. 4:13) Anachiyunva kubi amango rhuli rhwalibuka. (Isa. 63:9) Analaganyize ku kweri amala buli kahinda kali kalerhwa n’ebintu bili byarhuhikira omu kalamo.​—Ufu. 21:3, 4.

11. Nka gurhe rhwakachiyunva bwinja bwenene amango rhwamababalira abandi?

¹¹ Rhunakwanene rhuyibuke oku, rhwachiyunva bwinja bwenene amango rhwamababalira abandi. Echola ch’olala mwali werhu babesheraga ayinjaga kuyibuka. Hagera amango abona oku ababalire mwali-werhu wamubesheraga oku amuzimbire efuranga n’okuleka kumubikira omujinya. Ayinja bona oku amango rhwamababalira abandi, Yehova naye anarhubabalira. (Mt. 6:14) Alimenyere okw’echoyola mwali-werhu ajiraga chaliri chibi, aliko abona oku alekane n’omujinya. Okujira ntyo kwarhuma oyola mwali-werhu agwarha obusime, n’okushuba kuchiseza oku kasi ka Yehova.

12. Bichi olwandiko lwa 1 Yohana 3:19, 20 lurhuyigirize?

¹² Osome 1 Yohana 3:19, 20. Rhweshi, hanagera amango rhwachibona banya-magosa. Omufano, baguma banachibona ntyo, eju y’ebintu bibi baliri bakola embere bayige okuli. Abandi banachibona banya-magosa eju y’amabi bajiraga enyuma y’okubatizwa. (Ro. 3:23) Kweri, rhulonzeze kujira amenja. Aliko “rhweshi rhunasirhala-sirhala.” (Yak. 3:2; Ro. 7:21-23) Chiro akaba oku rhurhasima oku chibona banya-magosa, okuchiyunva ntyo kurhali kubi. Bulagurhe? Bulala okuchibona munya-magosa kwarhuma rhwahindamula engeso zerhu n’okuhigirira okurhagalukira amola mabi rhwajiraga.​—Ebr. 12:12, 13.

13. Bulagurhe rhukwanene kuleka kuchibona banya-magosa kurhalusa olugero?

¹³ Kandi byakashobokana okuchibona banya-magosa kurhalusa olugero, k’okuderha, okugenderera kuchibona banya-magosa enyuma y’okumala kuhungama, na Yehova amalire kuyerekana oku arhubabalire. Okuchiyunva ntyo kwakalerha obuhanya. (Zb. 31:10; 38:3, 4) Bulagurhe? Rhushambale oku mufano gwa mwali-werhu muguma wangererega kuchibona munya-magosa eju y’ebyaha ajiraga mira. Aderha ntya: “Naliri nawaza oku nakabere indinamala ebisanzi byani oku busha omu kasi ka Yehova, bulala nkabaga ntakayokolwa.” Banene mu rhwewe bakachiyunva nk’oyola mwali-werhu. Che chirhumire rhukwanene okuchilanga yi rhurhagenderera kuchibona banya-magosa kurhalusa olugero. Bulagurhe? Bulala Shetani akasima bwenene nka rhulekere kukolera Yehova, n’obola Yehova yewe arhubabalire!​—Ohuzanye na 2 Wakorinto 2:5-7, 11.

14. Bichi byakarhurhabala rhuchizere oku Yehova arharhujahikaga?

¹⁴ Aliko, hali oku rhwakalema rhwachibaza ntya, ‘Gurhe nakamenya oku Yehova arhaza kunjahika?’ Kweri, okuchibaza echola chibazo, kuyerekene oku Yehova akakubabalira. Hamagera myaka minene, Omunara g’Omulanzi guderhere ntya: “Hali oku [rhwakalema] rhwagalukira-galukira elyola gosa ly’en’elyo, byakanabonekana nka rhurhagwerhe buhashe  b’okulihima. . . . Omenye wakavunika omurhima. Orhawazaga oku wajirire echaha Yehova arhakababalira. Intyo ku Shetani asimire owazage. Okubona gurhe oli wachiyunva kubi n’okuchibona munya-magosa amango wajiraga echola chaha, kuyerekene oku orhali muntu mubi n’oku Yehova akakubabalira. Ogenderere kuba mwirhohye onagenderere kusalira Mungu akubabalire, anakurhabale ochese amawazo mawe n’okukurhabala orhachigalukiraga elyola gosa. Omuyegere nka kulala omwana anayegere eshe amango m’echibazo, buzira kuganja kangana gurhe wajirire elyola gosa, Yehova akubabalira kugerera olukogo lwage lurhakwanenwe.”

15-16. Gurhe bantu baguma balichinyurhe, amango bamenya oku Yehova arhaza kubajahika?

¹⁵ Banene omu bantu ba Yehova baheberwe omurhima omu kumenya oku Yehova arhaza kubajahika. Omufano, omu myaka egerere, mwene-werhu muguma aliheberwe omurhima omu kumala kusoma omwazi guderhere “Ebiblia Enahindamula Akamo k’Abantu.” Mw’ogola mwazi, mwali-werhu muguma aliderhere oku kugerera ebintu bibi byamuhikiraga omu kalamo, byalimukomerere kuyemera oku Yehova akamuzigire. Anagenderera kuwaza ntyo mu myaka minene enyuma y’okubatizwa kwage. Aliko amango awazaga bwenene eju y’enchungu, ahwanza kuhindamula amawazo mage n’okuyemera oku Yehova amuzigire. *

¹⁶ Nka gurhe ebi mwali-werhu ageragamo omu kalamo byalirhabere oyola mwene-werhu? Ayandika ntya: “Amango nalichili mudorho, nakazaga sima kulola epornografi bwenene n’okubona oku ntakagala kuyileka. Harhazi legama, nshubire kuyilola. Nahema oburhabale bw’abashamuka, nanajira amaja-mbere omu kuhima echola chibazo chani. Abashamuka bantabala kuyemera oku Yehova anzigire analonzeze kumbabalira. Aliko mango maguma, nagenderera kuchibona munya-magosa n’okuwaza oku Yehova arhakachinzigira. Kweri okusoma ebyahikiraga oyola mwali-werhu omu kalamo kwantabere. Nkala menyere oku amango namahwanza kuwaza oku Yehova arhambabalire, eyi nandi nk’oli aderha oku enterekero y’Omugala erhagwerhe buhashe b’okufunika ebyaha byani. Nacha amakaratasi mali k’ogola mwazi, bobola nkala nakagusoma n’okuguwazako buli mango namahwanza kuwaza oku Yehova arhanzigire.”

17. Bichi byarhabalaga entumwa Paulo eleke kuchibona munya-magosa kurhalusa olugero?

 ¹⁷ Ebyola birhuyibwise entumwa Paulo. Alikolere byaha binene bwenene bikomere embere y’okuba Mukristu. Paulo aliri ayibuka ebyajiraga embere, aliko, arhagendererega kuwaza bwenene kw’ebyola bintu. (1 Tim. 1:12-15) Alibwene enterekero y’enchungu nka luhembo Mungu amuhere bwage-bwage. (Gal. 2:20) Bobola Paulo aleka kuchibona munya-magosa kurhalusa olugero, si aj’achiseza omu kukolera Yehova okwage koshi agalire.

18. Bichi rhwayigire mu gunola mwazi?

¹⁸ Bichi ebintu rhwaganirireko mw’ogula mwazi byarhuyigirize? 1) Obuhashe b’okuyibuka ebyagerere, luli luhembo lurhengerere emwa Yehova; aliko chiro akaba akalamo kerhu kamira kalikwirire kangana gurhe, akalamo nji rhwalama omu gulu lihyahya ka nji kaba kenja bwenene kulusha. 2) Hali oku abandi bakarhuvuna omurhima, aliko amango rhwamachishoga okubababalira, ahola rhwanaja rhwagala kuchiseza oku kasi ka Yehova zene. 3) Okuchibona munya-magosa kurhalusa olugero, kwakarhuma rhurhakolera Yehova. Bobola, kuguma na Paulo, rhukwanene kuyemera oku Yehova arhubabalire.

19. Bichi birhuyerekere oku nta kantu chiro n’akatyu kakarhugayisa nji rhwayibuka omu gulu lihyahya?

¹⁹ Rhugwerhe obulangalire b’okulama esiku n’amango. N’amango nji rhwaba rhuli omu gulu lihyahya, rhurhakachiyibuka chiro n’akantu kaguma kakarhugayisa. Ebiblia ederhere ntya eju y’amola mango: “Ebintu bya mira birhakachigaluka omu bwenge.” (Isa. 65:17) Lero jaga wawaza: Baguma mu rhwewe bashajire omu kasi ka Yehova, aliko omu gulu lihyahya, nji rhwashuba kuba misole. (Yob. 33:25) Rhujage rhwahigirira okurhachifija ebyagerere. Ahali h’okujira ntyo, rhuseze obwenge bwerhu oku gulu lihyahya, n’okujira okwerhu koshi rhugalire yi nji rhulihikamo!