1-2. Paano naton iaplikar ang laygay sa Hulubaton 4:25? Maghatag sing halimbawa.

IMADYINA ining tatlo ka sitwasyon. Ginapamensar sang isa ka tigulang na nga sister ang iya maayo nga mga eksperiensia sang una. Bisan pa nabudlayan na sia subong, ginahimo niya gihapon ang iya bug-os nga masarangan para kay Jehova. (1 Cor. 15:58) Kada adlaw ginapamensar niya nga ara na sia sa Paraiso kaupod ang iya pamilya kag mga abyan. Nadumduman naman sang isa ka sister ang indi maayo nga ginhimo sa iya sang isa ka utod nga nagpalain sang iya buot, pero ginpalampas niya ini kag ginatinguhaan niya nga indi ini pirme pagpamensaron. (Col. 3:13) Nadumduman naman sang isa ka brother ang sala nga nahimo niya sang una, pero nagpokus sia sa mga dapat niya himuon para mangin matutom sia kay Jehova.—Sal. 51:10.

² Lainlain ang eksperiensia sining tatlo ka utod, pero may pareho sila nga ginhimo. Ano ini? Nadumduman nila ang natabo sa ila sang una, pero wala nila ini pirme ginapamensar. Sa baylo, ‘nagtulok sila sing diretso’ ukon ginhunahuna nila ang maayo nga palaabuton.—Basaha ang Hulubaton 4:25.

3. Ngaa dapat kita “magtulok sing diretso” sa palaabuton?

³ Ngaa importante nga ‘magtulok kita sing diretso’ sa palaabuton? Indi makalakat sing tadlong ang tawo nga pirme lang nagabalikid. Pareho man ini sa aton pag-alagad kay Jehova. Indi naton sia maalagad sa bug-os naton nga masarangan kon pirme lang naton ginapamensar ang mga natabo ukon mga nahimo naton sang una.—Luc. 9:62.

4. Ano ang binagbinagon naton sa sini nga artikulo?

⁴ Sa sini nga artikulo, binagbinagon naton ang tatlo ka balatyagon nga nagaimpluwensia sa aton nga magpokus sa nagligad. Amo ini ang (1) paghunahuna nga mas maayo ang aton kabuhi sang una, (2) paghinakit, kag (3) pagpamensar nga indi na kita mapatawad ni Jehova. Binagbinagon naton ang mga prinsipio sa Biblia nga makabulig sa aton nga indi magpokus sa “mga butang sa likuran,” kundi sa “mga butang sa unahan.”—Fil. 3:13.

5. Ano ang ginasiling sang Manugwali 7:10 nga indi naton dapat paghimuon?

⁵ Basaha ang Manugwali 7:10. Ini nga teksto wala nagasiling nga sala ang magpamangkot: “Ngaa maayo ang kabuhi sang una?” Regalo ni Jehova ang maayo nga mga eksperiensia nga pirme naton madumduman. Sa baylo, amo ini ang aton mabasa: “Indi ka magsiling, ‘Ngaa mas maayo sang una sangsa subong?’” Gani indi gid naton pag-ipaanggid ang aton kabuhi sang una sa aton kabuhi subong, kag indi gid naton paghunahunaon nga mas nagbudlay ang aton sitwasyon. Amo ini ang ginasiling sang isa ka bersion sang Biblia: “Indi ka gid magpamangkot, ‘Ngaa maayo iya sang una sang sa karon?’ Indi amo ini ang pamangkot sang maalam.”

6. Ngaa indi husto nga pamensaron naton pirme nga mas maayo ang aton kabuhi sang una? Maghatag sing halimbawa.

⁶ Ngaa indi husto nga pamensaron pirme nga mas maayo ang aton kabuhi sang una? Bangod posible nga hunahunaon lang naton ang aton maayo nga mga eksperiensia kag malipatan na naton ang mga malain. Binagbinaga ang natabo sa mga Israelinhon sang una. Paggua nila sa Egipto, nalipatan nila dayon kon daw ano kabudlay ang ila kabuhi didto. Ang manamit nga pagkaon sa Egipto amo ang pirme nila ginapamensar. Nagsiling sila: “Nadumduman gid namon ang isda nga ginakaon namon sa Egipto nga wala sing bayad, ang mga pipino, ang mga sandiya, ang mga sibuyas, kag ang mga ahos!” (Num. 11:5) ‘Wala gid man bala sing bayad’ ini nga mga pagkaon? Daku gid ang ginbayad sang mga Israelinhon kay ginpigos sila kag gin-ulipon sa Egipto. (Ex. 1:13, 14; 3:6-9) Pero nalipatan nila ang gin-antos nila nga mga kabudlayan. Nagpokus sila sa nadumduman nila nga nagustuhan nila imbes nga sa mga ginhimo ni Jehova para sa ila. Wala gid nalipay si Jehova sa ila.—Num. 11:10.

7. Ano ang nakabulig sa isa ka sister nga indi paghunahunaon nga mas maayo ang kabuhi niya sang una?

⁷ Ano ang himuon naton para indi naton paghunahunaon nga mas maayo ang aton kabuhi sang una? Binagbinaga ang halimbawa sang isa ka sister nga nag-alagad sa Bethel sa Brooklyn sugod sang 1945. Pagligad sang pila ka tuig, napamana niya ang isa ka Bethelite, kag padayon sila nga nag-alagad sa Bethel sa sulod sang madamo nga tinuig.  Pero sang 1976, nagmasakit ang iya bana. Nagsiling ang sister nga sang nabatyagan sang iya bana nga malapit na lang sia mapatay, may ginsiling sia nga maayo gid nga mga laygay nga nakabulig sa iya sang balo na sia. Ang iya bana nagsiling: “Malipayon ang aton pag-asawahay. Madamo nga tawo ang wala gid makaeksperiensia sini.” Dayon ginpalig-on sia sang iya bana: “Kalimti ang nagligad—bisan pa nga ang imo mga handumanan nagapadayon. Tion ang makapaumpaw sa imo. Indi magpangakig kag magbatyag sing kaluoy sa imo kaugalingon. Magkalipay ka bangod may yara ka sini nga kalipay kag mga pagpakamaayo. . . . Ang mga handumanan regalo sang Dios sa aton.” Indi bala nga maayo gid ini nga laygay?

8. Ano ang maayo nga resulta bangod wala ginhunahuna sang aton sister nga mas maayo ang kabuhi niya sang una?

⁸ Gin-aplikar sang aton sister ang laygay sang iya bana. Matutom sia nga nag-alagad kay Jehova asta nga napatay sia sang 92 anyos na sia. Mga pila ka tuig antes sia napatay, nagsiling sia: “Sa paghinumdom ko sa kapin sa 63 ka tuig nga bug-os tion nga pag-alagad kay Jehova, masiling ko nga makaalayaw gid ang akon kabuhi.” Ngaa nasiling niya ini? Amo ini ang paathag niya: “Ang labi pa gid nga nagahatag sing kaayawan sa akon kabuhi amo ang amon tumalagsahon nga paghiliutod kag ang paglaum nga magkabuhi upod sa amon mga kauturan sa paraiso nga duta, nga nagaalagad sing dayon sa aton Daku nga Manunuga, ang lamang matuod nga Dios, si Jehova.” * Maayo gid nga halimbawa ini nga sister parte sa pagpokus sa maayo nga palaabuton.

9. Suno sa Levitico 19:18, sa ano nga sitwasyon nga mahimo nabudlayan kita nga magpatawad?

⁹ Basaha ang Levitico 19:18. Kon kaisa, nabudlayan kita nga patawaron ang aton utod, abyan, ukon paryente nga nakasakit sa aton. Halimbawa, nagsiling ang isa ka sister nga ginkawat kuno sang isa ka sister ang iya kuarta, pero narealisar niya nga nagsala sia gani nangayo sia sing pasaylo. Pero nagahinakit gihapon ang ginpasibangdan nga sister. Naeksperiensiahan mo naman  bala nga maghinakit sa iban? Bisan pa wala naton maeksperiensiahan ang natabo sa sister, ang kalabanan sa aton nakabatyag man nga daw indi naton mapatawad ang nagpalain sa aton sing buot gani naghinakit kita.

10. Ano ang makabulig sa aton kon nagahinakit kita?

¹⁰ Ano ang makabulig sa aton kon nagahinakit kita? Dapat naton dumdumon nga makita ni Jehova ang tanan. Nabal-an niya ang tanan naton nga naeksperiensiahan lakip na ang indi maayo nga ginhimo sa aton. (Heb. 4:13) Nasubuan sia kon nagaantos kita. (Isa. 63:9) Kag nagpromisa sia nga dulaon niya ang tanan nga kasakit nga aton nabatyagan bangod sa indi maayo nga ginhimo sa aton.—Bug. 21:3, 4.

11. Ano ang mga benepisyo sa aton kon indi kita maghinakit?

¹¹ Dapat man naton dumdumon nga kon patawaron naton ang nakasala sa aton, makabenepisyo gid kita. Narealisar ini sang ginpasibangdan nga sister. Sang ulihi, ginpatawad niya ang sister nga nagsumbong sa iya. Nangin maathag sa iya nga kon ginapatawad naton ang iban, patawaron man kita ni Jehova. (Mat. 6:14) Kabalo sia nga sala ang ginhimo sa iya sang sister, pero wala na sia naghinakit. Bangod sini, nangin mas malipayon ang aton sister kag nagpokus sia sa iya pag-alagad kay Jehova.

12. Ano ang matun-an naton sa ginasiling sang 1 Juan 3:19, 20?

¹² Basaha ang 1 Juan 3:19, 20. Tanan kita ginakonsiensia kon kaisa. Halimbawa, ang iban ginakonsiensia bangod sa nahimo nila sang una antes nila natun-an ang kamatuoran. Ang iban naman ginakonsiensia bangod sa nahimo nila nga sala sang bawtismado na sila. (Roma 3:23) Gusto gid naton himuon ang husto. Pero “kita tanan nagakasandad sing madamong beses.” (Sant. 3:2; Roma 7:21-23) Nasubuan kita kon ginakonsiensia kita, pero makabulig man ini sa aton. Paano? Mapalig-on kita sini nga maghimo sang mga pagbag-o sa aton kabuhi kag magpanikasog nga indi na masulit ang aton mga sala.—Heb. 12:12, 13.

13. Ngaa indi kita dapat magbatyag nga indi na gid kita mapatawad?

¹³ Pero bisan pa nga ginpatawad na kita ni Jehova, posible nga ginakonsiensia man kita gihapon. Indi gid ini maayo. (Sal. 31:10; 38:3, 4) Ngaa? Binagbinaga ang halimbawa sang isa ka sister nga ginakonsiensia gihapon bangod sa iya nahimo nga mga sala sang una. Nagsiling sia: “Ginhunahuna ko nga wala man gihapon sing pulos kon ihatag ko ang akon bug-os nga masarangan sa akon pag-alagad kay Jehova kay basi indi man ako maluwas.” Madamo sa aton nga amo man ini ang ginabatyag. Gani importante gid nga indi kita magpadaug sa sini nga balatyagon. Ngaa? Bangod malipay gid si Satanas kon mag-untat kita sa pag-alagad kay Jehova bisan pa ginpatawad na kita ni Jehova.—Ipaanggid ang 2 Corinto 2:5-7, 11.

14. Ngaa makasalig kita nga ginapatawad kita ni Jehova?

¹⁴ Pero mahimo nagapalibog kita, ‘Paano ko masigurado nga ginpatawad na ako ni Jehova?’ Kon ginapamangkot mo ini, ginapakita sini nga mapatawad ka ni Jehova. Madamo na nga tinuig ang nagligad, ang The Watchtower nagsiling: “Posible nga sulitsulit naton nga mahimo ang amo gihapon nga sala. Posible nga wala pa naton mabag-o ang malain nga batasan nga ara na sa aton antes pa kita nag-alagad sa Dios. . . . Indi kita dapat madulaan sing paglaum. Indi naton paghunahunaon nga indi na gid kita mapatawad ni Jehova sa nahimo naton nga sala. Amo ina ang gusto ni Satanas nga hunahunaon naton. Bangod nasubuan ka sa nahimo mo nga sala, ginapakita sini nga indi ka malain nga tawo kag mapatawad ka ni Jehova. Magpabilin nga mapainubuson kag pirme mangamuyo sing hanuot sa Dios nga patawaron ka, buligan ka nga mangin matinlo ang imo konsiensia, kag buligan ka nga indi mo na masulit ang imo sala. Magpabulig kay Jehova nga daw pareho sa isa ka bata nga nagapabulig sa iya amay kon may problema sia. Bisan pa sulitsulit ka nga  magpabulig kay Jehova sa amo gihapon nga problema, buligan ka gid niya bangod sang iya wala tupong nga kaayo.” *

15-16. Ano ang nabatyagan sang pila naton ka utod sang narealisar nila nga ginpatawad na sila ni Jehova?

¹⁵ Madamo nga alagad ni Jehova ang nalipay gid sang narealisar nila nga ginpatawad sila ni Jehova. Halimbawa, mga pila ka tuig na ang nagligad, napalig-on gid ang isa ka brother sa nabasa niya sa isa ka artikulo nga “Ang Biblia Nagapabag-o sang Kabuhi.” Sa sini nga artikulo, nagsiling ang isa ka sister nga bangod sang iya naeksperiensiahan sang una, nabudlayan sia nga magpati nga palangga sia ni Jehova. Amo sini gihapon ang iya ginabatyag bisan pa tinuig na sia nga nabawtismuhan. Pero nagbag-o ini sang ginpamalandungan niya ang parte sa gawad. *

¹⁶ Paano nakabulig sa brother ining eksperiensia sang sister? Ang brother nagsulat: “Sang pamatan-on pa ako, naadik ako sa pornograpiya kag nabudlayan gid ako nga untatan ini. Sining karon lang, ginhimo ko ini liwat. Nagpabulig ako sa mga gulang kag amat-amat ko nga nabatuan ang akon kaluyahon. Ginpasalig sa akon sang mga gulang nga palangga ako sang Dios kag gusto niya ako nga buligan. Pero kon kaisa, nagabatyag gihapon ako nga wala ako sing pulos kag indi ako palangga ni Jehova. Nakabulig gid sa akon ang eksperiensia [sang sister]. Nahangpan ko na subong nga kon hunahunaon ko nga indi na gid ako mapatawad sang Dios, daw pareho lang nga nagapati ako nga indi bastante ang halad sang iya Anak para tabunan ang akon mga sala. Gingunting ko ini nga artikulo para mabasa ko ini kag mapamalandungan kon nagabatyag ako nga indi ako palangga ni Jehova.”

17. Ano ang ginhimo ni apostol Pablo para indi niya pagpamensaron nga indi na gid sia mapatawad?

¹⁷ Ang mga eksperiensia pareho sini nagapahanumdom sa aton sa eksperiensia ni apostol Pablo. Antes sia nangin Cristiano, madamo sia sing nahimo nga mabug-at nga sala. Nadumduman ni Pablo ang iya mga ginhimo, pero wala niya ini pirme ginapamensar. (1 Tim. 1:12-15) Nagpati sia nga ang gawad isa ka regalo sang Dios sa iya. (Gal. 2:20) Wala ginpamensar ni Pablo nga indi na gid sia mapatawad ni Jehova. Sa baylo, nagpokus sia sa pag-alagad kay Jehova sa bug-os niya nga masarangan.

18. Ano ang natun-an naton sa sini nga artikulo?

¹⁸ Ano ang natun-an naton sa sini nga artikulo? (1) Regalo ni Jehova ang maayo nga mga eksperiensia nga pirme naton madumduman. Pero bisan pa maayo ang aton kabuhi sang una, mas maayo ang aton kabuhi sa bag-ong kalibutan. (2) Posible nga may mahimo ang iban nga makasakit sa aton, pero kon patawaron naton sila, makapokus kita sa aton pag-alagad kay Jehova. (3) Kon pamensaron naton nga indi na gid kita mapatawad ni Jehova, makadula ini sang aton kalipay sa pag-alagad. Gani, pareho kay Pablo, dapat kita magtuo nga ginpatawad na kita ni Jehova.

19. Ngaa masiling naton nga sa bag-ong kalibutan indi na naton madumduman ang mga butang nga nagpasubo sa aton?

¹⁹ May paglaum kita nga mabuhi sing wala sing katapusan. Sa bag-ong kalibutan sang Dios, indi na naton madumduman ang bisan ano nga nagpasubo sa aton. Ang Biblia nagasiling: “Ang nagligad nga mga butang indi na pagdumdumon.” (Isa. 65:17) Hunahunaa ini: Ang pila sa aton madugay na nga nagaalagad kay Jehova kag tigulang na, pero sa bag-ong kalibutan mangin pamatan-on kita tanan. (Job 33:25) Gani, indi naton pagpamensaron pirme ang mga nagligad. Sa baylo, hunahunaon naton pirme ang maayo nga palaabuton kag himuon naton ang aton bug-os nga masarangan nga makaistar sa bag-ong kalibutan.