1-2. Edena dala ai Aonega Herevadia 4:25 ena sisiba ita badinaia diba? Haheitalai gwauraia.

MANI inai haheitalai ita lalodia. Keristani taihu burukana ta be guna negadiai idia vara gau namodia ia laloa lou. Ena be hari ena mauri ia auka, to Iehova totona ia karaia diba gaudia ia do karaia noho. (1 Kor. 15:58) Ia bona ena lalokau taudia be tanobada matamatana ai do idia noho negana, be hanaihanai ena lalona ai ia piksaia. Taihu ma ta be kongrigeisen ai ma ta ese ia hahisia karana ia laloa, to ena lalona ia hadaia do ia badu noho lasi. (Kol. 3:13) Tadikaka ta be guna ia karaia kerere ia laloatao, to hari ia gaukara goada Iehova ia abidadama henia noho totona.​—Sal. 51:10.

² Edena dala ai unai Keristani taudia toi be hegeregere? Idia toi be edia guna negana idia laloatao, to unai gaudia be nega momo idia laloa lasi. To, idia be “vairana kahana” idia itaia noho.​—Aonega Herevadia 4:25 duahia.

3. Dahaka dainai ‘vairana kahana ita itaia noho’ be gau badana?

³ Dahaka dainai ‘vairana kahana ita itaia noho’ be gau badana? Bema tau ta be hanaihanai murina kahana ia itaia noho do ia raka maoromaoro lasi. Unai hegeregerena mai iseda lalona ibounai ida Iehova do ita hesiai henia diba lasi, bema hanaihanai guna negadia ita laloa noho.​—Luka 9:62.

4. Inai stadi lalonai dahaka gaudia do ita herevalaia?

⁴ Inai stadi ai, guna gaudia ita laloa noho karana ese ita ia tarapua diba daladia toi do ita herevalaia. Unai tarapu be: (1) guna negadia laloa momo, (2) badu noho karana, bona (3) kerere gunadia dainai lalohisihisi bada karana. Unai tarapu ta ta ita herevalaia neganai, do ita itaia edena dala ai Baibel ena hakaua herevadia ese ita idia durua, ita “rakatania gaudia” ita laloa lasi, to “vaira gaudia totona” do ita hekwarahi noho.​—Fili. 3:13.

5. Hadibaia Tauna 7:10 ese dahaka tarapu ia herevalaia?

⁵ Hadibaia Tauna 7:10 duahia. Unai siri ia gwau lasi, inai bamona ita henanadai be kerere: “Badina dahaka nega gunadia be idia namo?” Memori namodia be Iehova ena harihari gaudia. To, unai siri ia gwau: “Do oi hereva lasi inai bamona, ‘Badina dahaka nega gunadia be namo, to inai nega be ia dika noho?’” Ita do ia tarapua gauna be, iseda guna maurina be hari ita noholaia maurina ida ita hahegeregerea, bona ita gwau hari mauri be ia dika momokani.

6. Dahaka dainai ita laloa eda guna maurina be namo herea be aonega karana lasi? Haheitalai gwauraia.

⁶ Dahaka dainai ita laloa iseda guna maurina be ia namo herea be aonega karana lasi? Guna negadia ita laloa momo bona ita hebogahisi neganai, ita be gau namodia sibona ita laloa, bona guna ita davaria hekwakwanai ita laloaboio. Mani, idaunegai Israela taudia ita laloa. Aigupito idia rakatania murinai, idia be karaharaga guna idia davaria nega aukadia idia laloaboio. To, guna idia moalelaia aniani namodia sibona idia laloa. Idia gwau: “Aigupito ita noho neganai, gwarume ita ania be davana lasi, ani? Bona kiukamba, bona meloni bona liki bona oniani bona galiki be momo herea, ani?” (Num. 11:5) To, momokani idia abia aniani be “davana lasi,” a? Lasi. Israela taudia be dagedage bada idia davaria; unai negai, Aigupito ai idia be mai metau ida igui hesiai gaukara idia karaia. (Eso. 1:13, 14; 3:6-9) To, idia be unai mauri aukana idia laloaboio bona idia ura guna negadia dekenai idia giroa lou. Idia ese guna nega namodia sibona idia laloa, bona Iehova ese idia totona ia karaia gau namodia idia laloa bada lasi. Iehova be edia kara dekenai ia moale lasi.​—Num. 11:10.

7. Dahaka ese taihu ta ia durua guna negadia ia laloa momo lasi totona?

⁷ Edena dala ai guna negadia ita laloa momo ena tarapu ita dadaraia diba? Mani taihu ta ena sivarai ita laloa, ia be lagani 1945 ai Brooklyn Betele ai ia gaukara matamaia. Lagani haida murinai, ia be Betele tadikaka ta ia adavaia bona lagani momo  idia ruaosi be unuseniai idia gaukara. To, lagani 1976 ai, ena tau ia gorere. Ia gwau ena tau ia diba kahirakahira do ia mase neganai, ia dekenai sisiba namona ia henia ena mase murinai ia goada noho totona. Ena tau ia gwau: “Iseda headava ita moalelaia. Momo be unai bamona idia moale lasi.” Ma ia hagoadaia ia gwau: “Ena be emu memori gunadia do oi laloa noho, to unai gaudia do oi laloa momo lasi. Nega ia hanaia lalonai, emu hebogahisi do ia ore. Oi dekenai idia vara gaudia dainai oi lalohisihisi bona hebogahisi lasi. To unai hahenamo bona nega namodia dainai do oi moale. Eda memori namodia be harihari gaudia Dirava amo.” Unai be sisiba namo hereana!

8. Edena dala ai taihu ta be ena tau ena sisiba ese ia durua?

⁸ Iseda taihu ese ena tau ena sisiba ia badinaia. Iehova ia hesiai henia noho ela bona iena mauri lagani be 92 neganai ia mase. Lagani haida gunanai ia do mase lasi neganai, ia gwau: “Lagani 63 lalodiai Iehova lau hesiai henia karana lau laloa neganai, lau gwau diba egu mauri lau moalelaia bada.” Dahaka dainai unai bamona ia hereva? Ia gwau: “Ita moale badina ita be iseda tadikaka taihu huanai ita noho bona eda helaro be Paradaiso tanobadana ai do ita noho hebou, bona iseda Havaraia Tauna Badana, Dirava momokani tamona, Iehova do ita hesiai henia noho ela bona hanaihanai.” * Unai taihu be haheitalai namona, badina Iehova ena gwauhamata namodia vaira nega totona ia lalodia noho!

9. Levitiko 19:18 ia hereva bamona, edena nega ai ma ta ena dika ita gwauatao be auka?

⁹ Levitiko 19:18 duahia. Nega haida tadikaka o taihu, iseda tura namona o varavara ta ese ita ia habadua neganai, edia dika ita gwauatao be auka. Hegeregere, mani kongrigeisen lalonai taihu rua edia haheitalai ita laloa. Taihu ginigunana ia gwau taihu iharuana ese iena moni ia henaoa, to gabeai ia laloparara ia kerere bona taihu iharuana dekenai sori herevana ia gwauraia. To taihu iharuana be ia lalohisihisi bada bona ia vara gauna ia laloa noho. Nega ta oi danu be unai bamona oi lalohisihisi, a? Ena be unai bamona hekwakwanai ita davaria lasi, to reana ita momo danu be gau ta dainai ita lalohisihisi noho bona ita mamia ita ia habadua tauna do ita gwauatao lasi.

10. Ita badu noho neganai, dahaka ese ita ia durua diba?

¹⁰ Dahaka ese ita do ia durua badu noho karana ita dadaraia totona? Namona be ita laloatao, Iehova be gau ibounai ia itaia noho. Ita davaria hekwakwanai ibounai, hegeregere ma haida ese ita idia kara auka henia negadia ia itaia danu. (Heb. 4:13) Iseda lalohisihisi ia mamia. (Isa. 63:9) Bona ia gwauhamata haida ese ita idia kara auka henia dainai ita mamia hisihisi ibounai do ia kokia vaitani.​—Apok. 21:3, 4.

11. Ma ta badu henia noho karana ita hadokoa neganai, edena dala ai ita sibona dekenai namo ita havaraia?

¹¹ Namona be ita laloatao danu, badu noho karana ita hadokoa neganai, ita sibona dekenai namo ita havaraia. Unai kerere ia laloa noho taihu be gabeai unai ia lalopararalaia. Nega ia hanaia lalonai, taihu iharuana ese taihu ginigunana ena kerere ia gwauatao bona ia badu henia noho lasi. Ia laloparara ma haida edia dika ita gwauatao neganai, Iehova ese ita do ia gwauatao danu. (Mat. 6:14) Ia gwau lasi ena Keristani taihu ena kerere be maragi, to ena lalona ia hadaia do ia badu henia noho lasi. Unai ia karaia dainai, iseda taihu be ia moale bona Iehova ena hesiai gaukara ia karaia noho.

12. Ioane Ginigunana 3:19, 20 amo dahaka ita dibaia?

¹² Ioane Ginigunana 3:19, 20 duahia. Vaia nega ta ta ai, ita ibounai be iseda kerere dainai ita lalohisihisi. Hegeregere, haida be hereva momokani idia diba lasi neganai idia karaia gaudia dainai, idia lalohisihisi. Ma haida be idia bapatiso murinai idia karaia kerere dainai, idia lalohisihisi. (Roma 3:23) Momokani, ita ura kara maorodia ita karaia, to “ita ibounai be nega momo ita kerere.” (Iam. 3:2; Roma 7:21-23) Ena be eda kerere dainai ita lalohisihisi karana ita moalelaia lasi, to unai ese ita ia durua diba. Edena dala ai? Oibe, eda kerere dainai ita lalohisihisi karana ese ita do ia durua eda mauri ita haidaua, bona eda lalona ita hadaia unai kerere ita karaia lou lasi totona.​—Heb. 12:12, 13.

13. Dahaka dainai eda kerere dainai ita lalohisihisi bada karana ita dadaraia be namo?

¹³ To, nega haida ita lalohisihisi bada diba. Hegeregere, ena be ita helalo-kerehai bona Iehova ese eda kara dika ia gwauatao vadaeni, to ita do lalohisihisi noho. Unai bamona lalohisihisi bada karana dainai ita manoka diba. (Sal. 31:10; 38:3, 4) Dahaka dainai? Mani taihu ta ena haheitalai ita laloa, ia be guna ia karaia kerere dainai ia lalohisihisi momo. Ia gwau: “Lau mamia Iehova ena hesiai gaukara lau karaia goadagoada be anina lasi, badina lau laloa lau do ia hamauria lasi.” Ita momo be reana unai bamona ita mamia. To namona be eda kerere dainai ita lalohisihisi bada karana ita dadaraia. Mani ita laloa, ena be Iehova be mai lalokau ida ita ia gwauatao vadaeni, to bema ita lalohisihisi bona ita manoka, Satani do ia moale bada herea!​—2 Korinto 2:5-7, 11 hahegeregerea.

14. Edena dala ai ita diba momokani Iehova be ita ia lalokau henia noho?

¹⁴ To, nega haida do ita laloa, edena dala ai lau diba momokani Iehova be lau ia lalokau henia noho?  Unai bamona oi henanadai neganai, ia hahedinaraia Iehova be oi ia gwauatao diba. Lagani 1954 ai, The Watchtower ta ia gwau: “Reana iseda mauri gunana lalonai ita manadalaia kara dikana ta dainai nega momo do ita moru loulou. . . . Oi dara doko lasi. Namo lasi oi laloa, Dirava ese do ia gwauatao diba lasi kara dikana ta oi karaia. Satani ia ura unai bamona do oi laloa. Bema emu kerere oi lalohisihisilaia, unai ese ia hahedinaraia oi be taunimanima dikana lasi bona Iehova ese oi ia gwauatao diba. Oi manau bona mai momokani ida Iehova oi guriguri henia loulou, emu dika do ia gwauatao, emu lalomamina do ia hagoevaia bona oi do ia durua unai kerere oi karaia lou lasi totona. Herevana nega hida unai kerere tamona dainai Iehova dekenai oi lao, to natu ta ese dika ia davaria neganai hanaihanai ena tamana dekenai ia lao hegeregerena, ia dekenai oi lao be namo, bena Iehova ese ena hebogahisi amo oi do ia durua.”

15-16. Haida idia laloparara Iehova ese idia ia lalokau henia noho neganai, edia hemami be edena bamona?

¹⁵ Iehova ena hesiai taudia momo idia goada, badina idia laloparara Iehova be idia ia lalokau henia noho. Hegeregere, lagani haida gunanai, taihu ta ena mauri sivaraina be Gima Kohorona ai idia halasia. Unai atikol lalonai, taihu ia gwau iena mauri gunana dainai, ia laloa Iehova ese do ia lalokau henia diba lasi. Ena be lagani momo ia bapatiso vadaeni, to unai bamona ia laloa noho. To, Iesu ena mauri davalaia boubouna ia laloa dobu neganai, ena lalohadai ia haidaua. *

¹⁶ Tadikaka ta ese unai taihu ena mauri sivarai ia duahia bona goada ia abia. Ia gwau: “Lau be mero matamata neganai, ponografi laulau lau itaia momo bona unai kara lau rakatania be auka momokani. Vanegai, ponografi laulau lau itaia lou. Elda taudia edia heduru lau noia, bona lau idia durua unai hekwakwanai lau hanaia totona. Elda taudia ese lau idia hagoadaia, namona be lau abia dae Dirava be lau ia lalokau henia bona ia ura egu dika do ia gwauatao. To, nega haida lau mamia lau be anina lasi, bona Iehova be lau do ia lalokau henia diba lasi. Unai taihu ena sivarai lau duahia ese lau ia durua bada. Lau laloparara bema lau laloa Dirava ese lau ia gwauatao diba lasi, unai be hegeregere lau gwau, iena Natuna ena mauri davalaia boubouna be ia hegeregere  lasi egu dika ia kokia totona. Unai atikol lau dogoatao noho unai amo bema Iehova be lau ia lalokau henia lasi ena lalohadai lau abia, lau duahia lou bona lau laloa dobu.”

17. Edena dala ai Paulo be ena kara dika dainai ia lalohisihisi bada ena tarapu ia dadaraia?

¹⁷ Unai bamona sivarai ita duahia neganai aposetolo Paulo ita laloa. Keristani tauna ai ia do lao lasi neganai, kara dika badadia haida ia karaia. Paulo be ia karaia gaudia ia laloatao, to ia lalodia momo lasi. (1 Tim. 1:12-15) Ia abia dae Iesu ena mauri davalaia boubouna be ia totona. (Gal. 2:20) Unai amo Paulo be ena kara dika dainai ia lalohisihisi bada ena tarapu ia dadaraia, bona ena mauri ia gaukaralaia Iehova ia hesiai henia totona.

18. Inai stadi amo dahaka ita dibaia?

¹⁸ Inai stadi ai ita herevalaia tarapu toi amo dahaka ita dibaia? (1) Memori namodia be Iehova ena harihari gaudia, to ena be guna negadia ai mauri namona ita noholaia, vaira nega ai tanobada matamatana lalonai iseda mauri be do ia namo herea. (2) Ena be haida ese ita idia kara auka henia, to edia dika ita gwauatao, bona Iehova hesiai henia karana ita goadalaia noho. (3) Iseda kara dika dainai ita lalohisihisi bada karana ese mai moale ida Iehova hesiai henia karana ia hadikaia diba. Unai dainai Paulo bamona, namona be ita abia dae momokani, Iehova ese eda kara dika ia gwauatao vadaeni.

19. Edena dala ai ita diba tanobada matamatana ai, kara gunadia dainai do ita lalohisihisi lasi?

¹⁹ Iseda helaro be do ita mauri hanaihanai bona Dirava ena tanobada matamatana ai, kara gunadia dainai do ita lalohisihisi lasi. Baibel ese unai nega ia herevalaia, ia gwau: “Kara gunadia be do idia laloa lou lasi.” (Isa. 65:17) Mani oi laloa: Ita haida be Iehova ita hesiai henia bona ita buruka vadaeni, to tanobada matamatana ai do ita matamata lou. (Iobu 33:25) Namona be iseda lalona ita hadaia guna gaudia do ita laloa momo lasi. To, namona be tanobada matamatana sibona ita laloa bona do ita gaukara goada unuseni ita noho totona!