1-2. Baka ni kitai nitihka jaku lalau ba Jaku Dalam 4:25? Beri chunto.

GAMBARKA tu. Seiku menyadi Kristian indu ke udah tuai ngenang pengingat ti manah lebuh iya agi biak. Taja pan diatu pengidup iya tusah, iya bebendar gawa ke Jehovah. (1 Kor. 15:58) Ninting hari iya ngambarka diri begulai enggau diri sebilik sereta bala pangan ba Paradais. Seiku agi menyadi indu ingat lebuh bisi menyadi ngemediska ati iya, tang iya milih enggai ngenangka nya. (Kol. 3:13) Seiku menyadi lelaki ngenang penyalah ke kala digaga iya, tang iya enggau naka ulih tetap ati ngagai Jehovah diatu.—Mas. 51:10.

² Nama utai ti sama ba tiga iku menyadi tu? Semua sida ngenang utai ke udah nyadi ba pengidup sida. Tang sida enda seruran betatika utai nya. Sida ‘merening terus’ ke jemah ila.—Bacha Jaku Dalam 4:25.

3. Nama kebuah kitai patut ‘merening terus’ ke jemah ila?

³ Nama kebuah kitai patut ‘merening terus’ ke jemah ila? Orang ke selalu malik ke belakang enda ulih bejalai lurus. Baka nya mega kitai enda ulih bebendar gawa ke Jehovah enti kitai terus ngenang utai ke udah nyadi ba pengidup kitai.—Luk. 9:62.

4. Nama deka dikerandauka kitai ba artikel tu?

⁴ Ba artikel tu, kitai deka berandauka tiga iti pekara ke ngasuh kitai ngenang baru utai ke udah nyadi ba pengidup kitai iya nya, (1) ngenang pengidup ti lama, (2) berasai pedis ati, lalu (3) terus berasai besalah. Kitai mega deka berandauka prinsip Bup Kudus ke ulih nulung kitai badu  agi “ngingatka utai ti udah,” tang bebendar ngulihka “utai ti di mua.”—Plp. 3:13.

5. Nama enda patut digaga kitai nitihka Pengajar 7:10?

⁵ Bacha Pengajar 7:10. Peratika ayat tu enda nyebut nya salah enti nanya: “Nama kebuah utai menya manah?” Pengingat ti manah nya pemeri ari Jehovah. Tang ayat tu nyebut: “Anang sekali-kali nanya, ‘Nama kebuah utai menya manah agi ari utai ti diatu?’” Kitai patut bejimat ngambika enda manding pengidup kitai suba enggau pengidup kitai ke diatu lalu ngumbai pengidup diatu enda manah. Siti agi salin Bup Kudus nyalin ayat tu: “Anang ngenang penyamai ti dulu menya. Nya ukai penemu orang ti landik.”

6. Nama kebuah enda manah ngumbai pengidup kitai suba manah agi? Beri chunto.

⁶ Nama kebuah enda manah ngumbai pengidup kitai suba manah agi? Laban kitai engka semina ingat pasal utai ti manah tang enda ingat pasal penanggul ke kala ditapi. Peratika chunto orang Israel kelia. Pengudah sida ninggalka menua Ejip, sida enggau jampat enda ingat pasal pengidup sida ti tusah ba din. Tang sida ngenang pasal pemakai ke diulih sida ba Ejip. Ku sida: “Di menua Ejip suba kitai seruran makai ikan sepeneka kitai, lalu utai nya enda ibuh dibeli. Ingat kita ke buah entimun, buah semangka, sayur bawang, bawang telu enggau bawang putih ti diempa kitai?” (P-pau. 11:5) Kati nya amat, semua pemakai “nya enda ibuh dibeli”? Enda. Orang Israel patut mayar enggau rega ti tinggi. Maya nya sida balat diperinsa nyadi ulun orang Ejip. (P-sut. 1:13, 14; 3:6-9) Tang sida enda ingat ke penusah nya, lalu inginka pengidup ti lama. Ari ke belemati chara Jehovah udah nulung sida, sida sanggup agi  betatika pengidup lama. Jehovah enda lantang ati enggau ulah sida.—P-pau. 11:10.

7. Nama nulung seiku menyadi indu nyeliah ari ngumbai pengidup iya suba manah agi?

⁷ Baka ni kitai ulih nyeliahka ari terus ngenang pengingat ti lama? Peratika chunto seiku menyadi indu ke berengkah gawa di Betel Brooklyn ba taun 1945. Beberapa taun udah nya, iya jadi enggau seiku menyadi ke gawa ba Betel, lalu seduai iya sama gawa ba dia betaun-taun. Taja pia, ba taun 1976, laki iya sakit. Tang sebedau laki iya mati, iya meri sekeda jaku lalau kena nulung bini iya pengudah iya udah nadai. Ku laki iya: “Tua bisi tikah ti manah. Ukai semua orang kala ngasaika nya. Nuan deka seruran ngenang utai ke udah digaga tua. Tang anang kelalu betatika nya. Nyau kelama nuan ulih napi utai tu. Anang meh tusah ati tauka asa enggau utai ke udah nyadi, gaga ati meh laban tua ulih sama gawa ke Jehovah, lalu ngasaika berekat ari Iya. . . . Pengingat nya pemeri Petara ke kitai.” Endaka tu jaku lalau ti manah?

8. Nama berekat ke diulih menyadi indu ketegal nitihka jaku lalau ari laki iya?

⁸ Menyadi indu nya nitihka jaku lalau ke diberi laki iya. Iya nyembah Jehovah enggau tetap ati nyentukka iya mati lebuh umur iya 92 taun. Beberapa taun sebedau iya mati, iya madah: “Lebuh aku ngenang baru 63 taun gawa penuh jam ke Jehovah, aku ulih madahka, pengidup aku amat ngagaka ati.” Nama kebuah? Ku iya nerangka: “Utai ti ngasuh pengidup aku ngagaka ati, iya nya bisi kaul enggau bala menyadi Kristian sereta bisi pengadang begulai enggau sida ba dunya Paradais lalu sama nyembah Penempa kitai, Petara ti bendar, Jehovah, belama-lama iya.” * Kitai tentu ulih belajar  mayuh ari menyadi indu tu ke betatika semaya Jehovah.

9. Nitihka Adat Lewi 19:18, ni maya kitai tusah deka ngampun orang ti udah ngemediska ati kitai?

⁹ Bacha Adat Lewi 19:18. Kekadang kitai tusah deka ngampunka orang ti ngemediska ati kitai, kelebih agi enti orang nya menyadi Kristian kitai, bakih ti rapat tauka kaban belayan. Ambika chunto, seiku menyadi indu nuduh menyadi indu ke bukai ngenchuri duit iya. Tang udah nya, iya nemu diri salah lalu minta ampun. Taja pia, menyadi indu ke dituduh iya agi pedis ati lalu enggai badu berundingka nya. Kala nuan ngasaika baka nya? Taja pan kitai enda napi utai ti sama, tang semua kitai engka tusah deka ngampun orang ti udah ngemediska ati kitai.

10. Nama ulih nulung kitai enti kitai pedis ati?

¹⁰ Nama ulih nulung kitai enti kitai pedis ati? Kingatka, Jehovah meda semua utai. Iya nemu semua utai ke nyadi ba kitai, nyengkaum pengawa ti enda lurus ke ditapi kitai. (Heb. 4:13) Iya tusah ati lebuh kitai merinsa. (Isa. 63:9) Lalu Iya besemaya deka muai semua pemerinsa ketegal pengawa ti enda lurus ke nyadi ba kitai.—Pem. 21:3, 4.

11. Nama penguntung enti kitai ngampun orang bukai?

¹¹ Kitai mega patut ingat, enti kitai ngampunka orang bukai kitai deka berasai nyamai agi. Nya meh asai ati menyadi indu ke dituduh ngenchuri duit tadi. Nyau kelama, iya ulih ngampun menyadi ke nuduh iya, lalu enda agi pedis ati enggau iya. Iya sedar enti kitai ngampun orang bukai, Jehovah mega deka ngampun kitai. (Mat. 6:14) Iya nemu menyadi indu nya endang salah, tang iya milih deka ngampunka iya. Asil iya, menyadi indu nya gaga agi ati lalu ulih terus nyembah Jehovah.

12. Nama ulih dipelajarka kitai ari 1 John 3:19, 20?

¹² Bacha 1 John 3:19, 20. Kekadang kitai berasai besalah ketegal utai ke digaga sebedau kitai nemu pemendar tauka penyalah ke digaga pengudah dibaptisa. (Rom. 3:23) Endang amat, kitai deka ngereja utai ti badas. Tang “semua kitai bela ngereja mayuh macham penyalah.” (Jas. 3:2; Rom. 7:21-23) Taja pan kitai enda entu rindu enggau asai ati besalah, tang nya mega manah ke kitai. Nama kebuah? Laban asai ati ti besalah nulung kitai ngaga ubah ba pengidup lalu enda agi ngereja penyalah ti sama.—Heb. 12:12, 13.

13. Nama kebuah kitai enda patut terus berasai besalah?

¹³ Kelimpah ari nya, kitai engka agi berasai besalah taja pan udah nesal ati lalu Jehovah udah ngampunka kitai. Asai besalah ke baka tu ulih ngemediska. (Mas. 31:10; 38:3, 4) Nama kebuah? Peratika chunto seiku menyadi indu ke enda ngetu berasai besalah ketegal penyalah iya suba. Ku iya: “Aku ngasaika nadai guna bebendar gawa ke Jehovah laban aku engka enda ulih diselamatka.” Mayuh ari kitai engka ngasai baka nya. Nya alai kitai patut nagang diri ari berasai kelalu besalah. Kingatka, Sitan gaga ati enti kitai badu nyembah Jehovah, taja pan Jehovah udah ngampunka kitai!—Bandingka 2 Korint 2:5-7, 11.

14. Baka ni kitai nemu Jehovah deka ngampun kitai?

¹⁴ Kitai engka berunding, ‘Baka ni aku nemu Jehovah udah ngampunka aku?’ Enti nuan berundingka tanya nya, tu nunjukka Jehovah ulih ngampun nuan. Siti artikel Menara Jaga ba taun 1954 madah: “Kitai [engka] selalu ngereja penyalah ti sama. Kitai engka agi bedau ulih muai pengelemi ke  bisi sebedau kitai nyembah Jehovah. . . . Anang lemi semengat. Anang ngumbai Jehovah enggai ngampun nuan lebuh nuan udah ngereja penyalah. Nya meh utai ti dikedekaka Sitan. Lebuh nuan ngereja penyalah, nuan tentu tusah ati sereta asa ati. Tu ukai reti nya nuan orang ti enda manah. Jehovah ulih ngampunka nuan. Terus meh baruh ati sereta besampi minta Petara ngampunka nuan ngambika ulih ngembuan ati ti beresi sereta nulung nuan enda ngereja penyalah nya agi. Baka seiku anak ke seruran minta tulung apai iya lebuh iya ngereja penyalah ti sama, baka nya meh nuan terus minta tulung Jehovah lalu Iya deka nulung nuan ketegal pengasih Iya.”

15-16. Baka ni asai ati sekeda menyadi lebuh sida nemu Jehovah ulih ngampunka sida?

¹⁵ Mayuh ari nembiak Jehovah berasai lantang laban nemu Jehovah udah ngampunka sida. Ambika chunto, beberapa taun suba, seiku menyadi lelaki macha siti peneleba ke bisi ba begian “Bup Kudus Ngubah Pengidup.” Utai ke dibacha iya negu ati iya. Ba artikel nya, seiku menyadi indu madahka, ketegal utai ti jai nyadi ba pengidup iya, iya tusah deka pechaya Jehovah rinduka iya. Taja pan iya udah dibaptisa, iya agi belaban enggau asai ati nya betaun-taun. Tang lebuh iya belematika pasal genselan tebus Jesus, nya nulung iya pechaya Jehovah rinduka iya. *

¹⁶ Baka ni peneleba menyadi indu nya nulung menyadi lelaki kitai? Ku iya madah: “Lebuh aku agi biak, aku gian meda gambar pornografi lalu tusah deka badu. Baru-baru tu, aku ngereja penyalah ti sama. Aku udah minta bantu ari tuai gempuru lalu ngaga pemansang mutarka pengelemi tu. Bala tuai gempuru udah nulung aku pechaya Jehovah rinduka aku lalu deka ngampunka aku. Tang kekadang aku agi ngasaika diri nadai guna, baka Jehovah enggai rinduka aku. Lebuh aku macha peneleba menyadi indu tu, aku nyau sedar enti aku madah Petara enda ulih ngampunka aku, tu baka ke  ngumbai genselan tebus Anak Iya enda chukup kena ngampun dosa aku. Aku nguntin artikel tu ngambika ulih macha sereta belematika iya, kelebih agi lebuh aku ngasaika diri enda beguna ba Jehovah.”

17. Baka ni rasul Paul nyeliahka diri ari terus berasai besalah?

¹⁷ Peneleba ke baka tu ngingatka kitai ngagai rasul Paul. Sebedau iya nyadi orang Kristian, iya kala ngereja mayuh utai ti jai. Paul ingat utai ke udah digaga iya, tang iya enda selalu berundingka nya. (1 Tim. 1:12-15) Iya pechaya iya ulih diampun ketegal bisi tebus, lalu tebus nya pemeri ari Petara ngagai iya. (Gal. 2:20) Nya alai, Paul enda ngelakka diri terus berasai besalah, tang bebendar gawa ke Jehovah.

18. Nama udah dipelajarka kitai ba artikel tu?

¹⁸ Nama udah dipelajarka kitai ba artikel tu? (1) Pengingat ti manah nya pemeri ari Jehovah. Taja pan pengidup kitai suba manah, tang pengidup jemah ila lebih manah agi. (2) Orang bukai engka ngemediska ati kitai. Tang enti kitai ngampunka sida, kitai senang agi nyembah Jehovah. (3) Enti kitai agi berasai besalah, kitai tusah deka nyembah Jehovah enggau gaga ati. Nya alai baka Paul, kitai patut pechaya Jehovah udah ngampunka kitai.

19. Baka ni kitai nemu ba dunya baru ila kitai enda agi ingat utai ti ngasuh kitai tusah ati?

¹⁹ Kitai bisi pengadang idup belama iya. Ba dunya baru ila kitai enda agi ingat utai ti ngasuh kitai tusah ati. Bup Kudus madahka: “Semua utai ti lama, enda agi dikingatka.” (Isa. 65:17) Uji pikirka: Sekeda ari kitai nyau mansang tuai gawa ke Jehovah, tang ba dunya baru, kitai ulih nyadi biak baru. (Jop 33:25) Nya alai, anang meh kitai ngenang pengidup ti udah lama. Tang perening terus ke mua lalu bebendar nentuka diri ulih idup ba dunya baru.