1-2. Kunnasi tam meyaplika i tabarang na Proverbio 4:25? Mangiyawa tu angngarigan.

NONOPAMMU yaw nga tallu nga situasion. Ollu, magayayya i bako nga sister nu nonopanna i nesimmu ta nappasa. Ngem maski nu marigatan ngana yayya sangawe, kukukuanna i adde na mawayyana tapenu passerbian si Jehova. (1 Cor. 15:58) Kadaggawna nga nononopan i tiempo sonu kavuluna i kafamilia anna kokkofunna ta paraiso. Mekadua, natakitan i tadday nga sister ta kapangngurugna, ngem ari yayya nga nangimula tu taki na nono. (Col. 3:13) Mekatallu, meraddamman na tadday nga brother i nakaliwatanna, ngem kukukuanna ngana i adde na mawayyana tapenu mabbalin tu matalo kani Jehova.​—Sal. 51:10.

² Anni i napparehuan na tallu nga wawwaragi? Manonoda i nappasa ngem ari ira nga nakafokus tatun. Lallagu, ‘derechu nga innadda’ i mappange.​—Bibbigan i Proverbio 4:25.

3. Ngatta mawag tu ‘derechu nga innattam’ i mappange?

³ Ngatta mawag tu ‘derechu nga innattam’ i mappange? Nonopan yaw: Nu makalipi-lipay i tadday nu lumakag yayya, magga arianna nga matuttulan tu derechu i dalan. Kunnatun gapa ta passerbi tam kani Jehova. Nu agga-nono tam i nesimmu ira ta nappasa, ariattam nga makapattulu-tuloy nga masserbi tu mapia kani Jehova.​—Luc. 9:62.

4. Anni i gigiammuattam taw nga artikulo?

⁴ Gigiammuattam i tallu nga gannug nga ibita tam tapenu ariattam agga-nono i nappasa. Danaw i: (1) pakkaraga nga  tolian i dati nga pattolay, (2) pangipappan tu taki na nono, anna (3) sobra nga pakkakonsensia. Ammuattam nu anni ira nga prinsipio ta Biblia i makoffun nittam tapenu ariattam nga agga-nono “i nappasa,” anna makapaffokus ittam ta “mappange.”​—Fil. 3:13.

5. Anni i ariattam kuan segun ta Eclesiastes 7:10?

⁵ Bibbigan i Eclesiastes 7:10. Ari nga kinagi na teksto nga ugo tu iyavu tam yaw: “Ngatta makasta i dati ira nga aggaw?” Kurug mabba tu egga ira makasta nga nesimmu ta nappasa. Regalu maggafu kani Jehova danatun. Ariattam nakuan ikumpara i maddaggun ta nappasa, nga gittana kakkagiattam: “Ngatta mas makasta i dati ira nga aggaw anne ta maddaggun?” Kayà kagian natun nga ariattam nonopan nga mas marake i ngamin nga mesissimmu sangawe anne ta dati.

6. Ngatta marake nga agga-nono tam nga mas makasta i dati nga pattoletam? Mangistoria tu angngarigan.

⁶ Ngatta marake nga agga-nono tam nga mas makasta i dati nga pattoletam? Megafu ta baka puru makkarasta laman nga gannug i meraddammattam anna makattamattam i ziga-riga nga inattammattam. Kunnatun i nesimmu ta Israelita ira. Turi ta nakapanaw ngana ira ta Ehipto, alistuda laman nga nakattaman i ziga na pattoleda tatun. Agga-nonoda lallagu i masingngo ira nga kinnadda. Kudda: “Kakanappammi ngana i pakkakammi tu libre nga manango ta Ehipto, kunne na gapa i pipino, sandia, lasuna, sabolyas, anna afus!” (Num. 11:5) Ngem kurug kari nga “libre” danatun? Ari. Daka-dakal i katali natun. Ziniga-riga ira na Ehipsio bilang aripadda. (Ex. 1:13, 14; 3:6-9) Ngem alistuda laman nga nakattaman danatun anna kayàda nga tolian yatun nga pattoleda. Imbes nga nonopadda i pinanguffun ni Jehova nira, agga-nonoda lallagu i makasta ira nga nesimmu ta nappasa. Gafu tatun, napporay si Jehova nira.​—Num. 11:10.

7. Anni i nakoffun ta tadday nga sister tapenu arianna manono nga mas makasta i dati nga pattolena?

⁷ Kunnasi tam mebita nga nonopan nga mas makasta i dati nga pattoletam? Makagigiammu  ittam ta nesimmu ta tadday nga sister nga nasserbi ta Brooklyn Bethel turi 1945. Piga dagun i nappasa, nakitawa yayya ta tadday gapa nga Bethelite anna piga dagun ira nga nakkavulu ta passerbi. Ngem turi 1976, nattaki i brother. Kinagi na sister nga turi ta aranni ngana nga matay i atawana, niddanna yayya tu makasta nga tabarang nga makoffun nisa sonu mabalu ngana yayya. Kinagi na brother nisa: “Magayayya i pinagatawa ta. Aru nga totolay i ari vuluvuga maka-ekspiriensa tu kunnaw.” Kunna paga: “Magga ariammu nga makattaman i makasta ira nga nesimmu nitta dua ngem ari nakuan tu danatun i agga-nono mu. Mawawan lapa saw i daddammu. Ari nakuan makkafi i nono mu ta mesissimmu niko. Mappabalo ka ta naekspiriensa ta ira nga pagayayya anna bendision. . . . Regalu danatun na Dios nitta.” Magga umanugu ka nga makasta nga tabarang yatun.

8. Kunnasi nga nabenefisiowan i sister ta arianna nga paffokus ta nappasa?

⁸ Nipafutu na sister i tabarang na atawana. Kingnguana ngamin i mawayyana tapenu passerbian si Jehova adde ta patena. Nigena nga natay ta edad nga 92, kunna: “Ta 63 dagun nga pinasserbì kani Jehova ta ngamin-tiempo, makagì tu makapagayayya yatun.” Ngatta? Kunna: “Megafu ta i kurug nga mamagayayya ay i wawwaragi anna i iddanama nga makavulu ira ta paraiso nga davvun tapenu mannanayun nga passerbian i Namaratu nittam, i kuru-kurug nga Dios nga si Jehova.” * Aru i magigiammu tam ta sister nu meyannung ta paffokus ta mappange!

9. Segun ta Levitico 19:18, anni nga situasion nga baka mangipappan ittam tu taki na nono?

⁹ Bibbigan i Levitico 19:18. Nu natakitan ittam na kapangngurug tam, madukko nga kofuttam, onu kafamilia tam, baka mangipappan ittam tu taki na nono. Kunnatun i nesimmu ta tadday nga sister. Pinaliwa yayya na tadday paga nga sister nga kinokotanna kanu yayya tu kuartu. Turi kua, nakkiddaw tu pakoma nisa i sister ngem agga-nonona lagapa i nesimmu. Naekspiriensam ngana kari i kunnatun? Maski nu ari tu kunnatun i nesimmu nittam, magga egga ira i tiempo nga nattaki i nono tam tapus marigatan ittam nga pakoman i nakataki nittam.

10. Anni i kuattam nu mattaki i nono tam?

¹⁰ Anni i kuattam nu mattaki i nono tam? Daddammammu nga masingi-singan ni Jehova i ngamin. Ammuna i pappasa-pasammu anna nu ari tu patas i katratum. (Heb. 4:13) Matagenona i pazziga-riga mu. (Isa. 63:9) Ipromesana paga nga alsanna noka i marake ira nga resulta na kawan tu hustisia nga naekspiriensam.​—Nep. 21:3, 4.

11. Ngatta pammakapianattam nu alsattam i taki na nono tam ta tanakuan?

¹¹ Daddammattam nga pammakapianattam nu alsattam i taki na nono tam ta tanakuan. Kunnatun i kiningngua na napaliwa nga sister. Megafu ta nanonona nga nu mamakoma yayya, pakoman gapa yayya ni Jehova. (Mat. 6:14) Arianna nga kinunsinti i kiningngua na wagi nisa, nu ari, pinilina nga mamakoma. Megafu tatun, nabbalin yayya tu mas magayayya anna mas nakapaffokus ngana yayya ta passerbina kani Jehova.

12. Anni i magigiammu tam ta 1 Juan 3:19, 20?

¹² Bibbigan i 1 Juan 3:19, 20. Normal laman nga makonsensia ittam. Makonsensia i karuan megafu ta kingnguada ira nigeda nakannammuan i kinakurug onu kabalin na bawtismoda. (Roma 3:23) Siempre kayà tam nga kuan i fustu, ngem “sittam ngamin ay maruddu nga makaliwa.” (Sant. 3:2; Roma 7:21-23) Maski ariattam kayà i kanayun nga makonsensia, egga i bentaha natun. Ngatta? Megafu ta nu makonsensia ittam, itunuttam i nakaliwatattam anna determinadu ittam nga ari ngana kuan danatun.​—Heb. 12:12, 13.

13. Ngatta ibita tam i sobra nga pakkakonsensia?

¹³ Sobra nga makokkonsensia i karuan maski nu nabbabawi ngana ira anna pinakoma ngana ira ni Jehova. Delikadu yatun. (Sal. 31:10; 38:3, 4) Ngatta? Kunnatun i nesimmu ta tadday nga sister nga sobra nga nakokkonsensia ta nakaliwatanna ira. Kunna: “Magimmang ngà ‘na tamma masserbi kani Jehova ta ari ngà mabba siguru mapaliag.” Aru nittam i makatageno tu kunnatun ngem magimmugug ittam tapenu mebita i sobra nga pakkakonsensia. Ngatta? Magaya-ayayya si Satanas nu magimmang ittam nga masserbi kani Jehova maski nu ta kakuruganna, pinakoma ittam ngana ni Jehova!​—Ikumpara i 2 Corinto 2:5-7, 11.

14. Anni i pamasiguradu tu sigga-paran lagapa si Jehova nga pakoman ittam?

¹⁴ Mittan, manono tam, ‘Anni i pamasiguradu tu sigga-paran lagapa si Jehova nga pakomannà?’ Nu niyavu mu yatun, ipasinganna nga ammum lagapa ta baggim tu mapakoma naka ni Jehova. Ta nappasa ira nga dekada, kinagi na Passifusifutan: “Baka manotoli tu makua tam i tadday tu liwa anna egga i dati nga pakkafiattam nige tam nasserbi nga adde sangawe, marigatan ittam nga labanan. . . . Ariammu mawanan tu iddanama. Ariammu nonopan tu ari ngana mapakoma ni Jehova i naliwatammu. Kunnatun i kayà ni Satanas tu nonopammu. Nu maraddam anna dismayadu ka ta naliwatammu, ipasingan natun tu ari ka nga marake anna mapakoma naka ni Jehova. Ari ka nga magimmang nga mapakalinno nga umaranni ta Dios tapenu makkiddaw tu pamakoma anna mapeggan tu marenu nga konsensia, anna duffun tapenu ari ngana makua uli i liwa. Parigammu i abbing tu kanayun nga mappoffun ta yamana kada manoli  i problemana. Maski gafu nu mamippiga nga mappoffukka kani Jehova, sigga-paran nga duffungan naka megafu ta ari maguku-gukug i allona.” *

15-16. Anni i efektona ta wawwaragi nu makannammuadda nga iddeddukan lagapa ira ni Jehova?

¹⁵ Aru nga aripan ni Jehova sangawe i mabanna-bannayan gafu ta makannammuadda nga iddeddukan lagapa ira ni Jehova. Angngariganna, piga dagun ngana i nappasa, egga i tadday nga brother nga napagaram ta ekspiriensa nga nabibbigna ta serye nga “Pakastan na Biblia i Pattolay.” Tatun nga artikulo, inamin na tadday nga sister nga megafu ta nesimmu ira nisa ta nappasa, marigatan yayya kurugan nga iddeddukan yayya ni Jehova. Piga ragun nga nilabananna yatun nga panageno maski turi ta nabawtisowan ngana yayya. Ngem turi ta pinannonopanna tu mapia i meyannung ta tavvu, nakoffun nisa yatun tapenu kurugan nga iddeddukan lagapa yayya ni Jehova. *

¹⁶ Kunnasi nakoffun i ekspiriensa na sister ta brother? Niturana: “Ta kabbikku, naadik ngà ta pornograpia. Tapus nikanni laman, kingnguà mangana yatun. Nappoffun ngà ta elder ira yatutta sisinu nga malabanakku ngana i problemà. Nipasiguradu na elder ira nga ayatannà na Dios anna mapakomanà. Ngem egga ira i tiempo nga matageno ku nga awan tu sesserbì anna ari ngà mepangngo ta aya ni Jehova. Daka-dakal i neyuffun na nabibbig ku nga ekspiriensa na sister. Megafu tatun, nu nonopakku nga ari ngà vuluvuga mapakoma ni Jehova, gittana kakkagiakku nga ari nga makalanno i sakrifisio nga tavvu tapenu matakkabban i liwi-liwa ku. Ginarsig ku yatun nga artikulo tapus nipappakku. Bibbigan anna pannonopakku yatun kada matageno ku nga awan tu sesserbì anna ari ngà mepangngo ta aya ni Jehova.”

17. Kunnasi nga nebita ni apostol Pablo i sobra nga pakkakonsensia?

¹⁷ Ipanono nittam natun ira nga ekspiriensa i nesimmu kani apostol Pablo. Aru nga  madammo tu liwa i nakuana nigena nabbalin tu Cristiano. Manonona paga ira yari, ngem ari tu danatun i agga-nonona. (1 Tim. 1:12-15) Nasinganna nga puede yayya nga pakoman ni Jehova. Ninonona tu regalu mismu tannisa ni Jehova i tavvu. (Gal. 2:20) Yari tu ari ngana yayya sobra nga makokkonsensia anna nakafokus ngana yayya ta pagangngua ta ngamin nga mawayyana ta passerbi kani Jehova.

18. Anni i nagigiammu tam taw nga artikulo?

¹⁸ Anni i nagigiammu tam taw nga artikulo? (1) Regalu ni Jehova i makasta ira nga nesimmu nittam ta nappasa. Maski nu makasta i dati nga pattoletam, mas makasta i pattoletam ta mappange. (2) Baka mattaki i nono tam ta tanakuan, ngem nu pakomattam ira, mas makapaffokus ittam ta passerbi tam kani Jehova sangawe. (3) Nu sobra i pakkakonsensia tam, mawawan i pagayayya tam ta passerbi kani Jehova. Parigattam si Pablo. Kumbinsidu ittam nakuan nga napakoma ittam ngana ni Jehova.

19. Ngatta makasiguradu ittam nga ariattam noka meraddamman i maski anni nga namarraddam nittam?

¹⁹ Egga i iddanama tam nga mattolay tu mannanayun ta paraiso. Sonu mesimmu ngana yatun, ariattam ngana meraddamman i maski anni nga namarraddam nittam. Kagian na Biblia: “Ari ngana manono i nappasa ira nga ganna-gannug.” (Isa. 65:17) Nonopammu yaw: Nallakay onu nabbako ngana i karuan nittam ta passerbi kani Jehova ngem sonu paraiso, magabbing ittam uli. (Job 33:25) Ariattam nakuan gafu agga-nono i nappasa. Maffokus ittam ta mappange anna kuattam i adde na mawayya tam tapenu makadde tatun!