1-2. Ga Shagawp 4:25 hta lawm ai hpaji jaw ga hpe gara hku hkan sa mai ai kun? Ga shadawn jaw rit.

NDAI mabyin masa ni hpe shingran yu u. Asak kaba ai Hkristan nauna langai gaw, lai wa sai aten na kabu hpa lam ni hpe myit nga ai. Ya aten hta prat gaw grau yak wa tim, Yehowa hpe dang lu ai daram magam gun nga ai. (1 Ko 15:58) Mungkan nnan hta tsawra ai ni hte arau nga nga ai ngu shani shagu shingran yu ai. Kaga nauna langai gaw, nauna langai a majaw myit hkra machyi ai lam ni hpe matsing nga tim, masin n si hkraw ai baw n byin na matu dawdan kau ai. (Kol 3:13) Hpunau langai mung lai wa sai aten hta galaw wa ai mara ni hpe dum nga tim, ya aten kaw nna sadi dung na matu sha myit maju jung ai.​—Shk 51:10.

² Ndai Hkristan marai 3 hta gara bung ai lam ni nga ai kun? Shanhte yawng lai wa sai aten hpe dum nga tim, dai aten hpe sha myit maju jung nga ai n re. “Shawng de sha yu” ma ai.​—Ga Shagawp 4:25 hpe hti u. *

3. “Shawng de sha yu” na matu hpa majaw ahkyak ai kun?

³ “Shawng de sha yu” na matu hpa majaw ahkyak ai kun? Hpang de sha aten tup yu nga yang, shawng de atsawm sa lu sana n re. Lai wa sai aten hpe aten tup myit nga yang, Yehowa a magam hta matut galaw lu sana n re.​—Luk 9:62.

4. Ndai sumhpa hta hpa lam hkaja na kun?

⁴ Lai wa sai aten hpe sha myit maju jung * shangun ai mahkam 3 a lam hpe ndai sumhpa hta hkaja lu na re. (1) Lai wa sai  aten hpe sha marit nga ai, (2) myit machyi nga ai, (3) mara nga ai ngu ladu lai hkamsha nga ai lam ni re. “Hpang maga na arai” ni hpe n re ai sha, “man ang ai arai ni” hpe myit maju jung na matu, Chyum Laika npawt tara ni gaw gara hku karum ya ai lam chye lu na re.​—Hpl 3:14.

5. Hpaji Ningli 7:10 hta gara mahkam a lam sadi jaw da ai kun?

⁵ Hpaji Ningli 7:10 hpe hti u. “Shawng na prat gaw, hpa majaw kaja a ta?” ngu nna tsun ai gaw shut ai ngu ndai Chyum daw hta n tsun da ai. Kaja ai matsing hpa lam ni gaw Yehowa kaw na kumhpa re. “Shawng na prat gaw, ya na prat hte hpa majaw grau kaja a ta?” ngu hkum tsun nga nna dai Chyum daw hta tsun nga ai re. Lam mi hku tsun yang, ya na masa hpe moi na masa hte shingdaw ai, ya aten hta hpa raitim grau sawng wa ai ngu nna sha myit ai gaw mahkam re.

6. Ya prat hta na lai wa sai prat gaw grau kaja ai ngu myit ai gaw hpa majaw hpaji n rawng ai kun? Ga shadawn jaw u. 

⁶ Ya prat hta na lai wa sai prat gaw grau kaja ai ngu myit ai gaw, hpa majaw hpaji n rawng ai rai kun? Dai aten hpe sha myit maju jung ai gaw, kaja ai lam ni hpe sha dum shangun nna, hkrum wa ai mayak mahkak ni hpe gaw malap kau shangun chye ai. Moi Israela ni a lam hpe yu yu ga. Egutu mung kaw na pru wa ai hpang, prat gaw kade daram yak wa ai hpe kalang ta malap kau nna, malu masha kaja ai hpe sha matsing nga ai. “Egutu mung e pagawn sha lu ai anga, kumgyin, gyinshau, gaubawng, shakau, hparaw re ai ni anhte dum ga ai” ngu tsun ma ai. (Bhk 11:5) Teng sha “pagawn sha lu” wa ai kun? N re. Egutu mung hta mayam hku nna adip arip di hkrum wa ai. (Pru 1:13, 14; 3:6-9) Dai pyi, mayak mahkak ni hpe malap kau nna, dai prat hpe bai marit nga ai. Yehowa galaw ya wa ai lam ni hpe myit maju jung na malai, lai wa sai aten na kaja ai lam ni hpe sha myit maju jung ma ai. Shanhte a myit jasat hpe Yehowa n ra ai.​—Bhk 11:10.

7. Lai wa sai aten hpe sha marit nga ai mahkam hpe koi na matu nauna langai hpe hpa gaw karum ya ai kun?

⁷ Lai wa sai aten hpe sha marit nga ai mahkam hpe gara hku koi lu na kun? 1954 hta,  Bruklin Behtela hta magam gun hpang ai nauna langai a lam hpe yu yu ga. Shaning loi mi na ai hpang Behtela nta masha hte hkungran ai. Shaning law law Behtela hta arau magam gun ai. Raitim, 1976 hta madu wa gaw hkam n kaja wa ai. Si ra sana hpe chye ai shaloi, madu jan hpe gaida prat hpe hkamjan lu na matu lajang ya wa ai. “An gaw ngwi pyaw ai dinghku prat lu la wa ai. Dai hpe masha law malawng n hkamsha lu ai” ngu tsun ai. “Na a matsing nyan hta bai dum wa na raitim, dai aten hpe sha marit nga ai baw hkum galaw. Aten gaw nang hpe shamai ya na re. Myit hkum daw. Aten tup yawn nga ai baw mung hkum galaw. Nang hta ngwi pyaw ai lam ni, shaman chyeju ni nga ai hpe dum u. Matsing nyan gaw Karai Kasang jaw ai kumhpa re” ngu nna mung n-gun jaw ai. Grai kaja ai hpaji jaw ga re.

8. Lai wa sai aten hpe sha myit maju n jung nga ai majaw nauna gara akyu lu wa ai kun?

⁸ Madu wa a hpaji jaw ga hpe nauna hkan sa ai. Asak 92 ning, si ai aten du hkra, sadi dung let magam gun wa ai. “Yehowa a magam hpe 63 ning jan aten hpring galaw wa ai hpe bai myit yu yang, nye a prat gaw gaja wa myit dik ai ngu lu tsun ai” nga nna n si shi ai shaning loi mi hta nauna tsun ai. Hpa majaw kun? Shi ndai hku tsun ai: “Prat hpe teng sha myit dik shangun ai gaw, hpunau nauna ni hte arau hparadisu hta Hpan Madu, langai sha rai nna tengman ai Karai Kasang Yehowa a magam hpe htani htana gun hpai mat na ngu ai myit mada lam hte mungkan grup hpunau nauna ni a majaw re ngu matut tsun ai.” * Shawng de sha yu wa ai ndai nauna kaw nna anhte law law sharin la lu ai.

9. Jaw Jau 19:18 hta lawm ai ga hpe laksan hku nna gara aten hta hkan sa na matu yak chye ai kun?

⁹ Jaw Jau 19:18 hpe hti u. Tinang hpe mara galaw ai wa gaw, hpunau nauna, manang, jinghku ni rai yang, mara raw ya na matu yak chye ai. Ga shadawn, nauna langai hpe kaga  nauna langai gaw, gumhpraw lagu ai ngu mara shagun ai. Hpang de, mara shagun ai nauna gaw bai hpyi nem tim, mara shagun hkrum ai nauna gaw, byin wa ai lam ni hpe n lu malap ai. Nang mung dai zawn hkrum ga ai kun? Dai hte maren n hkrum ga tim pyi, anhte law malawng gaw, langai ngai hpe myit machyi nga nna, galoi mung mara raw ya lu na n re ngu hkamsha chye ai.

10. Myit machyi nga yang hpa gaw karum ya lu ai kun?

¹⁰ Myit machyi nga yang hpa gaw karum ya lu ai kun? Lam langai hku nna, masa yawng hpe Yehowa mu ai lam dum ai hku nna re. N tara ai lam hte hpawn, anhte hkrum ai lam yawng hpe Yehowa chye ai. (Heb 4:13) Anhte hkamsha ai shaloi, Yehowa mung maren sha hkamsha ai. (Esa 63:9) N tara ai lam ni a majaw byin wa ai myit machyi ai lam yawng hpe yeng seng kau ya na nga nna mung ga sadi jaw da ai.​—Shr 21:3, 4.

11. Kaga ni hpe mara raw ya ai shaloi hpa akyu lu wa ai kun?

¹¹ Kaga ni hpe mara raw ya ai shaloi, anhte nan mung akyu lu ai hpe dum u. Ndai lam hpe mara shagun hkrum ai nauna myit dum nna, mara raw ya lu wa ai. Kaga ni hpe mara raw ya yang, tinang hpe mung Yehowa mara raw ya na ngu ai hpe nauna chye ai. (Mat 6:14) Maga mi na nauna shut ai hpe chye tim, mara raw ya na matu dawdan kau ai. Dai majaw, grau pyaw wa nna Yehowa a magam hpe grau myit maju jung lu ai.

12. 1 Yawhan 3:19, 20 kaw na hpa chye lu ai kun?

¹² 1 Yawhan 3: 19, 20 hpe hti u. Anhte yawng mara nga ai ngu hkamsha ga ai. Ga shadawn, nkau gaw, tengman ai tara n chye shi yang galaw wa ai mara ni a majaw, nkau gaw hkalup hkam ngut ai hpang galaw wa ai mara ni a majaw, mara nga ai ngu hkamsha ai. Dai hku byin chye ai. (Rom 3:23) Anhte yawng gaw jaw ai hpe galaw mayu tim, “malaw maga gaw kataw ai hkrai rai nga ga ai.” (Yak 3:2; Rom 7:21-23) Mara nga ai ngu ai hkamsha lam gaw, ra sharawng hpa n raitim, akyu shabyin ya lu ai. Tinang a prat hkrun lam hpe galai shai na matu, shut ai lam ni hpe bai n galaw hkrup hkra dawdan da na matu shadut ya lu ai.​—Heb 12:12, 13.

13. Mara nga ai ngu ladu lai hkamsha nga ai mahkam hpe hpa majaw sadi ra ai kun?

¹³ Anhte myit malai lu ngut ai hpang, Yehowa mara raw ya ngut ai hpang hta pyi, mara naw nga ai ngu ladu lai hkamsha nga chye ai. Dai gaw shoihpa nga ai. (Shk 31:10; 38:3, 4) Hpa majaw kun? Lai wa sai aten hta galaw wa ai mara ni a majaw, mara nga ai ngu hkamsha nga ai nauna langai a lam hpe myit yu ga. “Gara hku mi raitim, ngai na matu gaw grai hpang hkrat mat sai majaw, Yehowa a magam hta ngai hpa mung n galaw ai gaw kaja htum re ngu myit wa ai lam” nauna tsun dan ai. Masha law law dai zawn hkamsha ai. Raitim, mara nga ai ngu ladu lai hkamsha nga ai mahkam hpe sadi ra ai. Anhte hpe Yehowa pyi asum n jaw ai nga yang, tinang hkum tinang asum jaw dat yang Satan grai pyaw na re.​—2 Korinhtu 2:5-7, 10, 11 hte shing daw yu u.

14. Nang hpe Yehowa asum n jaw ai hpe gara hku chye lu ai kun?

¹⁴ Tinang hpe Yehowa asum n jaw ai hpe gara hku chye lu ai kun? nga nna nkau mi myit chye ai. Dai zawn myit ai gaw, nang hpe Yehowa asum n jaw ai ngu ai lachyum re. “Tinang shadu da ai hta grau ru jung nga ai prat hkrun lam dingsa a n kaja ai akyang ni a majaw, chyahkring hkring ahtu kataw nna hkrat sum chye ai. . . . Raitim, myit hkum daw, mara n raw ya lu ai mara hpe tawt lai hkrup sai  ngu hkum myit. Satan dai zawn myit shangun mayu ai. Grai yawn nna myit shuk shak nga ai gaw, na a masa nau n sawng shi ai ngu ai lachyum re. Karai Kasang hpang de shagrit shanem let, sharawng awng let bai kayin wa u. Karai Kasang a mara raw ya ai lam, kashin kamun ya ai lam hte karum shingtau lam lu na matu shakut u. Mara langai hpe kade lang galaw hkrup tim, jamjau hkrum nga ai aten hta, kawa hpang de gat mat ai ma langai zawn, Karai Kasang hpang de sit sa u. Tsawra myit nga ai Yehowa gaw, sharawng awng let karum ya na re” ngu Sin Langchyi hta tsun da ai. *

15-16. Tinang hpe Yehowa asum n jaw ai hpe chye lu ai majaw nkau gara hku hkamsha ai kun?

¹⁵ Tinang hpe Yehowa asum n jaw ai hpe chye lu ai majaw, Karai a mayam law law gaw shalan shabran lam lu ai. Ga shadawn, “Chyum Laika Gaw Prat Hpe Galai Shai Ya” ngu ai daw matut sumhpa ni hta lawm ai mahkrum madup langai kaw nna hpunau langai n-gun lu la ai. Dai sumhpa hta, nauna gaw, lai wa sai aten hta mara galaw ga ai majaw, shi hpe Yehowa tsawra ai hpe hkap la na matu yak nga ai. Hkalup hkam ngut ai hpang shaning law law dai zawn hkamsha nga dingyang re. Raitim, gawng malai hkungga a lam myit dat ai shaloi, shi hpe Yehowa kade daram tsawra ai lam chye mat ai. *

¹⁶ Hpunau gaw dai mahkrum madup kaw nna karum shingtau lam hpe gara hku lu la ai kun? “Ngai kaji nga ai aten hta, nse nsa sumla ni, laika ni, sumla hkrung ni yu ai akyang nga wa ai. Kade n na shi ai shaloi bai yu hkrup ai. Dai majaw, myitsu salang ni hpe karum hpyi ai. Hpang hta nye a masa ni kaja wa ai. Karai Kasang ngai hpe tsawra ai, matsan dum ai hpe myitsu salang ni tsun dan ai. Raitim, kalang lang ngai gaw manu n dan ai, Karai Kasang ngai hpe tsawra na n re ngu hkamsha nga ai. Dai nauna a lam gaw ngai hpe grai karum ya ai. Karai Kasang gaw ngai hpe mara raw ya na n re ngu sawn la ai gaw, Shi a Kasha sak jaw wa ai lam gaw nye a mara ni hpe n magap ya lu ai ngu tsun ai hte bung ai lam ngai chye na mat sai. Dai sumhpa hpe ngai rep nna zing da ai. Rai yang she, manu n dan ai ngu ai myit ni bai shang wa ai shaloi, dai nauna a lam hpe bai hti nna sawn sumru lu ai” ngu tsun ai.

17. Mara nga ai ngu ladu lai hkamsha nga ai mahkam hpe kasa Pawlu gara hku koi wa ai kun?

 ¹⁷ Dai zawn mahkrum madup ni gaw, kasa Pawlu a lam hpe bai dum shangun ai. Shi gaw Hkristan garai n byin shi yang, mara kaba ni hpe tawt lai wa ai. Galaw wa ai mara ni hpe bai dum tim, dai hpe sha myit maju n jung ai. (1 Tm 1:12-15) Gawng malai hkungga hpe tinang a matu Yehowa lajang ya ai kumhpa hku nna mu mada ai. (Gal 2:20) Mara nga ai ngu ladu lai n hkamsha ai. Yehowa a matu kaja htum sak jaw na hpe sha myit maju jung ai.

18. Ndai sumhpa kaw nna hpa chye lu ai kun?

¹⁸ Ndai sumhpa kaw nna hpa chye wa sai kun? (1) Kaja ai matsing hpa lam ni gaw Yehowa kaw nna kumhpa re. Raitim, moi na tinang a prat gaw kade daram kaja tim, htawm hpang mungkan nnan hta lu la na aprat daram gaw n kaja ai. (2) Kaga ni a majaw myit hkra machyi chye tim, matut hkawm sa lu na matu mara raw ya ra ai. (3) Mara nga ai ngu ladu lai hkamsha ai gaw, kabu gara let magam gun ai hpe hkum pat shangun chye ai. Dai majaw, anhte hpe Yehowa mara raw kau sai ngu ai hpe Pawlu zawn kam ra ai.

19. Mungkan nnan du wa ai shaloi lai wa sai aten hpe bai myit nna myit n pyaw ai lam ni nga sana n re ai hpe gara hku chye lu ai kun?

¹⁹ Anhte hta htani htana asak hkrung na matu myit mada lam nga ai. Mungkan nnan du ai shaloi, lai wa sai aten hpe bai myit nna myit n pyaw ai baw byin sana n re. “Shawng na lam ni hpe dum na mung n rai, myit sumru yu na mung n rai” ngu nna Chyum Laika hta tsun da ai. (Esa 65:17) Yehowa a magam gun let nkau mi gaw lani hte lani asak kaba wa sai. Raitim, mungkan nnan hta bai hkalung wa na re. (Yob 33:25) Dai majaw, lai wa sai aten hpe sha marit nga ai baw hkum galaw. Shawng de sha yu nna, htawm hpang a matu asak hkrung u.