1-2. Ɛzɩma ɖɩpɩzɩɣ nɛ ɖɩɖɔ lɔŋ tasʋʋ mbʋ pɩwɛ Aduwa 4:25 taa yɔ pɩ-yɔɔ? Ha kɩɖaʋ nakʋyʋ.

MAƔZƖ kɩɖaŋ ɩnɛ ɩ-naadozo ɩ-yɔɔ nɛ ŋna: Koobu halɩñɩnʋ akpadɩyʋ nɔɔyʋ wɛɛ nɛ ɛtɔzʋʋ e-wezuu caɣʋ taa alɩwaatʋ kɩbandʋ ndʋ tɩɖɛwa yɔ tɩ-yɔɔ. Paa lɛɛlɛɛyɔ ɛkatɩɣ kala e-wezuu caɣʋ taa yɔ, ɛwɛɛ nɛ ewoki pɩ-yɔɔ nɛ ɛlakɩ e-ɖoŋ ɖeɖe Yehowa sɛtʋ taa. (1 Kɔr. 15:58) Paa ɖooye lɛ, ɛmaɣzɩɣ ɛzɩma ɛ nɛ ɛ-hɔʋ taa ñɩma nɛ ɛ-taabalaa pakaɣ kpɛndʋʋ nɛ pɛwɛɛ Paradisuu taa yɔ pɩ-yɔɔ. Koobu halɩñɩnʋ lɛlʋ tɔzʋʋ se koobu nɔɔyʋ kaaɖʋ-ɩ ɖɩwɩzɩyɛ, ɛlɛ ɛkpaɣ lɩmaɣzɩyɛ se ɛɛwɛɣ nɛ ɛmaɣzɩɣ pɩ-yɔɔ mbʋ. (Kol. 3:13) Koobu abalɩñɩnʋ nɔɔyʋ tɔzʋʋ kɩwɛɛkɩm mbʋ ɛlaba nɛ pɩɖɛɛ yɔ pɩ-yɔɔ, ɛlɛ lɛɛlɛɛyɔ lɛ, ɛkam ñʋʋ mbʋ payɩ ɛpɩzɩɣ ɛla nɛ ɛwɛɛ siɣsiɣ Yehowa ɛsɩndaa yɔ pɩ-yɔɔ na.—Keɣa 50:12.

² Nɔɔ kʋɖʋmaɣ ŋga wɛ Krɩstʋ ñɩma mba pa-naadozo pɛ-hɛkʋ taa? Pa-tɩŋa pɔtɔzʋʋ mbʋ pɩlabɩ pe-wezuu caɣʋ taa nɛ pɩɖɛɛ yɔ pɩ-yɔɔ, ɛlɛ paamaɣzɩɣ pɩ-yɔɔ paa ɛzɩmtaa. ‘Pɛ-ɛsa cɔŋnɩ’ mbʋ pɩwɛnɩ ɛsɩndaa yɔ na.—Kalɩ Aduwa 4:25.

3. Ɛbɛ yɔɔ pɩpɔzʋʋ se ‘ɖɛ-ɛsa ɩcɔnɩ’ mbʋ pɩwɛnɩ ɛsɩndaa yɔ?

³ Ɛbɛ yɔɔ pɩcɛyaa se ‘ɖɛ-ɛsa ɩcɔnɩ’ mbʋ pɩwɛnɩ ɛsɩndaa yɔ? Ɛyʋ weyi ɛɖɔŋ nɛ ɛcɔŋnɩ ɛ-wayɩ ɖoŋ ɖoŋ yɔ, ɛɛɖɔŋ nʋmɔʋ taa camɩyɛ. Mbʋ ɖɔɖɔ pɩwɛ Yehowa sɛtʋ taa. Ye paa ɛzɩmtaa ɖɩwɛɛ nɛ ɖɩmaɣzɩɣ mbʋ pɩlaba nɛ pɩɖɛɛ yɔ pɩ-yɔɔ yɔ, ɖɩɩpɩzɩɣ nɛ ɖɩsɛɛ Yehowa nɛ ɖo-ɖoŋ kpeekpe.—Luka 9:62.

4. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

⁴ Tɔm ñʋʋ kʋnɛ kɩ-taa, ɖɩkaɣ yɔɔdʋʋ kpacanaa naadozo tɔm; kpacanaa mba papɩzɩɣ peyele nɛ ɖɩkɩlɩɣ maɣzʋʋ mbʋ pɩlaba nɛ pɩɖɛɛ yɔ pɩ-yɔɔ. Kpacanaa mba yɔ: (1) ɖɩmaɣzɩɣ se ɖe-wezuu caɣʋ kaakpaɖɩ ɖeu, (2) ɛyʋ lɛlʋ caɣnʋʋ, nɛ (3) ye ɖɛ-ɛhʋyɛ ɛcɛyɩɣ-ɖʋ kadadayaɣ yɔ. Paa kpaca ŋgʋ kɩ-hɔɔlʋʋ taa lɛ, ɖɩkaɣ naʋ Bibl paɣtʋ kila wena apɩzɩɣ asɩnɩ-ɖʋ nɛ ɖɩtaaka  ɖa-lɩmaɣza “mbʋ pɩwɛnɩ wayɩ yɔ pɩ-yɔɔ,” ɛlɛ ɖɩpa ɖɛ-ɛsa nɛ “mbʋ pɩwɛnɩ ɛsɩndaa yɔ” na.—Fil. 3:13.

5. Ɛbɛ Eklesɩyastɩ 7:10 yɔɔdʋʋ se pɩfɛyɩ se ɖɩla?

⁵ Kalɩ Eklesɩyastɩ 7:10. Yʋsɩ se mayaɣ ŋga katɩyɔɔdɩ se pɩfɛyɩ ɖeu se ŋpɔzɩ se: “Pɩlɩnɩ le nɛ caanaʋ taa wɛɛ ɖeu?” Tɔm kɩbandʋ yɔɔ tɔzʋʋ kɛnɩ kʋjɔʋ ŋgʋ kɩlɩnɩ Yehowa cɔlɔ yɔ. Ɛlɛ mayaɣ ŋga kɔyɔɔdaa se: “Taatɔ se: ‘Pɩlɩnɩ le nɛ caanaʋ taa wɛɛ weewee nɛ pɩkɩlɩ lɛɛlɛɛyɔ?’” Ye mbʋ, pɩwɛɛ se ɖɩkpa ɖa-tɩ nɛ ɖɩtaakpaɣ wezuu ŋgʋ ɖɩcaɣaa nɛ pɩɖɛɛ yɔ nɛ ɖɩmaɣzɩnɩ lɛɛlɛɛyɔ ñɩŋgʋ nɛ ɖɩmaɣzɩ se lɛɛlɛɛyɔ pɩtɩŋa pɩwɛɛkaa.

6. Ɛbɛ yɔɔ pɩtɩkɛnɩ lɔŋsɩnɖɛ se ɖɩwɛɛ nɛ ɖɩmaɣzɩɣ se ɖooo lɛ ɖe-wezuu caɣʋ kaakpaɖɩ ɖeu lɛɛlɛɛyɔ? Ha kɩɖaʋ nakʋyʋ.

⁶ Ɛbɛ yɔɔ pɩtɩkɛnɩ lɔŋsɩnɖɛ se ɖɩwɛɛ nɛ ɖɩmaɣzɩɣ se ɖooo lɛ ɖe-wezuu caɣʋ kaakpaɖɩ ɖeu lɛɛlɛɛyɔ? Wɛtʋ ndʋ, tɩpɩzɩɣ tiyele nɛ ɖɩwɛɛ ɖɩmaɣzɩɣ kɩbam mbʋ pɩlaba nɛ pɩɖɛɛ yɔ, pi-ɖeke pɩ-yɔɔ na. Yaa tɩpɩzɩɣ tiyele nɛ ɖini kala wena ɖɩɩkataa yɔ. Maɣzɩ caanaʋ taa Izrayɛɛlɩ mba kɩɖaʋ yɔɔ nɛ ŋna. Palɩ Ejipiti nɛ pitileɖi lɛ, pɔsɔɔ ɛzɩma pe-wezuu caɣʋ kaawɛ kaɖɛ peeɖe yɔ pɩ-yɔɔ. Ɛlɛ, paakam pa-lɩmaɣza tɔɔnaɣ kɩbaŋa ŋga pɔtɔkaɣ peeɖe yɔ kɔ-yɔɔ. Pɔyɔɔdaa se: “Ðɩtɔzʋʋ kpakpasɩ nzɩ ɖɩtɔkaɣ falaa Ejipiti ɛjaɖɛ taa yɔ sɩ-yɔɔ, ɖɩtɔzʋʋ kama, anasaayɩ somola, caasɩ, kaabʋnaa yɔɔ!” (Kɩg. 11:5) Ɛlɛ toovenim taa lɛ, pɔtɔkaɣ tɔɔnaɣ ŋga “falaa” yaa we? Aayɩ. Izrayɛɛlɩ mba kaatɔɔ kʋñɔŋ siŋŋ; alɩwaatʋ ndʋ tɩ-taa, paakɛ yomaa Ejipiti nɛ panazaɣ-wɛ siŋŋ. (Ejl. 1:13, 14; 3:6-9) Ɛlɛ, pʋwayɩ pɔsɔ kʋñɔmɩŋ ɛnɩ ɩ-yɔɔ nɛ pɔsɔɔlɩ siŋŋ se papɩsɩ peeɖe. Mbʋ ɛzɩ paakam pa-lɩmaɣza kɩbam ndɩ ndɩ mbʋ Yehowa labɩ-wɛ pitileɖita yɔ pɩ-yɔɔ lɛ, palɩzaa se pɔtɔzʋʋ alɩwaatʋ kɩbandʋ ndʋ tɩɖɛwa yɔ tɩ-yɔɔ. Pa-lakasɩ nzɩ sɩtaakɛdɩnɩ Yehowa.—Kɩg. 11:10.

7. Ɛbɛ sɩnɩ koobu halɩñɩnʋ nɔɔyʋ se ɛtaawɛɛ nɛ ɛmaɣzɩɣ se wezuu ŋgʋ ɛcaɣaa nɛ pɩɖɛɛ yɔ kɩɩkpaɖɩ ɖeu?

⁷ Ɛzɩma ɖɩpɩzɩɣ ɖɩla nɛ ɖɩtaamaɣzɩ se ɖe-wezuu caɣʋ kaakpaɖɩ ɖeu? Iyele nɛ ɖɩyɔɔdɩ koobu halɩñɩnʋ nɔɔyʋ kɩɖaʋ tɔm; pɩnaɣ 1945  taa ɛpaɣzɩ labʋ tʋmɩyɛ Brooklyn Betɛɛlɩ taa. Pɩnzɩ nasɩyɩ wayɩ lɛ, ɛ nɛ koobu abalɩñɩnʋ nɔɔyʋ pɔɖɔkɩ nesi, ɛlɛ ɖɔɖɔ lakɩ tʋmɩyɛ Betɛɛlɩ taa. Pɛkpɛndaa nɛ pala tʋmɩyɛ peeɖe pɩnzɩ sakɩyɛ. Ɛlɛ, pɩnaɣ 1976 taa lɛ, ɛ-walʋ tɔlɩ kʋdɔŋ nɛ pʋwayɩ ɛsɩ. Koobu halɩñɩnʋ ɛnʋ ɛyɔɔdaa se ɛ-walʋ nawa se ɛ-sɩm ñɔtaa lɛ, ɛ-walʋ tasɩ-ɩ lɔŋ kɩbaŋ nɩɩyɩ se ɩsɩnɩ-ɩ e-lelitu caɣʋ taa. Ɛ-walʋ heyi-i se: “Ðɩnɩ leleŋ ɖe-nesi ɖɔkʋʋ taa. Ɛyaa sakɩyɛ tɩnɩɩ leleŋ ɛnɩ nɛ pana.” Ɛlɛ ɛpaɣ-ɩ ɖɔɖɔ se: “Ŋŋkaɣ sɔʋ tʋma kɩbana wena ɖɩkpɛndaa nɛ ɖɩla yɔ a-yɔɔ, ɛlɛ taaka ña-lɩmaɣza a-yɔɔ. Alɩwaatʋ wɛɣ nɛ tɩɖɛɣ lɛ, ña-laŋwɛɛkɩyɛ wɛɣ nɛ ɖɩpasɩɣ. Taayele nɛ mbʋ pɩtalɩ-ŋ yɔ pɩkɩlɩ-ŋ tibu yɔɔɔ. Ña-taa ɛla leleŋ nɛ alɩwaatʋ kɩbandʋ ndʋ ɖɩkpɛndaa nɛ ɖɩla tʋmɩyɛ Yehowa sɛtʋ taa yɔ. . . . Tɔm yɔɔ tɔzʋʋ kɛnɩ kʋjɔʋ ŋgʋ Ɛsɔ ha-ɖʋ yɔ.” Pɩkɛ lɔŋ tasʋʋ kɩbam siŋŋ!

8. Ɛzɩma koobu halɩñɩnʋ nɔɔyʋ walʋ lɔŋ tasʋʋ wazɩ-ɩ?

⁸ Ðo-koobu halɩñɩnʋ ɛnʋ ɛɖɔm ɛ-walʋ lɔŋ tasʋʋ yɔɔ. Ɛɖɔkɩ e-siɣsiɣ wɛtʋ Yehowa sɛtʋ taa nɛ pɩkɔɔ pɩtalɩ ɛ-sɩm wiye alɩwaatʋ ndʋ ɛɛwɛnɩ pɩnzɩ 92 yɔ. Pɩnzɩ pazɩ pʋcɔ nɛ ɛsɩkɩ lɛ, ɛyɔɔdaa se: “Pɩnzɩ nzɩ mankpaɣaa nɛ malabɩnɩ alɩwaatʋ tɩŋa Ɛsɔ sɛtʋ tʋmɩyɛ yɔ sɩcɛzɩ 63, nɛ mamaɣzɩɣ sɩ-yɔɔ lɛ, manpɩzɩɣ nɛ mɔyɔɔdɩ se manɩ leleŋ siŋŋ me-wezuu caɣʋ taa.” Ɛbɛ yɔɔ? Ɛlɩzɩ pɩ-taa se: “Ðɩpɩzɩɣ nɛ ɖɩnɩɩ leleŋ ɖe-wezuu caɣʋ taa mbʋ pʋyɔɔ yɔ ɖɩwɛ koobiya hɔʋ kɩbaŋʋ taa, nɛ ɖɩwɛnɩ lidaʋ se ɖa nɛ wɛ ɖɩkaɣ caɣʋ Paradisuu taa tɛtʋ yɔɔ, ɖɩkaɣ kpɛndʋʋ nɛ ɖɩsɛɛ ɖa-Lɩzɩyʋ Sɔsɔ Yehowa weyi ɛkɛ Ɛsɔ toovenim tʋ yɔ tam.” * Koobu halɩñɩnʋ ɛnʋ ɛɛkam ɛ-lɩmaɣza Yehowa tamasɩ yɔɔ, nɛ ɖɩpɩzɩɣ nɛ ɖɩkpɛlɩkɩ lɔŋ sakɩyɛ ɛ-cɔlɔ!

9. Ɛzɩ pɔyɔɔdʋʋ Levitiki 19:18 taa yɔ, alɩwaatʋ ndʋ taa pɩpɩzɩɣ nɛ pɩwɛɛ-ɖʋ kaɖɛ kpem se ɖikpeɣ?

⁹ Kalɩ Levitiki 19:18. Ðoŋ ɖoŋ lɛ, ye ɛyʋ weyi ɛɖʋ-ɖʋ ɖɩwɩzɩyɛ yɔ ɛkɛ ɖo-koobu, ɖa-taabalʋ kʋsɔɔlʋ yaa ɖɔ-hɔʋ taa tʋ nɔɔyʋ yɔ,  pɩwɛ-ɖʋ kaɖɛ kpem se ɖikpeɣ-i. Kɩɖaʋ nakʋyʋ yɔ: Koobu halɩñɩnʋ nɔɔyʋ kpa koobu halɩñɩnʋ lɛlʋ ɖulum se ɛmɩlɩ e-liidiye. Pʋwayɩ lɛ, koobu weyi ɛkpa lɛlʋ mɩlɩm ɖulum yɔ ɛpɔzɩ-ɩ se ɛkpaɣ nɛ ekpeɣ-i, ɛlɛ koobu weyi pakpa-ɩ mɩlɩm yɔ pɩɩcɛyɩ-ɩ siŋŋ nɛ pɩɩsaŋ se ɛsɔɔ mbʋ pɩlaba yɔ pɩ-yɔɔ. Pɩtɛmɩ-ŋ labʋ mbʋ wiɖiyi? Paa wɛtʋ ndʋ tɩ-maɣmaɣ tɩtɩtalɩ-ɖʋ yɔ, pɩtɩla nabʋyʋ tɛm labʋ nɛ pɩcɛyɩ ɖa-taa sakɩyɛ nɛ pamaɣzɩ se wiɖiyi paakaɣ pɩ-yɔɔ sɔʋ kpa.

10. Alɩwaatʋ ndʋ ɖɩnaɣ se ɖɩcaɣnɩ nɔɔyʋ yɔ, ɛbɛ pɩzɩɣ nɛ pɩsɩnɩ-ɖʋ?

¹⁰ Alɩwaatʋ ndʋ ɖɩnaɣ se ɖɩcaɣnɩ nɔɔyʋ yɔ, ɛbɛ pɩzɩɣ nɛ pɩsɩnɩ-ɖʋ? Pɩwɛɛ se ɖɩtɔzɩ se Yehowa naɣ pɩtɩŋa. Ɛsɩm mbʋ payɩ pɩtalɩɣ-ɖʋ ɖe-wezuu caɣʋ taa yɔ, pɩkpɛndɩnɩ ɛzɩma ɛyaa lalaa muluu-ɖʋ yɔ. (Ebr. 4:13) Pɩcɛyɩɣ-ɩ alɩwaatʋ ndʋ ɖɩlakɩ kʋñɔŋ yɔ. (Iza. 63:9) Nɛ ɛlabɩ tamaɣ se ɛkaɣ-ɖʋ lɩzʋʋ mulum lakasɩ nzɩ payɩ siyeki nɛ ɖɩlakɩ kʋñɔŋ yɔ sɩ-taa.—Natʋ 21:3, 4.

11. Alɩwaatʋ ndʋ ɖɩɩcakɩnɩ nɔɔyʋ yɔ, ɛzɩma pɩwazɩɣ ɖa-maɣmaɣ?

¹¹ Pɩwɛɛ se ɖɩtɔzɩ ɖɔɖɔ se alɩwaatʋ ndʋ ɖɩɩcakɩnɩ nɔɔyʋ yɔ, pɩwazɩɣ ɖa-maɣmaɣ. Koobu halɩñɩnʋ weyi pakpa-ɩ ɖulum se ɛmɩlaa yɔ, ɛkɔma nɛ eɖiɣzina se tɔm ndʋ tɩkɛ toovenim. Alɩwaatʋ wɛɛ nɛ tɩɖɛɣ lɛ, ɛpɩzaa nɛ ekpeɣ koobu weyi ɛkpa-ɩ mɩlɩm ɖulum yɔ nɛ ɛ-taa yebi-i wɩnʋʋ. Eɖiɣzinaa se alɩwaatʋ ndʋ ɖikpeɣu lalaa yɔ, Yehowa kpeɣu-ɖʋ. (Mat. 6:14) Ɛnawa se mbʋ koobu halɩñɩnʋ lɛlʋ laba yɔ, pɩtɩtʋʋzɩ ɛlɛ ɛlɩzaa se ɛɛcakɩnɩ-ɩ. Mbʋ pɩlɩ pɩ-taa yɔ lɛ se ɖo-koobu halɩñɩnʋ ɛnʋ ehiɣ taa leleŋ nɛ pɩkpaɖɩ nɛ ɛpɩzɩ nɛ ɛka ñʋʋ Yehowa sɛtʋ yɔɔ.

12. Tɔm ndʋ tɩwɛ 1 Yohanɛɛsɩ 3:19, 20 taa yɔ, ɛbɛ tɩkpɛlɩkɩɣ-ɖʋ?

¹² Kalɩ 1 Yohanɛɛsɩ 3:19, 20. Nabʋyʋ taa, ɖɛ-ɛhʋyɛ cɛyɩɣ-ɖʋ. Mbʋ nabɛyɛ laba pʋcɔ nɛ patɩlɩ toovenim yɔ, piyeki nɛ pɛ-ɛhʋyɛ cɛyɩɣ-wɛ. Lalaa ɛhʋyɛ cɛyɩɣ-wɛ mbʋ pʋyɔɔ yɔ, palabɩ kɩwɛɛkɩm pa-lɩm mɩyɩsʋʋ wayɩ. (Roma 3:23) Toovenim taa lɛ, ɖɩsɔɔlaa se ɖɩla mbʋ pɩtʋʋzaa yɔ. Ɛlɛ, “pituuluu ɖa-tɩŋa tam sakɩyɛ.” (Yak. 3:2; Roma 7:21-23) Paa ɖɩtɩsɔɔlɩ se ɖɛ-ɛhʋyɛ ɛcɛyɩ-ɖʋ yɔ, nabʋyʋ taa pɩwɛ ɖeu se ɖɛ-ɛhʋyɛ ɛcɛyɩ-ɖʋ. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ ɖɛ-ɛhʋyɛ cɛyɩɣ-ɖʋ yɔ, pɩpɩzɩɣ piyele nɛ ɖɩla lɛɣzɩtʋ ɖe-wezuu caɣʋ taa nɛ ɖɩtɛ ɖa-taa se ɖɩɩtasɩɣ kɩwɛɛkɩm kʋɖʋmʋm mbʋ labʋ.—Ebr. 12:12, 13.

13. Ɛbɛ yɔɔ pɩwɛɛ se ɖɩkpa ɖa-tɩ nɛ ɖɛ-ɛhʋyɛ ɛtaacɛyɩɣ-ɖʋ kadadayaɣ?

¹³ Hɔɔlʋʋ lɛɛkʋ taa lɛ, ɖɛ-ɛhʋyɛ pɩzɩɣ nɛ ɖɩcɛyɩɣ-ɖʋ kadadayaɣ, pʋ-tɔbʋʋ se halɩ paa ɖikpiɖi kɩwɛɛkɩm mbʋ ɖɩlaba yɔ pɩ-yɔɔ nɛ Yehowa wɩlɩ se ekpeɣ-ɖʋ yɔ, ɖɛ-ɛhʋyɛ pɩzɩɣ nɛ ɖɩwɛɛ-ɖʋ cɛyʋʋ yɔɔ. Ye pɩtalɩ-ɖʋ mbʋ yɔ, pɩpɩzɩɣ nɛ pɩkɔnɩ-ɖʋ kaɖɛ. (Keɣa 30:11; 37:4, 5) Ɛzɩma tɩyɛ? Yele nɛ ɖɩna koobu halɩñɩnʋ nɔɔyʋ kɩɖaʋ, ɛɛlabɩ kɩwɛɛkɩm nɛ pɩɖɛɛ nɛ ɛ-ɛhʋyɛ cɛyɩɣ-ɩ kadadayaɣ. Ɛyɔɔdaa se: “Mamaɣzaɣ se paa malabɩ Yehowa tʋmɩyɛ nɛ kpekpeka ɛzɩma yɔ, pɩɩwazɩɣ pʋyʋ mbʋ pʋyɔɔ yɔ pɩtɩla ɛɛkaɣ ma-ñʋʋ yabʋ.” Ða-taa sakɩyɛ pɩzɩɣ nɛ pɛwɛɛnɩ lɩmaɣza ana ɖɔɖɔ. Pʋyɔɔ lɛ, pɩcɛyaa se ɖɩkpa ɖa-tɩ nɛ ɖɛ-ɛhʋyɛ ɛtaacɛyɩɣ-ɖʋ kadadayaɣ. Ɛbɛ yɔɔ? Mbʋ pʋyɔɔ yɔ, Sataŋ taa kaɣ labʋ leleŋ siŋŋ ye ɖiyebi Yehowa sɛʋ, paa ɛlɛ ekpeɣu-ɖʋ ɖa-kɩwɛɛkɩm yɔ.—Kpaɣ-tʋ nɛ ŋmaɣzɩnɩ 2 Kɔrɛntɩ mba 2:5-7, 11.

14. Ɛzɩma ɖa-taa pɩzɩɣ nɛ pɩtɛ se Yehowa tɩlɔ lidaʋ ɖɔ-yɔɔ?

¹⁴ Ɛlɛ, ɖɩpɩzɩɣ nɛ ɖɩpɔzɩ ɖa-tɩ se: ‘Ɛzɩma man-taa pɩzɩɣ nɛ pɩtɛ se Yehowa tɩlɔ lidaʋ mɔ-yɔɔ?’ Ye ŋpɔzɩ ña-tɩ tɔm ndʋ yɔ, pɩwɩlɩɣ se Yehowa pɩzɩɣ nɛ ɛkpeɣ-ŋ. Pɩlakɩ pɩnzɩ sakɩyɛ yɔ, Feŋuu Tilimiye yɔɔdaa se: “Ðɩpɩzɩɣ nɛ ɖɩlakɩ kɩwɛɛkɩm nabʋyʋ tam sakɩyɛ. Pɩpɩzɩɣ nɛ pɩla se kɩwɛɛkɩm mbʋ, ɖɩtaapɩzɩ ɖiyele pɩ-labʋ  pʋcɔ nɛ ɖɩpaɣzɩ sɛʋ Ɛsɔ. . . . Taalɔ lidaʋ. Taamaɣzɩ se ŋlabɩ kɩwɛɛkɩm mbʋ Yehowa ɛɛpɩzɩɣ nɛ ekpeɣ-ŋ kpa yɔ. Lɩmaɣza ana ɖeyi ɖeyi Sataŋ sɔɔlaa se ŋwɛɛna. Ŋlakɩ kɩwɛɛkɩm mbʋ lɛ, pɩcɛyɩɣ-ŋ. Pɩwɩlɩɣ se ŋtɩkɛ ɛyʋ kɩdɛkɛdʋ nɛ Yehowa pɩzɩɣ nɛ ekpeɣ-ŋ. Luzi ña-tɩ paa ɛzɩmtaa nɛ ŋtɩmɩɣnɩ Ɛsɔ se ekpeɣ-ŋ, ɛsɩnɩ-ŋ nɛ ñɛ-ɛhʋyɛ wɛɛ kele kele nɛ ɛsɩnɩ-ŋ ɖɔɖɔ nɛ ŋtaatasɩ kɩwɛɛkɩm mbʋ labʋ. Ñɔtɩnɩ-ɩ ɛzɩ pɩɣa ñɔtʋʋnɩ ka-caa kaɖɛ alɩwaatʋ taa yɔ, nɛ paa ŋlabɩ kɩwɛɛkɩm mbʋ tam ɛzɩma yɔ, Yehowa lootiye yɔɔ lɛ, ɛkaɣ-ŋ sɩnʋʋ faaa.” *

15-16. Ɛzɩma pɩlakɩ ɛyaa nabɛyɛ alɩwaatʋ ndʋ panaɣ se Yehowa tɩlɔ pɔ-yɔɔ lidaʋ yɔ?

¹⁵ Yehowa sɛyaa sakɩyɛ hiɣ laŋɩyɛ hɛzʋʋ alɩwaatʋ ndʋ panawa se ɛtɩlɔ lidaʋ pɔ-yɔɔ yɔ. Kɩɖaʋ nakʋyʋ yɔ: Pɩlakɩ pɩnzɩ nasɩyɩ yɔ, tɔm ñʋŋ “Bibl lɛɣzɩɣ ɛyaa wezuu caɣʋ” weyi paɖʋʋ Feŋuu Tilimiye taa yɔ, ɩ-taa nakʋyʋ kaasɩnɩ koobu abalɩñɩnʋ nɔɔyʋ. Tɔm ñʋʋ ŋgʋ kɩ-taa, koobu halɩñɩnʋ nɔɔyʋ yɔɔdaa se lakasɩ kɩdɛkɛdɩsɩ nzɩ ɛlabɩ e-wezuu caɣʋ taa yɔ sɩ-yɔɔ lɛ, pɩɩwɛ ɛnʋ kaɖɛ se etisi se Yehowa pɩzɩɣ nɛ ɛsɔɔlɩ-ɩ. Ɛɛwɛnɩ lɩmaɣza ana pɩnzɩ sakɩyɛ paa paatɛmɩ-ɩ mɩyɩsʋʋ lɩm yɔ. Ɛlɛ, ɛmaɣzɩ kɩhɛyʋʋ pʋ-ñʋʋ taa yɔɔ siŋŋ lɛ, pɩsɩnɩ-ɩ nɛ etisi se Yehowa sɔɔlɩ-ɩ. *

¹⁶ Ɛzɩma koobu halɩñɩnʋ ɛnʋ ɛ-kɩɖaʋ sɩnɩ koobu abalɩñɩnʋ ɛnɛ? Koobu abalɩñɩnʋ mawa se: “Maakɛ pɩɣa lɛ, mɔncɔŋnaɣ kʋzʋʋ fotonaa ɖoŋ ɖoŋ, nɛ pɩɩwɛ-m kaɖɛ siŋŋ se meyele lakasɩ nzɩ. Pitileɖi yɔ, manɖaɣnɩ cɔnʋʋ. Mɔnpɔzɩ ɛzʋtʋyaa se pasɩnɩ-m, nɛ mañaɣ pana nɛ pɩkpaɖɩ se mawa kaɖɛ nɖɩ. Ɛzʋtʋyaa sɩnɩ-m nɛ mentisi se Ɛsɔ sɔɔlɩ-m nɛ ɛsɔɔlaa se ɛsɩnɩ-m. Ɛlɛ paa mbʋ yɔ, nabʋyʋ taa, pɩlakɩ-m ɛzɩ mɛnfɛyɩ wazaɣ, nɛ Yehowa ɛɛpɩzɩɣ nɛ ɛsɔɔlɩ-m yɔ. Mankalɩ koobu ɛnʋ ɛ-kɩɖaʋ tɔm lɛ, pɩsɩnɩ-m siŋŋ. Lɛɛlɛɛyɔ manɩ pɩ-taa se alɩwaatʋ ndʋ mɔntɔŋ se Ɛsɔ ɛɛpɩzɩɣ nɛ ekpeɣ-m yɔ, pɩwɛ ɛzɩ mɛwɛɛ nɛ mɔyɔɔdʋʋ se ɛ-Pɩyalʋ kɩlaʋ tɩpaɣlɩ se kɩpɩzɩ nɛ kihuuzi man-kɩwɛɛkɩm yɔɔ yɔ. Mɛnsɛtɩ tɔm ñʋʋ ŋgʋ se pɩsa nɛ mankalɩɣ-kʋ nɛ mamaɣzɩɣ kɩ-yɔɔ alɩwaatʋ ndʋ pɩlakɩ-m ɛzɩ mɛnfɛyɩ wazaɣ yɔ.”

17. Ɛbɛ Pɔɔlɩ laba se pɩsa nɛ ɛ-ɛhʋyɛ ɛtaacɛyɩ-ɩ kadadayaɣ?

 ¹⁷ Kɩɖaʋ kʋnɛ nɛ kɩɖaŋ lɛɛŋ ɛzɩ kʋnɛ yɔ, pɔtɔzʋʋ-ɖʋ apostoloo Pɔɔlɩ yɔɔ. Pʋcɔ nɛ ɛpɩsɩɣ Krɩstʋ tʋ lɛ, ɛɛlabɩ lakasɩ kɩdɛkɛdɩsɩ siŋŋ. Pɔɔlɩ tɔzaɣ mbʋ ɛlaba yɔ pɩ-yɔɔ, ɛlɛ ɛtaamaɣzɩɣ pɩ-yɔɔ paa ɛzɩmtaa. (1 Tim. 1:12-15) Ɛɛwɛnɩ tisuu se pɩtɩŋnɩ kɩhɛyʋʋ pʋ-ñʋʋ taa kɩlaʋ yɔɔ lɛ, papɩzɩɣ nɛ pekpeɣ-i, nɛ etisaɣ ɖɔɖɔ se kɩhɛyʋʋ pʋ-ñʋʋ taa kɛ haɖɛ nɖɩ Ɛsɔ labɩ-ɩ yɔ. (Gal. 2:20) Pɔɔlɩ taayele nɛ ɛ-ɛhʋyɛ cɛyɩɣ-ɩ kadadayaɣ, ɛlɛ ɛɛkam ñʋʋ se ɛla e-ɖoŋ ɖeɖe Yehowa sɛtʋ taa.

18. Ɛbɛ ɖɩkpɛlɩkɩ tɔm ñʋʋ kʋnɛ kɩ-taa?

¹⁸ Kpacanaa naadozo mba pɔ-tɔm ɖɩyɔɔdɩ tɔm ñʋʋ kʋnɛ kɩ-taa yɔ, lɔŋ weyi pɛkpɛlɩkɩ-ɖʋ? (1) Tɔm kɩbandʋ yɔɔ tɔzʋʋ kɛnɩ kʋjɔʋ ŋgʋ kɩlɩnɩ Yehowa cɔlɔ yɔ; ɛlɛ paa wezuu ŋgʋ ɖɩcaɣaa nɛ pɩɖɛɛ yɔ kɩwɛ ɖeu ɛzɩma yɔ, wezuu ŋgʋ ɖɩkaɣ caɣʋ ɛjaɖɛ kɩfaɖɛ taa yɔ kɩkaɣ wɛʋ ɖeu nɛ pɩkɩlɩ. (2) Ɛyaa lalaa pɩzɩɣ nɛ paɖʋ-ɖʋ ɖɩwɩzɩyɛ, ɛlɛ alɩwaatʋ ndʋ ɖɩlɩzɩɣ se ɖikpeɣu-wɛ yɔ, piyeki nɛ ɖiwolo pɩ-yɔɔ nɛ ɖɩsɛɣ Yehowa. (3) Ye ɖɛ-ɛhʋyɛ ɛcɛyɩɣ-ɖʋ kadadayaɣ yɔ, pɩpɩzɩɣ piyele nɛ ɖɩɩsɛɣ Yehowa nɛ taa leleŋ. Ye mbʋ, ɛzɩ Pɔɔlɩ yɔ, pɩwɛɛ se ɖitisi se Yehowa kpeɣ-ɖʋ.

19. Ɛzɩma ɖɩlaba nɛ ɖɩna se ɛjaɖɛ kɩfaɖɛ taa lɛ, ɖɩɩkaɣ tɔzʋʋ mbʋ piyekaɣ nɛ ɖɩwɛɣ laŋwɛɛkɩyɛ taa yɔ pɩ-yɔɔ?

¹⁹ Ðɩwɛnɩ lidaʋ se ɖɩkaɣ caɣʋ wezuu maatɛŋ. Alɩwaatʋ ndʋ ɖɩwɛɣ ɛjaɖɛ kɩfaɖɛ taa yɔ, ɖɩɩkaɣ tɔzʋʋ mbʋ piyekaɣ nɛ ɖɩtalɩɣ laŋwɛɛkɩyɛ taa yɔ pɩ-taa nabʋyʋ yɔɔ. Bibl yɔɔdɩ alɩwaatʋ ndʋ tɩ-tɔm se: “Paakaɣ tasʋʋ tɔzʋʋ ndʋ tɩɖɛwa yɔ tɩ-yɔɔ.” (Iza. 65:17) Maɣzɩ nɛ ŋna: Ða-taa nabɛyɛ kpadɩyɩ Yehowa sɛtʋ taa, ɛlɛ ɛjaɖɛ kɩfaɖɛ taa lɛ, ɖɩɖaɣnɩɣ pɩsʋʋ evebiya nɛ pɛlaa. (Yɔɔb 33:25) Ye mbʋ, ɖɩtɛ ɖa-taa se ɖɩɩkaŋ ɖa-lɩmaɣza mbʋ pɩlabɩ ɖe-wezuu caɣʋ taa nɛ pɩɖɛɛ yɔ pɩ-yɔɔ. Ɛlɛ, ɖɩka ɖa-lɩmaɣza ɛjaɖɛ kɩfaɖɛ yɔɔ, nɛ ɖɩla mbʋ payɩ ɖɩpɩzɩɣ yɔ lɛɛlɛɛyɔ nɛ pɩsa nɛ ɖɩtalɩ peeɖe!