1-2. Kyebhi kitutena kukayela oitendelesu itusanga mudivulu dya Jisabhu 4:25? Bhana Kifika.

XINGANEKA mu ifika itatu yiyi. Phange yetu yamuhatu wakuka, wamuxinganeka muithangana yambote yabhiti kumwenyu wê, m’ukulu. Sumbala wamudibhana ni ibhidi yavulu kumwenyu we kindala, maji wamubhanga yoso yatena musidivisu ya Jihova. (1 Kol. 15:58) Izuwa yoso mwene udixinganeka kumoxi ni mwiji wê ni makamba mê mu palayizu. Phange yamukwa yamuhatu, ulembalala kwila sayi phange mukilunga wamuzwela ima yamulwalesa kyavulu, maji kadikwatenena mu ima yamubhange. (Kol. 3:13) Phange yadiyala udilembalala oitondalu yambhange m’ukulu, maji udikwatenena mu ima yamubhanga kindala phala kukala fiyele kwa Jihova.—Jisá. 51:10.

² Muifika itatu yiyi ya jiphange, ima yebhi yadifu? Enoso adilembalala oima yabhiti m’ukulu, maji ene kadikwatenena mu ima yoyo. Muveji dya kiki ene “a tale mwene ku pholo.”—Tanga Jisabhu 4:25.

3. Mukonda dyahi twabhingi ‘kutala mwene kupholo?’

³ Mukonda dyahi kima kyambote omuthu ‘kutala mwene kupholo?’ Muthu wamukwenda maji wamutale kudima, katena kwenda kyambote. Kyene kimoxi we musidivisu ya Jihova. Kitutena kusidivila Jihova ni muxima woso se ithangana yoso tuya ni kuxinganeka mu ima yabhiti mba itwabhange m’ukulu.—Luka 9:62.

4. Ihi itwandadilonga mumilongi yiyi?

⁴ Mumilongi yiyi twandilonga mibhetu itatu itena kutubhangesa kudikwatenena mu ima yabhiti m’ukulu. * Yenyi: (1) Ngunzu  ya ima itwabhange m’ukulu, (2) kubhaka phonzo, ni (3) kuditatela kyavulu. Mu ima itatu yiyi, twandamona kyebhi o Bibidya itena kutukwatekesa phala kitudikwatenene ku “ima ya xala ku dima”, maji tudikwatenena “ku ima yala ku pholo.”—Fil. 3:13.

5. Odivilu dya Ndongixi 7:10, ditudimumona mumubhetu webhi?

⁵ Tanga Ndongixi 7:10. Tala kuma ovelusu yiyi kiizwela kwila kima kyayibha kudibhwidisa se: “Mukonda dyahi oizuwa yokulu yawabhele?” Oilembalesu yambote ujitu utunda kwa Jihova. Muveji dyakiki ovelusu, yamba: “Nuka utanga, wixi: ‘Oizuwa ya ukulu, yabetelele’hi okuwabha, oyiyi ndenge?’” Muizwelu yamukwa twabhingi kudilanga phala kitusokelese omwenyu wetu wokulu ni wakindala, phala kituxinganeke kwila omwenyu wokulu wabetelekota owakindala ndenge. Sayi Bibidya yakamukwa ilungulula kiki ovelusu yiyi: “Kanakudibhwidisa, ‘Oh, mukonda dyahi oima m’ukulu yabetelekota olelu ndenge?’ Okibhwidisu kiki kikilondekesa unjimu.”

6. Mukonda dyahi kiunjimu kusuluka ni kuxinganeka kwila omwenyu wetu wabetelekota m’ukulu olelu ndenge? Bhana kifika.

⁶ Mukonda dyahi kiunjimu kusuluka ni kuxinganeka kwila omwenyu m’ukulu wabetelekota olelu ndenget? Ongunzu itena kulembalesa ngo oima yambote yabhiti m’ukulu. Mukonda nange tulembalala ngo oima yambote, oyayibha tuijimba. Tala ophangu ya wakwa Izalayele. Kyoso kyatundu ku Ijitu, mukubhita tuithangana ene ajimbi ohadi yoso yatalele mu Ijitu. Mukonda dyakiki, ene adikwatenena ngo mukudya kwambote kwabhelele. Ene ambe: “Twindaphe jimbiji ji twa kexi kúdya jinga mu Ijitu ja ngoho; ni xibwa, ni jimelá, ni jipolo, ni sabhola, ni jayu.” (Dya. 11:5) Maji okwila mukidi ene exile mudya okudya koko mu ki “ngoho”? Kana. Akwa Izalayele exile mutala hadi mukithangana kyenyokyo; exile muwatalatala kyayibha kala abhika mu Ijitu. (Mak. 1:13, 14; 3:6-9) Nekiki, ene ajimbi ohadi yatale, ya amateka kukala ni ngunzu ya ima yambote yokulu. Ene asolo kudikwatenena mu “ima yambote yokulu” muveji dyakudikwatenena mu ima  yambote yexile mwabhangela Jihova mukithangana kyenyokyo. Jihova kasangulukile ni ima yabhangele ene.—Dya. 11:10.

7. Ihi yakwatekesa phange yetu yamuhatu kulenga omubhetu wangunzu?

⁷ Kyebhi kitutena kulenga omubhetu wangunzu? Tala ophangu ya phange yetu yamuhatu wamateka kusidivila ku Betele ya Brooklyn mumuvu 1945. Mukubhita tumivu mwene wakazala ni phange wexile Betelita, kumoxi asidivila mumivu yavulu ku Betele. Maji mukaxi kamuvu wa 1970, mwadiwe wahaxila. Mwene wambe kuma kyoso omwadiwe kyejidile kwila kufwa kwe kwazukamene, wamubhana itendelesu yambote yejimukwatekesa kudibhana ni utudi. Mwadiwe wambe kumuhatwe: “Twasangulukile mu ukaza wetu. Athu avulu kasangulukile kala etu.” Maji mwene wadimuna muhatwe: “Eye kiwandajimba oima itwabhiti kumoxi—maji kana kudikwatenena muixinganeku yiyi. Kyoso okithangana kyandaya ni kubhita ojindolo je jandaya ni kusosoloka. Kana kuzoza mba kuditatela mukonda dya ima yabhiti kumwenyu. Sanguluka ni ithangana yambote itwabhiti kumoxi mukusidivila Jihova. Oilembalesu yambote ujitu wa Nzambi phala etu.” Okwila eye kuxikina kuma yiyi yexile itendelesu yambote?

8. Mbote yebhi yakatula phangyetu mukukayela oitendelesu yamubhana mwadiwe?

⁸ Ophange yetu yamuhatu wabhake oizwelu yoyo mumuxima wê. Mwene wasidivila Jihova ni ufiyele woso kate kyafu mukitala kya 92 amivu. Tumivu andi dya kufwa kwe, mwene wambe: “Kyoso kingitala kudima mu 63 amivu musidivisu yami kwa Jihova, ngitena kuzwela ni kidi kyoso kwila ngasangulukile kyavulu kumwenyu.” Mukoda dyahi? Mwene wajimbulula: “Okima kyangibhekela okusanguluka kwa kidi, ohenda ya jiphange jetu kumundu woso, ni kidyelelu kyakutunga ni jiphange jamala ni jahatu mu palayizu mu ixi, kusidivila o Mubhangi wetu Wadikota, o Nzambi ya kidi Jihova, kate kuhádya ni hádya.” * Tutena kudilonga  ima yavulu mu phangu ya phange yú, ya kwila tutena kudikwatenena muikanenu ya Jihova!

9. Kala kilondekesa Ijila 19:18, nange muithangana yebhi kikubhonzo kubhaka phonzo?

⁹ Tanga Ijila 19:18. Kikubhonzo kubhaka phonzo, kyoso phange yetu mu nzumbi, kamba dyetu dyakazola mba ndandu yetu watutalatala kyayibha. Mukifika, sayi phange amutatela kunyana kitadi ku phange yamukwa. Kupholo, ophange watatela mukwa wabhingi muloloki, maji ophange amutatela wasuluka ni kudikwatenena mu ima yabhiti. Okwila kiki kyabhiti kya neye? Nemwene se omaka ki ene amoxi, maji okwila eye wabhakele kya phonzo, anga waxinganeka kwila kiweji jimba oima yayibha yakubhange.

10. Ihi itena kutukwatekesa kyoso kitudivwa kwila twamubhaka phonzo?

¹⁰ Ihi itena kutukwatekesa kyoso kitudivwa kwila twamubhaka phonzo? Twatokala kulembalala kwila Jihova umona oima yoso. Mwene wejiya oima yoso itubhita nayu, katé kyoso athu kyatutalatala se kuyuka. (Jihe. 4:13) Kyoso kitwamutala hadi ni mwene vwivwa ondolo yetu. (Iza. 63:9) Mwene wakanena kwila wandazubha oima yoso itubhekela ndolo kumwenyu wetu.—Dij. 21:3, 4.

11. Mbote yahi itukatula kyoso kituloloka akwetu?

¹¹ Twabhingi kudilembalala kwila kyoso kituloloka akwetu tudivwa dingi kyambote. Kiki kyene kyabhange ophange amutatela kwila wanyana. Mukubhita kithangana mwene wabhange ngunzu phala kujimba oima yayibha yamubhange. Ophange yu amutatele wejidile kwila kyoso kituloloka akwetu Jihova utuloloka we. (Mat. 6:14) Mwene wejidile kwila ophange wamutatele wabhangele ima yayibha, maji nekiki, wasolo kumuloloka. Mukonda dya kuloloka ophange yetu wasangulukile dingi, yu walungile oixinganeku yê musidivisu ya Jihova.

12. Ihi itudilonga mumukanda 1 Nzwá 3:19, 20?

¹² Tanga 1 Nzwá 3:19, 20. Etwenyoso sayi ithangana twene muditatela. Mukifika, sayi ya aditatela mukonda dya ima yabhange andi dya kwijiya okidi. Akamukwa aditatela mukonda dya itondalu yâ yate kyoso kyabatizala. Etwenyoso twadivu kya kiki. (Loma 3:23) Se phata etwenyoso twamesena kubhanga okima kyatokala. Maji “etwene oso, twene mu tondajala mu ima yavulu.” (Tiya. 3:2; Loma 7:21-23) Sumbala kitusanguluka kyoso kituditatela, maji kitena kukala kima kyambote. Mukonda dyahi? Mukonda kudivwa kiki kutukwatekesa kubhanga oima yatokala, ni kukala polondo phala kituvutuke dingi kubhanga oitandalu itwate.—Jihe. 12:12, 13.

13. Mukonda dyahi twabhingi kudilanga phala kituditatele kyavulu?

¹³ Kumbandu yamukwa tutena kuditatela kyavulu—kifwa tutena kusuluka ni kuditatela ne mwene se twadyela kyá mba twejiya kwila Jihova watuloloka kyá. Oukexilu yu wakuditatela kyene okima kyayibha. (Jisá. 31:10; 38:3, 4) Mukonda dyahi? Tala okifika kya phange yamuhatu wasuluka ni kuditatela mukonda dya kituxi kyatele m’ukulu. Mwene wambe: “Ngexile mudivwa kwila kingabhingile dingi kubhanga nguzu mu sidivisu ya Jihova, mukonda nange oima ingexile mubhanga musidivisu ya Jihova kyexile ni valolo.” Nange avulu mudyetu adivu kya kiki. Mukiki twatokala kudilanga phala kituditatele kyavulu. Mukonda dyahi? Mukonda Satanaji wejisanguluka se tweha osidivisu ya Jihova ne mwene kyoso Jihova kyatuloloka kyá!—Sokesa 2 Kolindu 2:5-7, 11.

14. Kyebhi kitutena kwijiya ni kidi kyoso kwila Jihova wamesena kutuloloka?

¹⁴ Ne kiki nange tutena kudibhwidisa, ‘Kyebhi kingitena kwijiya kwila Jihova wangiloloka kyá?’ Se eye udibhwidisa kiki, eye wamulondekesa kwila Jihova utena kukuloloka.  Mumivu yavulu kudima, sayi Mulangidi wambe: “Etu [nange] tuvutuka mukubhanga oima itwabhangele kyá m’ukulu. Kiki kikilondekesa kwila kitwandatena kukitolola. . . . Maji kiwabhingi kuthandanganya. Kana kuxinganeka kwila okituxi kiwate Jihova nuka wandakiloloka. Satanaji wamesena kwila tusuluka mukuxinganeka kiki. Se eye udivwa ndolo mba uluwala, kiki kikilondekesa kwila eye umuthu wayibha mba Jihova kandakuloloka, kana. Kala umuthu walenduka, suluka ni kusamba kwa Jihova phala nakuloloke, ni kukukwatekesa kukala ni kitongolwelu kyazele ni kukukwatekesa kweha oima yayibha. Muzukame kala omona kyoso kyala ni maka, ne mwene kyoso kyatondala muveji javulu, mwene ubhinga jinga okikwatekesu kya tat’ê. Otat’ê umukwatekesa. Mukiki se usuluka ni kubhinga okikwatekesu kya Jihova, mwene wandakukwatekesa we. *

15-16. Kyebhi kyadivwa omuthu kyoso mwene kiza mukwijiya kwila Jihova wamuloloka?

¹⁵ Jiselevende javulu asange okutululuka mukwijiya kwila Jihova wene mwaloloka. Mukifika, sayi phange yadiyala wasange kiswinisu mumadivulu metu mumbandu ni dyambu “A Bíblia Muda a Vida das Pessoas.” Mumbandu yiyi, mwene watangeku omusoso wa phange yetu yamuhatu wexile muxinganeka kwila Jihova kamuzolele mukonda dya ima yayibha yabhiti m’ukulu, kyamubhonzele kuxikina. Ne mwene kyoso kyamubatizala, wasuluka hanji ni kudivwa m’ukexilu yu ne mwene mukubhita mivu yavulu. Maji kyoso kyaxinganeka ni muxima woso mu sata yakukula, kimukwatekesa kuxikina kwila Jihova wamuzolo. *

¹⁶ Kyebhi omusoso yu wakwatekesa phange yetu yadiyala? Mwene wasoneka: “Muunzangala wami ngexile ni ukexilu wakutala ufusa. Tuithangana kudima ngavutuka dingi kumona ufusa. Eme ngabhingi kikwatekesu kya tufunga mukilunga, ni kwila ngamukula mu nzumbi ngatolola omaka. Otufunga angikwatekesa kumona kwila Jihova wangizolo ni kwila mwene wamesena kungiloloka. Ne kindala, ngidivwa hanji kwila Jihova katena kungizola. Kutanga omusoso yu wa [phange yamuhatu] wangikwatekesa kyavulu. Kindala ngatendela kwila kyoso kingixinganeka kwila Jihova kandatena kungiloloka,  ngamuxikina kuma osata yamon’ê kiyasoko phala kufuta oituxi yami. Eme ngatandula ombandu yiyi eme ngayibhake phala kuitanga ni kuixinganeka, kyoso kingidivwa kwila Jihova kangiloloka.”

17. Kyebhi Phawulu kyalenge omubhetu wakuditatela kyavulu?

¹⁷ Musoso kala yu utulembalesa yabhiti ni poxolo Phawulu. Andi dya kukituka Kidistá mwene watele ituxi yavulu. Phawulu walembala oima yabhangele, maji kadikwatenena mu ima yenyoyo. (1 Tim. 1:12-15) Mwene wexile mumona osata yakukula kala ujitu phala mwene. (Nga. 2:20) Kyenyiki Phawulu kasuluka ni kuditatela, muveji dya kiki, wadikwatenena mu ima yambote yatenene kubhanga musidivisu ya Jihova.

18. Ihi itwadilongo mumbandu yiyi?

¹⁸ Ihi itwadilongo mukutonginina omibhetu itwazwela mumbandu yiyi? (1) Oilembalesu yambote ujitu utunda kwa Jhova; ne mwene se omwenyu wetu m’ukulu wawabhele, omwenyu utwandakala nawu kuhádya kumundu wobhe, wene wandabeta dingi kota. (2) Ne mwene se akwetu atulwalesa, maji tusola kwaloloka, twandasuluka ni kuxinganeka kuhádya. (3) Okuditatela kyavulu, kutena kutufidisa kusidivila Jihova ni kusanguluka. Mukiki, kala Phawulu, twabhingi kuxikina kuma Jihova watuloloka.

19. Kyebhi kitwejiya kwila kumundu wobhe kitwandalembalala dingi oima yokulu ituluwalesa?

¹⁹ Etu twala ni kidyelelu kya kukala ni mwenyu wakalelaku. Kyoso kitwandatunga kumundu wobhe, kitwandalembalala dingi oima yayibha yokulu itulwalesa. Yalungu ni kithangana kiki o Bibidya yamba: “O ima ya bhiti kyá ki bhu kala dingi ku i banza.” (Iza. 65:17) Xinganeka: Amoxi mudyetu twakukila mukusidivila Jihova, maji kumundu wobhe twandakala tumizangala dingi. (Jobe 33:25) Mukiki, tubhange yoso phala kitudikwatenene dingi mu ima itwabhange m’ukulu. Muveji dyakiki, xinganeka kuhádya, lungila omesu mê kupholo!