1-2. Thwanga ghendera thuthi okw’ihabulha eriri omwa Emisyo 4:25? Iha eky’erileberyako.

THALENGEKANIA okwa bino. Mwali wethu oyukulire akalengekanaya okwa buthuku bwiwe obuwene obwa kera. Nomwakine indi engebe yiwe yikalire lino, akalholha embere erikolera Yehova ebyo angathoka. (1 Kor. 15:58) Obuli kiro akathera akasasani iyo n’abanze biwe ibane haghuma omwa kihugho kihya-kihya. Owundi mwali wethu ak’ibuka ngoku omwikirirya mulikyabu mwamuhithania, aliwe akathwamu erithendi bera erikilengekaniako. (Kol. 3:13) Mughalha wethu an’ibukire ebisobyo ebyo akolha kera aliwe akathwamu erilholha embere iniane muthaleghulha.​—Esy. 51:10.

² Ni kyahi ekyo Abakristayo basathu aba basosenemo? Abosi bak’ibuka ebya kera, aliwe sibali bera eribilengekaniako. Omwakanya k’ekyo, bakasamalira ebikasa embere.​—Soma Emisyo 4:25.

3. Busana naki thukayithagha erisamalira ebikasa embere?

³ Busana naki ni kikulhu erisamalira ebikasa embere? Ngoku omundu oyukaghenda akakebera enyuma akaghenda akatara-tara oko nzira, nethu sithwanga thoka erilholha embere omwa mubiiri wa Yehova thwamabera erisubya ameso w’okwa bya kera.​—Lk. 9:62.

4. Thukendi kania okuki omo mwatsi ono?

⁴ Omo mwatsi ono, thukendi kania okwa bithegho bisathu ebyangaleka ithwabera erilengekania okwa bya kera. * Bya bino: (1) eribera erikandira ebya kera, (2) ekinigha, na (3) eriyowa nabi busana n’ebisobyo bya kera. Omwa buli kighuma, thukendi  lebya ngoku emisingyi ye Biblia yanga thuwathikya erithendi bera erilengekania okwa “myatsi eyabirilhaba,” kandi ngoku thwanga samalira “emyatsi eyiri emuliro.”​—Fil. 3:13.

5. Ni kithegho kyahi ekya thukakungawako omwa Omugambuli 7:10?

⁵ Soma Omugambuli 7:10. Wibuke ngoku omulhondo oyu syali bugha athi ni kibi eribulya wuthi: ‘Ni kyahi ekikaleka ebiro by’erimbere ibyuwana?’ Eryibuka ebyuwene ni kihembo erilhua oku Yehova. Aliwe, omulhondo oyu akabugha athi: ‘Siwubughe wuthi, Ni kyahi ekikaleka ebiro by’erimbere ibyuwana kwilhaba ebiro ebi kwehi?’ Ni bugha ambu, ekithegho kikasa thukalinganisya emibere yethu ya kera n’eya munabwire n’erighunzerera thuthi obuli kindu munabwire kitsandire kutsibu. Eyindi mbindulha ye Biblia yikabugha yithi: “Isiwabulhaya wuthi, ‘Busana naki emyatsi yabya yuwene kutsibu kera?’ Si ky’amenge eribulya ekibulyo ekyo.”

6. Busana naki si ky’amenge eribera erilengekania thuthi engebe yethu yabya yuwene kutsibu kera? Iha eky’erileberyako.

⁶ Busana naki si ky’amenge eribera erilengekania thuthi engebe yethu yabya yuwene kutsibu kera? Eribera erikandira ebya kera kyangana leka ithwibuka ebibuya ebya kera bisa. Kutse kyanganaleka ithw’ibirirwa ebitsibu ebyo thwabya thukabana. Lengekanaya okwa ky’erileberyako ky’Abaisraeli. Babere babirilhua e Misiri, mubalhuaho ibibirirwa engebe eyikalire eyo babyamo. Aliwe, mubalengekania okwa byalya ebyuwene ebyo babya bakalya. Mubabugha bathi: “Thwam’ibuka amahere, agho thwalya buyira omo kihugho kye Misiri; n’amatango, n’ebyobe, n’esyoporo, n’amatungulu, n’ehayi.” (Emig. 11:5) Aliwe kwenene mubanalya ebyalya ebyo bya “buyira”? Eyihi. Abaisraeli ibakabinubira; okwa buthuku obo, babya bakaghalibwa kutsibu ng’abakobe e Misiri. (Eri. 1:13, 14; 3:6-9) Aliwe, mubibirirwa omunubo oyo n’erikandira ebya kera. Mubathwamu erihwerya amalengekania okwa biro ebyuwene ebya kera omwakanya k’erilengekania okwa bibuya ebyo Yehova  abya iniamabiribakolera. Yehova mwathatsemera omubere wabu oyo.​—Emig. 11:10.

7. Ni kyahi ekya wathikaya mwali wethu eriyihighulha okwa kithegho ky’eribera erikandira ebya kera?

⁷ Thwanga yihighulha thuthi okwa kithegho ky’eribera erikandira ebya kera? Lengekanaya okwa ky’erileberyako kya mwali wethu oyuwatsuka erikolera okwa Beteli e Brooklyn omwa 1945. Enyuma w’emyaka mirebe, mwathahibwa n’omunya Beteli, kandi mubakolerako haghuma habw’emyaka mingyi. Aliwe, omwa 1976, mwira wiwe mwalhwalha. Mwali wethu oyo akabugha athi mwira wiwe abere akaminya ku akayaholha, mwamuha erihabulha eryuwene eryanga muwathikirye erighumira obukwakali. Mwira wiwe mwamubwira athi: “Obutheke bwethu bulhue buwene. Ni bake ababuwithe.” Aliwe kandi mwamubwira athi: “Isiwabera erilengekania okwa bya kera​—nomwakine indi wukendibya iwunemubibuka. Obuthuku bukendibya bunemulhaba, obulighe bukendi keha. Isiwahwa amani n’eriyowa nabi busana n’ebyabirikubyako. Sima kundi wabiribana etseme n’emighisa. . . . Eryibuka ni kihembo erilhua oku Nyamuhanga.” Eri ka lyabya ihabulha eryuwene!

8. Mwali wethu mwaghasirwa athi omw’ighendera okw’ihabulha lya mwira wiwe?

⁸ Mwali wethu mwaghendera okwa binywe ebyo. Mwakolera Yehova buthaleghulha erihika aho aholera iniawithe myaka 92. Myaka mirebe athali aholha, mwabugha athi: “Ngabya ingasubya ameso w’enyuma, emyaka eyilhabire oku 63 inganemukolera Yehova omwa mubiiri w’omughulhu wosi, nangana bugha indi nabiribya omwa ngebe eyuwene.” Busana naki? Akabugha athi: “Omo kwenene ekikatsemesaya engebe ly’eribya omwa lhughanda lhw’abalikyethu olhuwene n’amaha w’erisyabya n’abalikyethu okwa kihugho paradiso, erikolera Omuhangiki wethu Mukulhu, Nyamuhanga musa ow’okwenene, Yehova, kera na kera.” * Eki ni ky’erileberyako ekyuwene  kutsibu eky’omundu oyuwasamalira ebikasa embere!

9. Ngoku kiri omwa Abalawi 19:18, kyanga thukalira mughulhu wahi erighanyira oyuwabirithuhithania?

⁹ Soma Abalawi 19:18. Hakanayira ikyathukalira erighanyira oyulyathuhithanaya amabya ini mwikirirya mulikyethu, omunywani, kutse omuhughu. Ng’eky’erileberyako, mwali wethu mwahangirira owundi mwali wethu athi abiriba esyosente siwe. Enyuma waho, mwali wethu oyuwahangirira owundi mwasaba ekighanyiro, aliwe mwali wethu oyuwahangirirawa mwahithana neryo amabera erikilengekaniako. Wune wathayowa wuthya? Nomuthwangabya isithulithwathabya omwa mibere ng’eyo, abangyi omw’ithwe thukanahithana kandi ithwayowa nga sithwangaghanyira.

10. Ni kyahi ekyanga thuwathikya thwamakwa ekinigha?

¹⁰ Ni kyahi ekyanga thuwathikya thwamakwa ekinigha? Thutholere ithw’ibuka ngoku Yehova anasamalire obuli kindu. Analhangire ebyosi ebyo thukalhabamo, imwamune n’obuthe bulingirirania obwa thukabana. (Ebr. 4:13) Akapona thukaghalhwa. (Isa. 63:9) Kandi akalhaghanisaya erisyaghunzaho obulhumi obwa thukabana busana n’obuthe bulingirirania.​—Erib. 21:3, 4.

11. Thukaghasirawa thuthi thwamaghanyira abandi?

¹¹ N’ekindi, thutholere ithw’ibuka ngoku thwamaghanyira abandi, kikathughasira. Ekyo kya mwali wethu oyuwahangirirawa aminya. Endambi muyahika, mwali wethu amaghanyira n’erileka eribika ekinigha. Mwali wethu mwaminya ngoku thwamaghanyira abandi, Yehova akathughanyira. (Mt. 6:14) Abya inianasi ngoku ekyo mwali wethu amukolhako kiwire, aliwe mwathwamu erimughanyira. Ekyalhwiririramu, mwali wethu mwatsema kandi mwathoka erihwerya amalengekania okw’ikolera Yehova.

12. Thuk’ighaki omu 1 Yoane 3:19, 20?

¹² Soma 1 Yoane 3:19, 20. Ithwe bosi thukanayowa nabi busana n’ebyo thwakolha kera. Ng’eky’erileberyako, abandi bakanayowa nabi busana n’ebyo bakolha bathe baminya ekwenene. Abandi bakayowa nabi busana n’ebisobyo ebyo bakolha babiribatizibwa. Eriyowa ng’eryo ni rya buli kiro. (Abar. 3:23) Ni kwenene, thwanzire erikolha ekihikire. Aliwe “ithwe bosi thukathalha omo bingyi.” (Yak. 3:2; Abar. 7:21-23) Nomwakine indi sithuli tsemera eriyowa nabi, lyangana thughasira. Busana naki? Kundi eriyowa nabi lyangana leka ithwakolha esyombinduka kandi ithwathwamu erithendi suba omwa bisobyo byethu.​—Ebr. 12:12, 13.

13. Busana naki thutholere ithwayitheya okw’iyowa nabi kutsibu busana n’ebisobyo ebya kera?

¹³ Okwa lhundi lhuhandi, thwangana yowa nabi kutsibu​—ni bugha ambu, eribera eriyowa nabi nibya ithwabirinayisubamo kandi Yehova iniabirinathughanyira. Eriyowa nabi ng’eryo ni ribi kutsibu. (Esy. 31:10; 38:3, 4) Lithi? Lengekanaya okwa ky’erileberyako kya mwali wethu oyuwabya akayowa nabi busana n’ebibi ebyo akolha kera. Akabugha athi: “Munayowa nga singa tholere kutsibu omwa mubiiri wa Yehova kundi nanganasyaghana erilhamibwa.” Abangyi omw’ithwe bangana yowa nga mwali wethu oyu. Neryo ni kikulhu eriyitheya okwa kithegho eki. Aliwe, thalengekania Sitani ng’angatsema bungahi thwamabikyako​—nibya Yehova iyo isyathathulhuhirirako!​—Thasyalebaya na 2 Abanya Korinto 2:5-7, 11.

14. Thwanga kakasya thuthi ngoku Yehova syali athathulhuhirirako?

¹⁴ Aliwe, thwangana yibulya, ‘Nangaminya indi kwenene Yehova ku syali athanyilhuhirirako?’ Wamabulya ekibulyo ekyo, kikakanganaya ngoku Yehova angana kughanyira. Kera,  e Watchtower muyabugha yithi: “Thwanganabera eribya thukakolha ekisobyo kighumerera mirundi mingyi obundi kundi thwabirilemwa erisingura obutseke obwa thwabya nabu omwa ngebe yethu eya kera. . . . Isiwabikyako. Isiwalengekanaya wuthi wabirikolha ekibi ekithe kyanga ghanyirwa. Sitani kw’anzire iwayowa wuthya. Iwe eriyowa nabi n’eriyiponera kikakanganaya ku wukine kw’amalenguliro. Yikehaye kandi lholha embere erisaba Nyamuhanga y’ekighanyiro, erikuwathikya eribya n’obunyamuthima-thima obuwene, n’erileka ekisobyo ekyo. Muhikire ngoku omwana akanaghenda eyiri thatha wiwe akabana ekitsibu, nomwanga kibana mirundi mingahi, kandi Yehova akendi kuwathikya busana n’olhukeri lhwiwe.” *

15-16. Abandi babiriyowa bathi bakaminya ngoku Yehova syali athabalhuhirirako?

¹⁵ Abangyi b’okwa bandu ba Yehova babirihumulikanibwa busana n’eriminya ngoku Yehova syali athabalhuhirirako. Ng’eky’erileberyako, myaka mirebe kera, mughalha wethu mughuma mwawathikibwa omwa kyalholirweko ekyabya omwa myatsi eyikabera eryasira omwa “E Biblia Yikahindulha Esyongebe.” Omwa kyalholirweko ekyo, mwali wethu mwabugha athi busana n’ebyo akolha kera, mukyamukalira eriligha ngoku Yehova angana mwanza. Abya iniakinayowa nabi nibya ihamabirilhaba myaka mingyi alibatizibirwe. Aliwe, abere akaghanirya kwa ndongolya, mwatsuka erihindulha amalengekania. *

¹⁶ Ekyalholirweko kya mwali wethu mukyahamba kithi oku mughalha wethu oyo? Mughalha wethu akabugha athi: “Ingakine mulere, ikyabirinyikalira erileka erilebya eby’obutswatswa. Lino-lino, munatsukire erithasyabilebya. Munasaba abasyakulhu b’obuwathikya, kandi nabirisingura ekitsibu kyaghe. Abasyakulhu mubanyikakasya ngoku Nyamuhanga anyanzire kandi anzire erinyighanyira. Aliwe, hakanayira, ingayowa mwa wabbule, indi Yehova syanga nyanza. Erisoma ekyalholirweko kya [mwali wethu oyu] mukyangwathikya. Lino ngabiriminya ngoku namalengekania indi Nyamuhanga syanga nyighanyira, ngabya ng’oyuwamabugha athi ekihongwa kya Mughalha  wiwe sikyanga kuningira ebibi byaghe. Nabirisara olhupapura olhuli kw’omwatsi oyu erilhusyalho omwa gazeti nuku ngabye inangana somagho n’erighanirya kugho ingasa mw’amalengekania w’eriyowa nga singatholere.”

17. Paulo mwayihighulha athi okwa kithegho ky’eriyowa nabi busana n’ebyo akolha kera?

¹⁷ Ebyalholirweko ng’ebi bikathwibukaya omukwenda Paulo. Athali abya Mukristayo, mwakolha ebibi bingyi ebikalha-kalire. Paulo mw’ibuka ebyo abya iniabirikolha, aliwe mwathabera eribilengekaniako. (1 Tim. 1:12-15) Mwalhangira endongolya ng’ekihembo kiwe. (Gal. 2:20) Neryo Paulo mwayihighulha okwa kithegho ky’eriyowa nabi busana n’ebyo akolha kera, amahwerya amalengekania wiwe okw’ikolera Yehova.

18. Thwam’ighaki omo mwatsi ono?

¹⁸ Ni byahi ebyo thwamabirigha omw’ilebya ebithegho ebikanibweko omo mwatsi ono? (1) Eryibuka ebyuwene ni kihembo erilhua oku Yehova; aliwe engebe yethu nomuyangabya iyabya yuwene yithi kera, ekihugho kihya-kihya kikendi syuwana kutsibu. (2) Abandi bangana thuhithania, aliwe thwamathwamu eribaghanyira, thukathoka erilholha embere. (3) Eribera eriyowa nabi busana n’ebyo thwakolha kera byangana thulemesya erikolera Yehova ithunatsemire. Neryo nga Paulo, thutholere ithwaligha ngoku Yehova abirithughanyira.

19. Thukaminya thuthi ngoku omwa kihugho kihya-kihya sithwendi syasyibuka ebikendi syaleka ithwabya thukayowa nabi?

¹⁹ Thuwithe amaha w’erisyabyaho kera na kera. Kandi omwa kihugho kihya-kihya kya Nyamuhanga, sithwendi syasibuka ebya kera ebikendi syaleka ithwabya thukayowa nabi. E Biblia yikabya yikakania okwa buthuku obo, yikabugha yithi: “Emyatsi y’erimbere siyendi syasyibukwa.” (Isa. 65:17) Thakilengekaniako: Abandi omw’ithwe bamabirikekelhuhira omwa mubiiri wa Yehova, aliwe omwa kihugho kihya-kihya, thukendi syasuba balere. (Yobu 33:25) Kwesi, ka thuthwemu erithendi bera erilengekania okwa bya kera. Aliwe, thusamalire ebikasa embere n’eribihirako obulengekania bwethu!