1-2. Aweyi tulenda sadila e longi dina muna Ngana 4:25? Yika e nona.

YINDULA e nona tatu ilende. E nona kiantete kia mpangi ankento una vo nunu osungamene e zingu kiambote kakala kiau. Kana una vo mambu mampasi kewanananga mau owau, ovanganga mawonso kalenda muna salu kia Yave. (1 Kor. 15:58) Lumbu yawonso okukiyindulanga muna nz’ampa kumosi ye yitu ye akundi andi. E nona kiazole kia mpangi ankento osungamene diambu diambi kavangilu kwa nkwandi muna nkutakani, kansi obakidi e nzengo za lembi kunlundila makasi. (Kol. 3:13) E nona kiatatu kia mpangi ayakala osungamene e sumu kavola, kansi owau osianga e ngolo za sikila ye kwikizi muna Yave.—Nku. 51:10.

² Nkia diambu diafwanana tulenda solola muna nona tatu yayi? E mpangi tatu zazi besungamenanga mana mababwila muna mvu miavioka, kansi ke bekwamananga yindula mambu mama ko. Edi bevanganga i kwamanana “tala kaka kuna ntwala.”—Tanga Ngana 4:25.

3. Ekuma dinina diamfunu mu ‘talanga kaka kuna ntwala’?

³ Ekuma dinina diamfunu mu ‘talanga kaka kuna ntwala’? O muntu ona otalanga kaka kuna nima kalendi sia sungididi ko muna nzila kekwendanga. Diau dimosi mpe, ke tulendi sadila Yave ko una ufwene avo tukwamanene yindula kaka mana matubwila muna mvu miavioka.—Luka 9:62.

4. Adieyi tuvovela mu longi diadi?

⁴ Mu longi diadi, tuvovela vonza tatu tufwete venga. Vonza kia (1) fu kia yindulanga kaka oma mavioka, (2) lundila muntu o makasi ye (3) kuyitumba kwayingi. Muna konso vonza, tuvovela una e nkanikinu mia Bibila milenda kutusadisila mu lembi sia e sungididi muna “mana mena kuna nima,” kansi nanukina “mana mena kuna ntwala.”—Fili. 3:13.

5. Nkia vonza kiasonama muna Kimpovi 7:10, tufwete venga?

⁵ Tanga Kimpovi 7:10. Omu sono kiaki ke tutanganga ko vo diambi mu yuvula: “Ekuma e lumbu yavioka inina yambote?” Dialudi vo, o sungamena e mambu mambote twawanana mau i lukau katuvana o Yave. Kansi, muna sono kiaki tutanganga vo: “Kuvovi ko vo: ‘Ekuma e lumbu yavioka isundidi eyayi?’” Muna mvovo miankaka, tufwete venga e vonza kia tezanesa e zingu twakala kiau muna mvu miavioka ye zingu tuna kiau owau yo yindula vo owau e zingu kieto kisakidi e mpasi. E nsekola yankaka ya Bibila yasekola e sono kiaki mu mpil’eyi: “Kuyuvuidi ko vo: ‘Ah, ekuma e mambu masundila o wete muna lumbu yavioka?’ Kadi ekiaki kiuvu kia uzowa.”

6. Ekuma ke dinina diangangu ko mu yindula vo e zingu twakala kiau kisundidi eki tuna kiau owau? Yika e nona.

⁶ Ekuma ke dinina diangangu ko mu yindula vo e zingu twakala kiau muna mvu miavioka kisundidi eki tuna kiau owau? Kadi ediadi dilenda kutufila mu sungamena kaka mambu mambote twawanana mau yo vilakana oma mambi. Yindula e nona kia Aneyisaele. Vava bavaika kuna Engipito, vana vau bavilakana e zingu kiampasi bakala kiau. Bayantika yindula kaka o madia mambote badianga kuna Engipito. Bavova vo: “Ekwe tima dia mbizi za maza zina twadianga e ngovo muna Engipito ye tobe, nsudia za nzenzo, ndembe, niaza ye ayi!” (Nta. 11:5) Kansi, nga dialudi kikilu vo ‘mu ngovo’ badilanga e madia mama? Ve. Aneyisaele mu mpasi kikilu balendelanga mo. Kadi muna kolo kiakina, babangikwanga se abundu kuna Engipito. (Luv. 1:13, 14; 3:6-9) Kieleka, kuna kwalanda bavilakana e mpasi zazi bamweswanga yo yantika lakukila e zingu bakala kiau. Basola yindula kaka e mambu mamonekenanga vo mambote kuna kwa yau vana fulu kia yindula e mambu mambote mana Yave kabavangila. Muna kuma kiaki, Yave wakendalala kwayingi wau basonga e fu kiaki.—Nta. 11:10.

7. Nki kiasadisa mpangi mosi ankento mu venga e vonza kia yindulanga kaka e zingu kakala kiau?

⁷ Nki kilenda kutusadisa mu venga e vonza kia yindulanga kaka una wakala e zingu kieto? Tala e nona kia mpangi mosi ankento ona wayantika sadila kuna Betele dia Brooklyn  muna mvu wa 1945. Kuna kwalanda, wakazala yo mpangi wasadilanga mpe kuna Betele. Basadila Yave entwadi kuna Betele mu mvu miayingi. Kansi, muna mvu wa 1976, o nkaz’andi wabakama kimbevo. Mpangi ankento wavova vo o nkaz’andi vitila kafwa wamvana malongi mamfunu mana mansadisa mu zizidila o lufwa lwandi. Wamvovesa vo: “Longo lwakiese twakedi lwau. Wantu ayingi ke bena ye longo lwakiese ko.” Kansi, wamvana mpe luludiku olu: “Dialudi vo kuvilakana ko mambu mambote twavanga entwadi, kansi venga e fu kia yindulanga kaka mambu mama. Ekolo e ntangwa ivioka, malembe-malembe e ntantu zaku zikuluka. Kuyoyi ko ngatu kendalala kwasaka mu kuma kia dina dibwididi. Yangalala mu kuma kia mambu mambote twavangidi muna salu kia Yave. . . . O sungamena e mambu mama i lukau katuvana o Nzambi.” Kieleka, ediadi longi diamfunu kikilu, ke wau ko?

8. Nkia nluta kavua mpangi eto ankento muna lemvokela luludiku lwa nkaz’andi?

⁸ Mpangi eto ankento walemvokela luludiku lwa nkaz’andi. Wasadila Yave ye kwikizi kiawonso yavana kafwa ye kimbuta kia mvu 92. Ke vavioka mvu miayingi ko vitila kafwa, wavova vo: “Vava iyindulanga vioka mvu 63 isadilanga Yave muna salu kia ntangwa ke ntangwa, ndenda vova vo zingu kiakiese kikilu ngina kiau.” Ekuma kavovela dio? Wasasila vo: “O mambu mekututwasilanga e kiese i kintwadi kia wan’a ngudi ye vuvu kia zinga muna paradiso ova ntoto kumosi ye mpangi zeto wau tukwamanana sadila Yave wa Mvangi eto Anene yakwele mvu, una vo Nzambi mosi kaka aludi.” * Kieleka, tulenda longoka mayingi muna nona kia mpangi ndioyo ankento ona watalanga kaka kuna ntwala.

9. Nze una uyikwanga muna Levitiku 19:18, nkia ntangwa dikalanga diampasi mu loloka o muntu utuvangidi e mbi?

⁹ Tanga Levitiku 19:18. Ezak’e ntangwa diampasi dikalanga muna loloka mpangi muna nkutakani, nkundi yovo yitu kieto  ona utuvangidi e mbi. Muna bonga e nona, mpangi mosi ankento wavuninua o mambu kwa mpangi ankaka muna nkutakani vo nzimbu zandi kayiya. Kuna kwalanda, o mpangi ona wavunina nkwandi o mambu wamvovesa vo e nsangu kawá mu kuma kiandi zaluvunu kwandi. Nga wabwilwa kala e diambu dia mpila yayi? Kana nkutu vo ke twabwilwa diambu dia mpila yayi ko, ayingi mu yeto tulenda mona vo ke tulendi nkutu loloka ko o muntu ona utuvangidi e mbi.

10. Nki kilenda kutusadisa avo muntu tulundidi o makasi?

¹⁰ Nki kilenda kutusadisa avo muntu tulundidi o makasi? Tufwete sungamenanga vo Yave omonanga mawonso mevangamanga. Ozeye mawonso tunuananga mau kana nkutu vava akaka bekutuvanganga oma malembi songa. (Ayib. 4:13) Okendalalanga vava tumonanga e mpasi. (Yes. 63:9) Muna kuma kiaki, Yave osianga o nsilu vo okutuvevola muna mpasi zawonso tumweswanga kwa akaka.—Lus. 21:3, 4.

11. Nkia nluta tuvua avo tuyambwidi lundila akaka o makasi?

¹¹ Tufwete mpe sungamenanga vo vava tulolokanga o muntu utuvangidi e mbi, yeto kibeni nluta tuvua. O mpangi ankento ona wavuninua e mambu, i diau mpe kabakula. Kuna kwalanda, waloloka mpangi ankento ona wamvunina e mambu yo lembi kunlundila diaka o makasi. Wabakula vo vava tulolokanga akaka, o Yave mpe okutulolokanga. (Mat. 6:14) Wazaya wo vo dina mpangi ankaka ankento kamvanga diambi kikilu, kansi wasola kunloloka. Ediadi nkia nluta diantwasila? Mpangi eto wavutukila e kiese kiandi yo sia e sungididi muna salu kia Yave.

12. Adieyi tulongokele muna sono kia 1 Yoane 3:19, 20?

¹² Tanga 1 Yoane 3:19, 20. Ezak’e ntangwa, yeto awonso tumba tukuyitumbanga. Kasikil’owu, akaka balenda kuyitumba mu kuma kia mambu bavanga vitila bazaya e ludi. Vo i akaka balenda kuyitumba mu kuma kia vilwa bavanga kuna nim’a luvubu lwau. (Roma 3:23) Dialudi vo, tuzolele vanga oma mambote. Kansi, “nkumbu miayingi tutanga e sakuba.” (Yak. 3:2; Roma 7:21-23) Kana una vo ke tuyangalelanga kuyitumba ko, kansi tulenda vua nluta muna vanga wo. Mu nkia mpila? O kuyitumba kulenda kutusadisa mu soba e mpila zingu kieto yo kala ye kani dialembi vutukila e mbi twavanga.—Ayib. 12:12, 13.

13. Ekuma tufwete vengela e vonza kia kwamanana kuyitumba?

¹³ Kuna diak’e sambu, tulenda kwamanana kuyitumba kana nkutu vo twaviluka kala o ntima muna mbi twavanga yo lolokwa kwa Yave. O vanga wo diavonza kikilu. (Nku. 31:10; 38:3, 4) Ekuma? Badika e nona kia mpangi mosi ankento ona wakwamanana kuyitumba mu kuma kia sumu kavola. Wavova vo: “Kiazola diaka kuyivana muna salu kia Yave ko kadi yamonanga vo kivuluka kwame ko.” Ndonga muna yeto tulenda kala ye ngindu zazi. Muna kuma kiaki, tufwete venga e vonza kia kuyitumbanga kwayingi. Ekuma? E kuma kadi Satana oyangalala avo tuyambwidi sadila Yave kana una vo watuloloka kala.—Tezanesa ye 2 Korinto 2:5-7, 11.

14. Aweyi olenda kadila ye ziku vo Yave kabembwele ko?

¹⁴ Nanga olenda kukiyuvula: ‘Aweyi ndenda kadila ye ziku vo Yave kambembwele ko?’ Avo uyivangidi e kiuvu kiaki, disongele vo Yave olenda kuloloka. Se vioka mvu miayingi, Eyingidilu diavova vo: “Avo okwamanene vanga vilwa wau umosi nkumbu miayingi yo mona vo kulenda sunda diambu diadi ko. . . . Kuyoyi ko ngatu yindula vo Yave kesinga loloka sumu diaku ko. Satana ozolele vo wakala ye ngindu zazi. O kendalala mu kuma kia vilwa  wavanga i ziku kisonganga vo ku muntu ambi ko, o Yave mpe olenda kuloloka. Muna kuma kiaki, songa lulembamu yo kwamanana samba kwa Nzambi kimana kaloloka yo kusadisa walembi vutukila vilwa wavanga. Finama Yave nze una mwana kefinamenanga se diandi vava kekalanga mu mpasi. Kana nkutu vo nkumbu miayingi tuvutukidi o vanga vilwa wau umosi, Yave muna nkenda zandi okutusadisa.” *

15-16. Aweyi akaka bemonanga vava bebakulanga vo Yave kababembola ko?

¹⁵ Ayingi muna selo ya Yave befiaulwiswanga muna zaya vo Yave kababembola ko. Muna bong’e nona, muna mvu miavioka, mpangi mosi ayakala wakasakeswa vava katanga lusansu lwavaikiswa muna malongi: “Nkand’a Nzambi Zingu kia Wantu Usobanga.” Mpangi ankento oyikwanga muna lusansu lwalu wavova vo, mu kuma kia mambu mambi kavanga, kakwikilanga ko vo Yave zola kekunzolanga. Wakwamanana ye ngindu zazi kana nkutu vava vavioka mvu miayingi kuna nim’a luvubu lwandi. Kansi, vava kayindula o mfunu wa lukûlu, wayantika kwikila vo Yave zola kekunzolanga. *

¹⁶ Aweyi lusansu lwa mpangi ankento ndioyo lwasadisila mpangi eto ayakala? Wasoneka vo: “Vava yakala toko, fu kia tala mavangu ma zumba yakala kiau. Diampasi diakala mu yambula e fu kiaki. Ke kolo ko, yavutukidi diaka e fu kiaki. Yalombele lusadisu lwa akuluntu, isianga e ngolo kimana yasunda e fu kiaki. Akuluntu bansadisa mu kwikila vo Yave zola kekunzolanga ye ozolele kundoloka. Kana una vo i wau, ezak’e ntangwa ikuyimwenanga vo kina mfunu ko, o Yave mpe kalendi kundoloka ko. O tanga lusansu lwa mpangi ndioyo ankento lwansadisa kikilu. Owau nzeye wo vo vava iyindulanga vo Nzambi kalendi kundoloka ko, edi ivovanga vo e kimenga kia lukûlu kia Mwan’andi ke kiafwana ko muna loloka e masumu mame. Muna kuma kiaki, yazengele o lusansu lwalu kimana yatanganga yo badika lo konso ntangwa imona vo kina kwame mfunu ko.”

17. Adieyi Paulu wa ntumwa kavanga muna venga e vonza kia kuyitumba kwayingi?

 ¹⁷ E nona nze yayi, ikutusungamesanga Paulu wa ntumwa. Vitila kakituka Nkristu, mambu mayingi mambi kavanga. Dialudi vo, Paulu wasungamenanga mambu mambi kavanga, kansi kakwamanana yindula mambu mama ko. (1 Tim. 1:12-15) Wakwikilanga vo ololokwa mu kuma kia lukûlu. Wakwikilanga mpe vo lukûlu i lukau Nzambi kavana mu kuma kiandi. (Ngal. 2:20) Muna kuma kiaki, Paulu kakwamanana kuyitumba ko, kansi wasianga e ngolo muna kuyivana emvimba muna salu kia Yave.

18. Adieyi tulongokele mu longi diadi?

¹⁸ Adieyi tulongokele wau tufimpidi e mambu tufwete venga? (1) O sungamena o mambu mambote i lukau lwatuka kwa Yave. Nanga e zingu kieto kiambote kiakala muna mvu miavioka, kansi e zingu tukala kiau muna nz’ampa kisunda o wete. (2) Akaka balenda kutukendeleka, kansi avo tubalolokele, tusia e sungididi kieto muna salu kia Yave. (3) O kuyitumba kwayingi kulenda kutukakidila mu sadila Yave ye kiese. Muna kuma kiaki, nze Paulu, tufwete kwikila vo Yave okutulolokanga.

19. Aweyi tuzayidi wo vo muna nz’ampa ke tusungamena diaka ko e mambu mekutukendelekanga?

¹⁹ Tuna ye vuvu kia zinga yakwele mvu muna paradiso. Vava tuzingila mo, ke tusungamena diaka ko e mambu mawonso mekutukendelekanga. Bibila kivovanga mu kuma kia kolo kiaki vo: “Mambu mantete ke mesungamenua diaka ko.” (Yes. 65:17) Yindula edi: Ekolo tusadilanga Yave, akaka muna yeto se tu anunu, kansi muna nz’ampa tuvutukila e nitu ya kileke. (Yobi 33:25) Muna kuma kiaki, yambula twakala ye kani dialembi yindulanga kaka e zingu twakala kiau muna mvu miavioka. Vana fulu kia vanga wo, yambula yeto awonso twasia e sungididi kieto muna nz’ampa yo tala kaka kuna ntwala.