1-2. N’nga nina-arele a-vi malangi-o ali va lemba la Sanganikho 4:25? Velelani ifwanafwani-o.

KATHUULELANI va vyoireya vi. Rongola waimbwi unokalela thuulela vyongo vyanduli. Masiki ira ingumi yee yali yorucha vinjinji, liye unana dhowanave mlabela Yohova munoodela liye. (1 Akor. 15:58) Malambo othene liye unana thuulela akalanga muilambo ipya na axamwalee owadhiveliwana. Rongola unango unana thuulela mutu unango amsukwali-idhe mbwenye liye unana dhilimbi-edha ira a-alokote vyako-ini. (Akol. 3:13) Bali unango una thuulela vyodawa vyairile liye ndulimu, mbwenye liye unanave dhowana kala orormeleya romela e-ni dhowa sogolo.—Salimo 51:10.

² N’nga abali othene enala tanofwanafwana a-vi? Othene enala anothuulela vivirile, mbwenye katinokala ndulimu. Malo moira e-no aliwa “tanoing’anechecha vasogolo.”—Muleri Sanganikho 4:25.

3. Mwasiwa ngwan’ni i-yo ninofwanela “ing’ana sogolo?”

³ Mwasiwa ngwan’ni “ing’ana sogolo” kofuneya? Neri-a mutu kanaode wenda molinyali akala ira hora dhothene unoing’ana nduli. Movwelana na evi, i-yo kaninaode laba pama basa la Yohova akala hora dhothene ninakalela ing’ananga nduli.—Luka 9:62.

4. N’nga ninofuna nione n’ni mu yofunjedha yei?

⁴ Yofunjedha yei, ninafuna nitapanyemo migo-i yokwakwana miraru inaniiri-e thuulela vyanduli. * Vyongo viwa pivi: (1)  thuulela vyongo vyanduli, (2) lokotedha mutu vyako-ini, thitho (3) vionanga kala odawa vinjinji. Va yongo ili yothene ninofuna nione makundo a Bibilya munananikami-edhe aliwa  i-yo diwala vyanduli no vilimbi-edha laba vyongo vyasogolo.—Afil. 3:13.

5. Ngugo-i uuvi unaongiwa va lemba la Namalaleya 7:10?

⁵ Muleri Namalaleya 7:10. Muone ira versuli kalinoonga ira fuka kodaweya ira: “Mwasiwa ngwan’ni wale vyongo vyali pama?” Imbarimbari, thulela vyongo vyapama vyanduli chotuva yokumela wa Yohova. Lembali linoonga e-ni: “Kuongenga ira: ‘Mwasiwa ngwan’ni wale vyongo vyali pama i-yani-ana malambo ano?’” Va madhu enango go-i kulandani-ana vyongo vyawale na vyongo vyachineneeva onanga ira vitosimbwa Bibilya linango va versu leli tathapulele ira: “Kamudha fuke ira: ‘Mwasiwa ngwan’ni vyongo vyothene wale vyali pama?’ Mwasiwa kai zelu fukanga e-no.”

6. Mwasiwa ngwan’ni kai pama thuulelanga ira ingumi-u yali pama ndulimu? Velelani ifwanafwani-o.

⁶ Mwasiwa ngwan’ni kai zelu thuulelanga ira igumiyi-u walelene yali pama? Mwasiwa ninooda gwela go-i weena thuulelanga vyongo vyapama diwala nyarwa dhagumanana i-yo. Kathuulelani ifwanafwani-o ya ana Israeli ndulimu. Tangakumile ilambo ya Iguputu hora imbo-ive katondiwala ira ingumi yali yorucha vinjinji waliwa. Aliwa tathuulela vyodya vyapamave vyana aliwa. Aliwa taonga ira: “Ninathuulela somba dho-oonela nyarwa dhadyecha i-yo wu Iguputo, ukaka, mi-awa, mabubuda, masebola o-iyana-iyana na maaliyo!” (Num. 11:5) N’nga nafuna nionge ira vyodya vyana aliwa “ vyali vyo-oonela nyarwa?” E-i. Aliwa tapagali modula vinjinji vahora yen’ne, aliwa kanosamaliliwa mwauwalanga vinjinji no kala adhaari ilambo ya Iguputu. (Ekis. 1:13, 14; 3:6-9) Vanduli viwa aliwa tatodiwala nyarwa dhagumanana aliwa noroma thuulela vyongo vyanduli. Aisraeli tatosakula thuulela vyongo vyapama vyanduli malo mothuulela vyongo vyapama vyevyo Yohova vyairela liye. Yohova atosukwala na vyoira viwa.— Num. 11:10.

7. N’nga yamkami-idhe rongolula chini ira a-agwele go-ini vothuulela vyongo vyawale?

⁷ N’nga inafuna nikami-a chin’ni ira na-a  ngwele ngo-ini othuulelanga vyongo vyanduli? Onani ifwanafwani-o ya rongola m’mbo-i aromile laba Beteli ya Brooklyni yawa ya 1945. Vangavirile vyawa liye atotheliwa na betelita, ambilene tatolaba vyawa vinjinji. Yawa ya 1976, man’nee atoroma bulela. Rongolula atoonga ira man’nee a-anakwe, atomva-a malangi-o adhakala makwela. Liye aongile ira: “Iyo natokaana banja laimwerumweru atu anjinji kativiidhi evyo” mbwenye liye atolim’mbi-a onga ira: “Kuthuulelenga vyanduli mbwenye vyothuuchana vikalevove. Hora ngurombwe ofuneeleya. Kukale mutu okumbanya venango vivwela tangaranga. Ukale osimba vokaana imwerumweru yen’na na maraeli-o. . . . Vyothuulela pyotuva vyokumela wa Nlungu wa-iyo.” Mbamalangi-o apama, munoona a-vi?

8. Mwasiwa ngwan’ni ali pama rongolula a-rela malangi-o o-othuulela nduli?

⁸ Rongolula atovwela malangi-o aman’nee noa-arela. Liye atolaba mororomeleya wa Yohova fiedha ukwa angana vyawa 92. Vanga-adhi vyawa vyoyeva a-anakwe atoonga ira: “Vothuulela vyawa 63 vilabile miyo mubasa lavakundu la Yohova, ndinooda onga ira vaingumi yanga nditokala waimwerumweru vinjinji.” Mwasiwa ngwan’ni? Liye atoonga ira: “Yodhiveliwi-a vinjinji vaingumi ya mutu kakaana ubali wa pama wandhana mwapama thitho idedi-edho yodhakaana abali na arongola vailambo yavathi, mlabela namapanduchi-u Nlungu waimbarimbari Yohova dhowa nodhowa.” * Mo-okaikela rongolula njiifwanafwani-o yapama wa mutu unoing’anechecha vasogolo!

9. Movwelana na lemba la Levitiko 19:18, n’nga a-lokotedha mutu vyako-ini unorucha vahora yan’ni?

⁹ Muleri lemba la Levitiko 19:18. Vinokala vyorucha a-lokothedha mutu vyako-ini akala bali wairoromelo unisukwali-a venango fwi-u wavarimani venango abali-u taniirela  vyongo vyauwalanga. Mofwanafwani-a, rongola m’mbo-i atokuzeya rima tangamnukedhe ira utoba kobiri. Vanduli viwa rongola amnukedhuwo atopepesa vinjinji mokumela vathi varima. Mbwenye rongola anukedhuwiluo kaaodile diwala vyaireile vyo. Nyo vitoroma uireelani? Masiki angalive ira kavinarome uireelani, vinooneya ira kaninaode diwala lokotedha mutu vyako-ini.

10. N’nga inofuna nikami-a chini akala i-yo ninomlokotedha mutu vyako-ini?

¹⁰ N’nga inanikami-e chini namlokotedha mutu vyako-ini? Muthuulele ira Yohova unoona vyothene. Liye unoidhiwa vyothene vinogumanana i-yo gumani-avo a-longomana na nyarwa dhinogumanana i-yo. (Aeb. 4:13) Liye unokala osukwala anioanga i-yo nionanga nyarwa. (Esaya 63:9) Liye ulanyedha ira unodha mali-a vyongo vilivyothene gumani-avo upa onukedhiwa unoireya wa-iyo.— Apok. 21:3, 4.

11. Mwasiwa ngwan’ni alokotedha mutu vyako-ini ndi upama wa-iyo?

¹¹ Thuulelani ira levelela ndiupama wa-iyo. Puemo rongola anukedhiwilula mwavwele liye. Liye atooda i-yachi vyolokota vyako-ini vile atozindiela ira nalevelelanga atu enango Yohova thitho unodha nilevelela. (Mat. 6:14) Liye atoidhiwa ira rongolula utodawi-a masiki angalive ee-no atosakula alokota vyako-ini. Vyo-arelavo vyee rongoli-ula atokala waimwerumweru vinjinji liye mathuulelwee ato-ela vomlabela Yohova.

12. N’nga ninofunjedhavon’ni valemba 1 Juwau 3:19, 20?

¹² Muleri 1 Juwau 3:19, 20. I-yo othene ninoviomba landu fendo dhinjinji. Mofwanafwani-a enango anoviomba landu va vyongo viirile aliwa ta-anafunjedhe imbarimbari. Enango anoviomba landu va vyodawa vyadawile aliwa tangamadhi badiziwa. (Aroma 3:23) Pyovweya ira ninofuna ira vyongo vyapama mbwenye i-yo othene “ninogwegweduwa fendo dhinjinji.” (Tiy. 3:2; Aroma 7:21-23) Masiki ira viomba landu kai wapama mbwenye kaana mathuulelo enala anooda kala apama wa-iyo. Namwasa wan’ni? Namwasa oi anooda limbi-a ira machinjo ira na-awelelenga yodawa imbo-ive.— Aeb. 12:12, 13.

13. Mwasiwa ngwan’ni ninofwanela kala osamala va mwasa oviona kala odawa vinjinji?

¹³ Vaikundu inango pyoodeya viombanga landu oviona kala odawa vinjinji. Venango ninodhowanave viomba landu masiki ira nitomala chinyuwa thitho Yohova utomala nilevelela. Viomba landu weu unooda nipei-a. (Salimo 31:10; 38:3, 4) Moi a-vi? Thuulelani rongola wenio ana mathuulelo ovinanga kala odawa vinjinji na mwasa wa vyodawa vyairile liye nduli. Liye atoonga ira: “Ndathuulela ira kandali ofwanelela ira ndivilimbi-edhe laba basa la Yohova, nerii-a ndaona ira ndatodembuwa vinjinji.” Anjinji mwa i-yo ninovivwa ee-ni. Mbwenye ninofwanela kala osamala vinjinji; ovi-a gwela go-ini ovionaga kala odawa vinjinji. Kathuulelani imwerumweru inofuna kaana Satana voniona i-yo niwelelanga nduli, mbwenye mwambarimbari Yohova ulive na-iyo kanidiwalile.—Onani thitho 2 Akoritiyo 2:5-7, 11.

14. N’nga ninakaena isikimizo yoi a-vi ira Yohova kaninyanyanle?

¹⁴ Masiki angalive ee-ni nyo munooda vifuka ira: “N’nga miyo ndinasikimize aa-vi ira Yohova kandinyanyalile?” Mwaimbarimbari vovifuka yofuka yei ninomva-a yowakula rongolula, vyawa vinjinji vivirile Nsanja ya Olonda yatoonga ira: “[Myasa inango] ninoona ira ninogwegweduwa nogwa hora dhinjinji na mwasa wa makalelo othakala akaathi-eile vinjinji ndulimu kwarannya mwemo  munothuulela i-yo. . . . Mbwenye kamutatile rima. Kamuone ira muirile yodawa yo-oleveleliwa. Neri-a Satana unodhiveliwana vinjinji mathuulelo enala. Va hora inovivwa nyo kala ochenyela thitho vivwela tangaranga umboni ngoi kamunadhowe vandendai kamuchenyele welela wa Yohova movievi-a na moona rima wa Nlungu, no funa leveleliwa thitho chini-iwa na pedhelo, mumkwivele wa liye ninga mwemo mwana munodhowela liye wa babee akaana vyorucha mo-obala ira uirile fendo dhingasi yodawa venango yofooka imbo-ive yenio,thitho Yohova unopedhela mwa lemezo neri-a liye ngwalelo nlukulu.” *

15-16. N’nga atu enango tavivwide a-vi tadhavwecheche ira Yohova kaanyanyalile?

¹⁵ Abali anjinji atovivwa pama mwasa ovwechecha ira Yohova kaanyanyanle. Mofwanafwani-a, vyawa vivirile bali atokuzeya na vyoireya vya-eliwile vaikundu yoonga “Bibilya linochinja vingumi vyaatu.” Va muru unango rongola m’mbo-i atorumela ira va mwasa wa vyoireya vyanduli athuulela ira vinokala vyorucha roromela ira Yohova unomdhiveliwana. Masiki angabadiziwile liye atodhoowanave limbanana mathuulelo enala wa vyawa vinjinji. Mbwenye vothuulela yoombolana ya Yesu liye atororomela ira Yohova unomdhiveliwana. *

¹⁶ N’nga vyoireya vyamkami-idhe a-vi bali? Liye atolemba ira: Ndingali zombwe ndafuneela limbanana ilemeelo yoneela vyamandhave. Chineneeva ndatowelela okoka. Ndatodhowa mavepa pedhelo laandimuwa aikristau thitho ndanofwanela vilimbi-edha vinjinji ira ndilimbanena yorucha yei. Aliwa tatondiwandela ira Yohova unondidhiveliwana thitho ngwatangaranga. Mbwenye hora dhinango ndinoviona kala o-ofwanelela ninga Yohova kanondidhiveliwana. Leri istotiya ya rongolula itondipedhele vinjinji vachineneeva ndinothuulela ira ona ira Nlungu kanandilevelela ndisaasawa onga ira khuto wa Yesu utondiyevela wa miyo kunakwakwana mali-a vyodawa vyanga. Muru wen’na ndatou-ela vakundu ira ndiodenga uleri na uthuulela va  fendo dhothene vanoviona miyo kala mutu o-ofwanelela.”

17. N’nga paulo aodile a-vi thathuwa va go-i ovionanga kala odawa vinjinji?

¹⁷ Vyoireya vyevi vinonithuucha vyoireya vya rumiwi Paulo. A-anakale kristau, liye atoira vyodawa vinjinji vilukulu. Paulo anothuulela vyongo vyairile liye mbwenye kaakalela thuulele vyevyo hora dhothene. (1 Timo. 1:12-15) Yoombolana aionecha kala yotuva yokumela wa Nlungu wa liye. (Agal. 2:20) Moira ee-ni Paulo kaagwele go-ini ovionanga kala odawa vinjinji mbwenye liye mathuulelwee a-edhi va vyongo vinaode liye vomlabela Yohova.

18. N’nga yofunjedha yei nifunjedhilen’ni?

¹⁸ N’nga nifunjedhilen’ni vofiya ee-ni? (1) Thuulela vyongo vyapama vyanduli mbamaraeli-o okumela wa Yohova. Masiki ira ingumi-u ndulimu yali pama mbwenye ingumi inofuna i-yo kaana sogolo muilambo ipya njapama vinjnji. (2) Enango tanisukwali-a i-yo nasakula levelela, ninooda dhowanave ing’anechecha sogolo. (3) Vionanga kala odawa vinjinji unooda niimwanani-a mlabela Yohova mwaimwerumweru. Ngumwasiwa ee-ni ninga Paulo ninofwanela roromela ira Yohova utonilevelela.

19. Mwasiwa ngwan’ni muilambo ipya kaninodha thuulelanga vyongo vyosukwali-a vyanduli?

¹⁹ Nitokaana idedi-edho yokalao dhowa nodhowa. Mbwenye muilambo ipya ya Nlungu kaninodha viombanga landu na mwasa othuulela vyongo vyosukwali-a vyanduli. Vyongo vya vahora yenio Bibilya linoonga ira: “Vyongo vyawale kavinodha thuuleliwa venango welela rimani.” (Esaya 65:17) Kathuulelani vi: Enango amlabele Yohova muvyawa vinjinji atomala ulula mbwenye muilambo ipya anodha kala azombwe okoka. (Yobo 33:25) Ngumwasiwa mukale osakula athuulelanga vyongo vyanduli muthuulelenga vyongo vya sogolo noing’anechecha vya sogolo!