1-2. Tunateli kwovwahila ñahi kufumba kwekala haYishimu 4:25? Hanenu chakutalilahu.

TALENU iyi yakutalilahu yisatu. Iwu muhela mukwaKristu wakula dehi nakutoñojoka hachihandilu chindi chakunyima. Hela chakwila yuma yinakumukalila, natwalekihu kumukalakela Yehova hakumina ñovu yindi. (1 Kor. 15:58) Mpinji yejima watoñojokaña wudi hamu nachisaka chindi niamabwambu jindi mwituña dadiha. Muhela mukwawu niyena nakwanuka chamuneñesheliwu kudi mukwawu mukwakwitiya, ilaña nafuukulihu kujimbalaku. (Kol. 3:13) Manakwetu nakwanuka chaluwañesheliyi kunyima, ilaña nashi maana hayuma yinateli kumukwasha kutwalekahu kwikala washinshika kudi Yehova.—Mas. 51:10.

² Yumanyi yinadifwani yidi mudi awa akwaKristu asatu? Wejima wawu asatu anakwanuka yuma yakunyima, ilaña hiyanashi nankashi maana hayuma yakunyimaku. Ilaña ‘anakutala kumbidi hohu.’—Tañenu Yishimu 4:25.

3. Muloñadi chitwatela ‘kutalila kumbidi hohu’?

³ Muloñadi chichalemena ‘kutalila kumbidi hohu’? Muntu neyi nakwenda iku nakutala kunyima nateli kwenda chiwahi wanyi, munjila yoyimu, neyi tutoñojokaña nankashi hayuma yakunyima, chinateli kutukalila kumukalakela Yehova hakumina ñovu jetu.—Luka 9:62.

4. Yumanyi yitukuhanjekahu muchinu chibaaba?

⁴ Muchinu chibaaba, tukuhanjeka hayuma yisatu yinateli kutuleñela kutoñojoka nankashi hayuma yakunyima. (1) kutoñojoka netu chiña yuma yadiña neyi chiyadiña kunyima, (2) kumuhilila muntu, (3) nikusweja kudinka nyiloña. Muniyi yuma yejima yisatu, tukuhanjeka hayishina yamuBayibolu yinateli kutukwasha kuvulamena “yuma yakunyima,” nakufwila hohu “yuma yidi kumbidi.”—Fwi. 3:13.

5. Mukwakutaŋisha 7:10 yahosha nawu chumanyi chitwatela kubula kwila?

⁵ Tañenu Mukwakutaŋisha 7:10. Iyi vasi hiyinakuhosha nawu chatama kwihula netu: “Mafuku akusambila awahililidiku?” Kwanuka yuma yayiwahi hichawaana chatwinkayi Yehova. Ilaña vasi yinahoshi nawu: “Bayi wila neyi, Mafuku akusambila chanabadikuwu mafuku anu chinafumi hankaku?” Munjila yikwawu, bayi twesekejaña chidi chihandilu chetu yinu mpinji nachichadiña kunyima nakutoñojoka netu ichi yuma yinasweji kutamaku. MuBayibolu yikwawu abalumuna iyi vasi nawu: “Bayi mwihuleña nenu, ‘Muloñadi yuma chiyawahilili kunyima?’ Chachiwahi wanyi kwihula ilu lwihu.”

6. Muloñadi chichatamina kutwalekahu kutoñojoka netu yuma yadiña chiwahi kunyima? Shimunenu chakutalilahu.

⁶ Muloñadi chichatamina kutwalekahu kutoñojoka netu yuma yadiña chiwahi kunyima? Kutoñojoka netu chiña yuma yadiña neyi chiyadiña kunyima chinateli kutuleñela kwanukaña hohu hayuma yayiwahi yakunyima. Hela kunateli kutuleñela kudiwula kukala kutwahitileñamu. Talenu cheliliwu aIsarela. Hanyima yakufuma muEjipitu, avulameneni kukala kuyahitileñamu. Ilaña, ashili hohu maana hayakuda yayiwahi yadileñawu. Ahosheli nawu: “Tunaanuki inshi twadiilaña muEjipitu yakadi nindandu nitutanda nimachimpa nimafu nisapoli nikanyenzi.” (Kuch. 11:5) Komana chalala adileña yakuda “yakadi nindandu [hela yakadi nikusulwila]”? Inehi. A Isarela adiña nakukabakana nankashi hayina mpinji, adiña anduñu muEjipitu. (Kwid. 1:13, 14; 3:6-9) Ilaña ajimbeliku makabisha ejima nakutachika kwanuka yuma yakunyima. Afuukwilihu kusha maana hayuma yayiwahi yakunyima chatela ashi maana hayuma yayiwahi yayilililiyi Yehova. Yehova watiyili kutama nayilwilu yawu.—Kuch. 11:10.

7. Chumanyi chamukwashili muhela wumu kutondolwela yitoñojoka yakwila nawu yuma yadiña chiwahi kunyima?

⁷ Tunateli kutondolwela ñahi yitoñojoka yakwila nawu yuma yadiña chiwahi kunyima?  Talenu ichi chakutalilahu chamuhela watachikili kuzatila haBeteli yakuBrooklyn mu 1945. Chimwahitili yaaka, wasumbukili namanakwetu wahaBeteli nawa atwalekelihu kuzatila haBeteli hadi yaaka yayivulu. Ilaña mu 1976, nfumwindi wakatili. Dichi wahosheli nindi, chelili nfumwindi yeluki nindi keña yafwi, wamulejeli yuma yinateli kumukwasha kuumika neyi yena nafwi dehi. Wamulejeli nindi: “Twadiña namuzañalu muwulu wetu. Amavulu hiyekalaña naniwu namuzañaluku.” Ilaña wamukolesheli cheñi nindi: “Bayi wakasha maana hayuma yakunyima hela chakwila wakayanukañaku. Chimwakahita mpinji, chineñi chakamana. Bayi wukasweja kuneña hachuma chakamwekanaku. Wakanukeña chitwadiluñishaña hakumukalakela Yehova. . . . Kwanuka yuma hichawaana chatwinkayi Yehova.” Iwu wadiña hiwukwashu wawuwahi nankashi.

8. Yuma yamulejeliwu muhela kudi nfumwindi yamukwashili ñahi?

⁸ Iwu muhela wazatishili mazu amulejeliwu. Watwalekelihu kumukalakela Yehova nakashinshi sampu nichafwiliyi nayaaka 92. Chikwashalili yaaka yantesha nakufwa wahosheli nindi: “Neyi nanuka yaaka 63 yinamukalakeli Yehova mumudimu wampinji yejima, nateli kuhosha nami chalala nadiña namuzañalu chikupu.” Muloñadi? Wahosheli nindi: “Kwikala muchisaka chimu nawamanakwetu niahela, kuchiñeja kwakushakama nawu muparadisa hamaseki nikutwalekahu kumukalakela Nleñi Wabadika, Nzambi walala wumu hohu, Yehova, diyuma yatuzañaleshaña.” * Tunateli kudizilaku yuma yayivulu kudi iwu muhela washili maana hayikaninu yaYehova.

9. Neyi chinamwekeshiwu haAlevi 19:18, chumanyi chinateli kuletesha chitukalili kwanakena muntu neyi natuvulumuni?

⁹ Tañenu Alevi 19:18. Kakavulu chatukalilaña kwanakena, sweje-e neyi muntu wunatwili chatama himukwetu mukwakwitiya, ibwambu detu indi kwiji hintaña yetu. Chakutalilahu, muhela wumu amutwambilili kudi mukwawu mukwakwitiya nindi namwiyili mali. Nkumininaku, muhela wamutwambilili wadanakeneni, ilaña muhela atwambililiwu watwalekelihu kwanuka chuma chamwekeni. Ninenu mwatiyahu dehi chamuchidiwu? Hela chakwila kanda tumoneñahu dehi kukala kwamuchidiwu, etu amavulu chatukatahu dehi kumuchima chakwila twatoñojokeli netu nakamwanakena wanyi.

10. Chumanyi chinateli kutukwasha neyi tudi nandulu kumuchima?

¹⁰ Chumanyi chinateli kutukwasha neyi tudi nandulu kumuchima? Twatela kwanuka netu Yehova wamonaña yuma yejima. Wamonaña yuma yejima yitwahitañamu, kushilahu tuhu niyuma yatama yatwilañawu antu. (Heb. 4:13) Watiyaña kutama neyi tunakukabakana. (Isa. 63:9) Nawa watukana nindi wakafumishahu yihuñu yitwamonaña muloña wakutwila chatama.—Chim. 21:3, 4.

11. Yumanyi yayiwahi yafumañamu neyi twanakenaña akwetu?

¹¹ Twatela kwiluka cheñi netu neyi twanakena akwetu, tukwikala namuzañalu. Dichuma chenjili nakwilukayi muhela atwambililiwu. Mukuhita kwampinji, wamwanakeneni mukwawu wamutwambilili. Welukili nindi neyi twanakenaña akwetu, Yehova niyena wukutwanakena. (Mat. 6:14) Welukili nindi chuma chelili ona muhela chadiña chatama, ilaña wamwanakeneni. Chafuminimu, muhela wekalili namuzañalu nawa washili maana hakumukalakela Yehova.

12. 1 Yowanu 3:19, 20 yatudizishañadi?

¹² Tañenu 1 Yowanu 3:19, 20. Mpinji yikwawu twadinkaña nyiloña. Chakutalilahu, antu amakwawu adinkaña nyiloña muloña wayuma yeliliwu henohu kanda adizi chalala. Amakwawu niwena adinkaña nyiloña muloña wayiluwa yakoñeliwu hanyima yakupapatishewa. Amavulu dichatiyañawu. (Rom. 3:23) Mwamweni, twafwilaña kwila yuma yayiwahi. Ilaña “wejima wetu twahukanaña kakavulu.” (Yak. 3:2; Rom. 7:21-23) Hela chakwila hitwatiyaña kuwaha kudinka nyiloñaku, chumichi chinateli kutukwasha. Muloñadi? Muloña kudinka nyiloña kunateli kutukwasha kuhimpa yilwilu yetu nawa tukufwilaña kubula kufuntishahu chiluwa chochimu.—Heb. 12:12, 13.

13. Muloñadi chitwatela kulekela kusweja kudinka nyiloña?

¹³ Kwambukaku, chinateli kwikala chaswayi kusweja kudinka nyiloña, dikwila nawu kutwalekahu kudinka nyiloña nihanyima yakubalumuka mumuchima nawa Yehova natwanakeni. Kudinka nyiloña muniyi njila kwatama. (Mas. 31:10; 38:3, 4) Munjilanyi? Talenu chakutalilahu chamuhela wadinkeleña nyiloña hanshidi yakoñeliyi kunyima. Wahosheli nindi: “Natoñojokeleña nami namanishileña hohu mpinji yami nakumukalakela Yehova hekwawu nakapuluka wanyi.” Etu amavulu dichitwatoñojokaña. Twatela kuleka kusweja kudinka nyiloña. Satana nateli kuzañalala neyi tuleka kumukalakela Yehova hela chakwila Yehova watwanakena dehi.—Esekejenu 2 Akorinda 2:5-7, 11.

14. Tunateli kwiluka ñahi netu chalala Yehova natwanakeni?

¹⁴ Hela chochu, tunateli kudihula netu, ‘Nateli kwiluka ñahi nami chalala Yehova nañanakeni?’ Neyi mudihula ilu lwihu, chinakumwekesha nawu Yehova nateli kuyanakena. Yaaka yayivulu yinahitihu, Kaposhi Kakutalila kahosheli naku: “Tunateli kutwalekahu kukoña chiluwa chochimu. Hadaha tunakukañanya kuleka chilwilu chatama chitwadiña  nachu henohu kanda tutachiki kumukalakela Nzambi. . . . Bayi tuzeyaku. Bayi mutoñojoka nenu munakoñi nshidi yinateli kubula kwanakenawu kudi Yehovaku. Dichakeñañayi Satana nindi mutoñojokeña. Neyi mutiya kutama hachiluwa chimunakoñi, chikumwekesha nawu himwatamaku nawa Yehova nateli kuyanakena. Twalekenuhu kwikala adizoza nawa lombenuña kudi Nzambi kulonda yayanakeni, yayikwasha kwikala nachinleji chitooka nawa yayikwashi kubula kufuntishahu chiluwa chochimu. Mwana wanyanya hela nakoñi chiluwa kapampa kakavulu, watwalekañahu kulomba wukwashu kudi tata yindi. Dichi ninenu twalekenuhu kulomba wukwashu kudi Yehova, wukuyikwasha.” *

15-16. Amakwawu atiyaña ñahi neyi eluka nawu Yehova wuchidi wayikeña?

¹⁵ Ambuña aYehova amavulu akundejewaña hakwiluka nawu Yehova hayumbaku. Chakutalilahu, yaaka yinahitihu, manakwetu wumu wakolesheweli nansañu yadiña muyibaaba yahoshaña nawu, “Bayibolu Yahimpaña Yihandilu Yawantu.” Munichi chibaaba, muhela wahosheli nindi muloña wayuma yatama yeliliyi kunyima chamukalilili kukuhwelela nindi Yehova nateli kumukeña cheñi. Iyi yitoñojoka yatwalekelihu kumukabisha hadi yaaka yayivulu nihanyima yakupapatishewa. Ilaña chatachikiliyi kutoñojoka hefutu danyiloña welukili nindi Yehova wamukeña. *

¹⁶ Yuma yahitilimu muhela yamukwashili ñahi manakwetu? Wasonekeli nindi: “Hinadiña kansi, natalileña nyevulu yanzekesi, nawa chankalilili kuleka kuyitala. Katataka nayitala cheñi. Nayilejeli akulumpi nami ankwashi, ichi nashindi dehi iku kukala. Akulumpi ankwashili kwiluka nami Nzambi wankeña nawa nakukeña kuñanakena. Ilaña mpinji yikwawu nadimonaña neyi nidi wamukunkulwayi nawa nami Yehova wankeña wanyi. Chinatañili iyi nsañu yaniwu muhela yankolesheli chikupu. Ichi neluka nami chinahosha nami Nzambi kwila yañanakena nehi dikwila nawu inakutoñojoka nami mulambu  waMwanindi hiwunashikilimu kubuta hanshidi jamiku. Nakopolweli ninichi chibaaba kulonda nitañeñamu nikutoñojokahu neyi nitachika kutoñojoka nami Yehova hankeñaku.”

17. Kapostolu Pawulu walekeli ñahi kusweja kudinka nyiloña?

¹⁷ Yakutalilahu yamuchidiyi yatwanukishaña yuma yahitilimu kapostolu Pawulu. Henohu kanda yekali mukwaKristu, wakoñeli nshidi jamaneni jajivulu. Pawulu wanukileña yuma yakoñeliyi, ilaña haswejeli kutoñojokahuku. (1 Tim. 1:12-15) Wakuhweleleli nindi anateli kumwanakena muloña wefutu danyiloña nawa nindi hichawaana chamwinkeliwu kudi Nzambi. (Ñal. 2:20) Dichi Pawulu walekeli kusweja kudinka nyiloña nawa washili maana hakumukalakela Yehova kwesekeja nahakumina ñovu yindi.

18. Yumanyi yitunahanjekihu muchinu chibaaba?

¹⁸ Yumanyi yitunadizili kuyuma yitunahanjekihu muchinu chibaaba? (1) Kwanuka yuma yayiwahi hichawaana chatwinkayi Yehova, ilaña hela chakwila yuma yadiña chiwahi kunyima, yuma yikasweja kuwaha mwituña dadiha. (2) Antu anateli kutuneñesha, ilaña neyi tuyanakena, tukushaña maana hakumukalakela Yehova. (3) Kusweja kudinka nyiloña kunateli kutukañesha kumukalakela Yehova namuzañalu. Dichi kufwana Pawulu, twatela kukuhwelela netu Yehova natwanakeni.

19. Tuneluki ñahi netu mwituña dadiha hitwakanukaña yuma yatutiyishaña kutamaku?

¹⁹ Tukweti kuchiñeja kwakushakama haya nyaaka. Nawa mwituña daNzambi dadiha, hitwakanukaña yuma yatutiyishaña kutamaku. Bayibolu yahosha kutalisha kuniyi mpinji nawu: “Yuma yakusambila hiyakayanuka nawaku.” (Isa. 65:17) Etu amakwawu tunashinakajili mumudimu waYehova, ilaña mwituña dadiha, twakafunta cheñi kuwukwenzi. (Yoba 33:25) Dichi bayi tuswejeña kutoñojoka hayuma yakunyimaku. Ilaña tusheña hohu maana hayuma yakumbidi nikuzata hakumina ñovu jetu kulonda twakekali mwituña dadiha.