1-2. Edena dala ai Hereva Lada-isidia 4:25 ena sisiba baita badinaia? Haheitalai ta ba gwauraia.

MANI ini haheitalai toi a lalodia. Kristen taihu burukana ta na nega namodia e lalodia loumu. Ena be hari ena mauri na auka, to ena goada heḡereḡerena ai Iehova e hesiai heniamu. (1 Kor. 15:58) Dina ta ta ai, ia na lalonai e piksaiamu, ia bona ena lalokau taudia na mai moaledia ida Paradaiso ai nonoho. Taihu ma ta na kongrigeisin ai ta ena kara dainai e lalohisihisi. To lalona e hadaia basine badu bona dika baine gwautao. (Kol. 3:13) Tadikaka ta na e helalotaomu guna ia na kerere haida e kara, to hari Iehova ihesiai henina karana e laloa badamu.​—Sal. 51:10.

² Ini Kristen taudia tatoiosi be dahaka e kara? Idia tatoiosi na guna ediai e vara ḡaudia e lalodiatao, to unu na se lalodia hanaihanai. Idia na ‘vaira kahana’ mo e raraia.​—Hereva Lada-isidia 4:25 ba duahia.

3. Dahaka dainai ‘vaira kahana’ mo baita raraia na namo?

³ Dahaka dainai ‘vaira kahana’ mo baita raraia na mai anina bada? Sibona murina e itaiamu bena e rakamu tauna na basine raka maoromaoro diba. Iehova ihesiai henina karana danu unu bamona. Bema guna e vara ḡaudia eiava ta kara ḡau namodia baita lalomu, Iehova ena hesiai ḡaukara na basita karaia namonamomu.​—Luka 9:62.

4. Ina atikol ai dahaka baita herevalaimu?

⁴ Ina atikol ai, guna maurina baita laloa momo ena dika toi baita herevalaimu. Unu na: (1) nega namodia ilalodia lou karana,  (2) badu karana, bona (3) lalohisihisi bada karana. Unu kara ta ta ai, baita itaiamu edena dalai Baibul ena hahekau herevadia ese baine duruda, ‘murida ḡaudia baita lalo boio,’ bona ‘vairada ḡaudia baita ḡava.’​—Fili. 3:13.

5. Kohelete 7:10 ese e hadibadamu, dahaka basita kara na namo?

⁵ Kohelete 7:10 ba duahia. Ina siri na se gwaumu, ini baita henanadai toma na kerere, “Dahaka dainai nega gunadia na namo?” Nega namodia ilalodia lou karana na Iehova ena harihari ḡauna. To, siri na e gwaumu: “Basioto ‘Dahaka dainai nega gunadia ese ina nega e hereaia?’” Ina hereva anina na, ita na asita uramu guna maurina bona hari maurina baita haheḡereḡerea, bena baita laloa hari mauri na dika herea. Baibul ta ese ina siri na ini e hahanaia toma: “Basioto, ‘Dahaka dainai guna negadia na namo herea?’ Una henanadai baita heni na dia aonega karana.”

6. Dahaka dainai nega namodia baita lalodia loulou na dia aonega karana? Haheitalai ba gwauraia.

⁶ Dahaka dainai nega namodia baita lalodia loulou na dia aonega karana? Guna maurina ta laloa louloumu neganai, ita na nega namodia mo baita lalodiamu. Eiava ita edai e vara ḡau dikadia mo baita lalotaomu. Mani idaunegai Israel taudia edia haheitalai aita laloa. Aigupto e rakatania murinai, unuseniai e noholaiava mauri aukana na haraga herea e laloa boio. To, aniani namodia e moalelaiva karana hari e laloa bada. Idia na e gwa: “Aigupto ai gwarume ta ani asi davadia ani? Bona kiukamba bona melon bona liki bona onion bona galik na momo herea ani?” (Num. 11:5) To momokani e aniva anianidia be “asi davadia,” a? Lasi. Una negai Israel taudia na Aigupto ai iḡui hesiai ḡaukara e karava, bona hisihisi bada e davari. (Eso. 1:13, 14; 3:6-9) To, idia ese unu nega aukadia na e lalodia boio, bona ḡau namodia mo e lalodia bada. Idia na Iehova ese idia daidiai e kara ḡau namodia se lalodia, to edia nega namodia mo e lalodia. Iehova na edia kara dainai se moale.​—Num. 11:10.

7. Dahaka ese taihu ta e durua nega namodia ilalodia lou karana baine dadaraia?

⁷ Edena dalai nega namodia ilalodia lou karana baita dadaraia diba? Mani taihu ta ena haheitalai aita laloa. Laḡani 1945 ai, Brooklyn Betele ai e ḡaukara  matama. Laḡani haida murinai, Betele ai e ḡaukarava tadikakana ta e adavaia, bona laḡani momo lalodiai Betele ai e ḡaukara hebou. To, laḡani 1976 ai, taihu adavana na e gorerea. Taihu na e gwa, adavana na e diba kahirakahira baine mase neganai, ia ese taihu enai heduru hereva namodia haida e gwaurai. Ia ese taihu e hamaoroa, eto: “Eda headava maurina ta moalelaia. Taunimanima momo ediai una na auka. Ta kara hebou ḡau namodia na basio lalodia boiomu, to basio lalodia loulou. Nega be laomu lalonai, hebogahisi mamina na taina ruana be ore be laomu. Emu ai e vara ḡauna dainai, basio lalomanoka eiava basio lalohisihisi. Iehova ta hesiai henia nega namodia daidiai ba moale.  . . . Unu nega namodia na Dirava ena harihari ḡaudia.” Una na hahegoada herevana namona, ani?

8. Taihu na adavana ena sisiba e badinaia dainai dahaka namo e davari?

⁸ Taihu ese adavana ena sisiba herevadia e badinadia. Mai abidadama goadana ida Iehova e hesiai henia ela bona laḡanina 92 ai e mase. Laḡani haida gunanai, taihu do maurinai, ia na eto: “Laḡani 63 mai kahana lalodiai Iehova na hesiai henia lalonai, baina gwa diba egu mauri na na moalelaia.” Dahaka dainai? Ia na eto: “Iseda mauri baita moalelaia diba, badina nega vairai eda tadikaka bona taihu ida baita noho heboumu, Ihavarada Tauna, Dirava momokanina tamona, Iehova, baita hesiai heniamu ela bona hanaihanai.” * Ina taihu na Iehova ena gwauhamata namodia e lalodia bada, bona ia na haheitalai namona!

9. Levitiko 19:18 hegeregerena, ededia nega ai e habadudamu taudia edia dika baita gwautao na auka?

⁹ Levitiko 19:18 ba duahia. Nega haida kongrigeisin lalonai tadikaka ta o taihu ta, ita turada namona ta, eiava varavarada ta ese e habadudamu neganai, edia dika baita gwautao na auka. Heḡereḡere, taihu ta na ena moni e boio gwauna na ma taihu ta e  heniava, to gabeai taihu na e laloparara ia na e kerere dainai, una taihu e sori henia. To, gwau e henia taihuna na doini e baduva, bona e vara ḡauna na se laloa boio. Nega ta unu o hemami toma, a? Ena be edai na hekwakwanai unu bamona ta se vara, to bema ta ese e habadudamu, reana basita uramu ena dika baita gwautao.

10. Ta badumu neganai dahaka ese baine duruda diba?

¹⁰ Ta badumu neganai dahaka ese baine duruda diba? Namona na baita helalotao Iehova na ḡau iboudiai e itamu. Ita ta davarimu hekwakwanai iboudiai na mai dibana, heḡereḡere taunimanima ese e hahisidamu negadiai danu. (Heb. 4:13) Ita ta hisihisimu neganai ia na e lalohisihisimu. (Isa. 63:9) Bona ia na e gwauhamata hisihisi iboudiai na baine haore vaitani.​—Apok. 21:3, 4.

11. Badu karana baita dadaraiamu neganai dahaka namo baita davarimu?

¹¹ Baita helalotao, badu karana baita dadaraiamu neganai namo baita davarimu. Gwau e henia taihuna ese una na e lalopararalaia. Gabeai, taihu ese ena moni e boio taihuna na se badu henia lou. Ia na e laloparara, ma haida edia dika baita gwautaomu neganai, Iehova ese eda dika danu be gwautaomu. (Mat. 6:14) Ia na mai dibana taihu ese e karaia karana na kerere, to lalona e hadaia basine badu lou. Unu e kara toma dainai, taihu na e moale bona mai lalonai ibounai ida Iehova e hesiai henia.

12. Ioane Ginigunana 3:19, 20 amo dahaka ta dibamu?

¹² Ioane Ginigunana 3:19, 20 ba duahi. Ita iboudai na nega haida ta lalohisihisimu. Heḡereḡere, haida na hereva momokani do asie dibaia neganai, edia kara gunadia e lalomu dainai e lalohisihisimu. Haida be bapatiso murinai e kara kereredia dainai e lalohisihisimu. (Roma 3:23) Oibe, ita na ta uramu kara maorona baita karaia. To “ita iboudai ta hekwakwanai louloumu.” (Iak. 3:2; Roma 7:21-23) Ena be lalohisihisi na dia moale ḡauna, to mai ena namo. Dahaka dainai? Badina una ese ita baine duruda eda mauri baita haidaua, bona ta kara kereredia basita kara lou.​—Heb. 12:12, 13.

13. Dahaka dainai basita lalohisihisi bada na namo?

¹³ Nega haida eda kerere dainai baita lalohisihisi badamu. Ena be ta helalo-kerehai bona ta hahedinaraia Iehova ese eda dika na e gwautao, to eda kerere dainai doini ta lalohisihisimu. Una lalohisihisi karana ese dika baine havaraia diba. (Sal. 31:10; 38:3, 4) Dahaka dainai? Mani taihu ta ena haheitalai aita laloa, ia na ena kerere gunadia dainai doini e lalohisihisimu. Ia na eto: “Iehova ena hesiai ḡaukara baina karaia goadagoada na asi anina, badina reana basina maurimu.” Ita momo danu unu ta hemami tomamu. To, namona na baita henahua toho asita uramu eda kerere daidiai baita lalohisihisi hanaihanai. Dahaka dainai? Badina ita ese Iehova ihesiai henina karana baita hadokoamu neganai, Satana na be moale dikadikamu​—ena be Iehova ese eda dika na vada e gwautao!​—2 Korinto 2:5-7, 11 ba itaia.

14. Ede ta diba tomamu Iehova na e uramu eda dika baine gwautao?

¹⁴ To nega haida baita lalomu, ‘Ede bamona ba dibamu Iehova ese lau na e lalogu badamu?’ Bema unu o henanadai tomamu, namona na ba diba Iehova ese emu dika na be gwautao dibamu. Laḡani momo gunadiai, The Watchtower na e gwa: “Reana kerere tamona ta karaia louloumu. Iehova ta hesiai henia matama neganai, reana guna  ta manadalai karadia na asita hanai eiava asita dadarai. . . . Basita hesiku. Basitato ita na dika badana ta ta karaia dainai Iehova ese eda dika na basine gwautaomu. Satana na e uramu unu baita lalo toma. Kerere ta ta karaiamu neganai, eda hemami na e dikamu bona ta badumu. Una ese e hahedinaraiamu ita na dia taunimanima dikadia, bona Iehova ese eda dika na be gwautaomu. Baita manau bona Dirava baita ḡuriḡuri henia eda dika baine gwautao, lalomamina ḡoevana baita abia, bona baine dururuda una kerere ma basita karaia lou. Maraḡina ta na kerere ta e karaia louloumu, to nega iboudiai tamana e noiamu baine durua. Una heḡereḡerena Iehova baita noia loulou, bona ia ese baine duruda.” *

15-16. Haida na e laloparara Iehova ese idia na doini e lalodia badamu neganai, edia hemami be ede bamona?

¹⁵ Iehova ena taunimanima momo na e moalemu badina mai dibadia Iehova ese idia na e lalodia badamu. Heḡereḡere, laḡani haida gunanai, tadikaka ta ese atikol ladana “The Bible Changes Lives” e duahia neganai, una ese e hagoadaia. Una atikol ai, taihu ta na eto ena mauri ai ḡau dikadia momo e vara dainai, ia na e laloava Iehova ese ia na se lalokau heniamu. Ia na e bapatiso bona laḡani momo lalonai una hemami doini e abiava. To, mauri idavalaina boubouna e laloa dobu neganai, una ese e durua bona e laloparara Iehova ese ia na e lalokau heniamu. *

¹⁶ Edena dala ai una taihu ena ekspiriens ese tadikaka e durua? Ia eto: “Lau maraḡiguai lau na ponografi laulaudia na itava, bona una kara ihadokona na auka. Vanegai una kara ma na hamatamaia lou. Elda taudia edia amo heduru na abi, bona na hekwarahi una hekwakwanai baina hanaia totona. Elda ese e durugu na laloparara Dirava ese lau na e lalokau henigumu bona e uramu baine durugu. To, nega haida na hemamimu egu mauri na asi anina, bona Iehova ese lau na basine lalokau henigumu. Taihu ena ekspiriens ese e durugu bada. Hari na lalopararamu bema na gwaumu Dirava ese egu dika na basine gwautaomu,  una na vaitani na gwaumu ia Natuna ena mauri idavalaina boubouna na dia heḡereḡere egu dika baine gwautao. Una atikol na utua bona nega haida na hemamimu Iehova ese lau na se lalokau henigumu neganai, una atikol na duahiamu bona na laloa dobumu.”

17. Edena dala ai aposetolo Paulo ese lalohisihisi bada karana e dadaraia?

¹⁷ Unu ekspiriens amo aposetolo Paulo enai e vara ḡaudia ta dibamu. Kristen tauna ta ai do sela neganai, ia danu kara dikadia momo e kara. Paulo na e kara karadia e lalodiava, to se lalodia loulouva. (1 Tim. 1:12-15) Ia ese mauri idavalaina boubouna na harihari ḡauna ta bamona e laloa. (Gal. 2:20) Una dainai Paulo na ena kerere daidiai se lalohisihisi bada, to e ḡaukara goada Iehova e hesiai henia.

18. Ina atikol ai dahaka tame diba?

¹⁸ Ina atikol ai tame herevalai ḡaudia toi amo dahaka tame diba? (1) Nega namodia na Iehova ena harihari ḡauna; to ena be guna maurina na namo, to nega vairai eda mauri na be namo hereamu. (2) Ena be haida ese e habadudamu, to bema edia dika baita gwautaomu, Iehova baita hesiai heniamu. (3) Lalohisihisi bada karana dainai, Iehova ihesiai henina karana na basita moalelaiamu. Una dainai, Paulo heḡereḡerena, namona na baita abia dae Iehova ese eda dika na vada e gwautao.

19. Ede bamona ta dibamu tanobada matamatana lalonai laloda e hahisimu ḡaudia na ma basita lalodia loumu?

¹⁹ Ita na mauri hanaihanai helarona baita abiamu. Tanobada matamatana lalonai baita nohomu neganai, laloda e hahisimu ḡaudia na ma basita lalodia loumu. Baibul ese una nega na ini e gwauraia toma: “Ḡau gunadia na basie lalodia tao bona basie lalodia une.” (Isa. 65:17) Mani a laloa: Ita haida na Iehova ta e hesiai henia ela bona ta buruka, to nega tanobada matamatana ai, baita matamata loumu. (Iobu 33:25) Una dainai, namona na laloda baita hadai guna maurina basita laloa momo. To, tanobada matamatana baita laloa, bona hari baita ḡaukara goada unu amo unuseniai baita noho diba!