1-2. Kouma nou kapav swiv konsey ki ena dan Proverb 4:25? Donn enn lexanp.

REFLESI lor sa trwa lexanp-la. Enn ser aze pe mazinn bann bon moman so lavi. Mem si so lavi pli difisil asterla, li kontign fer so maximum pou Zeova. (1 Kor. 15:58) Toulezour, li mazine ki li dan lemond nouvo ansam avek bann dimounn ki li kontan. Enn lot ser rapel ki enn kikenn dan lasanble inn bles li, me li desid pou pa gard rankinn kont sa dimounn-la. (Kol. 3:13) Enn frer rapel bann erer ki li’nn fer dan lepase, me li res konsantre lor seki li kapav fer azordi pou res fidel anver Zeova.​—Ps. 51:10.

² Ki pwin komin ena ant sa trwa lexanp-la? Dan toule trwa lexanp, sa bann Kretien-la rapel zot pase, me zot pa viv dan lepase. Okontrer, zot “get drwat devan” zot ek zot res konsantre lor lavenir.​—Lir Proverb 4:25. *

3. Kifer eski li inportan ki nou “get drwat devan” nou ek ki nou res konsantre lor lavenir?

³ Kifer eski li inportan ki nou “get drwat devan” nou ek ki nou res konsantre lor lavenir? Enn dimounn pa kapav mars drwat devan li si li kontign get par deryer. Dan mem fason, nou pa pou kapav avanse dan nou servis pou Zeova si nou kontign mazinn bann kitsoz ki’nn arive dan lepase.​—Lik 9:62.

4. Ki nou pou examine dan sa lartik-la?

⁴ Dan sa lartik-la, nou pou koz lor trwa danze ki kapav fer nou viv dan lepase. * Sa trwa danze-la se: (1) nostalzi,  (2) santiman rankinn, ek (3) nou kontign santi nou koupab pou bann kitsoz ki nou’nn fer dan lepase. Dan sakenn parmi sa bann domenn-la, nou pou trouve kouma bann prinsip Biblik kapav ed nou pou pa res konsantre lor “tou seki deryer,” me pou res konsantre lor “seki devan.”​—Fil. 3:13.

5. Dapre Ekleziast 7:10, ki kitsoz fode pa nou fer?

⁵ Lir Ekleziast 7:10. * Sa verse-la pa dir ki li move ki nou demann noumem: “Kifer lepok lontan ti bon?” Bann bon souvenir se enn kado Zeova. Plito, sa verse-la dir: “Pa dir: ‘Kifer lepok lontan ti pli bon ki asterla?’” Alor, nou bizin fer bien atansion ki nou pa konpar lavi ki nou ti ena dan lepase ar lavi ki nou ena azordi, ek ki nou panse ki azordi tou pa bon. Enn lot version Labib tradir sa verse-la koumsa: “Fode zame to demande, ‘A, kifer bann kitsoz ti pli bon lontan?’ Se enn kestion bet.”

6. Kifer nou pou mank sazes si nou kontign panse ki nou lavi ti pli bon avan? Donn enn lexanp.

⁶ Kifer nou pou mank sazes si nou kontign panse ki nou lavi ti pli bon avan? Parski nostalzi kapav fer nou rapel zis bann bon moman ek fer nou bliye bann move moman. Anou pran lexanp bann Izraelit dan lepase. Apre ki zot ti kit Lezip, bien vit zot ti bliye ki kantite zot lavi ti bien difisil laba. Okontrer, zot ti kontign pans lor bann bon manze ki ti ena dan Lezip. Zot ti dir: “A! Nou rapel pwason ki nou ti pe manze gratis dan Lezip, ek kokom, melondo, pwaro, zoignon, ek lay!” (Nonb 11:5) Me eski zot ti vremem gagn sa bann manze-la “gratis”? Non. Bann Izraelit ti bien soufer sa lepok-la parski zot ti bann esklav dan Lezip. (Ex. 1:13, 14; 3:6-9) Me kanmem sa, zot ti bliye bann difikilte ki zot ti gagne laba ek zot ti anvi retourn dan lepase. Zot ti swazir pou res konsantre lor lepase, olie ki zot res konsantre lor bann  bon kitsoz ki Zeova ti fek fer pou zot. Zot latitid ti bien desevwar Zeova.​—Nonb 11:10.

7. Ki ti ed enn ser pou pa tom dan piez nostalzi?

⁷ Kouma nou kapav evit tom dan piez nostalzi? Anou pran lexanp enn ser ki ti koumans servi dan Betel Brooklyn an 1945. Inpe letan apre, li ti marye ar enn Betelit ek zot toulede ti servi dan Betel pandan plizir lane. Selman, dan bann lane 1970, ser-la so mari ti bien malad. Ser-la explike ki, kan so mari ti pre pou mor, li ti donn li bann bon konsey pou ed li persevere. Li ti dir ser-la: “Nou finn ena enn zoli lavi maryaz. Boukou dimounn pa’nn konn sa.” Me li ti osi dir ser-la: “Mem si zame to pou bliye bann moman ki nou’nn pase ansam, pa viv dan lepase. Avek letan to sagrin pou diminie. Pa tro dekouraze ek sagrin akoz seki finn ariv twa. To bizin zwaye pou bann bon moman ki nou’nn pase ansam pou servi Zeova. . . . Bann souvenir, se enn kado ki Bondie inn donn nou.” Se enn extra bon konsey, pa vre?

8. Ki bienfe nou ser ti gagne kan li ti swiv konsey so mari?

⁸ Nou ser ti swiv konsey ki so mari ti donn li. Li’nn servi Zeova avek fidelite ziska ki li mor laz 92 an. De-trwa lane avan, li ti dir: “Kan mo reflesi lor sa 63 an ki mo’nn servi Zeova dan servis aplintan la, mo kapav dir ki mo finn ena enn zoli lavi.” Kifer li dir sa? Li explike: “Seki vremem rann nou lavi zoli, se ki nou form parti enn gran fami bann frer ek ser. Nou ena lesperans pou viv ansam avek zot dan paradi lor later ek pou servi nou Gran Kreater, sel vre Bondie Zeova, pou touletan.” * Nou kapav aprann boukou ar lexanp nou ser ki ti res konsantre lor bann promes Zeova!

9. Kouma nou trouve dan Levitik 19:18, kan eski nou kapav trouv sa difisil pou rezet santiman rankinn?

⁹ Lir Levitik 19:18. * Parfwa, nou kapav trouv sa difisil pou pardonn enn bon kamarad, enn fami, ouswa enn kikenn dan lasanble, parski li’nn fer nou ditor. Par exanp, enn ser ti panse ki enn lot ser ti kokin so larzan ek li ti akiz li. Me ser-la ti inosan. Apre sa, ser-la ti vinn demann pardon so kamarad, me so kamarad ti bien ankoler ek li pa ti pe kapav aret pans lor la. Eski to finn deza ena sa santiman-la? Mem si nou pa finn pas par sa sitiasion-la, laplipar parmi nou kitfwa finn deza ena santiman rankinn. Kitfwa nou’nn panse osi ki zame nou pou kapav pardonn sa dimounn ki’nn fer nou ditor la.

10. Ki kitsoz kapav ed nou pou pa gard rankinn?

¹⁰ Ki kitsoz kapav ed nou pou pa gard rankinn? Premierman, pa bliye ki Zeova trouv tou kitsoz. Li konn tou bann sitasion ki nou’nn pase, mem bann linzistis. (Ebre 4:13) Li resanti nou soufrans. (Iza. 63:9) Ek Li promet nou ki biento, Li pou tir tou bann soufrans ek bann linzistis.​—Rev. 21:3, 4.

11. Ki bienfe nou gagne kan nou pa gard rankinn?

¹¹ Deziemman, nou santi nou pli bien kan nou pa gard rankinn ek nou pardonn lezot. Se seki nou ser inosan-la ti realize. Avek letan, li ti nepli ankoler ek li ti reisi pardonn ser-la. Li ti konpran ki, kan nou pardonn lezot, Zeova osi pardonn nou. (Mat. 6:14) Li ti kone ki ser-la ti fer li ditor, me li ti swazir pou pa gard rankinn anver ser-la. Gras-a sa, nou ser ti pli zwaye ek li ti reisi res konsantre lor so servis pou Zeova.

12. Ki nou aprann dan 1 Zan 3:19, 20?

¹² Lir 1 Zan 3:19, 20. Parfwa, nou tou nou santi nou koupab. Par exanp, sertin santi zot koupab akoz bann kitsoz ki zot inn fer avan ki zot konn laverite. Ek ena lezot ki santi zot koupab akoz bann erer ki zot inn fer apre zot batem. (Rom. 3:23) Biensir, nou tou nou anvi azir dan enn bon fason. Me “nou tou [nou] fer fot.” (Zak 3:2; Rom. 7:21-23) Mem si nou pa kontan kan nou santi nou koupab, sa kapav ena enn lefe pozitif lor nou. Kifer nou dir sa? Parski kan nou santi nou koupab, sa kapav ed nou pou fer bann sanzman ek sa kapav motiv nou pou pa refer bann mem erer.​—Ebre 12:12, 13.

13. Kifer fode pa ki nou kontign santi nou koupab?

¹³ Selman, li kapav arive ki nou kontign santi nou koupab, mem apre ki nou’nn repanti ek ki Zeova inn montre ki Li’nn pardonn nou. Sa kalite santiman-la kapav bien danzere. (Ps. 31:10; 38:3, 4) Kifer? Anou pran lexanp enn ser ki ti kontign santi li koupab akoz bann pese ki li ti fer dan lepase. Li ti dir: “Mo ti panse ki li ti initil ki mo fer boukou zefor pou servi Zeova, parski tout fason kitfwa li tro tar pou mwa.” Kitfwa boukou parmi nou ena mem santiman ki sa ser-la. Me nou bizin fer bien atansion ki nou pa kontign santi nou koupab pou bann erer ki nou’nn fer dan lepase. Kifer? Parski Satan ti pou bien kontan ki nou aret servi Zeova, mem si Zeova inn pardonn nou!​—Konpar avek 2 Korintien 2:5-7, 11.

14. Kifer nou kapav sir ki Zeova anvi pardonn nou?

¹⁴ Selman, kitfwa to kapav demann  tomem: ‘Kouma mo kapav sir ki Zeova anvi pardonn mwa?’ Si to pe poz tomem sa kestion-la, sa montre ki Zeova kapav pardonn twa. Finn gagn plizir lane, Latour Degard ti dir: “Kitfwa nou pe kontign fer bann mem erer plizir fwa. Kitfwa nou pankor sirmont sa febles ki nou ti ena avan ki nou’nn koumans servi Zeova la. . . . Pa perdi lespwar. Pa panse ki Zeova zame pa pou kapav pardonn to pese. Se Satan ki anvi ki to pans koumsa. Si to sagrin ek to regrete kan to fer enn pese, sa montre ki to pa enn move dimounn, ek ki Zeova kapav pardonn twa. Kontign ena limilite ek kontign priye Zeova pou ki Li pardonn twa, Li ed twa pou regagn enn konsians kler, ek Li ed twa pou aret fer pese-la. Parey kouma enn zanfan ki sak fwa rod led so papa kan li ena enn problem, twa osi kontign rod led Zeova ek Li pou ed twa akoz so faver ki nou pa merite.”

15-16. Ki santiman sertin finn ena kan zot inn konpran ki Zeova pa’nn les zot tonbe?

¹⁵ Boukou serviter Zeova inn gagn rekonfor kan zot inn konpran ki Zeova pa’nn les zot tonbe. Par exanp, enn frer ti bien ankouraze kan li ti lir enn lexperyans ki ti pibliye dan seri lartik “Labib Sanz Bann Dimounn.” Dan sa lartik-la, enn ser rakonte ki li ti trouv sa difisil pou krwar ki Zeova kontan li, akoz bann erer ki li ti fer dan lepase. Pandan plizir lane apre so batem, li’nn bizin kontign lite pou sirmont sa santiman-la. Me kan li ti medit lor laranson, sa ti ed li pou konpran ki Zeova kontan li. *

¹⁶ Kouma lexperyans sa ser-la ti ed nou frer? Frer-la ti ekrir: “Kan mo ti zenn, mo ti kontan get pornografi, ek sa ti bien difisil pou mo arete. Pa tro lontan, mo’nn rekoumanse ankor. Mo ti rod led bann ansien ek mo ti reisi sirmont sa problem-la. Bann ansien ti rasir mwa ki Zeova kontan mwa ek ki Li anvi ed mwa. Selman, parfwa mo ankor santi mwa initil ek mo panse ki Zeova pa kapav kontan mwa. Lexperyans [sa ser-la] ti vremem ed mwa. Asterla, mo’nn konpran ki, kan mo panse ki Bondie pa kapav pardonn mwa, se koumadir  mo pe panse ki sakrifis so Garson pa ase pou kouver mo pese. Mo’nn koup sa lartik-la ek mo’nn gard li bien. Lerla, kan mo koumans panse ki Zeova pa kontan mwa, mo relir li ek mo medit lor la.”

17. Ki kitsoz ti ed lapot Pol pou li pa kontign santi li koupab pou bann pese ki li ti fer?

¹⁷ Bann lexperyans koumsa fer nou rapel lapot Pol. Avan ki li vinn Kretien, li ti fer bann pese bien grav. Pol ti rapel seki li ti fer, me li pa ti kontign pans lor la. (1 Tim. 1:12-15) Li ti konsider laranson kouma enn kado personel ki Bondie inn fer li. (Gal. 2:20) Akoz sa, Pol pa ti kontign santi li koupab pou bann pese ki li ti fer, me li ti res konsantre pou fer so maximum pou Zeova.

18. Ki nou’nn aprann dan sa lartik-la?

¹⁸ Ki nou’nn aprann dan sa lartik-la? (1) Bann bon souvenir se enn kado Zeova; me mem si nou ti ena enn zoli lavi dan lepase, nou lavenir dan lemond nouvo pou pli zoli ankor. (2) Lezot kapav fer nou ditor, me kan nou swazir pou pardonn zot, nou pou kapav res konsantre lor nou servis pou Zeova. (3) Si nou kontign santi nou koupab pou bann erer ki nou’nn fer, sa kapav anpes nou servi Zeova avek lazwa. Alor, parey kouma Pol, nou bizin krwar ki Zeova inn fini pardonn nou.

19. Kouma nou kone ki dan lemond nouvo nou pa pou rapel bann kitsoz lepase ki pe fatig nou?

¹⁹ Nou ena lesperans pou viv pou touletan. Kan nou pou dan lemond nouvo, nou pa pou rapel bann kitsoz lepase ki pe fatig nou. Konsernan sa lepok-la, Labib dir: “Personn pa pou rapel bann kitsoz avan.” (Iza. 65:17) Sertin parmi nou kitfwa pe servi Zeova depi bien lontan ek zot pe koumans vinn vie. Me mazine ki dan lemond nouvo, zot pou revinn zenn! (Zob 33:25) Alor, anou bien determine pou pa viv dan lepase. Okontrer, nou anvi res konsantre lor lemond nouvo ek fer tou seki nou kapav pou nou reisi rant ladan!