1-2. Iseluleko esikuZaga 4:25 singasinceda njani? Nika izibonelo.

CABANGA ngezibonelo ezilandelayo. Udade osekhulile ucabanga ngezinto ezimnandi ezenzakala kudala empilweni yakhe. Lanxa khathesi impilo yakhe isinzima uqhubeka emkhonza ngenhliziyo yonke uJehova. (1 Khor. 15:58) Nsuku zonke uyazibona esephila emhlabeni omutsha lezihlobo labangane bakhe. Omunye udade ukhumbula into embi ayenziwa ngothile ebandleni, kodwa ukhetha ukungahlali ecabanga ngayo. (Kol. 3:13) Umfowethu ukhumbula amaphutha awenza kudala kodwa khathesi uzimisele ukuhlala ethembekile kuJehova.—Hubo. 51:10.

² Kuyini okuhambelanayo ngamaKhristu la amathathu? Wonke ayakukhumbula okwenzakala kudala kodwa kawahlali ecabanga ngakho. ‘Akhangelise amehlo awo nta phambili.’—Bala iZaga 4:25.

3. Kungani kumele ‘sikhangelise amehlo ethu phambili’?

³ Kungani kuqakathekile ukuthi ‘sikhangelise amehlo ethu phambili’? Umuntu ngeke enelise ukuhamba kuhle nxa elokhu enyemukula. Lathi ngeke sikhonze uJehova ngenhliziyo yonke nxa sihlala sicabanga izinto ezenzakala kudala.—Luk. 9:62.

4. Sizaxoxa ngani esihlokweni lesi?

⁴ Esihlokweni lesi sizaxoxa ngezinto ezintathu ezingabangela ukuthi sihlale sicabanga izinto ezenzakala kudala. Okokuqala, yikufisa ukuthi ngabe impilo iyabuyela emuva. Okwesibili, yikubamba isikhwili. Okwesithathu, yikuhlala sizisola. Sizabona ukuthi iBhayibhili lisinceda njani ukuthi singahlali sicabanga “izinto ezisemuva” kodwa silalamele “izinto eziphambili.”—Flp. 3:13.

5. UmTshumayeli 7:10 uthi kuyini okungamelanga sikutsho?

⁵ Bala umTshumayeli 7:10. Nanzelela ukuthi ivesi le kayitsho ukuthi kubi ukubuza umbuzo othi: “Kungani izinsuku zezolo zazimnandi?” Ukukhumbula izinto ezinhle ezenzakalayo yisipho esivela kuJehova. Kodwa ivesi le ithi: “Ungaze wathi, ‘Kungani izinsuku zezolo zazingcono kulalezi?’” Yikho akumelanga siqathanise indlela izinto ezaziyiyo kudala leseziyiyo khathesi besesicabanga ukuthi kudala kwakungcono kakhulu. Elinye iBhayibhili lithi: “Ungatsho ukuthi: ‘Kwenziwa yini ukuba insuku zakuqala zibe ngcono kulalezi na?’ Ngoba kuyibuthutha ukubuza lokhu.”

6. Kungani kuyibuthutha ukuhlala sicabanga ukuthi impilo yayingcono kudala? Nika isibonelo.

⁶ Kungani kuyibuthutha ukuhlala sicabanga ukuthi impilo yayingcono kudala? Kungenza sibone angani izinto zazihlala zitshelela, sikhohlwe ubunzima esasihlangana labo. Lokhu kwenzakala kuma-Israyeli. Athi esesukile eGibhithe aphanga akhohlwa ukuthi ayethwele amagabha avuzayo ngesikhathi eselizweni lelo. Ayesehlala ecabanga ngokudla okumnandi ayekudla. Athi: “Sesikhumbula izinhlanzi esasizidla eGibhithe kungelambadalo lamakhomane, amakhabe, amalikhi lemihlobo yonke yehanyanisi kanye legalikhi.” (Nani. 11:5) Kodwa liqiniso yini ukuthi ayesidla ukudla lokho “kungelambadalo”? Hatshi. Ama-Israyeli ayekubhadalela kabuhlungu ngoba ayeyizigqili zamaGibhithe ayewadlisa luklubhu. (Eks. 1:13, 14; 3:6-9) Kodwa akukhohlwa lokhu afisa impilo yakudala. Ayesehlala ecabanga ngezinto ayekade ezikholisa kulokuthi acabange ngezinto ezinhle uJehova ayesanda kuwenzela zona. UJehova wawazondela.—Nani. 11:10.

7. Kuyini okwakuzanceda omunye udade ukuthi angahlali ecabanga ngezinto ezimnandi azikholisa kudala?

⁷ Singenzani ukuze singahlali sikhumbula izinto ezimnandi esasizikholisa kudala? Kasixoxeni ngodade owaqalisa  ukusebenza eBhetheli eseBrooklyn ngo-1945. Ngemva kweminyaka ethile watshada lomunye umzalwane owayeseBhetheli futhi basebenza khona okweminyaka eminengi. Kodwa ngo-1976 umzalwane lo wagula. Udadewethu wathi umkakhe wamnika amacebo ayezamnceda esengumfelokazi ngesikhathi enanzelela ukuthi usezakufa. Wathi kuye: “Sikholisile ukuphila ndawonye. Abantu abanengi kabathokozi emitshadweni yabo.” Kodwa waphinda wathi kuye: “Kawusoze uzikhohlwe izinto esazikholisa sindawonye kodwa ungahlali ucabanga ngazo. Uzakuba ngcono ngokuya kwesikhathi. Ungadani kakhulu. Thokoza ngokuthi sakholisa ukukhonza uJehova sindawonye. Ukukhumbula izinto ezenzakalayo yisipho esasiphiwa nguNkulunkulu.” La kwakungamacebo amahle sibili.

8. Ukulalela okwatshiwo ngumkakhe kwamnceda njani udadewethu?

⁸ Udadewethu wenza khona kanye akutshelwa ngumkakhe. Wakhonza uJehova ethembekile waze wafa eseleminyaka engu-92. Engakafi wathi: “Ngikholise kakhulu ukuba senkonzweni yesikhathi sonke okweminyaka edlula engu-63.” Kuyini okwamenza wakholisa? Wathi: “Okwenza sithokoze empilweni yikuba phakathi kwemuli enhle yabazalwane lokuba lethemba lokuphila labo emhlabeni olipharadayisi sikhonza uMdali wethu, uNkulunkulu weqiniso uJehova, kuze kube nini lanini.” * Kunengi esingakufunda kudade lo owahlala ekhangelise amehlo akhe phambili!

9. Ngokwalokho okutshiwo kuLevi 19:18, kuyini okungenza kube nzima ukuthi sixolele umuntu osiphambaniseleyo?

⁹ Bala uLevi 19:18. Ngezinye izikhathi kunzima ukuxolela umfowethu kumbe udadewethu, umngane loba isihlobo esiyabe sisiphambanisele. Ngokwesibonelo,  omunye udadewethu wagconwa ngudade othile esithi untshontshe imali yakhe. Ngokuya kwesikhathi udade owamgconayo wananzelela ukuthi uphambanisile wasexolisa. Kodwa yena wayezonde kakhulu futhi wayelokhu ecabanga ngokwakwenzakele. Sewake wazizwa ngaleyondlela yini? Lanxa singazake sibe sesimeni esinjengesikadadewethu owagconwayo, abanengi bethu siyake sizonde size sizitshele ukuthi kasisoze senelise ukumthethelela umuntu osiphambaniseleyo.

10. Kuyini okungasinceda nxa sithwala nzima ukuthi sixolele omunye?

¹⁰ Kuyini okungasinceda nxa sithwala nzima ukuthi sixolele omunye? Yikukhumbula ukuthi uJehova ubona yonke into. Ubona konke okwenzakala kithi ngitsho lanxa abantu besiphatha kubi. (Heb. 4:13) Uzwa ubuhlungu nxa sithwele nzima. (Isaya. 63:9) Kanti njalo uthembisa ukuthi uzabuqeda bonke ubuhlungu esibuzwayo ngenxa yokuphathwa kubi.—Isam. 21:3, 4.

11. Ukuxolela abanye kusinceda njani?

¹¹ Kumele sikhumbule lokuthi ukuxolela abanye kuyasinceda thina ngokwethu. Udade owagconwayo wakubona lokhu. Ngokuhamba kwesikhathi wacina emxolele udade owayemphambanisele. Wananzelela ukuthi uJehova uzasixolela nxa sixolela abanye. (Mat. 6:14) Wayekwazi ukuthi udade owamgconayo wayephambanisile kodwa wakhetha ukumxolela. Lokhu kwamenza wathokoza kakhulu futhi wakhonza uJehova ngenhliziyo yonke.

12. Sifundani ku-1 Johane 3:19, 20?

¹² Bala u-1 Johane 3:19, 20. Sonke siyake sizisole ngezinye izikhathi. Ngokwesibonelo, abanye bayazisola ngezinto ababezenza bengakafundi iqiniso. Abanye bona bazisola ngamaphutha abawenza sebebhabhathiziwe. (Rom. 3:23) Siyafisa sibili ukwenza izinto eziqondileyo kodwa “sonke siyaphambanisa izikhathi ezinengi.” (Jak. 3:2; Rom. 7:21-23) Lanxa ukuzisola kubuhlungu, kuyanceda ngoba kungenza silungisise ebesikuphambanisile futhi sizimisele ukungakuphindi.—Heb. 12:12, 13.

13. Kungani kungamelanga sihlale sizisola?

¹³ Kungenzakala ukuthi sihlale sizisola lanxa sesiphendukile futhi uJehova esesithethelele. Ukuzisola okunjalo kuyingozi. (Hubo. 31:10, NWT; 38:3, 4) Kungani sisitsho njalo? Ake sixoxe ngomunye udade owayehlala ezisola ngezono azenzayo. Wathi: “Ngangibona angani akuncedi ukuthi ngitshiseke ekukhonzeni uJehova ngoba ngangicabanga ukuthi kangisoze ngisindiswe.” Abanye bethu singazizwa ngale indlela. Kodwa kumele sinanzelele ukuthi singahlali sizisola ngoba uSathane angathokoza kakhulu nxa singayekela ukukhonza uJehova lanxa uJehova esesithethelele.—Khangela u-2 Khorinte 2:5-7, 11.

14. Kuyini okungenza siqiniseke ukuthi uJehova angasithethelela?

¹⁴ Abanye bangazibuza ukuthi kuyini okungenza baqiniseke ukuthi uJehova angabathethelela. Nxa uzibuza lokho, kutshengisa ukuthi uJehova angakuthethelela. Enye iNqabayokulinda yakudala yathi: ‘Ngezinye izikhathi singabe silokhu sisenza iphutha elifananayo kanenginengi. Kungenzeka kasikenelisi ukutshiya umkhuba esasilawo singakakhonzi uNkulunkulu. Kodwa ungalahli ithemba. Ungacabangi ukuthi wenze isono uJehova angeke asithethelele ngoba lokhu yikho uSathane afuna ukucabange. Khona  nje ukuthi uzwa ubuhlungu futhi ukhathazeke nxa wenze iphutha lelo kutshengisa ukuthi kawusomuntu omubi lokuthi uJehova angakuthethelela. Hlala uthobekile njalo uthandaze kuNkulunkulu umcela ukuthi akuthethelele, akuncedise ube lomzwangedwa omsulwa njalo wenelise ukuyekela ukwenza iphutha lelo. Sonke isikhathi nxa umntwana angaba lohlupho olufananayo ugijimela kuyise ukuthi athole uncedo. Ngakho lawe ungadinwa ukucela uJehova ukuthi akuncedise futhi lakanye uzakuncedisa ngoba ulomusa omkhulu.’ *

15-16. Abanye kubancede njani ukunanzelela ukuthi uJehova lokhu ebathanda?

¹⁵ Abantu bakaJehova abanengi baduduzwe yikunanzelela ukuthi uJehova ulokhu ebathanda. Ngokwesibonelo, eminyakeni eyadlulayo omunye umfowethu wancedwa ngakubala kwesinye isihloko esithi “IBhayibhili Liyamntshintsha Umuntu.” Esihlokweni leso, omunye udade wathi wayekubona kunzima ukukholwa ukuthi uJehova angamthanda ngenxa yezinto ezazenzakale empilweni yakhe. Wayelokhu ezizwa ngaleyondlela lanxa kwasekudlule iminyaka eminengi ebhabhathiziwe. Kodwa ukucabangisisa ngenhlawulo kwamnceda wakholwa ukuthi uJehova uyamthanda. *

¹⁶ Okwenziwa ngudade lo kwamnceda njani umfowethu? Wabhala wathi: “Ngisesemncane ngangilomkhuba wokubukela iphonografi. Ngiphinde ngabuyela emkhubeni lo. Kodwa ngicele abadala ukuthi bangincedise, njalo sengizamile ukulwisana lawo. Abadala bangiqinisekise ukuthi uJehova uyangithanda lokuthi uyafuna ukungithethelela. Kodwa ngezinye izikhathi ngiyake ngizizwe ngingasimuntu walutho, ngicabange lokuthi uJehova kangithandi. Ukubala indaba [kadade lo] kwanginceda kakhulu. Khathesi senginanzelela ukuthi nxa ngicabanga ukuthi uJehova ngeke angithethelele ngamanye amazwi ngiyabe ngisithi umhlatshelo weNdodana yakhe kawenelisi ukusibekela  izono zami. Sengasiquma kumagazini isihloko lesi ukuze ngibe ngisibala futhi ngicabangisise ngaso nxa sengiqalisa ukuzwa angani uJehova kangithandi.”

17. Kuyini okwanceda umphostoli uPhawuli ukuthi angahlali ezisola?

¹⁷ Izindaba ezinjengalezi zisikhumbuza okwenzakala kumphostoli uPhawuli. Engakabi ngumKhristu wenza izono ezinengi ezinkulu. Kazange azikhohlwe izono ayezenzile kodwa wayengahlali ecabanga ngazo. (1 Tim. 1:12-15) Wayekholwa ukuthi inhlawulo yisipho asinikwe nguNkulunkulu. (Gal. 2:20) Lokhu kwamnceda ukuthi angahlali ezisola lokuthi akhonze uJehova ngenhliziyo yonke.

18. Sifundeni esihlokweni lesi?

¹⁸ Sifundeni esihlokweni lesi? (1) Ukukhumbula izinto ezinhle ezenzakala empilweni yethu kuyisipho esivela kuJehova. Kodwa kungelani lokuthi impilo yethu yayimnandi njani kudala, emhlabeni omutsha izabe imnandi kakhulu. (2) Abanye bangasizwisa ubuhlungu, kodwa nxa singabathethelela sizenelisa ukuqhubeka sikhonza uJehova ngenhliziyo yonke. (3) Ukuhlala sizisola kungabangela ukuthi singathokozi ekukhonzeni uJehova. Yikho kumele silingisele uPhawuli sikholwe ukuthi uJehova usithethelele.

19. Sikwazi njani ukuthi emhlabeni omutsha kasisoze sikhumbule izinto zakudala?

¹⁹ Silethemba lokuphila kuze kube nini lanini. Nxa sesisemhlabeni omutsha, kasisoze sikhumbule loba yini ezakwenza sidane. IBhayibhili lithi: “Izinto zakuqala aziyikukhunjulwa.” (Isaya. 65:17) Ngokwesibonelo, abanye bethu sebeze baguga bekhonza uJehova kodwa emhlabeni omutsha bazaphinda babe batsha. (Jobe. 33:25) Yikho kasizimiseleni ukungahlali sicabanga izinto zakudala kodwa kasikhangeliseni amehlo ethu phambili!