1-2. Ongiini tatu vulu okulandula omayele ngoka taga adhika mOmayeletumbulo 4:25? Gandja oshiholelwa.

DHILADHILA kiiholelwa mbika tayi landula. Omumwameme omukokele ota dhiladhila komathimbo omawawa ngoka a kala nokutyapula. Nonando ngashingeyi okwa taalela omashongo, ota tsikile okulongela Jehova ngaashi ta vulu. (1 Kor. 15:58) Kehe esiku oha tedhatedha e li pamwe naaholike ye moparadisa. Omumwameme gulwe okwa dhimbulukwa sho a li u uvithwa nayi komwiitaali omukwawo, ihe okwa tokola kaa kale ti ipula nasho. (Kol. 3:13) Omumwatate oku shi omapuko ge gomonakuziwa, ihe ngashingeyi ota gandja eitulomo kokukala omudhiginini kuJehova. — Eps. 51:10.

² Aakriste ayehe mbaka yatatu oya ningi shike sha faathana? Ayehe oya kala taya dhimbulukwa shoka she ya ningilwa monakuziwa, ihe inaya kala tayi ipula unene nasho. Pehala lyaashono, oya kala taya ‘tala komeho,’ ano konakuyiwa. — Lesha Omayeletumbulo 4:25.

3. Omolwashike twa pumbwa okukala tatu ‘tala komeho’?

³ Omolwashike sha simana okukala tatu ‘tala komeho’? Ngaashi owala omuntu itaa vulu okweenda u ukilila mondjila ngele okwa tala owala konima, natse itatu vulu naanaa okulongela Jehova nuudhiginini, ngele otwa kala owala tatu dhiladhila kiinima yomonakuziwa. — Luk. 9:62.

4. Oshike tatu ka kundathana moshitopolwa shika?

⁴ Moshitopolwa shika otatu ka kundathana oomwigo ndatu ndhoka tadhi vulu oku tu ningitha tu kale tatu dhiladhila owala konakuziwa. * Oomwigo ndhoka odho: (1) ondjuulukwe, (2) okugeya nosho wo (3) okukala tatu ipula nomapuko ngoka twa ninga monakuziwa. Sho tatu ka kundathana omwigo kehe, otatu ka tala nkene omakotampango gOmbiimbeli taga vulu oku tu kwathela kaatu gandje eitulomo ‘kwaashoka shi li konima,’ ihe otu li gandje ‘kwaashoka shi li komeho.’ — Fil. 3:13.

5. MOmuuvithi 7:10, otatu londodhwa tu yande omwigo guni?

⁵ Lesha Omuuvithi 7:10. Ndhindhilika kutya ovelise ndjika inayi popya kutya osha puka okupula to ti: “Omolwashike omasiku gonale ga li omawanawa?” Okudhimbulukwa oku li omagano omawanawa ga za kuJehova. Pehala lyaashono, ovelise otayi ti: “Ino tya: ‘Omasiku gonale oshike ga li omawanawa ge vule gongashingeyi?’” Onkee ano, natu kale twa kotoka kaatu yelekanithe onkalamwenyo yetu yonale naandjoka yongashingeyi, nokudhiladhila kutya onkalamwenyo itayi tu endele we nawa. Ombiimbeli yilwe oya toloka ovelise ndjoka ya ti: “Ino pula to ti: ‘Omolwashike iinima ya li yi li nawa monakuziwa?’ Ndyoka ka li shi epulo li li pandunge.”

6. Omolwashike kaashi li pandunge okukala tatu dhiladhila unene kutya onkalamwenyo yetu oya li ombwanawa monakuziwa? Gandja oshiholelwa.

⁶ Omolwashike kaatu na okukala tatu dhiladhila uunene kutya onkalamwenyo yetu yomonakuziwa oya li ombwanawa yi vule yongashingeyi? Omolwaashoka otashi vulika tu kale hatu dhimbulukwa owala iinima mbyoka iiwanawa, tse tatu dhimbwa mbyoka iiwinayi. Pashiholelwa, natu ka taleni koshiholelwa shAaisraeli yonale. Konima sho ya zi muEgipiti, mbalambala oya dhimbwa nkene onkalamwenyo yawo ya li ondhigu. Oya kala owala taya gandja eitulomo kiikulya iiwanawa mbyoka ya li haya li. Oya ti: “MuEgipiti otwa li hatu li oohi, ngaashi twa hala, dho inadhi futwa nando osha. Otatu dhiladhila okatanga kombihu, ookanuwa, oomboganyanga, oonyanga noonyalanyanga.” (Num. 11:5) Ihe mbela oondja ndhoka oya li ngaa shili haye dhi li ‘inaaya futa nando osha? Hasho. Pethimbo ndyoka Aaisraeli oya li haya hepekwa nayi noya li haya thiminikwa ye li aapika muEgipiti. (Eks. 1:13, 14; 3:6-9) Ihe nando ongawo, konima yethimbo oya dhimbwa okuhepekwa, e taya kala ya hala iikulya mbyoka ya li haya li hoka. Oya hogolola okukala taya gandja eitulomo komasiku omawanawa gomonakuziwa, pehala lyokugandja eitulomo kiinima iiwanawa mbyoka Jehova opo a li e ya ningile. Jehova ka li a hokwa iikala yawo mbyoka. — Num. 11:10.

7. Oshike sha kwathele omumwameme gumwe a yande okukala ta dhiladhila unene kutya onkalamwenyo ye oya li ombwanawa monakuziwa?

⁷ Ongiini tatu vulu okuyanda omwigo gwondjuulukwe? Natu taleni koshiholelwa shomumwameme gumwe ngoka a li a tameke okulonga  koBetel yaBrooklyn, mo 1945. Konima yoomvula dhontumba okwa hokanwa kOmubetel omukwawo, e taya longele moka oomvula odhindji. Ihe mo 1976, omusamane gwe okwa tameke okweehama. Okwa ti kutya sho omusamane gwe a mono kutya oku li pokusa, omusamane gwe okwe mu pe omayele omawanawa, ngoka ga li tage ke mu kwathela konima ngele omusamane gwe a si. Omusamane gwe okwe mu lombwele a ti: “Otwa li tu na ondjokana ombwanawa lela, naashoka sha pumba moondjokana odhindji.” Ihe okwe mu ladhipike wo a ti: “Nonando ito dhimbwa onakuziwa ombwanawa ndjoka twa li tu na, ino kala to ipula unene nayo. Mokweendela ko kwethimbo, oto ka hupula. Ino kala wa yemata nokukala wi uvitile ohenda. Kala wa pandula omauwanawa nomayambeko ngoka twa mona, sho twa kala tatu longele Jehova pamwe. . . . Okudhimbulukwa oku li omagano ga za kuKalunga.” Mbela ito tsu kumwe kutya omayele ngoka oga li omawanawa?

8. Omumwameme okwa mono mo ngiini uuwanawa mokuyanda okukala ti ipula nonakuziwa ye?

⁸ Omumwameme ngoka twa zi nokupopya okwa tula miilonga omayele gomusamane gwe. Okwa longele Jehova nuudhiginini sigo oosho e na omimvo 92. Oomvula dhontumba manga inaa sa, okwa ti: “Okutala kokulongela kwandje Jehova ethimbo lyu udha uule womimvo dha konda 63, otandi vulu okutya onkalamwenyo yandje oya li shili yinyanyudha.” Omolwashike a popi ngawo? Okwe shi yelitha a ti: “Uumwayinathana wetu owo unene hawu ningitha onkalamwenyo yi kale ombwanawa nosho wo etegameno ndyoka tu na lyoku ka kala pamwe naamwatate naamwameme moparadisa kombanda yevi, tatu longele Omushiti Omunenenene, Kalunga kashili, Jehova, sigo aluhe.” * Otatu vulu okwiilonga oshindji koshiholelwa shomumwameme nguka a li a gandja eitulomo komauvaneko gaJehova!

9. Ngaashi sha popiwa muLevitikus 19:18, uunake tashi vulika shi kale oshidhigu okudhimina po gumwe ngoka e tu uvitha nayi?

⁹ Lesha Levitikus 19:18. Olundji ohatu mono oshidhigu okukala inaatu geela omuntu ngoka e tu uvitha nayi, unene tuu ngele oku li omwiitaali  omukwetu, kuume ketu kopothingo nenge omupambele. Pashiholelwa, omumwameme gumwe okwa li a lundilwa komwiitaali omukwawo kutya okwa yaka po iimaliwa ye. Lwanima, omumwameme ngoka a lundila mukwawo okwa gandja ombili, ihe omumwameme ngoka a lundilwa okwa kala owala ta gandja eitulomo kwaashoka she mu ningilwa. Mbela nangoye owi iyadhele nale wu uvite ngaashi omumwameme ngoka? Nonando inatu iyadha nale monkalo ya fa yomumwameme ngoka, oyendji yomutse otashi vulika twa li tu uvithwa nayi kugumwe, e tatu kala tu uvite kutya katu na siku tu mu dhimine po.

10. Oshike tashi vulu oku tu kwathela uuna twa geyithwa?

¹⁰ Oshike tashi vulu oku tu kwathela, uuna twa geyithwa? Otu na okudhimbulukwa kutya Jehova oha kala e wete kehe shimwe. Oha kala e wete kehe shoka tatu ningilwa, nuuna tatu ungaungiwa natse kaashi li pauyuuki. (Heb. 4:13) Oha kala u uvite nayi uuna tatu ungaungiwa natse nayi. (Jes. 63:9) Oku uvaneka kutya masiku ota ka hulitha po kehe shoka hashi tu uvitha nayi. — Eh. 21:3, 4.

11. Ohashi tu etele ngiini uuwanawa uuna twa dhimine po yalwe?

¹¹ Otwa hala wo okudhimbulukwa kutya uuna tatu dhimine po yalwe ohashi tu etele uuwanawa. Shoka osho omumwameme ngoka a li a lundilwa a ndhindhilike. Mokweendela ko kwethimbo okwa dhimine po omumwameme ngoka a li e mu lundile. Okwe shi ndhindhilike mo wo kutya uuna tatu dhimine po yalwe, Jehova naye ohe tu dhimine po. (Mat. 6:14) Okwa li e shi kutya shoka a ningilwa komumwameme ngoka osha puka, ihe okwa tokola oku mu dhimina po. Oshizemo, omumwameme okwa kala a nyanyukwa shi vulithe nale nokwa li a vulu okugandja eitulomo kokulongela Jehova.

12. Oshike tatu ilongo muJohannes gwotango 3:19, 20?

¹² Lesha 1 Johannes 3:19, 20. Omathimbo gamwe atuheni ohatu kala tu uvite tu na ondjo. Pashiholelwa, yamwe ohaya kala yu uvite unene ye na ondjo omolwiinima mbyoka ya ninga manga inaaya tseya oshili. Yalwe ohaya kala yu uvite ye na ondjo omolwomapuko ngoka ya ninga konima sho ya ninginithwa. Oshi li paunshitwe okukala wu uvite ngawo. (Rom. 3:23) Odhoshili kutya otwa hala okuninga shoka shi li mondjila. Ihe “atuheni ohatu puka olwindji.” (Jak. 3:2; Rom. 7:21-23) Nonando ihatu nyanyukilwa okukala tu uvite tu na ondjo, oshi na uuwanawa wontumba kutse. Omolwashike tatu tile ngawo? Omolwaashoka okukala tu uvite tu na ondjo, otaku vulu oku tu inyengitha tu ninge omalunduluko notu kale twa tokola toka kaatu endulule omapuko ngoka twa ninga. — Heb. 12:12, 13.

13. Omolwashike twa pumbwa okukala twa kotokela okukala tu uvite unene tu na ondjo?

¹³ Shimwe ishewe, otashi vulika tu kale tu uvite unene tu na ondjo, nokuli nokonima sho twi iyela ombedhi naasho Jehova e tu dhimina po. Okukala wu uvite ngawo okwa nika oshiponga. (Eps. 31:10; 38:3, 4) Omolwashike tatu tile ngawo? Natu taleni koshiholelwa shomumwameme gumwe ngoka a kala u uvite unene e na ondjo, omolwomapuko ge gomonakuziwa. Okwa ti: “Onda li ndu uvite itaashi kwatha sha okulongela Jehova nuudhiginini, molwaashoka otashi vulika itaandi ka hupithwa.” Oyendji yomutse otashi vulika tu kale tu uvite ngaashi omumwameme ngoka. Onkee ano, otwa pumbwa okukotokela okukala tu uvite unene tu na ondjo. Omolwashike? Omolwaashoka Satana ota ka kala a nyanyukwa noonkondo ngele otwe etha po okulongela Jehova nonando Jehova okwe tu dhimina po. — Yelekanitha 2 Aakorinto 2:5-7, 11.

14. Ongiini tatu vulu okukala nuushili kutya Jehova natango oku na ko nasha natse?

¹⁴ Ihe nonando ongawo, otashi vulika tu ipule tatu ti: ‘Ongiini tandi vulu okutseya kutya Jehova natango oku na ko nasha nangame?’ Epulo ndyoka otali ulike kutya Jehova ota vulu oku ku dhimina po. Omimvo odhindji dha ka pita, Oshungolangelo oya tile: “Otashi vulika twa kala tatu kondjitha okweetha po omukalondjigilile gwontumba  gwa nyata uule wethimbo, nokonima nokuli sho twa tameke okulongela Jehova. . . . Ino teka omukumo. Ino dhiladhila kutya owa yona eyono ndyoka Jehova itaa vulu okudhima po. Satana osho a hala wu dhiladhile ngawo. Sho wu uvite kutya owa yona, shoka otashi ulike kutya owu uvitile nayi shoka wa kala nokuninga, na Jehova ote ke ku dhimina po. Ifupipika, e to galikana Jehova e ku dhimine po, opo wu kale wu na eiyuvo lya yela, noku ku kwathele wu yande okweendulula epuko ndyoka. Kutya nduno okanona oki iyadhe muupyakadhi wontumba lwiikando, aluhe ohaka yi kuhe e ka kwathele. Onkee ano, nangoye kala ho pula Jehova ekwatho, ote ke ku kwathela.” *

15-16. Ooitaali yamwe oya li yu uvite ngiini sho ya li taya dhiladhila kutya Jehova ke ya hole?

¹⁵ Aapiya yaJehova oyendji oya mona ehekeleko sho ya tseya kutya Jehova natango oku na ko nasha nayo. Pashiholelwa, omimvo opo dha zi ko, omumwatate gumwe okwa li a gumwa lela koshimoniwa shoka sha li sha holoka moshitopolwa “Ombiimbeli ohayi lundulula onkalamwenyo yaantu.” Moshitopolwa shoka, omumwameme gumwe okwa ti kutya omolwiinima iiwinayi mbyoka a li a ningi monkalamwenyo ye, osha li oshidhigu kuye okwiitaala kutya oku holike kuJehova. Nokonima sho a ninginithwa okwa kala ta kondjo nomaiyuvo ga tya ngawo. Ihe sho a dhiladhila muule kombinga yekuliloyambo, oshe mu kwathele i itaale kutya oku holike kuJehova. *

¹⁶ Oshimoniwa shomumwameme osha li sha gumu ngiini omumwatate ngoka? Okwa nyola a ti: “Sho nda li omugundjuka onda li nda pikwa kokutala omathano giipala, nosha li oshidhigu kungame oku ge etha po. Omathimbo hamale, onda tameke oku ga tala ishewe. Onda pula aakuluntugongalo ya kwathele ndje, notandi ningi ehumokomeho mokusinda uunkundi mboka. Aakuluntugongalo oya shilipaleka ndje kutya Jehova oku hole ndje nokwa hala okukwathela ndje. Nonando ongawo, omathimbo gamwe natango ohandi kala ndi uvite kaandi na oshilonga nosho wo kutya Jehova ita vulu okukala e hole ndje. Okulesha oshimoniwa shomumwameme nguka okwa kwathela ndje lela. Ngashingeyi onde shi ndhindhilika kutya uuna tandi dhiladhila kutya Kalunga ita vulu okudhimina ndje po omayono gandje, kungawo onda fa owala tandi ti ekuliloyambo lyOmwana itali vulu okusiikila omayono gandje. Oshitopolwa  shoka onde shi teta mo mOshungolangelo, opo ndi kale handi shi lesha nokutedhatedha kusho uuna ndi iyadha tandi dhiladhila kutya Jehova ke hole ndje.”

17. Omuyapostoli Paulus okwa yanda ngiini omwigo gwokukala ti ipula unene kutya oku na ondjo?

¹⁷ Iimoniwa ya fa mbika otayi tu dhimbulukitha omuyapostoli Paulus. Manga inaa ninga Omukriste, okwa li ha longo iilonga iiwinayi noonkondo. Paulus ka li a dhimbwa onakuziwa ye, ihe ka li aluhe hi ipula nayo. (1 Tim. 1:12-15) Okwa li a tala ko ekuliloyambo li li omagano e ga pewa kuKalunga. (Gal. 2:20) Onkee ano, Paulus ina kala ti ipula kutya oku na ondjo, ihe okwa gandja eitulomo kokulongela kwe Jehova ngaashi ta vulu.

18. Oshike twi ilonga moshitopolwa shika?

¹⁸ Oshike twi ilongo mokukonakona oomwigo ndhoka twa kundathana moshitopolwa shika? (1) Okudhimbulukwa oku li omagano ga za kuJehova, ihe kutya nduno onkalamwenyo yetu oya li ombwanawa monakuziwa, onkalamwenyo yetu muuyuni uupe otayi ka kala yi vule yongashingeyi. (2) Ngele yalwe oye tu uvitha nayi e tatu hogolola oku ya dhimina po, otatu ka vula okugandja eitulomo kokulongela Jehova. (3) Okukala tatu dhiladhila kutya otu na ondjo, otaku vulu oku tu imba tu longele Jehova nenyanyu. Onkee ano, ngaashi Paulus, otwa pumbwa okwiitaala kutya Jehova okwe tu dhimina po.

19. Otu shi shi ngiini kutya muuyuni uupe, itatu ka kala tatu ipe ombedhi omolwiinima yomonakuziwa?

¹⁹ Otu na etegameno lyoku ka kala nomwenyo sigo aluhe. Muuyuni uupe itatu ka dhimbulukwa nando osha hashi tu uvitha nayi. Shi na ko nasha nethimbo ndyoka, Ombiimbeli oya ti: “Iiningwanima yonale otayi ka dhimbiwa thiluthilu.” (Jes. 65:17) Dhiladhila owala: Yamwe yomutse otwa kala nokulongela Jehova sigo omuukulupe, ihe muuyuni uupe, otatu ka kala aagundjuka ishewe. (Job 33:25) Onkee ano, natu kale twa tokola toko kaatu kale tatu ipula unene nonakuziwa. Pehala lyaashono, natu kale tatu gandja eitulomo konakuyiwa, e tatu kala twa tegelela shoka shi li komeho!