1-2. Nni nipharihele hai ekano enaphwanyeya mu Masiposipo 4:25? Mvahe yootakiherya.

MUTHOKORORYE sootakiherya inacharela. Murokora mmoha awunnuwelavo onnuupuwela ilukuluku saphaama sa muculi. Naamwi ahoolelaka makacamiho mookumini hiihaano, owo onnapaka soothene onaweryeiye ntakhara Yehova. (1 Kor. 15:58) Nihiku ti nihiku onnaanyiherya akhalaka vamoha ni oosiveliwa awe mu elapo evyaani. Murokora mmoha onnuupuwela wi ohuukhuliwa ni mukhwaawe a munroromeloni, nyenya onnathanla ohikuha mathowa. (Kol. 3:13) Munna ori awuukhuwa nthowa na soocheka opankeiye khalai nyenya otikitheren’ye mu opaka soothene onaweryeiye wi atitelele okhala oororomeleya wa Yehova hiihaano.—Sal. 51:10.

² Echu taani yoolikana oothene yaala aryaayano? Oothene yaala annuupuwela ichu seeren’ye mookumini mwaya khalai, nyenya hanatikitheryeya mu seiyo. Ohiya yeeyo, awo annatitelela ‘oweha ohoolo.’—Mwaalakhanye Masiposipo 4:25.

3. Ntakhara heeni nnaphwanelaahu otitelela ‘oweha ohoolo’?

³ Ntakhara heeni eryaaya yoochuneyaxa otitelela ‘oweha muhoolo’? Hiiha ntoko muchu ohinaweryeiye weeca aniiha awehaka muculi hiyaano tho hinni niwerye otitelela omurumeela Yehova nniiha nuupuwelelaka ichu sa muculi.—Luka 9:62.

4. Tiheeni nnahaalaahu othokororya mmwaha yoola?

⁴ Mmwaha yoola nnahaala othokororya miraakho miraru seiho sahaala oneeriha otitelela wuupuwela ichu sa muculi. Muraakho: (1) woona ilukuluku sakhalai okhala saphaamaxa opwaha samutano, (2) okuha mathowa, nave (3) wiiphwanyerya mathowa ntakhara yeeyo nipankaahu khalai. Vaavaa nnathokororyaahu muraakho ti muraakho, nnahaala woona mukhalelo malakiheryo a Piipiliya eneeraaya enikhaviherye ‘ocuwala ichu sa muculi’ ni ‘olipixerya wuupuwela ichu sa muhoolo.’—Fil. 3:13.

5. Muraakho taani Eklesiyaste 7:10 onanlopoleiye osepa?

⁵ Mwaalakhanye Eklesiyaste 7:10. Moone wi eversikulu ela henaloca wi ti yoonanara okoha oriki: “Ntakhara sheeni ichu soothene  sakhalayi saatepaaya oreera?” Wuupuwela ichu saphaama yoovaha enarweela wa Yehova. Ohiya yeeyo, eversikulu ela eni: “Ohikohe oriki: ‘Ntakhara sheeni ichu soothene sakhalayi saatepaaya oreera opwaha iha sa mutano?’” Mwawiihiiha, nnaphwanela okhalano ekaasoope wi nihilikanyiheke ilukuluku sakhalai ni iha samutano, ni wuupuwela wi ilukuluku sakhalai saatepa oreera opwaha iha samutano. Piipiliya mmoha mu eversikulu yeela olonce wi: “Ohikohe oriki ‘ntakhara heeni mahiku akhalai yaatempaaya oreeraxa opwaha ala amutano?’ Nla tahi nikoho na miruku.”

6. Ntakhara heeni ehiryaaya ya miruku otitelela wuupuwela wi okumi ahu waahikhala phaama khalai? Mvahe yootakiherya.

⁶ Ntakhara heeni ehiryaaya ya miruku otitelela wuupuwela wi ilukuluku sa khalai saatepa oreera? Wuupuwelaxa ichu sakhalai onamuneeriha wi pahiru nnuupuwela ichu sivinre. Nthowa nawi onamuneeriha wuupuwelaka pahiru ichu saphaama ohiya wuupuwelaka ichu soonanara nihoolenlaahu khalai. Muthokororye yootakiherya ya Aisarayeli akhalai. Emanle okhuma o Yikuputu, mwawaakuveya yaahicuwala mukhalelo yaahooxeyaaya weiwe. Pahiru awo yaatikitheryen’ye mu soolya seiho yaapuhaaya. Awo yaaloca: “OYiikuputu weiwo, naalya mahaleene! Vaari ehopa, mukhuulume, mawuryo, sapola a miloko-miloko ni aalyu.” (Nam. 11:5) Apwanne eparipari wi awo “yaalya mahaleene?” Hooye. Awo yaanahooxiwa moonanaraxa. Aisarayeli yaakhalihiwa ntoko akapuro o Yikuputu. (Muk. 1:13, 14; 3:6-9) Naamwi hiihaa, ohoolo waya yaacuwala ohooxeya weiwe nave epacerya wuupuwela ichu sa muculi. Awo yaathanla “wuupuwela ichu sakhalai” ohiya wuupuwela ichu saphaama seiho Yehova aapankeiye wa yaawo. Yehova haahakalanle ni muupuwelo aya.—Nam. 11:10.

7. Tiheeni yaamukhavihenrye murokora mmoha osepa muraakho wa wuupuwela ichu sa muculi?

⁷ Nni nsepe hai muraakho wa wuupuwela ichu sa muculi? Muthokororye yootakiherya ya murokora mmoha yoowo aapacenrye orumeela o Epeteli yo Brooklyn mu 1945. Mu iyaakha ohoolo waya owo aahipaka othela ni munna mmoha aarumeela tho Opeteli, nave oopiili yaahirumeela Opeteli mu iyaakha sincipale. Nyenya variyari va eyaakha ya 1970, iyawe aahipacerya wiiceliwa. Owo olonce wi vaavaa iyawe aasuwenleiye wi aahanle  vakhaani oyeleela okumi, aahimvaha mwaariye ekano yeeyo yaahaala omukhaviherya ovilela ni onaamukhweli. Munna owo aamuleela mwaariye ariki: “Naahikhalano othela woohakalaliha. Achu ancipale haniiwexexa othela woohakalaliha tiheeni.” Owo tho aamulopola mwaariye ariki: “Ohuupuweleke ichu sa muculi—eyo tiwi ohitikitheryeye mu seiho. Moovira wa elukuluku onahaala ocuwalaka vakhaani-vakhaani. Ohikhaleke oothananaxa naari wiiphwanyerya mathowa. Okhale oohakalala ni ilukuluku saphaama naaryaahuno nimurumeelaka Yehova. Wuupuwela ichu samuculi yoovaha ya Muluku wa hiyo.” Apwanne hamuneemererya wi ela yaari ekano yaphaama?

8. Murokora ahu aaphunre hai moorweela wa ohuupuwelaxa ichu sa muculi?

⁸ Murokora ahu aakhapelela masu yaala mmurimani mwawe. Owo aahimurumeela Yehova moororomeleya ophiyerya okhwa wawe arino iyaakha 92. Mu iyaakha sa muculi ahaakumve okhwa, owo aaloca: “Kaawehaka muculi mu iyaakha opwaha 63 kimalinhaaka mmuteko wa elukuluku yoothene kimurumeelaka Yehova, kinanwerya oloca wi kaahikhalano okumi woohakalaliha chiryene.” Ntakhara heeni? Owo oothariha: “Echu yeerinhe wi okumi aka okhale woohakalaliha chiryene, ti onnaahu weelapo yoothene ni ewehereryo ya okhala vamoha ni anna ni arokora ahu mu Parataiso veelaponi yavathi, nimurumeelaka Muhusiha ahu Mutokotoko, Muluku mmoharu eparipari Yehova, mu elukuluku yoohimala.” * Nnanwerya ohuserya sincipale orweela wa yootakiherya ya murokora yoola yoowo aatikitheren’ye mu soolaiherya sa Yehova ntakhara omwaahiyu!

9. Hiiha ntoko elociwaaya mu Onamukutxho 19:18, elukuluku taani onakhalaaya woovila wa hiyo ohikuha mathowa?

⁹ Mwaalakhanye Onamukutxho 19:18. Onamukhala woovila wa hiyo ohikuha mathowa xaxaxa wakhala wi muchu ene oniphunce munnihu a munroromeloni, nthamwene ahu, naari mmusi ahu. Ntoko yootakiherya, murokora mmoha aahootheryiwa ni murokora mukhwaawe a munroromeloni wi aahimwiiyerya ikhorowa sawe. Ohoolo  waya, murokora yoole aamoothenrye mukhwaawe aahiveka nikhurumuwelo, nyenya murokora ole ootheriwe aahititelela okuha mathowa ntakhara yeele eereliweiye. Apwanne nyuwo mohintoko wiisoona mmukhalelo yoola? Naamwi nihintonko ohoolela nikacamiho noolikana, ancipale a hiyo akhweya nnanwerya okuha mathowa ni wuupuwela wi hinrwa nimulevelela muchu yoowo onchekenle.

10. Tiheeni enahaala onikhaviherya ohikuha mathowa?

¹⁰ Tiheeni enahaala onikhaviherya ohikuha mathowa? Muupuwele ela, Yehova onnoona echu eri yoothene. Yehova onnoona nikacamiho nri noothene nnahoolelaahu, ophitaanyerya vaavaa nnakhalihiwaahu moohookololowa. (Ahe. 4:13) Owo onnathanana vaavaa nnahooxeyaahu. (Isa. 63:9) Nave owo onnaniroromeliha wi mu elukuluku aya onahaala oviihavo ichu soothene inatannya wiicela yoowo nnahoolelaahu.—Wup. 21:3, 4.

11. Ti mwawiihai nnaphuraahu mukhatiihu vaavaa nihinakuhaahu mathowa?

¹¹ Nnaphwanela tho wuupuwela wi vaavaa nihinakuhaahu mathowa ninnaphura mukhatiihu. Ela ti yeeyo murokora ahu ootheriwe aasuwenleiye. Moovira wa elukuluku, owo aahilakelela ohikuha mathowa. Owo aahisuwela wi vaavaa nnaakhurumuwelaahu akina, Yehova tho onnanikhurumuwela. (Mat. 6:14) Owo aahisuwela wi yeeyo murokora mukhwaawe aamweerenleiye yaari yoonanara, nyenya aahilakelela omukhurumuwela. Ntoko yookhumelela, murokora ahu aahikhala oohakalala ni otikitheryeya mu omurumeela Yehova.

12. Tiheeni nnahuseryaahu orweela mu 1 Yohani 3:19, 20?

¹² Mwaalakhanye 1 Yohani 3:19, 20. Mu ilukuluku ikina oothene ahu ninniiphwanyerya mathowa. Ntoko yootakiherya, akina anniiphwanyerya mathowa wa nthowa na ichu yaapankaaya ehaakumve ohuserya eparipari. Akina anniiphwanyerya mathowa wa nthowa na ichu apankaaya emanle opatisiwa. Moonelo ntoko yoola ti wawunlaana. (Aro. 3:23) Mweeparipari, ninnachuna weera yeeyo eri yawookololowa. Nyenya “ninnakwaculiwa oothene mu sincipale.” (Tiy. 3:2; Aro. 7:21-23) Naamwi moonelo wa wiiphwanyerya mathowa ohiri woohakalaliha, onanwerya okhala waphaama ntakhara hiyo. Ntakhara heeni? Nthowa nawi moonelo wa wiiphwanyerya mathowa onanwerya oneeriha opaka matorokelo mookumini ni okhala oolakelela ohikookela yoocheka nipankaahu.—Ahe. 12:12, 13.

13. Ntakhara heeni hanaphwanela wiiphwanyerya mathowa moopwahaxa?

¹³ Mwawiihiiha, nnawerya wiiphwanyeryaka mathowa moopwahaxa eyo tiwi—otitelela wiithananela naamwi ncharunwe nave tho Yehova ooniheryaka wi oonilevelela moomalela. Nyenya othanana ntoko yoola onanwerya okhala woopahula. (Sal. 31:10; 38:3, 4) Mwawiihai? Muthokororye yootakiherya ya murokora mmoha yoowo aatitelenle wiiphwanyerya mathowa ntakhara soocheka aapankeiye khalai. Owo ooloca: “Kaaniisoona wi nkaaphwanela olapa mwakuru mmuteko wa Yehova nthowa nawi akhweya nki kivuluwe.” Ancipale a hiyo nnawerya wiisoona mmukhalelo woolikana. Mwawiihiiha, nnaphwanela okhalano ekaasoope wi nihiiphwanyeryeke mathowa moopwahaxa. Ntakhara heeni? Nthowa nawi Satana onahaala okhala oohakalala wakhala wi noomaala omurumeela Yehova naamwi Yehova amanle onilevelela!—Mulikanyihe ni 2 Korinto 2:5-7, 11.

14. Nni nroromele hai wi Yehova onnachuna onikhurumuwela?

¹⁴ Nlelo akhweya nnamwiikoha, ‘Kini kiroromele hai wi Yehova okikhurumuwela?’ Waakhanle wi mohintoko wiipakela nikoho sintoko nenla, eyo enooniherya wi Yehova onanwerya wookhurumuwelaani. Mu iyaakha sincipale ivirale, Mulipeleli mmoha aaloca: “Akhweya nnanwerya wuuluulela yoocheka emohamoha, eyo enanwerya weereya nthowa nawi hiniwenrye ovootha sookhovelela soonanara naaryaahuno nihipacenrye omurumeela Muluku. . . . Nyenya nihiyeleele ewehereryo. Muhuupuwele wi moopaka yoocheka yeeyo Yehova aneereiye ahikhurumuwele.  Ela ti yeeyo Satana onachuneiye wi muupuweleke. Munnakhala oothanana ni awuukhuwa vaavaa munapakaanyu yoocheka yeela. Ela enooniherya wi tahi mwa muchu oonanara murima nave wi Yehova onanwerya wookhurumuwelaani, mukhale awiiyeviha nave mutitelele omveka Muluku wi ookhurumuweleeni ni woovahaani yawuupuxerya-ya-murima yaphaama, nave tho wi ookhaviheryeeni ohiya wuuluulela soocheka imohamoha. Mutitelele omwaacamela Muluku hiiha ntoko mwaana oneereiye ni atiithi awe moohiphwacha oyeva wa nikacamiho, nave Yehova onahaala wookhaviheryaani nthowa na oreera wawe murima otokotoko.” *

15-16. Akina yoonne hai vaavaa yaasuwenlaaya wi Yehova ohaakhurumuwela?

¹⁵ Achu ancipale a Yehova yaahihakararyeya nthowa na osuwela wi Yehova haahin’ye. Ntoko yootakiherya, mu iyaakha sivirale munna mmoha aahitannyeya murima ni mwaha mmoha wa makupa ani “A Bíblia Muda a Vida das Pessoas.” Mmwaha owo murokora mmoha aalonce wi nthowa na ichu soonanara aapankeiye khalai, uupuwela wi Yehova haahaala omusivelaka. Nave owo aahititelela owaniha ni moonelo yoola mu iyaakha sincipale naamwi aapatisiwe. Nyenya vaavaa murokora owo uupuweleleiye mwawiixeela vooloca sa mukucho wa woopola owo aahipacerya woona ichu mmukhalelo woohiyana. *

¹⁶ Yaweereya ela yaanvolowenle hai munna? Owo oorepa: “Vaavaa kaaryaaka mmiravo kaanawaniha ni yookhovelela ya woona epwitikiri. Nave hiihaanoru, kaahuuluulela yoocheka emohamoha. Kaahiveka nikhaviheryo wa atokweene nave kaahiilipixerya ovootha nikacamiho naka. Atokweene yaakikhaviherya ororomela wi Muluku onnakisivela nave wi ori ooreheryeya okimorela ikharari. Naamwiihiiha, mu ilukuluku ikina kaanakhala awuukhuwa nave kaaniisoona wi Yehova haki awerye okisivela. Waalakhanya yaweereya ya [murokora yoola] yaakikhaviherya chiryene. Vano koosuwela wi vaavaa kinuupuwelaaka wi Muluku hani awerye okilevelela, mmukhalelo mukina kinaloca wi mukucho wa woopola wa mwanawe honi owerye oxipiha soocheka saka. Kaahikhapelela mwaha yoola nave kaanaalakhanya ni wuupuwelela vaavaa moonelo wa wuukhuwa waakhumelelaaya.”

17. Murummwa Paulo aasempe hai muraakho wa wiiphwanyerya mathowa moopwahaxa?

 ¹⁷ Saweereya ntoko seiha sinnanuupuxerya yaweereya ya murummwa Paulo. Owo ahaakumve okhala Mukristu, aahipaka soocheka sincipale nave itokotoko. Paulo aanasuwela seiho aapankeiye khalai, nyenya haamaliha elukuluku yincipale uupuwelelaka seiho. (1 Tim. 1:12-15) Paulo aanasuwela wi aanwerya okhurumuweliwa orweela wa mukucho wa woopola nave tho wi mukucho wa woopola waari yoovaha ya Muluku ntakhara yene. (Gal. 2:20) Mwawiihiiha Paulo aahisepa wiiphwanyerya mathowa opwaha mphimo nave aatikitheryeya mu opaka sincipale ntakhara Yehova.

18. Tiheeni nihusenryaahu mmwaha yoola?

¹⁸ Tiheeni nihusenryaahu orweela wa othokororya miraakho seiho itharihiwe mmwaha yoola? (1) Wuupuwela ichu saphaama yoovaha yoorweela wa Yehova; nyenya moohipwacha mukhalelo okumi ahu waaryaaya phaama khalai, okumi ahu mu elapo evyaani onahaala okhala woophwanelela. (2) Akina ananwerya onnyeenyeiha, nyenya vaavaa nnathanlaahu okhurumuwela, nnanwerya otikitheryeya mu omurumeela Yehova hiihaano. (3) Wiiphwanyerya mathowa ntakhara ichu sa muculi onamuneeriha okhala oohihakalala vaavaa nnamurumeelaahu Yehova. Mwawiihiiha, moolikana ni Paulo, nnaphwanela ororomela wi Yehova oonikhurumuwela.

19. Nnasuwela hai wi mu elapo evyaani hinikhalaka awuukhuwa nthowa na ichu sa muculi?

¹⁹ Nookhalano ewehereryo ya okhala ni ekumi okhala wookhala. Nave mu elapo evyaani ya Muluku hinni nikhaleke a wuukhuwa ntakhara ichu sa muculi. Alocaka sa elukuluku yeeyo Piipiliya oriye: “Ichu sa khalayi hisuupuweleliwa tho.” (Isa. 65:17) Pahiru muupuwele ela: Ancipale a hiyo nohuuluvalela mmuteko wa Yehova, nyenya mu elapo evyaani, nnamukookela okhala amiravo. (Yobi 33:25) Mwawiihiiha, hankooni nikhale oolakelela, ohuupuwelela ichu sa muculi. Ohiya yeeyo, nnaphwanela otikitheryeya mu elapo evyaani ya omwaahiyu ni opaka soothene ophiyerya nnaweryelaahuvo wi nivolowe mu elapo yeeyo!