1-2. Kansi tingaseŵenzeshe tyani malangizo opezeka pa Miyambo 4:25? Fotokozani visanzo.

GANIZILANI visanzo ivi. Kalongosi wacikulile oganizila za vinthu viweme vecicita kuvuli. Olo kuti moyo wake ni wovuta lomba, yove opitilizhya kucita zaangakwanishe potumikila Yehova. (1 Akor. 15:58) Siku iliyonse oganizila kuti ali m’calo calomba pamozi na okondeka ŵake. Kalongosi muyakine okumbukila kuti ekhumudwishiwapo na Mkhristu muyake, koma osankha kupewa kuganizila ngako pa vinthu vamene ivo. (Akol. 3:13) Mkwasu okumbukila vinthu vecilakwisa kuvuli, koma pavuli pake oganizila vangacite kuti apitilizhye kutumikila Yehova mokhulupilika.​—Sal. 51:10.

² Kansi Akhristu aŵa olingana pa vinthu votyani? Onse okumbukila vinthu vecitika kale, koma oika lini maganizo pa vinthu vamene ivo. M’malomwake, menso ŵao ‘ololesha’ pasogolo.​—Ŵelengani Miyambo 4:25.

3. Ndaŵa yanji tufunika ‘kulolesha’ msogolo?

³ Ndaŵa yanji tufunika ‘kulolesha’ msogolo? Ngati munthu oyenda uku ololesha kuvuli, angaone lini zingacitike kusogolo. Izi n’zolingana na utumiki wasu kwa Yehova. Tingapitilizhye lini kutumikila Yehova na moyo wasu wonse ngati tupitilizhya kuganizila pa vinthu vecitika kuvuli.​—Luka 9:62.

4. Kansi tilaŵizhyane cinji m’nkhani ino?

⁴ M’nkhani ino, tilaŵizhyane vinthu vitatu vamene vingaticitishe kuganizila pa vinthu vecitika kuvuli. Vinthu ivi ni: (1) kuganizila ngako pa vinthu viweme veticitikila, (2) kusunga cakumkosi, na (3) kuziimba mlandu mopitilila malile. Pa mbali iliyonse, tione mwamene malangizo ya m’Baibo yangatiyavyile kuleka kuganizila pa “vinthu vakuvuli” noyamba kuika maganizo ŵasu pa “vinthu va msogolo.”​—Afil. 3:13.

5. Kansi Mlaliki 7:10 yulaŵila kuti tufunika kupewa cinji?

⁵ Ŵelengani Mlaliki 7:10. Onani kuti vesi iyi yulaŵila lini kuti ni kulakwa kukonsha kuti: “Ndaŵa yanji kale vinthu venze bwino kupambana masiku ŵano?” Kukumbukila vinthu vakuvuli ni mphaso yofumila kwa Yehova. M’malomwake yulaŵila kuti: “Usalaŵile kuti, ‘Ndaŵa yanji kale vinthu venze bwino ngako kupambana masiku ŵano?’” Tetyo, tufunika kupewa kulinganizhya mwawenzele umoyo kale na mwaulili lomba. Tufunika soti kupewa kuganiza kuti lomba vinthu vonse ni viipa polinganizhya na kale. Baibo iyakine yemasulila vesi iyi kuti: “Osakonsha kuti, ‘Ndaŵa yanji kale vinthu venze bwino ngako kupambana lomba?’ Ni kusoŵa nzelu kukonsha kukonsha iyi.”

6. Ndaŵa yanji n’cinthu lini ca nzelu kuganiza kuti moyo wenze bwino ngako kale kupambana lomba? Fotokozani cisanzo.

⁶ Ndaŵa yanji n’cinthu lini ca nzelu kuganiza kuti moyo wenze bwino ngako kale kupambana lomba? Kuganizila ngako vinthu viweme vecitika kuvuli, kungaticitishe kucepesha mavuto yetenzokumana nayo kale. Ganizilani cisanzo ca Aisiraeli. Pavuli pofuma ku Iguputo eluŵa kamangu umoyo wa mavuto wecipitamo. M’malomwake eika maganizo pa vakulya viweme veenzokulya. Ove elaŵila kuti: “Tukumbukila nsomba zamahala zatenzokulya ku Iguputo, nkhaka, mavwembe, adyo koma soti anyenzi wamitundumitundu!” (Num. 11:5) Koma kansi n’cendi kuti vakulya veenzokulya venze va “mahala”? Yai. Aisiraeli evutika ngako peenze akapolo ku Iguputo. (Eks. 1:13, 14; 3:6-9) Olo n’tetyo, eluŵa mavuto yonse yecikumana nayo noyamba kuganizila kuti vinthu venze luweme kuvuli. Esankha kuganizila ngako “vinthu viweme vakuvuli” m’malo moika nzelu zao pa vinthu viweme veciŵacitila Yehova. Tetyo, Yehova aliyosangalale na nkhalidwe yao.​—Num. 11:10.

7. Kansi n’cinji ceyavya kalongosi muyakine kupewa kuganizila ngako vinthu vakuvuli?

⁷ Kansi tingapewe tyani kuganizila ngako vinthu viweme vakuvuli? Ganizilani cisanzo ca kalongosi muyakine wamene eyamba kutumikila pa Beteli ya ku Brooklyn mu 1945. Pavuli pa vyaka, elunguliwa na mkwasu wamene  enzotumikila soti pa Beteli, ndipo etumikila pamozi kwa vyaka vinyinji. Koma mu 1976 mulume wake eyamba kulwala. Kalongosi uyu elaŵila kuti mulume wake pecizindikila kuti wasala patontho kumwalila, emupasa malangizo aweme amene emuyavya pavuli pakuti yove wamwalila. Emuuzhya kuti: “Tankhala na cikwati ca cimwemwe ngako. Anyinji aliyonkhaleko na cikwati coteti.” Koma enilimbikisha kuti, “N’cendi kuti ungaluŵe lini vinthu viweme vetecitila pamozi koma osaganizila ngako vinthu vamene ivo. M’kuluta kwa nthawi cisoni cako cikokuya cucepa. Osafooka kapena kumvwa cisoni na vinthu vekucitikila. Ukonkhala wosangala na vinthu viweme vetecita tikali pamozi potumikila Yehova. . . . Kukumbukila vinthu vakuvuli ni mphaso yofumila kwa Mulungu.” Aya enze malangizo aweme ngako.

8. Kansi kalongosi epindula tyani na malangizo yecimupasa mulume wake?

⁸ Kalongosi uyu ekonkha malangizo yecimupasa mulume wake. Yove etumikila Yehova mokhulupilika mpaka pecimwalila ali na vyaka 92. Pecisala patontho kumwalila, elaŵila kuti: “Nikaganizila pa vyaka 63 vanatumikila mu utumiki wanthawi zonse, ningalaŵile kuti nankhala na umoyo wokhutilisha.” Ndaŵa yanji? Yove efotokoza kuti: “Cupangisha moyo kunkhala wokhutilisha ni kunkhala mbali ya banja ya pacalo conse ya akwasu na azilongosi na kunkhala na ciyembekezo cakuyonkhala m’paladaiso notumikila Yehova pamozi mpaka kale kale.” * Tingaphunzile zinyinji kufumila kuli kalongosi uyu wamene enzoika maganizo ŵake pa malonjezo a Yehova.

9. Molingana na Levitiko 19:18, kansi ni panthawi yotyani pacingankhale covuta kukhululukila munthu wamene etikhumudwisha?

⁹ Ŵelengani Levitiko 19:18. Nthawi ziyakine tingavutike kukhululukila Mkhristu muyasu, shamwali wasu olo wa banja wasu wamene watikhumudwisha. Mwacisanzo, kalongosi muyakine emutalizhyila wenye kuti eiŵa ndalama za  kalongosi muyakine. Pavuli pake kalongosi wamene emutalizhyila wenye epepesa. Olo n’tetyo, kalongosi elakwiliwa epitilizhya kuganizila pa vinthu vecimucitila. Kansi namwe mwemvwapo teti? Nangu kuti tingakumane lini na cocitika colingana na ici, anyinji a seo temvwapo kale kuti tingakwanishe lini kukhululukila munthu etikhumudwisha.

10. Kansi n’cinji cingatiyavye ngati takhumudwishiwa?

¹⁰ Kansi n’cinji cingatiyavye ngati takhumudwishiwa? Tufunika kukumbukila kuti Yehova oona ciliconse. Oziŵa mavuto yatupitamo, kuyangizhyilapo vinthu viliye cilungamo vuticitikila. (Aheb. 4:13) Yove akumvwa caipa ngati seo tuvutika. (Yes. 63:9) Ndipo otilonjeza kuti akafumyepo viipa vonse vamene vucitika cifukwa cosoŵa cilungamo.​—Chiv. 21:3, 4.

11. Kansi tupindula tyani ngati tukhululukila ayakine?

¹¹ Tufunika soti kukumbukila kuti ngati takhululukila munthu muyakine, tunkhala osangalala. Umu niye mwecimvwila kalongosi watomolewa mu ndime 9. M’kuluta kwa nthawi, yove esankha kukhululukila kalongosi wamene emutalizhyila wenye. Ezindikila kuti ngati tukhululukila ayakine, Yehova naye otikhululukila. (Mat. 6:14) Yove eziŵa kuti zecicita kalongosi zenze ziipa, koma esankha kumukhululukila. Zofumapo zake zenze zakuti kalongosi wasu enkhala wosangalala cakuti ekwanisha kuika maganizo ŵake pa kutumikila Yehova.

12. Kansi pa lemba ya 1 Yohane 3:19, 20 tuphunzilapo cinji?

¹² Ŵelengani 1 Yohane 3:19, 20. Tonse tukonda kuziimba mlandu nthawi ziyakine. Mwacisanzo, ayakine oziimba mlandu cifukwa ca vinthu vecicita akaliyophunzila cendi. Ayakine oziimba mlandu cifukwa ca vinthu vecilakwisa pavuli pobatizika. (Aro. 3:23) N’cendi kuti nthawi zonse tufuna kucita zinthu zoyenela. Koma “tonse tulakwisa nthawi zinyinji.” (Yak. 3:2; Aro. 7:21-23) Olo kuti tusangalala lini na kuziimba mlandu, nthawi ziyakine kungatipindulishe. Motyani? Cifukwa kuziimba mlandu kungatiyavye kuti tikonze zinthu zetelakwisa nosimikizhya kuti tikawezhyepo lini soti.​—Aheb. 12:12, 13.

13. Ndaŵa yanji tufunika kupewa kuziimba mlandu mopitilila malile?

¹³ Nthawi ziyakine, tingapitilizhye kuziimba mlandu mopitilila malile nangu pavuli pakuti talapa ndipo Yehova watikhululukila. Kuziimba mlandu koteti kungationonge. (Sal. 31:10; 38:3, 4) Ndaŵa yanji? Ganizilani cisanzo ca kalongosi wamene eziimba mlandu cifukwa ca macimo yecicita kale. Yove eciti: “Nenzozimvwa kuti zenenzocita potumikila Yehova ziliye pindu cifukwa cakuti payakine nikapulumuke lini.” Anyinji a seo tingamvwe cimozimozi monga ni mwecimvwila kalongosi uyu. Tetyo, tufunika kunkhala osamala mwa kupewa kuziimba mlandu mopitilila malile. Ndaŵa yanji? Cifukwa Satana angakondwele ngako ngati taleka kutumikila Yehova wamene otikonda.​—Linganizhyani na 2 Akorinto 2:5-7, 11.

14. Kansi tingaziŵe tyani kuti Yehova akalutikonda?

¹⁴ Payakine tingazikonshe kuti, ‘Kansi ningaziŵe tyani kuti Yehova akalunikonda?’ Kuzikonsha konsho iyi, kuonesha kuti Yehova angatikhululukile. Vyaka vinyinji kuvuli, Nsanja ya Olonda yelaŵila kuti: “Nthawi ziyakine tingolakwisa cinthu cimozi na cimozi cifukwa cokangiwa kuleka nkhalidwe yetenze nayo tikaliyoyamba kutumikila Yehova. . . . Musataye mtima koma soti osaganiza kuti cimo yanu ingakhululukiwe lini. Satana ofuna kuti mukoganiza kuti Yehova angakukhululukileni lini. Ngati mukumvwa caipa nocita cisoni pa vinthu vemwelakwisa, zuonesha kuti nimwe lini munthu muipa wakuti  Yehova angamukhululukileni lini. Musaŵeŵe kusenga Yehova molicefya na moona mtima kuti akukhululukileni nokuyavyani kunkhala na cikumbumtima cituŵa. Monga ni mwakucitila mwana kuluta kwa ausuwake mowelezhyawelezhya pa vuto imozi na imozi, namwe mukosenga Yehova kuti akuyavyeni cifukwa yove ni muweme mtima.” *

15-16. Kansi ayakine ecimvwa tyani pecizindikila kuti Yehova akaluŵakonda?

¹⁵ Atumiki a Yehova anyinji otonthozewa cifukwa cozindikila kuti Yehova akaluŵakonda. Mwacisanzo, vyaka vakuvuli mkwasu muyakine elimbikishiwa na cisanzo ceciŵelenga mu Nsanja ya Olonda m’nkhani zakuti “Baibulo Limasintha Anthu.” M’nkhani iyi kalongosi muyakine elaŵila kuti, cenze covuta kuli yove kukhulupilila kuti Yehova angamukonde cifukwa ca vinthu viipa vecicita. Epitilizhya kumvwa teti olo pavuli pobatizika. Olo tetyo, pavuli poganizila ngako za dipo, eyamba kukhulupilila kuti Yehova omukonda. *

¹⁶ Kansi zecikumana nazo kalongosi uyu zemuyavya tyani mkwasu? Yove elemba kuti: “Penenze mtontho, nenzokonda kutamba vithunzithunzi voonesha cinthaku, ndipo cenze covuta kuti nileke. Calombapano newelezhya soti kutamba zamene izi. Tetyo nesenga akulu kuti aniyavye ndipo nuyesayesa kugonjesa vuto iyi. Akulu enisimikizhyila kuti Mulungu onikonda ndipo ofunishisha kunikhululukila. Nangu n’tetyo, nthawi ziyakine nuzimvwa kuti n’ne watyalatyala cakuti Yehova anganikonde lini. Koma kuŵelenga cisanzo ca [kalongosi uyu] kweniyavya ngako. Nezindikila kuti ngati nuganiza kuti Yehova anganikhululukile lini, niye kuti nutanthauza kuti nsembe ya mwana wake ingakwanishe lini kuphimba macimo ŵangu. Nejuŵa kambali ka nkhani yamene iyi kuti nikokaŵelenga nosinkhasinkha ngati nayamba kumvwa kuti n’ne watyalatyala.”

17. Kansi n’cinji ceyavya mtumwi Paulo kuleka kuziimba mlandu?

¹⁷ Zocitika zoteti zutikumbusha zecitikila mtumwi Paulo. Akaliyonkhala Mkhristu ecita macimo akulu ngako. Paulo enzokumbukila  vecicita, koma yove enzoika lini maganizo ŵake pa vinthu vamene ivo. (1 Tim. 1:12-15) Enzokhulupilila kuti Yehova angamukhululukile cifukwa ca nsembe ya dipo, ndipo enzoona kuti dipo ni mphaso yofumila kwa Mulungu. (Agal. 2:20) Tetyo, Paulo eleka kuziimba mlandu, m’malomwake eika maganizo ŵake pa kutumikila Mulungu.

18. Kansi taphunzila cinji m’nkhani ino?

¹⁸ Kansi taphunzilanji pa vinthu vingatikangishe kuika maganizo pa vinthu va msogolo vatalaŵizhyana m’nkhani ino? (1) Kukumbukila vinthu viweme vakale ni mphaso yofumila kwa Yehova; koma olo kuti vinthu venze bwino kale, vingapambane lini mwati vikankhalile m’calo calomba. (2) Ŵanthu ayakine angatikhumudwishe, koma ngati taŵakhululukila zutiyavya kuika maganizo pa kutumikila Yehova. (3) Kuziimba mlandu mopitilila malile kungaticitishe kuleka kutumikila Yehova mwacimwemwe. Tetyo, molingana na Paulo, tufunika kukhulupilila kuti Yehova etikhululukila.

19. Tuziŵa tyani kuti m’calo calomba tikokumbukila lini vinthu viipa vakale?

¹⁹ Tili na ciyembekezo cakuyonkhala na moyo kosasila. Ndipo tikayonkhala m’calo calomba tikokumbukila lini vinthu viipa vakale. Ponena za nthawi yamene iyo, Baibo yulaŵila kuti: “Vinthu vakale vikakumbukiliwe lini soti.” (Yes. 65:17) Ganizilani tyala: Ayakine a seo takulukazhya potumikila Yehova, koma m’calo calomba tikankhale soti acilumbwana. (Yobu 33:25) Tetyo, tiyeni tinkhale osimikizhya kupewa kuika maganizo pa vinthu vakuvuli. M’malomwake, tiyeni tikoika maganizo ŵasu pacalo calomba nocita zonse zatingakwanishe kuti tikankhalemo.