1-2. Re ka diriša bjang keletšo yeo e lego go Diema 4:25? Nea mohlala.

NAGANA ka mehlala ye e meraro. Kgaetšedi yo a godilego o nagana ka bophelo bja gagwe bjo bo kgahlišago bja nakong e fetilego. Le ge gona bjale bophelo bo se bonolo, o sa dutše a direla Jehofa sohle seo a ka se kgonago. (1 Bakor. 15:58) Ka mehla o ipona a le paradeiseng le ba gabo le bagwera ba gagwe. Kgaetšedi yo mongwe o gopola gore Mokristegotee le yena o ile a mo dira selo se se kwešago bohloko kudu, eupša o ile a kgetha go se dule a nagana ka selo seo. (Bakol. 3:13) Ngwanabo rena o gopola diphošo tšeo a ilego a di dira, eupša ga bjale o leka go dira sohle seo a ka se kgonago gore a dule a botegela Jehofa.—Ps. 51:10.

² Ke’ng seo Bakriste ba ba bararo ba swanago ka sona? Ka moka ga bona ba gopola dilo tšeo di ilego tša direga maphelong a bona, eupša ga ba dulele go nagana ka dilo tšeo. Go e na le moo, ba dula ba ‘lebeletše pele’ lefaseng le lefsa.—Bala Diema 4:25.

3. Ke ka baka la’ng re swanetše go ‘lebelela pele’ lefaseng le lefsa?

³ Ke ka baka la’ng go le bohlokwa go ‘lebelela pele’ lefaseng le lefsa? Ka gobane motho yo a dulelago go lebelela morago ge a sepela, a ka se sepele gabotse. Se se swana le tsela yeo re hlankelago Jehofa ka yona. Re ka se kgone go hlankela Jehofa gabotse ge re duletše go nagana ka dilo tšeo re ilego ra di dira goba tša re diragalela.—Luka 9:62.

4. Re tlo ithuta’ng sehlogong se?

⁴ Sehlogong se re tlo ithuta ka dilo tše tharo tšeo di ka dirago gore re dule re naganne ka dilo tša nakong e fetilego. Dilo tšeo ke go duma ge nkabe bophelo bja rena bo se bja fetoga, go se lebalele ba bangwe le go dula o ikwa o le molato ka mo go feteletšego. Go se sengwe le se sengwe sa dilo tše, re tlo bona kamoo melao ya motheo ya Beibele e tlago go re thuša gore re se ke ra  dulela go lebelela “dilo tša morago” eupša re lebelele “dilo tša pele.”—Bafil. 3:13.

5. Mmoledi 7:10 e re lemoša gore ke’ng seo re sego ra swanela go se dira?

⁵ Bala Mmoledi 7:10. Temana ye ga e re ke phošo go botšiša gore: “Go re’ng mehla ya pele e be e kgahliša?” Go gopola ka dilo tše dibotse tša nakong e fetilego ke mpho e tšwago go Jehofa. Eupša temana ye e re: “O se ke wa re: ‘Go re’ng mehla ya pele e be e phala ya bjale?’” Ga se ra swanela go bapetša bophelo bja nakong e fetilego le bja gona bjale ke moka ra nagana gore ga go sa na seo se sepelago gabotse. Beibele e nngwe e fetoletše lengwalo le la Mmoledi 7:10 ka gore: “O se ke wa botšiša gore, ‘Ke ka baka la eng matšatši a kgale e be e le a mabotse go feta a gona bjale?’ Gobane ga se bohlale go botšiša seo.”

6. Ke ka baka la’ng e se gabohlale go dula re nagana gore bophelo bja rena bja nakong e fetilego bo phala bja gona bjale? Nea mohlala.

⁶ Ke ka baka la’ng e se gabohlale go dulela go nagana gore bophelo bja rena bja nakong e fetilego bo phala bja gona bjale? Ge re dulela go nagana ka dilo tša nakong e fetilego, re ka no nagana feela ka dilo tše dibotse. Re ka lebala ka dilo tša go se kgahliše tšeo di ilego tša direga. Nagana ka mohlala wa Baisiraele. Ka morago ga gore ba tšwe Egipita, ba ile ba lebala kapejana gore Baegipita ba be ba se ba ba swara gabotse. Go e na le moo, ba ile ba no gopola dijo tše dibose tšeo ba bego ba di thabela. Ba ile ba re: “Re gopola hlapi yeo re bego re eja kua Egipita re fo e hwetša feela, le diphara, magapu, diliki, dieie le konofolo.” (Num. 11:5) Eupša na ruri dijo tšeo ba be ba di hwetša mahala? Aowa. Baisiraele ba be ba sa di hwetše mahala, ka gobane ka nako yeo e be e le makgoba a Baegipita bao ba bego ba ba gateletše. (Ek. 1:13, 14; 3:6-9) Eupša ba ile ba lebala gore ba be ba gateletšwe, ba duma go boela morago. Ba ile ba kgetha go no nagana ka dilo tše dibotse tša Egipita, ba lebala ka dilo tše dibotse tšeo Jehofa a bego a sa tšwa go ba direla tšona. Jehofa ga se a ka a thabišwa ke tsela yeo ba bego ba nagana ka yona.—Num. 11:10.

7. Ke’ng seo se ilego sa thuša kgaetšedi yo mongwe gore a se ke a dulela go nagana gore bophelo bja gagwe bja nakong e fetilego bo phala bja gona bjale?

 ⁷ Re ka thušwa ke’ng gore re se ke ra dulela go nagana ka dilo tša nakong e fetilego? Nagana ka mohlala wa kgaetšedi yo a ilego a thoma go hlankela Bethele ya Brooklyn ka 1945. Ka moragonyana o ile a nyalana le ngwanabo rena yoo le yena a bego a le Bethele, ke moka ba tšwela pele ba hlankela moo Bethele ka mengwaga e mentši. Eupša ka 1976 monna wa gagwe o ile a thoma go babja. Kgaetšedi yo o re ka morago ga gore monna wa gagwe a lemoge gore neng le neng a ka no hlokofala, o ile a mo nea keletšo e botse ya gore a ka lebeletšana bjang le mathata a go ba mohlologadi. O ile a re go yena: “Re bile le lenyalo le le thabišago. Batho ba bantši ga se ba ka ba latswa seo.” O ile a mmotša le gore: “O ka se lebale dilo tše dibotse tšeo re ilego ra di dira, eupša o se ke wa phelela go nagana ka dilo tšeo. O tla ba kaone ge nako e dutše e eya. O se ke wa dula o nyamišitšwe ke seo se go diragaletšego. Go e na le moo, thabišwa ke gore re kgonne go hlankela Jehofa re le mmogo. . . . Go gopola ka dilo tša nakong e fetilego tše di kgahlišago, ke mpho yeo e tšwago go Jehofa.” Ruri ye e be e le keletšo e botse kudu!

8. Kgaetšedi yoo o ile a holwa bjang ke go theetša keletšo ya monna wa gagwe?

⁸ Kgaetšedi yoo o ile a theetša keletšo ya monna wa gagwe. O ile a hlankela Jehofa le go mmotegela go fihlela a hlokofala a na le mengwaga e 92. Mengwaganyana pele a ka hlokofala o ile a re: “Ge ke lebeletše mengwaga e 63 yeo ke e feditšego ke hlankela Jehofa ke le tirelong ya nako e tletšego, ruri ga ke belaele gore ke phetše bophelo bjo bo kgahlišago kudu.” Ka baka la’ng? O hlalositše gore: “Re ka kgona go phela bophelo bjo bo thabišago ka gobane re le karolo ya lapa le le kgahlišago la bana babo rena le dikgaetšedi, e bile re na le kholofelo ya go tlo phela le bona lefaseng la paradeise re hlankela Mmopi wa rena yo Mogolo e lego Jehofa ka mo go sa felego.” * Re ka ithuta mo gontši mohlaleng wa kgaetšedi yo yoo a bego a lebeletše pele dilong tšeo Jehofa a re tshepišitšego tšona!

9. Go ya ka Lefitiko 19:18, ke neng mo go ka bago thata go lebalela motho yo a go kwešitšego bohloko?

⁹ Bala Lefitiko 19:18. Ka dinako tše dingwe go ka ba thata go lebalela motho yo a go kwešitšego bohloko ge e ba e le wa ka phuthegong, e le mogwera wa gago goba e le wa geno. Ka mohlala, kgaetšedi yo mongwe o ile a latofatša kgaetšedi yo mongwe gore o mo utsweditše tšhelete. Ka moragonyana o ile a lemoga gore e be e se ya utswa ke kgaetšedi yoo ke moka a mo kgopela tshwarelo. Eupša kgaetšedi yoo ba bego ba re o utswitše tšhelete o be a kgopišegile kudu e bile a sa kgaotše go nagana ka taba yeo. Na o kile wa ikwa go swana le kgaetšedi yo? Le ge re se ra ka ba ra ba boemong bjo bo swanago le bjo, bontši bja rena re kile ra ikwa eka re ka se tsoge re lebaletše bao ba ilego ba re kweša bohloko.

10. Re ka thušwa ke’ng ge re ikwa eka re ka se tsoge re lebaletše ba bangwe?

¹⁰ Ke’ng se se ka re thušago ge re ikwa eka re ka se tsoge re lebaletše ba bangwe? Re swanetše go gopola gore Jehofa o bona dilo ka moka. O kgona go bona dilo ka moka tšeo di re diragalelago, go akaretša le ge ba bangwe ba sa re sware gabotse. (Baheb. 4:13) O kwa bohloko ge re tlaišega. (Jes. 63:9) E bile o re tshepiša gore mafelelong o tlo tloša dilo ka moka tšeo di re kwešago bohloko.—Kut. 21:3, 4.

11. Re holega bjang ge re lebalela ba bangwe?

¹¹ Re swanetše go gopola gore ge re lebalela ba bangwe le rena re a holega. Se ke seo kgaetšedi yo a ilego a latofatšwa gore o utswitše tšhelete a ithutilego sona. Ge nako e dutše e eya, kgaetšedi yo o ile a lebalela kgaetšedi yo a ilego a re o utswitše tšhelete. O ile a gopola gore ge re lebalela ba bangwe Jehofa le yena o a re lebalela. (Mat. 6:14) O be a tseba gore seo kgaetšedi yo a mo dirilego sona se be se fošagetše, eupša o ile a kgetha go mo lebalela. Mafelelong kgaetšedi yo o ile a thaba, ke moka a kgona go hlankela Jehofa a sa šitišwe ke selo.

12. Re ithuta’ng go Johane wa Pele 3:19, 20?

¹² Bala 1 Johane 3:19, 20. Ka moka ga rena re fela re ikwa re le molato. Ka mohlala, ba bangwe ba ikwa ba le molato ka baka la dilo tšeo ba ilego ba di dira pele ba ka ithuta therešo. Ba bangwe ba ikwa molato ka baka la diphošo tšeo ba ilego ba di dira ka morago ga gore ba kolobetšwe. Batho ba bantši ba fela ba ikwa bjalo. (Baroma 3:23) Ke therešo gore re nyaka go dira dilo tše di lokilego, eupša “re kgopša gantši.” (Jak. 3:2; Baroma 7:21-23) Le ge go sa thabiše go ikwa re le molato, ka dinako tše dingwe go ka re hola. Ka baka la’ng? Ka gobane go ikwa o le molato go ka go thuša gore o dire diphetogo bophelong gomme o ikemišetše go se sa bušeletša diphošo tšeo o ilego wa di dira.—Baheb. 12:12, 13.

13. Ke ka baka la’ng re se ra swanela go dulela go ikwa molato ka mo go feteletšego?

¹³ Go a kgonega go no dula o ikwa molato ka mo go feteletšego le ge o itshotše gomme Jehofa a go lebaletše. Go ikwa molato ka tsela yeo go kotsi. (Ps. 31:10; 38:3, 4) Ka baka la’ng? Nagana ka mohlala wa kgaetšedi yo a ilego a dula a ikwa molato ka baka la diphošo tšeo a ilego a di dira. O itše: “Ke bona go se bohlokwa go šoma ka thata go hlankela Jehofa ka gobane nka no se phologe.” Ba bantši ba rena re ka ikwa go swana le kgaetšedi yo. Ka baka leo go bohlokwa gore re se ke ra ikwa molato ka mo go feteletšego. Sathane o tlo thaba kudu ge re ka tlogela go hlankela Jehofa, le ge Jehofa a sa re rata goba a re lebaletše.—Bapiša le 2 Bakorinthe 2:5-7, 11.

14. Re tseba bjang gore Jehofa o nyaka go re lebalela?

¹⁴ Re ka ipotšiša gore: ‘Nka tseba bjang gore Jehofa o sa nthata e bile o nyaka go ntebalela?’ Ge e ba o ipotšiša potšišo ye, se se bontšha gore go a kgonega gore Jehofa a go lebalele. Mengwageng e mentši e fetilego Morokami o mongwe o ile wa bolela gore: “Re ka bušeletša phošo e tee gantši le gantši. Se se ka dirwa ke gore  ga se ra ka ra kgona go tlogela bofokodi bjo re bego re dutše re na le bjona pele re ka hlankela Modimo. . . . O se ke wa fela matla. O se ke wa nagana gore o dirile sebe seo Jehofa a ka se tsogego a go lebaletše sona. Sathane o nyaka gore o nagane ka tsela yeo. Ge o ikwa o nyamišwa ke diphošo tšeo o di dirago, seo se bontšha gore ga se wena motho yo mobe e bile Jehofa a ka kgona go go lebalela. Ikokobetše gomme o kgopele Jehofa ka thapelo gore a go lebalele, se se tla go thuša gore o be le letswalo le le hlwekilego gomme o se ke wa bušeletša diphošo tšeo o kilego wa di dira. Go no swana le ge ngwana a eya go tatagwe ge a le mathateng, le wena eya go Jehofa. Ngwana ga a tšhabe go kgopela tatagwe gore a mo thuše ka bothata bjo itšego gantšinyana. Le wena dula o kgopela thušo go Jehofa, ka baka la botho bja gagwe bjo bogolo o tla go thuša.”

15-16. Ba bangwe ba ile ba ikwa bjang ge ba be ba thoma go kwešiša gore Jehofa o sa ba rata e bile a ka ba lebalela?

¹⁵ Ba bantši ba bahlanka ba Jehofa ba ile ba kgothatšwa ke go tseba gore Jehofa o sa ba rata e bile a ka ba lebalela. Ka mohlala, mengwageng e fetilego go ile gwa ba le phihlelo ya kgaetšedi yo mongwe go se sengwe sa dihlogo tša “Beibele e Fetoša Maphelo.” Sehlogong seo kgaetšedi yoo o ile a re go be go se bonolo go dumela gore Jehofa a ka mo rata ka baka la dilo tše mpe tšeo a bego a kile a di dira. O ile a ikwa ka tsela yeo le ka morago ga mengwaga e mentši a kolobeditšwe. Eupša ka morago ga gore a naganišiše ka mo go tseneletšego ka sehlabelo sa Jesu sa topollo, o ile a kgona go bona gore Jehofa o a mo rata. *

¹⁶ Phihlelo ya gagwe e ile ya thuša bjang ngwanabo rena yo mongwe? Ngwanabo rena yoo o ngwadile gore: “Ge ke be ke sa le mofsa ke be ke lemaletše go bogela diswantšho tša batho ba sa aparago. Ke sa tšwa go bušeletša go di bogela gape. Ke ile ka kgopela thušo go bagolo, gomme seo se ile sa nthuša go fenya bothata bjoo bja ka. Bagolo ba ile ba nthuša go bona gore Jehofa o a nthata e bile o nyaka go ntebalela. Ka dinako tše dingwe ke sa fela ke ikwa ke se na mohola e bile ke bona eka Jehofa ga a nthate. Go bala phihlelo [ya kgaetšedi yoo] go ile gwa nthuša kudu. Ga bjale ke ithutile gore ge ke re Modimo a ka se tsoge a ntebaletše, ke ra gore sehlabelo sa Morwa wa gagwe ga se sa lekana go lebalela dibe tša ka. Ke ntšhitše letlakala la phihlelo  yeo gore ke kgone go e bala nako le nako ge ke ikwa eka Jehofa ga a nthate e bile a ka se tsoge a ntebaletše.”

17. Moapostola Paulo o ile a thušwa ke’ng gore a se ke a dulela go ikwa molato ka mo go feteletšego?

¹⁷ Diphihlelo tša go swana le tše di re gopotša ka moapostola Paulo. Pele e ka ba Mokriste, o ile a dira dilo tše dintšinyana tše mpe. Paulo o be a gopola dilo tše mpe tšeo a ilego a di dira eupša ga se a dulela go nagana ka tšona. (1 Tim. 1:12-15) O be a lebelela sehlabelo sa Jesu sa topollo e le mpho yeo Jehofa a mo neilego yona. (Bagal. 2:20) Paulo ga se a ka a dulela go ikwa a le molato ka mo go feteletšego eupša o ile a tšwela pele a dira sohle seo a ka se kgonago go hlankela Jehofa.

18. Re ithutile’ng sehlogong se?

¹⁸ Re ithutile eng sehlogong se? Re ithutile gore go nagana ka dilo tše dibotse tša nakong e fetilego ke mpho e tšwago go Jehofa. Le ge re ile ra phela bophelo bjo bo kgahlišago nakong e fetilego, lefaseng le lefsa re tlo thabela bophelo le go feta. Re ithutile le gore ba bangwe ba ka re kweša bohloko, eupša ge re ka kgetha go ba lebalela re tla tšwela pele re hlankela Jehofa gabotse gona bjale. Le gona go dula re ikwa re le molato ka mo go feteletšego go ka re šitiša go hlankela Jehofa re thabile. Ka gona, go swana le Paulo re swanetše go dumela gore Jehofa o re lebaletše.

19. Re tseba bjang gore lefaseng le lefsa re ka se sa gopola dilo tšeo di re nyamišago?

¹⁹ Re na le kholofelo ya go tlo phela ka mo go sa felego. Ge re tla be re phela lefaseng le lefsa, re ka se sa gopola selo le ge e le sefe seo se re nyamišago. Beibele ge e bolela ka nako yeo e re: “Dilo tša pele di ka se sa gopolwa.” (Jes. 65:17) Nagana ka se: Ba bangwe ba tšofetše ba dutše ba hlankela Jehofa, eupša lefaseng le lefsa ba tlo boela bofseng bja bona. (Jobo 33:25) A re ikemišetšeng go se dule re nagana ka bophelo bja nakong e fetilego. Eupša anke re duleng re lebeletše pele lefaseng le lefsa gomme re dire sohle seo re ka se kgonago gore re tle re kgone go phela moo!