1-2. Nitubaasa kukuratira tuta obuhabuzi oburi omu Enfumu 4:25? Ha eky’okureeberaho.

TEEKATEEKA aha mbeera ezi. Munyaanyazi-itwe omukaikuru naateekateeka aha mbeera ze nungi ez’enyima. N’obu araabe aine amagara mabi hati, naagumizamu naaheereza Yehova nk’oku arikubaasa. (1 Kor. 15:58) Buri izooba naateera akashushani we n’abakundwa be bari hamwe omu nsi ensya. Munyaanyazi-itwe ondiijo naijuka ngu mugyenzi we akamukora kubi, kwonka naacwamu kutaguma aine enziika. (Kol. 3:13) Ow’eishe-emwe naamanya gye enshobe ze ez’enyima, kwonka naata omutima aha kuguma ari omwesigwa hati na nyentsya.​—Zab. 51:10.

² Mbwenu shi Abakristaayo abo bonshatu nibashushanisa ki? Boona nibaijuka ebyababaireho enyima, kwonka tibyo barikuguma nibateekateekaho. Omu mwanya gw’ekyo ‘nibareebera kimwe omumaisho’ aha bya nyentsya.​—Shoma Enfumu 4:25.

3. Ahabw’enki twine ‘kureebera kimwe omumaisho’ aha bya nyentsya?

³ Ahabw’enki ni kikuru ‘kureebera kimwe omumaisho’ aha bya nyentsya? Nk’oku omuntu atarikubaasa kushoronzya ebigyere bye yaaba naagyenda arikureeba enyima, titurikubaasa kugumizamu nituheereza gye Yehova, butoosha twaguma nitureeba eby’enyima ebi twarabiremu.​—Luk. 9:62.

4. Nituza kushwijuma ki omu kicweka eki?

⁴ Omu kicweka eki, nituza kureeba emitego eshatu erikubaasa kutureetera kuta omutima aha by’enyima. * Niyo egi: (1) okwegomba  eby’enyima, (2) enziika, (3) n’okweshinja ekirenga. Omu buri mbeera, nituza kureeba oku emisingye ya Baibuli erikubaasa kutuhwera kwetantara kuta omutima aha ‘by’enyima,’ kureka okukununkirira “eby’omumaisho.”​—Fil. 3:13.

5. Omubuurizi 7:10 nihaturabura ahari mutego ki?

⁵ Shoma Omubuurizi 7:10. Yetegyereze ngu ekyahandiikirwe eki tikirikugira ngu kigwire kubuuza oti: ‘Ahabw’enki ebiro bya ira byabaire biri birungi?’ Okwijuka ebintu birungi n’ekiconco kuruga ahari Yehova. Omu mwanya gw’ekyo, nikigira ngu ‘otagira oti: Ahabw’enki ebiro bya ira nibihita ebya hati?’ Ekirikumanyisa ngu, omutego guri omu kugyeragyeranisa embeera ez’enyima n’eza hati, reero okahendera orikugira ngu embeera eza hati ni mbi munonga. Envunuura ya Baibuli endiijo neegira eti: “Otaribuuza oti, ‘Ai, ahabw’enki ebintu byabaire biri birungi munonga omu biro bya ira?’ Ti ky’obwengye kubuuza otyo.”

6. Ahabw’enki kitari ky’obwengye kuguma nituteekateeka ngu embeera zaitu ez’enyima zikaba nizihita eza hati? Ha eky’okureeberaho.

⁶ Ahabw’enki kitari ky’obwengye kuteekateeka ngu embeera zaitu ez’enyima zikaba nizihita eza hati? Okwegomba eby’enyima nikibaasa kutureetera kwijuka eby’enyima ebirungi byonka. Nari nikibaasa kutureetera kwehuzya oburemeezi obu twabaire niturabamu. Nk’eky’okureeberaho, teekateeka aha Baisraeli aba ira. Bwanyima y’okuruga Misri, ahonaaho bakeebwa embeera zigumire ezi baabaire nibarabamu. Omu mwanya gw’ekyo, bakata omutima aha by’okurya birungi ebi baabaire nibarya. Bakagira bati: ‘Nitwijuka eby’enyanja, ebi twabaire nituriira busha, tukiri omuri Misri, emyongo, ebihaaza, obutunguru bw’ebibabi, n’obw’ebitakuri, na katunguricumu.’ (Kub. 11:5) Kwonka shi buzima eby’okurya ebyo bakabirya buhooro? Ngaaha. Abaisraeli bakaba nibabonabonesibwa barikubaitsa omwaga obwo bari abahuuku omuri Misri. (Kur. 1:13, 14; 3:6-9) Kwonka, bwanyima bakeebwa embeera zigumire ezo baayegomba eby’enyima. Bakacwamu kuta omutima  aha ‘biro birungi ebya ira’ omu mwanya gw’ebintu birungi ebi Yehova yaabaire abakoreire. Yehova tarasiimire emiteekateekyere yaabo.​—Kub. 11:10.

7. Niki ekyahwereire munyaanyazi-itwe kwetantara omutego gw’okwegomba eby’enyima?

⁷ Nitubaasa kwetantara tuta omutego gw’okwegomba eby’enyima? Yetegyereze eky’okureeberaho kya munyaanyazi-itwe owaatandikire kuheereza aha Beseeli Brooklyn omuri 1945. Bwanyima y’emyaka, akaza omu bushwere n’Omubeseeli mugyenzi we, kandi bakaheerezayo hamwe kumara emyaka mingi. Kwonka, omu myaka ya 1970, iba akarwara. Naagira ngu iba ku yaamanyire ngu ari haihi kufa, akamuha obuhabuzi burungi kubaasa kugumira obufaaki bwe. Akamugira ati: “Tutwire twine obushwere burungi. Eki ti ky’abantu baingi.” Kwonka akamuhiga ati: “N’obu oraabe noija kuguma noijuka ebirungi eby’enyima, otaba nibyo waataho omutima. Haahinguraho obwire obusaasi bwawe nibwija kukira. Otagira ekiniga n’enaku erengire. Gira okushemererwa ahabw’ebirungi n’emigisha ebi twatungire hamwe. . . . Okwijuka n’ekiconco eki Ruhanga yaatuhaire.” Mbwenu shi torikwikiriza ngu obu bukaba buri obuhabuzi burungi?

8. Munyaanyazi-itwe omwe akagasirwa ata ahabw’okutaguma naayegomba eby’enyima?

⁸ Munyaanyazi-itwe akakuratira obuhabuzi bwa iba obwo. Akagumizamu naaheereza Yehova omu bwesigwa kuhitsya obu yaafa aha myaka 92. Emyaka mikye enyima atakafiire, akagira ati: “Ku ndikureeba enyima emyaka 63 ei mmazire nimpeereza Yehova omu buheereza obw’obutwire, nimbaasa kugira ngu ntungire okumarwa.” Ahabw’enki? Naashoboorora ati: “Buzima ekirikureeta okumarwa n’okuba abantu b’oruganda rumwe n’okugira amatsiko g’okutuura n’ab’eishe-emwe na banyaanyazi-itwe omu paradiso, turikuheereza Omuhangi waitu Orikukirayo, Ruhanga omwe ow’amazima Yehova, ebiro byona.” * Eki ka n’eky’okureeberaho  kirungi eky’ogwo owaashorongize amaisho ge kureebera kimwe omumaisho!

9. Kurugiirira aha Abaleevi 19:18, ni ryari obu kirikubaasa kutugumira kwetantara enziika?

⁹ Shoma Abaleevi 19:18. Obumwe nikitugumira kwetantara kugira enziika, na munonga otugwisize kubi yaaba ari ow’eishe-emwe mugyenzi waitu, munywani waitu ow’aha mara, nari omunyabuzaare. Nk’eky’okureeberaho, munyaanyazi-itwe akoomesereza mugyenzi we ngu akamwibaho esente. Bwanyima, munyaanyazi-itwe owaayomesereize mugyenzi we akashaba okusaasirwa, kwonka oriya we akaguma ataire omutima aha kyabaireho. Naiwe oreehuriireho otyo? N’obu turaabe tutakahikirweho embeera niyo emwe, baingi ahariitwe turagizireho enziika kandi nitubaasa kuba twabaire nituteekateeka ngu titurikubaasa kusaasira owaatugwisize kubi.

10. Niki ekirikubaasa kutuhwera twaba twine enziika?

¹⁰ Niki ekirikubaasa kutuhwera twagira enziika? Twine kwijuka ngu Yehova naareeba buri kimwe. Naamanya byona ebi turikurabamu, otwariiremu n’obutari buringaaniza oburikutuhikaho. (Heb. 4:13) Naayehurira kubi twaba nitubonabona. (Isa. 63:9) Kandi naaraganisa ngu naija kwihaho obusaasi bwona obu turabiremu ahabw’obutari buringaaniza.​—Kush. 21:3, 4.

11. Nitugasirwa tuta twayetantara kubiika enziika?

¹¹ Kandi twine n’okwijuka ngu twayetantara enziika, niitwe turikugasirwa. Eki nikyo munyaanyazi-itwe ou baagambireho ebishuba yaizire kwetegyereza. Bwanyima y’obwire, enziika ye ekahwaho. Akeetegyereza ngu twasaasira abandi, Yehova nawe naatusaasira. (Mat. 6:14) Tarayehugize eki munyaanyazi-itwe yaakozire, kwonka akacwamu kutabiika enziika. N’ekyarugiremu, munyaanyazi-itwe akagaruka yaashemererwa yaata omutima aha kuheereza Yehova.

12. Ebiri omuri 1 Yohaana 3:19, 20 nibituhamiza ki?

¹² Shoma 1 Yohaana 3:19, 20. Okweshinja ti kintu ekitari kya butoosha. Nk’eky’okureeberaho, abamwe nibeeshinja ahabw’ebintu ebi baakozire batakeegira mazima. Abamwe nibeeshinja ahabw’enshobe ezi baakozire bwanyima y’okubatizibwa. Enyehurira nk’ezo nizikira kubaho. (Rom. 3:23) Amazima gari ngu, nituba nitwenda kukora ekihikire. Kwonka ‘twena nitushobya omuri bingi.’ (Yak. 3:2; Rom. 7:21-23) N’obu turaabe tutarikukunda enyehurira z’okweshinja, kwonka nikubaasa kutuhwera. Ahabw’enki? Ahabw’okuba enyehurira z’okweshinja nizibaasa kutuhwera kuhindura emitwarize yaitu, n’okumariirira kutagaruka kukora enshobe nizo zimwe.​—Heb. 12:12, 13.

13. Ahabw’enki twine kwetantara omutego gw’okweshinja ekirenga?

¹³ Aha rubaju orundi, nitubaasa kweshinja ekirenga, ekirikumanyisa okugumizamu nitweshinja na bwanyima y’okweteisa kandi Yehova akatusaasira. Okweshinja okw’omuringo nk’ogwo n’okw’akabi. (Zab. 31:10; 38:3, 4) Mu muringo ki? Yetegyereze eky’okureeberaho kya munyaanyazi-itwe omwe owaabaire naateganisibwa okweshinja ahabw’ebibi bye eby’enyima. Akagira ati: “Nkaba nindeeba ngu tikiine mugasho kuba omweziriki omu kuheereza Yehova ahakuba okujunwa nikubaasa kwija kundema.” Baingi ahariitwe twine enyehurira nk’eza munyaanyazi-itwe ogwo. Ni kikuru ngu twetantare omutego gw’okweshinja ekirenga. Teekateeka oku Sitaane arikushemererwa twayehwa amatsiko nangwa n’obu Yehova arikuba nakitukunda!​—Gyeragyeranisa na 2 Abakorinso 2:5-7, 11.

14. Nitubaasa kuhamya tuta ngu Yehova akitwinemu amatsiko?

¹⁴ Kwonka nabwo, nitubaasa kwebuuza tuti: ‘Nimbaasa kumanya nta ngu buzima Yehova  akinyinemu amatsiko?’ Twayebuuza ekibuuzo ekyo, nikiba nikyoreka ngu Yehova naabaasa kutusaasira. Emyaka mingi enyima, Omunaara gw’Omurinzi gukagira guti: “Nitubaasa kuteera entsibo tugwe emirundi mingi ahabw’emize mibi etutaahiremu munonga kukira oku turikuteekateeka. . . . Otahwa amatsiko. Otakaateekateeka ngu okakora ekibi ekitarikubaasa kusaasirwa. Okwo nikwo Sitaane arikwenda ngu oteekateekye. Ahabw’okugira ngu noohurira kubi waaheza kukora enshobe n’obuhame oburikworeka ngu tosiisire ekirenga. Otaruha kushaba Ruhanga omu bucureezi orikumweshengyereza kukusaasira, akakweza kandi akakuhwera. Mushabe obuhwezi nk’oku omwana arikushaba ishe obuhwezi yaaba aine oburemeezi, nangwa n’obu waakuba nookora enshobe niyo emwe emirundi mingi, Yehova naija kuguma naakuhwera ahabw’embabazi ze ezitatushemereire.” *

15-16. Abamwe beehuriire bata ahabw’okumanya ngu Yehova akibainemu amatsiko?

¹⁵ Baingi aha baheereza ba Yehova batungire obuhuumure ahabw’okumanya ngu Yehova akibainemu amatsiko. Nk’eky’okureeberaho, emyaka mingi enyima ow’eishe-emwe omwe akahigwa eky’okureeberaho ky’omubuurizi orikugambwaho omu kicweka ekiine omutwe, “Baibuli Neehindura Emitwarize y’Abantu.” Omu kicweka ekyo, munyaanyazi-itwe akagira ngu ahabw’ebi yaarabiremu enyima, kikaba nikimugumira kwikiriza ngu Yehova naabaasa kumukunda. Akaguma naateganisibwa enyehurira ezo nangwa na bwanyima y’okubatizibwa. Kwonka, ku yaateekateekire munonga aha kitambo, akatandika kureeba ebintu omu muringo gw’omutaano. *

¹⁶ Eky’okureeberaho kye kikakwata kita aha w’eishe-emwe? Akahandiika ati: “Obu naabaire ndi muto, nkaba nyine omuze gugumire eicwa ogw’okureeba eby’enshoni. Enyimaho, nkagarukirwa omuze ogwo. Nkashaba abareeberezi obuhwezi, kandi mbaasize kuteera orutambwe omu kusingura oburemeezi bwangye. Abareeberezi baampamiize ngu Ruhanga naankunda kandi anyiniire embabazi. Kwonka obumwe, ninyehurira nk’otaine mugasho, orikushusha  ngu Yehova tarikubaasa kunkunda. Okushoma eky’okureeberaho [kya munyaanyazi-itwe ogu] buzima kikaampwera. Hati niimanya ngu naaba ninteekateeka ngu Ruhanga tarikubaasa kunsaasira, nimba ndi nk’orikugira ngu ekitambo ky’Omwana we tikirikumara kushweka ebibi byangye. Nkakuuramu ekicweka eki kugira ngu ngume ninkishoma kandi ninkiteekateekaho buri kwehurira nk’otaine omugasho.”

17. Entumwa Paulo akeetantara ata omutego gw’okweshinja ekirenga?

¹⁷ Eby’okureeberaho nk’ebi nibitwijutsya ebirikukwata aha ntumwa Paulo. Obu yaabaire atakabaire Mukristaayo, akakora ebibi by’amaani bingi. Paulo akaba naijuka ebi yaakozire, kwonka akaba atarikubitaho omutima. (1 Tim. 1:12-15) Akaba naareeba ekitambo nk’ekiconco eki Ruhanga yaamuhaire we nk’omuntu. (Gal. 2:20) Paulo akeetantara omutego gw’okweshinja ekirenga, reero yaata omutima aha kuha Yehova ekirikukirayo oburungi.

18. Twayega ki omu kicweka eki?

¹⁸ Twayega ki bwanyima y’okushwijuma emitego erikugambwaho omu kicweka eki? (1) Okwijuka n’ekiconco kuruga ahari Yehova, kwonka n’obu twakuba twabaire turi mu mbeera ki enungi enyima, embeera zaitu omu nsi ensya niziija kuba nizikirayo oburungi. (2) Abandi nibabaasa kutukora kubi, kwonka twacwamu kubasaasira, nitwija kugumizamu nituheereza Yehova. (3) Okweshinja nikubaasa kuturemesa kuheereza Yehova tushemereirwe. N’ahabw’ekyo, nka Paulo, twine kwikiriza ngu Yehova akatusaasira.

19. Nitumanya tuta ngu omu nsi ensya titurikwija kuguma nitwefuuza ahabw’embeera zaitu ez’enyima?

¹⁹ Twine amatsiko g’okutuuraho ebiro byona. Omu nsi ensya, titurikwija kuba nitwefuuza ahabw’embeera zaitu ez’enyima. Aha bikwatiraine n’obwire obwo, Baibuli neegira eti: ‘Ebya ira tibirikwija kwijukwa.’ (Isa. 65:17) Kiteekateekeho: Bamwe ahariitwe turugireho twaba abakaikuru nari abagurusi turikuheereza Yehova, kwonka omu nsi ensya, nitwija kugaruka kuba bato. (Yob. 33:25) N’ahabw’ekyo, ka tumariire kutata omutima aha by’enyima. Omu mwanya gw’ekyo, ka tureebe eby’omumaisho tube nibyo twataho omutima!