1-2. Kɛzi yɛbahola yɛava folɛdulɛ mɔɔ wɔ Mrɛlɛbulɛ 4:25 la yɛali gyima ɛ? Maa neazo.

PƐ TƐNLABELƐ ɛhye mɔ anwo nvoninli nea. Adiema raalɛ kpanyinli bie ɛlɛdwenledwenle asetɛnla kpalɛ mɔɔ ɛnee ɔwɔ nu mekɛ bie la anwo. Ɔnva nwo kɛ kɛkala ninyɛne nu yɛ se la, ɔkɔ zo ɔyɛ mɔɔ ɔbahola la wɔ Gyihova ɛzonlenlɛ nu. (1 Kɔl. 15:58) Ɔpɛ ye nvoninli wɔ ye adwenle nu dahuu kɛ ɔ nee ye alɔvolɛ wɔ Paladaese. Adiema raalɛ gyɛne noko kakye kɛ ɔ diema Kilisienenli bie yɛle ye debie maanle ɔgyegyele ye, noko ɔzile kpɔkɛ kɛ ɔnrɛva ɔ nwo ɛya ɔnrɛzie ye nu. (Kɔl. 3:13) Adiema nrenyia bie kakye nvonleɛ mɔɔ ɔyɛle ye dɛba la, noko yebɔ kpɔkɛ kɛ ɔbahɔ zo yeali nɔhalɛ yeamaa Gyihova.​—Edw. 51:10.

² Duzu a yɛnwu ye wɔ Kilisienema nsa ɛhye mɔ amuala anwo a? Bɛ muala bɛkakye mɔɔ zile dɛba la, noko bɛnva bɛ adwenle bɛnzie zo somaa. Emomu, ‘bɛnea bɛ nyunlu fɔɔnwo’ na bɛfa bɛ nye bɛto mɔɔ bɛbanyia ye kenle bie la azo.​—Kenga Mrɛlɛbulɛ 4:25.

3. Kɛmɔti a ɔwɔ kɛ ‘yɛnea yɛ nyunlu fɔɔnwo’ a?

³ Kɛmɔti a ɔhyia kɛ ‘yɛnea yɛ nyunlu fɔɔnwo’ a? Kɛ mɔɔ awie ɛlɛtia na ɔta ɔto ɔ nye ɔ nzi a ɔnrɛhola ɔnrɛhɔ ɔ nyunlu fɔɔnwo la, zɔhane ala a saa yɛfa yɛ adwenle yɛsie mɔɔ ɛpɛ nu la azo somaa a, yɛnrɛhola yɛnrɛnyia anyuhɔlɛ wɔ Gyihova ɛzonlenlɛ nu a.​—Luku 9:62.

4. Duzu a yɛbazuzu nwo wɔ edwɛkɛ ɛhye anu a?

⁴ Wɔ edwɛkɛ ɛhye anu, yɛbazuzu ngane nsa mɔɔ bahola  amaa yɛava yɛ adwenle yɛazie mɔɔ ɛpɛ nu la azo somaa la anwo. Bɛmɛ a le: (1) mekɛ kpalɛ mɔɔ ɛpɛ nu, (2) ɛya mɔɔ bɛfa bɛsie bɛ nu yɛɛ (3) adwenle mɔɔ bua bɛ fɔlɛ dahuu. Wɔ ko biala anu, yɛbanwu Baebolo ngyinlazo mɔɔ baboa yɛ amaa yɛanva yɛ adwenle yɛanzie ‘ninyɛne mɔɔ yɛgyakyi ye wɔ yɛ nzi’ la azo na yɛapele yɛadwu ‘ninyɛne mɔɔ wɔ yɛ nyunlu anwo la.’​—Fel. 3:13.

5. Duzu a Nolobɔvo 7:10 ka kɛ yɛmmayɛ a?

⁵ Kenga Nolobɔvo 7:10. Yɛ ye nzonlɛ kɛ ngyɛnu ɛhye anga kɛ, ɔle ɛtane kɛ ɛbabiza kɛ: “Duzu ati a mekɛ mɔɔ ɛze ɛhɔ la le kpalɛ a?” Ninyɛne mgbalɛ mɔɔ ɛpɛ nu mɔɔ yɛkakye la le ahyɛlɛdeɛ mɔɔ vi Gyihova ɛkɛ. Emomu, ngyɛnu ne ka kɛ: “Mmaka kɛ, ‘Duzu ati a mekɛ mɔɔ ɛze ɛhɔ la le kpalɛ tɛla ɛnɛ a?’” Ɔnle kɛ yɛfa asetɛnla mɔɔ ɛpɛ nu la yɛtoto mɔɔ yɛwɔ nu kɛkala la anwo na yɛka kɛ dɛba ne le kpalɛ tɛla mɔɔ yɛwɔ nu la. Baebolo gyɛne kile ngyɛnu ɛhye abo kɛ: “Mmabiza ye ɛlɛ kɛ, ‘O, duzu ati a dɛba ne ɛnee ninyɛne le kpalɛ ɛ?’ Ɔnle kpuya mɔɔ nrɛlɛbɛ wɔ nu.”

6. Duzu ati a nrɛlɛbɛ ɛnle nu kɛ yɛbahɔ zo yɛadwenle kɛ dɛba ne ɛnee yɛlɛ asetɛnla kpalɛ ɛ? Maa neazo.

⁶ Duzu ati a nrɛlɛbɛ ɛnle nu kɛ yɛbahɔ zo yɛadwenle kɛ dɛba ne ɛnee yɛlɛ asetɛnla kpalɛ ɛ? Saa yɛyɛ ye zɔ a, ɔbamaa yɛava yɛ adwenle yɛazie zolɛ somaa. Anzɛɛ ɔbamaa yɛabu yɛ nye yɛagua ngyegyelɛ mɔɔ yɛyiale la azo. Fa tete Yizilayɛma kɛ neazo. Mɔɔ bɛvile Yigyibiti la, yeangyɛ bɛ rɛle vile kɛzi ɛnee bɛ nwo kyele bɛ wɔ ɛkɛ la. Emomu, bɛvale bɛ adwenle bɛziele aleɛ kpalɛ mɔɔ ɛnee bɛdi la ala azo. Bɛhanle kɛ: “Nea kɛzi yɛkakye fɛlɛ mɔɔ ɛnee yɛdi wɔ Yigyibiti mɔɔ yɛndua ɛhwee, nee kɔkumba, wɔtamelɔn, liiki, anweɛ yɛɛ galeke la!” (Nɔm. 11:5) Noko asoo bɛlile aleɛ zɔhane mɔɔ ‘bɛandua ɛhwee’ ɔ? Kyɛkyɛ. Bɛduale nwolɛ kakɛ kpole; mekɛ zɔhane, ɛnee bɛle ngɛkɛlɛ wɔ Yigyibiti na bɛ nwo hyelele bɛ kpalɛ. (Ɛzɛ. 1:13, 14; 3:6-9) Noko nzinlii bɛ rɛle vile anwongyelelɛ zɔhane na bɛ nwo lɔle dɛba ne. Kɛ anrɛɛ bɛbava bɛ  adwenle bɛazie ninyɛne mgbalɛ mɔɔ Gyihova ɛyɛ ɛmaa bɛ azo la, bɛvale bɛ adwenle bɛziele mekɛ kpalɛ mɔɔ ɛpɛ nu la azo. Gyihova anye anlie mɔɔ bɛyɛle la anwo.​—Nɔm. 11:10.

7. Duzu a ammaa adiema raalɛ ko andɔ mekɛ kpalɛ mɔɔ ɛpɛ nu la ɛhane ne anu a?

⁷ Kɛ ɔkɛyɛ na yɛandɔ mekɛ kpalɛ mɔɔ ɛpɛ nu la ɛhane ne anu ɛ? Fa adiema raalɛ bie mɔɔ ɔbɔle ɔ bo kɛ ɔsonle wɔ Brooklyn Bɛtɛle wɔ 1945 la kɛ neazo. Ɛvolɛ bie anzi, adiema nrenyia bie mɔɔ sonle wɔ Bɛtɛle ɛkɛ ne la gyale ye na bɛzonlenle wɔ ɛkɛ ne ɛvolɛ dɔɔnwo. Noko wɔ 1976, ɔ hu anwo dole ye. Ɔhanle kɛ, mɔɔ ɔ hu nwunle kɛ ɔka ekyi ɔwu la, ɔdule ye folɛ kpalɛ mɔɔ baboa ye yeamaa yeagyinla tɛnlabelɛ ne anloa la. Ɔ hu hanle kɛ: “Yɛ nye liele wɔ yɛ agyalɛ ne anu. Menli dɔɔnwo ɛnnyia ye zɔ.” Eza ɔhanle ɔhilele ye kɛ: “Ɛ rɛle ɛnrɛvi ninyɛne mgbalɛ mɔɔ yɛyɛle yɛbɔle nu la noko mmafa wɔ adwenle ɛsie zo somasoma. Mekɛ ɛlɛkɔ la wɔ nyanelilɛ ne azo bade. Mmamaa ɛ rɛle bɔ somaa na ɛdi nyane wɔ mɔɔ ɛdo wɔ la anwo. Maa ɛ nye ɛlie kɛ yɛ mu nwiɔ yɛbɔle nu yɛzonlenle Gyihova wɔ anyelielɛ nu la. . . . Ninyɛne mgbalɛ mɔɔ yɛkakye la le ahyɛlɛdeɛ mɔɔ vi Nyamenle ɛkɛ.” Ɛnlie ɛndo nu kɛ ɛhye le folɛdulɛ kpalɛ ɔ?

8. Kɛzi adiema raalɛ bie ahu folɛdulɛ boale ye ɛ?

⁸ Yɛ diema raalɛ ne lile ɔ hu folɛdulɛ ne azo. Ɔvale nɔhalɛlilɛ ɔzonlenle Gyihova ɔhɔle ewule nu, ɔlile ɛvolɛ 92. Kolaa na yeawu la, ɔhanle kɛ: “Saa menea ɛvolɛ 63 mɔɔ meva meyɛ dahuu ɛzonlenlɛ gyima ne la a, mebahola meaha kɛ me kunlu dwole me nwo kpalɛ.” Duzu ati ɔ? Ɔhilehilele nu kɛ: “Mɔɔ maa ɛbɛlabɔlɛ yɛ ahunlundwolɛ la a le yɛ mediemayɛlɛ ne yɛɛ anyelazo mɔɔ yɛlɛ kɛ yɛ nee yɛ mediema badɛnla paladaese azɛlɛ zo na yɛazonle yɛ Bɔvolɛ Kpole ne, nɔhalɛ Nyamenle kokye, Gyihova dahuu la.” * Ɔyɛle kɛzi ɔwɔ kɛ yɛnea yɛ nyunlu fɔɔnwo yɛfa yɛ adwenle  yɛsie kenle bie azo la anwo neazo kɛnlɛma!

9. Kɛ mɔɔ Lɛvitikɔso 19:18 kile la, mekɛ boni a ɔyɛ se kpalɛ kɛ yɛbava awie ɛtane yɛahyɛ ye a?

⁹ Kenga Lɛvitikɔso 19:18. Saa yɛ diema diedinli, yɛ gɔnwo kpalɛ, anzɛɛ yɛ busuanli bie yɛ yɛ ɛtane a, ɔyɛ a ɔyɛ se kpalɛ kɛ yɛbava yɛahyɛ ye. Kɛ neazo la, adiema raalɛ bie bɔle ɔ diema diedinli bie somolɛ kɛ yewua ye ezukoa. Nzinlii, adiema raalɛ ne mɔɔ bɔle ɔ diema ne somolɛ la hɔkpale kyɛlɛ, noko adiema raalɛ ne mɔɔ bɛbɔle ye somolɛ ne la hɔle zo dwenlenle mɔɔ zile la anwo. Ɛhye bie ɛdo wɔ ɛlɛ ɔ? Saa tɛnlabelɛ zɔhane bie ɛtɛtole yɛ ɛlɛ bɔbɔ a, bie a yɛ nuhua dɔɔnwo vale awie anwo ɛya ziele yɛ nu na yɛdele nganeɛ kɛ yɛnrɛhola yɛnrɛva yɛnrɛhyɛ ye ɛlɛ.

10. Duzu a bahola aboa yɛ na yɛanva awie anwo ɛya yɛanzie yɛ nu a?

¹⁰ Duzu a bahola aboa yɛ na yɛanva awie anwo ɛya yɛanzie yɛ nu a? Ɔwɔ kɛ yɛkakye kɛ Gyihova nwu debie biala. Ɔze mɔɔ yɛlɛkɔ nu la amuala, saa awie nee yɛ ɛnli ye boɛ a ɔze ye. (Hib. 4:13) Saa yɛlɛdi nyane a ɔdaye noko ɔdi nyane. (Aye. 63:9) Na yebɔ ɛwɔkɛ kɛ ɔnrɛhyɛ, ɔbaye nyane biala mɔɔ debie ɛtane mɔɔ bɛva bɛyɛ yɛ la ɛlɛmaa yɛali la yɛavi ɛkɛ.​—Yek. 21:3, 4.

11. Saa yɛfa ɛtane yɛkyɛ a kɛzi ɔboa yɛ ɛ?

¹¹ Eza ɔwɔ kɛ yɛkakye kɛ saa yɛfa ɛtane yɛkyɛ a ɔboa yɛ. Yemɔ a yɛ diema raalɛ ne mɔɔ bɛdole ye ɛzonle la ranwunle ye a. Nzinlii, ɔgyakyile edwɛkɛ ne anu. Ɔnwunle kɛ saa yɛfa awie mɔ ɛtane yɛkyɛ bɛ a, Gyihova noko fa yɛ ɛdeɛ kyɛ yɛ. (Mat. 6:14) Ɛnee ɔze kɛ mɔɔ adiema raalɛ ɛhendeɛ ne yɛle la ɛnle kpalɛ, noko ɔvale ɔhyɛle ye. Ɛhye maanle yɛ diema raalɛ ne anye liele kpalɛ na ɔholale ɔvale ye adwenle ɔziele Gyihova ɛzonlenlɛ zo.

12. Duzu a 1 Dwɔn 3:19, 20 maa yɛnwu ye a?

¹² Kenga 1 Dwɔn 3:19, 20. Ɔyɛ a yɛ muala yɛ adwenle bua yɛ fɔlɛ. Kɛ neazo la, bie mɔ adwenle bua bɛ fɔlɛ ɔlua ninyɛne bie mɔɔ bɛyɛle kolaa na bɛanwu nɔhalɛ ne la ati. Bie mɔ adwenle bua bɛ fɔlɛ ɔlua nvonleɛ mɔɔ bɛyɛle wɔ bɛ ɛzɔnenlɛ ne anzi la ati. Ɛhye to yɛ nuhua dɔɔnwo. (Wlo. 3:23) Nɔhalɛ nu, yɛkulo kɛ yɛyɛ mɔɔ tenrɛ la. Noko “yɛ muala yɛfo fane dɔɔnwo.” (Gye. 3:2; Wlo. 7:21-23) Saa yɛ adwenle bua yɛ fɔlɛ a yɛ nye ɛnlie nwo, noko ɔyɛ a ɔboa. Duzu ati ɔ? Ɔluakɛ ɔka yɛ ɔmaa yɛyɛ nzenzaleɛ na ɔmaa yɛbɔ kpɔkɛ kɛ yɛnrɛyɛ ɛtane zɔhane mɔ bieko.​—Hib. 12:12, 13.

13. Duzu ati a ɔnle kɛ yɛmaa yɛ adwenle bua yɛ fɔlɛ dahuu ɛ?

¹³ Noko yɛ adwenle bahola abua yɛ fɔlɛ dahuu wɔ mekɛ bɔbɔ mɔɔ yɛnlu yɛ nwo na Gyihova ɛva yɛ ɛtane ɛhyɛ yɛ la. Ɛhye bahola aboda yɛ. (Edw. 31:10; 38:3, 4) Adenle boni azo? Fa adiema raalɛ bie mɔɔ ɛnee ye adwenle bua ye fɔlɛ wɔ ɛtane dɛba mɔɔ ɔyɛle anwo la kɛ neazo. Ɔhanle kɛ: “Mendele nganeɛ kɛ nwolɛ ɛngyia kɛ mebayele me nwo wɔ Gyihova ɛzonlenlɛ nu, ɔluakɛ bie a bɛnrɛlie me ngoane.” Bie a yɛ nuhua dɔɔnwo te nganeɛ zɔ. Ɔti ɔhyia kɛ yɛnea boɛ na yɛ adwenle ambua yɛ fɔlɛ dahuu. Ɔluakɛ saa yɛgyakyi Gyihova ɛzonlenlɛ ɔnva nwo kɛ yeva yɛ ɛtane yehyɛ yɛ la a, ɔbayɛ Seetan fɛ kpole kpalɛ.​—Fa toto 2 Kɔlentema 2:5-7, 11 anwo.

14. Kɛ ɔkɛyɛ na yɛanwu ye kɛ Gyihova kulo kɛ ɔfa yɛ ɛtane ɔkyɛ yɛ ɛ?

¹⁴ Bie a yɛtɛbiza yɛ nwo kɛ, ‘Kɛ ɔkɛyɛ na meanwu kɛ Gyihova ɛtɛkpole me ɛ?’ Saa ɛbiza kpuya zɔhane a ɔkile kɛ Gyihova bahola ava wɔ ɛtane ahyɛ wɔ. Ɛvolɛ dɔɔnwo mɔɔ ɛpɛ  nu la, Ɛzinzalɛ Arane ne hanle kɛ: “Bie a yɛbanwu kɛ yɛ subane ɛtane dɛba bie mɔɔ ɛha yɛ nwo la maa yɛtɔ aze fane dɔɔnwo. . . . Mmamaa ɛ sa nu to. Mmanyia adwenle kɛ wɔyɛ ɛtane mɔɔ bɛfa bɛkyɛ wɔ a ɔnyɛ boɛ a. Adwenle mɔɔ Seetan kulo kɛ ɛnyia la ala ɛne. Kɛmɔ ɛdi nwolɛ nyane na ɔgyegye wɔ la ati, ɔkile kɛ bɛfa bɛkyɛ wɔ a ɔyɛ boɛ. Bɛlɛ ɛ nwo aze na kɔ zo sɛlɛ Nyamenle kɛ ɔva wɔ ɛtane ɔhyɛ wɔ na ɔboa wɔ ɔmaa ɛnyia adwenle mɔɔ anu te la bieko. Saa ɛyɛ ɛtane ko ne ala fane dɔɔnwo bɔbɔ a, sɛlɛ Gyihova moalɛ kɛ mɔɔ kakula kɔ ye papa ɛkɛ ne la na ye ɛlolɛ kpole ne ati ɔbaboa wɔ.” *

15-16. Mɔɔ bie mɔ nwunle kɛ Gyihova ɛtɛkpole bɛ la, kɛzi bɛdele nganeɛ ɛ?

¹⁵ Mɔɔ Gyihova menli dɔɔnwo nwunle kɛ Gyihova ɛtɛkpole bɛ la, ɔkyekyele bɛ rɛle kpalɛ. Kɛ neazo la, wɔ ɛvolɛ dɔɔnwo mɔɔ ɛpɛ nu la, anwubielɛ mɔɔ adiema nrenyia bie gengale ye wɔ edwɛkɛ, “Baebolo Ne Kakyi Sonla” anu la hanle ye ahonle. Adiema raalɛ ne hanle ye wɔ edwɛkɛ ne anu kɛ, ɔlua ɛtane mɔɔ ɔyɛle ye dɛba ne la ati, ɛnee ɔyɛ se kɛ ɔbalie yeali kɛ Gyihova kulo ye. Mɔɔ bɛzɔnenle ye la anzi ɛvolɛ dɔɔnwo ɛnee ɔtɛte zɔhane nganeɛ ne. Noko mɔɔ ɔdwenledwenle ɛkpɔnedeɛ ne anwo la, ɔhakyile ye adwenle. *

¹⁶ Kɛzi ye anwubielɛ ne boale adiema nrenyia ne ɛ? Adiema nrenyia ne hɛlɛle kɛ: “Mɔɔ mele kakula la, membɔle mɔdenle kɛ mebagyakyi nlanwonvoninli ɛnleanlɛ mɔɔ ɛha me nwo la. Kenlensa ye ala, menlea bie. Menganle mengilele asafo nu mgbanyima ne mɔ kɛ bɛboa me na ngyikyingyikyi melɛdi me ngyegyelɛ ne azo konim. Mgbanyima ne mɔ ɛmaa menwu ye kɛ Nyamenle kulo me na ɔkulo kɛ ɔfa me ɛtane ɔkyɛ me. Noko ɔyɛ a, mete nganeɛ kɛ nvasoɛ ɛnle me nwo zo na Gyihova ɛnrɛhola ɛnrɛhulo me edwɛkɛ. Adiema raalɛ ne anwubielɛ ne mɔɔ mengengale la ɛboa me kpalɛ. Kɛkala mede ɔ bo kɛ saa meka kɛ Nyamenle ɛnrɛva me ɛtane ɛnrɛhyɛ me a, ɔkile kɛ ɔ Ra ne afɔlebɔlɛ ne ɛnrɛhola ɛnrɛkyikyi me ɛtane ne. Meva edwɛkɛ ɛhye mezie amaa saa  mete nganeɛ kɛ nvasoɛ ɛnle me nwo zo a, meagenga na meadwenledwenle nwolɛ.”

17. Duzu a ammaa ɛzoanvolɛ Pɔɔlo andɔ adwenle mɔɔ bua bɛ fɔlɛ dahuu la ɛhane ne anu a?

¹⁷ Anwubielɛ zɛhae maa yɛkakye ɛzoanvolɛ Pɔɔlo. Kolaa na yearayɛ Kilisienenli la, ɔyɛle ɛtane mgbole dɔɔnwo. Ɛnee Pɔɔlo kakye mɔɔ ɔyɛle la, noko yeanva ye adwenle yeanzie zolɛ. (1 Tim. 1:12-15) Ɔbule ɛkpɔnedeɛ ahyɛlɛdeɛ ne kɛ ɔdaye ti a bɛvale bɛmaanle a. (Gal. 2:20) Ɔti Pɔɔlo ammaa ye adwenle ambua ye fɔlɛ dahuu na ɔbɔle kpɔkɛ kɛ ɔvi mekɛ zɔhane mɔɔ kɔ la, ɔbayɛ biala mɔɔ ɔbahola la yeamaa Gyihova.

18. Duzu a yɛzukoa wɔ edwɛkɛ ɛhye anu a?

¹⁸ Duzu a yɛzukoa yɛvi ngane mɔɔ bɛhilehile nu wɔ edwɛkɛ ɛhye anu la anu a? (1) Ninyɛne mgbalɛ mɔɔ yɛkakye la le ahyɛlɛdeɛ mɔɔ vi Gyihova ɛkɛ; saa ɛnee yɛlɛ asetɛnla kpalɛ bɔbɔ a, asetɛnla mɔɔ yɛbanyia ye kenle bie wɔ ewiade fofolɛ ne anu la badɛla ye kolaa. (2) Awie mɔ bayɛ debie yeamaa yeagyegye yɛ, noko saa yɛfa yɛkyɛ bɛ a ɔbamaa yɛahola yɛahɔ yɛ nyunlu wɔ Gyihova ɛzonlenlɛ nu. (3) Saa yɛ adwenle bua yɛ fɔlɛ dahuu a, ɔnrɛmaa yɛnrɛva anyelielɛ yɛnrɛzonle Gyihova. Yemɔti ɔwɔ kɛ yɛdie yɛdi kɛ Gyihova ɛva yɛ ɛtane ɛhyɛ yɛ kɛ mɔɔ Pɔɔlo noko yɛle la.

19. Kɛzi yɛkola yɛnwu kɛ wɔ ewiade fofolɛ ne anu, ninyɛne mɔɔ zile dɛba la ɛnrɛgyegye yɛ bieko ɛ?

¹⁹ Yɛ nye la kɛ yɛbadɛnla aze dahuu. Na wɔ Nyamenle ewiade fofolɛ ne anu, ninyɛne mɔɔ zile dɛba la ɛnrɛgyegye yɛ bieko. Baebolo ne ka ye wɔ mekɛ zɔhane anwo kɛ: “Bɛnrɛhakye ninyɛne dɛba ne mɔ.” (Aye. 65:17) Dwenle nwolɛ nea: Yɛ nuhua dɔɔnwo ɛyɛ mgbanyinli wɔ Gyihova ɛzonlenlɛ nu, noko wɔ ewiade fofolɛ ne anu yɛbayɛ mgbavolɛ nee mbɛlɛra bieko. (Dwobu 33:25) Yemɔti bɛmaa yɛbɔ kpɔkɛ kɛ yɛnrɛva yɛ adwenle yɛnrɛzie mɔɔ zile dɛba la azo. Emomu, bɛmaa yɛva yɛ adwenle yɛzie ewiade fofolɛ ne azo na yɛnlea yɛ nyunlu fɔɔnwo!