LONGO DIA 48
‘Tala Phamba Gutuama’ mu Masugu Adi Muza
“Meso aye adi naye gutala phamba gutuama, ayi, udi naye gutala phamba gutuama diaye.”—ISH. 4:25, NWT.
LUNGIMBO 77 La lumière dans un monde enténébré
NDAGA JIDI MU LONGO EDI *
1-2. Luholo lutshi tuajiya gulandula longo didi mu Ishima 4:25? Hana gifezegeselo.
TANGIZA gale ifezegeselo eyi thathu yalandula. Phangi mumoshi wa mukhetu wa gukola udi mutangiza matangua abonga abalegesele hakhalele muene muvuala. Ngatshima udi mutagana nu malamba avula mangino, uvi udi mulandula gutshita yagasue yajiya gukalagala muene mukunda nu Yehowa. (1 Kol. 15:58) Lusugu nu lusugu phangi muene udi mutangiza luholo muene nu athu anazumba mbajinga hamoshi mu phaladiso. Phangi muko wa mukhetu udi muzuela egi phangi muko wa Muklisto wakalagala ndaga imoshi yamusagesa muavula, uvi wazula desizio dia gutuna gutangiza ndaga yene. (Kol. 3:13) Phangi mumoshi wa yala udi muwunguluga gubola guatshitshile muene, uvi henyaha udi mutangiza ndaga jiajiya gutshita muene ha gusala ya gujinginyina gudi Yehowa.—Ngi. 51:10.
2 Gudivua gutshi gudi mukatshi dia ndaga aphangi awa thathu adi mutagana najio? Mukut’awo agasue adi muwunguluga ndaga jiabalegele mu masugu abalega, uvi ashigo mulandula gutangiza ndaga jiene. Hafundo dia gutangiza ndaga jiene, adi ‘mutala phamba gutuama’ mu masugu adi muza.—Tanga Ishima 4:25.
3. Mukunda natshi idi nu ndando egi tulandule ‘gutala phamba gutuama’ mu masugu adi muza?
3 Mukunda natshi idi nu ndando ha ‘gutala phamba gutuama’ mu masugu adi muza? Handaga muthu gajiyilego guwenda muabonga ha guya gutuama gula muene udi mutala gungima. Esue nji tuajiyilego guya gutuama mu mudimo wetu wa gukalegela Yehowa gula tudi mutala gungima mu ndaga jiabalegele gale.—Luka 9:62.
4. Itshi tuza muzuelela mu longo edi?
4 Mu longo edi, tuza muzuelela miheto thathu yajiya gututuma ha gutangiza ndaga jiabalegele gale. * miheto yene idi: (1) uhote, (2) khabu nu (3) gudisagesa muavula mukunda nu gubola wakalegele mu masugu abalega. Mu ndaga eji jiagasue, tuza mumona luholo malongo a Biblia ajiya gutukuatesa ha gutuna gutangiza ‘ndaga jia gungima’ nu ha gutala phamba ‘ndaga jidi gutuama.’—Fili. 3:13.
MUHETO WA THOMO: UHOTE
Itshi yajiya gutukanga njila ha gutala phamba gutuama mu masugu adi muza? (Tala paragrafe 5, 9, 13) *
5. Muheto utshi mukanda wa Mulongeshi 7:10 udi gututemesa?
5 Tanga Mulongeshi 7:10. Verse ishigo muzuela egi idi ndaga yabola ha guhula muhu egi: ‘Mukunda natshi ndaga jia masugu abalega jiakhalele jiabonga?’ Khadilo dia guwunguluga ndaga didi kado gatuhuile Yehowa. Uvi, verse idi muzuela egi: “Uzuedigo egi, ‘Mukunda natshi ndaga jia masugu abalega jiakhalele jiabonga gubalega jia masugu awa?’” Hene, tudi naye gumonesa gutema ha gutuna gufuanesa lujingu luetu lua masugu abalega nu lujingu luetu lua mangino. Tushigo naye nji gutangiza egi mangino ndaga jiagasue jishigo jiabonga. Verse eyi yabalumuiwe mu Biblia iko egi: “Ushigo naye guhula nga hazonda egi, ‘Oo, mukunda natshi ndaga jiakhalele muabonga diago mu masugu akulu?’ Guhula muhu owu gushigo gutema.”
Gungima dia guzoga gu Ejipitu, ndaga itshi yabola enya Isalele atshitshile? (Tala paragrafe 6)
6. Mukunda natshi ishigo gutema ha gutangiza egi mu masugu abalega tuakhalele nu lujingu luabonga diago? Hana gifezegeselo.
6 Mukunda natshi ishigo gutema ha gutangiza egi mu masugu abalega tuakhalele nu lujingu luabonga diago? Handaga uhote wajiya gututuma ha guwunguluga phamba ndaga jiabonga tuatshitshile mu masugu abalega, uvi tujimbila ndaga jiabola tuataganele najio. Tutadilenu gifezegeselo gia enya Isalele. Gungima dia guzoga mu uhiga gu Ejipitu, abuitshile mutshima muphushi mukunda nu malamba ataganele nawo guene. Akhalele mutangiza phamba ndaga jiabonga ataganele najio guene. Azuelele egi: ‘Tudi mutangiza jishui jia khenda tuakhalele mudia gu Ejipitu, nu kokombele, mayangua nu masophola a luholo nu luholo!’ (Lutang. 11:5) Uvi mu giamatshidia giagasue, akhalelego mudia ima eyi yakhenda. Enya Isalele akhalele musagesewa muavula gu Ejipitu. Akhalele mutshita midimo yakola ya ahiga. (Guz. 1:13, 14; 3:6-9) Uvi, gungima ajimbidile midimo yakola akhalele mukalagala guene. Akhalele mutangiza phamba ‘ima yabonga ya gudia’ ya gu Ejipitu. Uvi ajimbidile ndaga jiabonga Yehowa watshitshile mukunda nu ene. Yehowa gasuangulugilego nu khadilo diawo.—Lutang. 11:10.
7. Itshi yakuatesele phangi mumoshi wa mukhetu ha gulenga muheto wa uhote?
7 Luholo lutshi tuajiya gulenga muheto wa uhote? Tutadilenu gifezegeselo gia phangi mumoshi wa mukhetu wasendesele gutshita mudimo gu Betele ya gu Brooklyn mu 1945. Ivo yazonda gungima, wazudiwe mu ulo gudi Betelite muko. Alanduile gutshita mudimo hamoshi gu Betele ivo yavula. Uvi, mu 1976, mulumi’enji wasendesele gukata. Udi muzuela egi tangua mulumi’enji wajiyile egi gufua guenji guasuena hehi, wamuhanele malongo ajiya gumukuatesa gungima. Wawambelele mukaji’enji egi: “Tuakhalele diago nu gusuanguluga mu ulo wetu. Athu avula khenji akhalelego nu gusuangula guene.” Wamuwambelele luko egi: “Mbawushigo mujimbila ndaga jiabonga tuatshitshile hamoshi, uvi ushigo naye gusha matangi aye phamba mu ndaga jiene. Gutshita ngenyi mbagugukuatesa ha gutuna guvua gikenene giavula. Ushigo naye guleba muila nga guvua gikenene giavula mukunda nu ndaga yagubuila. Khala nu gusuanguluga mukunda nu matangua abonga tuabalegesa naye mu mudimo wa Yehowa. . . . Guwunguluga ndaga gudi kado gatuhuile Yehowa.” Longo edi diakuatesele diago phangi muene.
8. Gubonga gutshi phangi wa mukhetu wahetele mu longo dia mulumi’enji?
8 Phangi’etu wa mukhetu walanduile malongo a mulumi’enji. Wakalegele Yehowa mudimo nu gujinginyina guagasue uu nu hafuile muene nu ivo 92. Ivo yazonda gutuama egi afue, wazuelele egi: “Guwunguluga ivo 63 ngatshitshile mu mudimo wa Yehowa wa tangua diagasue guana gunguhana gusuanguluga guavula diago.” Mukunda natshi? Udi muzuela egi: “Ndaga yana tshita egi tukhale nu gusuanguluga mu monyo wetu idi aphangi’etu nu felela dietu dia gujinga nawo mu phaladiso ha gukombelela Mufugi wetu Wakoma, Nzambi mungoshi phamba wa giamatshidia, Yehowa, ivo nu ivo.” * Idi diago gifezeselo giabonga ha gulandula guhaga matangi phamba mu mafelela a Yehowa!
MUHETO WA MBADI: KHABU
9. Luholo mukanda wa Levi 19:18 udi guyimonesa tangua ditshi yajiya gukhala lamba ha gututosela muthu watuhanyi khabu?
9 Tanga Levi 19:18. Matangua ako, yana khala lamba ha gutotesela muthu gubola gula udi phangi’etu wa Muklisto, futa dietu nga muenya fami yetu. Ha gufezegesa, phangi mumoshi wa mukhetu wambidile phangi muko wa mukhetu mambo egi wakuyile makuta enji. Gungima, phangi wambidile phangi muene mambo wayile gumutoga ha gumutotesela, uvi phangi wambiwe mambo wavuile khabu jiavula, walanduile gutangiza ndaga yene. Aye nji wadivuile gale ngenyi ba? Ngatshima khenji tutaganelego nu ndaga ya luholo elu, uvi yajiya gukhala egi athu avula mukatshi dietu ataganele gale nu ndaga yene nu adivuile egi ajiyilego gutotesela athu a ahanele khabu nga hazonda.
10. Itshi yajya gutukuatesa tangua tudi nu khabu?
10 Itshi yajiya gutukuatesa tangua tudi nu khabu? Tudi naye gujiya egi Yehowa wana mona ndaga jiagasue. Wana jiya ndaga jiagasue tuana tagana najio, ikhale athu adi gututshitshila ndaga jishigo jia nduedi. (Heb. 4:13) Yehowa wana gudisagesa tangua tuana mona lamba. (Yesh. 63:9) Uvi udi gutulaya nji egi mbawukatula ndaga jiagasue jiana gutubatela malamba.—Yat. 21:3, 4.
11. Gubonga gutshi tuana guheta tangua tuana gutotesela athu ako gubola?
11 Tudi naye gujiya nji egi gula tudi mutotesela athu ako gubola, mbatudivua muabonga. Yene ndaga yakotelesele phangi wa mukhetu wambiwe mambo egi wakuyile makuta. Gungima watotesele gubola gua phangi wamumbidile mambo, gakhalelego luko gumuvuila khabu. Wakotelesele egi hagula Yehowa atutotesele, tudi naye gutotesela athu ako gubola. (Mat. 6:14) Wajiyile egi phangi wa mukhetu wamumbidile mambo, uvi wazudile desizio dia gumutotesela. Gungima, phangi’etu wa mukhetu wakhalele nu gusuanguluga, walanduile gukombelela Yehowa.
MUHETO WA THATHU: GUDISAGESA MUAVULA MUKUNDA NU GUBOLA WAKALEGELE
12. 1 Yone 3:19, 20 idi gutulongesa itshi?
12 Tanga 1 Yone 3:19, 20. Matangua ako, mukut’etu agasue tuana gudisagesa mukunda nu gubola tuakalegele gale. Ha gufezegesa, athu ako ana gudisagesa mukunda nu ndaga atshitshile gutuama egi ajiye giamatshidia. Ako ana gudisagesa mukunda nu gubola atshitshile gungima dia gubatijiwa. (Lomo 3:23) Yadiago, tuana tshigina gutshita ndaga jiabonga. Uvi, ‘mukut’etu agasue tuana tshita gubola mahugo avula.’ (Yak. 3:2; Lomo 7:21-23) Ngatshima tuana tshiginago gudisagesa, uvi guajiya nji gutukuatesa matangua ako. Mukunda natshi? Handaga gudisagesa mukunda nu gubola tuakalegele guajiya gutukuatesa ha gusombegesa nu ha guzula desizio dia gutuna gutshita luko gubola guene.—Heb. 12:12, 13.
13. Mukunda natshi tushigo naye gudisagesa muavula mukunda nu gubola tuakalegele?
13 Uvi, tuajiya nji gudisagesa muavula gubalega, yakotelesa gulandula gudisagesa ngatshima tuasombegesele gale khadilo dietu nu Yehowa watutosele gale gubola guetu. Gudisagesa gua luholo elu guajiya gutubatela malamba. (Ngi. 31:10; 38:3, 4) Luholo lutshi? Tutadile gifezegeselo gia phangi mumoshi wa mukhetu wakhalele mulua nu khadilo dia gudisagesa mukunda nu gubola guatshitshile muene masugu abalega. Wazuelele egi: “Ngakhalele mutangiza egi ngajiyilego gudihana lamba dia githuhu ha gukombelela Yehowa, handaga ngakhalele mumona gifua mbangushigo muhuluishiwa gami.” Athu avula mukatshi dietu ajiya gudivua nji ngenyi. Hene, tudi naye gutema ha gutuna gudisagesa muavula gubalega. Mukunda natshi? Handaga gula tuabemba gukombelela Yehowa, ngatshima watutosele gale gubola guetu, Satana mbawukhala nu gusuanguluga!—Fuanesa nu 2 Kolinto 2:5-7, 11.
14. Luholo lutshi tuajiya gujiya egi Yehowa wana gututotesela gubola guetu?
14 Uvi, tuajiya gudihula egi: ‘Luholo lutshi ngajiya gujiya egi Yehowa wangutotesele gubola guami?’ Gula tuadihula muhu owu, ngenyi idi mumonesa egi Yehowa wajiya gututosela gubola guetu. Ivo yavula yabalega gale, Inzo Yaleha ya Mutaledi yazuelele egi: “Tuajiya gulandula gutshita gubola guene gumoshi. Yajiya gukhala egi tuabingilego khadilo diene gutuama dia gusendesa gukombela Yehowa. . . . Tushigo naye guleba muila. Tushigo naye gutangiza egi Yehowa gajiyilego gututosela gubola guetu nga hazonda. Uvi, Satana wana tshigina egi tutangize ngenyi. Gula udi gudisagesa nu udi muvua khabu mukunda nu ndaga imoshi yabola wakalegele, idi mumonesa egi ushigo muthu wabola, Yehowa wajiya gugutotesela. Tudi naye gukhala nu khadilo dia gudibulumuisa ha gulandula gutoga Nzambi atutosele ha gukhala nu mutshima waphelegeta. Tudi naye nji gumutoga atukuatese hagula tutshitshigo luko gubola guene. Gifua luholo mona wanaya gudi sh’enji gula udi gudisagesa, esue nji tudi naye guya gudi Yehowa ikhale tuatshita gubola. Tudi naye gulandula gumutoga ukuateshi, handaga wana gutuvuila khenda.” *
15-16. Luholo lutshi athu ako ana gudivua gula ajiya egi Yehowa wana guatotesela?
15 Akombeledi avula a Yehowa ana guheta ngolo handaga ana kotelesa egi Yehowa wana guatotesela gubola guawo. Ha gufezegesa, mu ivo yabalega, phangi mumoshi wa yala wahetele ngolo mu eksperianse yatangele muene mu longo diana guzuela egi: “Biblia Yana Gusombegesa Lujingu.” Mu longo diene, phangi mumoshi wa mukhetu wazuelele egi luholo akalegele ndaga jiabola mu monyo wenji, yakhalele lamba gudi muene ha gutshigina egi Yehowa wana gumuzumba. Wakhalele mutangiza ngenyi ikhale ivo yavula gungima dia gubatijiwa guenji. Uvi, gutangigiza gibawu gia Yesu guamukuatesele ha gutshigina egi Yehowa wana gumuzumba. *
16 Luholo lutshi eksperianse yene yakuatesele phangi wa yala? Phangi muene udi muzuela egi: “Tangua ngakhalele muvuala, ngakhalele mutala ifuanesa ya pornografi muavula. Masugu azonda abalega gale, ngabuile luko mu muheto wene. Ngatogele ukuateshi gudi akulu, gungima ngabingile khadilo diene. Akulu angukuatesele ha gujiya egi Nzambi wana gunguzumba nu wana gungutotesela gubola. Ikhale ngenyi, matangua ako ngana gudivua gifua ngushigo nu ndando nu Yehowa gajiyilego gunguzumba. Uvi, gutanga eksperianse ya phangi wa mukhetu yangukuatesele diago. Ngakotelesele egi gula ngudi mutangiza egi Nzambi gajiyilego gungutotesela, ngenyi ngudi muzuela egi mulambu wa Mun’enji ushigo watagana ha gungukula mu gubola. Ngabatudile diyiji dia longo diene ha guditanga nu gutangigiza gula ngasendesa gutangiza egi Yehowa ganago gunguzumba.”
17. Luholo lutshi mupostolo Phaula walengele muheto wa gudisagesa muavula mukunda nu gubola guakalegele muene?
17 Eksperianse eji jidi gutuwunguluisa lumene lua mupostolo Phaula. Gutuama egi abue Muklisto, watshitshile ndaga jiavula jiabola. Phaula wakhalele mujiya ndaga jiakalegele muene, uvi gakhalelego gujitangiza tangua diagasue. (1 Tim. 1:12-15) Wakhalele mutadila gibawu gifua kado gahanewe mukunda nu muene. (Gal. 2:20) Hene, Phaula galanduilego gudisagesa mukunda nu gubola guatshitshile muene masugu abalega, uvi wahagele matangi’enji mu mudimo wa Yehowa.
KHALA MUTANGIZA MAVU AHE-AHE!
Tuzulenu desizio dia gutangiza phamba mavu ahe-ahe (Tala paragrafe 18-19) *
18. Itshi tualonguga mu longo edi?
18 Miheto tualonguga mu longo edi idi gutulongesa itshi? (1) Khadilo dia guwunguluga ndaga didi kado gatuhuile Yehowa. Ikhale tuakhalele nu lujingu luabonga masugu abalega, uvi mu masugu adi muza, mbatukhala nu lujingu luabonga. (2) Athu ako ajiya gutuhana khabu, uvi gula tuaatotesela, mbayitukuatesa ha gukombelela Yehowa muabonga. (3) Gudisagesa muavula gubalega guajiya gutukanga njila ha gukombelela Yehowa nu gusuanguluga guagasue. Hene, gifua Phaula, tudi naye gutshigina egi Yehowa wana gututosela gubola guetu.
19. Luholo lutshi tudi mujiya egi mu mavu ahe-ahe mbatushigo mutangiza ndaga jiabalegele gale?
19 Tudi nu luendu lua gujinga mayilago mu phaladiso. Mu phaladiso mbatushigo muwunguluga luko ndaga jia mualeha. Hene, Biblia idi muzuela egi: ‘Mbatuwungulugago luko ndaga jikulu.’ (Yesh. 65:17) Tangiza gale: Athu ako mukatshi dietu adi mukola mu mudimo wa Yehowa, uvi mu mavu ahe-ahe mbatuvutuga luko mavuala. (Yobo 33:25) Tuzulenu desizio dia gutuna gutangiza ndaga jiabalegele gale. Tutalenu phamba gutuama mu masugu adi muza!
LUNGIMBO 142 Tenons ferme notre espérance
^ par. 5 Gutangiza ndaga jiabalegele gale mu monyo wetu ishigo ndaga yabola. Uvi gula tudi mutangiza muavula ndaga jiabalegele gale, tuajiya gubemba gukalagala ndaga tuajiya gutshita mukunda nu Yehowa. Tuajiya nji gubemba gutangigiza mafelela abonga a Yehowa atadila Phaladiso. Longo edi diza muzuelela miheto thathu yajiya gututuma ha gutangiza ndaga jiabalegele gale. Tuza mutadila luholo malongo a Biblia nu ifezegeselo ya aphangi a mu masugu etu yajiya gutukuatesa ha gutuna miheto yene yagasue.
^ par. 4 UKOTELESHI WA MBIMBI: Mu longo edi, ‘gutangiza ndaga jiabalegele gale’ gudi mukotelesa gulandula gutangiza nga guzuelela ndaga tuakalagele mu masugu abalega, nga gutangiza lujingu luabonga tuakhalele nalo thomo.
^ par. 14 Tala Inzo Yaleha ya Mutaledi ya Français, 15 juin 1954 diyiji 185 par. 16.
^ par. 59 UKOTELESHI WA IFUANESA: Guvua uhote, khabu nga gudisagesa muavula mukunda nu gubola wakalegele idi gifua ginemo giakola tudi munana giajiya gutukanga njila ha guwenda muabonga mu njila ya monyo.
^ par. 66 UKOTELESHI WA IFUANESA: Gula tuabemba gudisagesa, mbatudivua muabonga, mbatuheta gusuanguluga nu ngolo. Ngenyi, mbatukhala hehi ha gutala phamba gutuama.
