1, 2. Proverbios 4:25​pi nishcataca ¿imashinata pactachi ushapanguiman? Explicapai.

CUNANGA cai quimsa yuyaicunapi pensaripashunchi: Shuj mayorlla paniguca pai joven cashpa ali cosascunata rurashcatami yarin. Pero ña mayorllagu caimandami pundashnaca imagutapash ñana ruraita ushan. Shina cashpapash ima usharishcagutami Jehovapaca rurashpa catin (1 Cor. 15:58). Shinallata cada punllami paipa juyashca familiahuan Paraíso alpagupi causanata yaria causan. Cutin shuj paniguca congregacionmanda shuj panigu nali sintichishcataca na yaringapami ninanda esforzarin (Efe. 4:32). Cutin shuj huauquica joven cai horas pandarishcata yarishpami nali sintirin carca. Shinapash cunanmanda vichaica Jehovata tucui shunguhuan sirvingapami ninanda esforzarin (Sal. 51:10).

² Cai quimsandi huauquipanicunamandaca ¿imatata yachajuita ushapanchi? Pundacunapi imatalla rurashcata yarishpapash shamuj punllacunapi Paraíso alpagupi imashna causanatami paicunaca yaria causan (Proverbios 4:25, liingui).

3. Shamuj punllacuna imacunalla pactarinata confiashpa catichunga ¿imata ayudanga?

³ Shamuj punllacunapi Paraíso alpagupi imacunalla pactarinata confianaca ¿imamandata minishtirishcapacha can? Cunanga caipi pensaripashunchi. Pipash ñanda recto rectoguta puringapaj munashpaca huashamanga na tigrarishpa ricunllu. Huashaman ricushpaca na rectoguta purita ushanmanllu. Shina cuendami ñucanchicuna pundacunapi imacunatalla rurashcata yarishpa causajushpaca, Jehovata ali sirvishpa catitaca na ushashunllu (Luc. 9:62).

4. Cai yachajuipica ¿imatata yachajupashun?

⁴ Cai yachajuipica cai quimsa yuyaicunamandami yachajupashun: Llaquilla cana, risintirishca cana, yapata culparina. Caicunami pundacunapi imacunatalla rurashpa causashcata yarishpa causajpi llaquilla sintichin. Shinapash Bibliapi consejocunami  ‘punda causashcata cungashpa’ causachun ayudanga. Shinallata Paraíso alpaguta ‘japigrishapacha yashpa ñaupaman’ catichunbashmi ayudanga (Filip. 3:13).

5. Eclesiastés 7:10​pi nishca shinaca ¿imata nali can?

⁵ (Eclesiastés 7:10, liingui). Pundacunapi ali causashcata yarinaca alimi can. Cunanbi causaica ashtahuan alimi can nishpa pensarinapash alimi can. Shina yarichunga Jehovallatami carashca. Shinaca ¿imata nali can? Punda causashcata yarishpa, cunanbica nali causajuni nijunami nali can. Eclesiastés 7:10​ta shuj traducishca Bibliaca: “Punda causashcami ashtahuan ali carca nishpaca ama nijuichichu. Shina nijunaca na valinllu” nircami.

6. Punda causaimi ali carca, cunanga nali causajuni nijunaca ¿imamandata nali can? Shuj ejemplomanda parlapai.

⁶ Punda causaica ashtahuan ali carca nishpa nijunaca ¿imamandata nali can? Llaquilla caimandaca alitalla yarishpami imapash problemacunata charishcataca cungaita ushapanchi. Cunanga punda tiempopi israelitacunamanda yaripashun. Paicunaca Egiptopi esclavocuna cashcata cungashpami: “Egiptopica, pijitapash yanga micushcatami yarinchi. Pepinocunata, [sandiacunata], puerro nishcacunata, cebollacunata, ajoscunatapash micushcatami yarinchi” ninajurcami (Núm. 11:5). Paicunaca ¿ciertopachachu ali causanajurca? Na. Paicuna micungapaca shinllitapachami trabajana carca. Paicunaca Egiptopica esclavocunami carca (Éx. 1:13, 14; 3:6-9). Israelitacunaca Egiptopi sufrishcata cungashpami punda causaitara yarishpa causanajurca. Ñapashmi paicunaca esclavocuna cashcataca cungashca carca. Paicunamanda Jehová Dios rurashcatapash cungaitapachami cungashca carca. Chaimi Jehová Diosca paicunahuanga ninanda culirarca (Núm. 11:10).

7. Ama llaquilla cachunga shuj panigutaca ¿imata ayudarca?

⁷ Ama llaquilla cachunga ¿imata ayudanga? Cunanga 1945 huatapi Brooklyn Betelpi sirvingapaj rishca shuj panigumanda yachajupashunchi. Huaquin huatacuna jipaca shuj Betelita huauquihuanmi cazararca. Ishcandimi tauca huatacunata Betelpi sirvirca. Huata 1976​pica huauquiguca irquiyarcami. Chai huauquiguca ña huañuna punlla  chayamujta yachashpami paipa huarmigumanga: “Cazarashca punllamandapacha cushillami causashcanchi. Ashtaca gentecunaca cashna cushilla causaitaca na charishcachu” nircami. Shinallata nircami: “Punda causaita yarishpaca ama causanguichu. Tiempohuanga ñana llaquilla causanguichu. Cai llaquitaca ñucallami charini nishpapash ama pensarijunguichu. Chaipa randica cushilla causajushcata, ashtaca bendiciongunata chasquijushcata yarishpami causana cangui. Chaicunata yarinami ali sintirichun ayudanga. Chaicunata yarichunga Jehová Diosllatami carashca” nircami. Cai consejoca alipachami can.

8. Punda causaita ama yarishpa causachunga ¿imata chai panigutaca ayudarca?

⁸ Chai paniguca chai consejotaca cazurcami. Paica 92 huatacunata charishpami huañurca. Chai paniguca tucui shunguhuanmi Jehovataca sirvirca. Pai nara huañushpaca cashnami parlarca: “63 huatacunatami Jehová Diostaca tiempo completopi sirvishcani. Cai tucui causaipimi cushijushpa causapashcani” nirca. ¿Imamandata shina nirca? Chai paniguca ninmi: “Turiñañacunata charina, Paraíso alpagupi causanata shuyana, ñucanchi shujlla Jehová Diosta sirvishpa catinata yachanaca ñucapaca shuj jatun bendicionmi cashca” nircami. * Cai paniguca shamuj punllacunapi Jehovapa nishcacuna pactarinatami siempre yarishpa causarca. Caica ñucanchipaca alipacha ejemplomi can.

9. Levítico 19:18​pi nishca shinaca ¿imashinata ama risintirishca cachun ayudan?

⁹ (Levítico 19:18, liingui). Shuj familia, alipacha amigo, shuj huauqui o shuj panimi imatapash nishpa o rurashpa nali sintichita ushan. Chaimi paicunata perdonanaca shinlli ricurin. Shuj punllaca shuj panigumi shuj paniguta culquita shuhuashcangui nishpa yangata juchachirca. Shinapash chai paniguca na juchachingapaj munarcanichu, disculpahuai nijpica na disculpaita usharcachu. Talvez ñucanchitaca pipash  culquita shuhuashcangui nishpaca na juchachishcachu. Pero casi gulpicunallatami imagumandapash risintiripashcanchi.

10. Ama risintirishcalla parachunga ¿imata yarinata ayudanga?

¹⁰ Ama risintirishcalla parachunga ¿imata ayudanga? Jehová Dios tucui tucuita ricujujta yarinami ama risintirishca parachun ayudanga. Paica ñucanchicunata pipash yangamanda llaquichijpi sufrinajujtaca alimi ricujun (Heb. 4:13). Ñucanchi sufrijujta ricushpaca Jehová Diospashmi sufrin (Is. 63:9). Shuj punlla chai llaquicunata Jehová Dios tucuchinataca alimi yachapanchi (Apoc. 21:3, 4).

11. Pihuanbash ama risintirishcalla cachunga ¿imata ayudanga?

¹¹ Pihuanbash ñana risintirishca cashpaca ñucanchillatami ali sintirishun. Imashinami ña ricuparcanchi. Yangamanda juchachi tucushca panica, tiempohuanga yangamanda juchachishca panigutaca perdonaita usharcami. Pitapash perdonajpica Jehovapash perdonaj cashcatami paniguca cuenta japirca (Mat. 6:14). Chai panigu perdonashpaca chai paniguhuan ama risintirishcalla cangapami shina rurarca. Shina rurashpami cushilla, Jehovatapash ashtahuan ali sirvita usharca.

12. ¿Imashinata 1 Juan 3:19, 20​pi shimicunaca ayudaita ushan?

¹² (1 Juan 3:19, 20, liingui). Casi tucuicunallatami Jehovata nara rijsishpaca talvez nalitaiman rurashcashun. O cutin ña bautizarishca jipa talvez nalitaiman rurashcashun. Chaimi llaquirishpa culparipanchi. Shina sintirinaca normalmi can (Rom. 3:23). Huaquinbica alita rurangapaj esforzarijushpapash ‘imatapash pandata nishpami llaquichinchilla’ (Sant. 3:2; Rom. 7:21-23). Llaquirishpa culparijunaca shuj partemandaca alimi can. ¿Imamandata ali can nipanchi? Imatapash nalita rurajujta cuenta japichun, ama chaitalla rurashpa catichunmi ayudaita ushan (Heb. 12:12, 13).

13. ¿Imamandata na yapata culparina capanchi?

¹³ Ñucanchi juchacunamanda arripintirishpa Jehová Dios perdonashcata yachanaca alimi can. Shinapash punda rurashcata yarishpa causajunaca ¿imamandata nali can? Yapata culparijunaca ñucanchipallatami nalipacha can (Sal. 31:10; 38:3, 4). ¿Imamandata nalipachami can nipanchi? Cunanga shuj panigupa causaimanda yachajupashun. Paica paipa punda causaipi nalicuna rurashcata yarishpami cutin cutin culparijurca. Paica: “Jehovata ashtahuan sirvingapaca imapata esforzarisha. Jehová Diosca ñucataca na perdonahuashcachu” nishpami nin carca. Nachu cai shimicunataca tucuicunallata nipashcanchi. Shinapash ama yapata culparingapami cuidarina capanchi. Diabloca shina culparishpa causachunmi munan. Cutin Jehová Diosca culparishpa causajuchunga na munanllu (2 Corintios 2:5-7, 11​huan chimbapurashpa ricupangui).

14. Jehová Dios na saquishcataca ¿imashinata seguro caita ushapanchi?

¹⁴ Huaquinbica cashnachari tapuripanchi: “Jehová Dios na saquishcataca ¿imashinata seguro caita ushani?” nishpa. Shina tapurishpallatami Jehová Dios perdonashcataca ña yachapanchi. Ashtaca huatacuna huashamanga La Atalaya revistaca cashnami nirca: “Huaquinbica shuj problemata charishpami punda causaipishna nalicunata cutin cutin ruranlla”. Shinallata: “Jehová Diosca ñucataca na perdonashcachu yashpaca ama quiquinllata culparipaichu. Shina pensachunga Diablomi munan. Shina culparijushpaca quiquinmandallatami culira o llaquilla sintiripangui. Pero shina sintirijushpaca chai juchapillata na urmangapaj munashcatami ricuchijupangui. Shinallata Jehovata perdonahuai nishpa mañajushpaca humilde shunguhuan, tucui shunguhuanmi mañana capangui. Chaimi Jehová Diosca quiquin nalita rurashcataca perdonanga. Shinallami alita rurashpa catichunbash ayudanga. Shuj uchilla huahuagu llaqui apajushpa paipa taitata  ayudachun mañanajunshnami quiquingunapash Jehovataca mañana capanguichi. Mashna viajeta mañana cajpipash Jehová Diostaca mañashpa catinallami capanguichi. Shina mañajpica Jehová Diosca quiquinda ayudashpami ashtaca bendiciongunata cunga. Paica shuj juyaj Taita Diosmi can” nircami.  *

15, 16. Punda causaipi nalicunata rurashcata Jehová Dios yachashpapash paicunata juyashpa catishcata yachanaca ¿imashinata chai huauquipanicunataca ayudashca?

¹⁵ Ashtaca huauquipanicunaca punda causaipi nalicunata rurashcata Jehová Dios yachashpapash paicunata juyashpa catishcata yachanami cushilla, tranquilo sintirichun ayudashca. Por ejemplo huaquin huatacuna huashamanga shuj huauquiguca “Bibliami gentecunapa causaita cambiashca” nishca partepimi shuj experienciata liirca. Chaipica shuj panigu paipa punda causaipi nalicunata rurashcata yarishpami llaquilla sintirishpa Jehová Diosca ñucataca na juyahuanllu nishpa pensarin carca. Chai paniguca ashtaca huatacunata ña bautizarishca cajpipashmi chai pensamientocunaca llaquichin carca. Shinapash ama shina sintirichunga ¿imata ayudarca? Jesús paimanda huañushcata yarinami ama culparishpa causachun ayudarca. *

¹⁶ Cai experienciata liinaca ¿imashinata chai huauquitaca ayudarca? Paica: “Joven cai horasca telepi o peliculacunapi lluchulla nalicunata ruranajujta ricunatami ninanda gushtan carcani. Shinapash chai viciota ricunataca saqui usharcanimi. Pero cai punllacunapillami cutin ricujushcani. Chaimi ancianocuna ayudachun mañarcani. Paicuna ayudajpimi ñana ricujushcani. Ancianocunaca ayudashunmi, na canlla canguichu, Jehová Diospash quiquindaca llaquinmi, juyanmi nihuashcami. Shina nijpipash Jehovapa ñaupajpica nimapa na sirvij cuendami sintirini. Jehová Diosca ñucataca na juyahuanllu yanimi” nircami. Chai panigupa experienciami cai huauquitaca ayudarca. Huauquica ninmi: “Jehová Diosca ñucataca na perdonahuangachu nijunaca, Jesús ñucanchipa juchacunamanda huañushcataca na sirvichijuj cuendami ninajunchiman. Chaimi ama ñucamandallata culparijungapaj chai panigupa experienciata yaringapaj chai revistamanda chai hojata llujchishpa cutin cutin liishpa, liishcapi pensaripani” nircami.

17. Apóstol Pablotaca paipa punda causaita yarishpa ama culparishpa causachunga ¿imata ayudarca?

 ¹⁷ Cashna experienciacunami apóstol Pablopi pensarichun ayudan. Paica Jesusta nara ali catij tucushpaca ninan nali cosascunatami rurashca carca. Paica punda causaipi nalicunata rurashcata yarishpapash punlla entero chaitallata chaitallata pensarishpaca na causajunllu carca (1 Tim. 1:12-15). Apóstol Pabloca Jehová Dios paipa churi Jesusta juchacunamanda huañuchun cachamushcatami yarishpa causan carca (Gál. 2:20, NM ). Chaita pensarinami ama paillata culparishpa causachun ayudarca. Shinami apóstol Pabloca Jehová Diosta ashtahuan ali sirvingapaj ninanda esforzarirca.

18. Caipica ¿imatata yachajupashcanchi?

¹⁸ Caipica ¿imatata yachajupashcanchi? Primero, ñucanchicuna imagutapash yarichunga Jehová Diosllatami carashca. Pero cunanbi ali causanajushpapash, shamuj punllacunapi paraíso alpagupi causanaca ashtahuan alimi canga. Segundo, pipash ñucanchita imatapash nishpa o rurashpami nali sintichita ushan. Shinaca ama paicunahuan risintirishca parangapami uchalla perdonana capanchi. Shinallami Jehovatapash cushilla sirvita ushashun. Tercero, ñucanchicuna joven cai horas nalicunata rurashcata yarishpa yapata culparishpaca, Jehovata cushilla sirvinatapash na ushashunllu. Shinaca ñucanchicunapash apóstol Pablo cuendami Jehová Dios perdonashcataca tucui shunguhuan crina capanchi.

19. Paraíso alpagupica ¿imatata ñana yaripashun?

¹⁹ Jehová Diosmi Paraíso alpaguta carasha nin. Chaipi causanajushpaca pipash na huañushpami causanajunga. Chaipica nipipash punda causaita yarishpaca ñana llaquiyangachu. Paraisopi ña causanajushpaca ‘punda ima tucushcataca cungaitami’ cungashun (Is. 65:17). Huaquin huauquipanicunaca ashtaca huatacunatami Jehovata sirvinajun. Paicunamandaca huaquingunaca ñami mayorllagucuna can. Cunanga caipi pensaripaichi, Paraisopi cashpaca cutinmi jovenguna capanguichi (Job 33:25). Shinaca pundacuna nalicunata rurashcata yarishpaca ama causapashunchichu. Chaipa randica shamuj punllacunapi Paraíso alpagupi causanata yaria causapashunchi.